Kaytam willakun Olivier Randriamora

“Yachanim wakcha kayta chaynataq llapa imayoq kaytapas. Contentakunitaqmi saksasqa kaspaypas otaq yarqaymanta kaspaypas [. . .]. Tukuy imataqa rurani [Dios] kallpanchawaptillanmi” (Fili. 4:12, 13).

APOSTOL Pablopa kayna nisqankunam kallpanchawarqaku ñoqata chaynataq Oly señoraytapas, Madagascar islapi Diosmanta willakunaykupaq. Pablo hinam, ñoqaykupas ‘yacharurqaniku’ kusisqa kanapaqqa Diospi hapipakuymanta kasqanta.

1982 watapim, Oly señoraypa mamanqa Jehová Diospa testigonkunawan Biblia estudiayta qallaykurqa. Hina chay watallam ñoqapas qallaykurqani, chaymantañataqmi Olypas qallaykurqa, paywanqa ñam casarakunaykupaqña kachkarqaniku. Chaymi 1983 kaq watapi casarakurqaniku, bautizakurqanikuñataqmi 1985 kaq watapi hinaspam precursor auxiliar karqaniku. 1986 kaq watapa julio killanpiñataqmi precursor regular karqaniku.

1987 watapa septiembre killanpim precursor especial kanaykupaq niwarqaku hinaspam islapa huk lawninman rinaykupaq kamachiwarqaku, chaypiqa manam congregacionqa karqachu. Madagascar nacionpiqa kanmi 18 casta runankuna, paykunaqa manam chaynallachu kanku costumbrenkupiqa. Chay lawpi runakunaqa malgache nisqa rimaytam astawan rimanku, ichaqa kantaqmi achka rimaykunapas. Kamachiwasqanku llaqtaman chayaruspaykuqa, qallaykurqanikum chaypi runakunapa rimayninta yachayta, chaymi achka runakuna astawan uyariwaqku.

Qallariypiqa sapa domingo punchawtam lliw runakunapaq huk yachachikuymanta rimarqani, hinaptinmi tukuruptiy señorallay taqllakuq. ¡Payllamá huñunakuypiqa karqa! Rurarqanikutaqmi Diosmanta Yachachinapaq Escuelatapas, hinaptinmi señoray Oly demostracionkunata ruraq piwanpas parlachkanman hina. Ichaqa, congregacionkuna watukuq ancianom niwarqaku manaña chaynata ruranaykupaq. ¡Allinmá chayqa karqa!

Cartakunata apamuqkunaqa manam tiempollanpichu chayachimuqku, chaymi wakinpiqa qollqeykutaqa mana sapa killachu chaskiq karqaniku. Hinaptinmi kapuqllaykuwan kawsarqaniku. Huk kutipim iskay punchaw asambleaykuman rinaykupaq 130 kilometrota rinayku karqa, ichaqa qollqeykum mana haypawarqakuchu carrowan rinaykupaq. Chaymi yuyarirqaniku huk iñiqmasiykupa niwasqankuta, nirqam: “Sasachakuynikichik kaptinqa Jehová Diosman willakuychik. Paypa munaynintamá rurachkankichik”, nispa. Hinaspam Diosta mañakuspayku chakiwan rinaykupaq tantearurqaniku. Ichaqa lloqsinaykupaq kachkaptiykum, huk iñiqmasiyku watukamuwarqaku hinaspam  qollqeta qoykuwarqaku, chay qollqeqa carrowan rinaykupaqmi haypawarqaku.

CONGREGACIONKUNATA WATUKUSQAYKU

1991 watapa febrero killanpim congregacionkunata watukunaykupaq niwarqaku. Chay watapaqqa servisqayku lawpim isqon runakunaña Diosmanta willakurqaku, kimsañataqmi bautizasqaña karqaku. Huñunakuykunata ruraptiykuñataqmi pichqa chunka runakuna hamuqku. Ichaqa congregacionkunata watukunaykupaq astawan yachachisqa kaptiykum, kamachiwarqaku Antananarivo llaqtaman rinaykupaq. 1993 kaq watapiñataqmi kamachiwarqaku huklawman rinaykupaq. Chay llaqtaqa manam ñawpaqpi yachasqayku llaqta hinachu karqa.

Congregacionkunata watukunaykupaqqa, rinaykum karqa 145 kilometrota monte ñanninkunata. Chaymi necesitasqallaykuta apaq kaniku. Ichaqa yachachinaypaq televisionpi hina qawanaykupaq kaptinqa, Oly señoraymi huk aparatota apaq, ñoqañataqmi carropa baterianta.

Huk congregacionmanta huklaw congregacionkamaqa, 40 kilometrotam huk punchawpi riq kaniku monte ñanninkunata, mayukunata chinpaspa hinaspa mituntakamapas. Wakin kutipiqa ñanpa patankunapim puñuq kaniku, wakinpiñataqmi samapakunaykupaq wasikunata maskaq kaniku. Chaymantapas mana reqsisqayku runakunatam nirqaniku samachiwanankupaq. Samapakunaykupaq wasita tariruspaqa yanukunaykum karqa. Señorayqa mankata prestakuspanmi yakuman riq, ñoqañataqmi yantata cheqtaq kani. Wakinpiqa wallpata rantimuspaykum kikiyku wañuchispa yanukuq kaniku.

Mikuyta tukuruspaykuñataqmi, bañakuq kaniku hinaspa cocinapi puñuq kaniku. Paramuptinñataqmi wasita perqanpi qemikuykuspayku puñuq kaniku.

Samachiwaqniyku runakunamanqa Diosmantam willaq kaniku. May risqaykuman chayaruptiykuqa, iñiqmasiykunam ancha kuyakuywan samachiwaqku. Watukusqaykumanta kusisqa kaptinkum, ñanpi sasachakusqaykutapas qonqaq kaniku.

Iñiqmasiykupa wasinpi samapakuspaykuqa, imapas rurayninkupim gustawaqku yanapayta. Chaymi tiempochakuyta atirqaku ñoqaykuwan predicaq lloqsinankupaq. Manam haykapipas suyarqanikuchu ancha chaninniyoq mikuyta qowanankutaqa, paykunaqa manamá haypakuqkuchu.

KARUNEQPI YACHAQ IÑIQKUNATA WATUKUSPAYKU

Kusikunapaqmi karqa karuneqpi yachaq iñiqmasiykupa kasqanman watukusqaykuqa. Paykunaqa achka ruranapaq kaqkunawanmi suyawaqku, samanaykupaqpas manam tiempo karqachu (Mar. 6:31). Huk kaqninpim, huk kaqnin iñiqmasinchik señoranpiwan tawa chunka runakunata wasinpi huñurusqaku Bibliata ñoqaykuwan kuska yachachinankupaq. Señoranwanmi Olyqa yaqa iskay chunka runakunata Bibliamanta yachachiqku, ñoqañataqmi qosanwan wakinta yachachirqaniku. Yaqa tukuy punchawmi sapakamata yachachirqaniku, tardentañataqmi huñunakuyta rurarqaniku, hinaspam huñunakuy tukuytapas tutakamaraq yachachirqaniku.

Huk lawman watukuspaykuñataqmi, huk llaqtachaman rirqaniku predicanaykupaq. Madrugawmi  lloqsirqaniku mawka pachayoq monte ñanninta rinaykupaq. Chayarqanikuñataqmi chawpi punchawta hinaspam pachaykuta cambiakuspayku predicayta qallaykurqaniku. Chay llaqta uchuychalla kasqanraykum ratulla tukururqaniku. Rirqanikutaqmi huk llaqtachamanpas, chaypi predicaruspaykum kutikamurqaniku. Qallariypiqa tumpatam hukmanyarurqaniku, huk horallata predicanaykupaq karu-karuta risqaykumanta. Chayna kaptinpas, iñiqmasinchikkunaqa kusisqam predicaqku.

Taviranambo sutiyoq llaqtapim orqopa hichpanpi aslla iñiqmasinchikkuna karqaku. Huk Testigopa wasinman chayaruspaykum tarirqaniku huk cuartollapi llapan familianwan yachaqta. Wasinkupa waqtanpiñataqmi kasqa taksa wasicha huñunakuykunata ruranankupaq. Hinaptinmi qonqayllamanta samachiwaqniyku iñiqmasinchik qayakuyta qallaykurqa: “¡Wawqe-panikuna!”, nispa. Orqopa chinpanmantañataqmi kutichimurqa: “¡Ima!”, nispa. Payñataqmi nirqa: “¡Congregacionkuna watukuq ancianom chayaramun!”, nispa. Hukninñataqmi kutichimurqa: “¡Allinmi!”, nispa. Yaqachusmi chaynata qayanakuspanku llapallanku willanakururqaku, hinaptinmi huñunakuyman chayayta qallaykamurqaku. Huñunakuy qallaykuptinqa yaqa pachak runakunañam karqaku.

ILLASQAYKUPI SASACHAKUYKUNA

1996 kaq watapim Antananarivo lawpi congregacionkunataña watukunaykupaq niwarqaku, chayqa karqa islapa chawpinpim. Chaypipas karqataqmi sasachakuykunaqa, huk kutipim Beankàna (Besakay) llaqtata watukunayku karqa, chayqa 240 kilometropim kachkan Antananarivo llaqtamantaqa, ichaqa manam anchachu carrokunaqa karqa. Taksa camion chay lawman risqanta yacharuspaykum, choferwan rimaruspayku carronman seqarurqaniku. Llapaykuqa kimsa chunka masninmi runakunam karqaniku, wakinkum camionpa altonpi riqku wakinkuñataqmi qepanmanta hapipakuykuspa.

Achka kutikama malograkusqanpim ñanpi qeparurqa. Hinaptinmi chakiwan achka horakunata richkaptiyku, huk hatun camion rikuriramurqa. Chay carroqa huntallañam richkasqa, ichaqa chaywanpas sayaykurqam. Chaymi hinata qespirqaniku sayanpa rinayku kaptinpas. Chaymantañataqmi mayuman chayarurqaniku, ichaqa chakatam allichachkasqaku hinaptinmi kaqmanta chakiwan rinayku karqa. Chayarqanikuñataqmi huk llaqtachapi precursor especial iñiqmasinchikkunapa kasqanman. Mana watukunaykupaq tupawaptinkupas paykunawanmi predicarqaniku chakata allichanankukama.

 Huk semana pasaytam kaqmanta huk carrowan rirqaniku. Carreterañataqmi uchku-uchkullaña karqa, chaymi achka kutikama carrota tanqanaykupaq moqoykukama yakuman yaykuq kaniku. ¡Achka kutikamam wichiq kaniku! Huk llaqtachaman tutapayta chayaruspaykum bajarurqaniku, hinaspam chakiwanña arroz plantakunapa kasqanta, weqawniykukama putka yakunta rirqaniku.

Wamaqllaraq chay llaqtachaman risqaykuraykum, chakrapi llamkaq runakunaman predicarqaniku hinaspa tapurqaniku Testigokunapa wasinman imayna chayanaykumanta. Ichaqa, ¡paykunamá iñiqmasinchikkunaqa kasqaku!

TUKUY TIEMPONKUWAN DIOSTA SERVINANKUPAQ KALLPANCHASQAYKU

Anchatam kusikuniku tarikuniku iñiqmasinchikkuna tukuy tiemponkuwan Diosta servinankupaq kallpanchaspayku. Huk congregacionpim isqon precursorkunata kallpancharqaniku, sapakama huk iñiqmasinchikta precursor kananpaq yanapanankumanta. Soqta killa pasayta kutiptiykum, iskay chunka iskayniyoqman yapakurusqaku. Iskay precursorakunam yanaparusqaku congregacionpi anciano kaq taytankuta precursor kanankupaq. Paykunañataqmi huknin ancianota. Pisi tiempollamantam kay ancianoqa precursor especial karqa, chaymantañataq señoranwan kuska congregacionkunata watukuq anciano karqa. ¿Imatam nichwan chay iskay kallpanchaq ancianokunamanta? Hukninmi karqa congregacionkuna watukuq, hukninñataqmi huñunakuna salonkunata hatarichiq.

Sapa punchawmi Diosta anchata agradecekuniku, manachá paypa yanapakuyninwanqa ima ruraytapas atiymankuchu karqa. Wakinpiqa pisipasqamá otaq onqosqamá tarikuniku, ichaqa anchatam kusikuniku runakunata yanapasqaykumanta yuyaymanaspayku. Sutillamá Diosqa llaqtanta yanapan, chaymi kusisqa tarikuniku kunan precursor especial hina yanapasqaykumanta. Arí, ‘yacharurqanikum’ haykapipas kusisqa kanaykupaq kallpata qowaqninchik Jehová Diospi hapipakunamanta kasqanta.

[6 kaq paginapi suti rikuylla kaq willakuy]

‘Yacharurqanikum’ haykapipas kusisqa kanaykupaq Jehová Diospi hapipakunamanta kasqanta

[4 kaq paginapi fotokuna hinaspa mapa]

Madagascar nacionqa, sutichakuntaqmi Puka Isla nispa puka allpayoq kasqanrayku, kayqa enteron Pachapi hatu-hatun islakunamanta tawa kaqmi, kantaqmi maypipas mana rikusqanchik sachakunawan animalkunapas

[5 kaq paginapi foto]

Illasqaykupiqa sasachakuykunam karqa

[5 kaq paginapi fotokuna]

Kusikunikum Bibliamanta runakunaman yachachispayku