Diosmi ‘sucedenanña kaqkunata’ sutʼinchan
Diosmi ‘sucedenanña kaqkunata’ sut’inchan
“Kayqa Jesucristoq rikuchiyninmi, chaytan Diosqa payman qorqan yaqaña sucedenan kaqkunata kamachinkunaman rikuchinanpaq.” (APO. 1:1.)
¿IMA NISPAN KUTICHIWAQ?
¿Hatunkaray runaq ima partenwanmi tupan Gran Bretaña, Estados Unidos nacionkuna?
¿Imatan Juan nirqan hukllachasqa hatun nacionmanta, Naciones Unidas nisqamantapas?
¿Imaynatan Danielpas, Juanpas profetizarqan kay pachapi gobiernokuna chinkapunanmanta?
1, 2. a) ¿Imatan entiendenchis Danielpa Juanpa profeciankunata t’aqwispa? b) ¿Mayqen hatun nacionkunan karqan wak’a animalpa soqta umankuna?
DANIELPA profecianqa allintan tupan Juanpa profecianwan. Chaykunata t’aqwispan allinta entiendesunchis kay tiempopi hamuq tiempopipas imakuna sucedenanta. ¿Imaynatan tupan Juanpa rikusqan wak’a animal, manchakunapaq chunka waqrayoq animalta Danielpa rikusqanwan, hinallataq hatunkaray runa mosqoypi rikhurisqanta Danielpa sut’inchasqanwanpas? ¿Imapaqmi kallpachawananchis chay profeciakunata entiendesqanchis?
2 Juanpa rikusqan wak’a animalmanta rimasun. (Apo. 13 cap.) Ñawpaqpi yachasqanchis hina, chay wak’a animalpa soqta umankunan karqan Egipto, Asiria, Babilonia, Medopersia, Grecia, Roma hatun nacionkuna; rikuchirqankutaqmi warmiq miraynin contra kasqankuta (Gén. 3:15). Chay rikhuriykunata Juanpa qelqasqan askha watakuna qhepamanpas, Roma nacionqa hatun kamachikuqllan kasharqan. Ichaqa qanchis kaq uman paypa rantinpi kamachikunanña karqan. ¿Mayqenmi chay hatun nación kanman, imaynatan warmiq miraynintapas tratanman?
GRAN BRETAÑA, ESTADOS UNIDOS NACIONKUNAQ RIKHURISQAN
3. ¿Ima nacionwanmi tupan chunka waqrayoq manchakuna animal? ¿Imawanmi tupan chunkantin waqrakuna?
3 Apocalipsis libropi, 13 capitulopi wak’a animal mayqen nacionchus kasqanta yachanapaqqa, Juanpa rikusqantan tupanachinanchis manchakunapaq chunka waqrayoq animalta Danielpa rikusqanwan (leey Daniel 7:7, 8, 23, 24). * Chay manchakunapaq animalqa Roma nacionmi karqan (qhaway 12, 13 paginakunata). 400 watakunamantapachan Roma nacionpa atiynin pisiyapurqan. Chhaynaqa, chay manchay animalpa chunka waqrakuna wiñamusqanqa tupan, Roma nacionmanta askha gobiernokuna rikhurimusqanwanmi.
4, 5. a) ¿Imatan huch’uy waqra ruwarqan? b) ¿Mayqen nacionkunan wak’a animalpa qanchis kaq uman?
4 Danielpa rikusqan chay chunka waqrayoq animalmantan huk “huch’uy waqra” wiñamurqan, chaymi p’akirqan kinsa waqrakunata. ¿Imaynatan chay hunt’akurqan? Roma nacionpa atiyninpi kaq Gran Bretaña aswan atiyniyoqman tukupuspa. Roma nacionpa atiyninpi kaq España, Países Bajos, Francia suyukunan aswan allin reqsisqakuna karqan. Gran Bretañan ichaqa 1600 watakunakama huch’uy suyu hinalla qhawarisqa karqan. Chaywanpas, pisi-pisimantan chay kinsa suyukunaq rantinpi aswan allin qhawarisqa kapurqan. 1750 watakunapaqqa pachantinmanta aswan atiyniyoq nacionñan kapusharqan. Chhaynaqa, ¿wak’a animalpa qanchis kaq umanñachu karqan? Manaraqmi.
5 Chay qhepallamanmi, norteamerica ladopi Gran Bretañaq atiyninpi kaq llaqtakuna, pay contra sayarispa Estados Unidos nacionman tukupurqanku. Chaywanpas, Gran Bretañaq yanapayniwanmi Estados Unidosqa atiyniyoq nacionman tukupullarqantaq. 1914 watapi Señorpa p’unchaynin qallariqtinqa, Gran Bretaña nacionqa aswan atiyniyoqmi kasharqan, Estados Unidos naciontaq pachantinmanta aswan qhapaq kapurqan. * Primera guerra mundialpin iskaynin nacionkuna hukllachanakuspa yanapanakurqanku. Chhaynapin wak’a animalpa qanchis kaq uman karqan: Gran Bretaña, Estados Unidos hatun nacionkuna. ¿Imaynatan chay qanchis kaq uma warmiq mirayninta tratarqan?
6. ¿Imaynatan Diospa llaqtanta tratarqan wak’a animalpa qanchis kaq uman?
6 Señorpa p’unchaynin qallariqtin hinan, qanchis kaq umaqa Diospa llaqtan contra otaq kay pachapi qhepaq Cristoq wawqenkuna contra sayarirqan (Mat. 25:40). Jesusmi willarqan runakunawanña mana rikuylla kashasqan tiempopi, akllasqa cristianokuna kay pachapi llank’ashanallanku kasqanta (Mat. 24:45-47; Gál. 3:26-29). Chay qanchis kaq hatun nacionmi ‘Diospaq ch’uya kawsaqkuna’ contra hatarirqan (Apo. 13:3, 7). Primera guerra mundialpin Diospa llaqtanta qatiykacharqan, wakin qelqankuna rakikunanta hark’arqan, Umalliq T’aqapi wakin kaqkunata carcelman wisq’arqan. Apóstol Juanman Jehová Diospa willasqan hina, predicación aparikunantapas huk tiempon sayachirqanku. Ichaqa, Diosmi Juanman willarqan akllasqa cristianokuna, wakmanta sayarispa Dios serviyninkuta aswan kallpawanraq aparinankuta (Apo. 11:3, 7-11). ¿Hunt’akurqanchu Diospa nisqan? Kay tiempopi Testigonkunata sucedesqanmi rikuchin Diospa willasqan hunt’akusqanta.
ISKAY HATUN NACIONKUNA, FIERROYOQ T’URUYOQ CHAKIKUNA
7. ¿Imapin tupan wak’a animalpa qanchis kaq uman hatunkaray runawan?
7 ¿Imapin tupan wak’a animalpa qanchis kaq uman hatunkaray runawan? Estados Unidos nacionqa Gran Bretaña nacionmantan lloqsirqan, chhaynapin nisunman iskaynin nacionkunapas Roma hatun nacionmanta lloqsisqankuta. ¿Imanisunmanmi hatunkaray runaq chakinmanta? Danielmi rikurqan fierromanta t’urumanta ruwasqa kasqanta (leey Daniel 2:41-43). Chay rikusqanqa tupanmi wak’a animalpa qanchis kaq uman rikhurimusqanwan, chaymi karqan hukllachasqa iskay hatun nacionkuna. T’uruwan fierrowan ruwasqa perqaqa manan kaqllatachu sayan fierrollawan ruwasqa perqa hina, chhaynallataqmi hukllachasqa hatun nacionpa atiyninqa aswan pisi Roma nacionmanta. Astawan chayta sut’inchasun.
8, 9. a) ¿Imaynatan qanchis kaq hatun nación rikuchirqan fierro hina kallpayoq kasqanta? b) ¿Imawanmi tupan hatunkaray runaq chakinpi t’uru?
8 Wak’a animalpa qanchis kaq umanqa mayninpin karqan fierro hina atiyniyoq, chaytan rikuchirqan primera guerra mundialpi atipaspa, hinallataq segunda guerra mundialpipas. * Qhepamanpas mayninpin rikuchishallarqan fierro hina atiyniyoq kasqanta. Ichaqa, hukllachasqa hatun nacionman tukupusqanmantapachan chay fierroqa t’uruwan chaqrusqa kasharqan. ¿Imaynapi?
9 Ñawpa tiempomantaraqmi Jehová Diospa testigonkunaqa entiendeyta munarqanku hatunkaray runaq chakin imawanchus tupasqanta. Daniel 2:41 texton willan t’uruwan chaqrusqa fierroqa huk ‘suyulla’ otaq reinolla kasqanta. ¿Imawanmi t’uruta tupanachikun? Hukllachasqa hatun nacionpa atiyninta pisiyachiq runakunawanmi, chhaynapin mana Roma nación hinachu fierro hina kallpayoq. Danielmi willan chay t’uruqa “runaq miraynin” otaq común runakuna kasqanta (Dan. 2:43, NM). Hukllachasqa hatun nacionpa kamachikuyninpiqa, runakunan derechonkuta reclamanku imaymana t’aqakunapi huñukuspa. Chay común runakunan hukllachasqa hatun nacionpa atiyninta pisiyachinku, chhaynapin manaña fierro hina kallpayoqchu. Chaymantapas, runakunaqa manan kaqllatachu politicamanta yuyaykunku, kamachikuqkunapas pisi runaq akllasqallanmi kanku, aswan allin reqsisqa autoridadkunapas pisi runaq yanapasqallanmi, chhaynapin ima prometesqankuta mana hunt’ayta atinkuchu. Danielpa kay profetizasqanmi hunt’akunpuni: ‘Chay suyuqa wakinpin kallpasapa wakinpitaq pisi kallpayoq kanqa’, nispa (Dan. 2:42; 2 Tim. 3:1-3).
10, 11. a) ¿Iman sucedenqa hatunkaray runaq ‘chakinta’? b) ¿Imatan nisunman hatunkaray runaq chaki dedonkunamanta?
10 Kay watakunapipas Gran Bretaña, Estados Unidos nacionkunaqa hukllachasqallan kashanku, imapas kaqtinqa sapa kutillanmi rikukun kuskalla ruwasqanku. Hatunkaray runamanta, wak’a animalmanta profeciakunan sut’inchan, hukllachasqa hatun nacionpa qhepantaqa manaña huk kananta. Qanchis kaq uma aswan pisi kallpayoqña Roma nacionmanta chaypas, manan kikillanmantachu urmaykunqa.
11 ¿Imawanpas tupanchu hatunkaray runaq chakinpa dedonkuna? Manchakunapaq animalta Daniel rikuspaqa, willarqanmi hayk’a waqrakunayoq kasqanta, hinallataq huk rikhuriykunapipas. Chay numerokunataqa manan yanqachu willarqan. Ichaqa, Danielqa manan willarqanchu hatunkaray runaq chaki dedonkuna hayk’a kasqanta. Chhaynaqa, yaqachus hina chaki dedonkunaqa mana imawanpas tupanchu, kaqllatataqmi nikunman makinmanta, maki dedonkunamanta, chakanmanta chakinmantapas. Ichaqa willanmi chaki dedonkuna fierromanta t’urumanta ruwasqa kasqanta. Chaywanmi entiendekun, maypachachus huk ‘qaqa’ rumi otaq Diospa Reinon hatunkaray runaq chakinta thuniqtinqa, hukllachasqa hatun nacionmi atiyniyoq kashanqa (Dan. 2:45).
HUKLLACHASQA HATUN NACIÓN, ISKAY WAQRAYOQ WAK’A ANIMAL
12, 13. ¿Imawanmi tupan iskay waqrayoq wak’a animal? ¿Imatan ruwarqan?
12 Hukllachasqa hatun nación t’uruyoq fierrowanña tupan chaypas, imaymanatan ruwashanallan karqan, chaytan yachanchis Juanta huk rikhuriypi Jesús rikuchisqanpi. ¿Imakunan chaykuna? Juanmi rikurqan iskay waqrakunayoq wak’a animalta, rimarqantaqmi dragón hina. ¿Imawanmi chay tupan? Iskay waqraqa, hukllachasqa iskay nacionkunan: Gran Bretaña, Estados Unidos nacionkunan, ichaqa huk ruwayta aparinankupaq (leey Apocalipsis 13:11-15).
13 Iskay waqrayoq wak’a animalmi kamachin qanchis umayoq wak’a animalpa “rikch’ayninta” ruwanankupaq. Juanmi willarqan chay wak’a animalpa rikch’aynin, rikhurimusqan qhepaman chinkapunanta hinaspa wakmanta sayarimunanta. Gran Bretaña, Estados Unidos nacionkunan rikhurichirqanku llapa gobiernokunaq sutinpi ruwananpaq huk organizacionta, chay hinapi pachantinpi llapa gobiernokunata hukllachananpaq, chayqa allintan tuparqan Juanpa willasqanwan. * Chaytan reqsikurqan Sociedad de Naciones nispa. Primera guerra mundialpin rikhurimurqan, chinkapurqantaq segunda guerra mundialpi. Chay guerra kasqan tiempopin Diospa llaqtan willarqan chay wak’a animalpa rikch’aynin hukmanta rikhurimunanta. Chaymi hunt’akurqan Naciones Unidas sutiwan rikhurimuspa (Apo. 17:8).
14. ¿Imaraykun Juan nirqan wak’a animalpa rikch’aynin ‘pusaq kaq rey’ kasqanta?
14 Juanmi willarqan wak’a animalpa rikch’aynin ‘pusaq kaq rey’ kasqanta. Ichaqa manan wak’a animalpa pusaq kaq umanchu, aswanpas ‘rikch’aynillanmi’. Chay ‘rikch’ayqa’ llapa nacionkunamantan atiyta chaskin, astawanqa paqarichiqnin hukllachasqa hatun nacionmanta (Apo. 17:10, 11). Ichaqa, ¿imaraykun Juan willan pusaq kaq rey kasqanta? Rey hina kaspa huk ruwayta aparinanpaq atiyta chaskisqanrayku, chay ruwasqanmi kay pachapi kawsayta cambianan karqan.
WAK’A ANIMALPA RIKCH’AYNIN RABONA WARMITA LLAT’ANAN
15, 16. ¿Piwanmi tupanachikun ‘rabona warmita’, imaynapi tarikun ‘askha ununkuna’?
15 Juanmi willan, sansaq-puka manchay wak’a animalpi otaq wak’a animalpa rikch’aynin patapi, huk ‘rabona warmi’ tiyashasqanta. Rabona warmiqa chay wak’a animaltan kamachin, sutichakuntaqmi “Hatun Babilonia”, nispa (Apo. 17:1-6). ¿Piwanmi tupanachikun chay warmita? Llapa pantasqa religionkunawan, astawanqa “cristianon kayku” niq religionkunawan. Llapa pantasqa religionkunan chay wak’a animalpa rikch’ayninta bendicinku, chapukunkutaq ruwasqankunamanpas.
16 Señorpa p’unchayninpin ichaqa Hatun Babiloniaq ‘askha unun’ otaq runankuna usqhaylla ch’akipurqan (Apo. 16:12; 17:15). Wak’a animalpa rikch’aynin rikhurimuqtinqa, “cristianon kayku” niq religionmi atiyniyoq karqan askha nacionkunapi. Kay tiempopin ichaqa chay religionpas umallinkunapas mana allin qhawarisqa kapun, qatikuqninkunapas manañan yanapanñachu. Askha runakunan yuyaykunku religionqa kay pachapi sasachakuykuna paqarichiq kasqanta. Hukkunapas nillankutaqmi kay pachapi religionkuna amaña kananta.
17. ¿Iman sucedenqa pisi tiempomanta pantasqa religionkunata, imaraykun chay sucedenqa?
17 Pantasqa religionkunaqa manan pisi-pisimantachu chinkanqa. Gobiernokunaq sonqonta Dios yuyaychanankaman rabona warmiqa atiyniyoq kanqa, gobiernokunaq ruwayninmanpas chapukunqa (leey Apocalipsis 17:16, 17). Pisi tiempomantan Diosqa yuyaychanqa Satanaspa makinpi kaq gobiernokunata, Naciones Unidas nisqawan pantasqa religionkuna contra hatarinankupaq, chhaynapin atiynintapas qhapaq kaynintapas tukuchinqa. Ñawpaq watakunapiqa manapaschá chayqa sucedenanpaq hinachu karqan. Kunanqa sut’in kashan; rabona warmiqa sansa puka wak’a animal patamanta urmaykunanpaq hinañan kashan. ¿Munayllatachu urmayunqa? Manan, qonqayllan hukpaqkama urmanqa (Apo. 18:7, 8, 15-19).
WAK’A ANIMALKUNAQ TUKUPUYNIN
18. a) ¿Imatan ruwanqa wak’a animal, imapin chay tukunqa? b) Daniel 2:44 textopi nisqan hina, ¿mayqen gobiernokunatan Diospa Reinon chinkachinqa? (Qhaway 17 paginapi recuadrota.)
18 Pantasqa religionkuna tukuchisqa kaqtinqa, wak’a animalmi otaq kamachikuqkunan kallpachasqa kanqaku Diospa Reinon contra hatarinankupaq. Diospa Reinonqa hanaq pachapitaq kashan chayqa, gobiernokunan sayarinqaku kay pachapi Diospa llaqtan contra. Ichaqa, imapichus chay tukunanqa yachakunñan (Apo. 16:13-16; 17:12-14). Danielmi willarqan imachus sucedenanta (leey Daniel 2:44). Apocalipsis 13:1 textopi qanchis umayoq wak’a animal, chay animalpa rikch’aynin, iskay waqrayoq wak’a animalpas chinkachisqan kanqaku.
19. ¿Imamantan mana iskayananchischu, imatan kunan ruwananchis?
19 Qanchis kaq umaq kamachikuynin tiempopin tiyashanchis. Manañan huk hatun nacionqa rikhurimunqañachu. Pantasqa religionkuna chinkachisqa kaqtinqa, Gran Bretaña, Estados Unidos nacionkunan atiyniyoq kashanqa. Ama qonqasunchu, Danielpa, Juanpa profeciankunaqa llapallanmi k’apakta hunt’akurqan. Chhaynaqa, pisi tiempollamantan chayamunqaña pantasqa religionkunaq tukukuynin, Diospa hatun p’unchayninpas. Jehová Diosqa willawanchismi imachus sucedenanta. ¿Makillachu kashasun profeciakunaq willasqanman? (2 Ped. 1:19.) ¡Kunanmi Diostaqa kasukunanchis, Gobiernontapas yanapananchis! (Apo. 14:6, 7.)
[Uranpi willakuykuna]
^ párr. 3 Bibliapi chunka numeromanta rimaspaqa, imapas hunt’asqa kaqwanmi tupanachikun. Chaymi kaypiqa tupanachikun Roma nacionmanta llapa gobiernokuna rikhurimuqwan.
^ párr. 5 Chay iskay nacionkuna, 1700 watakunapi atiyniyoqña karqanku chaypas, Juanmi nirqan Señorpa p’unchaynin qallariqtin hukllachanakuspa aswan atiyniyoq kapunankuta. Juanpa rikusqanqa ‘Señorpa p’unchayninpin’ hunt’akushan (Apo. 1:10). Chhaynapin iskaynin hatun nacionkuna, primera guerra mundialpi hukllachanakuspa, wak’a animalpa qanchis kaq uman kapurqan.
^ párr. 8 Danielmi kay reymanta profetizarqan: “Sinchitan purunyachinqa”, nispa. Chaywanmi willasharqan chay guerrapi imachus ruwananta (Dan. 8:24). Estados Unidos nacionmi hatun bombawan purunyachirqan hukllachasqa hatun nacionpa huknin kaq enemigonta.
^ párr. 13 Qhaway Apocalipsis... ¡se acerca su magnífica culminación!, librota, 240, 241, 253 paginakunata.
[Tapuykuna]
[17 paginapi recuadro]
¿PIKUNAN KANKU ‘LLAPA SUYUKUNA’?
Daniel 2:44 textoq nisqan hina, Diospa Reinonmi ‘llapa suyukunata ñut’uspa tukunqa’. Kay profeciaqa rimashan hatunkaray runaq partenwan tupaq gobiernokunallamantan.
¿Iman sucedenqa huk gobiernokunawan? Apocalipsis libropi profecian sut’ita willan, pachantinpi ‘reykunata’ ‘taripay p’unchaypi’ Dios contra maqanakunankupaq huñukusqanta (Apo. 16:14; 19:19-21). Chhaynaqa, Diospa hatun p’unchayninpiqa manan hatunkaray runaq partenwan tupaq gobiernokunallachu chinkachisqa kanqa, aswanpas pachantinpi llapa gobiernokuna iman.
