Jehová «namasiyunikgoy kskujnin wa ntu lakapala nalay»
Jehová «namasiyunikgoy kskujnin wa ntu lakapala nalay»
«Wa ntu stalanka [masiyalh] Jesucristo, wa ntu Dios ntimaxkilh lakimpi namasiyunikgoy kskujnin wa ntu lakapala nalay.» (APO. 1:1)
¿LA XKGALHTINANTI?
¿Tukuya xmakni lanka imagen kilhchanima tamapakgsin angloamericana?
Chuna la maʼakxilhnika apóstol Juan, ¿tuku akxtum katlawa lanka tamapakgsin angloamericana chu Naciones Unidas?
¿La xlichuwinankgonit Daniel chu Juan xlakata la nakamasputukan mapakgsinanin?
1, 2. 1) ¿Tuku katsiniyaw akxni akxilhaw tuku lichuwinankgolh pi xʼama la Daniel chu Juan? 2) ¿Tiku xkilhchanima xapulana akgchaxan akgxakga xla lapanit?
TUKU tsokgkgolh Daniel chu Juan watiya tuku lichuwinankgo. Komo nakalakputsananiyaw, nakatsiyaw lhuwa tuku lama kkakilhtamaku la uku chu tuku aku nala. ¿Tuku na xtachuna xalixkajni lapanit nema akxilhli Juan chu xalipekua lapanit nema xkgalhi kgankaw akgalokgot nema lichuwinalh Daniel chu lanka imagen nema limanaxnalh Nabucodonosor? ¿Chu tuku kilitlawatkan akxni katsiyaw uma?
2 Pulana kalichuwinalh lapanit nema akxilhli Juan (Apo., cap. 13). Chuna la akxilhwi kxapulana artículo, xapulana akgchaxan akgxakga kilhchanima Egipto, Asiria, Babilonia, Medopersia, Grecia chu Roma. Putum umakgolh laklanka tamapakgsin limasiyakgolh pi ni xakxilhputunkgo xkamanan puskat (Gén. 3:15). Titaxtulh akglhuwa siglo akxni Juan xtsokgnita tuku xʼakxilhnit, Roma chuntiyaku akgtum lanka tamapakgsin xwanit. Pero xʼama chan kilhtamaku akxni xliʼakgtujun akgxakga xtawi kxlakgxokgo. ¿Tiku uma lanka tamapakgsin xʼama wan chu la xʼama kalikatsini xkamanan puskat?
AKXNI TAWILAKGOLH GRAN BRETAÑA CHU ESTADOS UNIDOS
3. ¿Tiku xkilhchanima xalipekua lapanit nema xkgalhi kgankaw akgalokgot, chu tuku xkilhchanima kgankaw akgalokgot?
3 Xlakata nakatsiyaw tiku xliʼakgtujun akgxakga xla lipekua lapanit nema lichuwinan capítulo 13 xla Apocalipsis, talakaskin natamalakxtumiyaw tuku akxilhli Juan chu tuku akxilhli Daniel xlakata xalipekua lapanit nema kgalhi kgankaw akgalokgot (kalikgalhtawakga Daniel 7:7, 8, 23, 24). * Uma lapanit xkilhchanima lanka tamapakgsin xalak Roma (kaʼakxilhti recuadro xla página 14 chu 15). Ksiglo V, uma tamapakgsin tsukulh tapapitsi. Wa xlakata, kgankaw akgalokgot nema tsukukgolh pulhnikgo uma lapanit kxakgxakga kilhchanima mapakgsinanin nema lakatsukukgolh kRoma.
4, 5. 1) ¿Tuku tlawalh xaktsina akgalokgot? 2) ¿Tiku litaxtu xliʼakgtujun xakgxakga lapanit?
4 Lapanit nema kgalhi kgankaw akgalokgot, nema akxilhli Daniel tsukuni stakni kgantum, «xaʼaktsu akgalokgot» nema kapulhu kgantutu akgalokgot. Uma kgantaxtulh akxni Gran Bretaña, nema xtapakgsi kRoma, xlakaskinka tsukulh litaxtu. Asta ksiglo XVII kaj nitu xlitaxtu. Xwilakgo akgtutu kachikinin nema pulana na xtapakgsikgo kxtamapakgsin Roma chu tlakg xlakaskinka xwankgonit: España, Países Bajos chu Francia. Pero Gran Bretaña tsinu tsinu tsukulh tlakg lanka litaxtu. Pero kxitat siglo XVIII tlakg tliwakga xlitaxtuma xlikalanka Katiyatni. Ama kilhtamaku, ¿litaxtulh xliʼakgtujun xakgxakga lapanit? Nina.
5 Maski Gran Bretaña aku lu lanka tamapakgsin xwanit, kachikinin xalak Norteamérica nialh tapakgsinikgolh. Pero xlakata xbarcos Gran Bretaña xkuentajtlawanankgo, Estados Unidos na lu tliwakga wa. Kata 1914, akxni tsukulh xkilhtamaku kiMalanakan, Gran Bretaña xlitaxtu tlakg tliwakga tamapakgsin nema xʼanan chu Estados Unidos xlitaxtu kachikin tiku tlakg lhuwa tuku xtlawa. * Kxapulana guerra nema tatlawalh xlikalanka kakilhtamaku, umakgolh akgtiy países akxtum lakgolh. Chuna lakatsukulh xliʼakgtujun xakgxakga lapanit: lanka tamapakgsin xaʼangloamericana. ¿La likatsinilh uma akgxakga xkamanan puskat?
6. ¿La kalikatsilh xliʼakgtujun akgxakga xkachikin Dios?
6 Akxni tsukulh xkilhtamaku kiMalanakan, xliʼakgtujun akgxakga tsukulh kaputsastalani xkachikin Dios, uma kilhchanima xnatalan Cristo tiku xwilakgolhku kKatiyatni (Mat. 25:40). Jesús xlichuwinanit pi akxni xkinkatawilan nawan, makgapitsi tiku kalaksakkanit xlakata naʼankgo kʼakgapun chuntiya xʼamakgolh skujkgo kKatiyatni (Mat. 24:45-47; Gál. 3:26-29). Lanka tamapakgsin angloamericana tsukulh kasitsini «ksantujlanin Dios» (Apo. 13:3, 7). Kxapulana guerra nema tatlawalh xlikalanka katiyatni kaputsastalanilh xkachikin Dios, nialh mastalh talakaskin natamakgpitsi makgapitsi likgalhtawakga chu katamaknulh kpulachin tiku xlitaxtukgo skujni xalipaw. Chu tlawalh pi nialh xtalichuwinalh Dios, chuna la Jehová xmakatsininit Juan. Pero Dios na xmakatsininit Juan pi tiku na xlitaxtukgo xkamanan puskat xʼamakgolh lakastakwanankgo chu tlakg lhuwa xʼamakgolh lichuwinankgo Dios (Apo. 11:3, 7-11). ¿Kgantaxtulh tuku xwankanit? Tuku titaxtukgolh xlakskujni Dios limasiya pi kgantaxtulh.
LANKA TAMAPAKGSIN ANGLOAMERICANA CHU TANTUN XLA HIERRO CHU TIYAT
7. ¿Tuku xtalakxtum xliʼakgtujun akgxakga xla lapanit chu lanka imagen?
7 ¿Tuku xtalakxtum xliʼakgtujun akgxakga xla lapanit chu xalanka imagen? Gran Bretaña chu Estados Unidos taxtukgocha kRoma. ¿Tuku tlan nalichuwinanaw xlakata xtantun, o xtujun, imagen? Chuna la akxilhli Daniel, litatlawanit hierro chu tiyat (kalikgalhtawakga Daniel 2:41-43). Uma tuku talichuwinan na watiya akxni wanka pi xʼama taxtu xliʼakgtujun akgxakga, lanka tamapakgsin angloamericana. Chuna la akxni wi tuku litlawakan hierro chu tiyat ni lu tliwakga la akxni kaj hierro litlawakan, lanka tamapakgsin angloamericana tlakg ni tliwakga la xwanit tamapakgsin niku lakatsukucha. ¿Tuku xlakata ni tliwakga?
8, 9. 1) ¿La limasiyalh xliʼakgtujun lanka tamapakgsin pi tliwakga xtachuna la hierro? 2) ¿Tuku kilhchanima xtantun imagen nema litatlawanit tiyat?
8 Lakgachunin xliʼakgtujun akgxakga xla lapanit limasiyanit pi tliwakga la hierro; akgtum liʼakxilhtit, la akxni tlajanalh kxapulana guerra nema tatlawalh xlikalanka katiyatni. Chu uma na litasiyalh kxliʼakgtiy guerra. * Akxni xtitaxtunita umakgolh guerras na limasiyalh pi lu tliwakga xwanit. Pero akxni tsukulh uma hierro litalakgtlawakanit tiyat. ¿Tuku wamputun uma?
9 Makgasa, xlakskujni Jehová, akgatekgsputunkgo tuku kilhchanima xtantun imagen. Daniel 2:41 wan pi akxni tuku litatlawanit hierro chu tiyat kaj akgtum «tamapakgsin» chu ni lhuwa kilhchanima. Wa xlakata tiyat kilhchanima tuku na makgtanuma klanka tamapakgsin angloamericana chu tlawa pi ni lu tliwakga nawan la hierro nema xlitatlawanit Roma. Daniel wan pi uma tiyat wa «xkamanan latamanin» o lakchixkuwin (Dan. 2:43). Klanka tamapakgsin angloamericana, latamanin skinkgo tuku kalakgchan chu limaklakaskinkgo sindicatos, xakstu tapakgsiputunkgo chu talakkaxwilikgo xlakata ni nakaʼaktayamikan. Latamanin tlawakgonit pi uma lanka tamapakgsin nialh natasiya la hierro. Nachuna xlakata tanu tanu la lakapastakkgo chu xlakata kaj nilhuwa votos litlajanankgo partidos, chu maski tiku tlajanankgo lu kapaxkikan ni putum latamanin katatayakgo chu uma tlawa pi nila namakgantaxtikgo tuku lakapastakkgonit natlawakgo. Lalh chuna la lichuwinalh Daniel: «Tamapakgsin wi niku tliwakga nawan chu wi niku ni tliwakga» (Dan. 2:42; 2 Tim. 3:1-3).
10, 11. 1) ¿Tuku naʼakspula «tantun»? 2) ¿Tuku tlan wanaw xlakata la xlilhuwa laktsu tantun kgalhi lanka imagen?
10 Ksiglo XXI, Gran Bretaña chu Estados Unidos chuntiya akxtum lakgonit chu lamakgtayakgo akxni wi tuku tlawakgo kkakilhtamaku. Tuku xlichuwinankanit xlakata uma lanka imagen chu xalixkajni lapanit kinkawanikgoyan pi uma lanka tamapakgsin angloamericana niti katitawi kxlakgxokgo. Maski uma lanka tamapakgsin ni lu tliwakga nixawa akglhtantun nema litatlawanit hierro, ni kaj xakstu nalakgsputa.
11 ¿Wi tuku kilhchanima la xlilhuwa laktsu tantun kgalhi imagen? Kalakapastakwi pi amakgapitsi tuku akxilhli Daniel, lichuwinan números, la akxni lichuwinalh la kganlit akgalokgot xkgalhikgo makgapitsi lapanit. Umakgolh números xlakaskinka. Pero palakachuwina ni lichuwinan la xlilhuwa laktsu tantun kgalhi uma lanka imagen. Wa xlakata likatsiyaw pi ni lu xlakaskinka la xlikganlhuwa laktsu tantun kgalhi chuna la nitu kilhchanima la xlilhuwa makxpan, makan, akglhtantun chu tantun. Kaj talichuwinan pi laktsu tantun litatlawanit hierro chu tiyat. Uma likatsiyaw pi akxni chiwix nema kilhchani xTamapakgsin Dios nawilini kxtantun lanka imagen, tamapakgsin nema namapakgsinan kkakilhtamaku wa lanka tamapakgsin angloamericana (Dan. 2:45).
LANKA TAMAPAKGSIN ANGLOAMERICANA CHU LAPANIT NEMA KGALHI KGANTIY AKGALOKGOT
12, 13. ¿Tuku kilhchanima lapanit nema kgalhi kgantiy akgalokgot chu tuku tlawalh?
12 Maski lanka tamapakgsin angloamericana litatlawanit hierro chu tiyat, tuku Jesús maʼakxilhnilh Juan limasiya pi uma lanka tamapakgsin wi tuku lu xlakaskinka xʼama tlawa kxaʼawatiya kilhtamaku. ¿Tuku xlakata? Juan akxilhli tantum lapanit nema tanu la xtasiya xkgalhi kgantiy akgalokgot chu xchuwinan la tantum dragón. ¿Tiku kilhchanima? Uma kgantiy akgalokgot kilhchanima uma lanka tamapakgsin angloamericana, pero limasiya pi wi tuku lu xlakaskinka xʼama tlawa (kalikgalhtawakga Apocalipsis 13:11-15).
13 Uma lapanit nema kgalhi kgantiy akgalokgot wan pi «natlawalakgxtukgo» xalipekua lapanit nema kgalhi akgtujun akgxakga. Juan lichuwinalh pi uma tatlawalakgxtu xʼama tasiya chu alistalh xʼama lakgsputa pero amakgtum xʼama takipara. Wi pulaktum tuku lakkaxwilikanit nema kilhchanima chu malakatsukilh Gran Bretaña chu Estados Unidos xlakata akxtum xtawilakgolh putum tamapakgsin xalak kakilhtamaku. * Uma tuku xlakkaxwilikgonit talilakgapasli Sociedad de Naciones, chu lakatsukulh akxni xkgalhsputnit xapulana guerra nema tatlawalh xlikalanka kakilhtamaku chu lakgsputli akxni tsukulh xliʼakgtiy guerra. Akxni xtatlawama uma guerra, xkachikin Dios lichuwinankgolh pi chuna la xtalichuwinanit kʼApocalipsis, pi xtatlawalakgxtu lapanit xʼama takipara. Chu chuna lalh, xlakata lakatsukupa chu limapakuwika Naciones Unidas (Apo. 17:8).
14. ¿Tuku xlakata Juan wa pi xtatlawalakgxtu lapanit nalitaxtu «xliʼakgtsiyan mapakgsina»?
14 Juan wa pi uma xtatlawalakgxtu lanka lapanit kilhchanima «xliʼakgtsiyan mapakgsina». Uma ni wamputun pi wa xliʼakgtsayan xaʼakgxakga xapulana lapanit. Uma kaj akgtum xtatlawalakgxtu xla uma lapanit. Putum xlitliwakga maxkikgo laklanka kachikinin nema anta makgtapakgsikgo, chu tlakg maxki limapakgsin tiku malakatsukilh, lanka tamapakgsin angloamericana (Apo. 17:10, 11). Pero ¿tuku xlakata Juan wa pi chatum «mapakgsina»? Xlakata maxkikanit limapakgsin natlawa tuku nalakgpali la wi kakilhtamaku.
XTATLAWALAKGXTU LAPANIT NAWA PUSKAT TIKU STA XMAKNI
15, 16. ¿Tiku kilhchanima «ntlanka makwana» o puskat tiku sta xmakni, chu tuku akgspulanit “xchuchut”?
15 Chuna la wan Juan, kstipun uma xaspinini lapanit wi chatum «makwana» o puskat tiku sta xmakni. Uma puskat tiku sta xmakni wanikan «xatlanka Babilonia» chu lapanit tlawa tuku uma puskat lakaskin (Apo. 17:1-6). ¿Tiku kilhchanima puskat tiku sta xmakni? Putum nixaxlikana takanajla, niku tlakg tasiyakgo tiku kaj wankgo pi kstalaninanin Cristo. Chuna la xtalichuwinanit, nixaxlikana takanajla makgtayakgo xtatlawalakgxtu lapanit chu matlawiputunkgo tuku lakaskinkgo.
16 Pero kxkilhtamaku kiMalanakan, Babilonia Xalanka akxilhnit la «nchuchut» lakapala kskakma, uma wamputun latamanin tiku tatayakgo (Apo. 16:12; 17:15). Akxni xtatlawalakgxtu lapanit tasiyalh, takanajla tiku kaj wankgo pi kstalaninanin Cristo, tiku tlakg kalakgapaskan kBabilonia xaLanka xmapakgsikgo atsinu ni itat kakilhtamaku. Pero la uku ni xaxlikana takanajla chu tiku kapulalinkgo nialhtu kaliʼakxilhkan chu latamanin nialh katatayakgo. Asta lhuwa latamanin lakpuwankgo pi takanajla kaj tlawakgo pi kaʼanalh taʼakglhuwit. Kʼuma kachikinin, tlakg lhuwa lakgskgalalan lakchixkuwin kawanikgo amakgapitsin pi nialh kamakgtanukgolh ktakanajla.
17. ¿Tuku nakaʼakgspula nialh makgas nixaxlikana takanajla chu tuku xlakata?
17 Pero, nixaxlikana takanajla ni tsinu tsinu nalakgsputkgo. Uma puskat tiku sta xmakni chuntiyaku nakgalhi lhuwa litliwakga chu nakamatlawiputun tuku lakaskin mapakgsinanin asta akxni nachan kilhtamaku chu Dios natlawa wi tuku nalakapastakkgo (kalikgalhtawakga Apocalipsis 17:16, 17). Nialh makgas Jehová natlawa pi políticos tiku tapakgsinikgo Satanás, xlakata uma Naciones Unidas, namalakgsputukgo nixaxlikana takanajla chu nialh nakamapakgsikgo chu namakglhtikgo xtumin. Kaj nina akglhuwa kata, niti xlakpuwa pi chuna xlalh. Pero la uku liwana tasiya pi uma puskat tamokgosmaja kstipun xaspinini lapanit. Pero ni kaj tsinu tsinu natakta. Kaj xalan natamokgosa chu lipekua tuku naʼakgspula (Apo. 18:7, 8, 15-19).
AKXNI NAKAMASPUTUKAN LAPANIT
18. 1) ¿Tuku natlawa xalixkajni lapanit chu tuku nala alistalh? 2) Chuna la wan Daniel 2:44, ¿tukuya tamapakgsin namalakgsputu xTamapakgsin Dios? (Kaʼakxilhti recuadro nema wi kpágina 19.)
18 Akxni masputukanita nawan nixaxlikana takanajla, xalixkajni lapanit tiku kilhchanima mapakgsinanin namalakgsputuputunkgo xTamapakgsin Dios. Xlakata nila chankgo kʼakgapun, mapakgsinanin nakatlawaniputunkgo tuku nitlan xlakskujnin Dios tiku tatayakgo uma Tamapakgsin unu kkatiyatni. Pero tuku nala talakkaxwilinita (Apo. 16:13-16; 17:12-14). Daniel wa tuku xʼama la kʼuma guerra (kalikgalhtawakga Daniel 2:44). Xalixkajni lapanit, xtatlawalakgxtu chu lapanit nema kgalhi kgantiy akgalokgot nema lichuwinan Apocalipsis 13:1 nakamasputukan.
19. ¿Tuku liwana katsiyaw chu tuku kilitlawatkan uku?
19 Akinin lamaw akxni mapakgsinama xliʼakgtujun xʼakgxakga lapanit. Chu ni anan atanu nema natasiya akxni nina malakgsputukan lapanit. Wa xlakata akxni nixaxlikana takanajla namalakgsputukan, mapakgsinama nawan lanka tamapakgsin angloamericana. Kalakapastakwi pi tuku lichuwinankgolh Daniel chu Juan putum kgantaxtukgonit. Wa xlakata katsiyaw pi xlisputni ni xaxlikana takanajla chu Armagedón lu lakatsu wi. Xlikana, Dios kinkamakatsininitan tuku nala nialh makgas. ¿Kuenta tlawayaw tuku lichuwinankanit? (2 Ped. 1:19.) ¡Talakaskin pi la uku natatayayaw Jehová chu xTamapakgsin! (Apo. 14:6, 7.)
[Notas nema wilakgo kpágina]
^ párr. 3 Anta kBiblia, número akgkaw kilhchanima akxni wi tuku xatakgatsin. Unu kilhchanima putum tamapakgsin nema lakatsukukgolh kRoma.
^ párr. 5 Maski tiku tapakgsinikgo xwilakgolha ksiglo XVIII, Juan wan pi uma akgtiy laklanka tamapakgsin xʼama lakatsukukgo akxni xkilhtamaku kiMalanakan. Tuku makxilhnika Juan chu talichuwinan kʼApocalipsis kgantaxtu akxni «xkilhtamaku nkimPuchinakan» (Apo. 1:10). Wa xlakata kxapulana guerra nema tatlawalh xlikalanka kakilhtamaku lakatsukulh xliʼakgtujun akgxakga tiku litaxtulh la akgtum lanka tamapakgsin.
^ párr. 8 Daniel wa pi uma mapakgsina lhuwa xʼama masputunan akxni xtlawalh umakgolh guerra xla tsokgli: «Chu lu tlan [o kaks nalilakawanaw] la namasputunan» (Dan. 8:24). Kawiliw akgtum liʼakxilhtit, Estados Unidos lu malakgsputunalh akxni kamalakgachanilh akgtiy bombas atómicas xtalamakgasitsin, lanka tamapakgsin angloamericana.
^ párr. 13 Kaʼakxilhti libro Apocalipsis... ¡se acerca su magnífica culminación!, páginas 240, 241 chu 253.
[Takgalhskinin]
[Recuadro xla página 19]
¿TIKU UMAKGOLH «PUTUM TAMAPAKGSIN»?
Chuna la lichuwinanit Daniel 2:44, xTamapakgsin Dios «nakalakxpulay chu nakamasputuy putum tamapakgsin». Uma tuku xlichuwinankanit kilhchanima tamapakgsin nema na talichuwinan klanka imagen.
Chu, ¿tuku nakaʼakgspula amakgapitsi tamapakgsin? Tuku talichuwinan pi nala kʼApocalipsis liwana masiya pi nakamamakxtumikan «reyes lantla xlikatlanka nkatuxawat» xlakata natalachipakgo Jehová «ntlanka kilhtamaku xliminat Dios nti mpaks kgalhiy xlitliwakga» (Apo. 16:14; 19:19-21). Wa xlakata, kʼArmagedón nakamasputukan putum tamapakgsin xalak kakilhtamaku, chu nikaj tiku kakilhchanima imagen nema lichuwinalh Daniel.
