Unong ed salaysay nen Olivier Randriamora

“Amtak no panon so manbilay ed dagdaiset, amtak no panon so manbilay ed dakdakel. Naaralan ko lay sekreto na pagmaliw a kontento ed amin a bengatla tan diad amin a kipapasen, balanglan napsel odino narasan . . . Ta diad amin a bengatla et ombibiskeg ak diad panamegley na samay mangiiter ed siak na pakayari.”​—Fil. 4:12, 13.

ABAYAG lan mamapabiskeg ed sikami nen Oly, say asawak, irayan salita nen apostol Pablo. Singa si Pablo, naaralan mi met so “sekreto,” diad sigpot ya impanmatalek mid si Jehova legan min manlilingkor ed Sikato dia ed Madagascar.

Nen ginmapon iyaralan na Saray Tasi nen Jehova so nanay nen Oly nen 1982, wala lay tongtongan min mankasal nen Oly. Inawat ko met so panangiyaral na Biblia, tan diad saginonor et akila met si Oly. Nankasal kami nen 1983, abautismoan nen 1985, tan kayari na satan et nan-auxiliary payunir kamin tampol. Nen Hulyo 1986, nagmaliw kamin regular payunir.

Nen Setyembre 1987, ginmapo kamin manlingkor bilang espisyal payunir. Say inmunan asainmin mi et diad melag a baley ya anggapo ni kongregasyon, diad bandad amianen-sagur na Madagascar. Walay 18 manunan etnikon grupo tan amayamay ya tribu ed Madagascar, tan baleg so pandurumaan na saray kustombre tan tradisyon da. Say opisyal ya lenguahe et Malagasy, balet wala ni ray arum ya nanduruman salita. Kanian inaral mi so lenguahen uusaren ed balon asainmin mi, tan akatulong itan pian mas naawat kamid satan ya lugar.

Nen unaan, kada Simba et siak so manpaliwawa, tan kayari to et kapilitan ya ontipak si Oly. Sikamin dua labat so onaatendi. Gagawaen mi met so interon programa na Teokratikon Eskuelaan Parad Ministeryo, ya kunwari et walay householder nen Oly. Akainawa kamin maong nen imbagay manangasikaso na sirkito ya sarag min umanen na daiset iray aral!

Lapud no maminsan et ag-onsasabi iray sulat, agmi nanaawat ya regular so allowance mi. Kanian naaralan mi no panon so manbilay ed dagdaiset. Aminsan, kulang so kuarta mi ya ipasahed bus pian makaatendid sirkiton asemblea, ya manga 130 kilometro so kaarawi to. Anonotan mi ’may maong ya simbawa na sakey ya agi: “Ibaga yod si Jehova iray problema yo. Tutal, kimey to ’tay gagawaen yo.” Kanian nampikasi kami tan nandesidi kamin manakar paonlad asemblea. Balet antis kamin makaalis, walay agi ya agmi iilaloan et binmisitad sikami tan inikdan to kami kuarta​—eksakto labat ya pamasahe mid bus!

PANAGLINGKOR ED SIRKITO

Nen Pebrero 1991, niasain ak bilang manangasikaso na sirkito. Diad saman, say melag a grupo mi  et nagmaliw lan 9 a manangipalapag, 3 ed saratan so abautismoan la, tan kaslakan et walay manga 50 ya onaatendid aral. Kayari impangipasal dad siak, nanlingkor kamid sakey a sirkito diad kabiseran syudad, say Antananarivo. Nen 1993, niasain kami lamet ed sakey a sirkito diad bandad bukig na bansa. Baleg so pandumaan na panagbilay diman tan diad syudad.

Pian makasabi kamid saray kongregasyon tan saray grupo ed nisulinek iran pasen, manaakar kami, no maminsan et anggad 145 kilometro diad saray katakelan. Agkami mangaawit na dakel. Balet siempre, mas ambelat so awit mi kada no say paliwawa na manangasikaso na sirkito et walay katekep ton slide show, ta wala ray onman nensaman. Si Oly so mangaawit na projector, siak balet so mangaawit ed 12-volt ya battery na kotse.

Mabetbet ya manga 40 kilometro kada agew so akaren mi pian makasabid onsublay ya kongregasyon. Ontatatdang kamid kapalandeyan, ombabaliw ed saray ilog, tan ondadalan ed mapitepitek iran dalan. Wala ray panaon ya onuugip kamid abay na karsada, balet mabetbet ya manaanap kami baryo ya naugipan mi no labi. No maminsan ingen miuugip kamid totoon agmi kabat. No akalmo kami lay ugipan mi, manluto kami lay kanen mi. Ombayes si Oly na kaldero tan onlad sankaasinggeran ya ilog pian onasol. Siak balet et ombayes na wasay pian pambelang na itungo. Mankaukolan iraya na dakel a panaon. No maminsan mangaliw kami mabilay ya manok, ya pakgeran tan linisan mi ni.

Kayari min mangan, manasol kami lamet na panames. No maminsan diad kusina so uugipan mi. No onuuran tan mantedter so atep, no maminsan et onugip kamin akasaral ed dingding pian agkami nabasa.

Seseguroen min naynay ya napulongan iray akan-abung. No makasabi kami lad abung na agagi, agaylay kamaongan tan panamarawes da. Lapud ipapanengneng dan panangapresya ed imbisita mi, baliwala iray irap mi ed dalan.

No mipupundo kamid abung na agagi, maliket kamin mangiibad sikara ed saray trabahod abung. Kanian walay panaon dan milad sikami ya manpulong. Agkami nanilalo ya ikdan kami na agagi na luho odino espisyal iran panangan ya agda nasarag.

IMBISITAD SARAY GRUPO ED NISULINEK A PASEN

Na-enjoy mi ray imbisita mid saray grupo ed nisulinek a pasen. Kakkasabi mi ni labat, wala lay imparaan na agagin eskedyul ya napnapnoy aktibidad. Ngalngali anggapoy panaon pian ‘makapanpainawan magano.’ (Mar. 6:31) Diad sakey ya pasen, inimbitaan na sanasawan Tasi so amin ya iyaaralan day Biblia​—40 ya amin​—ed abung da pian nakaiba da kamin mangiyaral ed sikara. Inibaan nen Oly imay sister ya iyaralan so 20 o masulok ni, tan inibaan ko balet imay brother ed saramay arum nin 20. Kaalis na sakey, onggapon tampol ‘may onsublay. Diad bandad ngarem, tinmunda kami pian miaral, kayari to et intuloy mi lamet iray panangiyaral. Nasusumpal so onia ran inka-busy ya agew ed manga pasado alas otso la na labi!

Diad sananey a grupo ya binisita mi, amin kami et inmalis paonlad kaabay a baley ed manga alas otso na kabuasan. Say insulong min paonla et daan  iran kawes. Kayari andukey ya impanakar ed katakelan, akasabi kamid teritorya ed bandad kaagwan. Nampales kami malinis ya kawes tan inggapo min tampol so manpulong ed kaabungan. Dagdaiset so abung balet dakel so manangipalapag. Kanian manga 30 minuto labat et asumpal min tampol so teritorya. Insan tinmuloy kami ed onsublay ya baley. Kayari min nampulong diman, nanakar kami lamet na andukdukey a pasempet. Nen unaan, nadidismaya kami ta dakel ya panaon so nausar min onlad teritorya, balet manga sakey oras kami labat ya nampulong. Anggaman ontan, agnanreklamo iraman ya agagi. Malikeliket ni ran siansia.

Say sakey a grupo ed Taviranambo et asingger ed toktok na palandey. Diman et walay sakey a pamilya na Tasi ya manaayam ed melag ya abung. Tan walay asingger ditan ya panaaralan da. Biglan inmeyag so agin akan-abung ed pampupundoan mi, “Agagi!” Walay inmebat ya boses manlalapud toktok na kaabay a palandey, “E!” Inmeyag lamet so agi, “Wadia lay C.O.!” Wala lamet so inmebat, “On!” Mapatnag ya impasa-pasa da itan a mensahe ed saray manaayam ed mas arawi. Nagugunoyan, mansasabian la ray totoo tan nen ginmapo lay aral, masulok lan 100 so wadman.

SARAY IRAP ED PANAGBIAHE

Nen 1996, niasain kami ed sakey a sirkito ya asingger ed Antananarivo. Duma met iray kairapan ya naeksperiensya mi diman. Anggapoy regular ya biahe na saray pampasaheron luganan diad saray pasen ya arawrawid baley. Aka-eskedyul ya bisitaen mi so grupo ed Beankàna (Besakay), manga 240 kilometro manlapud Antananarivo. Kinatongtong mi so drayber na sakey a melag a truck ya ombiahen mamaarap diman, insan kami linmugan. Walay manga 30 nin pasahero, say arum et akarukol ed toktok tan wala ray akabitin ed beneg na truck.

Singa mabetbet lan nagawa, aderal so truck, kanian nanakar kami la. Kayari pigay oras ya makapakesaw ya impanakar mi, walay sinmabin baleg ya truck. Napno lay totoo tan amayamay so karga to, balet tinundaan to kami nin siansia. Linmugan kami anggano amta min alageyan la. Akasabi kamid sakey ya ilog, balet ta aapigeren day taytay. Kanian nanakar kami lamet anggad akasabi kami ed melag ya baryo a wala ray manaayam ya espisyal payunir. Anggano aliwan eskedyul na bisita, nampulong kamin kaiba ra legan min aalagaren ya naapiger so taytay tan walay ondalan ya arum a naluganan.

 Sakey simba ni linmabas antis ya walay dinmalan ya luganan, tan intuloy mi panbiabiahe mi. Nikutkutlaong so dalan. Mabetbet kamin ontulong ya mantulak ed luganan, diad danum ya anggad pueg, tan natuttumba kami ni. Kabuasan la nen akasabi kamid melag a baryo, a diman kami inmepas. Aliwa lan karsada so dinalan mi, nanakar kamid alog ya tatanemay pagey, anggad balambang so danum ya mapitek.

Sankaunaan mi itan ya imbisita ed saman a lugar, kanian nandesidi kamin pulongan iray mankikimey ed alog, tan pian makapantepet kami met no panon kamin makasabid abung na saray Tasi diman. Malikeliket kami nen naamtaan min saraman manayay mankikimey et agagi mid espiritual!

PANAMASESEG ED ARUM YA MANLINGKOR A SIGPOT PANAON

Diad inlabas na saray taon, naliliketan kamin nanengneng iray resulta na panamaseseg ed arum ya manlingkor a sigpot panaon. Walay sakey a kongregasyon ya siamera so regular payunir. Pinaseseg mi irayan payunir ya kada sakey ed sikara et mamaseseg na sakey a manangipalapag ya manpayunir. Diad sinmublay ya imbisita mi kayari anem bulan, say bilang na regular payunir da et 22 lan tampol. Pinaseseg na duaran payunir a sister iray tatay da, a parehon elder, ya manpayunir. Tan pinaseseg na sarayan elder so sakey nin elder a manpayunir met. Sinmabi panaon, sayan komatlon elder et nagmaliw ya espisyal payunir. Insan niasain kaibay asawa to a mangasikasoy sirkito. Saramay duaran elder ey? Samay sakey et manlilingkor natan bilang manangasikaso na sirkito tan samay sakey et Kingdom Hall construction volunteer.

Inagew-agew kamin misalsalamat ed si Jehova lapud tulong to, amta min agmi nagawaan iraya diad sarilin biskeg mi. No maminsan et nakekesawan tan mansasakit kami met, balet maliket kami no iisipen mi ray resulta na panlilingkor mi. Bebendisyonan nen Jehova so kimey to. Maliket kami ya walay melag ya pibibiang mi ed satan, a natan et manlilingkor kami la bilang espisyal payunir. On, naaralan mi so “sekreto” diad impanmatalek mid si Jehova, ‘samay mangiiter na pakayari’ ed sikami.

[Blurb ed pahina 6]

Naaralan mi so “sekreto” diad impanmatalek mid si Jehova

[Mapa/Saray litrato ed pahina 4]

Say Madagascar, a tatawagen met ya Big Red Island, so komapat a sankabalegan ya isla ed interon mundo. Ambalanga so dalin diman tan dakel iray klase na ayep tan tanaman ya diman labat nanengneng

[Litrato ed pahina 5]

Say panagbiahe so sakey ed saray sankairapan ya naeksperiensya mi

[Saray litrato ed pahina 5]

Panliliketan mi mibiang ed panangiyaral na Biblia