Pwata Sipwe Akkomwa án Jiowa Angang?

“Iteiten rän üpwe apworausa usun om föför mi pwüng, pwal usun om amanauaei.”​—KÖLF. 71:15.

IFA USUN KOPWE PÉLÚWENI?

Met popun Noa, Moses, Jeremaia, me Paulus ra akkomwa Jiowa lón manawer?

Met epwe álisuk le filatá met kopwe féri lón manawom?

Met popun kopwe akkomwa Jiowa lón manawom?

1, 2. (a) Lupwen emén a fangoló manawan ngeni Jiowa met a pwáraatá? (b) Ifa usun án Noa, Moses, Jeremaia, me Paulus leenien áppirú repwe álisikich?

 LUPWEN ka fangoló manawom ngeni Kot me wiliti néún Jesus (Jises) chón káé mi papatais, ka eáni eú kefil mi fókkun lamot lón manawom. Usun itá ka apasa ngeni Jiowa: ‘Ua mochen kopwe nei Masta. Ngang noum chón angang. Ua mochen kopwe ereniei ifa usun upwe áeá ai fansoun, met upwe alamota lón manawei me ifa usun upwe áeá tufichi me piseki.’

² Ika en emén Chón Kraist mi papatais, ikkena met ka fen pwon ngeni Jiowa. Ka fókkun kefiliéch, minne ka filatá a pwúng me tipachem. Nge pokiten iei ka fen etiwa Jiowa an epwe noum Masta, iwe, ifa usun ka áeá om fansoun? Án Noa, Moses, Jeremaia, me aposel Paulus leenien áppirú ra tongeni álisikich le etittina pwisin nonnomuch. Meinisin ekkeei mwán ra féri úkúkún ar tufich le angang ngeni Jiowa. Nonnomur a usun chék nonnomuch ikenái. Minne ra filatá ra pwáraatá met ra aúcheani, iwe, itá epwe amwékútúkich le etittina ifa usun sia ákkáeá ach fansoun.​—Mat. 28:19, 20; 2 Tim. 3:1.

MWEN EWE NOTER

3. Ifa usun aramas ikenái ra usun chék ekkewe aramas lón fansoun Noa we?

³ Jesus a alélléfengeni ekkewe aramas lón fansoun Noa we me ekkewe aramas lón ach ei fansoun. A apasa: “Ewe fansoun waren Nöün Aramas epwe usun chök met a fis lon fansoun Noa.” Ekkewe aramas “ra momongö o ükün, ra pwüpwülü o akapwüpwülüür tori ewe rän lupwen Noa a tolong lon ewe waimw. Resap silei mine epwe fis tori ewe noter a war o niirela meinisin.” (Mat. 24:37-39) Lap  ngeni aramas ikenái rese aúseling ngeni ekkewe éúréúr seni néún Kot kewe chón angang. Rese pwal áfánni pwe sia manaw lón ewe fansoun mi atapwalapwal. Usun chék ekkewe aramas lón fansoun Noa we, ikenái chómmóng rese lúkú pwe Kot epwe nieló ekkewe aramas mi ngaw. Ra pwal mwo nge eáni atakirikir! (2 Pet. 3:3-7) Nge ifa usun Noa a áeá an fansoun inaamwo ika aramas rese aúseling ngeni an éúréúrer?

4. Ifa usun Noa a áeá an fansoun mwirin án Jiowa ewisa ngeni eú angang mi kkóló aúchean, iwe pwata?

⁴ Kot a ereni Noa pwe i epwe nieló meinisin aramas mi ngaw, me a ewisa ngeni eú angang mi kkóló aúchean. Noa a falei efóch waimw pwe epwe amanawa aramas me ekkewe man. (Ken. 6:13, 14, 22) A pwal éúréúra aramas usun met Jiowa epwe féri. Ewe aposel Petrus a erá pwe Noa emén “chon afalafala usun pwüng,” a pwáraatá pwe Noa a achocho le álisi aramas le weweiti atapwalapwalen ar we fansoun. (Álleani 2 Petrus 2:5.) Epwe eú alen mirit ika Noa me an famili ra áeá ar fansoun le fér ar business, pwe repwe pisekisek seni ekkewe ekkóch, are achómmóngaaló pisekiir mi ling? Aapwi! Ra túmúnú seni ekkewe mettóch epwe erikiireló seni ar angang pun ra silei pwe Jiowa epwele ataieló ena otot.

ÁN NÉÚN EWE KINGEN ISIP KEFIL

5, 6. (a) Met popun Moses a káit me ren “tipachemen chón Isip meinisin”? (b) Pwata Moses a filatá an esap manaweni manawen emén néún Kingen Isip?

⁵ Iei sipwe káé seni án Moses we leenien áppirú. Néún Farao we fefin a mwuuti, iwe a mááritá lón ewe imwen Kingen Isip. A káit me ren “tipachemen chon Isip meinisin.” (Föf. 7:22; Eks. 2:9, 10) Ena asukul epwe ammolnatá Moses an epwe eáni eú wis lón imwen Farao we. A tongeni eáni eú wis mi fókkun tekia fán ena mwú mi péchékkúl an nemenem seni meinisin lón ena fansoun. Ika a eáni ena wis, a tongeni wéúni chómmóng pisek mi ling me aramas repwe asamolu. Nge Moses a aúcheani ekkeei mettóch?

⁶ Le kúkkúnún Moses, wesewesen seman kewe me inan ra áiti ngeni usun Jiowa. Ese mwáál a káé án Jiowa kewe pwon ngeni Apraham, Isaak, me Jakop. Moses a lúkú ekkena pwon. A ekiekiéchú met epwe féri lón manawan lón mwachkkan me an tuppwél ngeni Jiowa. Lupwen a tori ewe fansoun an epwe filatá ika epwe manaweni manawen emén néún Farao are emén slave chón Israel, met a filatá? Moses a filatá an epwe “eti nöün Kot kewe aramas le riaföü, lap seni an epwe pwapwaiti tipis lon ekis chök fansoun.” (Álleani Ipru 11:24-26.) Mwirin, a áeá manawan lón ewe napanap mi apwapwaai Jiowa. (Eks. 3:2, 6-10) Met popun Moses a féri ena? Pun a lúkú minne Kot a pwonei  me a silei pwe ekkewe feiéch epwe eáni lón Isip resap nomottam. Nge fen pwúngún, pun lo, lo, lo a tori Isip ekkewe engol riáfféú, ina eú kapwúng seni Kot. Meinisin néún Jiowa kewe chón angang ra tongeni káé seni án Moses we leenien áppirú. Itá sipwe akkomwa Jiowa me ach angang ngeni, nge esap ach achocho le eáni och angang are chei pisek mi ling lón ei fénúfan.

JEREMAIA A SILEI MINNE EPWELE FIS

7. Ifa usun nonnomun Jeremaia a pwal usun nonnomuch?

⁷ Ewe soufós Jeremaia a pwal akkomwa án Jiowa angang lón manawan. Jiowa a ewisa ngeni an epwe néún soufós. A wisen afalafala pwóróusen án Jiowa kapwúng ngeni chón Jerusalem me Juta pun ra fel ngeni kot chofona. Nonnomun Jeremaia a usun chék nonnomuch, a pwal manaw lón eú fansoun “lesopwolóón kinikinin ekkewe rán.” (Jer. 23:19, 20, NW) A fókkun lúkú pwe ewe otot a manaw lón epwe muchuló.

8, 9. (a) Met popun Kot a apwúngú án Paruk ekiek? (b) Met sipwe chechchemeni lupwen sia féri ach kókkót?

⁸ Met Jeremaia ese achocho ngeni pokiten minne a lúkú? Ese achocho le amúrinnéló nonnomun manawan lón ewe otot epwe taló. A ifa me miritingawan ika a féri ena! Nge Paruk, néún we seketeri, a poputá le eáni pwal och ekiek. Ina popun, Kot a ereni Jeremaia an epwe apwúngú ekiekin Paruk. Iei alón Jiowa: “Üpwe ataetiu mine üa aüetä o üttätä mine üa fotukätiu. Iei usun mine üpwe föri ngeni unusen ewe fanü. Ifa usun, ka kütta mettoch mi watte fän itom? Kosap kütteer. Pun üpwe awarato feiengau won aramas meinisin. Nge ngang üpwe amwöchü manauom lon ekewe leni meinisin ia kopwe feila ie.”​—Jer. 45:4, 5.

⁹ Ese ffat ikkefa ekkewe “mettoch mi watte” Paruk a tipeni. * Nge sia silei pwe ekkena mettóch resap nomottam, repwe taló lupwen Papilon epwe akkufu Jerusalem lón ewe ier 607 mwen Kraist. Met sia káé seni ei pwóróus? A ffat pwe a lamot sipwe féri ekkóch kókkót fán iten tufichin manawach iei. (SalF. 6:6-11) Nge epwe eú alen mirit ika sia áeá watteen ach fansoun me péchékkúl fán iten ekkewe mettóch repwe móróló? Pwúngún, án Jiowa mwicheich a akkakkóta kaútáán ekkewe mineféén Leenien Mwich, keangen ofes, me pwal ekkóch angang. Nge ekkena kókkót a sókkóló pun ra álisatá án Kot we Mwú. Ina minne, lupwen néún Jiowa kewe aramas ra féri kókkót, itá án Kot we Mwú epwe akkomw lón manawer. Ka kukkútta akkomw án Jiowa we Mwú me an pwúng?​—Mat. 6:33, TF.

A EKIEKI PWE “RA USUN CHÖK PIPI”

10, 11. (a) Met Paulus a aúcheani mwen an a wiliti emén Chón Kraist? (b) Pwata a unusen siwil minne Paulus a akkomwa lón manawan?

¹⁰ Iei sipwe pwóróus usun án ewe aposel Paulus leenien áppirú. Me mwen an wiliti emén Chón Kraist, ekkewe aramas ra ekieki pwe epwe wiseni wis mi tekia. A káé ewe allúkún Jus ren emén sense mi fókkun iteféúló lón ena atun. Néún chón Jus we samolfel mi lap, a lúkúlúk wóón Paulus me a ewisa ngeni eú angang mi lamot. Lón pekin lamalamen chón Jus, Paulus a feffeitá me sópwéch lap seni pilóón kewe. (Föf. 9:1, 2; 22:3; 26:10; Kal. 1:13, 14) Nge a unusen siwil manawan lupwen a mirititi pwe Jiowa a fen péútaaló ekkewe chón Jus, pwe resap chúen usun néún.

¹¹ Ren ei popun, Paulus a silei pwe eú  wis lón án chón Jus we otot, mi chék lamotmwáál me ren Jiowa. Ena otot epwe taló. (Mat. 24:2) Paulus a weweiti minne Jiowa a tipeni me silei pwe an féri ewe angangen afalafal ina eú wis mi aúchea. A pwal mwo nge apasa pwe minne a fen akkomwa me lóóm, iir “ra usun chök pipi,” are kápich. Paulus a likitaló ewe lamalamen Jus me a áeá unusen manawan le afalafala ewe kapas allim.​—Álleani Filipi 3:4-8, 15; Föf. 9:15.

ETITTINA MINNE KA AKKAKKOMWA

12. Met Jesus a akkomwa mwirin an papatais?

¹² Noa, Moses, Jeremaia, Paulus, me pwal ekkewe ekkóch ra áeá ar fansoun me péchékkúl le angang ngeni Jiowa. Iir leenien áppirú mi múrinné fán itach. Pwúngún, Jesus, i ewe leenien áppirú mi múrinné seni meinisin fán iten néún Jiowa kewe chón angang. (1 Pet. 2:21) Mwirin án Jesus papatais, a áeá unusen manawan wóón fénúfan le arongafeili ewe kapas allim me asamolu Jiowa. Ina minne, ekkewe Chón Kraist meinisin mi etiwa Jiowa usun néúr Masta, itá repwe akkomwa ar angang ngeni i. Om angang ngeni Jiowa, ina ewe a nampa eú lón manawom? Ifa usun sipwe alapaaló ach angang ngeni Jiowa me pwal túmúnú wisach kewe lón pekin aion?​—Álleani Kölfel 71:15; 145:2.

13, 14. (a) Ifa ewe pesepes ngeni meinisin Chón Kraist ar repwe iótek usun? (b) Met epwe atoto pwapwa ngeni néún Kot kewe aramas?

¹³ Ren fite fite ier, án Jiowa we mwicheich a fen pesei Chón Kraist ar repwe iótek ika repwe tufichin pioneer. Nonnomun ekkóch Chón Kraist mi tuppwél a eppetiir le afalafal úkúkún 70 awa iteiten maram. Nge itá resap lichippúng ren ena. (1 Tim. 5:8) Nge en? En mi tongeni pioneer?

¹⁴ Ekieki ewe pwapwa chómmóng néún Kot kewe aramas ra eáni fán ewe maram March lón ei ier. Ina ewe maram mwen ewe Áchechchem, mi suuk eú kefil mi aúchea fán iten ekkewe auxiliary pioneer ar repwe filatá ika repwe néúni 30 are 50 awa le afalafal. (Kölf. 110:3) Fite million pwiich kewe ra auxiliary pioneer. Ka tongeni meefi meseiken me pwapwaan chón ekkewe mwichefel. En mi tongeni féri om kókkót pwe kopwe alapaaló om fiti auxiliary pioneer? Lupwen emén Chón Kraist mi papatais a pioneer, iteiten le sópwólóón eú me eú rán a tongeni apasa: “Jiowa, ua féri om angang ren úkúkún ai tufich.”

15. Ifa ewe ekiek pwúng emén Chón Kraist sáráfé epwe eáni usun an fiti sukul?

¹⁵ Ika kopwele sochungio seni high school, ese mwáál ka péchékkúl. Me ika esor wisom epwe tongeni eppetuk, kese fen ekieki om kopwe regular pioneer? Noum kewe sense eli ra meefi pwe om fiti college are universtiy a fókkun lamot ren an epwe núkúnúkéch manawom lón mwachkkan. Ra eáni lúkúlúk wóón mwicheichen aramas are moni. Nge lo, lo, lo ekkena mettóch repwe chék lamotmwáál. Nge ika ka angang fán iten Jiowa, kopwe áeáéchú om fansoun me ka féri eú angang epwe atoto ngonuk ápilúkúlúk allim. Ka áppirú án Jesus leenien áppirú mi unuséch. Iei ewe kefil mi múrinné epwe atoto ngonuk pwapwa me túmún. Epwe pwáraatá pwe ka úppos le akkamwéchú om pwon ngeni Jiowa pwe kopwe angang ngeni.​—Mat. 6:19-21; 1 Tim. 6:9-12.

16, 17. Ikkefa ekkewe kapas eis mi lamot ekkewe Chón Kraist repwe pwisin eisiniir usun ar angang ngeni Jiowa?

¹⁶ Chómmóng me lein néún Kot kewe chón angang a lamot epwe watte ar fansoun angang pwe repwe atufichi ar famili. Nge ren ekkóch, a fen kon watte  ar fansoun angang lap seni minne mi lamot ngeniir. (1 Tim. 6:8) Ei fénúfan a fókkun etipetipakich pwe mi lamot ach sipwe chék kakkamé mineféén pisek. Nge ekkewe Chón Kraist mi enlet rese mut ngeni Satan me an we otot le wisen filatá met repwe alamota lón manawer. (1 Joh. 2:15-17) Nge ifa usun chókkewe mi fen retire seni ar angang? Iir ra tongeni alamota ar fansoun le pioneer me akkomwa án Jiowa angang, ina ewe mettóch mi éch seni meinisin.

¹⁷ Meinisin néún Jiowa kewe chón angang ra tongeni pwisin eisiniir: Ifa ewe mettóch mi kon aúchea lón manawei? Ua akkomwa án Jiowa angang lón manawei? Ua áppirú Jesus me tipemecheres le áeá ai fansoun me péchékkúl le angang ngeni Kot? Ua aúseling ngeni Jesus me tatapweló mwirin? Ua tongeni akkóta pwe upwe alapaaló ai fiti ewe angangan afalafal are pwal ekkóch angang fán iten Jiowa? Ikaamwo iei, use tongeni alapaaló ai angang ngeni Jiowa, nge ngang mi chúen achocho le pennúkúoló pwisin mocheni fán iten an kewe angang?

A EFISATÁ ACH MOCHEN ME TUFICH

18, 19. Met ka tongeni tingorei Jiowa lón iótek? Pwata Jiowa epwe pwapwaiti ei iótek?

¹⁸ A ifa me pwapwaach le kúna tinikkenin néún Kot kewe aramas. Iwe nge, ekkóch ra tufichin pioneer nge eli esap ina mocheniir are ra meefi lipwákingawer. (Eks. 4:10; Jer. 1:6) Ifa usun ika en ena? Tingor án Jiowa álillis lón iótek. Paulus a erá pwe Jiowa epwe ‘afisätä ach mochen me ach tufichin apwönüetä letipan.’ (Filip. 2:13) Ina popun, ika esap ina tipom le alapaaló om angangen afalafal, tingorei Jiowa an epwe fang ngonuk ewe mochen me tufich.​—2 Pet. 3:9, 11.

¹⁹ Noa, Moses, Jeremaia, Paulus, me Jesus, iir meinisin mwán mi tuppwél. Ra áeá ar fansoun me péchékkúl le esilefeili án Jiowa éúréúr. Rese mut ngeni och mettóch an epwe erikiireló seni ar angang. Sópwólóón ei otot a fókkun arapoto. Ina minne, a lamot kich meinisin mi fen fangoló manawach ngeni Kot, sipwe túmúnú pwe sia akkachocho le áppirú ekkeei leenien áppirú lón Paipel. (Mat. 24:42; 2 Tim. 2:15) Ren ach féri ena, sia apwapwaai Jiowa me i epwe efeiéchúkich.​—Álleani Malakai 3:10.

[Sasing lon pekin taropwe 22]

Ekkewe aramas rese aúseling ngeni án Noa kewe kapasen éúréúr

[Sasing lon pekin taropwe 25]

Ka fen ekieki ika en mi tongeni regular pioneer?