Nganong Unahon ang Pag-alagad Kang Jehova?

“Ang akong baba magasugilon sa imong pagkamatarong, sa imong pagluwas sa tibuok nga adlaw.”—SAL. 71:15.

UNSAON NIMO PAGTUBAG?

Nganong giuna ni Noe, Moises, Jeremias, ug Pablo ang pag-alagad kang Jehova?

Unsang pagsusi sa kaugalingon ang makatabang nimo sa pagdesisyon kon unsay imong himoon sa imong kinabuhi?

Nganong determinado kang unahon ang pag-alagad kang Jehova?

1, 2. (a) Kon ikaw bawtismado na, unsay imong gisaad kang Jehova? (b) Sa unsang paagi makatabang kanato ang panig-ingnan ni Noe, Moises, Jeremias, ug Pablo?

DIHANG nahimo kang dedikado ug bawtismadong sumusunod ni Jesus, mihimo kag labing seryosong desisyon sa imong kinabuhi. Sa diwa, ikaw miingon kang Jehova: ‘Gusto ko nga mahimo ka nakong Agalon. Ako imong ulipon. Tudloi ko kon unsaon paggamit ang akong panahon, kahinguhaan, ug katakos, ug kon unsay angay nakong mga prioridad.’

² Kanay imong gisaad kang Jehova kon ikaw bawtismado na. Maayo kaayo ang imong desisyon; husto ug maalamon kana. Apan kon imo nang giila si Jehova nga imong Agalon, unsaon nimo paggamit ang imong panahon? Ang panig-ingnan ni Noe, Moises, Jeremias, ug apostol Pablo makatabang sa pagtubag niana. Sila bug-os kalag nga nag-alagad kang Jehova. Susama kanila ang atong situwasyon. Ang ilang mga desisyon nagpaila sa ilang mga prioridad ug makatabang kini kanato sa pagsusi kon giunsa nato paggamit ang atong panahon.—Mat. 28:19, 20; 2 Tim. 3:1.

SA WALA PA ANG LUNOP

3. Sa unsang paagi ang atong panahon susama sa adlaw ni Noe?

³ Gipakita ni Jesus nga ang atong panahon susama sa panahon ni Noe. “Maingon kaniadto sa mga adlaw ni Noe, mao man usab unya ang presensiya sa Anak sa tawo,” siya miingon. Sila “nangaon ug nanginom, [ang mga lalaki] nagminyo ug ang mga babaye gihatag sa kaminyoon, hangtod sa adlaw nga misulod si Noe sa arka; ug wala sila magtagad hangtod nga miabot ang baha ug gibanlas silang tanan.” (Mat. 24:37-39) Gibalewala sa kadaghanan karon ang pagkadinalian sa atong panahon.  Wala sila magtagad sa mga pasidaan nga gimantala sa mga alagad sa Diyos. Sama sa mga tawo sa adlaw ni Noe, daghan karon ang dili motuo nga laglagon sa Diyos ang mga daotan. (2 Ped. 3:3-7) Bisan pa niana, giunsa paggamit ni Noe ang iyang panahon?

4. Giunsa paggamit ni Noe ang iyang panahon human siya hatagi ni Jehova ug linaing buluhaton, ug ngano?

⁴ Gisultihan sa Diyos si Noe nga laglagon Niya ang tanang daotan, ug gihatagan siyag linaing buluhaton. Busa si Noe naghimog arka aron maluwas ang mga tawo ug mananap. (Gen. 6:13, 14, 22) Gipasidan-an usab ni Noe ang mga tawo sa umaabot nga paghukom ni Jehova. Si apostol Pedro nagtawag kaniya nga “usa ka magwawali sa pagkamatarong.” Kini nagpakita nga naningkamot gayod si Noe sa pagtabang sa uban nga masabtan kon unsa ka seryoso ang ilang situwasyon. (Basaha ang 2 Pedro 2:5.) Sa imong hunahuna, makataronganon kaha kon si Noe ug ang iyang pamilya nagpokus sa pagnegosyo, sa pagpaningkamot nga moasenso kay sa uban, o sa pagbatog haruhayng kinabuhi? Dili gayod! Gilikayan nila ang maong mga kabaldahan kay nahibalo sila kon unsay hapit nang mahitabo.

ANG GIPILI SA USA KA PRINSIPE SA EHIPTO

5, 6. (a) Nganong si Moises gitudloan “sa tanang kaalam sa mga Ehiptohanon”? (b) Nganong gisalikway ni Moises ang mga kahigayonan nga gitanyag kaniya sa Ehipto?

⁵ Hisgotan nato karon ang panig-ingnan ni Moises. Siya gisagop sa anak nga babaye ni Paraon ug nagdako ingong prinsipe sa palasyo sa Ehipto. Si Moises gitudloan “sa tanang kaalam sa mga Ehiptohanon.” (Buh. 7:22; Ex. 2:9, 10) Gituyo kana aron maandam siya sa usa ka posisyon diha sa palasyo ni Paraon. Mahimo unta siyang inila sa labing gamhanang gobyerno niadtong panahona, nga makabatog daghang mahalong mga butang ug espesyal nga mga pribilehiyo tungod sa maong posisyon. Apan kana bay gitinguha ni Moises?

⁶ Sa bata pa si Moises, siya gitudloan sa tinuod niyang mga ginikanan bahin kang Jehova. Busa siya lagmit nahibalo sa gisaad ni Jehova kang Abraham, Isaac, ug Jacob. Nagtuo gayod si Moises sa maong mga saad. Lagmit gihunahuna niya pag-ayo ang iyang kaugmaon ug pagkamaunongon kang Jehova. Busa dihang kinahanglan siyang modesisyon kon magkinabuhi ba siya ingong prinsipe sa Ehipto o ulipong Israelinhon, unsay iyang gipili? Gipalabi ni Moises nga “daogdaogon uban sa katawhan sa Diyos inay magpahimulos sa umalaging kalipay sa pagpakasala.” (Basaha ang Hebreohanon 11:24-26.) Sa ulahi, iyang gisunod ang paggiya ni Jehova kon unsaon paggamit ang iyang kinabuhi. (Ex. 3:2, 6-10) Nganong gihimo kadto ni Moises? Kay nagtuo siya sa mga saad sa Diyos. Nakita niya nga wala siyay kaugmaon sa Ehipto. Tinuod kana, kay sa wala madugay ang maong nasod gisilotan sa Diyos pinaagig napulo  ka hampak. Unsay makat-onan sa dedikadong mga alagad ni Jehova karon bahin niini? Imbes magpokus sa bisan unsang karera o kalingawan niining sistemaha, angay natong unahon si Jehova ug ang pag-alagad kaniya.

NAHIBALO SI JEREMIAS KON UNSAY MAHITABO

7. Sa unsang paagi ang kahimtang ni Jeremias susama sa atong kahimtang?

⁷ Giuna usab ni propeta Jeremias ang pag-alagad kang Jehova. Gisugo siya ni Jehova sa pagpahayag ug mensahe sa paghukom batok sa apostatang Jerusalem ug Juda. Sa diwa, si Jeremias nagkinabuhi “sa kaulahiang bahin sa mga adlaw.” (Jer. 23:19, 20) Nahibalo gayod siya nga matapos ang sistema nga iyang gikinabuhian.

8, 9. (a) Nganong angayng tul-iron ang panglantaw ni Baruk? (b) Unsay angay natong hinumdoman dihang mohimog mga plano?

⁸ Unsay wala himoa ni Jeremias tungod sa iyang pagtuo? Wala siya maningkamot nga makabatog maayong kaugmaon sa sistema nga hapit nang laglagon. Unsa pay kapuslanan niana? Apan may higayon nga nausab ang panglantaw sa sekretaryo ni Jeremias nga si Baruk. Busa gisugo sa Diyos si Jeremias nga sultihan ang iyang sekretaryo: “Tan-awa! Ang akong gitukod akong pagalumpagon, ug ang akong gitanom akong pagalukahon, bisan ang tibuok yuta mismo. Apan kon bahin kanimo, ikaw nagpadayon sa pagtinguha ug dagkong mga butang alang sa imong kaugalingon. Ayaw pagpadayon sa pagtinguha. Kay ania, ako magadala ug katalagman diha sa tanang unod, . . . ug ihatag ko kanimo ingon nga inagaw ang imong kalag sa tanang dapit nga imong adtoan.”—Jer. 45:4, 5.

⁹ Dili nato matino kon unsa ang “dagkong mga butang” nga gitinguha ni Baruk. * Apan nahibalo kita nga kadto maoy mga butang nga temporaryo lang, kay kini nahanaw dihang gilaglag sa Babilonya ang Jerusalem sa 607 W.K.P. Unsay atong makat-onan niini? Buweno, kinahanglan kitang magplano alang sa atong mga panginahanglan sa kinabuhi. (Prov. 6:6-11) Apan maalamon ba nga mogahig daghang panahon ug kusog alang sa mga butang nga temporaryo lang? Tinuod, ang organisasyon ni Jehova padayong nagplano sa pagpanukod ug bag-ong mga Kingdom Hall, sangang buhatan, ug uban pang mga proyekto. Apan dumalayon kini nga mga plano kay alang kini sa pagpalambo sa intereses sa Gingharian. Busa kon mohimog plano ang dedikadong mga alagad ni Jehova, kinahanglang hatagan nilag prioridad ang intereses sa Gingharian. Imo ba gayong ‘gipangita pag-una ang gingharian ug ang pagkamatarong [ni Jehova]’?—Mat. 6:33.

‘GIISIP KO KINI NGA MGA BASURA’

10, 11. (a) Unsay prioridad ni Pablo sa wala pa mahimong Kristohanon? (b) Nganong bug-os nausab ang prioridad ni Pablo?

¹⁰ Atong hisgotan karon ang panig-ingnan ni Pablo. Sa wala pa siya mahimong Kristohanon, daw maayo na ang iyang kaugmaon. Gitudloan siya sa labing iladong magtutudlo niadtong panahona bahin sa balaod sa mga Hudiyo, ug gihatagan siyag awtoridad sa hataas nga saserdote. Mas nagmauswagon siya sa Judaismo kay sa iyang mga katalirongan. (Buh. 9:1, 2; 22:3; 26:10; Gal. 1:13, 14) Apan nausab kanang tanan dihang nasabtan ni Pablo nga gisalikway na ni Jehova ang mga Hudiyo ingong usa ka nasod.

¹¹ Nahibalo si Pablo nga walay bili kang Jehova ang bisan unsang karera sa Hudiyohanong sistema. Kini walay kaugmaon.  (Mat. 24:2) Miingon pa gani kining kanhi Pariseo nga kon itandi ang iyang bag-o ug tin-aw nga pagsabot sa mga katuyoan sa Diyos ug ang iyang pribilehiyo sa Kristohanong ministeryo, ang giisip niya kanhi nga hinungdanong butang giisip na niya karong “mga basura.” Gibiyaan ni Pablo ang iyang karera sa Judaismo ug gipokus ang iyang kinabuhi sa pagsangyaw sa maayong balita.—Basaha ang Filipos 3:4-8, 15; Buh. 9:15.

SUSIHA ANG IMONG MGA PRIORIDAD

12. Human mabawtismohi, asa gipokus ni Jesus ang iyang kinabuhi?

¹² Si Noe, Moises, Jeremias, Pablo, ug ang uban pa naggugol ug dakong panahon ug kusog diha sa pag-alagad kang Jehova. Maayo silang panig-ingnan kanato. Siyempre, si Jesus ang labing maayong panig-ingnan alang sa tanang dedikadong alagad ni Jehova. (1 Ped. 2:21) Human mabawtismohi, gipokus ni Jesus ang iyang kinabuhi sa pagsangyaw sa maayong balita ug sa pagpasidungog kang Jehova. Busa kon giila sa usa ka Kristohanon si Jehova ingong iyang Agalon, angay niyang himoong prioridad ang pag-alagad Kaniya. Kana bay imong prioridad? Unsaon nato pagbalanse ang teokratikanhong kalihokan ug ang ubang sekular nga mga responsabilidad?—Basaha ang Salmo 71:15; 145:2.

13, 14. (a) Unsay gidasig nga pamalandongon sa tanang bawtismadong Kristohanon? (b) Unsay bation kon ang usa magpayunir?

¹³ Sa daghang katuigan, ang organisasyon ni Jehova kanunayng nagdasig sa mga Kristohanon sa pagpamalandong kon makapayunir ba sila. Tungod sa lainlaing kahimtang, ang pipila ka matinumanong alagad ni Jehova dili makahimo sa paggugol ug 70 ka oras kada bulan sa pagsangyaw. Dili sila angayng maluya niini. (1 Tim. 5:8) Apan komosta ka? Makapayunir ka ba?

¹⁴ Hunahunaa ang kalipay nga gibati sa daghang alagad sa Diyos panahon sa Memoryal niining tuiga. Tungod sa espesyal nga kahikayan sa miaging Marso, ang mga oksilyare payunir nakapili kon 30 o 50 ka oras ba ang ilang gugolon sa pagsangyaw. (Sal. 110:3) Minilyon ang nag-oksilyare payunir, ug nakahatag kinig dakong kalipay sa kongregasyon. Mapasibo ba nimo ang imong eskedyul aron kanunay nimong matagamtam ang maong kalipay? Kon magpayunir ang usa ka Kristohanon, malipay gayod siya inigkatapos sa matag adlaw nga makaingon: “Diyos nga Jehova, gihimo ko ang akong maarangan sa pag-alagad kanimo.”

15. Unsay angayng tumong sa usa ka batan-ong Kristohanon kon bahin sa sekular nga edukasyon?

¹⁵ Tingali hapit ka nang mograduwar, may maayong panglawas, ug wala pa kaayoy responsabilidad. Napamalandong na ba nimo ang pagregular payunir? Seguradong dasigon ka sa imong mga magtutudlo nga moeskuyla sa kolehiyo o unibersidad alang sa usa ka sekular nga karera. Apan sila misalig lang sa tawhanong organisasyon ug sa salapi, mga butang nga temporaryo lang. Sa laing bahin, kon imong himoong karera ang pag-alagad kang Jehova, imong gipangagpas ang mapuslanon ug dumalayong mga tumong. Ug imong gisundog ang hingpit nga panig-ingnan ni Jesus. Malipay ug mapanalipdan ka gayod sa maong maalamong desisyon. Kini nagpakita nga determinado kang motuman sa imong panaad kang Jehova.—Mat. 6:19-21; 1 Tim. 6:9-12.

16, 17. Unsay angayng ipangutana sa matag Kristohanon sa ilang kaugalingon?

¹⁶ Daghang alagad sa Diyos karon ang motrabaho tibuok adlaw aron matagan-an ang pangunang mga panginahanglan sa ilang pamilya. Apan ang uban mag-obertaym bisag dili na kinahanglan. (1 Tim. 6:8)  Naningkamot gayod ang kalibotan sa komersiyo sa pagkombinsir kanato nga dili kita mabuhi kon dili kita mopalit sa kinabag-ohan nilang mga produkto. Apan dili buot sa matuod nga mga Kristohanon nga ang kalibotan ni Satanas maoy magdiktar sa ilang prioridad. (1 Juan 2:15-17) Para sa mga retirado, duna pa bay mas maayong paagi sa paggamit sa ilang panahon kay sa pagpayunir ug sa pag-una sa pag-alagad kang Jehova?

¹⁷ Mahimong pangutan-on sa tanang bawtismadong alagad ni Jehova ang ilang kaugalingon: Unsay labing hinungdanon sa akong kinabuhi? Ako bang giuna ang intereses sa Gingharian? Gisundog ba nako ang masakripisyohong tinamdan ni Jesus? Ako bang gituman ang tambag ni Jesus nga padayong mosunod kaniya? Gipasibo ba nako ang akong eskedyul aron makagahig mas daghang panahon sa pagsangyaw o sa ubang teokratikanhong kalihokan? Bisag dili ko makapalapad sa akong ministeryo sa pagkakaron, naningkamot ba kong maugmad ang espiritu sa pagsakripisyo sa kaugalingon?

‘TINGUHAA UG BUHATA’

18, 19. Unsay puwede nimong iampo, ug nganong malipay si Jehova niana?

¹⁸ Makapalipay gayod ang kadasig sa mga alagad sa Diyos. Apan ang uban walay tinguha o mibating dili kuwalipikado nga magpayunir bisag makahimo unta sila. (Ex. 4:10; Jer. 1:6) Komosta kon kini ang imong gibati? Mahimo ba nimo kining iampo kang Jehova? Oo. Si Pablo miingon nga si Jehova malipay nga motabang kanato sa ‘pagtinguha ug sa pagbuhat.’ (Filip. 2:13) Kon wala ka pay tinguha sa pagpalapad sa imong ministeryo, pag-ampo kang Jehova nga ihatag kanimo ang tinguha ug katakos sa paghimo niana.—2 Ped. 3:9, 11.

¹⁹ Si Noe, Moises, Jeremias, Pablo, ug Jesus maoy matinumanong mga alagad. Gigamit nila ang ilang panahon ug kusog sa pagmantala sa pasidaang mensahe ni Jehova, ug wala sila magpabalda. Duol na kaayo ang kataposan niining sistemaha. Busa ingong dedikadong mga alagad ni Jehova, tinoon gayod nato nga atong buhaton ang atong maarangan sa pagsundog niining maayong mga panig-ingnan sa Bibliya. (Mat. 24:42; 2 Tim. 2:15) Sa paghimo niana, atong mapahimut-an si Jehova ug maangkon ang iyang dagayang panalangin.—Basaha ang Malaquias 3:10.

[Footnote]

[Mga Pangutana sa Pagtuon]

[Hulagway sa panid 21]

Ang mga tawo wala mamati sa pasidaan ni Noe

[Hulagway sa panid 24]

Napamalandong na ba nimo ang pagregular payunir?