Taano ta Dapat na Enoton an Paglilingkod ki Jehova?

‘An sakuyang ngoso magbabalangibog kan saimong katanosan asin saimong karahayan sa bilog na aldaw.’—SAL. 71:15.

ANO AN ISISIMBAG NINDO?

Anong mga bagay an nagkaigwa nin epekto sa pamumuhay ni Noe, Moises, Jeremias, asin Pablo?

Anong pagsiyasat sa sadiri an makakatabang sa saimo na determinaran kun paano mo gagamiton an saimong buhay?

Taano ta determinado kang enoton an paglilingkod ki Jehova?

1, 2. (a) Ano an ipinaparisa kan pagdusay nin saro kan saiyang sadiri ki Jehova? (b) Paano kita makikinabang sa pag-estudyar sa mga desisyon ni Noe, Moises, Jeremias, asin Pablo?

SA PAGDUSAY asin pagpabautismo mo bilang parasunod ni Jesus, ginigibo mo an sarong seryosong marhay na lakdang. An pagdusay mo sa Dios iyo an pinakaseryosong desisyon na magigibo mo bilang indibiduwal. Garo man sana sinasabi mo: ‘Dios na Jehova, gusto taka pong magin Kagurangnan sa kada aspekto kan buhay ko. Lingkod mo po ako. Itokdo mo po sa sako kun paano ko dapat gamiton an sakong panahon, ano an dapat na magin mga prioridad ko, asin paano ko gagamiton an sakong mga kakayahan asin mga bagay na yaon sa sako.’

² Kun ika nagdusay nang Kristiano, sa pundamental iyan an ipinangako mo ki Jehova. Dapat kang komendaran sa desisyon mo; iyan an tama asin madonong na gibohon. Pero, sa paggamit kan saimong panahon, ano an ipinaparisa kan pagmidbid mo ki Jehova bilang Kagurangnan mo? An halimbawa ni Noe, Moises, Jeremias, asin apostol Pablo makakatabang sa sato sa pagsiyasat sa hapot na iyan. An lambang saro sa sainda naglingkod ki Jehova nin bilog na kalag. An satong situwasyon kaagid kan sa sainda. An mga desisyon ninda manongod sa pangenot nindang mga gibohon makakadagka sa sato na siyasaton kun paano ta ginagamit an satong panahon.—Mat. 28:19, 20; 2 Tim. 3:1.

BAGO AN BAHA

3. Paanong an panahon niato kaagid kan panahon ni Noe?

³ Pinagkomparar ni Jesus an panahon ni Noe asin an panahon niato. ‘Siring kan mga aldaw ni Noe, siring man an pagpadigdi kan Aki nin tawo,’ an sabi nia. Sinda ‘nagkakarakan asin nag-iirinom, nag-aaragom asin nagpapaaragom, sagkod sa aldaw na si Noe luminaog sa dahong; asin sinda dai nakaisi sagkod na uminabot an baha, asin nadara  sinda gabos.’ (Mat. 24:37-39) An kadaklan sa mga tawo ngonyan sibot-sibot sa pang-aroaldaw nindang buhay na binabaliwala an pagkaapurado kan panahon ta. Dai ninda iniintindi an mga patanid na ibinabalangibog kan mga lingkod nin Dios. Pinag-oolog-olog pa ngani nin dakol an ideya na an Dios mainterbenir sa mga gibo-gibo nin tawo—siring kan ginibo kan mga tawo kan panahon ni Noe. (2 Ped. 3:3-7) Alagad, paano ni Noe ginamit an panahon nia sa masakit na mga kamugtakan na idto?

4. Paano ginamit ni Noe an saiyang panahon pakaakoa kan sugo sa saiya ni Jehova, asin taano?

⁴ Pagkatapos na sabihon ki Noe an katuyohan nin Dios asin an sugo sa saiya, itinogdok nia an arka tangani na may mga tawo asin hayop na maingatan na buhay. (Gen. 6:13, 14, 22) Ibinalangibog man ni Noe an nagdadangadang na paghokom ni Jehova. Inapod sia ni apostol Pedro na “parahulit nin katanosan,” na nagpaparisa na si Noe nagmaigot na tabangan an saiyang mga kapwa na masabotan an pagigin seryoso kan situwasyon ninda. (Basahon an 2 Pedro 2:5.) Sa hiling mo rasonable daw na magpokus si Noe asin an pamilya nia sa pagpundar nin negosyo, na magin labaw sa mga kakontemporanyo ninda, o na magin komportable an estilo nin pamumuhay? Dai nanggad! Huling aram ninda kun ano an nakatalaan na mangyari, linikayan ninda an siring na mga disturbo.

AN MGA PAGPIPILIAN NIN EGIPCIONG PRINSIPE

5, 6. (a) Taano ta tinokdoan si Moises ‘kan gabos na kadonongan nin mga taga Egipto’? (b) Taano ta hinaboan ni Moises an mga oportunidad na naghahalat sa saiya sa Egipto?

⁵ Sunod, hilingon ta an halimbawa ni Moises. Nagdakula sia sa palasyo kan Egipto bilang ampon kan aking babae ni Faraon. Bilang hoben na prinsipe, tinokdoan sia ‘kan gabos na kadonongan nin mga taga Egipto.’ (Gui. 7:22; Ex. 2:9, 10) Posibleng marhay na an katuyohan kan pagtotokdong ini iyo na andamon sia sa sarong katongdan sa palasyo ni Faraon. Posible kutanang nagin prominente sia sa pinakamakapangyarihan na gobyerno kaidto, na igwa kan mga luho, pribilehio, asin mga kaalingan na ikakatao sa saiya kan siring na posisyon. Alagad an mga iyan daw an gustong makamtan ni Moises?

⁶ Dahel sa pagpatuod sa saiya kan tunay niang mga magurang kan sia aki pa, posibleng marhay na aram ni Moises kun ano an panuga ni Jehova sa apoon niang si Abraham, Isaac, asin Jacob. Nagtubod si Moises sa mga panugang idto. Siertong maingat niang hinorophorop an manongod sa puturo nia asin an kaimbodan nia ki Jehova. Kaya, kan mag-abot an panahon na kaipuhan niang pumili sa pagigin Egipciong prinsipe o sa pagigin Israelitang oripon, arin an pinili nia? Pinili ni Moises ‘na pasakitan kaibahan kan banwaan nin Dios, kisa magpaoyon sa kaogmahan nin kasalan sa kadikit na panahon.’ (Basahon an Hebreo 11:24-26.) Pag-abot nin panahon, sinunod nia an paggiya ni Jehova manongod sa kun paano nia dapat gamiton an buhay nia. (Ex. 3:2, 6-10) Taano ta ginibo idto ni Moises? Huling nagtubod sia sa mga panuga nin Dios. Nagkongklusyon sia na mayo siang kaaabtan sa Egipto. Dai nahaloy, an nasyon na  iyan linaglag nanggad paagi sa sampulong damat hale sa Dios. May nahihiling ka daw na leksion digdi para sa mga nagdusay ki Jehova ngonyan? Imbes na magpokus sa karera o ano man na kaalingan sa sistemang ini nin mga bagay, an satong pokus dapat na ki Jehova asin sa paglilingkod sa saiya.

ARAM NI JEREMIAS KUN ANO AN MAABOT

7. Paano an kamugtakan ni Jeremias kapareho kan sa sato?

⁷ An saro pang lalaki na inenot an paglilingkod ki Jehova iyo si propeta Jeremias. Sinugo ni Jehova si Jeremias bilang propeta nia tangani na maghulit nin mensahe nin paghokom sa apostatang Jerusalem asin Juda. Si Jeremias masasabing nabuhay ‘sa huring [kabtang] kan mga aldaw.’ (Jer. 23:19, 20) Aram nia nin lubos na an sistema na kinabubuhayan nia dai na magpapadagos pa arog kan dati.

8, 9. (a) Taano ta kaipuhan na itanos an kaisipan ni Baruc? (b) Ano an maninigo niatong isaisip sa satong mga plano?

⁸ Ano an epekto ki Jeremias kan marigon na pagtubod nia? Sa pag-andam kan saiyang puturo, dai nia hiningoang ibasar iyan sa malalaglag na sistemang idto, huling kamangmangan an paggibo kaiyan. Minsan siring, may panahon na an sekretaryo ni Jeremias, si Baruc, dai nagin malinaw an pagmansay sa mga bagay-bagay. Kaya pinasabngan nin Dios si Jeremias na sabihon sa sekretaryo nia: ‘Uya, raraoton ko an sakuyang mga pinatindog, asin gagaboton ko an sakuyang mga itinanom, asin an bilog na dagang ini. Asin naghahanap ka sa saimo nin mga kahalangkawan [“darakulang bagay,” NW]? Dai ka maghanap: huli ta uya, may dara akong karatan sa gabos na laman, asin itatao ko sa saimo an saimong buhay na siring sa sinamsaman saen ka man pumaduman.’—Jer. 45:4, 5.

⁹ Dai ta aram kun anong “darakulang bagay” an hinahanap ni Baruc para sa sadiri nia. * Alagad, aram nanggad niato na an mga bagay na idto mayong kaaabtan asin siertong matatapos sa pagsakop kan mga Babilonyo sa Jerusalem pag-abot nin 607 B.C.E. May nahihiling ka daw dian na leksion para sa sato? Sa paghanap kan mga pangangaipo sa buhay, kaipuhan man na magplano kita para sa maabot na panahon. (Tal. 6:6-11) Alagad madonong daw na magtao nin kadakol na panahon asin kosog sa mga gibohon na mayo man nin nagdadanay na pakinabang? Totoo, an organisasyon ni Jehova padagos na nagpaplano nin bagong mga Kingdom Hall, pasilidad sa sangang opisina, asin iba pang teokratikong mga proyekto. Minsan siring, an mga paghihingoang ini may kaaabtan huling an katuyohan kaini iyo na suportaran an intereses kan Kahadean. Angay sana na iyan man an magin prioridad nin gabos na dusay na lingkod ni Jehova sa saindang mga plano. Kombensido ka daw talaga na ‘hinahanap mo nguna an kahadean asin an katanosan’ ni Jehova?—Mat. 6:33.

“IBINILANG KO IYAN NA TAPOK”

10, 11. (a) Sa ano nakasentro an mga paghihingoa ni Pablo bago sia nagin Kristiano? (b) Taano ta biyong nagbago an mga prioridad ni Pablo?

¹⁰ Ultimo, estudyaran niato an halimbawa ni Pablo. Bago sia nakombertir sa Kristianismo, garo baga magayonon an puturo nia. Tinokdoan sia kan saro sa pinakabantog na mga maestro kan panahon nia dapit sa Judiong ley. Nag-ako sia nin autoridad hale sa Judiong halangkaw na saserdote. Asin an pag-oswag nia sa Judaismo orog kisa sa mga kakontemporanyo nia. (Gui. 9:1, 2; 22:3; 26:10; Gal. 1:13, 14) Alagad, gabos idto nagbago kan maaraman ni Pablo na mayo na an pagbendisyon ni Jehova sa mga Judio bilang sarong nasyon.

¹¹ Narealisar ni Pablo na an karera sa Judiong sistema mayo nin halaga sa punto de vista ni Jehova; mayo iyan nin kaaabtan. (Mat. 24:2) An dating Fariseong ini nagsabi pa ngani na kun ikokomparar sa saiyang bago asin naliwanagan  na pakasabot kan mga katuyohan nin Dios saka sa pribilehio na Kristianong ministeryo, an dating hinohona niang mahalaga minamansay na nia ngonyan na dakol na “tapok.” Binayaan ni Pablo an mga oportunidad nia sa Judaismo asin poon kaidto idinusay na nia an saiyang buhay sa paghuhulit kan maogmang bareta.—Basahon an Filipos 3:4-8, 15; Gui. 9:15.

SIYASATON AN SAIMONG MGA PRIORIDAD

12. Sa ano nagkonsentrar si Jesus pagkatapos kan saiyang bautismo?

¹² Si Noe, Moises, Jeremias, Pablo, asin dakol pang iba na arog ninda ginamit an kadaklan sa saindang panahon asin kosog sa teokratikong mga gibohon. Sinda marahay na halimbawa para sa sato. Siempre, si Jesus an nakakalabi sa gabos na lingkod na dusay ki Jehova. (1 Ped. 2:21) Pakabautismohi ki Jesus sagkod na magadan sia, idinusay nia an saiyang buhay sa paghuhulit kan maogmang bareta asin sa pagtao nin onra ki Jehova. Para sa Kristianong minimidbid si Jehova bilang Kagurangnan nia, an malinaw na kongklusyon iyo na an paglilingkod sa Saiya dapat na magin prioridad nia sa buhay. Arog ka man daw kaiyan? Asin paano pagsasabayon an teokratikong mga pasohan asin an sekular na mga aktibidad?—Basahon an Salmo 71:15; 145:2.

13, 14. (a) Ineenkaminar an gabos na nagdusay na Kristiano na isip-isipon an ano? (b) Anong pagkakontento an puedeng kamtan kan mga lingkod nin Dios?

¹³ Sa nakaaging mga taon, paorootrong ineenkaminar kan organisasyon ni Jehova an mga Kristiano na mapagngayongayong isip-isipon kun baga puede sindang magpayunir. Huli sa manlaenlaen na dahelan, dai itinotogot kan mga kamugtakan nin nagkapirang maimbod na lingkod ni Jehova na maghulit nin mga 70 oras kada bulan. Dai sinda maninigong magmondo dapit digdi. (1 Tim. 5:8) Alagad kumusta an kamugtakan mo? Dai mo daw talaga kayang magpayunir?

¹⁴ Girumdoma an kagayagayahan nin kadakol na lingkod nin Dios durante kan panahon nin Memorial ngonyan na taon. Kan Marso, igwa nin espesyal na probisyon para sa mga auxiliary payunir na pumili kun 30 o 50 oras an gagamiton ninda sa paghuhulit. (Sal. 110:3) Minilyon an nag-auxiliary payunir, asin nabanaag sa mga kongregasyon an pambihirang entusiasmo saka kagayagayahan. Puede mo daw na iareglo an saimong mga aktibidad tanganing mas parate mong maeksperyensiahan an siring na kagayagayahan? Pagkatapos kan kada aldaw, nagtatao iyan sa nagdusay na Kristiano nin dakulang pagkakontento kaya masasabi nia, “Dios na Jehova, ginibo ko po an bilog kong makakaya sa paglilingkod sa saimo.”

15. Ano an maninigong magin pasohan nin sarong hoben na Kristiano mapadapit sa sekular na edukasyon?

¹⁵ Tibaad madali ka nang matapos sa pag-eskuela. Tibaad marahay an salud mo asin dikit an responsabilidad. Seryoso mo daw na pinag-iisipan na magregular payunir? Mayong duda na an saimong mga maestra sinserong naniniwala na pinakaikakarahay mo an pagkua nin halangkaw na edukasyon asin pagplano para sa sekular na karera. Pero, an pinagtitiwalaan ninda iyo an mga organisasyon nin tawo asin an kuarta na mayo nin nagdadanay na puturo. Sa ibong na lado, kun magmamaigot ka para sa teokratikong karera, magkakamit ka nin tunay asin daing sagkod na pakinabang. Asin inaarog mo an perpektong halimbawa ni Jesus. An siring na madonong na desisyon makakapaogma sa saimo. Poprotektaran ka kaiyan. Asin ipapahiling kaiyan na determinado kang mamuhay oyon sa saimong pagdusay ki Jehova.—Mat. 6:19-21; 1 Tim. 6:9-12.

16, 17. Ano an mga puedeng ihapot may koneksion sa sekular na trabaho asin iba pang mga gibohon?

¹⁶ Dakol sa mga lingkod nin Dios ngonyan an nagtatrabaho nin dakol na oras tanganing ikatao an pangenot na mga pangangaipo kan pamilya ninda. Pero, an nagkapira tibaad nagtatrabaho nin mas dakol na oras kisa sa kaipuhan. (1 Tim. 6:8) Ginigibo kan kinaban nin  komersio an pinakamakakaya kaini tanganing kombensiron kita na dai kita mabubuhay kun mayo an dakol na produkto kaini asin an kada bagong luwas na gamit. Alagad an tunay na mga Kristiano dai mapadikta sa kinaban ni Satanas dapit sa saindang mga prioridad. (1 Juan 2:15-17) Para sa mga nagretiro na sa sekular na trabaho, may mas marahay pa daw kisa sa paggamit kan saindang panahon sa pagpapayunir, na ineenot an paglilingkod ki Jehova?

¹⁷ An gabos na nagdusay na lingkod ni Jehova puedeng hapoton an saindang sadiri: Ano an pangenot sa buhay ko? Ineenot ko daw an intereses kan Kahadean? Inaarog ko daw an mapagsakripisyong atitud ni Jesus? Hinihimate ko daw an sadol ni Jesus na padagos siang sundan? Puede ko daw na liwaton an sakong iskedyul tanganing mas dakol na panahon an magamit ko sa paghuhulit kan Kahadean o sa iba pang teokratikong mga gibohon? Minsan ngani dai itinotogot kan kamugtakan ko ngonyan na pahiwason an sakong paglilingkod, ipinapadagos ko daw an pagpatalubo nin pagigin mapagsakripisyo?

“MAGMAWOT SAGKOD HUMIRO”

18, 19. Ano an puede mong ipamibi, asin taano ta an siring na pakiolay nakakapaogma ki Jehova?

¹⁸ Nakakagayagayang pagmasdan an kaigotan kan banwaan nin Dios. Minsan siring, an nagkapira tibaad mayo nin pagmawot na magpayunir o nag-iisip na dai ninda iyan kayang gibohon—dawa itinotogot kan saindang mga kamugtakan. (Ex. 4:10; Jer. 1:6) Kaya ano an marahay na gibohon? Angay daw na ipamibi ini? Iyo nanggad. Sinabihan ni Pablo an mga kapagtubod na si Jehova, “huli sa pinagmarahay nia, iyo an nagpapahiro sa saindo tanganing kamo magmawot sagkod humiro.” (Fil. 2:13, NW) Kun dai ka namomotibar na pahiwason an saimong ministeryo, hagadon ki Jehova na logod itao sa saimo an pagmawot asin an abilidad na gibohon iyan.—2 Ped. 3:9, 11.

¹⁹ Si Noe, Moises, Jeremias, Pablo, asin Jesus gabos debotong lalaki. Ginamit ninda an saindang panahon asin kosog sa pagbalangibog kan nagpapatanid na mensahe ni Jehova. Dai ninda tinogotan na madisturbo sinda. Harani na an katapusan kan presenteng sistema nin mga bagay, kaya kaipuhan niato gabos na nagdusay sa Dios na siertohon na padagos niatong ginigibo an satong pinakamakakaya sa pagsunod kan marahayon na mga halimbawang ini sa Kasuratan. (Mat. 24:42; 2 Tim. 2:15) Sa paggibo kaiyan, mapapaogma niato si Jehova asin makakamtan an abundang bendisyon nia.—Basahon an Malaquias 3:10.

[Nota sa Ibaba]

[Mga Hapot Para sa Pag-adal]

[Ritrato sa pahina 21]

Dai naghimate an mga tawo sa patanid ni Noe

[Ritrato sa pahina 24]

Seryoso mo daw na pinag-iisipan na magregular payunir?