“Opa árare amoherakuãne nderekojojaha ha nde oresalvaha”. (SAL. 71:15, NM)

¿MBAʼÉPA REMBOHOVÁITA?

¿Mbaʼépa omomýi Noé, Moisés, Jeremías ha Páblope omotenonde hag̃ua Ñandejára servísio?

¿Mbaʼépa ñañeporanduvaʼerã jaikuaa hag̃ua mbaʼéichapa jaiporuñaína ñande rekove?

¿Mbaʼérepa nde redesidi remotenonde Jehová servísio?

1, 2. a) ¿Mbaʼépa heʼise ñañemeʼẽ Jehovápe? b) ¿Mbaʼéichapa ñanepytyvõta ñahesaʼỹijóramo Noé, Moisés, Jeremías ha apóstol Pablo rembiasakue?

 ÑAÑEMEʼẼVO Jehovápe ha jajevautisa oiko ñandehegui Jesucristo remimboʼe. Upéicha ñameʼẽ Ñandejárape ñande rekove. Ndaipóri mbaʼeve iñimportantevéva upévagui. Haʼete jaʼéva chupe: “Jehová, koʼág̃a guive nde che jára ha redesidíta opa mbaʼe ajapótava. Nde chemboʼéta mbaʼéichapa aiporúta che tiémpo, umi mbaʼe arekóva ha aikuaáva, ha rehechaukáta chéve mbaʼépa amotenondevaʼerã”.

² Oiméramo nde reñemeʼẽma Jehovápe ikatu oime reñekomprometéraʼe chupe upéicha. Ha ojeguerohory redesidi porãiterei haguére. Koʼág̃a Jehová haʼéma nde Jára, ha iporã reñeporandu: “¿Mbaʼéichapa aiporuvaʼerã che tiémpo?”. Noé, Moisés, Jeremías ha apóstol Pablo ehémplo nepytyvõta rembohovái hag̃ua ko porandu. Haʼekuéra oservivaʼekue Jehovápe ipyʼaite guive, upévare ñahesaʼỹijóramo hembiasakue jaikuaáta mbaʼéichapa jaikovaʼerã. Umi mbaʼe jahasáva koʼág̃a rupi ojoguaiterei haʼekuéra ohasavaʼekuépe, upéicha rupi umi mbaʼe odesidivaʼekue hikuái ñanepytyvõta jahechakuaa hag̃ua mbaʼépepa jaiporuñaína ñane tiémpo (Mat. 28:19, 20; 2 Tim. 3:1).

PE AMA GUASU MBOYVE

3. ¿Mbaʼépepa ojojogua ñane tiémpo ha Noé tiémpo?

³ Jesús heʼivaʼekue ñane tiémpo ojoguataha pe tiémpo Noé oiko haguépe. Haʼe heʼi: “Oiko haguéicha Noé tiémpope, upéichata avei pe Yvypóra Raʼy oĩ vove”. Upérõ umi hénte “okaru ha omboyʼu, kuimbaʼe ha kuñanguéra omendajoa, Noé oike peve pe  árkape; ha haʼekuéra nopenái mbaʼevére ha upéi ou pe ama guasu ha ohundipaite chupekuéra” (Mat. 24:37-39, NM). Koʼág̃a rupi avei hetaitereive hénte oiko oikoseháichante, ndohechakuaái ko múndo oñehundipotaitemaha ha nopenái pe mensáhe omeʼẽvare Ñandejára rembiguaikuéra. Oiko haguéicha Noé tiémpope, oĩ voi oñembohorýva ojeʼéramo chupekuéra ñande Apohare osolusionataha yvyporakuéra provléma (2 Ped. 3:3-7). Péro, ¿mbaʼéichapa Noé oiporúraʼe itiémpo oikóramo jepe umi hénte aña apytépe?

4. ¿Mbaʼéichapa Noé oiporu itiémpo Jehová omeʼẽrõ guare chupe hembiaporã, ha mbaʼérepa?

⁴ Ñandejára heʼi Noépe mbaʼépa ojapóta umi hénte añágui ha omeʼẽ chupe hembiaporã. Noé ojapo peteĩ árka ojesalva hag̃ua yvyporakuéra ha umi mymba (Gén. 6:13, 14, 22). Apóstol Pedro heʼi hese ‘omombeʼu hague opavavépe mbaʼéichapa Ñandejára oipota ojeiko’ ha mbaʼépa ojapóta. Upéva ohechauka Noé oñehaʼã hague oipytyvõ hapichakuérape ohechakuaa hag̃ua ndahaʼeiha vyrorei pe oikótava (elee 2 Pedro 2:5). Jaikuaaháicha, Noé ha hogayguakuéra noñehaʼãi omoĩ negósio, ipláta heta térã oiko porã. Upéicha ojapórire ohechaukavaʼerãmoʼã hikuái ndoiporuporãiha itiémpo. Péro haʼekuéra oikuaa porã mbaʼépa oikóta ha ndohejái mbaʼeve ohesarea chupekuéra.

MBAʼÉPA ODESIDIVAʼEKUE PETEĨ PRÍNSIPE EGIPTOYGUA

5, 6. a) ¿Maʼerãpa oñehekomboʼerakaʼe Moiséspe? b) ¿Mbaʼérepa Moisés omboyke umi mbaʼe oñekuaveʼẽva chupe Egíptope?

⁵ Jahechamína koʼág̃a Moisés ehémplo. Faraón rajy ogueraha ha omongakuaa chupe imemby teéramo peteĩ palásiope. Haʼe ningo peteĩ prínsipe ha upévare “oñehekomboʼe umi Egiptoygua arandúpe” (Hech. 7:22; Éxo. 2:9, 10). Umi mbaʼe oaprendéva ikatúkuri oipytyvõ chupe ojapo hag̃ua umi tembiapo iñimportánteva pe palásiope. Ikatu oiko chugui peteĩ tapicha omanda guasúva pe goviérno imbaretevévape upe tiémpope, avei orekovaʼerãmoʼã heta mbaʼe iporãva, ohupytýta oipotáva guive ha ojapóta ogustáva chupe. Péro, ¿oipotápa raʼe Moisés koʼã mbaʼe?

⁶ Ñepyrũrã ningo Moiséspe omongakuaavaʼekue itúva ha isy tee. Oiméne haʼekuéra omboʼe chupe mbaʼépa Jehová opromete Abrahán, Isaac ha Jacóbpe, ha haʼe ojerovia koʼã promésare. Katuete Moisés ojepyʼamongetáne raʼe henonderãre ha opensa mbaʼéichapa iñeʼẽrendúta Jehovápe. Upéi, odesidítarõ guare osegínte Faraón rógape prínsiperamo térã osẽ upégui ha oiko chugui tembiguái, haʼe ‘oiporavo ohasa asy Ñandejára retãyguakuéra ndive, oiko porã rangue sapyʼami vyʼapópe pekádo poguýpe’ (elee Hebreos 11:24-26). Upe rire oheja Jehová ohechauka chupe haperã (Éxo. 3:2, 6-10). ¿Mbaʼérepa haʼe odesidi upéva? Ojerovia rupi Jehová promesakuérare ha ohechakuaa Egíptope  ndohupytymoʼãiha mbaʼeve iporãva. ¡Ha ndojavyirakaʼe! Tiémpo riremínte Jehová ohundi Egipto umi diez plága rupive. ¿Mbaʼépa ñanemboʼe ko ehémplo enterove kristiáno koʼag̃aguápe? Iñimportantevevaʼerãha ñandéve g̃uarã Jehová ha iservísio, jaiko rangue jaheka mbaʼerepy ha umi vyʼarã ko múndo oikuaveʼẽva.

JEREMÍAS OIKUAAVAʼEKUE MBAʼÉPA OIKÓTA

7. ¿Mbaʼérepa jaʼekuaa Jeremías ohasavaʼekue ojoguaha umi mbaʼe ñande jahasávape?

⁷ Proféta Jeremías omotenondevaʼekue avei Ñandejára servísio. Jehová oiporavo chupe iprofetarã ha omondo chupe omombeʼu hag̃ua umi Jerusalén ha Judayguápe Jehová okastigataha chupekuéra opuʼã haguére hese. Ikatu jaʼe Jeremías oiko hague avei “umi ára pahápe” (Jer. 23:19, 20, NM). Haʼe oikuaa porã pe múndo upe tiempopegua ndohopukuveimaha.

8, 9. a) ¿Mbaʼérepa Baruc tekotevẽkuri okambia opensa lája? b) ¿Mbaʼe rehépa ñapensavaʼerã jadesidíta jave mbaʼépa jajapóta?

⁸ Jeremías ojerovia rupi Jehováre, noñehaʼãi ohupyty umi mbaʼe pe múndo oikuaveʼẽva upérõ guare. Haʼe oikuaa umi mbaʼe opa reitaha. Péro peteĩ tiémpore isekretário Baruc ndohechakuaái upéva ha Jehová heʼika chupe Jeremías rupive: ‘Eikuaa porãke, che ambyai umi mbaʼe amopuʼãmavaʼekue, ha amondoro umi mbaʼe añotỹmavaʼekue, ha ko yvy tuichakue rehe péicha ajapóta. ¿Ha nde piko reiko reheka ndejupe g̃uarã umi mbaʼe tuicháva? Ani reheka, ha emaʼẽ porãke, che aguerúta mbaʼe vai opa oikóvape ko yvy apére, [...] ha ndéve katu ameʼẽta nde rekove peteĩ jopóiramo mamo rehohápe’ (Jer. 45:4, 5, ÑÑB).

⁹ Ñande ningo ndajaikuaái mbaʼépa raʼe umi “mbaʼe tuicháva” Baruc oipotavaʼekue, péro tahaʼe haʼéva, umíva opa reíta umi Babiloniaygua ojagarra vove Jerusalén áño 607-pe Jesús ou mboyve. a ¿Mbaʼépa ikatu ñaaprende ko ehémplogui? Jaikuaaháicha, tekotevẽtante voi ñapensa mbaʼéichapa jahupytýta ñane remikotevẽ (Pro. 6:6-11). Péro, ¿iporãtapa jaiporupaite ñane tiémpo ha ñane mbaretekue jahupyty hag̃ua umi mbaʼe oñehundítava koʼẽrõite? Añetehápe Jehová organisasión ohecha gueteri ojejapo hag̃ua Salón del Reino, sukursál térã ambue mbaʼe. Upéicharamo jepe, koʼã konstruksión ndopareimoʼãi, akóinte ojeporúta oñemotenonde hag̃ua Ñandejára rembipota. Upévare opavave oservíva Jehovápe omotenondevaʼerã Haʼe oipotáva odesidíta jave mbaʼépa ojapóta hekovépe. ¿Ikatúpa ere ‘remotenonde memeha Ñandejára Rréino ha ihustísia’? (Mat. 6:33, NM.)

“AREKO UMÍVA YTÝRAMO”

10, 11. a) ¿Mbaʼépa ohupytysevaʼekue Pablo oiko mboyve chugui kristiáno? b) ¿Mbaʼérepa Pablo ou okambiaite?

¹⁰ Jahechamína koʼág̃a Pablo ehémplo. Oiko mboyve chugui kristiáno, ikatúkuri ohupyty hetaiterei mbaʼe ko múndope. Pór ehémplo, ostudiavaʼekue hudiokuéra léi pe mboʼehára ikatupyryvéva ndive upe tiémpope. Avei pe saserdóte guasu omeʼẽ chupe autorida ha oñakãrapuʼãve ohóvo irrelihiónpe umi ótro hapichakuéragui (Hech. 9:1, 2; 22:3; 26:10; Gál. 1:13, 14). Péro upéi haʼe ou okambia ohechakuaa rupi Jehová ndoguerohoryveimaha umi hudíope.

¹¹ Pablo ohechakuaa umi mbaʼe ohupytýva umi hudío apytépe ndovaleiha mbaʼeverã Ñandejára renondépe, ha umíva ndoguerahamoʼãiha chupe mamove  (Mat. 24:2). Haʼe omombaʼeterei oaprendéva Ñandejáragui ha upe priviléhio ohupytýva oiko rupi chugui kristiáno. Ombojojávo koʼã mbaʼe oaprende ramóva umi ymave ohupytyvaʼekuére haʼérõ guare fariséo, heʼi: “Areko umíva ytýramo”. Upévare oheja hudiokuéra rrelihión ha oñemeʼẽmbaite opredika hag̃ua pe marandu porã oikove aja ko yvy ape ári (elee Filipenses 3:4-8, 15; Hech. 9:15).

JAHECHA MBAʼÉPA ÑAMOTENONDEÑAÍNA

12. ¿Mbaʼépa Jesús omotenonde ojevautisa rire?

¹² Noé, Moisés, Jeremías, Pablo ha ambue oservivaʼekue Jehovápe oiporupaite itiémpo ha imbaretekue ombaʼapo hag̃ua Ñandejárape g̃uarã, upévare iporã ñahaʼanga chupekuéra. Péro jaikuaaháicha, Jesús haʼevaʼekue pe ehémplo tuichavéva (1 Ped. 2:21). Ojevautisa rire, oiporupaite hekove opredika hag̃ua pe marandu porã ha omombaʼeguasu hag̃ua Jehovápe. Upéicharõ, pe kristiáno orekóva Jehovápe ijáraramo oikuaa porã ndaiporiha mbaʼeve iñimportantevéva Jehová servísiogui. ¿Repensápa avei upéicha? ¿Mbaʼéichapa remohenda porãta ne rembiapokuéra ikatu hag̃uáicha rehupyty avei hetave mbaʼe Ñandejára servísiope? (Elee Salmo 71:15 ha 145:2.)

13, 14. a) ¿Maʼerãpa oñemokyreʼỹ opavave kristiánope? b) ¿Mbaʼéichapa oñeñandu Jehová rembiguái ojapóramo ikatúva guive iservísiope?

¹³ Heta áñorema Jehová organisasión omokyreʼỹ kristianokuérape oñemboʼe hag̃ua Jehovápe isituasión rehe ha ojepyʼamongeta jahecha ndaikatúipa ojapo iprekursorádo. Péro oĩ heta ermáno ndaikatúiva opredika setenta óra káda més, ha ndovaléi oñeñandu vai upévare (1 Tim. 5:8). Ha nde, ¿añetehápepa ndaikatúi oiko ndehegui prekursór?

¹⁴ Oiméne ñanemanduʼa mbaʼeichaitépa heta ermáno ovyʼa ko áñope pe Conmemoración tiémpope. Márzope umi prekursór auxiliar ikatúkuri oiporavo ojapótapa treinta térã cincuenta óra predikasiónpe (Sal. 110:3). Hetaiterei ermáno ojapo iprekursorádo, ha umi kongregasiónpe ojehecha ojevyʼaitereiha. ¿Ikatúpa nde remohenda porãve ne tiémpo revyʼa hag̃ua avei péicha rejapóvo pyʼỹive nde prekursorádo? Epensamína mbaʼéichapa oñeñandu pe kristiáno oñemeʼẽmbaitéva Ñandejára servísiope. Katuete ovyʼaiterei omohuʼãvo káda día, ha heʼi Jehovápe: “Ko árape ajapo ikatúva guive roservi porã hag̃ua”.

15. ¿Mbaʼéichapa umi kristiáno imitãva ohechavaʼerã umi estúdio?

¹⁵ Oiméramo nemitã gueteri ha remohuʼãmbotaitéma nde koléhio, avei neresãi ha saʼi ne kompromíso, ¿repensa porãpa ikatúne hag̃ua rejapo nde prekursorádo rregulár? Umi mboʼehára opensa iporãvetaha resegíramo umi estúdio ijyvatevéva ha oiko ndehegui peteĩ tapicha iñimportánteva ko múndope. Haʼekuéra ningo ojerovia umi mbaʼe opa reítavare, pór ehémplo ko múndore ha pláta rehe. Péro rembaʼapo meméramo Jehová servísiope, nereñehaʼãreimoʼãi ha rehupytýta umi mbaʼe ndopamoʼãiva. Avei upéicha resegitareína Jesús ehémplo. Rejapóramo koʼã mbaʼe revyʼaitereíta, rejehekýita heta pelígrogui ha rehechaukáta rekumpliha ne kompromíso Jehovándi (Mat. 6:19-21; 1 Tim. 6:9-12).

16, 17. ¿Mbaʼépa ñañeporanduvaʼerã opavave kristiáno?

¹⁶ Heta kristiáno ombaʼapoiterei omantene hag̃ua ifamília. Péro oĩ avei ikatúva ombaʼapo saʼimie (1 Tim. 6:8). Ko múndo oipota jaguerovia ñaikotevẽtereiha umi mbaʼe ojefavrikáva térã osẽ pyahúva. Péro umi kristiáno tee ndohejái ko  múndo oĩva Satanás poguýpe odesidi mbaʼépa iñimportantevevaʼerã chupekuéra g̃uarã (1 Juan 2:15-17). ¿Ha mbaʼépa ikatu jaʼe umi ermáno ojehuvilavaʼekuére? ¿Ikatúpa oservi Jehovápe de tiémpo kompléto? ¡Ajépa ojapo porãitéta omotenondéramo Ñandejára servísio!

¹⁷ Opavave jajevautisamavaʼekue ñañeporanduvaʼerã: “¿Mbaʼépa amotenondeve che rekovépe? ¿Ahechaukápa iñimportanteveha chéve g̃uarã Ñandejára servísio? ¿Amboykéntepa umi komodida, Jesús ojapo haguéicha? ¿Asegípa umi konsého omeʼẽvaʼekue ha aiko haʼe oiko haguéicha? ¿Ikatúpa amohenda porã che tiémpo apredikave térã ajapo hag̃ua hetave mbaʼe Ñandejárape g̃uarã? Ndaikatúiramo jepe koʼág̃a aservi de tiémpo kompléto, ¿ahechaukápa ajapoha ikatúva guive Jehová servísiope?”.

‘PEIPOTÁKENA PE IPORÃVA PEMOG̃UAHẼ HAG̃UA HUʼÃME’

18, 19. ¿Mbaʼe rehépa ikatu reñemboʼe Jehovápe, ha mbaʼérepa upéva ombovyʼáta chupe?

¹⁸ Javyʼaiterei jahecha jave ñane ermanokuéra kyreʼỹme oserviha Ñandejárape. Upéicharõ jepe, oĩ kristiáno ikatúva ojapo iprekursorádo péro oimoʼã ndaikatupyryiha térã ndojaposeguasúi (Éxo. 4:10; Jer. 1:6). ¿Mbaʼépa ikatu rejapo oiméramo repensa upéicha? Reñemboʼevaʼerã Jehovápe ha remombeʼu chupe mbaʼéichapa reñeñandu. Pablo ohaivaʼekue umi kristiáno Filiposguápe: ‘Ñandejára voi niko pendeporiahuverekógui penepytyvõ peipota hag̃ua pe iporãva, ha penepytyvõta pemog̃uahẽ hag̃ua huʼãme’ (Fili. 2:13). Upéicharõ, oiméramo nanekyreʼỹguasúi rembaʼapove hag̃ua Jehová servísiope, ejerure chupe tanemokyreʼỹ ha tanembokatupyry upearã (2 Ped. 3:9, 11).

¹⁹ Noé, Moisés, Jeremías, Pablo ha Jesús ohechaukavaʼekue ojeroviaitereiha. Oiporu hikuái itiémpo ha imbaretekue omombeʼu hag̃ua Ñandejára okastigataha umi hénte añáme ha ndohejái mbaʼeve ohesarea chupekuéra. Koʼág̃a ningo hiʼag̃uimbaitéma ko múndo ára paha, upévare entéro ñañemeʼẽmavaʼekue Jehovápe, ñañehaʼãmbaitevaʼerã jasegi koʼã kuimbaʼe ojeroviaitevaʼekue ehémplo (Mat. 24:42; 2 Tim. 2:15). Péicha Jehová ñandeguerohorýta ha jahupytýta chugui heta mbaʼe porã (elee Malaquías 3:10).

[Nóta]

[Porandu ñahesaʼỹijóva]

[Nóta oĩva taʼanga ndive páhina 21]

Umi hénte nohendúi Noépe opredikárõ guare chupekuéra

[Nóta oĩva taʼanga ndive páhina 24]

¿Repensámapa ikatuha rejapo nde prekursorádo rregulár?