Jehová Diosmi revelan “imam chaylla pasananta”

“Diosmi kaykunata Jesucristoman revelarqa serviqninkunaman imam chaylla pasananta willananpaq” (APO. 1:1).

¿IMATAM NIWAQ?

¿Nabucodonosorpa mosqosqan runapa mayqan partentaq tupan Gran Bretañawan Estados Unidos nacionkunawan?

¿Juanpa ima rikusqantaq qawachin Naciones Unidas nisqa kamachikuq kananpaq, Gran Bretañawan Estados Unidos nacionkunamanta atiy chaskisqanta?

¿Imaynatam Danielwan Juanqa willakurqaku kay Pachapi gobiernokunapa imayna puchukananmanta?

1, 2. a) ¿Imatam yachasunchik Danielpa chaynataq Juanpa willakusqankumanta? b) ¿Pikunawanmi tupan animalpa soqtan umankunaqa?

DANIELPA willakuyninkunawan Juanpa willakusqankunaqa allintam tupan. Kaykunamanta yachaykuspaqa, kunan tiempopi pasakusqantawan hamuq tiempopi tukuy pasakunantam allinta entiendesun. ¿Imakunapim tupan Juanpa revelacionpi chaskisqan chunka waqrayoq animalwan Danielpa willakusqan chunka waqrayoq manchakuypaq animalqa chaynataq Nabucodonosorpa mosqosqan runawanpas? ¿Imapaqmi kay willakuykunamanta yachasqanchikqa kallpanchawananchik?

² Puntata rimasun Juanpa revelacionninpi qawasqan animalmanta (Apo. 13 capitulo). Pasaq yachachikuypi qawamusqanchikman hinaqa, chay animalpa soqta kaq umankunaqa tupanmi Egipto, Asiria, Babilonia, Medopersia, Grecia hinaspa Roma nacionkunawan. Lliw kay nacionkunam warmipa mirayninpa contranpi mana allinkunata rurarqaku (Gen. 3:15). Pachaknintin watakuna pasaruptin Diospa revelasqanta Juan qellqaptinqa, hinallam Roma nacionqa enteron Pachapi munaychakuchkarqa. Ichaqa qanchis kaq umam rantinpi munaychakunan karqa. ¿Mayqan naciontaq kanan karqa, hinaspa imaynatam warmipa mirayninta qawanan karqa?

GRAN BRETAÑAWAN ESTADOS UNIDOS NACIONKUNAPA RIKURIMUSQANKU

3. ¿Piwanmi tupan manchakuypaq chunka waqrayoq animalqa, hinaspa chunka waqrankunapas?

³ Apocalipsis qellqapi 13 capitulonpi rimasqan animalpa qanchis kaq uma pi kasqanmanta yachanapaqqa, tupachinanchikmi Juanpa revelacionninta Danielpa mosqosqanpi rikusqan manchakuypaq chunka waqrayoq animalwan (leey Daniel 7:7, 8, 23, 24). * Kay animalqa tuparqam Roma nacionwan  (qaway 12, 13 paginakunata). Cristianokunapa tiemponpi 400 kaq watakunapim, Roma nacionqa rakinakuyta qallaykurqa. Chaynaqa, manchakuypaq animalpa umanpi wiñasqan chunka waqrakunaqa, tupanmi Roma nacionmanta rikurimusqan gobiernokunawan.

4, 5. a) ¿Imatam rurarqa taksa waqrachaqa? b) ¿Pitaq animalpa qanchis kaq umanqa?

⁴ Danielpa willakusqan chunka waqrayoq manchakuypaq animalmantam, sapaq “taksa waqracha” wiñaramuspan kimsa waqrakunata kiwllururqa. Kayqa cumplikurqam Roma nacionpa munaychakusqan Gran Bretaña nacion, aswan atiyniyoq kayta qallaykuptin. Kay nacionqa 1600 watakunapiqa manam ancha atiyniyoqchu karqa. Aswanmi, Roma nacionpa munaychakusqan kimsa nacionkuna aswan atiyniyoq karqaku, kaykunam España, Países Bajos hinaspa Francia nacionkuna karqaku. Ichaqa Gran Bretaña nacionmi paykunapa rantinpi aswan atiyniyoq rikurirurqa. 1700 watakunapaqqa aswan atiyniyoqñam enteron Pachapi rikurichkarqa. Hinaptinqa, ¿yaqachu chaypiqa manchakuypaq animalpa qanchis kaq uman rikurirurqa? Manaraqmá.

⁵ Gran Bretaña nacion atiysapa rikuriruptinpas, Estados Unidosmi paykunamanta rikurirurqa sapaq nacion hinaña. Hinaptinmi Gran Bretaña nacionpa yanapakuyninwan, Estados Unidospas ancha atiyniyoq nacionpi rikurirurqa. Arí, 1914 watapi Señorpa punchawnin qallaykuptinqa, Gran Bretaña nacionqa haykapimantapas ancha atiyniyoqmi karqa, Estados Unidos nacionpas tukuy ima rurasqanwanmi ancha atiyniyoq karqa. * Enteron Pachapi punta kaq guerra kachkaptinmi, iskayninku hukllawakururqaku. Chaynapim Gran Bretaña hinaspa Estados Unidos nacionkunaqa, animalpa qanchis kaq umanpi rukurirurqaku. ¿Imaynatam kay qanchis kaq umaqa warmipa mirayninta qawarqa?

6. ¿Imaynatam animalpa qanchis kaq umanqa Diospa llaqtanpa contranpi hoqarikurqa?

⁶ Señorpa punchawnin qallaykusqan qepallanmanmi, qanchis kaq umaqa Diospa llaqtanpa otaq Jesuspa wawqenkunapa contranpi hoqarikururqa (Mat. 25:40). Jesusqa willakurqañam chay tiempopi, warmipa mirayninmanta wakiqninqa kay Pachapi Diospa munayninta hinalla rurachkanankumanta (Mat. 24:45-47; Gal. 3:26-29). Hinaptinmi Gran Bretañawan Estados Unidos nacionkunaqa, ‘Diosllapaqña kawsaqkunapa contranpi peleayta’ qallaykurqa (Apo. 13:3, 7). Enteron Pachapi punta kaq guerrapim paykunaqa, Diospa llaqtanpa contranpi churakuspanku qellqankunata chinkarachiyta munarqaku hinaspapas punta apaqninkunatam presocharurqaku. Juanpa willakusqanman hinam Diosmanta willakuyninkutapas unay niqta harkarurqaku. Juanqa willakurqataqmi, warmipa mirayninmanta parten kaqkuna kawsariramunmankupas hina astawanraq Diosmanta willakunankumanta (Apo. 11:3, 7-11). Jehová Diospa willakusqanman hinam, warmipa mirayninpa partenqa kaqmanta astawan predicayta qallaykurqaku.

GRAN BRETAÑAWAN ESTADOS UNIDOS NACIONKUNA HINASPA MITUWAN FIERRO CHAQRUSQA CHAKIMANTA

7. ¿Nabucodonosorpa mosqosqan runapa mayqan partentaq, animalpa qanchis kaq umanwan tupan?

⁷ Animalpa qanchis kaq umanqa hina kaqllam Nabucodonosorpa mosqosqan runapa chakinwanqa, chayqa Gran Bretañawan Estados Unidos nacionkunam kanku. Kay iskaynin nacionkunamantam nichwan Roma nacionmanta rikurimusqankuta. Ichaqa, ¿imaynataq karqa Nabucodonosorpa mosqosqan runapa chakinqa? Danielpa willakusqanman hinaqa, mituwan hinaspa fierrowan chaqrusqam karqa (leey Daniel 2:41-43). Chayna kasqanqa allintam tupan animalpa qanchis kaq uman otaq Gran Bretañawan Estados Unidos nacionkuna rikurimuyta qallarimusqankuwan. Imapas mituwan hinaspa fierrowan  chaqrusqa kaspanqa, manamá allintachu takyan fierrollamanta rurasqa hinaqa. Chaynallataqmi Gran Bretañawan Estados Unidos nacionkunapas, mana allin takyasqachu kanku Roma nacion hinaqa. ¿Imanasqam chaynata ninchik?

8, 9. a) ¿Imaynatam animalpa qanchis kaq umanqa fierro hina kallpasapa kasqanta qawachirqa? b) ¿Imawantaq tupan Nabucodonosorpa mosqosqan runapa chakinpi mituqa?

⁸ Animalpa qanchis kaq umanqa fierro hina kallpasapa kasqantam qawachirqa enteron Pachapi punta kaq hinaspa iskay kaq guerra kasqanpi atipaspan. * Chaymanta qepamanpas wakinpiqa kallpasapa kasqantam qawachirqa. Ichaqa, Gran Bretañawan Estados Unidos nacionkuna atiyniyoq rikurimusqankumantaqa, ñam fierroqa mituwan chaqrusqaña karqa. ¿Ima ninantaq chayqa?

⁹ Ñawpaqmantaraqmi Jehová Diospa serviqninkunaqa allinta yachayta munarqanchik, Nabucodonosorpa mosqosqan runapa chakin ima ninan kasqanmanta. Daniel 2:41 nisqanpim willakun fierrowan mitu chaqrusqa chakiqa huk ‘gobiernolla’ kasqanta, manamá achkachu. Hinaptinqa, Danielpa willakusqanman hinaqa chay mituqa tupanmi ‘runakunawan’, chaymi Gran Bretañawan Estados Unidos nacionkunaqa mana allin takyasqachu kanku, fierrowan tupachisqa Roma nacion hinaqa (Dan. 2:43). Gran Bretañawan Estados Unidos nacionkunapa kamachisqan tiempopiqa, runakunaqa huñunakuruspanku hinaspa chaqwakunata ruraspankum imaymana derechonkuta mañakurqaku. Chaynata ruraspankum runakunaqa harkarunku Gran Bretañawan Estados Unidos nacionkuna fierro hina kallpayoq kanankuta. Manataqmi wakin reqsisqa kamachiqkunapas nacionninkupaq tanteasqankuta qespichinkuchu, runakunapa munasqankuman hina mana kasqanrayku. Chayna kananmantam Danielqa willakurqa, nirqam: ‘Chay gobiernom parten kanqa allin takyaq, partenñataq pisi atiyniyoqlla’, nispa (Dan. 2:42; 2 Tim. 3:1-3).

10, 11. a) ¿Imam pasanqa Nabucodonosorpa mosqosqan runapa chakinta? b) ¿Imatam yacharunchik Nabucodonosorpa mosqosqan runapa chakinpi dedonkunamanta?

¹⁰ Kunan tiempopiqa, Gran Bretañawan Estados Unidos nacionkunaqa huk sonqollam kanku, chaymi kay pachapi imapas kaptin kuskalla imatapas ruranku. Nabucodonosorpa mosqosqan runamanta willakuywan manchakuypaq animalmanta willakuypas, qawachiwanchikmi enteron Pachapi munaychakuq Gran Bretañawan Estados Unidos nacionkunapa rantinpi huk nacionqa manaña rikurimunanmanta. Fierrowan tupachisqa Roma nacion hina kallpasapa mana kaspanpas, manamá kikillanmantaqa chinkanqachu.

¹¹ ¿Yaqachu Nabucodonosorpa mosqosqan runapa chakinpi hayka dedonkuna kasqanqa imamantapas willakuchkanman? Danielqa willakunmá wakin animalkunapa waqran hayka kasqankumanta, chay willakusqanqa allin tupanachisqam kachkan. Ichaqa, chay runapa chakinpi hayka dedonkuna kasqanmantaqa manamá Danielqa willakunchu. Hinaptinqa, yaqachusmi imawanpas mana tupanchu, chaynallataqmi makinkunapas dedonkunapas chaynataq chakinkunapas mana imawanpas tupanachisqachu kachkan. Ichaqa Danielqa willakunmi, chay runapa chakinpi dedonkunaqa fierromantawan mitumanta kasqanta. Chaymi nichwan Diospa Gobiernonwan tupanachisqa “rumi” Nabucodonosorpa mosqosqan runapa chakinpi hapiruptin, Gran Bretañawan Estados Unidos nacionkuna enteron Pachapi munaychakunankumanta (Dan. 2:45).

GRAN BRETAÑAWAN ESTADOS UNIDOS NACIONKUNA HINASPA ISKAY WAQRAYOQ HUK ANIMALPAS

12, 13. ¿Piwantaq tupan iskay waqrayoq animalqa, hinaspa imatam rurarqa?

¹² Gran Bretañawan Estados Unidos nacionkuna fierrowan hinaspa mituwan chaqrusqa kaptinkupas, Jesusmi Juanman willarqa tukupay tiempopi  chay nacionkuna ima ruranankumanta. Juanmi rikurqa iskay waqrayoq huk animalta, hinaspam dragon hina rimarqa. ¿Piwantaq kayqa tupan? Iskay waqrayoq kasqanqa qawachinmi iskay nacionkuna kasqanta, chayqa tupantaqmi Gran Bretañawan Estados Unidos nacionkunawan. Chayna rikurisqanqa qawachinmi huk rurayniyoq kasqankuta (leey Apocalipsis 13:11 *, 12-15).

¹³ Kay iskay waqrayoq animalmi manchakuypaq animalpa “imagenninta” ruranankupaq kamachin. Juanqa willakurqataqmi chay animalpa imagennin rikuriramuspan chinkanamanta hinaspa kaqlla hatarimunanmantapas. Kay manchakuypaq animalpa imagenninqa tupanmi Sociedad de Naciones nisqawan, kaymi rikurichisqa karqa Gran Bretañawan Estados Unidos nacionkunawan, chaynapi lliw nacionkunata hukllawaspan paykunapa rantinpi imatapas rurananpaq. * Kay Sociedad de Naciones nisqaqa, rikuriramurqam enteron Pachapi punta kaq guerra tukuruptin, chinkarurqañataqmi enteron Pachapi iskay kaq guerra qallaykuptin. Chay guerra kachkaptinmi Diospa llaqtanqa willakurqa Apocalipsis nisqanman hina, chay animalpa imagenninqa kaqmanta rikurimunanta. Chaynamá pasakurqa, kunanqa Naciones Unidas sutiwanñam reqsisqa kachkan.

14. ¿Imanasqataq Juanqa nirqa animalpa imageninqa “pusaq kaq rey” kasqanta?

¹⁴ Juanqa willakurqam animalpa imagenninqa, “pusaq kaq rey” kasqanta. Chaywanqa manamá nichkanchu punta animalpa pusaq kaq uman kasqantaqa. Aswanqa punta animalpa ‘imagennillanmi’. Chayna kamachikuq kasqanqa manam kikillanmantachu hamun, aswanqa chay qanchis nacionkunamantam, astawanraqmi Gran Bretañawan Estados Unidos nacionkunamanta (Apo. 17:10, 11). Hinaptinqa, ¿imanasqam Juanqa nin “rey” kasqantaqa? Chaynataqa nin rey hina kamachinanpaq atiyta chaskisqanraykum, hinaptinmi rurasqanwan kay Pachapi tukuy ima pasakunqa.

ANIMALPA IMAGENNINMI CHUCHUMIKA WARMITA MIKUN

15, 16. ¿Piwantaq tupanachisqa kachkan “chuchumika” warmiqa, hinaspa imam pasarqa ‘yakunkunawan’?

¹⁵ Juanpa willakusqanman hinaqa, “chuchumika” warmim sillarayaspa rin manchakuypaq puka animalpi, chayqa manchakuypaq animalpa imagenninmi. Chay chuchumika warmiqa “Hatun Babilonia” niq sutitam urkunpi apan, hinaspam chay animalta controlan (Apo. 17:1-6). ¿Piwantaq tupanachisqa kachkan chay chuchumika warmiqa? Lliw pantay religionkunawanmi, puntapim kachkan cristiano tukuqkuna. Chay pantay religionkunaqa animalpa imagennintam anchata yanaparqaku hinaspam controlayta munarqaku.

¹⁶ Ichaqa Señorpa punchawnin qallaykusqanmantam, Hatun Babiloniaqa qawarqa ‘yakunkuna’ imayna chakisqanta otaq runankuna  pisiyasqanta (Apo. 16:12; 17:15). Animalpa imagennin rikuriramuptinqa, cristiano tukuqkunaqa achka nacionkunapim munaychakurqaku. Ichaqa kunan tiempokunapiqa, yaqa lliw runakunam manaña respetankuñachu nitaq yanapankuñachu. Aswanmi ninku guerrakunata religionkuna qatarichisqankumanta. Chay nacionkunapim yachaysapa runakunapas ninku lliw runakuna religionkunata qepanchanankupaq.

17. ¿Imataq pantay religionkunata pasarunqaña, hinaspa imanasqa?

¹⁷ Pantay religionkunaqa manamá pisi-pisimantaqa chinkanqakuchu. Chuchumika warmiqa hinallamá atiyniyoq kaspan nacionkunapi kamachiqkunatapas controlayta munanqa. Ichaqa ñamá Diosqa “paykunapa sonqonman kikinpa munasqanta ruranankupaq” churanqaña (leey Apocalipsis 17:16, 17). Jehová Diosqa ñam gobiernokunata otaq Naciones Unidas niqta tanqanqa, llapallan pantay religionkunatawan tukuy imankunatapas chinkachinanpaq. Chay pasakunantaqa manam haykapipas runakunaqa piensayllapas-piensarqakuchu. Kunanmi ichaqa chay chuchumika warmiqa, puka animalpa wasanmanta wichiykuchkanña. Manataqmá allillamantachu wichinqa, aswanqa wañuypaqmi qonqayllamanta wichiykunqa (Apo. 18:7, 8, 15-19).

ANIMALKUNAPA PUCHUKAYNIN

18. a) ¿Imatam puka animalqa ruranqa, hinaspa imapim tukunqa? b) Daniel 2:44 nisqanman hinaqa, ¿ima gobiernokunatam Diospa Gobiernonqa puchukachinqa? (Qaway 17 paginapi recuadrota.)

¹⁸ Pantay religionkuna puchukachisqa kaptinkuqa, Satanasmi puka animalta otaq gobiernokunata kallpanchanqa Diospa Gobiernonpa contranpi hoqarikunankupaq. Mana atisqankuraykum, gobiernokunaqa piñasqallaña kay Pachapi Diospa serviqninkunapa contranpiña hoqarikunqaku. Chaymanta imayna tukusqanqa Bibliapim qellqasqa kachkan (Apo. 16:13-16; 17:12-14). Danielpas willakurqam ima pasananmanta (leey Daniel 2:44). Arí, Diospa Gobiernonmi Apocalipsis 13:1 nisqanpi manchakuypaq animalta hinaspa chay animalpa imagennintawan iskay waqrayoq animaltapas puchukachinqa.

19. ¿Imamantam mana iskayrayananchikchu, hinaspa imatam kunan rurananchik?

¹⁹ Ñoqanchikqa kawsachkanchikmi animalpa qanchis kaq umanpa kasqan tiempopi. Puchukachisqa kanankamaqa, manañam hukqa rikurimunqañachu. Chaynaqa, pantay religionkuna puchukachisqa kaptinkuqa enteron Pachapim Gran Bretañawan Estados Unidos nacionkuna munaychakuchkanqaku. Ama qonqasunchu, Danielpawan Juanpa willakusqankunaqa tukuy imapim cumplikurqa. Hinaptinqa, manamá iskayrayachwanchu pantay religionkunapa puchukaynin hinaspa Armagedon punchawpas kayllapiña kasqanmantaqa. Jehová Diosqa willaykuwanchikmi hamuq punchawkunapi imakuna pasananmanta. Chaynaqa, ¿chay willakuykunapa nisqanman hinachu kawsachkanchik? (2 Ped. 1:19.) ¡Kunanmi Diosta kasukunanchik hinaspa Gobiernontapas yanapananchik! (Apo. 14:6, 7.)

[Willakuykuna]

[Kay yachachikuypa tapukuyninkuna]

[17 kaq paginapi recuadro]

¿PIKUNATAQ KANKU ‘LLAPALLAN KAY GOBIERNOKUNAQA’?

Daniel 2:44 (NM) willakusqanman hinaqa, Diospa Gobiernonmi “llapallan kay gobiernokunata ñutupaspan chinkachinqa”. Kay willakuyqa rimachkanmi Nabucodonosorpa mosqosqan runawan tupachisqa gobiernokunallamantam.

Hinaptinqa, ¿imatam nichwan wakin gobiernokunamantaqa? Apocalipsis qellqam willakun “kay pachapi llapallan reykuna” huñusqa kanku ‘tukuy atiyniyoq Diospa punchawnin guerrapi peleanankupaq’ (Apo. 16:14; 19:19-21). Chaynaqa, Armagedon punchawpim lliw kay Pachapi gobiernokuna chinkachisqa kanqaku.