Jihova u tu Jingununa o Ima ia ‘Tokala o ku Bhita mu Kindala’
Jihova u tu Jingununa o Ima ia ‘Tokala o ku Bhita mu Kindala’
‘Divulu dia Dijingunuinu dia Jezú Kristu dia bhana Nzambi phala kuidikisa jiselevende jê, o ima ia tokala o ku bhita kindala.’—DIJ. 1:1.
KIEBHI KI UEJI TAMBUIJILA?
Mbandu iebhi ia kiteka kionene, kilombolola o utuminu ua Grã-Bretanha ni Estados Unidos?
Kiebhi Nzuá kia londekesa kuila o utuminu ua Grã-Bretanha ni Estados Unidos uala ni ukamba ni Nações Unidas?
Kiebhi Daniiele ni Nzuá kia jimbulula o dizubhilu dia mautuminu a ngongo?
1, 2. (a) O ikanenu ia Daniiele, ni ia Nzuá, ia tokala ku tu suínisa ku bhanga ihi? (b) O mitué isamanu ia dianga ia kiama kia muxitu, ulombolola ihi?
O ikanenu ia bhana Nzambi kua Daniiele ni kua Nzuá ia kidi muene, i tu kuatekesa kuijiia o izulukutu ia-nda bhita lelu ni ku hádia. Ihi i tu di longa ku kisuma kia Nzuá kia lungu ni kiama kia muxitu, ni kia Daniiele kia lungu ni kiama ki kuatesa o uôma, kua tundu dikuinhi dia lumbinga, ni kijimbuluilu kia kiteka kionene? O kuijiia o ikanenu íii, ia tokala ku tu suínisa ku bhanga ihi?
2 Tua-nda mateka o ku di longa o kisuma kia Nzuá kia lungu ni kiama kia muxitu. (Dij., kibat. 13) Kala ki tua di longo kiá, o mitué isamanu ia dianga ia kiama kia muxitu, ilombolola Ijitu, Asídia, Babilonha, Mediia ni Pélesa, Ngeléxia ni Loma. O mautuminu enhá, exile jinguma ja mbutu ia muhatu. (Dim. 3:15) Kioso Nzuá kia soneka o kisuma kiki, o Loma o mutué ua kasamanu ua kexile kiá mu tumina ukulu. O mutué ua kasambuadi ueji bhingana bhu kididi kia Loma. O mutué ua kasambuadi ulombolola utuminu uebhi, ni ihi ieji bhanga ku mbutu ia muhatu?
O UTUMINU UA GRÃ-BRETANHA NI ESTADOS UNIDOS A MATEKA O KU TUMINA
3. O kiama kia muxitu kia dikuinhi dia lumbinga kilombolola ihi, o dikuinhi dia lumbinga dilombolola ihi?
3 Tu tena ku tungununa o mutué ua kasambuadi ua kiama kia muxitu, kia tange mu divulu dia Dijingunuinu mu kibatulu 13, se sokesa o kisuma kia Nzuá, ni kia Daniiele kia lungu ni kiama ki kuatesa o uôma kiala ni dikuinhi dia lumbinga. * (Tanga Daniiele 7:7, 8, 23, 24.) O kiama kia muxitu kia mono Daniiele, kilombolola o Utuminu ua Loma. (Tanga o kaxa mu mbandu 14-15) Mu hama ia katanu K.K. o Utuminu ua Loma ua di sanzumuna. O dikuinhi dia lumbinga dia moneka ku mutué ua kiama ki kuatesa o uôma, ilombolola o mautuminu a tundu ku utuminu ua Loma.
4, 5. (a) Ihi ia bhange o mbinga iofele? (b) O mutué ua kasambuadi ua kiama kia muxitu ulombolola nanhi?
4 O ji mbinga jiuana, mba mautuminu, ja moneka ku mutué ua kiama ki kuatesa o uôma, a ki tumbula ni ujitu uoso. O ‘mbinga iofele,’ i katula o ji mbinga jitatu. Kiki kia dikumbidila kioso o utuminu ua Grã-Bretanha ua tundu o Utuminu ua Loma, ua moneka ni fuma. Ku hama ia 17, o utuminu ua Grã-Bretanha ki ua kexile luua ni fuma ku utuminu. O jixi jitatu ku Utuminu ua Loma—Espanha, Holanda, ni França—a betele o fuma. O utuminu ua Grã-Bretanha ua luua ni mautuminu enhá, iu ua tambula o fuma iâ. Mukonda dia kiki ku hama ia 18, o utuminu ua Grã-Bretanha ua kituka o utuminu ua betele kota ku mundu. Maji né kiki, o utuminu iú ki uexile o mutué ua kasambuadi ua kiama kia muxitu.
5 Kioso o utuminu ua Grã-Bretanha ki ua tambuile o fuma, ua mateka ku tumina, o ji colônia ku America ia Norte a bhukumukina o utuminu ua Grã-Bretanha. Maji né kiki o ixi ia Estados Unidos, a i kuatekesa ku utuminu ua Grã-Bretanha ni masoladi. Katé mu kizuua kia Ngana kia mateka ku muvu ua 1914, o utuminu ua Grã-Bretanha uexile o utuminu ua betele kota ku mundu, o ixi ia Estados Unidos ia betele kota mu ku kala ni ji nzo ja matenda. * Mu Ita ia Dianga ku Mundu, o utuminu ua Estados Unidos ua bhange ukamba ni utuminu ua Grã-Bretanha. O mutué ua kasambuadi ua kiama kia muxitu o utuminu ua Grã-Bretanha ni Estados Unidos uene ua mu Tumina ku Mundu uoso. Ihi ieji bhanga o mutué iú ku mbutu ia muhatu?
6. Kiebhi o mutué ua kasambuadi kia talesa o hadi ku mundu ua Nzambi?
6 Kioso kia mateka o kizuua kia Ngana, o mutué ua kasambuadi ua mateka ku talesa hadi ku mundu ua Nzambi—o jiphange ja Kristu a undu ala mu ixi. (Mat. 25:40) Jezú ua londekesa kuila mu kizuua kiê, o Jikidistá a a undu a tokala ku mbutu, eji suína mu ixi. (Mat. 24:45-47; Nga. 3:26-29) O Utuminu ua Britânia ni America, ua mu Tumina ku Mundu, ua zukutisa o Jikidistá a undu. (Dij. 13:3, 7) Kioso kia bhiti o Ita ia Dianga ku Mundu, a zukutisa o mundu ua Nzambi, a jokotesa o madivulu mâ, a tele mu kaleia o jikidistá akexile ku pholo a tokala ku kibuka kia kimbadi kia fiiele. O mutué ua kasambuadi ua kiama kia muxitu, ua fidisa o kikalakalu kia ku boka mu kithangana kiofele. Jihova uejidile kiá o izulukutu íii, iu ua i jimbuluila kua Nzuá mu kisuma. Nzambi uambela ué Nzuá kuila, o mbandu ia kaiiadi ia mbutu ia muhatu, ieji kolokota mukonda dia ku suína ku kikalakalu kia ku boka. (Dij. 1:3, 7-11) Lelu o misoso ia Jimbangi ja Jihova, ilondekesa kuila o izulukutu íii ia bhiti muene.
O UTUMINU UA GRÃ-BRETANHA NI ESTADOS UNIDOS , NI INAMA IA FELU, NI UTUMA
7. Ukamba uahi uala nau o mutué ua kasambuadi ua kiama kia muxitu, ni kiteka kionene?
7 O kuila saí kima kia difu ku mutué ua kasambuadi ua kiama kia muxitu, ni kiteka kionene? O utuminu ua Grã-Bretanha ni Estados Unidos—ua tundu ku utuminu ua Loma. Kiebhi kia jimbulula o inama ia kiteka? A i jimbulula kuila a i fungu ni felu ni utuma. (Tanga Daniiele 2:41-43.) O utuma ni felu, ia lungu ni thembu, ieji kuíza ni fuma iavulu o mutué ua kasambuadi—o utuminu ua Grã-Bretanha ni Estados Unidos—ieji Tumina ku Mundu. Tuejiia kuila, o felu se a i funga ni utuma, ki i kala ni nguzu, kiene kimoxi ué, o utuminu ua Grã-Bretanha ni Estados Unidos ki ueji kala ni kutena kua soko, kála kiexile o utuminu ua Loma ku ua tundu. Kiebhi ki kia-nda bhita?
8, 9. (a) Kiebhi o utuminu ua kasambuadi ua mundu, ua londekesa o nguzu kála o felu? (b) O utuma mu inama ia kiteka ulombolola ihi?
8 O mutué ua kasambuadi ua kiama kia muxitu, ua londekesa o kutena kuê, kioso kia nganhala o Ita ia Dianga ia bhiti ku Mundu. Kioso kia bhiti o Ita ia Kaiiadi ku Mundu, o mutué ua kasambuadi ua londekesa o kutena kuê, kála o felu. * Kioso kia bhiti o ita íii, saí ithangana o mutué ua kasambuadi ua londekesa hanji o kutena kua difu ni felu. Mu kizuua kia Ngana o felu a i fungu ni utuma.
9 O Jimbangi ja Jihova, tundé ukulu a mesenene kuijiia se ihi ilombolola o inama ia kiteka kia kisuma. O divulu dia Daniiele 2:41, di jimbulula o o felu ia fungu ni utuma, “utuminu” umoxi ngó. Kienhiki tu tena kuijiia kuila o utuma ulombolola ua Grã-Bretanha ni Estados Unidos a ua tundu ku Utuminu ua Loma, a u tange kuila inama ia felu. Daniiele uambe kuila o utuma ulombolola o “mbutu ia athu” mba athu ahatu. (Dan. 2:43) O athu eji zozesa o Kutena kua Utuminu ua Grã-Bretanha ni Estados Unidos, mu ku jijila ima ia a tokala, mu veji dia ku kalakala, ka mesena ku a tumina ku Utuminu iú. O athu a bhanga kima phala ku zozesa o kutena kua Utuminu ua Grã-Bretanha ni Estados Unidos iala ni ngunzu kála felu. A dituna ué ukexilu ua Grã-Bretanha ni Estados Unidos, ua ku tumina. Kioso kia sola mutuameni, muéne ka tena ku kumbidila o ikanenu ioso ia bhange. Daniiele ua kanena: ‘O utuminu ió, ua ka kala ku mbandu kuku ua suína, o ku mbandu ia mukuá ua zoza.’—Dan. 2: 42; 2 Tim. 3:1-3.
10, 11. (a) Ihi ia-nda bhita ni “inama?” (b)Ihi i tuejiia ia lungu ni muxinda ua milembu?
10 Lelu, o utuminu ua Grã-Bretanha ni Estados Unidos ene mu suínisa o ukamba uâ, ene a di ta mu maka a mundu. O ikanenu ia lungu ni kiteka kionene, ni kiama kia muxitu, kilondekesa kuila o Utuminu ua Grã-Bretanha ni Estados Unidos ku Mundu, ka-nda ku u bhingana ku utuminu uéngi. Sumbala o utuminu iú, ua sukina ki uala ni kutena kua sokela ni Loma ulombolola o matabela a felu, maji né kiki uene ki ua-nda batula o ukamba uâ.
11 O kuila o milembu ilombolola kima? Xinganeka: Mu isuma ia mukuá, Daniiele ua tumbula se ji mbinga ji kuxi jala—ku mitué ia iama ia muxitu. O ji mbinga jiji jala ni dijimbuluilu. Maji kioso kia tumbula o kiteka, Daniiele ka tumbula se milembu ikuxi. Kiki kilondekesa kuila o milembu ki iala ni valolo, sumbala o kiteka kia kexile ni maku, matabela, ni inama. Daniiele ka zuela kuila o inama eji i bhanga ni felu, ni utuma. Mu ima ia zuela, u tu londekesa kuila o Utuminu ua Grã-Bretanha ni Estados Unidos uene ngó ua-nda tumina kioso o Utuminu ua Nzambi ua-nda takula o “ditadi” ku inama ia kiteka.—Dan. 2:45.
O UTUMINU UA GRÃ-BRETANHA NI ESTADOS UNIDOS NI MBINGA JIIADI JA KIAMA KIA MUXITU
12, 13. O ji mbinga jiiadi ja kiama kia muxitu, ilombolola ihi ni ihi ia bhange?
12 Sumbala o Utuminu ua Grã-Bretanha ni Estados Unidos, a u funga ni felu, ni utuma, o isuma ia bhana Jezú kua Nzuá, ilondekesa kuila o utuminu iú ueji kima kia isunji mu izuua isukidila-ku. Ihi ieji bhita? Nzuá ua mono mu kisuma ji mbinga jiiadi ja kiama kia muxitu, ia mu zuela kála mudikixi. O kiama kia muxitu kiki kia kisunji, kilombolola ihi? O ji mbinga jiiadi, o kutena kua jisobha jiiadi. Nzuá ua mono dingi o Utuminu ua Grâ-Bretanha ni Estados Unidos , ua mu bhanga isunji.—Tanga Dijingunuinu 13:11-15.
13 O kiama kia muxitu kia bhana kutena ku kiteka kia difuangana ué kála kiama kia muxitu. Nzuá ua soneka kuila, o kiteka kia kiama kia muxitu kieji moneka, ni kieji ku jimuka, ni ku moneka dingi lua mukuá. Kiki kia bhiti muene kioso kia zubha o Ita ia dianga ku mundu kiene kia moneka o kisangela kiki. O utuminu ua Grã-Bretanha ni Estados Unidos, a suínisa o ifuxi ia mundu ku di bunda ni kisangela kiki, phala ku a kuatekesa ku kisangela kiki. * A ki ixanene Liga das Nações. O Liga das Nações ia jimuka kioso kia mateka o Ita ia Kaiiadi ia bhiti ku Mundu. Kioso kia bhiti o ita íii, o mundu ua Nzambi ua boko kuila kala kia ki kanene mu divulu dia Dijingunuinu, kuila o kiteka kia kiama kia muxitu kieji moneka dingi. Kia moneka muene—o kisangela kia Nações Unidas.—Dij. 17:8.
14. Mukonda diahi o kiteka kia kiama kia muxitu kiene o “kanake ku jisobha?”
14 Nzuá ua zuela kuila o kiteka kia kiama kia muxitu, muene o “kanake ku jisobha.” Mukonda diahi a ki xana sobha? Ki kilombolola kuila o kiama kia muxitu, o mutué ua kanake, ua kiama kia muxitu kia dianga. Kilombolola ngó o kiteka kia kiama. O kutena kuala na-ku a mu bhana-ku ku ifuxi, bhenge-bhenge o utuminu ua Grã-Bretanha ni Estados Unidos. (Dij. 17:10, 11) Maji kiene ki tambula kutena phala ku kala sobha, kiki, kia-nda bheka izulukutu iavulu ku mundu.
O KITEKA KIA KIAMA KIA MUXITU KIA-NDA JIBHA O KIDIA-NZUNGA
15, 16. O kidia-nzunga kilombolola ihi, ni ihi iene mu bhita ni athu a mu suínisa?
15 Kala kiambe Nzuá, kidia-nzunga kia xikama ku a kiama kia muxitu kia kusuka—kiene o kiteka kia kiama kia muxitu—kidia-nzunga kia kifika, kia mu tumina. Muéne a mu ixana “Babilonha ia Dikota. (Dij. 17:1-6) O kidia-nzunga kiki, kilombolola o jingeleja joso ja makutu, bhenge-bhenge o jingeleja ja Kidistándade. Kiene kimoxi ué o kidia-nzunga kiala ku thandu a kiama o jingeleja ja makutu ene mu kuatekesa o Liga das Nações ni Nações Unidas, o kisangela kia jingeleja ja makutu Babilonha, kia mesena ku tumina o isangela íii.
16 Tundé mu izuua ia Ngana, tuene mu mona kuila Babilonha ia Dikota, ua xikama ku thandu a menha, o menha enhá, o athu ene ku mu suínisa, a mu kukuta ni lusolo. (Dij. 16:12; 17:15) Mu kifika, kioso o kiteka kia kiama kia muxitu kia moneka ku dimatekenu, o jingeleja ja Kidistándade—o mbandu ia beta-kota ia Babilonha ia Dikota—ku jixi ja Ocidente. Lelu o athu kene dingi mu belesela o ilongesu ia jingeleja, ni ku kuatekesa o atumeni iâ. Mu kidi, saí athu a xikina kuila o jingeleja jene ji bheka o maka. Athu avulu, mba kibuka kia athu ku jixi ja Ocidente, ene mu di kola phala ku zubha o jingeleja ku mundu.
17. Ihi ia-nda bhita ni jingeleja ja makutu, ni mukonda diahi?
17 O jingeleja ja makutu, ki ja-nda bhua mukonda o athu a mesena ji bhua. O kidia-nzunga kia-nda kolokota ku kala ni kutena, o jisobha ja-nda kolokota ué o ku mu fukamena, katé Nzambi kia a ta ku mixima iâ o kilunji kia tokala o ku bhanga. (Tanga Dijingunuinu 17:16, 17.) Kua kambe bhofele, Jihova ua-nda bhangesa kuila, o jinguvulu ja mundu ua Satanaji, ku buika Babilonha. Ene a-nda zubha o fuma iê, ni ku buika o jimbote jê. O izulukutu íii, nange i moneka kala ki ia-nda bhita, kála m’ukulu. Lelu o kidia-nzunga kiene mu suínisa o kiama kia muxitu. Muéne ua-nda bua ku thandu dia kiama kikusuka. Kia-nda bua muene sé ku laleka.—Dij. 18:7, 8, 15-19.
O KIAMA KIA MUXITU A-NDA KI BUIKA
18. (a) Ihi ia-nda bhanga o kiama kia muxitu, ni ihi ia-nda bhita? (b) O divulu dia Daniiele 2:44, dizuela kuila o Utuminu ua Nzambi, ua-nda buika jinguvulu jebhi? (Tanga ku dífue 17.)
18 Kioso kia-nda buika o jingeleja ja makutu, kiama kia muxitu, Satanaji ua-nda suínisa o jinguvulu, ku bhânga ni Utuminu ua Nzambi. Mukonda ka tena ku luua ni utuminu ua diulu, o jisobha ja ixi, a-nda londekesa o njinda iâ ku athu mu ixi ene mu kuatekesa o Utuminu ua Nzambi. O kizulukutu kiki, kia-nda bhita muene. (Dij. 16:13-16; 17:12-14) Daniiele ua soneka o ima ia-nda bhita ku ita ia sukina. (Tanga Daniiele 2:44.) O kiama kia muxitu, kia tange mu divulu dia Dijingunuinu 13:1, ni kiteka kiê, ni ji mbinga jiiadi ja kiama kia muxitu, a-nda a buika.
19. Kidielelu kiahi ki tu tena ku kala na-kiu, ni ihi i tua tokala ku bhanga lelu?
19 Tuala mu izuua ia sukina-ku ku mutué ua kasambuadi. Ki kua-nda moneka dingi mitué iéngi ande dia ku i buika. O utuminu ua Grã-Bretanha ni Estados Unidos uene ua-nda kala ku utuminu, kioso kia-nda buika o jingeleja joso. O ikanenu ia Daniiele, ni ia Nzuá iene mu di kumbidila ioso. Tu tena ku dielela kuila o kibuikilu kia jingeleja, kia-nda bhita muene sé ku laleka mu ita ia Alumajedone. Nzambi uene mu tu tangela o ima ioso ia-nda bhita, mu kithangana kia tokala. O kuila, tua-nda belesela o itendelesu íii? (2 Phe. 1:19) Kiki kiene o kithangana kia ku kala ku mbandu ia Jihova mu ku zokela o Utuminu uê.—Dij. 14:6, 7.
[Tanga mu luji]
^ kax. 3 Mu Bibidia, dikuinhi, dilombolola kima kia muvimba mba kia tenena—ilombolola o mautuminu a tundu ku utuminu ua Loma.
^ kax. 5 Sumbala mautuminu oso a mundu ene mu tumina kiá tundé hama ia 18, Nzuá ua jimbulula kuila jene jeji moneka mu kizuua kia Ngana. O ki kumbidilu kia kisuma mu divulu dia Dijingunuinu, kia di kumbidila mu “kizuua kia Ngana.” (Dij. 1:10) O mutué ua kasambuadi, o utuminu ua Grã-Bretanha ni Estados Unidos a mateka ku tumina kumoxi, kioso kia bhiti o Ita ia dianga ku Mundu.
^ kax. 8 Kala kia kanena Daniiele, kioso kieji bhita o Ita ia Kaiiadi o Grã-Bretanha ni Estados Unidos a mu Tumina ku Mundu eji bhanga ima ia iibha. Muéne ua soneka: ‘Ua ka bhanga isunji ni ku jibha o mundu.’ (Dan. 8:24) Mu kifika, o Grã-Bretanha ni Estados Unidos a jibha athu avulu, kioso kia takula o matenda a iiadi ku mautuminu a mukuá.
^ kax. 13 Tanga o divulu, Revelação—Seu Grandioso Clímax Está Próximo!, mu jimbandu ja 240, 241, 253, mu phutu.
[Ibhuidisu ia ku dilonga]
[Kidikisu ku mbandu 19]
A NANHI A BHANGA MBANDU KU ‘MAUTUMINU OSO ENHÁ?’
O divulu dia Daniiele 2:44, dia kanena kuila o Utuminu ua Nzambi ‘ua ka sasujula o mautuminu oso enhá.’ O kikanenu kiki, kia lungu ngó ni mautuminu a bhanga mbandu ku kiteka.
Ihi i tuamba ia lungu ni mautuminu a mukuá? O kikanenu mu divulu dia Dijingunuinu, ki jimbulula kiambote o mautuminu enhá. Di londekesa kuila, o “jisobha mu ngongo ioso, [a-nda] ku a kasa ku ita ia kizuua kia Dikota kia Nzambi, Muteni-a-Ioso.” (Dij. 16:14; 19:19-21) Kiki kilondekesa kuila, o mautuminu a kiteka kene ngó an-nda a buika ku Alumajedone, a-nda buika ué o mautuminu a mukuá mu ngongo.
