Jehofa o Utolla Dilo “tše di Tlago go Direga Kgauswinyane”

“Kutollo ka Jesu Kriste, yeo Modimo a mo neilego yona gore a bontšhe bahlanka ba gagwe dilo tše di tlago go direga kgauswinyane.”—KUT. 1:1.

O BE O TLA ARABA BJANG?

Ke dikarolo dife tša seswantšho se segolo kudu tšeo di emelago Mmušo wa Lefase wa Maisemane le Maamerika?

Johane o bontšha bjang tswalano magareng ga Mmušo wa Lefase wa Maisemane le Maamerika le Ditšhaba tše Kopanego?

Daniele le Johane ba hlalosa bjang bofelo bja pušo ya batho?

1, 2. (a) Diporofeto tša Daniele le Johane di re thuša gore re dire eng? (b) Dihlogo tše tshela tša mathomo tša sebata di emela eng?

DIPOROFETO tša Daniele le Johane di swana ka ditsela tšeo di re thušago go kwešiša seo se bolelwago ke ditiragalo tše dintši tše di diregago gona bjale mo lefaseng le tšeo di sa tlago go direga. Re ka ithuta eng ka go bapetša pono ya Johane ya sebata, pego ya Daniele ya sebata se se boifišago seo se bego se na le manaka a lesome, gotee le tlhathollo ya Daniele ya seswantšho se segolo kudu? Le gona go kwešiša ga rena gabotse diporofeto tšeo go swanetše go re tutueletša go dira eng?

² Anke re ahlaahleng pono ya Johane ya sebata. (Kut., kgao. 13) Go etša ge re bone sehlogong se se fetilego, dihlogo tše tshela tša mathomo tša sebata di emela Egipita, Asiria, Babilona, Media le Peresia, Gerika gotee le Roma. Ka moka ga tšona di ile tša hloya peu ya mosadi. (Gen. 3:15) Roma, e lego hlogo ya botshelela, e ile ya dula e le matla dipolitiking nywagakgolo ka morago ga ge Johane a ngwadile pono ya gagwe. Mafelelong, hlogo ya bošupa e be e tla tšeela Roma sebaka. Ke mmušo ofe wa dipolitiki wa lefase woo o ilego wa e tšeela sebaka, gomme o be o tla swara bjang peu ya mosadi?

BRITHANIA LE UNITED STATES DI TŠEA MMUŠO

3. Sebata se se boifišago sa manaka a lesome se emela eng, gomme manaka a lesome a swantšhetša eng?

³ Re ka kgona go tseba hlogo ya bošupa ya sebata seo go bolelwago ka sona go Kutollo kgaolo 13 ka go bapetša pono ya Johane le pono ya Daniele ya sebata seo se boifišago sa manaka a lesome. * (Bala Daniele 7:7, 8, 23, 24.) Sebata seo Daniele a se bonego se be se swantšhetša Mmušo wa Lefase wa Roma. (Bona tšhate go matlakala 12-13.) Ngwagakgolong wa bohlano C.E., Mmušo wa Roma o ile  wa thoma go felelwa ke matla. Manaka a lesome ao a bego a metše hlogong ya sebata seo se se boifišago a emela mebušo yeo e tšwilego mmušong woo.

4, 5. (a) Lenaka le lenyenyane le ile la dira eng? (b) Hlogo ya bošupa ya sebata e emela eng?

⁴ Go bolelwa ka go lebanya ka mebušo yeo e emelwago ke manaka a mane ao a bego a metše hlogong ya sebata se se boifišago. A mararo a ona a kgolwa ke le lengwe la manaka ao, “le lenyenyane.” Seo se ile sa phethagala ge Brithania, e lego naga yeo e bego e le koloni ya Mmušo wa Roma, e be e thoma go ba le matla. Brithania e be e le mmušo o nyatšegago go ba go fihla ngwagakgolong wa bo-17. Dikarolo tše dingwe tša Mmušo wa Roma ya bogologolo—Sepania, Netherlands le Fora—di be di na le tutuetšo e kgolo. Brithania e ile ya kgola mebušo yeo ka go latelana, ya e tloša maemong a yona a phagamego. Bogareng bja ngwagakgolo wa bo-18, Brithania e be e batamela go ba mmušo o matla wa lefase. Eupša e be e se ya tšwa e fetoga hlogo ya bošupa ya sebata.

⁵ Gaešita le ge Brithania e ile ya ba le matla, dikoloni tša yona tša Amerika Leboa di ile tša ikemela. Lega go le bjalo, United States e ile ya dumelelwa gore e matlafale, e šireleditšwe ke matla ao Brithania e bego e na le ona a madira a ka lewatleng. Ge letšatši la Morena le be le thoma ka 1914, Brithania e be e le mmušo o mogolo wo o sa kago wa bonwa historing gomme United States e be e le naga e matla kudu ka diintaseteri. * Nakong ya Ntwa ya I ya Lefase, United States e ile ya hlama segwera se se kgethegilego le Brithania. Ga bjale hlogo ya bošupa ya sebata e be e tšweletše e le Mmušo wa Lefase wa Maisemane le Maamerika. Hlogo ye e ile ya swara bjang peu ya mosadi?

6. Hlogo ya bošupa e ile ya swara bjang batho ba Modimo?

⁶ Nakwana ka morago ga ge letšatši la Morena le thomile, hlogo ya bošupa e ile ya hlasela batho ba Modimo—mašaledi a bana babo Kriste mo lefaseng. (Mat. 25:40) Jesu o bontšhitše gore nakong ya go ba gona ga gagwe, mašaledi a peu yeo a tla be a le gona mo lefaseng. (Mat. 24:45-47; Bagal. 3:26-29) Mmušo wa Lefase wa Maisemane le Maamerika o ile wa lwa le bakgethwa bao. (Kut. 13:3, 7) Ntweng ya I ya Lefase, o ile wa gatelela batho ba Modimo, wa thibela tše dingwe tša dikgatišo tša bona gomme wa lahlela baemedi ba sehlopha sa mohlanka yo a botegago kgolegong. Hlogo ya bošupa ya sebata e ile ya nyaka e fediša modiro wa boboledi ka nakwana. Jehofa o ile a bona e sa le pele tiragalo yeo e makatšago gomme a e utollela Johane. Le gona Modimo o ile a botša Johane gore karolo ya bobedi ya peu yeo e be e tla tsošološwa gomme ya dira modiro o oketšegilego wa moya. (Kut. 11:3, 7-11) Histori ya mehleng yeno ya bahlanka ba Jehofa e tiišetša gore ditiragalo tšeo di ile tša direga.

MMUŠO WA LEFASE WA MAISEMANE LE MAAMERIKA GOTEE LE DINAO TŠA TŠHIPI LE LETSOPA

7. Hlogo ya bošupa ya sebata e tswalana bjang le seswantšho se segolo kudu?

⁷ Hlogo ya bošupa ya sebata e tswalana bjang le seswantšho se segolo kudu? Brithania—go akaretša le United States—di tšweletše Mmušong wa Roma. Lega go le bjalo, go thwe’ng ka dinao tša seswantšho? Di hlaloswa e le tšhipi e tswakanego le letsopa. (Bala Daniele 2:41-43.) Tlhaloso yeo e dumelelana le nako ya go thoma ga pušo ya hlogo ya bošupa—Mmušo wa Lefase wa Maisemane le Maamerika. Go fo etša ge selo seo se dirilwego ka tšhipi le letsopa se se sa tia go swana le seo se dirilwego ka tšhipi feela, Mmušo wa Lefase wa Maisemane le Maamerika le wona ga se wa tia go swana le mmušo woo o tšwelego go wona. Seo se diregile bjang?

8, 9. (a) Mmušo wa bošupa wa lefase o ile wa bonagatša bjang matla a wona a swanago le a tšhipi? (b) Letsopa leo le lego dinaong tša seswantšho le emela eng?

 ⁸ Ka dinako tše dingwe, hlogo ya bošupa ya sebata e ile ya bonagatša dika tša go swana le tšhipi. Ka mohlala, e ile ya bontšha matla a yona ka go fenya Ntwa ya I ya Lefase. Ntweng ya II ya Lefase, matla a swanago le tšhipi a mmušo wa hlogo ya bošupa a ile a bonagala gape. * Ka morago ga ntwa yeo, ka dinako tše dingwe hlogo ya bošupa e ile ya bonagatša dika tša go swana le tšhipi. Eupša go tloga mathomong, tšhipi yeo e be e tswakane le letsopa.

⁹ Ke kgale bahlanka ba Jehofa ba nyaka go kwešiša seo se bolelwago ke dinao tša seswantšho se. Daniele 2:41 e bolela gore tšhipi e tswakanego le letsopa ke “mmušo” o tee, e sego e mentši. Ka gona, letsopa le emela batho le mekgatlo yeo e hwetšwago moo Mmušo wa Lefase wa Maisemane le Maamerika o nago le tutuetšo, e lego tšeo di o dirago gore o se tie go swana le tšhipi e matla ya Mmušo wa Roma. Letsopa le hlaloswa e le “bana ba batho,” goba bao e lego batho feela. (Dan. 2:43) Mmušong wa Lefase wa Maisemane le Maamerika, batho ba bantši ba ile ba lwela ditshwanelo tša bona ka masolo a go lwela ditshwanelo tša selegae, mekgatlo yeo e emelago bašomi le mekgatlo e ikemetšego. Batho ba tlwaelegilego ba fokodiša bokgoni bja Mmušo wa Lefase wa Maisemane le Maamerika bja go buša ka matla a swanago le a tšhipi. Le gona, dikgopolo tše di thulanago gotee le dipoelo tšeo di nyakilego di lekana tša dikgetho tšeo go tšona go feleletšago go se na yo a nago le dibouto tše di mo neago matla a go buša ka mo go feletšego, di fokodišitše gaešita le matla a baetapele ba tumilego, mo e lego gore ga ba na matla a go hloma melao ya bona. Daniele o boletše gore: “Karolo e nngwe ya mmušo woo e tla ba e tiilego gomme e nngwe ya ba e fokolago.”—Dan. 2:42; 2 Tim. 3:1-3.

10, 11. (a) Bokamoso bja “dinao” ke bofe? (b) Re ka phetha ka go re’ng ka palo ya menwana?

¹⁰ Lekgolong la bo-21 la nywaga, Brithania le United States di ile tša tšwetša pele tswalano ya tšona ya moswananoši, gantši di gata mogato ditabeng tša lefase di le gotee. Diporofeto tšeo di bolelago ka seswantšho se segolo kudu le ka sebata di tiišetša gore Mmušo wa Lefase wa Maisemane le Maamerika o ka se tšeelwe legato ke mmušo le ge e le ofe o mongwe wa lefase. Mmušo wo wa mafelelo wa lefase o ka fo ba o se wa tia go swana le woo o bego o swantšhetšwa ke maoto a tšhipi, eupša o ka se we ka bowona.

¹¹ Na go na le seo se bolelwago ke palo ya menwana ya seswantšho se? Ela hloko taba še: Diponong tše dingwe, Daniele o bolela ka dipalo tše itšego ka go lebanya—ka mohlala, o bolela ka palo ya manaka ao a lego dihlogong tša dibata tše fapafapanego. Go na le seo se bolelwago ke dipalo tšeo. Lega go le bjalo, ge Daniele a bolela ka seswantšho seo se segolo kudu, ga a bolele ka palo ya menwana. Ka gona, ga go bonagale palo ya menwana yeo e na le seo e se bolelago, go fo swana le ge palo ya matsogo, diatla, menwana, maoto le dinao tša sona e se na seo e se bolelago. Daniele o bolela ka go lebanya gore menwana e tla ba ya tšhipi e tswakanego le letsopa. Go ya ka tlhaloso ya gagwe, re ka phetha ka gore Mmušo wa Lefase wa Maisemane le Maamerika ke wona woo o tlago go ba o buša ge “leswika” leo le emelago Mmušo wa Modimo le wela dinao tša seswantšho seo.—Dan. 2:45.

MMUŠO WA MAISEMANE LE MAAMERIKA GOTEE LE SEBATA SA MANAKA A MABEDI

12, 13. Sebata sa manaka a mabedi se emela eng, gomme se dira eng?

¹² Gaešita le ge Mmušo wa Lefase wa Maisemane le Maamerika e le tšhipi e tswakanego le letsopa, dipono tšeo Jesu a di bontšhitšego  Johane di bontšha gore mmušo wo o tla tšwela pele o kgatha tema e bohlokwa go theoša le mehla ya bofelo. Seo se bjalo bjang? Johane o bone pono ya sebata sa manaka a mabedi seo se bego se bolela go swana le drakone. Sebata se sa go makatša se emela eng? Se na le manaka a mabedi, ka gona ke mmušo wa mohlakanelwa. Johane o sa dutše a bona Mmušo wa Lefase wa Maisemane le Maamerika, eupša mo lebakeng le o o bona o phetha karolo e kgethegilego.—Bala Kutollo 13:11-15.

¹³ Sebata se thekga taba ya gore go hlangwe seswantšho sa sebata. Johane o ngwadile gore seswantšho seo sa sebata se be se tla ba gona, sa timelela, gomme sa tsoga gape. Seo ke sona seo se ilego sa direga ka mokgatlo woo o bego o thekgwa ke Brithania le United States, e lego mokgatlo woo o bego o reretšwe go kopanya le go emela mebušo ya lefase. * Mokgatlo woo o ile wa tšwelela ka morago ga Ntwa ya I ya Lefase gomme o ile wa bitšwa Kgwerano ya Ditšhaba. O ile wa timelela ge go phulega Ntwa ya II ya Lefase. Ntweng yeo, batho ba Modimo ba ile ba tsebatša gore go ya ka boporofeta bja puku ya Kutollo, seswantšho sa sebata se be se tla rotoga gape. Se ile sa rotoga gape—e le Ditšhaba tše Kopanego.—Kut. 17:8.

14. Ke ka kgopolo efe seswantšho sa sebata e lego “kgoši ya seswai”?

¹⁴ Johane o boletše gore seswantšho sa sebata ke “kgoši ya seswai.” Ka kgopolo efe? Ga go bolelwe ka sona e le hlogo ya seswai ya sebata seo se tšweletšego la mathomo. E fo ba e le seswantšho sa sebata seo. Matla le ge e le afe ao se nago le wona a tšwa go ditšhaba tšeo e lego ditho tša sona, kudukudu ditšhaba tše kgolo tšeo di se thekgago, e lego Mmušo wa Lefase wa Maisemane le Maamerika. (Kut. 17:10, 11) Eupša se newa matla a go gata megato go swana le kgoši e le gore se dire selo se itšego ka go lebanya, e lego seo se tlago go thoma lelokelelo la ditiragalo tšeo di tlago go fetoša histori.

SESWANTŠHO SA SEBATA SE JA MOGWEBA-KA-MMELE

15, 16. Mogweba-ka-mmele o swantšhetša eng, gomme go diregile eng ka thekgo yeo a bego a e hwetša?

¹⁵ Go ya ka Johane, godimo ga sebata sa mmala o mohwibiduhwibidu, e lego seswantšho sa sebata, go dutše mogweba-ka-mmele wa seswantšhetšo. Leina la gagwe ke “Babilona o Mogolo.” (Kut. 17:1-6) Mogweba-ka-mmele yo o swantšhetša gabotse bodumedi bja maaka ka moka, bjoo ketapele ya bjona e lego dikereke tša Bojakane. Mekgatlo ya bodumedi bja maaka e šegofaditše seswantšho sa sebata gomme e lekile go se šušumeletša go dira dilo tše itšego.

¹⁶ Lega go le bjalo, letšatšing la Morena, Babilona o Mogolo o šetše a bone ge meetse a gagwe, e lego batho bao ba e thekgago, a gopa ka tsela e makatšago. (Kut. 16:12; 17:15) Ka mohlala, ge seswantšho sa sebata se be se  tšwelela ka lekga la pele, dikereke tša Bojakane, e lego karolo yeo e bego e na le tutuetšo e kgolo ya Babilona o Mogolo, di be di laola dinageng tša ka Bodikela. Lehono, dikereke le baruti ba tšona ga di sa hlompšha e bile ga di sa thekgwa ke batho ba bantši. Ge e le gabotse, batho ba bantši ba dumela gore bodumedi bo kgatha tema dikgohlanong tšeo di lego gona e bile ke sebaki sa tšona. Palo e golago ya mekgatlo yeo e ipelaetšago le yeo e ratago ntwa ya dirutegi tša dinageng tša ka Bodikela e bolela phatlalatša gore go fedišwe tutuetšo ya bodumedi setšhabeng.

17. Ke eng seo se tlago go diragalela bodumedi bja maaka kgauswinyane, gomme ka baka la’ng?

¹⁷ Lega go le bjalo, bodumedi bja maaka bo ka se no hwelela. Mogweba-ka-mmele o tla dula a na le tutuetšo e matla, a leka go laela dikgoši gore di dire seo a se ratago go ba go fihlela ge Modimo a tsenya kgopolo e itšego ka dipelong tša babuši. (Bala Kutollo 17:16, 17.) Go se go ye kae Jehofa o tla dira gore mekgatlo ya dipolitiki ya tshepedišo ya Sathane, yeo e emelwago ke Ditšhaba tše Kopanego, e hlasele bodumedi bja maaka. Mekgatlo yeo e tla fediša tutuetšo ya gagwe gomme ya senya le mahumo a gagwe. Nywagasomeng e mmalwa e fetilego, tiragalo e bjalo e ka ba e be e bonagala e ka se kgonege. Lehono, mogweba-ka-mmele o dutše godimo ga sebata sa mmala o mohwibiduhwibidu ka go tekateka. Lega go le bjalo, a ka se we moo ganyenyane-ganyenyane. O tlo wa ka tšhoganetšo le ka tsela e sehlogo.—Kut. 18:7, 8, 15-19.

DIBATA DI A FEDIŠWA

18. (a) Sebata se tla dira eng, gomme seo se tla feleletša ka eng? (b) Daniele 2:44 e bolela gore Mmušo wa Modimo o tla fediša mebušo efe? (Bona lepokisi go letlakala 17.)

¹⁸ Ka morago ga gore bodumedi bja maaka bo fedišwe, sebata, e lego tshepedišo ya lefase la Sathane ya dipolitiki, se tla tutuetšwa gore se hlasele Mmušo wa Modimo. Ka ge dikgoši tša lefase di ka se kgone go fihla legodimong, di tla galefela bao ba thekgago Mmušo wa Modimo mo lefaseng. Dipoelo tša seo di ka se phemege. (Kut. 16:13-16; 17:12-14) Daniele o hlalosa karolo e nngwe ya ntwa yeo ya mafelelo. (Bala Daniele 2:44.) Sebata seo go boletšwego ka sona go Kutollo 13:1, seswantšho sa sona le sebata sa manaka a mabedi, di tla fedišwa.

19. Ke eng seo re ka kgodišegago ka sona, gomme ye ke nako ya gore re dire eng?

¹⁹ Re phela mehleng ya pušo ya hlogo ya bošupa. Ga go sa na dihlogo tšeo di tlago go tšwelela sebateng se pele ga ge se fedišwa. Mmušo wa Lefase wa Maisemane le Maamerika e tla ba e le wona o bušago lefase ge bodumedi bja maaka bo fedišwa. Diporofeto tša Daniele le Johane di phethagetše ka tsela e makatšago. Re ka kgodišega gore go se go ye kae bodumedi bja maaka bo tla fedišwa gomme ntwa ya Haramagedone ya thoma. Modimo o šetše a re utolletše ditaba tše. Na re tla ela hloko ditemošo tše tša boporofeta? (2 Pet. 1:19) Ye ke nako ya gore re eme le Jehofa gomme re thekge Mmušo wa gagwe.—Kut. 14:6, 7.

[Mengwalo ya tlase]

[Dipotšišo tša Thuto]

[Lepokisi go letlakala 17]

KE BOMANG BAO BA BOPAGO “MEBUŠO YE KA MOKA”?

Boporofeta bjo bo lego go Daniele 2:44 bo bolela gore Mmušo wa Modimo “o tla pšhatlaganya mebušo ye ka moka wa e fediša.” Boporofeta bjoo bo bolela feela ka mebušo yeo e emelwago ke dikarolo tše fapafapanego tša seswantšho seo.

Go thwe’ng ka mebušo e mengwe ka moka ya batho? Boporofeta bjo bo sepedišanago le bjo bja puku ya Kutollo bo utolla ditaba tše dingwe tše di oketšegilego. Bo bontšha gore “dikgoši tša lefase ka moka” di tla kgobokana gore di lwe le Jehofa ka “letšatši le legolo la Modimo Ramatlaohle.” (Kut. 16:14; 19:19-21) Ka gona, nakong ya Haramagedone go ka se fedišwe feela mebušo ya seswantšho seo se segolo kudu eupša go tla fedišwa le mebušo e mengwe ka moka ya batho.