Cinshi Tulingile Ukubikila Umulimo wa kwa Yehova pa Ntanshi?

“Akanwa kandi kakalondolola ubulungami bwenu, kakalondolola ukupususha kwenu akasuba konse.”—AMALU. 71:15.

KUTI MWAYASUKA SHANI?

Finshi fyalengele ukuti Noa, Mose, Yeremia na Paulo babike Yehova pa ntanshi?

Finshi fingamwafwa ukwishiba ifyo mulingile ukucita?

Cinshi mulefwaila ukubikila umulimo wa kwa Yehova pa ntanshi?

1, 2. (a) Bushe calola mwi ukuipeela kuli Yehova? (b) Bushe ifyo Noa, Mose, Yeremia, e lyo na Paulo bacitile kuti fyatwafwa shani?

NGA MWAIPEELA no kubatishiwa, mulaba abasambi ba kwa Yesu kabili ninshi mwacita icintu icacindama nga nshi. Ukuipeela kuli Lesa cintu icikankaala sana ico umuntu onse alingile ukucita. Ciba kwati mulelanda ati: ‘Yehova, Ndefwaya ukulacita ukufwaya kwenu pantu ndi musha wenu. Ndefwaya mulengafwa ukwishiba ifyo mfwile ukubomfya inshita, ifyo mfwile ukubalilapo ukucita e lyo ne fyo mfwile ukubomfya ifyuma no kulamuka kwandi.’

² Nga mwalibatishiwa, ifi fine ninshi e fyo mwalaile Yehova ukuti e fyo mukalacita. Kanshi tulemutasha nga nshi pa fyo mwapingwilepo ukucita. Nomba bushe nga mwaishiba ukuti Yehova ni Shikulwinwe, mwa kulabomfya shani inshita? Ifyo Noa, Mose, Yeremia e lyo na Paulo bacitile kuti fyatwafwa ukwishiba umulolele ici cipusho. Bonse balibombeele Yehova no mweo onse. Ifyalecitika mu nshiku shabo fyalilinganako ne ficitika mu nshiku shesu. Ifyo basalilepo ukucita kuti fyatwafwa ukwishiba ifya kubomfya inshita.—Mat. 28:19, 20; 2 Tim. 3:1.

ILYO KUSHILABA ILYESHI

3. Bushe inshiku shesu shapalana shani ne nshiku sha kwa Noa?

³ Yesu alingenye inshiku shesu ku nshiku sha kwa Noa. Atile: “Filya fine inshiku sha kwa Noa shali, e fyo cikaba na lintu Umwana wa muntu akabapo.” Pantu “balelya no kunwa, baleupa no kuupwa, mpaka no bushiku ubo Noa aingile mu cibwato; kabili tabapooseleko amano nakalya mpaka ilyeshi lyaisa no kubasenda bonse.” (Mat. 24:37-39) Abantu abengi  muno nshiku bacita fye ifintu ukwabula ukubikako amano ukuti tuli mu nshiku sha mpela. Tabapoosako amano ku fyo abantu ba kwa Lesa babasoka. Abengi no kupumya balapumya ukuti Lesa takonaule icalo nga filya abantu mu nshiku sha kwa Noa balecita. (2 Pet. 3:3-7) Apo abantu mu nshiku sha kwa Noa bali abayafya, bushe Noa abomfeshe shani inshita?

4. Bushe Noa abomfeshe shani inshita ilyo bamupeele umulimo kuli Yehova kabili mulandu nshi?

⁴ Pa numa ya kumweba ifyo Lesa alepanga ukucita e lyo amupeela no mulimo, Noa alikuulile icibwato ica kupusukilamo abantu ne nama. (Ukute. 6:13, 14, 22) Noa alisokele abantu na pa fyo Yehova ali no konaula abantu babipa. Umutumwa Petro atile, Noa ‘aleshimikila abantu pa fyalungama’ pantu alefwaisha ukusambilisha abantu ukwishiba ifyo ifintu fyabipile mu nshiku shabo. (Belengeni 2 Petro 2:5.) Bushe mutontonkanya ukuti nga cali fye bwino, Noa no lupwa lwakwe ukubika amano ku makwebo, ukufwaya ukulumbuka e lyo no kufwaya ifintu ifingi ukucila bambi? Awe nakalya! Apo balishibe ifyali no kucitika, tabalefwaya ifya kubapumbula.

IFYO CILOLO UMWINA EGUPTI ASALILEPO UKUCITA

5, 6. (a) Bushe ifyo Mose asambilile fyali no kumwafwa ukubomba mulimo nshi? (b) Cinshi Mose akaniine ubusambashi ubo ali no kukwata mu Egupti?

⁵ Nomba natulande pali Mose. Mose akuulile mwi sano lya bena Egupti pantu umwana mwanakashi uwa kwa Farao alimubulile ukuba umwana wakwe. Apo ali ni cilolo umwaice, balimusambilishe “amano yonse aya bena Egupti.” (Imil. 7:22; Ukufu. 2:9, 10) Ifyo bamusambilishe nalimo fyali no kumwafwa pa kuti akalebombela mwi sano lya kwa Farao. Ali no kulumbuka sana mu buteko ubwakwatishe amaka pali ilya nshita, ali no kukwata ifintu ifisuma ifingi kabili ali no kucindikwa. Bushe Mose alefwaya ifi fintu?

⁶ Pa mulandu wa fyo abafyashi bakwe bamusambilishe ilyo ali umwaice, Mose afwile alishibe ifyo Yehova alaile ifikolwe fyakwe Abrahamu, Isaki na Yakobo. Mose alicetekele aya malayo. Afwile alitontonkenyepo bwino pa fyo ubumi bwakwe bwali no kuba e lyo na pa fyo alingile ukuba uwa cishinka kuli Yehova. Ilyo inshita yaishile iya kuti asalepo nampo nga kuba cilolo wa bena Egupti nelyo umwina Israele umusha, finshi asalilepo? Mose asalilepo “ukuculila pamo na bantu ba kwa Lesa ukucila ukuipakisha ubusuma bwa pa kashita fye ubwa lubembu.” (Belengeni AbaHebere 11:24-26.) Pa numa, Mose alikonkele ifyo Lesa amwebele pa fyo ali no kucita. (Ukufu. 3:2, 6-10) Cinshi Mose akonkeele ifyo Yehova amwebele? Pantu alicetekele amalayo ya kwa Lesa. Alimwene ukuti tali no kutwalilila ukuba umusambashi mu  Egupti pantu Lesa ali no kuleta ifinkunka 10 mu Egupti. Bushe abaipeela kuli Yehova kuti basambililako fimo kuli ifi? Ukucila ukulabika amano ku kufwaya ukusambilila no kwangala, tufwile ukubika amano kuli Yehova na ku mulimo wakwe.

YEREMIA ALISHIBE IFYALI NO KUCITIKA

7. Bushe inshiku shesu shalingana shani ne sha kwa Yeremia?

⁷ Kasesema Yeremia na o alibikile umulimo wa kwa Yehova pa ntanshi. Yehova alyebele Yeremia ukubila ukuti Yehova ali no kupingula abantu ba mu Yerusalemu na mu Yuda pantu balimupondokele. Kanshi kuti twatila Yeremia aleikala “mu nshiku sha ku mpela.” (Yer. 23:19, 20) Alishibe bwino bwino ukuti ubuteko bwa bena Egupti tabwali no kutwalilila ukukwata amaka.

8, 9. (a) Mulandu nshi Baruki balingile ukumulungika mu fyo aletontonkanya? (b) Finshi tulingile ukulaibukisha ilyo tulepanga ifya ukucita?

⁸ Apo Yeremia alishibe ifyali no kucitika mu Yerusalemu, finshi akeene ukucita? Tafwaile ubusambashi mu calo icali no konaulwa. Bushe nga cali bwino afwaya ukuba umusambashi? Inshita imo, kalemba wa kwa Yeremia Baruki alilubile mu kutontonkanya. E co Lesa aebele Yeremia ukweba kalemba wakwe ukuti: “Mona! Ifyo nakuula ndebongolola, kabili ifyo nalimba ndenukula, e kutila icalo conse fye. Lelo iwe, ulefwaya ifintu ifikalamba. Leka ukufifwaya. Pantu, mona, ndeleta ubucushi pa bantu bonse, . . . kabili nkakupeela umweo obe e o ukapususha konse uko ukaya.”—Yer. 45:4, 5.

⁹ Tatwaishiba bwino “ifintu ifikalamba” ifyo Baruki alefwaya. * Lelo twalishiba ukuti fintu ifishakwete ubucindami bwine bwine ifyali no kupwa ilyo abena Babiloni bali no konaula Yerusalemu mu 607 B.C.E. Finshi twingasambilila kuli ifi? Pa kuti tukwate ifyo tukabila, tulingile ukuipekanishisha libela. (Amapi. 6:6-11) Bushe kuti cawama ukulabomfya inshita yesu na maka ku kufwaya ifintu ifishakwata ubucindami bwine bwine? Ukuteyanya kwa kwa Yehova kwalitwalilila ukukuula Amayanda ya Bufumu, amaofeshi ya Nte sha kwa Yehova na makuule yambi. Iyi milimo yalikwata ubucindami bwine bwine kabili ikatwalilila pantu ilatungilila umulimo wa kwa Lesa. Kanshi kuti cawama nga ca kuti abantu ba kwa Yehova balebika ifya Bufumu pa ntanshi ilyo balepanga ifya kucita. Bushe mwalishininkisha ukuti ‘intanshi mulafwaya ubufumu no bulungami bwa kwa [Yehova]?’—Mat. 6:33.

“MFIMONA UKUTI FISOOSO FYE”

10, 11. (a) Finshi Paulo abikileko amano ilyo ashilaba Umwina Kristu? (b) Cinshi calengele ukuti Paulo aluuke mu fyo aletontonkanya?

¹⁰ Nomba natulande pali Paulo. Ilyo ashilaba Umwina Kristu calemoneka kwati ali no kukwata incito ya pa muulu sana. Alisambilile amafunde ya baYuda kabili uwalemusambilisha ali muntu uwalumbuka sana. Shimapepo mukalamba uwa baYuda alimupeele amaka kabili alelunduluka mu masambililo ya baYuda ukucila abaYuda banankwe. (Imil. 9:1, 2; 22:3; 26:10; Gal. 1:13, 14) Lelo ilyo Paulo aishibe ukuti Yehova alilekele ukupaala uluko lwa baYuda, alyalwike.

¹¹ Paulo alishibe ukuti ukulabomba incito muli cilya calo ca baYuda takwakwete ubucindami bwine bwine kuli Yehova. (Mat. 24:2) Paulo uwali kale umuFarise alelinganya ifyo asambilile pali Lesa no mulimo wa kwa Lesa ku fyo alemona pa nshita imo ukuti fyali ifyacindama,  ukuti “fisooso fye.” Paulo alilekele amasambililo ya baYuda kabili ali-ipeele ku kulashimikila imbila nsuma.—Belengeni  Abena Filipi 3:4-8, 15; Imil. 9:15.

TONTONKANYENI PA FYO MUFWAISHA UKUCITA

12. Finshi ifyo Yesu abikileko sana amano ukucita ilyo abatishiwe?

¹² Noa, Mose, Yeremia, Paulo na bambi abengi balebomfya inshita yabo na maka ku kucita ukufwaya kwa kwa Lesa. Baba fya kumwenako ifisuma nga nshi kuli ifwe. Lelo Yesu e ca kumwenako icisuma sana pa babomfi ba kwa Yehova bonse. (1 Pet. 2:21) Ilyo Yesu abatishiwe, ali-ipeele ku kushimikila imbila nsuma no kucindika ishina lya kwa Yehova. Kanshi Umwina Kristu uwaishiba ukuti musha wa kwa Yehova alingile ukumona ukuti ukubombela Yehova e cintu icacindama sana. Bushe na imwe e fyo mufwaya ukucita? Bushe kuti twacita shani pa kuti twingabika umulimo wa kwa Lesa pa ntanshi ilyo tulebomba ne milimo yesu?—Belengeni Amalumbo 71:15; 145:2.

13, 14. (a) Finshi ifyo bonse ababomfi ba kwa Lesa balekoseleshiwa ukucita? (b) Bushe ababomfi ba kwa Lesa kuti baumfwa shani nga babombako uyu mulimo?

¹³ Pa myaka iingi, ukuteyanya kwa kwa Yehova kulakoselesha Abena Kristu ukupepa kuli Yehova pa kuti bengabombako bupainiya. Kwaliba ifingi ifingalenga ababomfi ba kwa Yehova ukufilwa ukubomba bupainiya pantu te kuti bakumanishe amaawala 70 cila mweshi. Tabalingile ukumfwa ububi. (1 Tim. 5:8) Inga imwe? Bushe ca cine kuti mwafilwa ukubombako bupainiya?

¹⁴ Tontonkanyeni pa nsansa isho bakapepa ba kwa Lesa bakwete ilyo babombeleko bupainiya mu nshita ya Cibukisho uno wine umwaka mu 2012. Mu March, kwali ukupekanya kwa kuti bamunyinefwe kuti babombako bupainiya bwa kwafwilisha ubwa ma-awala 30 nelyo 50. (Amalu. 110:3) Bamunyinefwe ama milioni balibombeleko bupainiya bwa kwafwilisha kabili balitemenwe sana. Bushe te kuti muipekanye pa kuti mulebombako bupainiya libili libili? Cilawama nga nshi pa mpela ya bushiku ubuli bonse ukweba Yehova ukuti “Nincita fyonse ifyo naciba no kucita mu mulimo wenu.”

15. Finshi Umwina Kristu wacaice engapingulapo ukucita pa numa ya kupwisha isukulu?

¹⁵ Nga ca kuti muli mupepi no kupwisha isukulu e lyo kabili nga tamulwalilila e lyo nga tamulakwata ne fya kucita ifingi, bushe te kuti mutontonkanyepo pa kubomba bupainiya bwa nshita yonse? Lelo bakafundisha wenu limbi kuti bamweba ukutila kuti cawama sana nga mwasambilila sana no kwingila incito iisuma. Nomba bena babika sana amano ku bwikashi bwa pa muulu na mu kukwata sana indalama ifishakwata ubucindami bwine bwine. Lelo nga mwabika amano mu kubomba umulimo wa kwa Lesa ninshi mwasala umulimo uwacindama nga nshi kabili ninshi mulepashanya Yesu. Nga mwacita ifi, mukaba aba nsansa kabili mukacingililwa. E lyo mukalanga no kuti mulefwaisha ukutwalilila ukubombela Yehova no mutima wenu onse.—Mat. 6:19-21; 1 Tim. 6:9-12.

16, 17. Fipusho nshi twingepusha pa lwa kubomba incito e lyo na pa milimo ya kwa Lesa imbi?

¹⁶ Ababomfi ba kwa Lesa abengi balabomba amaawala ayengi pa kuti balesunga indupwa shabo bwino. Lelo bambi balabomba amaawala ayengi sana ukucila pa fyo bafwile ukubomba. (1 Tim. 6:8) Ama kampani ayapanga ifintu yalatweba ukuti tulingile ukushita ifintu ifipya ifyo  bapanga pantu nga tatuleshita ifipya kuti cilemoneka kwati te kuti tuleikala bwino. Lelo Abena Kristu ba cine tabafwaya icalo ca kwa Satana cilebeba ifya kucita. (1 Yoh. 2:15-17) Nomba abapoka penshoni, bushe tabalingile ukubika umulimo wa kwa Yehova pa ntanshi pa kubombako bupainiya?

¹⁷ Bonse ababomfi ba kwa Yehova bafwile ukuyipusha abati: Finshi nacindamika sana? Bushe ndabika Ubufumu bwa kwa Lesa pa ntanshi? Bushe ndaipeelesha nga filya Yesu aipeeleshe? Bushe ndakonka ukufunda kwa kwa Yesu ukwa kuti mulenkonka? Bushe kuti napekanya shani pa kuti ndebombako sana umulimo wa kushimikila ne milimo ya kwa Lesa imbi? Nangu ca kuti te kuti imbe na maka ya kubombako sana umulimo pali ino nshita, bushe ndalanga ukuti ndaipeelesha?

“MULEFWAYA E LYO NO KUCITAPO CIMO”

18, 19. Finshi ifyo mulingile ukupepela, kabili amapepo ya musango uyu kuti yasekesha shani Yehova?

¹⁸ Cilawama sana ukumona ifyo ababomfi ba kwa Lesa bacincila. Lelo bamo balashimunuka ukubombako bupainiya no kuyumfwa kwati tabafikapo ukubomba, nangu ca kuti balikwata inshita na maka ya kubomba. (Ukufu. 4:10; Yer. 1:6) Kuti bacita shani? Nga ca kuti ifi e fyo bomfwa, bushe tabalingile ukupepa kuli Yehova? Ee, balingile ukupepa. Paulo aebele Abena Kristu banankwe ati, Yehova “pa mulandu wa kufwaya kwakwe pa kuti mulefwaya e lyo no kucitapo cimo.” (Fil. 2:13) Kanshi nga mulashimunuka ukubombako umulimo, mulingile ukupepa kuli Yehova pa kuti engamupeela amaka aya kufwaisha ukubomba.—2 Pet. 3:9, 11.

¹⁹ Noa, Mose, Yeremia e lyo na Paulo na Yesu bonse bali-ipeeleshe ku mulimo wa kwa Lesa. Babomfeshe inshita yabo ku kubila ubukombe bwa kwa Yehova ubwa bupingushi. Tabalekele icintu nangu cimo ukubapumbula. Icalo cili mupepi no kupwa, e co kanshi, ifwe bonse fwe baipeela kuli Lesa tulingile ukushininkisha ukuti tuletwalilila ukubombesha ukukonka ifya kumwenako fya mu Baibolo. (Mat. 24:42; 2 Tim. 2:15) Nga tulecita ifi, kuti tulesekesha Yehova kabili kuti atupaala.—Belengeni Malaki 3:10.

[Futunoti]

[Ifipusho]

[Icikope pe bula 21]

Abantu tabaumfwile ifyo Noa alebasoka

[Icikope pe bula 24]

Bushe na mutontonkanyapo sana pa kubomba bupainiya bwa nshita yonse?