Jiobá nga Dios ni «rusihuinni guiráʼ ni nagaʼchiʼ»

«Dios stitu nga Dios ni jma risaca lade guiráʼ dios ne Señor lade guiráʼ rey, ne laa rusihuinni guiráʼ ni nagaʼchiʼ.» (DAN. 2:47)

XI NICÁBILUʼ.

Xi cayabi Jiobá laanu chigaca despué.

Tuu nga zeeda gaca ca primé xhoopaʼ ique maniʼ duxhuʼ que.

Xi zanda guininu de maniʼ duxhuʼ ni biʼyaʼ Juan ne estatua guníʼ xcaandaʼ Nabucodonosor.

1, 2. Xi maʼ guníʼ Jiobá zahuinni tiempu riʼ, ne xiñee guniʼbe ni.

 GUNÁʼ nga guidxi roʼ ni jma nadipaʼ cayuni mandar lu Guidxilayú riʼ ora gunduuxeʼ Reinu stiʼ Dios guiráʼ gobiernu stiʼ binni yaʼ. Zanda gánnanu xi guidxi, purtiʼ Jiobá nga Dios ni «rusihuinni guiráʼ ni nagaʼchiʼ». Para nga naquiiñeʼ guidúʼndanu ca libru zeeda lu Biblia ni bicaa Daniel, ni riguixhená, ne ni bicaa apóstol Juan.

² Bidii Jiobá caadxi visión ca hombre riʼ, lu ca visión riʼ biiyacabe caadxi maniʼ duxhuʼ. Laaca bisiene Dios Daniel, xi riníʼ ti bacaandaʼ ra bihuinni ti estatua naroʼbaʼ. Guníʼ Dios guicá ca relatu riʼ lu Biblia, para gacanécani laanu ora guidúʼndanu cani (Rom. 15:4). Zacá zaguidxi fe nápanu Reinu stiʼ Dios, purtiʼ mayaca gunitiluni guiráʼ ca gobiernu ni nuu lu Guidxilayú (Dan. 2:44).

3. Para ganda guiénenu ca diidxaʼ riguixhená zeeda lu Biblia, xi caquiiñeʼ guiénenu primeru, ne xiñee.

³ Guiráʼ cani bicaa Daniel ne ni bicaa Juan ruzeetecani zahuinni xhono «rey», o guidxi jma nadipaʼ ni guni mandar, peru laaca riníʼcani padxí ne ximodo guihuinni stale de ca guidxi riʼ. Yanna, para ganda guiene chaahuinu guiropaʼ relatu riʼ, naquiiñeʼ guiénenu primé diidxaʼ riguixhená zeeda lu Biblia. Xiñee yaʼ. Purtiʼ guiráʼ ni zeeda lu Biblia cusihuinni ximodo gaca ni na ca diidxaʼ ca. Nga runi, zeeda gaca primé diidxaʼ riguixhená stiʼ Biblia casi ti doo ra nanda guiráʼ ca diidxaʼ riguixhená.

CANI ZA DE BEENDAʼ NE MANIʼ DUXHUʼ

4. Tuu nga zeeda gaca cani za de gunaa que, ne xi chigúnicabe.

⁴ Bichee si Adán ne Eva, guníʼ Jiobá ziuu ti «gunaa» ni zapa xiiñiʼ. Sicaríʼ na Biblia: «Ne zucaaʼ laatu  gacananaláʼdxisaatu, lii ne gunaa ca, ne zaqueca ni za de lii ne ni za de laabe. Ni za de gunaa ca zucaache íqueluʼ ne lii zuninaluʼ xatini ñeebe» (Génesis 3:15). a Ni za de gunaa ca zuxhaatañee ique beendaʼ que, o Binidxabaʼ. Gudiʼdiʼ si tiempu, bisihuinni Jiobá zahuinni ni za de gunaa que lade binnilidxi Abrahán, de guidxi Israel, de tribu stiʼ Judá ne lade ca xiiñiʼ rey David (Gén. 22:15-18; 49:10; Sal. 89:3, 4; Luc. 1:30-33). Jesucristu nga binni ni jma risaca ni za de gunaa que (Gál. 3:16). Xcaadxi ni za de gunaa riʼ nga ca xpinni Cristu ni bibí pur espíritu santu (Gál. 3:26-29). Jesús ne cani bibí pur espíritu santu nga nuu lu Reinu stiʼ Dios, ne laani nga zaquiiñeʼ Jiobá para gunitilú Binidxabaʼ (Luc. 12:32; Rom. 16:20).

5, 6. 1) Panda guidxi jma nadipaʼ ruzeeteʼ visión stiʼ Daniel ne Juan. 2) Tuu nga zeeda gaca ca ique maniʼ duxhuʼ ruzeeteʼ Apocalipsis.

⁵ Primé diidxaʼ riguixhená stiʼ Biblia ruzeeteʼ laaca zapa Binidxabaʼ xiiñiʼ, o xpinni, ne zaca xhenemigu ca xpínnibe cani za de gunaa que. Tuu nga zeeda gaca ca binni ni za de beendaʼ que yaʼ. Guiráʼ ca binni ni nanalaʼdxiʼ Dios ne cani rucaalú xquídxibe. Maʼ raca stale iza de rucaa Binidxabaʼ ca xpinni guiníʼ íquecaʼ naquiiñeʼ gápacaʼ reinu o gobiernu sticaʼ (Luc. 4:5, 6). Caadxi si de ca gobiernu riʼ nga cani huayuniná guidxi Israel o ca xpinni Cristu ni bibí para cheʼ guibáʼ. Ndiʼ nga tobi de ca cosa risaca lu tema cadúʼndanu riʼ, purtiʼ zacaneni laanu guiénenu xiñee xhono si guidxi jma nadipaʼ rihuinni lu visión biʼyaʼ Daniel ne Juan.

⁶ Ra ziluxe primé siglu, biasa si Jesús de lade gueʼtuʼ, biluiʼbe apóstol Juan caadxi visión ni zucaa laanu guidxagayaanu (Apo. 1:1). Lu tobi de ca visión que biiyaʼ Juan ti dragón —ni zeeda gaca Binidxabaʼ— zuhuaa guriá nisadóʼ bani (biindaʼ Apocalipsis 13:1, 2). Óraque biree ti maniʼ duxhuʼ ndaaniʼ nisadóʼ que, ne bidii Binidxabaʼ poder laame para guni mandarme. Despué biiyaʼ apóstol Juan ti maniʼ duxhuʼ naxiñáʼ ni napa gadxe ique. Maniʼ riʼ nga «bidóʼ» stiʼ maniʼ duxhuʼ ni ruzeeteʼ Apocalipsis 13:1, ni zeeda gaca «gadxe rey» o gadxe guidxi ni jma nadipaʼ (Apo. 13:14, 15; 17:3, 9, 10). Dxi gucuá libru stiʼ Apocalipsis, maʼ biaba gaayuʼ ique maniʼ que, cayuni  mandar stobi, peru cayaadxaʼ «gueeda ru stobi» para guizaa gadxe. Gunáʼ ca nga ca guidxi riʼ yaʼ. Chiguidúʼyanu tuu nga ca ique maniʼ duxhuʼ riʼ tobi pur tobi. Laaca zadúʼyanu xcaadxi cosa bisiene Daniel de ca gobiernu riʼ, nuu biaje guniʼbe de laacaʼ stale siglu ante guihuínnicaʼ.

PRIMÉ NE GUIROPA IQUE: EGIPTO NE ASIRIA

7. Tuu nga primé ique maniʼ que, ne xiñee.

⁷ Primé ique maniʼ que nga Egipto. Xiñee yaʼ. Purtiʼ laani nga primé guidxi jma nadipaʼ ni biquiichináʼ xquidxi Dios. Bizulú bicaalúcabe xquidxi Dios ora bininácabe ca xiiñiʼ Abrahán —ra chigale ni za de gunaa que— purtiʼ nabé maʼ bidálecaʼ ndaaniʼ xquídxicabe. Para cadi gale ni za de gunaa que la? gucalaʼdxiʼ Binidxabaʼ nunduuxeʼ xquidxi Dios. Ximodo yaʼ. Ora bicaa Binidxabaʼ Faraón guuti guiráʼ ca hombrehuiiniʼ nuu Israel. Peru qué nudii Jiobá lugar ñácani ne guleebe ca xpínnibe de Egipto (Éxo. 1:15-20; 14:13). Gudiʼdiʼ si tiempu yenebe laacaʼ lu Layú ni Bizabiruaa Dios, ne raqué biaanacaʼ para guibánicaʼ.

8. Tuu nga beeda gaca guiropa ique maniʼ que, ne xi gucalaʼdxiʼ ñuni.

⁸ Guiropa ique maniʼ que nga Asiria, ti guidxi nabé nadipaʼ ni gucalaʼdxiʼ nunduuxeʼ xquidxi Dios. Dxandíʼ biquiiñeʼ Jiobá laacabe para gusabanácabe reinu de chii tribu, purtiʼ biʼniʼ adorarcaʼ bidóʼ ne qué nuzuubacaʼ stiidxabe. Peru despué bicaalú Asiria Jerusalén. Zándaca racalaʼdxiʼ Binidxabaʼ gunduuxeʼ ca binni de ra gueeda gale Jesús. Peru cadi ngue diʼ nga gudixhe Jiobá gácani. Ngue runi, bilá Jiobá ca xpinni ni ruzuubaʼ diidxaʼ ora biseendabe ti ángel para gunitilú cani cucaalú laacabe (2 Rey. 19:32-35; Isa. 10:5, 6, 12-15).

GUIONNA IQUE: BABILONIA

9, 10. 1) Xi bidii Jiobá lugar guni ca babilonio. 2) Xi naquiiñeʼ guizaaca né ca judíu para gaca ni na caadxi diidxaʼ riguixhená.

⁹ Guionna ique maniʼ biiyaʼ Juan que nga reinu stiʼ Babilonia. Bidii Jiobá lugar gunitilú Babilonia Jerusalén ne chiné ca binni nabeza raqué de esclavu. Ne maca gudxi Dios ca israelita zusabanabe laacaʼ zaqué purtiʼ qué ruzuubacaʼ diidxaʼ (2 Rey. 20:16-18). Guniʼbe zadxiña dxi maʼ qué ziuu binni ni gaca rey para cuiʼ «lu trono stiʼ Jiobá» ni nuu Jerusalén (1 Cró. 29:23). Peru laaca guniʼbe zale tuuxa lade ca xiiñiʼ rey David, tobi «ni napa derechu», para guni mandar casi rey stiʼ Jiobá sti biaje (Eze. 21:25-27).

¹⁰ Sti diidxaʼ riguixhená cuzeeteʼ ziuuruʼ judíu ni cayuni adorar Jiobá ndaaniʼ yuʼduʼ nuu Jerusalén, ora gueeda Mesías ni gulí Jiobá (Dan. 9:24-27). Sti diidxaʼ riguixhená gucuá ante cheʼ ca israelita casi esclavu Babilonia, bizeeteʼ zale Mesías ndaaniʼ guidxi Belén (Miq. 5:2). Para ganda gaca ni na ca diidxaʼ riʼ, caquiiñeʼ guiree ca judíu de esclavu, guibiguétacaʼ xquídxicaʼ ne gucuicaʼ yuʼduʼ que sti biaje. Peru ca binni de Babilonia qué rinacaʼ gundaacaʼ ca esclavu sticaʼ. Yanna, ximodo guireecabe yaʼ. Jiobá biquiiñeʼ cani riguixhená stiʼ para gusiéneni (Amós 3:7).

11. Xi biiyaʼ Daniel ne Juan lu visión sticaʼ ni bisihuinni laacani nga reinu stiʼ Babilonia. (Biiyaʼ ni cá ñee yaza.)

¹¹ Tobi de ca israelita ni guyé casi esclavu Babilonia nga Daniel, ti hombre ni riguixhená (Dan. 1:1-6). Lu ti bacaandaʼ biluíʼ Jiobá laabe caadxi cosa ni cusihuinni gunáʼ nga ca guidxi jma nadipaʼ ziuu despué de Babilonia. Xiruʼ biʼniʼ Dios yaʼ. Bicaabe Nabucodonosor guiníʼ xcaandaʼ ti estatua naroʼbaʼ (Dan. 2:1, 19, 31-38). Despué biquiiñebe Daniel  para gusiene Nabucodonosor zeeda gaca ique de oro stiʼ estatua que reinu stiʼ Babilonia. b Xpechu estatua que ne guiropaʼ chu naʼ, zeeda gaca sti guidxi guiasa despué. Xi guidxi riʼ, ne xi zúnini xquidxi Dios yaʼ.

GUIDAPA IQUE: MEDOPERSIA

12, 13. 1) Ximodo bisihuinni Jiobá zanitilú Babilonia. 2) Xiñee Medopersia nga guidapa ique stiʼ maniʼ duxhuʼ que.

¹² Jma de ti gayuaa iza ante guibani Daniel, biquiiñeʼ Jiobá Isaías, ni riguixhená, para guiníʼ ziuu ti guidxi nadipaʼ ni gunitilú Babilonia. Qué niníʼsibe ximodo zanitilú Babilonia, sínuque laaca guniʼbe tu láʼ hombre chigúnini: Ciro, de Persia (Isa. 44:28; 45:2). Laaca gucuaa Daniel chupa visión ni caníʼ de guidxi roʼ ni láʼ Medopersia. Lu primé visión ca biiyabe reinu riʼ casi ti oso ni candisaʼ ti chu náʼ ne cayábicabe laa gó «stale beela» (Dan. 7:5). Ne lu sti visión biiyabe laa casi ti dendxuʼ barracu ni napa chupa cachu (Dan. 8:3, 20).

¹³ Guca ni na ca diidxaʼ riguixhená riʼ ora biquiiñeʼ Jiobá Medopersia para gunitilú Babilonia, ti ganda guiree ca israelita de esclavu ne guibiguétacaʼ xquídxicaʼ (2 Cró. 36:22, 23). Peru gudiʼdiʼ si tiempu, biaʼ qué nunduuxeʼ si guidxi riʼ ca xpinni Dios. Lu libru stiʼ Ester ridúʼndanu xi gucalaʼdxiʼ Hamán ñuni, ti xaíque nabé risaca stiʼ Persia. Laabe gucaláʼdxibe ñuutibe guiráʼ ca judíu ni nabani ndaaniʼ guidxi que, dede gudíxhebe padxí gácani. Peru gupa Jiobá xquidxi sti biaje, ne bilabe laacaʼ de ca xpinni Binidxabaʼ (Est. 1:1-3; 3:8, 9; 8:3, 9-14). Racá ridúʼyanu Medopersia nga guidapa ique stiʼ maniʼ duxhuʼ ruzeeteʼ Apocalipsis.

GRECIA NGA RA BIZAA GAAYUʼ IQUE

14, 15. Gunáʼ nga caadxi cosa guníʼ Jiobá de guidxi Grecia.

¹⁴ Grecia nga beeda gaca ra bizaa gaayuʼ ique maniʼ duxhuʼ ni ruzeeteʼ Apocalipsis. Ora bisiene Daniel bacaandaʼ ni gupa Nabucodonosor que, maca guniʼbe Grecia nga ndaaniʼ ne guiropaʼ coʼre de cobre stiʼ estatua que. Peru laaca gucuaa ni riguixhená riʼ xhupa visión, ra bihuinni ximodo gueeda guiasa reinu stiʼ Grecia ne tuu nga rey ni jma risaca stini.

¹⁵ Lu tobi de ca visión que, biiyabe zeeda gaca Grecia casi ti beedxeʼ ni napa tapa xhiaa, nga rusihuinni nabé nagueenda zuni ganar Grecia xcaadxi guidxi (Dan. 7:6). Lu sti visión biiyabe ti chivu barracu ni napa ti cachu nabé naroʼbaʼ, biiti chivu riʼ ti dendxuʼ de chupa cachu, ni zeeda gaca Medopersia. Jiobá bisiene Daniel zeeda gaca chivu barracu que Grecia, ne cachu nabé naroʼbaʼ stime que nga tobi de ca rey stiʼ guidxi riʼ. Peru guníʼ Daniel zaluuza cachu que ne zandani stapa cachu huiiniʼ lugar stini. Diidxaʼ riguixhená riʼ gucuani gayuaa iza ante gaca Grecia tobi de ca guidxi jma nadipaʼ. Peru guca guiráʼ ni bieeteʼ lu ca diidxaʼ riguixhená riʼ. Alejandro Magno nga guca rey ni jma risaca stiʼ guidxi Grecia, ne laabe nga bicaalube Medopersia. Peru cadi xadxí diʼ bindaa «cachu» que, purtiʼ guti rey que dxi deruʼ napa 32 iza, ca dxipeʼ jma cayuni ganarbe. Gútisibe, biasa tapa de ca general stibe ne gundaacaʼ guidxi que tapa ndaa. Biblia na: «Dendxuʼ biʼyuʼ napa chupa cachu que nga ca rey de Media ne Persia. Ne chivu barracu ladi  raxi que nga rey stiʼ Grecia; ne cachu ni zuba lucuame ca nga primé rey. Cumu biluuza cachu que la? gundani tapa ni beeda guiaana lugar stini, laacani nga tapa reinu ni guiasa guidxi ca, peru qué zácacani nadipaʼ biaʼ gúcani» (Daniel 8:20-22).

16. Xi biʼniʼ Antíoco IV.

¹⁶ Biaba si Persia, bizulú biʼniʼ mandar Grecia layú ra nuu xquidxi Dios. Ca dxi que, maʼ nuu ca judíu lu Layú ni Bizabiruaa Dios ne maʼ bicuicaʼ yuʼduʼ stiʼ Jerusalén sti biaje. Nuuruʼ ca judíu casi xquidxi Jiobá, ne yuʼduʼ que nga riquiiñeʼ para gaca adorar Dios jneza. Peru lu guiropa siglu ante de ca dxi stiʼ Jesús, bininá Grecia laacabe, guidxi ni beeda gaca ra bizaa gaayuʼ ique maniʼ duxhuʼ que. Antíoco IV, tobi de ca ni biaanané ti ndaa guidxi stiʼ Alejandro, bizuhuaa ti altar para gaca adorar bidóʼ ra nuu yuʼduʼ stiʼ Jerusalén ne gudíxhebe gati guiráʼ tu qué gusaana religión stiʼ ca judíu. ¡Racá ridúʼyanu pabiáʼ guca nanalaʼdxiʼ ca xpinni Binidxabaʼ cani za de gunaa que! Peru qué nindaa biaba Grecia ora biasa sti guidxi roʼ ni zeeda. Tuu nga gueeda gaca ra guizaa xhoopaʼ ique maniʼ duxhuʼ que yaʼ.

ROMA NGA RA BIZAA XHOOPAʼ IQUE NE NABÉ BIDXÍBICABE LAA

17. Ximodo biquiiñeʼ Roma para guca ni na Génesis 3:15.

¹⁷ Roma nga guidxi jma nadipaʼ nuu dxi gucuaa apóstol Juan visión ra bihuinni maniʼ duxhuʼ que (Apo. 17:10). Beeda gaca Roma ra bizaa xhoopaʼ ique maniʼ duxhuʼ que ne biquiiñeʼ guidxi riʼ para guca ni na Génesis 3:15. Biquiiñeʼ Binidxabaʼ ca xaíque stiʼ Roma para guninacaʼ «xatini» ñee ni za de gunaa que. Ximodo yaʼ. Biʼniʼ juzgar ca binni que Jesús casi ti binni malu ni cucaalú gobiernu ne despué biiticabe laa (Mat. 27:26). Peru cumu gundisaʼ Jiobá Jesús de lade gueʼtuʼ la? beeda gácani casi ora nagueenda ñanda ra bininácabe laabe.

18. 1) Xi guidxi cubi gulí Jiobá, ne xiñee. 2) Ximodo bininaruʼ ca xpinni Binidxabaʼ ca binni ni za de gunaa que.

¹⁸ Ca xaíque yuʼduʼ stiʼ Israel bidaagucaʼ Roma para gucaalucaʼ Jesús, ne bidxiideche stale de ca binni guidxi que laabe. Ngue runi bicaanáʼ Jiobá Israel (Mat. 23:38; Hech. 2:22, 23). Ne gulibe sti guidxi cubi para laabe, «Israel stiʼ Dios» (Gál. 3:26-29; 6:16, NM). Laacabe nga guiráʼ ca xpinni Cristu ni bibí pur espíritu, ca judíu ne binni de sti guidxi (Efe. 2:11-18). Biasa si Jesús de lade gueʼtuʼ, bininaruʼ ca xpinni Binidxabaʼ ca binni ni za de gunaa que, stale biaje gucalaʼdxiʼ Roma nunduuxeʼ xcaadxi de ca binni ni za de Abrahán, ca xpinni Cristu ni bibí pur espíritu. c

19. 1) Xi guníʼ Daniel de guidxi ni jma nadipaʼ ra bizaa xhoopaʼ ique maniʼ que. 2) Xi zazíʼdinu lu sti tema ca.

¹⁹ Lu bacaandaʼ ni bisiene Daniel Nabucodonosor que, Roma nga zeeda gaca guiropaʼ coʼre de guiibaʼ stiʼ estatua que (Dan. 2:33). Peru, lu sti visión gucuaa Daniel biiyaʼ Roma ne laaca biiyaʼ sti guidxi nadipaʼ ni zaree de laa (Dan. 7:7, 8). Pur stale siglu, guca Roma ti guidxi ni nabé bidxibi ca xhenemigu laa ne nabé nadipaʼ. Peru ca diidxaʼ riguixhená cuzeetecaʼ zaree «chii cachu», ne lade cani zaree stobi ni zaca jma nadipaʼ que laacani. Tuu nga beeda gaca chii cachu riʼ yaʼ. Tuu nga beeda gaca cachu huiiniʼ que, ne xi lugar stiʼ estatua que zeedani yaʼ. Zacábinu ca guendarinabadiidxaʼ riʼ lu tema ni zeeda lu yaza 14.

[Nota]

[Guendarinabadiidxaʼ stiʼ párrafo]