Akoz nou devret met nou servis pour Zeova premye?

“Mon labous pou rakont ou ladrwatir, ou delivrans tou dilon lazournen.”​—PS. 71:15.

KI OU POU REPONN?

Kwa ki ti motiv Noe, Moiz, Zeremi ek Pol pour met zot servis pour Zeova premye dan zot lavi?

Ki evalyasyon ou kapab fer pour konnen konman pour servi ou lavi?

Akoz ou determinen pour met ou servis pour Zeova premye?

1, 2. (a) Kan en dimoun i dedye son lavi avek Zeova ki sa i montre? (b) Ki byenfe nou kapab gannyen kan nou egzamin desizyon ki Noe, Moiz, Zeremi ek Pol ti pran?

KAN ou dedye ou lavi e batize konman en disip Zezi, sa i en pa vreman enportan. Ou dedikasyon avek Bondye i sa desizyon pli enportan ki ou kapab pran. I konmsi ou pe dir: ‘Zeova, mon anvi ki ou vin mon Met dan tou laspe mon lavi. Mon ou serviter. Mon anvi ki ou dir mwan ki mannyer pour servi mon letan, kwa ki devret mon bann priyorite e ki mannyer mon devret servi mon resours ek talan.’

² Si ou en Kretyen batize, se sa ki ou ti promet Zeova. Ou merit ganny felisite akoz i ti sa pli bon desizyon ki ou ti kapab pran. Lefet ki Zeova i ou Met, ki mannyer sa i devret afekte lafason ki ou servi ou letan? Pour kapab reponn sa kestyon annou vwar legzanp Noe, Moiz, Zeremi ek zapot Pol. Zot tou zot ti servi Zeova avek tou zot leker. Nou sityasyon i parey sa ki pour zot. Desizyon ki zot ti pran konsernan sa ki pli enportan dan zot lavi i kapab ankouraz nou pour analiz lafason ki nou nou pe servi nou letan.​—Mat. 28:19, 20; 2 Tim. 3:1.

AVAN DELIZ

3. Ki mannyer nou letan i parey avek letan Noe?

³ Zezi ti konpar nou letan avek letan Noe. I ti dir: “Larive Fis-de-Lonm pou parey sa ki ti arive dan letan Noe. . . . Bann dimoun ti pe manze e bwar, dimoun ti pe marye e zot ti pe fer marye zot fiy, ziska zour Noe ti antre dan lars. Zot pa ti pran kont nanryen ziska deliz ti vini e balye zot tou.” (Mat. 24:37-39) Laplipar dimoun ozordi i viv zot lavi san pran kont ki letan ki reste i kourt.  Zot pa ni menm pran kont lavertisman ki bann serviter Bondye pe donnen. Bokou zot i monk sa lide ki Bondye pou entervenir dan zafer bann imen zis parey dan letan Noe. (2 Pyer 3:3-7) Me konman Noe ti servi son letan menm si i ti pe viv parmi sa bann kalite dimoun?

4. Ki mannyer Noe ti servi son letan apre ki Zeova ti demann li pour konstri lars e akoz?

⁴ Bondye ti dir Noe ki i ti pe al detrir tou move dimoun e demann li pour konstri en lars pour prezerv bann bon dimoun ek zannimo. (Zen. 6:13, 14, 22) Noe ti osi anons zour zizman Bondye. Zapot Pyer i apel Noe “en predikater lazistis” ki montre ki i ti fer bokou zefor pour ed son bann vwazen realize ki zot devret azir deswit. (Lir 2 Pyer 2:5.) Eski ou krwar i ti pou saz pour Noe ek son fanmir konsantre lo zot biznes, esey fer pli byen ki lezot oubyen rod en lavi pli konfortab? Non! Zot ti konnen sa ki ti pe al arive e zot ti evite ganny distrer.

SWA KI EN PRENS EZIPSYEN TI FER

5, 6. (a) Sa ledikasyon ki Moiz ti gannyen ti pe prepar li pour fer kwa? (b) Akoz Moiz ti rezet sa ki Lezip ti kapab ofer li?

⁵ Annou aprezan get legzanp Moiz. Fiy Faraon ti adopte li e i ti grandi dan en pale. Konman en zenn prens, i ti ganny edike “dan tou sa ki bann Ezipsyen ti devre konnen.” (Akt 7:22; Egz. 2:9, 10) I tre probab ki i ti ganny sa ledikasyon pour prepar li pour en travay dan lakour rwayal Faraon. I ti’n kapab vin en gran dimoun dan sa gouvernman pli pwisan son letan, annan bann keksoz deliks, ganny bokou privilez ek plezir. Me eski sa bann keksoz ti enportan pour Moiz?

⁶ I posib ki paran Moiz ti ansenny li lo Zeova ek promes ki I ti’n fer avek son bann zanset Abraam, Izaak ek Zakob kan i ti ankor ptipti. Moiz ti annan lafwa dan sa bann promes. I ti’n bezwen mazin en kantite lo son lavenir ek son fidelite anver Zeova. Kan sa moman ti arive pour swazir ant vin en prens Ezipsyen oubyen en lesklav Izraelit, ki Moiz ti swazir? I ti swazir pour “ganny maltrete ansanm avek pep Bondye, plito ki zouir plezir pese pandan en pti pe letan.” (Lir Ebre 11:24-26.) Plitar, i ti swiv gidans Zeova konsernan lafason ki i devret servi son lavi. (Egz. 3:2, 6-10) Akoz Moiz ti fer sa? Parski i ti krwar dan bann promes Bondye. I ti realize ki i ti napa okenn lavenir Lezip. I vre akoz pa tro bokou letan apre, Bondye ti frap sa nasyon avek dis fleo. Eski ou vwar leson ki bann ki’n dedye zot lavi avek Zeova i kapab tire ozordi? Dan plas konsantre lo rod en karyer oubyen keksoz ki sa lemonn i ofer, nou devret konsantre lo nou servis pour Zeova.

 ZEREMI TI KONNEN SA KI TI POU ARIVE

7. Ki mannyer nou letan i parey avek letan Zeremi?

⁷ En lot zonm ki ti met servis Zeova premye dan son lavi sete profet Zeremi. Zeova ti demann li pour anons son zizman lo bann zabitan Zerizalenm ek Zida ki ti’n vin aposta. Zeremi osi ti viv “dan bann dernyen zour.” (Zer. 23:19, 20) I ti konn tre byen ki sa move lemonn ki i ti pe viv ladan pa ti pou dir pour lontan.

8, 9. (a) Akoz Barouk ti devret koriz son fason panse? (b) Ki nou devret annan antet kan nou pe plàn pour lavenir?

⁸ Lefet ki Zeremi ti konnen ki i ti napa bokou letan ki reste, ki i ti fer? I pa ti esey rod en lavenir dan sa lemonn ki ti pe al ganny detrir. I pa ti pou fer sans, non? Par kont, i ti annan en letan kot Barouk son sekreter pa ti pe get keksoz byen. Alor Bondye ti enspir Zeremi pour dir sa parol avek li: “Gete! Sa ki mon’n konstri mon pe demolir e sa ki mon’n plante mon pe derasinen, menm sa pei antye. Me ou, ou kontinyen rod bann gran keksoz pour ou menm. Aret rod sa bann keksoz. . . . Parski mon pou anmenn en maler lo tou dimoun e mon pou sov ou lavi, partou kot ou ale.”​—Zer. 45:4, 5.

⁹ Nou pa konnen kwa egzakteman sa bann “gran keksoz” ki Barouk ti pe rode. * Me nou konnen ki zot ti bann keksoz ki ti pou ganny detrir kan bann Babilonnyen ti pou konkerir Zerizalenm an 607 A.N.L. Eski ou vwar ki leson nou kapab tire? Pour nou kapab ganny nou bann nesesite tou le zour, nou bezwen plàn nou lavenir. (Prov. 6:6-11) Eski i ti pou fer sans pour envestir en kantite letan ek lenerzi dan bann keksoz ki pa dirab? Wi, lorganizasyon Zeova i kontinyen fer plan pour batir bann nouvo Lasal Rwayonm, biro brans e lezot proze. Sa bann plan i diferan akoz zot pe siport Rwayonm Bondye. I ti pou byen si tou pep Zeova ki’n dedye zot lavi avek li fer son Rwayonm vin zot priyorite kan zot pe fer plan pour lavenir. Eski ou konvenki ki ou pe ‘rod plito Rwayonm ek lazistis [Zeova]?’​—Mat. 6:33.

“MON KONSIDER TOUSALA KONMAN SALTE”

10, 11. (a) Avan Pol ti vin en Kretyen dan kwa ki i ti pe depans son letan ek lenerzi? (b) Akoz i ti sanz net son lobzektif?

¹⁰ Finalman, annou vwar legzanp Pol. Avan ki i ti vin en Kretyen, i ti annan en lavenir ki ti paret solid. I ti’n etidye lalwa Zwif avek enn bann ansenyan pli renonmen dan son letan. I ti’n ganny lotorite sorti kot gran pret Zwif pour fer en travay enportan. Pol ti pe fer plis progre dan larelizyon Zwif ki bokou dimoun dan son letan. (Akt 9:1, 2; 22:3; 26:10; Gal. 1:13, 14) Pourtan tou sa la ti sanze kan i ti realize ki Zeova ti pe nepli beni bann Zwif konman en nasyon.

¹¹ Pol ti realize ki en karyer dan sa sistenm Zwif ti napa okenn valer dan lizye Zeova e ki i pa ti pou dirab. (Mat. 24:2) I ti menm dir ki konpare avek sa nouvo konprenezon ki i ti’n gannyen lo plan Bondye ek sa privilez ki i ti annan pour prese, sa ki i ti krwar ti enportan ti aprezan parey en ta “salte.” I ti aret son karyer dan larelizyon Zwif e i ti dedye larestan son lavi lo later pour anons sa bon nouvel.​—Lir Filipyen 3:4-8, 15; Akt 9:15.

 EGZAMIN OU PRIYORITE

12. Ki ti priyorite Zezi apre son batenm?

¹² Noe, Moiz, Zeremi, Pol ek bokou lezot dimoun in servi laplipar zot letan ek lenerzi pour met Rwayonm Bondye premye. Zot bann bon legzanp pour nou. Byensir, pli gran legzanp ki nou annan se Zezi. (1 Pyer 2:21) Apre son batenm, Zezi ti dedye larestan son lavi lo later pour pres sa bon nouvel e onor Zeova. I evidan ki en Kretyen ki konsider Zeova konman son Met, son priyorite i devret son servis pour Li. Eski sa i ou priyorite? Ki mannyer ou kapab fer ou servis pour Zeova ou priyorite e an menm tan fer bann lezot keksoz ki neseser?​—Lir Psonm 71:15; 145:2. *

13, 14. (a) Kwa ki tou bann Kretyen batize i ganny ankouraz pour fer? (b) Ki satisfaksyon pep Bondye i kapab eksperyanse?

¹³ Pour plizyer lannen lorganizasyon Zeova pe ankouraz bann Kretyen pour konsider dan lapriyer si zot kapab fer servis pionye. Pour diferan rezon, sirkonstans serten serviter fidel Zeova pa permet zot pour pas an mwayenn 70 erdtan dan predikasyon sak mwan. Zot pa devret santi zot koupab. (1 Tim. 5:8) Me ou? Eski i vreman enposib pour ou fer pionye?

¹⁴ Mazin sa lazwa ki bokou serviter Bondye ti gannyen pandan sezon Memoryal sa lannen. Pandan mwan Mars, bann proklanmater ti kapab swazir pour fer swa 30 oubyen 50 erdtan dan predikasyon konman pionye asistan. (Ps. 110:3) I annan plizyer milyon dimoun ki ti pran servis pionye asistan e bann kongregasyon in eksperyans bokou plis lazwa ek leksitasyon. Eski ou kapab aranz ou progranm e eksperyans sa menm kalite lazwa pli souvan? A lafen sak zour, bann Kretyen ki’n dedye zot lavi avek Zeova i ganny bokou satisfaksyon akoz zot kapab dir: “Zeova mon’n fer tou sa ki mon ti kapab dan ou servis.”

15. Ki lobzektif en zenn Kretyen i devret annan konsernan ledikasyon?

¹⁵ Si ou pros pour fini lekol, ou annan en bon lasante e napa tro bokou responsabilite, eski ou’n mazin seryezman lo pran servis pionye ordiner? Bann school counselor i san dout vreman krwar ki i dan ou pli bon lentere pour pourswiv en ledikasyon pli avanse e fer en karyer dan sa lemonn. Me zot konfyans i dan sa lemonn ki son sistenm sosyal e finansyel pa pou dire. De lot kote, si ou pran servis a plen tan, ou pou montre ki ou pe rod bann lobzektif ki vo lapenn e dirab. Sa pou osi demontre ki ou pe swiv legzanp parfe Zezi. Sa bon desizyon pou fer ou vreman ere. I pou protez ou e i pou donn levidans ki ou determinen pour viv an armoni avek dedikasyon ki ou’n fer avek Zeova.​—Mat. 6:19-21; 1 Tim. 6:9-12.

16, 17. Ki kestyon nou kapab demann nou lekor konsernan lanplwa ek lezot aktivite dan sa lemonn?

¹⁶ I annan bokou serviter Bondye ozordi ki pe travay lizour konman aswar pour pran swen avek bezwen zot fanmir. Me i annan parmi ki pe travay an plis pour bann keksoz ki pa neseser. (1 Tim. 6:8) Sa lemonn komers pe fer nou krwar ki nou pa kapab viv san son bann prodwi enkli sak nouvo model ki vin lo marse. Me bann  vre Kretyen pa anvi les lemonn Satan dikte zot kwa ki devret zot priyorite. (1 Zan 2:15-17) Kant a bann ki’n pran retret, ki pli bon fason ki zot kapab servi zot letan ki par fer pionye e met zot servis pour Zeova premye?

¹⁷ Tou serviter Zeova ki’n dedye zot lavi avek li i devret demann zot lekor: Kwa ki mon priyorite dan lavi? Eski mon pe met Rwayonm Bondye premye? Eski mon pe imit sa leta lespri sakrifis ki Zezi ti demontre? Eski mon pe ekout konsey Zezi pour kontinyen swiv li? Eski mon kapab aranz mon progranm pour mwan kapab fer plis dan predikasyon oubyen lezot travay dan servis Zeova? Menm si mon sirkonstans pour le moman pa permet mwan pour fer plis, eski mon pe kontinyen demontre en leta lespri sakrifis?

BONDYE I DONN NOU ‘LAVOLONTE E RANN NOU KAPAB’

18, 19. Lo kwa ki nou kapab priye e akoz sa bann demann i fer plezir Zeova?

¹⁸ I vreman gou pour vwar devouman ki pep Bondye i demontre. Par kont, i annan serten ki menm si zot sirkonstans i permet, zot napa sa lanvi oubyen zot santi ki zot pa ase kalifye pour fer pionye. (Egz. 4:10; Zer. 1:6) Eski ou santi koumsa? Eski ou kapab fer sa en size ou lapriyer? Byensir! Pol ti dir son bann konpanyon Kretyen ki Zeova “i travay dan zot, e i donn zot lavolonte e rann zot kapab [pour] akonpli tou dapre son bon plan.” (Fili. 2:13) Si ou napa sa lanvi pour fer plis pour Zeova, demann li pour donn ou sa dezir ek abilite.​—2 Pyer 3:9, 11.

¹⁹ Noe, Moiz, Zeremi, Pol ek Zezi ti bann zonm devoue. Zot ti servi zot letan ek lenerzi pour anons lavertisman Zeova. Zot pa ti les zot ganny distrer. Lafen sa lemonn i pros pour arive, alor nou tou ki’n dedye nou lavi avek Bondye nou bezwen fer sir ki nou pe kontinyen fer nou mye pour swiv sa bann bon legzanp ki dan Labib. (Mat. 24:42; 2 Tim. 2:15) Si nou fer sa, nou pou fer plezir Zeova e nou pou ganny bokou benediksyon.​—Lir Malaki 3:10. *

[Not anba lo paz]

[Kestyon]

[Portre lo paz 22]

Bann dimoun pa ti ekout lavertisman Noe

[Portre lo paz 25]

Eski ou’n mazin seryezman lo pran servis pionye ordiner?