Kawënin

Jehoväta sirwiyanqächömi “imano bida pasana cashqanta” yachakuyarqö

Olivier Randriamora willakunqan

“Musyämi wactsa bida paseta y imecapis janancho bida paseta. Yachacushqam cä ima eca captinpis, imano bida pasana cashqanta, öra pacha junta öra mallaqpis [...]. Imecapaqpis listum quecä, puedeq Jesucristu callpanwan yanapamaptin.” (Fili. 4:12, 13.)

PABLU kënö qellqanqanqa, Madagascar islachö Diospita yachatsikur kayanqäpita patsëmi, noqata y warmï Olyta alläpa yanapayämashqa. Tsë apóstol ruranqannöllam noqakunapis Jehoväman llapan shonqökunawan markäkurnin o yärakurnin ima kaptimpis “imano bida pasana cashqanta” yachakuyarqö.

1982 watam Olypa mamäninqa Jehoväpa testïgonkunawan Bibliapita yachakur qallëkurqan. Jina noqapis Olywan novio këkarmi Bibliapita yachakur qallëkurqä, pëqa tsëpitaran qallarqan. 1983 watam casakuyarqä, 1985 watachönam bautizakuyarqä y precursor auxiliar tikrariyarqä. 1986 watapa julio killanchönam precursor regularnö yanapakur qallëkuyarqä.

1987 watapa septiembre killanchönam precursor especial tikrariyarqä y tsë islapa noroeste kaq lädompa këkaq ichikllan markamanmi mandayämarqan, tsëchöqa manam ima congregacionpis karqantsu. Madagascarchöqa chunka puwaq kastakunam más precisaq kayan, tsëkunapaqa kikinkunapa costumbrenkuna y idiömankunam kayäpun, jina jukläya costumbreyoq tukï kasta grüpokunapis atskam kayan. Tsë nacionchöqa, malgache idiömatam más parlayan, tsënö kaptimpis tsë idioma igualaqtanöllam mëtsika idiömakunata parlayan. Mandayämanqan markaman chärirqa, tsëchö parlayanqan idiömatam yachakur qallëkuyarqä, tsënöpam nunakuna más wiyayämarqan.

Puntataqa llapan domingokunam discursota ruraq kä, ushariptïnam warmïqa sinchipa noqapaq paqchimoq o taqllamoq... ¡Pëllam reunionchö këkaq! Jina Yachatsikunapaq Diospa Escuëlantapis llapantam rurayaq kayä, Olym jukwan parlëkaqnö japallanlla demostracionkunata ruramoq. Pero kushikïnïkunapaqqa, congregacionkunata watukaq wawqin juknöpana reunionkunata rurayänäpaq niyämarqan. ¡Imanö allim tsëqa karqan!

Cartata chätsimoqkunaqa manam markäkïpaqtsu kayaq, tsënö kaptinmi cada killachö gastökunapaq qellëta chaskiyaqtsu kayä. Pero wallkallawan kawëtam yachakuyarqä. Juk kutichömi, ishkë junaq kaq asamblea kanan markaman chäyänäpaq 130 kilömetrosta ëwayänä karqan, y qellënïkunaqa manam tinkurqantsu cärrowan ëwayänäpaq. Tsënam yarpäriyarqä juk testigo kënö consejayämanqanta: “Ima problëmayoqpis karqa Jehoväta willayë. Rasun kaqchöqa, pëpa munënintam rurëkäyanki”.  Tsëmi Diosta mañakurir chakipa ëwayänäpaq churapakäriyarqä. Pero yarquyänäpaqna këkäyaptïmi, illaqpita juk wawqi watukayämaqnï chäramurqan y qellëta qarayämarqan, ¡pasajëkuna rantiyänäpaq tinkum kanaq!

CONGREGACIONKUNATA WATUKARNIN YANAPAKUYÄ

1991 watapa febrero killanchömi congregacionkunata watukar yanapakunäpaq niyämarqan. Tsë witsampaqqa, wallkalla grupökunachöqa isqunmi publicadorkuna kayaq, pëkunapitaqa kimaqmi bautizakushqana kayarqan, jina reunionkunachöqa juntakäyaq kayä pitsqa chunkanömi. Imanö watukakunäpaq kaqta yacharatsiyämarnïmi, mandayämarqan Antananarivo jutiyoq reqishqa markaman. 1993 watapaqnam, watukakunäpaq mandayämarqan tsë nacionpa oriente kaq lädonman. Tsëchö kawëqa manam jatun markachö kawënötsu karqan.

Tsëchö congregacionkunata y käruchö këkaq grüpokunata watukayänäpaqqa, selva rurimpam hasta 145 kilömetrosta chakipa ëwayaq kayä. Tsë witsankunachöqa hora höraqa Discursopita Yachakunapaq reunionchömi diapositïvakunata rikäna kaq, tsënö kaptinqa, Olym tsë proyector nishqanta apaq y noqanam cärropa 12 voltios kaq baterïanta apaq kä, pero mana rikäna kaptinqa necesitäyanqällatam apayaq kayä.

Juk congregacionpita juk congregacionman ëwarqa, cada junaqmi 40 kilömetrostanö selva jirkakunapa y mayukunata tsimpar lutska nänikunapa ëwayaq kayä. Imëpis amänu markakunachömi posädata ashiyaq kayä, tsënö kaptimpis höraqa nänikunapa kuchunchömi punuyarqä. Juk kutikunachöqa, mana imëpis reqiyanqä nunakunatam posadatsiyämänampaq mañakuyaq kayä. Posädata taririrnam cënata rurar qallëkuyaq kayä. Mankata mañakurirmi, Olyqa mayuta o amänun qochata yaku asheq ëwaq, y noqanam hächata mañakurir cocinayänäpaq yamtata tseqtaq kä. Llapampis tiempopaqmi kaq. Hora höraqa wallpatam rantiyaq kayä y kikïkunam wanuratsir awiyaq kayä.

Mikur usharirnam yakuta ashirirnin bañakurïkur punuriyaq kayä. Masqa cocïnallachömi posadatsiyämaq. Tamyaptinqa, janäkunaman mana shutumunampaqmi perqachö kinkisharëkar punuyaq kayä.

Posadatsiyämaqnïkunatam imëpis Diospita yachatsita procurayaq kayä. Ëwayanqä markaman chäriyaptïqa, wawqikuna y panikunaqa alläpa kuyëpam y tukïta qoyämarnïmi o qopäkamarmi chaskiyämaq. Watukayanqäpita alläpa agradecikoqta rikarmi, chäyänäpaq tukïta pasayanqäkunata qonqariyaq kayä.

Testigo familiachö posadakurqa, wayichö rurapakïkunawanmi yanapakuyaq kayä. Tsëmi Diospita yachatsikoq yarquyänampaq más tiempota tariyaq. Posadatsiyämaqnïkuna qoyämëta mana puëdeyanqankunataqa manam shuyaräyaqtsu kayä.

KARU GRÜPOKUNATA WATUKAYÄ

Karuchö këkaq grüpokunata watukëqa kushikïpaqmi. Tsëchö wawqikuna y panikunaqa chipyëpam shuyaräyämaq tukïchö yanapayänäpaq, tsëmi jamayänäpaq ichiklla tiempökuna kaq (Mar. 6:31). Juk grüpochömi, warmi ollqu testïgokuna chusku chunka pëkunawan Bibliapita yachakïkaqkunata wayinkunaman invitashqa kayarqan noqakunawan Bibliapita yachatsiyänäpaq. Olyqa ishkë chunkatanömi  Bibliapita yachakïkaqkunata paniwan yachatsiyarqan, y noqanam wawqiwan wakin kaqkunata. Jukwan usharirllanam jukwan qallëkuyaq kayä. Reunionta rurayänä kaptinmi yachatsita dejariyarqä y ushariptinnam yachatsikurnin siguiyarqä. Paqas hörakunayaqmi tsënö kayarqä.

Karuchö këkaq juk grüpota watukarnam, llapan publicadorkunawan amänun markaman Diospita yachatsikoq ëwayarqä. 8 de la mañänanömi yarquyarqä. Selva rurimpa ëwayänä kaptinmi makwa o qarwakashqa röpata vestikuyarqä. Pullan junaqnö tsë markaman chärirmi, limpio röpakunata vestikurir wayin wayin yachatsikur qallëkuyarqä. Tsë marka ichikllanlla kaptinmi atskaq karnin pullan hörallachö yachatsikur ushariyarqä. Tsëpitanam qateqnin kaq markaman ëwayarqä y yachatsikurirnam alläpa karuta kutikuyarqä o kutipäkamurqä. Rasumpa kaqchöqa, Diospita tsënö yachatsikïqa qallananchö qelanäratsiyämarqanmi, juk hora yachatsikuyänällapaqmi atska tiempo ëwayaq kayä. Tsënö kaptimpis wawqikuna y panikunaqa manam imapitapis quejakuyaqtsu ni llakikuyaqtsu.

Taviranambo nishqanchömi jirka jananchö watukanäpaq juk karu grupo karqan. Chärirmi, tariyarqä juk cuartoyoqlla wayichö juk Testigo familia täraqta. Y tsë wayi lädonchönam reunionta rurayänampaq juk ichikllan wayi karqan. Illaqpitam posadatsiyämaq wawqi kënö qayakurirqan: “¡Wawqikuna!”. Juk kaq amänu jirkapitanam kënö contestamorqan: “¡Jäy!”. Posadatsiyämaqnïmi yapë kënö nirqan: “¡Congregacionta watukaq wawqim chämushqa!”. Y juk kaqnam kënö contestarqan: “¡Allim tsëqa!”. Quizaschi tsënölla más karuchö kaqkunatapis musyatsiyarqan, tsëchi ichikpa ichikllapa chämur qallëkuyarqan. Reunión qallanampaqnam pachaknö nunakuna chämushqa kayarqan.

VIÄJECHÖ TUKÏTA PASAYANQÄ

1996 watam Antananarivo markapa más amänunchö congregacionkunata watukayänäpaq mandayämarqan, tsëchöpis tukïtam pasayarqä. Juk kutichömi Beankàna (Besakay) markachö juk grüpota watukayänä karqan, tsëqa Antananarivopita 240 kilömetroschömi këkarqan, pero tsëmanqa hora hörallam carro ëwaq. Tsë markata juk ichikllan camión ëwanampaq kaqtam musyariyarqä, tsëmi choferwan parlarir cärroman yëkuriyarqä. Tsëchöqa 30 pasajërokunam këkäyarqan, wakinkunam carro jananchö latarëkäyarqan y wakinkunanam hasta cärropa qepampitapis tsaripakushqa këkäyarqan.

Atska kutim camionqa ëwayanqächö malograkarqan, tsëmi pullan nänitaqa chakipa atska hörakuna ëwayarqä, tsënö ëwëkäyaptïmi juk jatun camión taripärayämarqan. Atska nunayoq o runayoq y tukïwan cargashqa këkarpis choferqa päramurqanmi y shëkar ëwayänä këkaptimpis  yëkuriyarqämi. Tsënöpam juk mayuman chäriyarqä, pero tsakatam altsëkäyarqan, tsëmi chakipa yapë ëwar qallëkuyarqä. Imëkanöpapis precursor especialkuna täräyanqan markamanmi chäriyarqä. Pëkunata mana watukayänä këkaptimpis, tsakata altsayanqanyaq y juk carro yurimunqanyaqmi pëkunawan Diospita yachatsikur kayarqä.

Juk semana pasariptinran juk carro chäramuptin viajar siguiyarqä. Carretera mëtsika uchkuyoq kaptinmi, cärrota kumayänäpaq atska kuti yarpuyarqä qonqükunayaq o qonqurnïkunayaq yaku këkaptimpis. ¡Atska kutim ishkiyarqä! Patsa warëkaptinnam juk markaman chäriyarqä y tsëchömi yarpuriyarqä. Carretërapita yaqarirmi chäyänä markayaq arroz murushqa chowpin nänikunapa tseqlläkunayaq yaku këkaptimpis ëwayarqä.

Tsë markachö noqakuna imëpis mana kashqa karmi, tsëchö täraqkunata Diospita yachatsiyarqä y Testïgokunapa wayinkunaman imanö chäyänäpaq kaqta tapuyarqä. ¡Kikinkunam cristiano mayïkuna kayänaq!

PRECURSOR KAYÄNAMPAQ YANAPAKUYÄ

Kë llapan watakunaqa precursor kayänampaq yanapakuyanqäpita mirayanqanta rikarmi alläpa kushikuyä. Juk congregacionchömi isqun precursor regularkunata niyarqä, cada uno juk publicadorta precursor regular kanampaq parlapäyänampaq. Joqta killata kutiriyänäpaqqa ishkë chunka ishkënam precursor regularkuna kayänaq. Ishkaq precursörakunam congregacionchö anciänonö yanapakoq teytankunata precursor kayänampaq awnitsiyänaq. Jina tsë ishkan anciänokunanam congregacionchö juknin kaq anciänotapis precursor kanampaq awnitsiyänaq. Tsëpita ichik tiempollatanam tsë wawqita precursor especialnö yanapakunampaq niyarqan, y tsëpitaqa congregacionkunata warminwan watukar puriyänampaqmi niyarqan. Y ¿punta kaq ishkë anciänokunaqa imachötaq yanapakuyan? Juk kaqqa congregacionkunata watukaqmi, y jukninnam Yachatsikuyänan Wayikunata rurarnin yanapakun.

Jehoväta agradecikïtaqa manam juk junaqllapis qonqariyätsu, mana yanapayämashqa kaptinqa manam tsë llapanta rurayämantsu karqan. Awmi, höraqa utiyämi o qeshyayämi, pero Diospita yachatsikurnin imëkata rurayanqäman yarparmi, alläpa kushikuyä. Clärom këkan kikin Jehová rurëninchö yanapakunqanqa, y alläpam kushikuyä llapan puëdeyanqämampa tsë rurëchö kanan witsankuna precursor especialnö yanapakuyanqäpita. Awmi, Jehoväman markäkurmi ima kaptimpis “imano bida pasana cashqanta” yachakuyarqö.

[6 kaq päginachö fötu]

Jehoväman markäkurmi ima kaptimpis “imano bida pasana cashqanta” yachakuyarqö

[4 kaq päginachö fötukuna y mäpa]

Madagascartaqa allpan puka kaptinmi, Puka Jatun Isla nishpapis reqiyan. Patsachö chusku kaq más jatun islam y tsëchöqa juk lädokunachö mana kanqan animalkuna y plantakunam kan

[5 kaq päginachö fötu]

Bibliapita yachatsikïqa alläpam gustayäman

[5 kaq päginachö fötukuna]

Viäjechöqa tukïtam pasayarqä