Stori bilong Olivier Randriamora

“Maski mi stap rabis o mi gat planti samting, mi lain pinis long stap olsem. Long olgeta samting na long olgeta kain sindaun, mi lain pinis long pasin bilong pulap na pasin bilong i stap hangre. . . . God i givim pawa long mi, na long dispela rot mi gat strong long mekim olgeta samting.”—Fili. 4:12, 13.

INAP longpela taim dispela tok bilong Aposel Pol i bin strongim mi na meri bilong mi, Oly. Olsem Pol, mipela i lain long trastim Jehova taim mipela mekim wok bilong em hia long Madagaska.

Taim ol Witnes Bilong Jehova i kirap stadi Baibel wantaim mama bilong Oly long 1982, mi na Oly i bin pasim tok pinis long marit. Mi tu kirap stadi, na Oly i kirap stadi bihain. Mipela i marit long 1983, na long 1985 mipela i baptais, na wantu mipela kirap long painia haptaim. Long Julai 1986, mipela i kirap painia oltaim.

Long Septemba 1987, mipela kamap painia salim. Namba 1 asainmen bilong mipela em long wanpela liklik taun long not-wes Madagaska, we i no gat kongrigesen i stap. I gat olsem 18 bikpela lain pipol na planti moa klen long Madagaska, na kastam wantaim ol bilip tumbuna bilong ol i narapela narapela. Malagasi em bikpela tokples bilong kantri, tasol i gat ol arapela tokples i klostu wankain. So mipela kirap lainim tokples ol man i mekim long hap mipela i go long en, dispela i mekim na ol man i amamas moa long mipela.

Pastaim, mi mekim pablik tok long olgeta Sande, na bihain long en Oly bai paitim han. Em mitupela tasol i stap. Mipela mekim olgeta tok bilong Skul Tiokratik, Oly bai mekim tok olsem em i toktok wantaim narapela. Mipela i amamas taim wasman sekit i tok olsem mipela ken senisim hau mipela i mekim ol miting!

Pos Ofis i no ron gut, olsem na planti taim mipela i no kisim liklik mani brens i save salim i kam. Olsem na mipela i lain long pasin bilong sot long ol samting. Wanpela taim mipela i no gat mani bilong baim basfea bilong i go long kibung sekit, em ol i mekim 130 kilomita longwe. Mipela tingim gutpela tok wanpela brata i bin mekim, olsem: “Tokim Jehova long ol hevi bilong yu. Long wanem, em wok bilong em yu save mekim.” So mipela i beten na wokim disisen long wokabaut i go. Tasol paslain long mipela go, wanpela brata i kam lukim mipela na givim presen long mipela—em mani inap long baim basfea!

WOK SEKIT

Long Februeri 1991, ol i makim mi long mekim wok sekit. Long dispela taim, liklik grup i gat  9-pela pablisa, 3-pela bilong ol i baptais pinis, na 50 manmeri i save kam long ol miting. Mi kisim trening pastaim, na bihain mipela lukautim wanpela sekit long biktaun Antananarivo. Long 1993, ol i makim mipela long i go long wanpela sekit long hap is bilong kantri. Sindaun bilong ol man long dispela hap i narapela kain long sindaun bilong ol man long taun.

Sampela taim mipela i mas wokabaut long bikbus bilong maunten inap olsem 145 kilomita bilong kamap long ol liklik grup na ol kongrigesen. Mipela i no karim planti kago. Tasol taim pablik tok bilong wasman sekit i gat ol piksa slait, mipela i mas karim planti samting moa. Oly mas karim slait projekta na mi mas karim bateri bilong kar.

Bilong kamap long neks kongrigesen, planti taim mipela mas wokabaut inap 40 kilomita long wanpela de. Mipela i go antap na i go daun long ol maunten, brukim ol wara, na wokabaut long graun malumalum. Sampela taim mipela i slip long rot, tasol planti taim mipela traim long painim haus bilong slip long en. Sampela taim mipela askim ol man mipela i no save long ol long larim mipela i slip long haus bilong ol. Taim mipela painim ples slip pinis, mipela kirap redim kaikai. Oly bai boroim sospen na go kisim wara. Na mi bai boroim tamiok na katim paiawut. Bikpela taim i lus long mekim olsem. Wan wan taim mipela baim kakaruk na kilim na redim.

Bihain long kaikai, mipela go kisim wara bilong waswas. Sampela taim mipela slip insait long haus kuk. Long sampela hap, taim ren i kam na rup i no gutpela, mipela i mas sindaun pas tru long wol bai ren i no ken wasim mipela.

Mipela putim mak long mipela mas autim tok long ol man em mipela i slip long haus bilong ol. Taim mipela i kamap long hap mipela i laik go long en, pasin helpim na pasin bilong ol bratasista Kristen long lukautim mipela i bikpela moa yet. Amamas bilong ol long visit bilong mipela i mekim na mipela i no tingim moa ol hevi mipela i bin bungim long rot.

Taim mipela i stap long haus bilong ol wanbilip, mipela amamas long helpim ol long mekim ol haus wok. Dispela i mekim na ol i gat taim long autim tok wantaim mipela. Mipela i no ting ol brata i mas givim ol samting long mipela i gat bikpela pe o baim ol spesel kaikai samting, dispela bai putim hevi long ol.

VISITIM OL GRUP

Mipela i amamas long visitim ol grup i stap longwe, we ol brata i amamas na ol i stretim sediul bilong ol na bai mipela i bisi tru. Planti taim mipela i no inap “malolo liklik.” (Mak 6:31) Long wanpela hap, tupela marit Witnes i singautim olgeta Baibel stadi bilong ol, em 40 manmeri, long kam long haus bilong tupela bai mipela i ken sindaun long stadi bilong ol. Oly wantaim sista i mekim 20 stadi, na mi wantaim brata i mekim 20 stadi. Taim wanpela stadi i pinis, wantu mipela kirapim narapela. Bihain, mipela brek na mekim ol miting bilong kongrigesen, na bihain mipela kirap gen mekim ol Baibel stadi. Dispela longpela de i save pinis bihain long 8 klok nait!

 Taim mipela visitim narapela grup, mipela grup olgeta i kirap wokabaut long 8 klok moning na go long wanpela viles klostu. Mipela werim ol olpela klos. Mipela brukim bus na kamap long teritori long belo. Mipela putim ol klinpela klos na kwiktaim mipela autim tok long ol haus. I no gat planti haus, na ol pablisa i planti. So mipela pinisim teritori insait long 30 minit. Bihain mipela go long neks viles. Taim mipela autim tok pinis, mipela mas bihainim longpela rot i go bek. Pastaim mipela bel hevi long dispela. Mipela bin lusim bikpela hap taim na strong bilong autim tok inap wanpela aua tasol. Tasol ol Witnes long dispela hap i no komplein. Ol i amamas long mekim dispela wok.

Wanpela liklik grup long Taviranambo i stap klostu long kil bilong maunten. Long dispela hap mipela bungim wanpela Witnes famili i stap long haus i gat wanpela rum tasol. Narapela liklik haus i stap klostu, na ol i save mekim miting long en. Wantu, papa bilong haus i singaut bikmaus olsem, “Ol brata!” Na long narapela maunten, wanpela i bekim, “O o!” Papa bilong haus i singaut gen, “Wasman sekit i kam pinis!” Narapela i bekim, “Em nau!” Na tok i go moa long ol arapela i stap longwe. I no longtaim na ol lain i kam bung, na taim miting i kirap, moa long 100 i sindaun i stap.

HEVI BILONG TRENSPOT

Long 1996 mipela kisim asainmen long wanpela sekit i klostu long Antananarivo, em long sentral hailans. I gat sampela hatwok long dispela sekit tu. No gat ol bas i save go long ol hap i stap longwe. Long sediul mipela mas visitim grup long Beankàna (Besakay), klostu 150 mail (240 km) longwe long Antananarivo. Mipela stretim tok wantaim wanpela draiva na kalap long liklik trak i go long dispela hap. I gat 30 pasindia long trak, sampela i stap long rup bilong trak na sampela i hangamap long baksait.

I no longtaim na trak i bagarap na mipela mas wokabaut, planti taim kain samting olsem i save kamap. Bihain long sampela aua, bikpela trak i kam. Na draiva i stop, maski trak i pulap pinis long ol man na kago. Mipela kalap na sanap tasol insait long trak. Bihain mipela kamap long wanpela wara, tasol ol i wok long stretim bris. So mipela kirap wokabaut gen na go long hap we sampela painia salim i stap. Maski i no taim bilong  mipela long visitim ol, mipela stap wantaim ol na autim tok i go inap long ol wokman i stretim pinis bris na mipela i ken kisim trenspot.

Mipela wet inap wanpela wik na wanpela kar i kam. Rot i gat planti traipela pot-hol. Planti taim kar i pas long wara na mipela mas pusim kar, na sampela taim mipela i pundaun. Long bikmoning tru mipela i kamap long liklik viles na mipela go daun long dispela hap. Mipela lusim bikrot na katim namel long ol gaden rais we wara i kam antap inap long bel bilong mipela.

Dispela em fes taim mipela i raun long dispela hap, so mipela i ting i gutpela long autim tok long ol man i wok long ol gaden rais na askim ol long stiaim mipela i go long hap we ol Witnes i stap. Mipela i bin amamas long kisim save olsem ol dispela wokman em ol wanbilip bilong mipela!

KIRAPIM OL ARAPELA LONG PAINIA

Mipela kisim bikpela amamas long lukim sampela bratasista i bihainim tok mipela mekim bilong kirapim ol long mekim wok painia. Taim mipela i visitim wanpela kongrigesen i gat 9-pela painia oltaim, mipela i kirapim olgeta wan wan painia long putim mak bilong helpim narapela pablisa i kamap painia. Taim mipela visitim ol 6-pela mun bihain, namba bilong ol painia oltaim i bin go antap long 22. Tupela painia sista i bin strongim tupela papa bilong ol, em tupela i stap elda, long kamap painia oltaim. Dispela tupela elda i kirapim narapela elda long mekim wok painia oltaim wantaim ol. Bihain liklik, dispela namba 3 elda i kamap wanpela painia salim. Bihain yet, em na meri bilong en i kirap mekim wok sekit. Olsem wanem long narapela 2-pela elda? Wanpela i mekim wok sekit, na narapela i stap volantia bilong wokim ol Haus Kingdom.

Long olgeta de mipela i tenkyu tru long Jehova long helpim em i givim mipela. Mipela save olsem, long strong bilong mipela yet mipela i no inap mekim wanpela samting. Tru, sampela taim mipela pilim taiet na sik, tasol mipela i save amamas taim mipela tingim ol gutpela samting i kamap long wok autim tok bilong mipela. Jehova i save mekim wok bilong em i karim kaikai. Mipela amamas long helpim dispela wok, na long nau mipela i mekim wok painia salim. Yes, mipela i “lain pinis” long bilip na wetim Jehova, husat i “givim pawa” long mipela.

[Rait long pes 6]

Mipela i “lain pinis” long bilip na wetim Jehova

[Mep/Ol Piksa long pes 4]

Madagaska, ol i kolim Bikpela Retpela Ailan, na em namba 4 bikpela ailan long graun. Graun i retpela, na i gat ol narakain animal i stap

[Piksa long pes 5]

Trenspot em wanpela bikpela hevi mipela i mas karim

[Ol Piksa long pes 5]

Mipela i amamas long mekim Baibel stadi wantaim ol man