Ntak Emi Akpadade Utom Jehovah nte Akpa N̄kpọ ke Uwem?

“Inua mi oyobụk edinen ido fo, ye edinyan̄a fo kpukpru usen.”—PS. 71:15.

DIDIE KE AFO ỌKPỌBỌRỌ?

Nso ikanam Noah, Moses, Jeremiah, ye Paul ẹda utom Jehovah nte akpa n̄kpọ ke uwem mmọ?

Nso idin̄wam fi ebiere se akpadade uwem fo anam?

Ntak emi ebierede ndida utom Jehovah nte akpa n̄kpọ ke uwem fo?

1, 2. (a) Nso ke owo ndiyak idemesie nnọ Jehovah ọwọrọ? (b) Nso ufọn ke ikeme ndibọ ke ini ikerede iban̄a ubiere oro Noah, Moses, Jeremiah, ye Paul ẹkenamde?

 KE INI ayakde idem ọnọ Abasi onyụn̄ anade baptism nte anditiene Jesus, amanam ata akpan n̄kpọ. Ndiyak idem nnọ Abasi edi n̄kponn̄kan ubiere oro afo ekemede ndinam ke idemfo. Etie nte n̄kpọ emi ọdọhọde ete: ‘Jehovah, nyom fi edi Eteufọk mi. Ami ndi asan̄autom fo. Nyom fi ebiere kpukpru n̄kpọ ke uwem mi—nte ndade ini mi nnam n̄kpọ, mme n̄kpọ oro n̄kpadade nte akpa, ye nte n̄kpadade inyene ye ukeme mi nnam n̄kpọ.’

² Edieke afo edide Christian emi ama akayak idem ọnọ Abasi, se afo ọkọn̄wọn̄ọde ọnọ Jehovah edi oro. Imọkọm fi ke ubiere oro akanamde mi; nnennen n̄kpọ ke akanam oro. Edi didie ke akpada ini fo anam n̄kpọ edieke adade Jehovah nte Eteufọk fo? Uwụtn̄kpọ Noah, Moses, Jeremiah, ye apostle Paul ekeme ndin̄wam nnyịn ibọrọ mbụme oro. Kpukpru mmọ ẹkenam n̄kpọ Jehovah ke ofụri ukpọn̄. Idaha nnyịn onyụn̄ etie nte eke mmọ. Ubiere oro mmọ ẹkenamde ama owụt se mmọ ẹkedade nte akpa n̄kpọ, ndien emi ekeme ndinam nnyịn ifiak ise nte idade ini nnyịn inam n̄kpọ.—Matt. 28:19, 20; 2 Tim. 3:1.

MBEMISO UKWỌ

3. Didie ke eyo nnyịn ebiet eyo Noah?

³ Jesus ọkọdọhọ ke eyo nnyịn ebiet eyo Noah. Enye ọkọdọhọ ete: “Kpa nte mme usen Noah ẹkedide, kpasụk ntre ke edidu Eyen owo edidi.” Onyụn̄ ọdọhọ n̄ko ke mmọ ẹma “ẹdia ẹnyụn̄ ẹn̄wọn̄, irenowo ẹdọ ndọ ẹnyụn̄ ẹda iban ẹnọ ke ndọ, tutu esịm usen emi Noah odụkde ubom; mmọ inyụn̄ ifiọkke tutu ukwọ edi edikpọri mmọ kpukpru efep.” (Matt.  24:37-39) Ata ediwak owo mfịn ẹnam se ibehede mmọ inyụn̄ ifiọkke ke utịt ekpere. Mmọ idọn̄ke enyịn ke ntọt oro mme asan̄autom Abasi ẹtan̄ade. Ediwak mmọ inịmke ke Abasi oyosobo mme idiọkowo. Oro akam edi n̄kpọ imam ọnọ mmọ, kpa nte ekedide ke eyo Noah. (2 Pet. 3:3-7) Edi, didie ke Noah akada ini esie anam n̄kpọ ke idiọk ererimbot oro?

4. Didie ke Noah akada ini esie anam n̄kpọ ke Jehovah ama ọkọnọ enye utom, ndien ntak-a?

⁴ Ke Abasi ama akasian Noah se enye aduakde ndinam onyụn̄ ọnọ enye utom, Noah ama ọkọn̄ ubom man ẹda ẹnyan̄a mme owo ye unam. (Gen. 6:13, 14, 22) Noah ama odụri mme owo utọn̄ ete ke Jehovah ọmọn̄ osọp ndisobo ererimbot. Apostle Peter okot enye “ọkwọrọ edinen ido,” emi owụtde ke Noah ama odomo ndin̄wam mbon eyo esie ẹsọsọp ẹkpụhọde. (Kot 2 Peter 2:5.) Ndi emekere ke okpowụt eti ibuot edieke Noah ye ubon esie ẹkpekeyomde usụn̄ ẹtọn̄ọ mbubehe, ẹkan mme uke mmọ, m̀mê ndidia uwem? Ikpowụtke. Mmọ ikọdọn̄ke enyịn ke utọ n̄kpọ oro sia ẹma ẹfiọk se iditịbede ke mîbịghike.

MME UBIERE ORO EYEYEN EDIDEM EGYPT AKANAMDE

5, 6. (a) Anaedi ẹkenọ Moses ukpep man ẹtịm enye idem ẹnọ nso? (b) Ntak emi Moses ekesịnde mme ifet oro ẹkenọde enye ke Egypt?

⁵ Ẹyak ineme idahaemi iban̄a Moses. Ẹkebọk enye ke ufọk ubọn̄ Egypt nte eyen adiaha Pharaoh. Ẹma ‘ẹkpep enye ofụri ọniọn̄ nditọ Egypt’ sia enye ekedide eyeyen Edidem. (Utom 7:22; Ex. 2:9, 10) Etie nte ẹkenọ enye ukpep emi man enye ekpekeme ndinam utom ke okụre Pharaoh. Enye akpakakama akamba itie ke n̄kponn̄kan ukara oro okodude ke eyo esie, enyene ediwak inyene ye mme n̄kpọ eken oro mbon oro ẹdude ke utọ itie emi ẹsinyenede. Edi ndi Moses ama ada mme n̄kpọ emi nte akpan n̄kpọ?

⁶ Ke ntak ukpep oro ata ete ye eka Moses ẹkenọde enye ke ini uyen, etie nte enye ama ọfiọk se Jehovah ọkọn̄wọn̄ọde ọnọ mme ete ete esie, Abraham, Isaac, ye Jacob. Moses ama enịm ke mme un̄wọn̄ọ oro ẹyesu. Anaedi enye ama enen̄ede ekere aban̄a ini iso esie ye nte imọ ikemede ndisọn̄ọ nda nnam n̄kpọ Jehovah. Ntre, ke ini akanade enye emek m̀mê iyom ndidi ọbọn̄ Egypt m̀mê ofụn eyen Israel, nso ke enye ekemek? Moses ekemek “nditiene ikọt Abasi mbiom ukụt utu ke ndidia inemesịt idiọkn̄kpọ ke ibio ini.” (Kot Mme Hebrew 11:24-26.) Nte ini akakade, enye ama ada uwem esie anam n̄kpọ nte Jehovah eketemede. (Ex. 3:2, 6-10) Ntak emi Moses akanamde oro? Sia enye ama enịm ke mme un̄wọn̄ọ Abasi ẹyesu. Enye ama ọfiọk ke se ededi oro idinyenede ke Egypt edidi ke ibio ini. Ke akpanikọ, ikebịghike Abasi ama ada ufen duop ọnọmọ idụt oro. Ndi omokụt se mbon oro ẹyakde idem ẹnọ Jehovah mfịn ẹkemede ndikpep nto oro? Utu ke ndiwụk ekikere nnyịn ke ubọkọkọ m̀mê  ndiye n̄kpọ ererimbot emi, ikpakam ida Jehovah ye utom esie nte akpa n̄kpọ ke uwem nnyịn.

JEREMIAH AMA ỌFIỌK SE IDITỊBEDE

7. Didie ke idaha nnyịn ebiet eke Jeremiah?

⁷ Owo en̄wen emi akadade utom Jehovah nte akpa n̄kpọ ke uwem esie ekedi prọfet Jeremiah. Jehovah ọkọdọn̄ prọfet Jeremiah ete atan̄a ubiomikpe esie ọnọ mbon Jerusalem ye Judah emi ẹkedide mbon mfiakedem. Ẹkeme ndidọhọ ke Jeremiah okodu uwem “ke mme akpatre usen.” (Jer. 23:19, 20) Enye ama enen̄ede ọfiọk ke ẹyesọp ndisobo editịm n̄kpọ oro.

8, 9. (a) Ntak emi okoyomde ẹnen̄ede ekikere Baruch? (b) Nso ke ikpeti ke ini inamde ndutịm?

⁸ Didie ke Jeremiah akanam n̄kpọ ke ntak emi enye ekenịmde ke mme un̄wọn̄ọ Jehovah ẹyesu? Enye ikodomoke ndinam mme n̄kpọ nnịm nnọ ini iso ke editịm n̄kpọ oro ẹkeyomde ndisobo do. Ikpowụtke ifiọk ndinam oro. Nte ededi, enyene ini emi Baruch, ewetn̄wed Jeremiah, mîkekereke ntre. Ntem, Abasi ama ọnọ Jeremiah odudu spirit ada eteme enye ete: “Sese! Nyowụri se mbọpde, nnyụn̄ ndịbede se ntọde, kpa ofụri isọn̄ oro. Edi amaedi afo, afo osụk oyom ikpọ n̄kpọ ọnọ idemfo. Kûyom. Koro sese ami mmọn̄ nda afanikọn̄ ntiene kpukpru obụkidem, . . . ndien ami nyọnọ fi ukpọn̄ fo nte n̄kpọ mbụme ke kpukpru ebiet emi afo edikade.”—Jer. 45:4, 5.

⁹ Nnyịn ifiọkke se idide “ikpọ n̄kpọ” oro Baruch okoyomde ọnọ idemesie. * Edi imọfiọk ke mmọ ẹkedi mme n̄kpọ oro mîsibịghike, mme n̄kpọ oro ẹkesịmde utịt ke ini mbon Babylon ẹkesobode Jerusalem ke isua 607 M.E.N. Ndi omokụt n̄kpọ emi ikemede ndikpep nto emi? Oyom inam ndutịm inọ ini iso edieke anade inyene mme n̄kpọ udu uwem. (Mme N̄ke 6:6-11) Edi ndi owụt eti ibuot ndida ekese ini ye odudu mbịne mme n̄kpọ oro ẹdibede ifep? Edi akpanikọ ke esop Jehovah aka iso ndinam ndutịm ndibọp mbufa Ufọkmbono Obio Ubọn̄, mme n̄kọk itieutom, ye mme n̄kpọ ntre. Edi ndutịm enye emi edi isio sia mmọ ẹdi n̄kpọ Obio Ubọn̄. Ọkpọfọn kpukpru mme asan̄autom Jehovah oro ẹma ẹkeyak idem ẹnọ enye ẹtiene ẹnịm mme n̄kpọ Obio Ubọn̄ akpa ke ini mmọ ẹnamde ndutịm. Ndi afo emenen̄ede enịm ke ọwọn̄esịt fo ke afo ke ‘ebem iso oyom obio ubọn̄ ye edinen ido Jehovah?’—Matt. 6:33.

“MBAT MMỌ KE MBIO”

10, 11. (a) Paul akada ofụri ukeme esie anam nso mbemiso akakabarede edi Christian? (b) Nso ikanam enye okpụhọde utịtmbuba esie?

¹⁰ Ke akpatre, ẹyak ineme iban̄a uwụtn̄kpọ Paul. Mbemiso enye okodụkde Ido Ukpono Christ, enye ama enyene se mme owo ẹkedade nte ata eti ubọkọkọ. Enye ama ekpep ibet mme Jew ke ukot kiet ke otu mme akakan andikpep eyo esie. Akwa oku mme Jew ama ọnọ enye odudu. Ndien enye ama anam n̄kọri ke Ido Ukpono Mme Jew akan ediwak mbon eyo esie. (Utom 9:1, 2; 22:3; 26:10; Gal. 1:13, 14) Edi enye ama ọkpọn̄ kpukpru oro ke ini enye ọkọfiọkde ke Jehovah ama esịn mme Jew nte idụt.

¹¹ Paul ama ọfiọk ke ubọkọkọ ke editịm n̄kpọ mme Jew ikenyeneke ufọn ke enyịn Jehovah; ẹkenyene ndisobo idụt oro ke mîbịghike. (Matt. 24:2) Paul, emi ekedide Pharisee, ama akam ọdọhọ ke ida se imọ ikadade ini kiet ko nte ata akpan n̄kpọ “ke mbio” ke ini imende enye idomo ye uduak Abasi oro ikedide  idifiọk ye ifet editiene nnam utom ukwọrọikọ. Paul ama ọkpọn̄ Ido Ukpono Mme Jew onyụn̄ ayak ofụri ini oro enye ekenyenede ndidu uwem ke isọn̄ esịn ke edikwọrọ eti mbụk.—Kot Philippi 3:4-8, 15; Utom 9:15.

FIAK SE SE ADADE NTE AKPA N̄KPỌ KE UWEM FO

12. Nso ke Jesus akada ofụri ini esie anam ke enye ama akana baptism?

¹² Noah, Moses, Jeremiah, Paul, ye ediwak mbon en̄wen ẹkeda ekese ini ye ukeme mmọ ẹnam n̄kpọ Abasi. Mmọ ẹma ẹnịm eti uwụtn̄kpọ ẹnọ nnyịn. Edi akakan ke otu mme asan̄autom Jehovah oro ẹma ẹkeyak idem ẹnọ enye edi Jesus. (1 Pet. 2:21) Ke Jesus ama akana baptism, enye ama ada ofụri ini esie ke isọn̄ ọkwọrọ eti mbụk onyụn̄ ọnọ Jehovah ubọn̄. Christian emi ekpebede Jesus onyụn̄ adade Jehovah nte Eteufọk esie ekpenyene ndinịm utom Abasi nte akpa n̄kpọ ke uwem esie. Ndi utom Jehovah edi akpa n̄kpọ ke uwem fo? Didie ke ekeme ndinam ekese ke n̄kpọ Abasi ke adan̄aemi osụk anamde utom idịbi udia fo?—Kot Psalm 71:15; 145:2.

13, 14. (a) Ẹsịn udọn̄ ẹnọ kpukpru mme Christian oro ẹma ẹkeyak idem ẹnọ Abasi ẹte ẹkere ẹban̄a nso? (b) Nso idatesịt ke ikọt Abasi ẹkeme ndikop?

¹³ Ke ediwak isua idahaemi, esop Jehovah esisịn udọn̄ ọnọ mme Christian ete ẹbọn̄ akam ẹkere m̀mê imekeme ndinam utom usiakusụn̄. Ke ntak kiet m̀mê eken, idaha ndusụk mme anam-akpanikọ asan̄autom Jehovah iyakke mmọ ẹkeme ndikwọrọ ikọ n̄kpọ nte hour 70 ke ọfiọn̄. Ikpanaha mmọ ẹyak emi anam idem emem mmọ. (1 Tim. 5:8) Nso kaban̄a fi? Ndi enen̄ede edi akpanikọ ke ukemeke ndinam utom usiakusụn̄?

¹⁴ Kere ban̄a idatesịt oro ata ediwak ke otu ikọt Abasi ẹkekopde ke ini Editi isua emi. Ẹma ẹnam san̄asan̄a ndutịm ke March emi akanamde mme asiakusụn̄ unọ un̄wam ẹmek m̀mê iyom ndinọ hour 30 m̀mê 50. (Ps. 110:3) Ata ediwak mme asuanetop ẹma ẹnam utom usiakusụn̄ unọ un̄wam, ẹma ẹnyụn̄ ẹkop nduaidem ye idatesịt ke esop. Ndi emekeme ndinam ndutịm man ekeme ndisikop utọ idatesịt emi ke ubọk ke ubọk? Ke ini Christian emi ama akayak idem ọnọ Abasi anamde utom usiakusụn̄, esịt esinem enye ke ini enye ọnyọn̄de ukwọrọikọ edi, onyụn̄ ọdọhọ ete: “Jehovah, mmanam ofụri se n̄kemede ke utom fo mfịn.”

15. Nso ikpedi ubiere uyen Christian kaban̄a uka n̄wed?

¹⁵ Edieke afo ekperede ndikụre n̄wed, okopde nsọn̄idem, unyụn̄ unen̄ekede unyene mbiomo ke ubon, ndi emenen̄ede ekere aban̄a ndidụk utom usiakusụn̄ ofuri ini? Anaedi mme andikpep mbufo ẹnen̄ede ẹnịm ke afo ndika ufọkn̄wed ntaifiọk nnyụn̄ nyom eti utom ke ererimbot emi ọyọfọn ye afo. Mmọ ẹdori enyịn ke editịm n̄kpọ oro mîdibịghike mi. Edi edieke ebịnede mme utịtmbuba ukara Abasi, ọwọrọ ke afo ebịne nti utịtmbuba emi ẹdibịghide. Emi oyonyụn̄ owụt ke afo ekpebe mfọnn̄kan uwụtn̄kpọ oro Jesus ekenịmde. Utọ eti ubiere emi ayanam fi okop inemesịt. Enye eyekpeme fi. Emi n̄ko oyowụt ke afo emebiere ndidu uwem ekekem ye uyakidem fo nnọ Jehovah.—Matt. 6:19-21; 1 Tim. 6:9-12.

16, 17. Mme mbụme ewe ẹdemede ẹban̄a utom idịbi udia ye mme utịmbuba eken?

¹⁶ Ediwak mme asan̄autom Jehovah ẹsinam utom anyan ini man ẹse ẹban̄a ubon mmọ. Edi etie nte ndusụk owo ẹsinam utom ẹbịghi akan nte ẹkpenamde. (1 Tim. 6:8) Ererimbot ke ẹsịn ofụri ukeme mmọ man ẹnam nnyịn inịm  ke nnyịn ikemeke ndidu uwem edieke nnyịn mîdepke ediwak n̄kpọ oro ẹsion̄ode ẹdi. Edi ikpanaha ata mme Christian ẹyak ererimbot Satan ebiere se idide akpa n̄kpọ ke uwem mmọ. (1 John 2:15-17) Mfọnn̄kan usụn̄ oro mbon oro ẹma ẹkekpọn̄ utom ẹkemede ndida ini mmọ nnam n̄kpọ edi ndinam utom usiakusụn̄ nnyụn̄ nda utom Jehovah nte akpa n̄kpọ.

¹⁷ Kpukpru mme asan̄autom Jehovah oro ẹma ẹkeyak idem ẹnọ enye ẹkpenyene ndibụp idemmọ ẹte: Nso inen̄ede idi akpa n̄kpọ ke uwem mi? Ndi ami ke mbem iso nyom Obio Ubọn̄? Ndi ami ke n̄kpebe edu n̄waidem Jesus? Ndi ami ke nnam item emi Jesus ọkọnọde ete ika iso itiene imọ? Ndi mmekeme ndinam ukpụhọde ke ndutịm mi man n̄keme ndida ekese ini nnam utom edikwọrọ Obio Ubọn̄ m̀mê mme utịtmbuba ukara Abasi eken? Idem edieke idaha mi mîyakke nnam ekese idahaemi ke utom ukwọrọikọ, ndi ami ke n̄ka iso nnyene edu n̄waidem?

‘NDINYỊME NNYỤN̄ NNAM’

18, 19. Nso ke afo ọkpọbọn̄ akam aban̄a, ndien ntak emi utọ akam emi enemde Jehovah esịt?

¹⁸ Ifịk oro ikọt Abasi ẹnyenede edi ata n̄kpọ idatesịt. Okposụkedi emi idaha ndusụk owo akpayakde mmọ ẹnam utom usiakusụn̄, idọn̄ke mmọ ndinam, ndien ndusụk owo ẹkere ke mmimọ idotke. (Ex. 4:10; Jer. 1:6) Nso ke akpanam edieke etiede fi ntre ke idem? Sịn n̄kpọ emi ke akam. Paul ọkọdọhọ ekemmọ mme andinịm ke akpanikọ ete ke Jehovah ke ‘anam utom ke esịt mmọ, nte enemde enye, man mmọ ẹnyịme ẹnyụn̄ ẹnam.’ (Phil. 2:13) Edieke mîdọn̄ke fi ndinam ekese ke utom ukwọrọikọ, ben̄e Jehovah anam ọdọn̄ fi onyụn̄ ọnọ fi ukeme ndinam emi.—2 Pet. 3:9, 11.

¹⁹ Noah, Moses, Jeremiah, Paul, ye Jesus ẹma ẹnen̄ede ẹnyene ifịk. Mmọ ẹkeda ini ye odudu mmọ ẹdụri mme owo utọn̄ ẹban̄a se Jehovah aduakde ndinam. Mmọ ikayakke n̄kpọ ọwọn̄ọde ntịn̄enyịn̄ mmọ. Utịt editịm n̄kpọ emi enen̄ede ekpere. Ntem, ana kpukpru nnyịn emi ima ikayak idem inọ Abasi ikụt ite ke imaka iso ikpebe nti uwụtn̄kpọ N̄wed Abasi oro inemede mi. (Matt. 24:42; 2 Tim. 2:15) Edieke inamde emi, iyenem Jehovah esịt inyụn̄ ibọ ediwak edidiọn̄.—Kot Malachi 3:10.

[Ikọ Idakisọn̄]

[Mme Mbụme Ukpepn̄kpọ]

[Ndise ke page 21]

Mme owo ikọdọn̄ke enyịn ke ntọt oro Noah ọkọnọde

[Ndise ke page 24]

Ndi emenen̄ede ekere nte okpodụkde utom usiakusụn̄ ofụri ini?