Pingo Myero I Ket Tic Pi Jehovah Obed Mukwongo?

“Abituco pi tic ma atir ducu ma itiyo, abituco bene pi tic me larri dyeceng jwi.”​—JAB. 71:15.

IN IROMO GAMONE NINGO?

Pingo Nua, Moses, Jeremia ki dong Paulo guketo Jehovah mukwongo i kwogi?

Gin ango ma ka ingiyogi i kwoni gitwero konyi kit ma myero iti kwede ki kwoni?

Pingo imoko tammi me keto tic pi Jehovah bedo mukwongo?

1, 2. (a) Dyere pa ngat moni bot Jehovah nyuto gin ango? (b) Wan watwero nongo adwogi maber nining ka wanyamo tam ma Nua, Moses, Jeremia ki Paulo gumoko?

 KA IDYERE bot Lubanga kun bene inongo batija dok bene idoko lalub kor Yecu, meno nongo dong itimo gin mo ma pire tek adada i kwoni. Dyereni bot Lubanga obedo moko tam ma pire tek pud dong loyo ma imoko i kwoni. Bedo calo itye ka iwacci: ‘Jehovah, amito ni in aye ibed ngat ma loyo kwona i yo ducu. An atye laticci. Amito ni in aye inyutta kit ma myero ati kwede ki cawana, gin ma myero aket mukwongo ki dong kit ma myero ati kwede ki jamina ki kero ma atye kwede.’

² Ka ce itye Lakricitayo mudyere, man aye gin ma icikke me timone bot Jehovah. Myero gipwoyi pi tam ma imoko-ni; pien meno obedo gin me ryeko dok opore me atima. Ento ngeyo ni Jehovah aye tye Laloc-ci myero ogud kit ma itiyo kwede ki cawani nining? Lanen pa Nua, Moses, Jeremia, ki dong lakwena Paulo gitwero konyowa me nyamo lapeny meno. Jo magi ducu ki acel gubedo ka tic pi Jehovah ki cwinygi ducu. Kit kwo ma watye iye i kareni roma aroma ki megi bene. Tam ma gumoko ma lubbe ki gin ma pire tek loyo i kwogi twero cuko cwinywa me ngiyo kit ma watye ka tic kwede ki cawawa.​—Mat. 28:19, 20; 2 Tem. 3:1.

MA PEYA PII ALUKA OCORRE

3. Karewa-ni rom aroma ki kare pa Nua nining?

³ Yecu oporo kare pa Nua ki karewa-ni. “Kit macalo ceng otimme i kare pa Nua, bitimme kit meno bene i kare me dwogo pa Wod pa dano. I kare ca ma peya pii aluka ocorre i wi lobo onongo gicamo, gimato, dok awobe ki anyira ginyomme, nio wa i nino  ma Nua odonyo kwede i yeya; pe gumedo ki ngeyo gin mo nio ka pii aluka opong, ci omologi woko ducu.” (Mat. 24:37-39) Pol pa dano i kare-ni gikwo ma pe giparo pi kare ma watye iye-ni. Pe giketo cwinygi i lok me ciko dano ma lutic pa Lubanga gitye ka titone-ni. Jo mapol bene pe giye ni Lubanga twero luto wiye i jami ma kwako dano adana-ni, man rom aroma ki jo me kare pa Nua ca. (2 Pet. 3:3-7) Nua mono otiyo ki cawane nining kadi bed ni en okwo i kin jo ma kitgi raco?

4. Nua otiyo ki cawane nining i kare ma Jehovah omiye tic me atima, dok pingo?

⁴ I kare ma Nua oniang gin ma Lubanga mito timone dok bene tic ma Lubanga mito ni etim, Nua opayo yeya me gwoko kwo pa dano ki pa lee. (Acak. 6:13, 14, 22) Nua otito pi ngolo kop ma onongo tye ka bino kun a ki bot Jehovah. Lakwena Petero olwongo Nua ni “latit lok me kit ma atir,” ma nyuto ni en oyelle mada me konyo jo murumo ngete wek gunen ni pinye pe tye maber. (Kwan 2 Petero 2:5.) Tika itamo ni onongo romo bedo gin matir ka Nua ki jo me pacone guketo mere tamgi i timo biacara, bedo ki kwo ma yot makato jo mukene, nyo bedo ki jami mabeco mapol? Pe kumeno! Pien guniang gin ma tye ka bino anyim, pe guye ni gin ma kit meno odwo tamgi.

TAM MA LATIN KER ME EJIPT OMOKO

5, 6. (a) Pwonye ma Moses onongo-ni nen calo onongo bikonye me timo gin ango? (b) Pingo Moses okwero jami ma onongo en twero nongogi ki i Ejipt?

⁵ Kong dok waloku tamwa i kom lanen pa Moses. En odongo i gang ker pa jo Ejipt macalo latin apita pa nyaka Parao. Macalo latin me gang ker, en onongo pwonye i “ryeko ducu pa Luejipt.” (Tic. 7:22; Nia 2:9, 10) Pwonye man onongo bikonye me bedo i kin lutic ma i gang kal pa Parao. Onongo en romo doko ngat mo ma oywek ma pe wacce i gamente pa Parao, kun bedo ki jami me wel, dog tic mapol, ki dong yomcwiny ma bino pi jami magi. Ento tika onongo jami magi pigi tego bot Moses?

⁶ Ma lubbe ki pwonye ma en onongo ki bot lunyodone i kare me tinone, Moses nen calo onongo ngeyo gin ma Jehovah ocikke kwede bot kwarine Abraim, Icaka ki Yakobo. Moses obedo ki niye i kom cikke meno. En nen calo bene otamo matut i kom anyimme ki dong gwoko gennene bot Jehovah. Pi meno, tam ango ma en omoko i kare ma onongo mitte ni en oyer me bedo latin ker me Ejipt nyo Laicrael ma tye opii? Moses “oyero me neno can kacel ki jo pa Lubanga ma ka bedo ki yomcwiny me bal ma ri pi kare manok mo keken-ni.” (Kwan Jo Ibru 11:24-26.) Lacen en olubo tira pa Jehovah ma lubbe ki kit ma myero eti kwede ki kwone. (Nia 3:2, 6-10) Pingo Moses otimo meno? Pien en oye cikke pa Lubanga.  En onongo ngeyo ni anyimme mo pe i lobo Ejipt. Ki lok ada, i nge kare manok keken, lobo meno odeno can malit pi gemo apar ma Lubanga ocwalo. Tika itye ka niang pwony ma tye pi jo ma gudyere bot Jehovah i kare-ni? Ma ka keto cwinywa i kom jami ma watwero timogi i lobo kany nyo yomcwiny me lobo-ni, omyero waketu tamwa i kom Jehovah kacel ki ticce.

JEREMIA ONONGO NGEYO GIN MA BIBINO ANYIM

7. Kare pa Jeremiagi ca rom ki mewa nining?

⁷ Laco mukene ma oketo tic pa Jehovah obedo mukwongo aye lanebi Jeremia. Jehovah omiyo tic ki Jeremia macalo lanebine me tito kwena me ngolo kop i kom Jerucalem ki Juda. Dok bene Jeremia okwo ‘i kare me agikki’ me lobogi ca. (Jer. 23:19, 20) En onongo ngeyo maber adada ni lobo me karegi ca pe obimedde kit ma onongo tye kwede-ni.

8, 9. (a) Pingo onongo mitte ni kiyub tam pa Baruk? (b) Gin ango ma myero wiwa pe owil iye ka wagoyo pulan?

⁸ Jeremia otimo gin ango ma lubbe ki tam ma en omoko i cwinye? En pe otute me bedo ki kwo maber i lobo meno ma onongo kibityekone woko-ni. Tika timo gin ma kit meno onongo obedo me ryeko? Ento pi kare mo, Baruk, karan pa Jeremia pe oniang jami magi maber. Pi meno, Lubanga omiyo Jeremia oloko bot karanne ni: “Abemuko gin ma yam agero dok aputo gin ma yam apito-ni woko. Abitimo man i kom lobo kulu. Itye ka yenyo gin mogo madito piri keni? Pe iyenygi. Pien nen, abekelo can i kom dano ducu ma bedo i lobo, ento olo twal ibibwot, abimiyo kwoni bedo boti macalo mot me lweny i kabedo ducu ma icito iye.”​—Jer. 45:4, 5.

⁹ Wan pe watwero niang atir atir “gin mogo madito” ma Baruk obedo ka yenyogi-ni. * Wangeyo ni magi onongo gubedo jami ma pe giri pi naka, ma onongo gibigik woko i kare ma Babilon bituro kwede Jerucalem i mwaka 607 K.M.P. Tika iniang pwony ma wanongo ki iye? Bedo ka duru jami me kwo mito goyo pulan pi anyim. (Car. 6:6-11) Ento mono bedo me ryeko ka ngat moni balo lwak cawa ki kerone i kom gin ma pe ri pi nakanaka? Dul pa Jehovah kono gire medde ameda anyim ki goyo pulan pi Odi manyen me Ker, jang gang kal ki dong tic mapol mukene me tiokraci. Pulan magi kiketogi pi tyen lok acel keken me konyo kor tic me Ker-ri. Bedo me ryeko ka ce jo ducu ma gudyere bot Jehovah gimoko tamgi ma cal ki man ka gigoyo pulan. In mono iwinyo ki i cwinyi ni itye ka ‘keto cwinyi i kom ker-ri mukwongo, ki nongo kit ma atir pa Jehovah’?​—Mat. 6:33.

“ANENOGI CALO YUGI”

10, 11. (a) Gin ango ma Paulo oketo kerone ducu iye ma peya odoko Lakricitayo? (b) Pingo Paulo oloko tamme woko ki i kom gin ma en onongo tamo ni pigi tek?

¹⁰ Me agikkine, kong dong wanenu lanen pa Paulo. Ma peya en olokke odoko Lakricitayo, en nen calo onongo tye ki anyim maber atika. En okwano cik me tekwaro pa Lujudaya ki bot lapwony mo muywek adada i karegi ca. En onongo rukca ki bot lalamdog madit pa Lujudaya. En onongo tye ka loyo jo mapol ma gin yalwakke i dini pa Lujudaya i kare meno. (Tic. 9:1, 2; 22:3; 26:10; Gal. 1:13, 14) Ento inongo ni jami magi ducu olokke woko i kare ma Paulo oniang ni Jehovah dong pe tye ki cwak i kom Lujudaya macalo rok.

 ¹¹ Paulo oniang ni jami ma etwero nongogi i tekwaro pa Lujudaya konygi pe ki bot Jehovah; dok gubedo jami ma pe ri. (Mat. 24:2) Laparicayo man macon-ni owaco ni ka eporo ngecce manyen i kom yub pa Lubanga ki dong mot me tic pa Lukricitayo, gin ma yam onongo etamo ni pigi tek-ki kombeddi dong enenogi “calo yugi.” Paulo obwoto dini pa Lujudaya ci odyero kwone ducu me tito kwena maber-ri.​—Kwan Jo Pilipi 3:4-8, 15; Tic. 9:15.

NGI JAMI MA IKETO MUKWONGO

12. Gin ango ma Yecu oketo cwinye me timone i nge nongo batija?

¹² Nua, Moses, Jeremia, Paulo ki dong jo mukene mapol ata gujalo karegi ducu i timo tic me tiokraci. Gin gunyuto lanen maber botwa. Kono gire Yecu aye pud dong ngene loyo i timo meno ki i kin lutic pa Jehovah. (1 Pet. 2:21) I nge nongo batija, Yecu odyero kwone ducu i tito lok me kwena maber-ri kun keto deyo i kom Jehovah. Pi meno, Lakricitayo ma neno Jehovah calo Laditte keto tic Pire bedo gin mukwongo i kwone. Tika tye kit meno boti? Ento, wan watwero cobo tic me tiokraci kun bene watimo tic mogo mapat pat me kwowa nining?​—Kwan Jabuli 71:15; 145:2.

13, 14. (a) Kicuko cwiny Lukricitayo ducu mudyere me timo gin ango? (b) Kit yomcwiny ango ma jo pa Lubanga gitwero nongone?

¹³ Pi mwaki mapol, dul pa Jehovah tye ka cuko cwiny Lukricitayo teretere me keto i lega yub me doko painia. Pi tyen lok mapat pat, lutic mukene ma lugen bot Jehovah pe gitwero mine me tito kwena kun gitiyo pi cawa 70 dwe ki dwe. Omyero cwinygi pe obed ka ngoligi kop pi lok man. (1 Tem. 5:8) Ento in kono? Tika mot me bedo painia pe twere boti?

¹⁴ Tam kong twon yomcwiny ma pol pa jo pa Lubanga gubedo kwede i kare me Nipo me mwakani. I dwe me adek, kimiyo kare me bedo painia pi tutunu kun iyero me tic pi cawa 30 nyo 50 i ticwa me pwony. (Jab. 110:3) Dano milion mapol gutiyo calo painia dok bene kacokke mapat pat gubedo ki yomcwiny i kare meno. Tika itwero keto alokaloka mogo wek inong yomcwiny ma kit man kare ki kare? I otyeno me nino ducu, Lakricitayo mudyere bedo ki yomcwiny madit ma lapore pe, pien en twero wacone ni, “Jehovah, atyeko timo gin ducu ma atwero tiyone i tic ma meri.”

15. Yub ango ma Lakricitayo ma bulu myero obed kwede ka en pud tye i cukul?

¹⁵ Ka ce ibedo ngat ma cok tyeko kwane ci nongo pud komi yot dok bene itye ki jami manok me atima. Tika dong itamo matut me donyo i tic macalo painia mari? Wangeyo gire ni jo ma gimini tam ki i cukul pe gitye ki cwiny marac ka gimini tam ni myero imedde ki kwan i rwom mamalo wek inong dog tic maber. Ento gengi ducu cung mere i kom lonyo me lobo man ma gik woko-ni. Kitungcel, ka ce iweko tic me tiokraci bedo calo gin ma myero icobbi, nongo itye ka yenyo gin maber dok ma ri. Dok meno nongo itye ka lubo lanen pa Yecu kikome. Moko tam me ryeko ma kit meno bikeli yomcwiny. Bigwoko kwoni bene. Dok man binyuto ni imoko tammi me cobo dyereni bot Jehovah.​—Mat. 6:19-21; 1 Tem. 6:9-12.

16, 17. Lapeny mene ma gibino ma lubbe ki dog tic ki dong yenyo jami mukene?

¹⁶ Lutic mapol pa Lubanga i kare-ni gitiyo pi cawa malac me nongo jami ma mitte pi jo me odigi. Ento inongo ni jo mukene i kingi gitye ka cwalo cawa  malac mukato kare woko. (1 Tem. 6:8) Lobo man mupong ki jami acata-ni bedo ka bwolowa ni pe watwero kwo ka pe wanongo jami mapol dok manyen ma gitye i cuk-ki. Ento Lukricitayo me ada pe giweko ni lobo pa Catan-ni aye otittigi gin ma myero giket mukwongo. (1 Jon 2:15-17) Bot jo ma dong guweko dog ticgi pi olo, yo mene maber loyo me tic ki cawagi makato bedo painia kun giketo tic pi Jehovah bedo mukwongo?

¹⁷ Jo ducu ma gudyere bot Jehovah gitwero penye kekengi ni: Gin ango ma pire tek loyo i kwona? An tika atye ka keto pi Ker-ri bedo mukwongo? Tika alubo lanen me cwiny me jalle pa Yecu? Tika atye ka lubo tam pa Yecu ni myero amedde ki lubo kore nakanaka-ni? Mono aromo timo alokaloka wek acwal cawa malac i tic me tito kwena me Ker-ri nyo a keto yub wek acob tic mukene me tiokraci? Kadi bed kit kwo ma atye iye i kare-ni pe miyo acwalo cawa malac i tito kwena, tika atye ka medde ki bedo ngat ma tye ki cwiny me jalle?

“MITI KI TEKO ME TIC”

18, 19. Gin ango ma iromo lega pire, dok pingo lega ma kit meno yomo cwiny Jehovah?

¹⁸ Tye twon yomcwiny madit atika me neno arima ma jo pa Lubanga gitye kwede. Ento jo mukene pe giwinyo ni myero gibed painia kadi bed kwo ma gitye iye pe gengogi. (Nia 4:10; Jer. 1:6) Ci dong, gin myero gutim gin ango? Mono pe opore botgi me ketone i lega? Tye kumeno. Paulo otito bot luye luwote ni Jehovah, “aye ma tye ka tic i cwinywu, kun miyowu miti ki teko me tic wek wun wuyom cwinye.” (Pil. 2:13) Pi meno, ka iwinyo ni myero imed cawa i ticci pi Jehovah, peny Jehovah wek omini miti ki teko me timone.​—2 Pet. 3:9, 11.

¹⁹ Nua, Moses, Jeremia, Paulo ki dong Yecu gin ducu gubedo co ma lugen. Gutiyo ki cawagi kacel ki kerogi me tito kwena pa Jehovah me poyo wi dano. Pe guye ni gin mo odwo tamgi. Agikki me lobo man dong cok tutwal, pi meno wan ducu ma wadyere-ni myero waketu tek me neno ni walubo lanen magi ma ginonge i Ginacoya-ni. (Mat. 24:42; 2 Tem. 2:15) Ka watimo meno, ci wayomo cwiny Jehovah dok bene wabiyeng ki motte.​—Kwan Malaki 3:10.

[Lok ma tye piny]

[Peny me Kwan]

[Cal ma tye i pot karatac 22]

Dano pe guye lok me poyo wic ma Nua otittigi

[Cal ma tye i pot karatac 25]

Tika dong itamo matut me donyo i tic macalo painia mari?