?From Wanem Yumi Mas Mekem Wok Blong Jehova Fastaem?

“Bambae mi stap tokbaot ol stret fasin blong yu. Oltaem bambae mi stap talemaot paoa blong yu blong sevem man, i stat long moning gogo kasem long sapa.”—SAM 71:15.

?BAMBAE YU YU ANSA OLSEM WANEM?

?From wanem Noa, Moses, Jeremaea, mo aposol Pol, oli mekem wok blong Jehova fastaem long ol narafala samting?

bambae i givhan long yu blong jusum samting we yu wantem mekem long laef blong yu?

?From wanem yu mas mekem wok blong Jehova fastaem long ol narafala samting?

1, 2. (1) ?Man we i givim laef blong hem long Jehova, hem i promes blong mekem wanem? (2) ?From wanem fasin blong Noa, Moses, Jeremaea, mo Pol, i save givhan long yumi?

SIPOS yu givim laef blong yu i go long God mo yu baptaes, yu mekem desisen we i bigwan moa long ol narafala desisen. I olsem we yu talem long Jehova se: ‘Mi mi wantem se yu yu Masta blong mi long olgeta laef blong mi. Mi mi man blong wok blong yu. Mi wantem we yu talem long mi se, ?mi mas yusum taem blong mi olsem wanem? ?Wanem samting we mi mas tinghevi long hem? ?Ol samting we mi mi gat bambae mi yusum olgeta olsem wanem?’

² Hemia nao samting we yu promes blong mekem. Desisen blong yu i nambawan. Hem i waes mo i stret. Naoia we Jehova i Masta blong yu, ?yu yu yusum taem blong yu olsem wanem? Fasin blong Noa, Moses, Jeremaea, mo aposol Pol, i save givhan long yumi blong ansa long kwestin ya. Olgeta man ya oli traehad long wok blong Jehova. Ol samting we i hapen long taem blong yumi oli olsem ol samting we i hapen long taem blong ol man ya. Ol desisen we oli mekem i soemaot ol samting we oli tinghevi long hem. Mo fasin blong olgeta i save givhan long yumi blong luk olsem wanem yumi stap yusum taem blong yumi.—Mat. 28:19, 20; 2 Tim. 3:1.

BIFO WE BIGFALA WOTA I RON

3. ?From wanem taem blong yumi i olsem taem blong Noa?

³ Jisas i talem se taem blong yumi i olsem taem blong Noa. Hem i talem se: “Long taem ya we mi, mi Pikinini blong Man mi kamtru, bambae i olsem taem blong Noa bifo, we ol man oli no rere. Long taem ya, taem we wota i no ron bigwan yet, ol man oli stap kakae, mo oli stap dring, mo oli stap mekem mared, go kasem taem we Noa i go insaed long bigfala sip blong hem. Mo olgeta ya oli no save se bambae trabol i kam, gogo wota i ron bigwan,  i tekemaot olgeta.” (Mat. 24:37-39) Tede plante man oli no lesin long ol tok we ol man blong God oli talemaot. Nating se en blong wol ya i klosap, be oli no wantem save. Olsem ol man long taem blong Noa, ol man tede oli no bilif se God bambae i spolem ol rabis man. !Oli laf taem oli harem ol man blong God oli tokbaot samting ya! (2 Pita 3:3-7) Nating se ol man oli no lesin long ol tok we Noa i talemaot, ?Noa i mekem wanem?

4. ?Noa i yusum taem blong hem blong mekem wanem? ?From wanem Noa i mekem olsem?

⁴ God i talem long Noa se bambae hem i spolem ol rabis man, mo hem i talem wanem we Noa i mas mekem. Ale, Noa i wokem wan bigfala sip blong sevem ol man mo ol anamol. (Jen. 6:13, 14, 22) Mo hem i talemaot se Jehova bambae i spolem ol man. Aposol Pita i talem se Noa i wan man we i stap “talemaot stret fasin.” Hemia i soemaot se Noa i wok had blong givhan long ol narafala blong kasem save se oli no mas tektaem blong obei long God. (Ridim 2 Pita 2:5.) ?Yu ting se i waes blong Noa mo famle blong hem oli traehad blong statem wan bisnes, oli traem mekem laef blong olgeta i gud moa long ol narafala, mo oli kasem plante sas samting? !Nogat! Oli no letem eni samting i pulum olgeta blong lego wok blong Jehova, from we oli save se wol bambae i lus.

OL DESISEN BLONG WAN HAEMAN BLONG IJIP

5, 6. (1) ?From wanem oli tijim Moses long “waes blong ol man Ijip”? (2) ?From wanem Moses i no wantem laef olsem wan haeman blong Ijip?

⁵ I gud yumi luk wanem we yumi save lanem long fasin blong Moses. Dota blong king blong Ijip i lukaot long Moses olsem stret pikinini blong hem. Moses i gruap long haos blong king olsem wan pikinini blong king. “Oli tijim hem long waes blong ol man Ijip.” (Wok 7:22; Eks. 2:9, 10) Oli tijim hem blong i save wok long haos blong king mo i kam wan haeman long Ijip. Long taem ya, Ijip i gat bigfala paoa. Moses i save kasem plante sas samting mo bambae ol man oli ona long hem. ?Be olsem wanem? ?Moses i tinghevi long ol samting ya?

⁶ Taem Moses i pikinini nomo, stret papa mama blong hem i tijim hem blong save Jehova. Ating hem i save promes we Jehova i mekem long Ebraham, Aesak, mo Jekob. Moses i bilif se ol promes ya bambae oli kamtru. Ating hem i tingting plante long samting we bambae hem i mekem long laef blong hem, mo wanem we hem i mas mekem blong i obei oltaem long Jehova. Biaen hem i mas jusum se bambae hem i laef olsem wan haeman blong Ijip no olsem wan man Isrel we i slef nomo. ?Hem i jusum weswan? “Hem i no wantem blong i stap hapi long fasin blong sin we i blong smoltaem nomo, hem i glad moa blong go joen long ol man blong God blong harem nogud wetem olgeta.” (Ridim Hibrus 11:24-26.) Moses i yusum laef blong hem blong mekem Jehova i glad. (Eks. 3:2, 6-10) ?From wanem Moses i mekem olsem? From we hem i bilif long ol promes blong God, mo hem i save se gudfala laef we hem i save gat long Ijip bambae i no stap olwe. I tru se biaen God i mekem ten panis i kasem ol man Ijip. Fasin blong  Moses i tijim yumi evriwan we yumi givim laef blong yumi long Jehova. Yumi no mas putum tingting blong yumi long gudfala wok mo ol sas samting we yumi save kasem long wol ya, be yumi mas tinghevi long Jehova mo long wok blong hem.

JEREMAEA I SAVE SAMTING WE BAMBAE I HAPEN

7. ?From wanem taem blong Jeremaea i olsem taem blong yumi?

⁷ Jeremaea tu i mekem wok blong Jehova fastaem long ol narafala samting. Jehova i jusum hem blong i mekem wok blong profet. Nao Jeremaea i mas go talemaot long ol man Jerusalem mo ol man Juda se Jehova bambae i jajem olgeta, from we oli wosipim ol giaman god. Taem blong Jeremaea i olsem taem blong yumi. Hem i laef long ol las dei blong Jerusalem mo Juda. (Jer. 23:19, 20) Hem i save se ol samting long ol ples ya bambae oli lus.

8, 9. (1) ?From wanem God i stretem Baruk? (2) ?Yumi mas tingbaot wanem, taem yumi mekem ol plan?

⁸ Jeremaea i bilif long tok blong God. Taswe hem i no traehad blong kasem haenem mo wan gudfala laef. Bambae i krangke sipos hem i mekem olsem from we hem i save se ol samting ya bambae oli lus. Be man ya Baruk we i wok wetem Jeremaea, i stap tingting blong kasem wan gudfala laef. Ale God i givim tok blong hem long Jeremaea blong i stretem Baruk. Hem i se: “Mi stap brekemdaon ol samting we mi bin stanemap, mo mi stap pulumaot ol samting we mi bin planem. Bambae mi mekem olsem long olgeta ples long wol ya. ?Olsem wanem? ?Yu ting se bambae yu kasem gudfala laef, i winim we ol narafala man bambae oli kasem? I nogud yu mekem olsem. Mi bambae mi letem bigfala trabol i kam kasem olgeta man long wol ya, be bambae mi letem yu yu stap laef long weples we bambae yu yu go long hem. Mi mi Hae God, mo hemia tok blong mi.”—Jer. 45:4, 5.

⁹ Yumi no save wanem samting stret we Baruk i wantem mekem blong i kasem wan gudfala laef. * Be yumi save se bambae ol samting ya oli lus, taem ol man Babilon i spolem Jerusalem long yia 607 B.K.T. ?Yumi lanem wanem? I tru se yumi mas tingbaot wanem we yumi mas mekem, blong yumi save kasem ol samting we yumi nidim long laef. (Prov. 6:6-11) ?Be yu ting se i waes blong traehad blong kasem ol samting we bambae oli lus? Ating bambae yumi westem taem mo paoa blong yumi nomo. I tru se ogenaesesen blong Jehova i stap plan blong wokem ol niu Haos Kingdom, branj ofis, mo sam narafala samting bakegen. Be ol plan ya oli no blong kasem plante samting long wol ya we bambae i lus. Oli blong mekem wok blong Kingdom i go moa. Taswe yumi evriwan we i givim laef blong yumi long Jehova, yumi mas tinghevi long Kingdom blong God long ol plan we yumi mekem. ?Olsem wanem? ?Yu yu stap lukaot Kingdom mo stret fasin blong Jehova fastaem?—Mat. 6:33.

“MI LUK OLGETA OLSEM RABIS NOMO”

10, 11. (1) ?Bifo we Pol i kam Kristin, hem i tinghevi long wanem? (2) ?From wanem tingting blong Pol i jenis bigwan?

¹⁰ I gud yumi tokbaot samting we aposol Pol i mekem. Bifo we Pol i kam Kristin, hem i gat wan gudfala wok mo ol man oli ting se bambae hem i kam wan haeman. Hem i stadi long loa blong ol man Isrel mo wan nambawan tija i tijim hem. Hae pris blong ol man Isrel i trastem hem mo i givim wan gudfala wok long hem. Pol i strong long skul blong ol laen blong Isrel, i bitim plante narafala we hem i gruap wetem olgeta. (Wok 9:1, 2; 22:3; 26:10; Gal. 1:13, 14) Biaen, Pol i kasem save se Jehova i no moa glad long neson blong Isrel. Ale hem i mekem sam bigfala jenis long laef blong hem.

¹¹ Pol i save se Jehova i no tinghae long  gudfala wok mo haenem we hem i kasem long skul blong ol man Isrel. Bambae Jehova i no moa blesem neson ya. (Mat. 24:2) Pol i save ol promes we God bambae i mekem oli kamtru, mo hem i glad tumas we hem i save mekem nambawan wok ya blong prij. Hem i talem se ol samting we hem i tinghevi long hem fastaem oli “olsem rabis nomo.” Pol i lego skul blong ol man Isrel mo hem i yusum laef blong hem blong talemaot gud nius long ol man.—Ridim Filipae 3:4-8, 15; Wok 9:15.

?WANEM OL SAMTING WE YU TINGHEVI LONG HEM?

12. ?Afta we Jisas i baptaes, hem i tinghevi long wanem?

¹² Noa, Moses, Jeremaea, Pol, mo plante narafala oli yusum bighaf blong taem mo paoa blong olgeta blong mekem wok blong Jehova. Yumi mas folem fasin blong olgeta. Fasin blong Jisas tu i nambawan blong yumi evriwan i folem. (1 Pita 2:21) Afta we Jisas i baptaes, hem i yusum laef blong hem blong talemaot gud nius mo blong leftemap nem blong Jehova. Taswe olgeta Kristin we oli folem fasin blong Jisas mo we Jehova i Masta blong olgeta, oli mas tinghevi long wok blong Jehova. ?Olsem wanem long yu? ?Yu tinghevi long wok blong Jehova? ?Yu save mekem moa long wok blong Jehova mo yu lukaot gud long ol narafala wok blong yu tu?—Ridim Ol Sam 71:15; 145:2.

13, 14. (1) ?I gud ol Kristin oli tokbaot wanem long prea blong olgeta? (2) ?Wanem i mekem ol man blong Jehova oli harem gud?

¹³ Plante yia finis ogenaesesen blong Jehova i talem se i gud we ol Kristin oli luk sipos oli save mekem wok blong paenia, mo oli prea from samting ya. Samfala oli traehad blong obei long Jehova, be sam samting long laef blong olgeta i mekem se oli no save prij 70 aoa evri manis. Sipos i olsem, oli no mas harem nogud. (1 Tim. 5:8) ?Be olsem wanem long yu? ?Yu yu save mekem wok blong paenia?

¹⁴ Long ol manis klosap long Memoriol long yia ya, ol man blong Jehova oli glad tumas. Long manis Maj, i gat wan spesel plan, blong ol haftaem paenia oli save mekem 30 aoa no 50 aoa long wok blong prij. (Sam 110:3) Plante milian man blong Jehova oli mekem haftaem paenia long taem ya, mo kongregesen i glad we i glad. ?Yu ting se yu save jenisim sam samting long laef blong yu, blong yu save mekem moa long wok blong paenia? Long en blong evri dei, olgeta we oli mekem wok blong paenia oli harem gud tumas mo oli save talem se, “Jehova, mi mekem evri samting we mi save mekem long wok blong yu.”

15. ?Ol yangfala Kristin we oli stap long skul, oli save tingbaot blong mekem wanem wok?

¹⁵ Sipos yu yu wan yangfala we bambae yu finis skul i no longtaem, maet yu no gat tumas wok blong mekem mo bodi blong yu i strong. ?Olsem wanem? ?Yu tingbaot blong mekem wok blong fultaem paenia? Ating ol tija blong yu oli ting se i moa gud yu go long yunivesiti blong yu save kasem wan gudfala wok. Oli ting se haenem mo mane i save givim wan gudfala laef long yu. Be ol samting ya bambae oli lus. Sipos yu mekem wok blong Jehova, bambae yu yusumgud taem blong yu. Mo bambae wok blong Jehova i givhan long yu blong kasem laef we i no save finis. Long rod ya, yu stap folem nambawan fasin blong Jisas, mo bambae yu glad from we yu mekem wan waes desisen. Mo bambae i givhan long yu blong mekem fasin we i stret. Bambae yu soemaot se yu no letem eni samting i blokem yu blong mekem wok blong Jehova olsem we yu promes long hem.—Mat. 6:19-21; 1 Tim. 6:9-12.

16, 17. ?Wanem ol kwestin we yumi evriwan i mas tingbaot?

¹⁶ Plante man blong God oli mas wok plante aoa blong kasem ol samting we famle blong olgeta i nidim. Be samfala oli wok bitim mak, we oli no nid blong mekem olsem. (1 Tim. 6:8) Ol man long wol oli traehad blong pulum yumi blong ting se yumi mas pem evri niu samting we i kamaot, from we  yumi no save glad sipos yumi no gat ol samting ya. Be ol tru Kristin oli no wantem se Setan mo wol blong hem, i talem long olgeta wanem we oli mas tinghevi long hem. (1 Jon 2:15-17) ?Olsem wanem long ol olfala we oli finis long wok? I nambawan sipos oli yusum taem blong olgeta blong mekem wok blong paenia, mo blong mekem wok blong Jehova fastaem long ol narafala samting.

¹⁷ I gud we yumi evriwan i tingbaot ol kwestin ya se: ?Wanem i impoten long laef blong mi? ?Mi mi mekem wok blong Jehova fastaem? ?Mi glad blong yusum taem mo paoa blong mi blong mekem wok blong God olsem Jisas? ?Mi mi obei long ol tok blong Jisas mo mi biaen long hem oltaem? ?Mi mi save jenisim sam samting long laef blong mi blong mi mekem moa long wok blong prij, no long ol narafala wok blong God? Nating se naoia mi no save mekem wok blong paenia, ?mi mi traehad blong yusum taem mo paoa blong mi blong mekem wok blong Jehova?

GOD “I MEKEM YUFALA I GLAD BLONG OBEI”

18, 19. ?Yu yu save askem wanem long God long prea blong yu? ?Yumi mas mekem wanem blong Jehova i glad long yumi?

¹⁸ I gud tumas blong luk we ol man blong God oli wok strong long wok blong hem. Be samfala we oli save mekem wok blong paenia oli no wantem, mo maet oli ting se oli no naf blong mekem. (Eks. 4:10; Jer. 1:6) ?Yu save mekem wanem sipos yu harem olsem? I gud yu prea long Jehova blong i givhan long yu. Pol i talem se: “God i stap wok long laef blong yufala blong mekem yufala i glad blong obei long hem, mo blong givim paoa long yufala blong yufala i save mekem ol samting we hem i wantem.” (Fil. 2:13) Sipos yu no glad blong mekem moa long wok blong prij, yu mas askem long Jehova blong i givhan long yu blong yu glad mo yu naf blong mekem wok blong hem.—2 Pita 3:9, 11.

¹⁹ Noa, Moses, Jeremaea, Pol, mo Jisas, oli obei oltaem long Jehova. Oli yusum taem mo paoa blong olgeta blong talemaot ol tok blong Jehova. Oli no letem eni samting i pulum tingting blong olgeta i gowe long wok ya. En blong wol ya i klosap we i klosap. Taswe yumi evriwan we i givim laef blong yumi long Jehova, yumi mas mekem evri samting we yumi save mekem, blong folem gudfala fasin blong ol man ya. (Mat. 24:42; 2 Tim. 2:15) Nao bambae yumi mekem Jehova i glad, mo bambae hem i blesem yumi.—Ridim Malakae 3:10.

[Futnot]

[Kwestin]

[Tok blong pija long pej 22]

Noa i talemaot jajmen blong God be ol man oli no lesin

[Tok blong pija long pej 25]

?Yu yu save mekem wok blong fultaem paenia?