?Ngue ti yɛ Zoova i junman’n yɛ ɔ fata kɛ ɔ yo e cinnjin ɔn?
?Ngue ti yɛ Zoova i junman’n yɛ ɔ fata kɛ ɔ yo e cinnjin ɔn?
“Ń kán ɔ sa nuan su bɔ a yo’n i ndɛ cɛn kwlaa. Ń kán delɛ bɔ a de sran’n i ndɛ, n su yaci-man.”—JUE. 71:15.
?WAFA SƐ YƐ AMÚN TƐ́ SU Ɔ?
?Ngue ti yɛ Nowe nin Moizi nin Zeremi nin Pɔlu be fali Ɲanmiɛn i junman’n be sieli i like kwlaa ɲrun ɔn?
?Ngue yɛ ɔ fata kɛ amun bu i akunndan naan amun a si like nga amún fá amun nguan’n bé yó ɔ?
?Ngue ti yɛ amun a fua kpa kɛ amún fá Zoova i junman’n síe i like kwlaa ɲrun ɔn?
1, 2. (a) ?Sran nga ɔ fɛ i wun man Zoova kɛ ɔ́ sú i’n, ndɛ benin yɛ ɔ ti kɛ w’a kan kle Zoova sa ɔ? (b) ?Kosan benin yɛ Nowe nin Moizi nin Zeremi nin Pɔlu be ajalɛ’n wá úka e naan y’a bu i su akunndan ɔn?
AJALƐ cinnjin kpafuɛ’n nga sran kun fɛ i i nguan cɛn’n nun’n, yɛle i wun m’ɔ fa man Ɲanmiɛn kɛ ɔ́ sú i’n, ɔ nin i batɛmu mɔ be yo’n m’ɔ kaci Zezi i sɔnnzɔnfuɛ’n. Sran ng’ɔ fɛ i sɔ ajalɛ’n ɔ ti kɛ ɔ su se Zoova kɛ: ‘N kunndɛ kɛ a yo min Min. N ti ɔ sufuɛ. Ɔ maan, n kunndɛ kɛ a kle min ninnge nga ɔ fata kɛ n fa min blɛ’n n yo’n, ɔ nin nga ɔ fata kɛ be yo min cinnjin tra like kwlaa’n, ɔ nin nga ɔ fata kɛ n fa min sa nun ninnge mun n yo’n, yɛ nga a klo kɛ n fa min ngwlɛlɛ n yo’n.’
2 Sɛ amun ti Klistfuɛ kun mɔ b’a yo i batɛmu’n, nn i sɔ ndɛ yɛ amun kan kleli Zoova ɔ. Ajalɛ kpa ng’ɔ fata kɛ amun fa’n yɛ amun fɛli i lɛ ɔ. Ngwlɛlɛ ayeliɛ ɔ. I ti amun nin mo yolɛ fata. ?Sanngɛ siɛn mɔ amun waan Zoova ti amun Min’n, ngue yɛ amun fa amun blɛ’n be yo ɔ? Nowe nin Moizi nin Zeremi nin akoto Pɔlu be ajalɛ’n wá úka e naan y’a bu i su akunndan. Be kwlaa be tuli be klun be dili Zoova i junman’n. Blɛ nga be trannin nun’n, ɔ ti kɛ e blɛ liɛ’n sa. Be fali ajalɛ wie mɔ be yili like ng’ɔ yoli be cinnjin’n, i nglo ɔ. I sɔ liɛ’n kwla uka e naan y’a bu like nga e fa e blɛ’n e yo’n i akunndan.—Mat. 28:19, 20; 2 Tim. 3:1.
KA NAAN NZUE DAN’N W’A TƆ’N
3. ?Ngue yɛ ɔ kle kɛ e blɛ liɛ’n ti kɛ Nowe i liɛ’n sa ɔ?
3 Zezi seli kɛ e blɛ liɛ’n yó kɛ Nowe i liɛ’n sa. I waan: “Kɛ m bɔ n kacili Sran’n ń wá bá’n, sran’m bé yó kɛ Noe i blɛ su’n sa. Blɛ sɔ’n nun’n, [...] sran’m be di like, be nɔn nzan, be ja bla nin bian lele fa ju cɛn nga Noe wluli mmeli nun’n. B’a bu-man like fi akunndan lele nzue dan’n ɔ wa fa be kwlaa ɔli.” (Mat. 24:37-39) Kɛ Nowe i blɛ sufuɛ’m be sa’n, sa nga ɔ́ wá tɔ́ mɛn’n su’n i su ndɛ nga Ɲanmiɛn i sufuɛ’m be kan’n, andɛ sran’m be faman be ɲin sieman su. Bé yó be ninnge mun ɔn, be klun timan be kaan sa. Kɛ Ɲanmiɛn i sufuɛ’m be se be kɛ Ɲanmiɛn wá núnnún sran tɛ mun’n, be lafiman su. I kpa’n bɔbɔ’n, be bu i kɛ ngua yɛ be su di ɔ. (2 Piɛ. 3:3-7) ?Kannzɛ Nowe i blɛ sufuɛ’m be tanninnin be su’n, ngue yɛ Nowe fɛli i blɛ’n yoli ɔ?
4. ?Kɛ Ɲanmiɛn mannin Nowe i junman cinnjin kpa kun’n, ngue yɛ Nowe fɛli i blɛ’n yoli ɔ? ?Yɛ ngue ti ɔ?
4 Ɲanmiɛn seli Nowe kɛ ɔ́ wá núnnún sran tɛ mun. I sin ɔ mɛnnin i junman cinnjin kpa kun. I waan ɔ bobo mmeli naan nnɛn mun nin sran’m be wlu nun naan b’a kwla fite nun. I sɔ kusu yɛ ɔ yoli ɔ. (Bob. 6:13, 14, 22) Asa ekun’n, Nowe boli sa nga Zoova wá yó’n i jɔ. I ti’n, akoto Piɛli flɛli Nowe kɛ sran “b’ɔ bo sa nga be yo-ɔ ɔ ti su’n i ndolo’n.” I sɔ’n kle kɛ Nowe wlɛli i wun ase ukali i blɛ sufuɛ mun naan be fa ajalɛ ndɛndɛ naan nán be cuɛncuɛn be ja ase. (An kanngan 2 Piɛr 2:5 nun.) ?Sanngɛ sɛ ɔ ti kɛ Nowe nin i awlobofuɛ’m be boli aata wie dilɛ bo annzɛ be kunndɛli kɛ bé ɲán ɲrun trá be wiengu mun annzɛ kusu ninnge’m be totolɛ’n yɛ ɔ yoli be cinnjin sa’n nin? ?Nn i sɔ’n klé kɛ be fa akunndan nanti? Cɛcɛ. Kɛ mɔ be si be ɲrun lɔ sa’n ti’n, b’a fɛmɛn i sɔ ninnge mun b’a fa tanndanman be ɲrun.
AJALƐ NGA EZIPTI FAMIƐN’N I AWLO LƆ SRAN DAN KUN FALI BE’N
5, 6. (a) ?Ngue ti yɛ Eziptifuɛ’m be fali be ngwlɛlɛ’n kwlaa kleli Moizi ɔ? (b) ?Ngue ti yɛ Moizi kpaloli ninnge nga ɔ kwla ɲan be Ezipti lɔ’n niɔn?
5 Maan e kan Moizi i ndɛ siɛn’n. Ezipti famiɛn’n i wa bla’n fɛli i yoli i wa, ɔ maan be tɛli i famiɛn’n i awlo lɔ. I ti’n, “Eziptfuɛ’m be kleli Moiz be ngwlɛlɛ’n kwlaa.” (Yol. 7:22; Tul. 2:9, 10) Be kleli i ngwlɛlɛ sɔ naan cɛn wie lele’n, ɔ kaci Ezipti famiɛn’n i awlo’n nun lɔ sran dan kun. Ɔ maan, sɛ Moizi waan ɔ́ yó nvle sɔ m’ɔ sie mɛn’n blɛ sɔ nun’n, i nun sran lɔuun kun’n nn ɔ yoli. Sɛ ɔ yoli sɔ kusu’n, nn ninnge kpakpa’n kwlaa be bo sin yiɛli i, yɛ nn ɔ ɲannin ɲrun kpa wie. ?Sanngɛ ninnge sɔ’m be ɲanlɛ yɛ ɔ trannin Moizi i ti nun ɔn?
6 I nun nga Moizi te yo kaan’n, i si nin i nin be kannin Zoova ndɛ be kleli i. Ɔ maan atrɛkpa’n, ɔ sili like nga Zoova seli kɛ ɔ́ yó mán i nannan Abraamu nin Izaaki ɔ nin Zakɔbu’n, yɛ ɔ lafili su. Yɛ ɔ buli ninnge nga cɛn wie lele ɔ́ yó’n, ɔ nin nantilɛ nga ɔ nin Zoova be ko nanti’n, i akunndan kpa. Blɛ wie wa juli m’ɔ yoli cinnjin kɛ ɔ kle junman nga i waan ɔ́ dí’n niɔn. ?Ɔ́ yó Ezipti famiɛn i awlo’n nun sran dan annzɛ ɔ́ yó kanga kɛ Izraɛlifuɛ’m be sa? ?Ajalɛ benin yɛ ɔ fali ɔ? Moizi kloli kɛ “be kle i nin Nyanmiɛn sran’m be nyrɛnnɛn tra kɛ ɔ di mɛn’n b’ɔ ti le nnyɔn kun like’n.” (An kanngan Ebre Mun 11:24-26 nun.) I sin’n, like nga Zoova waan ɔ fɛ i nguan’n yo’n yɛ ɔ fa yoli ɔ. (Tul. 3:2, 6-10) ?Ngue ti yɛ Moizi yoli i kwlaa sɔ’n niɔn? Ɔ yoli sɔ afin ɔ lafili su kɛ ninnge nga Ɲanmiɛn waan ɔ́ yó be’n, saan ɔ́ yó. Ɔ maan, ɔ seli i wun kɛ sɛ ɔ kaci Ezipti lɔ sran dan’n, i sɔ’n yó le nɲɔn kun like. Nanwlɛ, akunndan ng’ɔ buli’n yoli su. Afin kɛ i osu’n cɛli kan’n, Ɲanmiɛn fali ɲrɛnnɛn blu yili i Ezipti mɛn’n su. ?Akunndan benin yɛ Moizi i su ndɛ sɔ’n man be nga andɛ b’a fa be wun b’a man Zoova kɛ bé sú i’n niɔn? Yɛle kɛ ɔ fataman kɛ e fa e ɲin e sie i mɛn nun sran dan yolɛ’n annzɛ fɛ dilɛ’n su. Sanngɛ Zoova yɛ ɔ ti mɔ e ɲin tɛ i ɔ, yɛ i junman’n yɛ ɔ fata kɛ ɔ yo e cinnjin ɔn.
ZEREMI SILI SA NG’Ɔ́ WÁ JÚ’N
7. ?Ngue ti yɛ e kwla se kɛ blɛ nga e o nun yɛ’n, ɔ nin Zeremi liɛ’n ti kun ɔn?
7 Sran kun ekun mɔ Zoova i junman’n yɛ ɔ fa sieli i like kwlaa ɲrun’n, yɛle Zeremi. Zoova kpɛli i kɛ ɔ yo i nuan ijɔfuɛ, naan ɔ bo jɔlɛ ng’ɔ́ wá dí Zerizalɛmufuɛ mun nin Zidafuɛ mɔ be fali amuɛn sɔlɛ cicili be ti’n, i jɔ kle be. E kwla se kɛ Zeremi trannin i mɛn liɛ’n i “blɛ kasiɛn’n nun.” (Zer. 23:19, 20, NW) Ɔ sili weiin kɛ mɛn nga ɔ o nun’n su kaman lɛ sa trilili.
8, 9. (a) ?Ngue ti yɛ ɔ yoli cinnjin kɛ be uka Bariki naan ɔ kaci i akunndan’n niɔn? (b) ?Kɛ é bú ainman akunndan’n, ngue yɛ ɔ fata kɛ ɔ yo e cinnjin ɔn?
8 ?Kɛ mɔ Zeremi si sɔ’n ti’n, ajalɛ benin yɛ ɔ fali ɔ? W’a kunndɛman kɛ ɔ́ yó sran dan mɛn sɔ mɔ saan bé núnnún i’n nun. Sɛ ɔ yoli sɔ bɔbɔ nn sinnzin yɛ ɔ dili ɔ. Sanngɛ Bariki m’ɔ ti Zeremi i fluwa klɛfuɛ’n, i liɛ’n, ɔ wa buli akunndan uflɛ. I ti’n, Ɲanmiɛn maan Zeremi seli Bariki kɛ: “Like nga n kplannin’n, n wo i bubulɛ. Like nga n tali’n, n wo i bo tulɛ. Ɔ lɛ-man mɛn’n i lika kun b’ɔ́ ká lɛ-ɔ. I sɔ’n kpɛkuun pɔɔ yɛ a kunndɛ kɛ á trán nun-ɔn. Nán kunndɛ pɔɔ nun tranlɛ. Nyrɛnnɛn nga ń fá yí i mɛn’n su’n, like kun ng’ɔ su nyɛn-mɛn i’n ɔ nun-man lɛ. Ɔ liɛ nga á nyɛ́n i’n yɛlɛ ɔ nguan’n. Kan kwlaa nga ɔ waan á kɔ́’n, ɔ wun fɔuun!”—Zer. 45:4, 5.
9 Kɛ ɔ ko yo naan Bariki ‘w’a tran pɔɔ nun’n,’ sɛ ɔ kunndɛli kɛ ɔ́ ɲán ɲrun ekun famiɛn i awlo lɔ e, sɛ kusu aɲanbeun ninnge mun yɛ ɔ kunndɛli be e, e siman. Sanngɛ nga e si i’n yɛle kɛ ninnge sɔ’m be timan cɛlɛ liɛ. Afin afuɛ nga be flɛ i 607 nun kwlaa naan b’a wu Zezi’n, Babilɔnifuɛ’m be wa sacili Zerizalɛmu klɔ’n. ?Afɔtuɛ benin yɛ Bariki i su ndɛ sɔ’n man e ɔ? Sakpa, kɛ ɔ ko yo naan y’a ɲan like y’a fa nian e wun lika’n, ɔ ti mɔ e bu ainman akunndan wie. (Nya. 6:6-11) ?Sanngɛ sɛ e fa e blɛ’n nin e wunmiɛn’n i dan lika e fa kunndɛ ninnge nga be timan cɛlɛ liɛ’n, e kwla se kɛ e fa ngwlɛlɛ e nanti? Ɔ ti su kɛ Zoova i anuannzɛ’n, ɔ te kunndɛ kɛ ɔ́ kplán Ɲanmiɛn Sielɛ Sua nin Betɛli uflɛ mun naan kusu ɔ́ yó ninnge uflɛ wie mun ekun. Ninnge sɔ’m be yo sa ye. Afin be suan Ɲanmiɛn Sielɛ’n i bo. I kunngba’n, kɛ Zoova i sufuɛ’m be tinuntinun bé bú ainman akunndan’n, Ɲanmiɛn Sielɛ’n i bo suanlɛ yɛ ɔ fata kɛ ɔ yo be cinnjin ɔn. ?Kɛ amun nian amun klun lɔ siin’n, “an dun mmua fa amun wun man [Zoova] maan ɔ sie amun, yɛ an yo i klun sa’n”?—Mat. 6:33.
“M BU LIKE’N KWLAA KƐ WLA SA”
10, 11. (a) ?Ka naan Pɔlu w’a kaci Klistfuɛ’n, ngue yɛ ɔ yoli i cinnjin ɔn? (b) ?Ngue ti yɛ Pɔlu i akunndan’n kacili mlɔnmlɔn ɔn?
10 Sran kasiɛn nga é kɛ́n i ndɛ’n yɛle Pɔlu. Kwlaa naan w’a kaci Klistfuɛ’n, sran’m be lafili su kɛ ɔ́ yó mɛn nun sran dan kun. I blɛ su like klefuɛ dan kun yɛ ɔ kleli i Zuifu’m be mmla mun ɔn. Asa kusu’n, Ɲanmiɛn ɲrun jranfuɛ’m be su kpɛn’n lafili i su yɛ ɔ mɛnnin i junman cinnjin kpa kun. Kpɛkun blɛ sɔ’n nun’n, ɔ kɔ i ɲrun Zuifu’m be Ɲanmiɛn sulɛ wafa’n nun kpa trɛ i wiengu sunman. (Yol. 9:1, 2; 22:3; 26:10; Gal. 1:13, 14) Sanngɛ kɛ Pɔlu wunnin kɛ Zoova nunman Zuifu’m be nvle’n i sin kun’n, i akunndan’n kacili mlɔnmlɔn.
11 Pɔlu wunnin i wlɛ kɛ Zoova ɲrun’n Zuifu’m be mɛn’n nun sran dan yolɛ’n, ɔ timan like fi. Afin mɛn sɔ’n timan cɛlɛ liɛ. (Mat. 24:2) Pɔlu wunnin ninnge nga Ɲanmiɛn waan ɔ́ yó be’n be wlɛ. Yɛ ɔ wunnin i ekun kɛ jasin fɛ bolɛ junman’n ti cenjele like. Ɔ seli bɔbɔ kɛ ɔ bu ninnge nga be yoli i cinnjin laa’n, “kɛ wla sa.” Pɔlu tuli Zuifu’m be Ɲanmiɛn sulɛ wafa’n nun kpɛkun ɔ dili jasin fɛ’n bolɛ junman’n lele i wie cɛn.—An kanngan Filipfuɛ Mun 3:4-9, 15 nun; Yol. 9:15.
?NGUE YƐ Ɔ TI AMUN CINNJIN ƆN?
12. ?Kɛ be yoli Zezi i batɛmu’n, ngue yɛ ɔ yoli i cinnjin ɔn?
12 Nowe, Moizi, Zeremi nin Pɔlu yɛ sran uflɛ wie mun ekun be fali be blɛ nin be wunmiɛn’n i dan lika be dili Zoova i junman’n. I sɔfuɛ’m be kle e ajalɛ kpa. Sanngɛ sran nga i ajalɛ liɛ’n leman wunsu’n yɛle Zezi. (1 Piɛ. 2:21) Kɛ be yoli i batɛmu’n, ɔ fali blɛ kan ng’ɔ dili i asiɛ’n su wa ekun’n ɔ boli jasin fɛ’n yɛ ɔ fa manmannin Zoova. I sɔ kle e kɛ Klistfuɛ kwlaa nga ɔ nian Zezi i ajalɛ’n su’n m’ɔ fa Zoova kaci i Min’n, ɔ fata kɛ Zoova i sulɛ’n yɛ ɔ yo i cinnjin tra like kwlaa ɔ. ?Yɛ amun li, i sɔ yɛ amun yo ɔ? ?Sanngɛ yoo, é yó sɛ naan y’a kwla kunndɛ ninnge nga be mian e sa’n naan e kunngba’n y’a ɲan e ti y’a di Ɲanmiɛn junman’n?—An kanngan Jue Mun 71:15 nin Jue 145:2 nun.
13, 14. (a) ?Junman benin yɛ Zoova i anuannzɛ’n wla Klistfuɛ’m be fanngan kɛ be di ɔ? (b) ?Yɛ aklunjuɛ benin yɛ junman sɔ’n mán be ɔ?
13 Zoova i anuannzɛ’n wla Klistfuɛ’m be fanngan kɛ be srɛ Zoova naan be bu i akunndan kpa be nian sɛ be kwla kaci atin bofuɛ o. Ɔ yo sɔ i afuɛ kpanngban yɛ. Sanngɛ sa ng’ɔ o Zoova i sufuɛ ndɛnmanfuɛ wie’m be su’n ti’n, be kwlá boman jasin fɛ’n diman dɔ 70 anglo kwlaa nun. Nán i sɔ’n ti aniaan sɔ’m be sa sin bubu be. (1 Tim. 5:8) ?Yɛ amun li? ?Sakpa naan amun kwlá yoman atin bofuɛ?
14 Afuɛ’n, Marsi nin Avrili nin Mɛ anglo’m be nun’n, sɛ amun wla te o su’n, Ɲanmiɛn i sufuɛ kpanngban kpa be dili aklunjuɛ dan. Marsi anglo nun’n, be nga be kacili cɛn kunngun atin bofuɛ’n, be mannin be atin naan b’a di dɔ 30 annzɛ 50 jasin fɛ’n bolɛ’n nun. (Jue. 110:3) Aniaan akpinngbin kpanngban be fali be wun wlali junman sɔ’n nun. I ti’n, asɔnun’m be nun’n, aniaan’m be dili aklunjuɛ dan. É wlá amun fanngan kɛ amun siesie amun wun naan amun di junman sɔ’n i kpɛ sunman, naan aklunjuɛ ng’ɔ o nun kusu’n, amun a di i kpɛ sunman wie. Sɛ amun yo sɔ’n, kɛ aliɛ ba kwlaa nun’n amún wíe junman’n i di’n, amun klun jɔ́ dan. Yɛ amún kwlá sé Zoova kɛ: “Zoova, n kplinnin min ɲin n dili ɔ junman’n.”
15. ?Sɛ Klistfuɛ gbanflɛn annzɛ talua kun te kɔ suklu’n, junman benin yɛ ɔ fata kɛ ɔ bu i dilɛ’n i akunndan ɔn?
15 Atrɛkpa’n, suklu kan ng’ɔ fata kɛ amun di naan amun a ɲan amun sa ti like kan’n, amun su wa wie i di. Yɛ amun te yo kpinndinkpinndin kpɛkun amun su sa’m b’a sɔnman. ?Sɛ ɔ ti sɔ’n niɔn, amun buli titi atin bolɛ junman’n i dilɛ’n i akunndan kpa be niannin? I yo, be nga be man suklu ba’m be afɔtuɛ naan b’a si suklu nga be ko di’n, bé sé amun kɛ like nga ɔ kwla yo amun ye sakpa’n yɛle suklu dan dilɛ. I liɛ’n, amún ɲán junman kpa. Sika nin ninnge fanunfanun nga klɔ sran’m be siesieli be’n, be su yɛ be lafi ɔ. Kusu nn be timan cɛlɛ liɛ. Sanngɛ sɛ Zoova i junman’n i dilɛ’n yɛ amun fa amun wun wla nun mlɔnmlɔn’n, ɔ timan amun blɛ’n i sacilɛ. Yɛ junman sɔ’n yó amun ye anannganman. Asa ekun’n, i sɔ mɔ amún yó’n, ɔ ti Zezi i ajalɛ’n m’ɔ ti kpa tra su’n i su falɛ. Ajalɛ kpa kɛ ngalɛ’n sa’n, maan amún dí aklunjuɛ. Ajalɛ sɔ’n sásá amun. Asa kusu’n, sɛ amun yo sɔ’n, amún klé kɛ amun a fua kɛ amún yó amun wun mɔ amun fa mannin Zoova’n i nuan su like.—Mat. 6:19-21; 1 Tim. 6:9-12.
16, 17. ?Zoova i junman’n i dilɛ’n i su kosan benin yɛ ɔ fata kɛ Klistfuɛ’m be fa usa be wun ɔn?
16 Ɲanmiɛn sufuɛ kpanngban be fa blɛ kaka kpa be di junman naan b’a kwla ɲan ninnge cinnjin nga be awlobofuɛ’m be mian be wun’n. Sanngɛ wie’m be liɛ’n, b’a mianman kɛ be di junman cɛ sɔ naan b’a ɲan ninnge kunngba mun. (1 Tim. 6:8) Aata difuɛ’m be wla be wun ase be yo naan e bu i kɛ sɛ y’a ɲanman ninnge uflɛuflɛ nga be yo be atɛ’n, e su wunman e wun fɛ. Sanngɛ Klistfuɛ kpa’m be kplinman su kɛ Satan nin i mɛn’n i nunfuɛ mun yɛ be kle be like nga ɔ fata kɛ ɔ yo be cinnjin’n niɔn. (1 Zan 2:15-17) Be nga be o antrɛti nun’n, like kpafuɛ nga be kwla yo’n yɛle kɛ be fa be blɛ’n be di atin bolɛ junman’n naan be fa Zoova i junman’n sie like kwlaa ɲrun.
17 Maan Zoova sufuɛ’m be tinuntinun be usa be wun kosan yɛ mun: ?Like benin yɛ ɔ ti min cinnjin kpa ɔ? ?Ɲanmiɛn i junman’n yɛ n fa sie i like kwlaa ɲrun ɔn? ?Kɛ Zezi sa’n, n klɛn min wun n su Ɲanmiɛn? ?N nian Zezi i ajalɛ’n su titi kɛ nga ɔ seli min kɛ n yo’n sa? ?N kwla siesie min wun naan m’an ɲan blɛ kpa ekun m’an bo Ɲanmiɛn Sielɛ’n i jasin fɛ’n annzɛ m’an di Ɲanmiɛn junman uflɛ? ?Kannzɛ bɔbɔ dɔ nga su’n, n kwlá ukaman Ɲanmiɛn junman nga n di’n su’n, sanngɛ n kunndɛ i sɔ yolɛ’n i wun atin titi?
KƐ Ɔ KO YO NAAN I YOLƐ W’A YO AMUN FƐ NAAN KUSU’N AMUN A KWLA YO’N
18, 19. ?Like benin ti yɛ ɔ fata kɛ e srɛ Zoova ɔ? ?Ngue ti yɛ sɛ e yo sɔ’n, Zoova i klun jɔ́ ɔ?
18 Nanwlɛ, wafa nga Ɲanmiɛn i sufuɛ’m be di i junman wakawaka su’n, ɔ yo ɲɛnmɛn dan. Sanngɛ aniaan wie mɔ be kwla di atin bolɛ junman’n, be konvi nunmɛn i dilɛ’n su annzɛ kusu be bumɛn i kɛ bé kwlɛ́ i di. (Tul. 4:10; Zer. 1:6) ?Sɛ ɔ yo amun sɔ wie’n, ngue yɛ ɔ fata kɛ amun yo ɔ? Amun fɛ i sɔ ndɛ’n wlɛ i Zoova sa nun. Pɔlu seli i wiengu Ɲanmiɛn sufuɛ mun kɛ: “Nyanmiɛn bɔbɔ yɛ ɔ maan i klun sa yolɛ’n yo amun fɛ yɛ maan an kwla yo-ɔ.” (Fil. 2:13) I ti’n, sɛ ɔ yoman amun kɛ amun uka Ɲanmiɛn junman nga amun di’n su’n, amun srɛ Zoova kɛ ɔ yo naan amun konvi sɔ i sɔ yolɛ naan kusu ɔ man amun i sɔ yolɛ’n i wun atin.—2 Piɛ. 3:9, 11.
19 I Nowe o, i Moizi o, i Zeremi o, i Pɔlu o, i Zezi o, be kwlaa be tuli be klun be suli Ɲanmiɛn. Yɛle kɛ be fali be blɛ’n nin be wunmiɛn’n be boli fɔ nga Zoova wá tú sran mun’n i jɔ kleli be. B’a manman like wie fi i atin naan w’a tanndan be junman’n i ɲrun. Mɛn nga e o nun yɛ’n, i nunnunlɛ’n w’a wie ju. I ti’n, maan e kwlaa nga e fali e wun e mannin Ɲanmiɛn’n, e nian sɛ e te yo like kwlaa nga e kwlɛ i yo naan y’a nian sran kpa sɔ mɔ be kan be ndɛ Biblu’n nun’n, be ajalɛ’n su o. (Mat. 24:42; 2 Tim. 2:15) Sɛ e yo kɛ be sa’n, Zoova i klun jɔ́ e wun yɛ ɔ́ yrá e su dan.—An kanngan Malasi 3:10 nun.
[Kosan mun]
[Foto, bue 22]
Kɛ Nowe kannin fɔ nga Zoova wá tú sran mun’n i ndɛ’n, sran’m b’a sieman be su.
[Foto, bue 25]
?Amun buli titi atin bolɛ junman’n i dilɛ’n i akunndan kpa be niannin?
