Willakun Olivier Randriamora

“Yachanin wakcha kawsayta, yachallanitaqmi allin qhapaq hina kawsaytapas, imayna kawsaypiña rikukuspaypas yachasqan kani: saksasqa kaspapas, yarqasqa kaspapas [...]. Kallpachawaqniy Cristowan [“Dioswan”, NM] hukllachasqa kaspaymi tukuy imaymanata atini.” (Fili. 4:12, 13.)

MADAGASCAR islapi Diosta servisqaykupiqa Pabloq nisqanmi anchatapuni Oly esposaytawan kallpachawarqanku. Pablo hinan ñoqaykupas ‘yacharqayku’ imaynapi tarikuspapas kusisqa kanapaqqa Diosmanta hap’ipakuy kasqanta.

Olyq mamanmi 1982 watapi Testigokunawan Biblia estudiayta qallarirqan, kaqllataqmi ñoqapas, Oly parlaqmasiytaq qhepaman. 1983 watapin casarakurqayku, 1985 watapi bautizakusqayku qhepamanmi precursor auxiliar karqayku, 1986 watapi julio killapitaq precursor regular karqayku.

Setiembre killapi 1987 watapin precursor especial kanaykupaq niwarqanku, kachawarqankun Madagascar islaq huch’uy llaqtachanman, chaypiqa manan huk iñiq t’aqapas karqanchu. Chay Madagascar islapiqa 18 llaqtakuna, askha ayllukuna iman kan imaymana costumbrekunayoq. Yaqa llapankun Madagascar islapiqa malgache simita rimanku, ichaqa kanmi askha simikunapas. Predicanaykupaq llaqtachaman chayaspaqa, chaypi rimasqanku simitan yacharqayku, chhaynapin runakuna sumaqta chaskiwaqku.

Qallariypiqa iskayllaykun huñukurqayku, sapa domingonmi huk discursota qorqani, tukuqtiytaq esposallay t’aqllakuq, payllan chay huñunakuypi karqan. Chaymantapas sapa semananmi Bibliamanta Allin Yachachiq Kanapaq Escuelata apariq kayku, esposaymi demostracionkunata ruwaq iskaypas ruwashankuman hinata. ¡May allinmi karqan watukuq umalli huñunakuykunata huk niraymanta aparinaykupaq niwasqankuqa!

Yanapawanankupaq sapa killa pisilla qolqe apachimuwasqankuqa, mayninpin mana chayamuwaqkuchu. Ichaqa, pisillawan kawsaytan yacharqayku. Huk kutinmi hatun huñunakuyman rinaykupaq 130 kilometrota purinayku karqan, qolqeykuqa manan pasajeykupaq aypawarqankuchu. Hinan yuyarirqayku huk Testigoq niwasqankuta: “Ima sasachakuyniykipas kaqtinqa, Jehová Diosman willakuy, paypa munaynintan ruwashankichis riki”, nispa. Hinan Diosmanta mañakusqayku qhepaman, decidirqayku chakipi rinaykupaq. Ichaqa, pasanaykuña kashaqtinmi huk iñiqmasi watukuqniyku hamusqa, hinan qolqeta qoykuwarqanku, chayqa pasajeykupaqmi ayparqan.

 IÑIQ T’AQAKUNATA WATUKUYKU

Febrero killapi 1991 watapin iñiq t’aqakunata watukuq kanaypaq niwarqanku. Chay kutipaqqa chay llaqtacha kasqaykupiqa isqon predicaqkunañan karqan, kinsan karqanku Bautizasqakuna, huñunakuykunamantaq hamuqku phisqa chunka hina. Allinta yachachiwasqanku qhepamanmi Antananarivo llaqtapi watukuq kanaypaq kachawarqanku. 1993 watapin huk ladopi watukuq kanaykupaqñataq niwarqanku. Chaypi kawsayqa sasan karqan.

Iñiq t’aqakunata, karupi kaq gruponkunatapas watukunaykupaqqa, monte ukhuntan purinayku karqan 145 kilometrota hinaraq. Q’epitaqa pisillatan apaq kayku, discursota qonaypaq película kaqtinmi ichaqa mana, chaypaqqa esposaymi proyector nisqata apaq, ñoqataq huk bateriata.

Huk iñiq t’aqamanta hukman rinaykupaqqa 40 kilometrotan purinayku karqan orqonta, mayukunata chimpaspa, ch’ura otaq oqho pampanta ima. Qorpachakunaykupaqqa huk llaqtatan maskhaq kayku, mana tarispataq ñanpi puñuyku. Mayninpiqa mana reqsisqayku runakunatan qorpachawanankupaq valekurqayku, tarispataq wayk’ukuyta qallariq kayku. Esposaymi mankata mañakuspa mayuta otaq qochata unuman riq, ñoqataq hachata mañakuspa llant’ata ch’eqtaq kani. Manan ratullachu chaytaqa ruwakuq. Maynillanpin wallpata rantikuspa wayk’ukunaykupaq sipiq kayku.

Mikhusqayku qhepamanmi unuta maskhaq kayku bañakunaykupaq, cocinallapin puñuqpas kayku. Paraqtinqa perqaman k’iraykuspan puñuq kayku sut’umusqan mana apiyawanankupaq.

Qorpachawaqniykumanqa predicaqpunin kayku. Chayaqtiykuqa iñiqmasikunan sumaqta chaskiwaqku. Ancha kusisqata rikuspan, qonqapuqraq kayku risqaykupi imaymana sasachakuykuna kasqanmanta.

Testigoq wasinpi qhepakuspaqa ruwayninkupin yanapakuq kayku. Chhaynapin tiemponku kaq ñoqaykuwan predicaq rinankupaq. Manan hayk’aqpas suyarqaykuchu allin mikhunakuna qowanankuta.

KARUPI TARIKUQ GRUPOKUNATA WATUKUYKU

Karupi tarikuq grupokunata watukuyqa anchatan kusichiwaqku. Chaypi iñiqmasikunaqa suyachiwaqkuñan imakunachus ruwanayta, chhaynapin pisita samaq kayku (Mar. 6:31). Huk casarasqa Testigotan estudio qoypi yanapanayku karqan, payqa tawa chunka estudiantekunatan nisqa wasinman hamunankupaq. Esposanwanmi Oly iskay chunka estudiota qorqan, wakintataq qosanwan kuska qorqayku. Huk estudiota tukuspaqa hukwanñataqmi qallarirqayku. Tardentaqa huñunakuytan aparirqayku, qhepamantaq kaqllata estudiota qorqayku tutakama.

Karupi huk grupota watukuq risqaykupin chaypi kaq llapa iñiqmasikunawan huk llaqtachata predicaq rirqayku. Pusaq horas tutamantanta hinan lloqsirqayku. Monte ukhuntan rinayku karqan, chaymi thanta p’achawan churakurqayku. Chay llaqtamanqa kuskan p’unchayta hina chayarqayku, hinan allin p’achawan churakuspa predicayta qallarirqayku. Askhataq karqayku chayqa, kuskan horallapin tukurqapurqayku.  Chaymantan huk llaqtachamanñataq rirqayku predicaq, hinaspataq chay karu purisqaykuta kutinpunayku karqan. Karutan purinayku karqan huk horalla predicanaykupaq, chhayna predicayqa pisikallpayachiwarqankun. Iñiqmasikunan ichaqa mana quejakuqkuchu, kusisqallan kaqku.

Taviranambopin huk grupo karqan orqo patapi. Chayman chayaspaykun tarirqayku huk Testigo familiata ch’ulla wasillapi tiyaqta. Kallarqantaqmi huñunakunankupaq huk cheqaspas. Chayllamanmi chaypi tiyaq iñiqmasi qaparirqan: “¡Wayqe-panakuna!”, nispa. Huk orqo patamantataq kutichimurqan: “¡Imata!”, nispa. Hinan kutichirqan: “¡Watukuq umallin chayarqamunña!”, nispa. Hukninkaqtaq kutichimurqan: “¡Allinmi!”, nispa. Yaqachus hina huk orqomanta huk orqomanpas chhaynallatataq willanakurqanku, chayllamanmi runakunaqa chayamurqan. Huñunakuy qallarinanpaqqa pachak runakuna hinan kasharqan.

VIAJAYQA SASAN KARQAN

1996 watapiqa Antananarivo llaqtapi iñiq t’aqakunatan watukunayku karqan, chayqa manan karupichu tarikurqan, aswanpas Madagascar islaq chawpinpin, ichaqa, chaypipas kallarqantaqmi sasachakuykuna. Huk kutinmi Beankàna (Besakay) grupota watukuq rinayku karqan, chayqa tarikun Antananarivo llaqtamanta 240 kilómetro karupin, chayman rinapaqqa manan yaqapas carro kaqchu. Yacharqorqaykun risqaykuman huk carro rishasqanta, manejaqta valekuspan chay carroman wicharqayku. 30 runakuna kasharqayku, wakin carroq hawanpi thallarayaspa, wakintaq carroq qhepanpi hap’ipakuspa.

Chay carroqa sapa raton malograkurqan, hinan kuskan ñanpi manaña puripurqanchu. Unaytan purirqayku, chayllamanmi huk hatun camión askha pasajerojoq q’epikunayoq ima rikhurimurqan, chaywanpas sayarqanmi. Sayaspaña rinayku kaqtinpas seqarqaykun. Huk mayuman chayaqtiykun puenteta allichashasqaku, chaymi hukmanta purinayku karqan. Hinan chayarqayku precursor especialkunaq kasqan huk llaqtachaman. Manaña paykunata watukunaykuchu karqan chaypas, predicaspan qhepakurqayku puenteta allichananku kama.

Huk semana qhepatan huk carropi rirqayku. Carretera toqo-toqo kasqanraykun sapa kutilla moqoykukama unuman chapukuspa carrota  tanqaq kayku. ¡Askha kutipin tanqasqaykupi urmarqayku! Illarimuytan huk llaqtachaman chayaspa uraypurqayku. Chaymantaqa chakipin rirqayku arroz chakrakunanta pasaspa, cinturaykukama qhelli unukunanta pasaspa ima.

Chayllaraqtaq chayman risharqayku chayqa, chaypi llank’aqkunatan predicarqayku, tapurqaykutaqmi Testigokunaq wasinman imayna chayayta. Ichaqa, ¡paykunallataqmi kasqa iñiqmasikuna!

TUKUY TIEMPONKUWAN DIOSTA SERVINANKUPAQ KALLPACHAYKU

Tukuy tiemponkuwan Diosta servinankupaq kallpachasqayku allinpi tukusqanmi anchata kusichiwaqku. Huk iñiq t’aqapin isqon precursor regularkunata kallpacharqayku sapankankupas huk publicadorta tukuy tiemponwan Diosta servinanpaq yanapanankuta. Soqta killamanta kutiqtiykun iskay chunka iskayniyoq precursorkunaña kapusqaku. Iskay precursorakunan taytankuta yanapasqaku precursor kanankupaq, paykunaqa umallikunan karqanku. Paykunan huk umallimasinkuta yanapallasqakutaq. Pisi tiempollamanmi chay cristianoqa precursor especial kapurqan. Chaymantataq esposanwan kuska watukuq umalli karqan. ¿Ñawpaq kaq iskay umallikunari? Huknin kaqmi watukuq umalli, huknin kaqtaq huñunakuna wasikuna hatarichiypi yanapakushan.

Mana Diospa yanapayninwanqa manan imatapas ruwayta atiykumanchu karqan, chaymi sapa kuti agradecekuyku. Mayninpiqa sayk’usqa onqosqan tarikuyku, ichaqa predicasqaykuwan askha runakunata yanapasqaykupi yuyaymanaymi anchata kusichiwanku. Jehová Diosmi Reinonmanta willasqaykuta wiñachirqan, kunanqa ancha kusisqan kashayku precursor especial kaspa pisichallapipas yanapakusqaykumanta. Arí, ‘yacharqaykun’ imaynapi tarikuspapas kusisqa kanapaqqa Diosmanta hap’ipakuy kasqanta, paymi atiyta qowanchis.

[6 paginapi willakuy]

‘Yacharqaykun’ imaynapi tarikuspapas kusisqa kanapaqqa Diosmanta hap’ipakuy kasqanta

[4 paginapi fotokuna mapapiwan]

Madagascar islaq hallp’anqa pukan, chayraykun nikullantaq Hatun Puka Isla, nispa. Pachantinpi hatun islakunamanta tawa kaqmi, mana maypipas tarikuq animalkunan chaypi tarikun.

[5 paginapi foto]

Kusikuykun Bibliamanta yachachispa

[5 paginapi fotokuna]

Viajayqa sasan karqan