“Egu uduna ese oiemu kara maoromaoro do ia herevalaia, bona oiemu hamauria kara danu, be nega ibounai do lau gwauraia hedinarai.”​—⁠SAL. 71:15.

EDENA BAMONA DO OI HAERE?

Dahaka dainai Noa, Mose, Ieremia, bona Paulo be edia hesiai gaukara idia atoa guna?

Oi ura karaia gaudia oi abia hidi totona, dahaka ese oi ia durua diba?

Dahaka dainai oi ura Iehova ena hesiai gaukara oi atoa guna?

1, 2. (a) Ta be ena mauri Iehova dekenai ia gwauhamatalaia neganai, dahaka ia hahedinaraia? (b) Edena dala ai Noa, Mose, Ieremia bona Paulo edia haheitalai ese ita idia durua?

 DIRAVA dekenai emu mauri oi gwauhamatalaia, oi bapatiso bona Iesu murinai oi raka neganai, oi be mai anina bada abia hidi oi karaia unai. Hegeregere, Iehova dekenai oi gwau: ‘Lau ura oi ese lau oi Biagua. Lau be oiemu hesiai tauna. Mani lau oi hadibaia edena bamona egu nega do lau gaukaralaia, dahaka gaudia do lau atoa guna, bona edena dala ai egu diba bona kohu do lau gaukaralaia.’

² Bema oi be bapatiso Keristani tauna, oi be Iehova dekenai unai gwauhamata oi karaia vadaeni. Unai be abia hidi namona, bona unai oi karaia be aonega karana. Iehova be emu Biaguna ai oi halaoa dainai, emu nega be edena bamona oi gaukaralaia? Noa, Mose, Ieremia bona aposetolo Paulo edia haheitalai ese ita do ia durua, eda gwauhamata ita laloa namonamo totona. Idia be mai edia kudouna ibounai ida Iehova idia hesiai henia. Iseda nega be edia nega hegeregerena. Edia abia hidi amo idia hahedinaraia edena gaudia idia laloa bada, bona unai ese ita ia durua eda nega ita gaukaralaia namonamo totona.​—⁠Mat. 28:19, 20; 2 Tim. 3:1.

ABATA BE DO LASI NEGANAI

3. Edena dala ai iseda nega be Noa ena nega hegeregerena?

³ Iesu ese iseda nega be Noa ena nega ida ia hahegeregerea. Ia gwau: “Noa ena nega hegeregerena, taunimanima ena Natuna ena noho negana danu be unai bamona. . . . Idia aniani, idia inuinu, idia headava noho ela bona Noa be lagatoi lalonai ia vareai dinana. Bona idia laloa lasi ela bona Abata ia mai bona idia ibounai ia abia lao.” (Mat. 24:37-39) Hari, momo idia ura lasi Dirava ena hesiai taudia edia hadibaia herevadia idia  kamonai. Ena be nega dokonai ita noho, to momo be unai idia abia dae lasi. Noa ena nega bamona, hari momo idia laloa Dirava ese kara dika taudia do ia hadikaia lasi bona unai hereva idia kirikirilaia! (2 Pet. 3:3-7) To, ena be taunimanima idia kamonai lasi, Noa be edena dala ai ena nega ia gaukaralaia?

4. Iehova ese Noa dekenai gaukara badana ta ia henia murinai, Noa ese edena bamona ena nega ia gaukaralaia? Dahaka dainai unai bamona ia karaia?

⁴ Dirava ese Noa ia hamaoroa ia ese kara dika taudia ibounai do ia haorea, bona Noa dekenai gaukara badana ta ia henia. Noa ese lagatoi badana ta ia karaia taunimanima bona animal hamauria totona. (Gen. 6:13, 14, 22) Danu, ia ese Iehova do ia karaia gauna ia harorolaia. Unai dainai aposetolo Petero ia gwau, Noa be “kara maoromaoro ia harorolaia tauna.” Unai amo ita diba Noa ia gaukara goada taunimanima ia hadibaia edia kara idia haidaua haraga totona, badina Dirava ese abata do ia mailaia. (2 Petero 2:5 duahia.) Bema Noa bona ena famili be edia nega idia gaukaralaia bisinesi badana ta idia haginia, bona taga taudia ai idia lao, unai be aonega karana, a? Lasi, ani? Idia diba Iehova ese unai tanobada do ia hadikaia ore dainai, edia hesiai gaukara idia hadikaia diba gaudia idia dadaraia vaitani.

AIGUPITO ENA LOHIA TAUNA TA

5, 6. (a) Dahaka dainai Mose dekenai “Aigupito taudia edia aonega ibounai” idia hadibaia? (b) Dahaka dainai Mose ia ura lasi Aigupito ena lohia tauna ta ai ia lao?

⁵ Hari ita ese Mose ena haheitalai do ita herevalaia. Ia be Farao ena natuna kekeni ese ia ubua bona Farao ena ruma ai ia noho. Ia dekenai “Aigupito taudia edia aonega ibounai” idia hadibaia. (Kara 7:22; Eso. 2:9, 10) Unai amo gabeai ia be Farao ena gavamani goadana ai dagi badana ta ia abia diba. Bona gau namodia momo bona hahenamo idauidau ia moalelaia diba. To, Mose be unai gaudia ia laloa bada, a?

⁶ Mose ia do maragi neganai, iena tama sina korikoridia ese ia dekenai Iehova ena dala idia hadibaia. Unai dainai, Iehova ese Aberahamo, Isako bona Iakobo dekenai ia karaia gwauhamatana ia diba bona ia abidadama henia. Reana ena mauri lalonai do ia karaia gaudia bona Iehova do ia badinaia dalana ia lalohadailaia. Mose be Aigupito ena lohia tauna ta eiava Israela hesiai tauna ai do ia lao, a? Mose be edena ia abia hidi? Ia be “ena lalona ia hadaia Dirava ena taunimanima ida hisihisi ia abia hebou, to kara dika ena moale, nega sisina do ia noho gauna ia ura henia lasi.” (Heberu 11:24-26 duahia.) Oibe, iena mauri ia gaukaralaia Iehova ena ura ia karaia totona. (Eso. 3:2, 6-10) Dahaka dainai unai bamona ia karaia? Badina Iehova ena gwauhamata ia abidadama henia, bona ia diba Aigupito amo do ia abia hahenamo be do idia noho daudau lasi. Unai be lalohadai maorona. Daudau lasi murinai Iehova ese hisihisi 10 amo Aigupito taudia  ia panisia. Hari, bapatiso Keristani taudia ibounai ese Mose ena haheitalai idia laloa be namo. Namona be Iehova bona iena hesiai gaukara ita atoa guna, bona tanobada ena moni gaukara bona kohu namodia ita tahua lasi.

IEREMIA IA DIBA DAHAKA DO IA VARA

7. Edena dala ai Ieremia ena nega be iseda nega bamona?

⁷ Peroveta tauna Ieremia danu be Iehova ena hesiai gaukara ia atoa guna. Ia be Iehova ese ia abia hidi peroveta tauna bona ia dekenai gaukara badana ta ia henia. Ierusalema bona Iuda hanua taudia be dirava koikoidia idia tomadiho henia dainai, Iehova ese do ia hahemaoro henidia herevana be Ieremia ese ia harorolaia. Ieremia ena nega be iseda nega bamona. Ia be “dina gabedia ai” ia noho. (Ier. 23:19, 20, BHğ) Ia diba ena negai idia noho taudia be kahirakahira Dirava ese do ia hadikaia ore.

8, 9. (a) Dahaka dainai Dirava ese Baruku ia sisiba henia? (b) Palani ita karaia neganai, dahaka ita laloatao be namo?

⁸ Ieremia be Dirava ia abidadama henia dainai, dahaka ia karaia? Ia ura lasi unai nega ai mauri namona ia tahua, badina ia diba kahirakahira Dirava ese dika do ia mailaia. To, Baruku, Ieremia ena seketere ena lalohadai be idau. Unai dainai, Dirava ese Ieremia amo Baruku ia sisiba henia, ia gwau: “Lau Lohiabada ese lau haginia vadaeni gauna lau veria diho noho, bona lau ese lau hadoa gauna be lau kokia noho. Inai bamona do lau karaia inai tano ena kahana ibounai dekenai. To oi ese gau namo herea, oi sibona totona, oi tahua noho, a? . . . Inai bamona tahua kara do oi karaia lasi, badina be lau ese taunimanima ibounai dekenai dika do lau havaraia.” To, Iehova be Baruku dekenai ia gwauhamata, Ierusalema idia hadikaia neganai ia do ia hamauria.​—⁠Ier. 45:4, 5.

⁹ Ita diba lasi Baruku be dahaka “gau namo herea” ia ura henia. a To, ita diba unai gaudia be do idia noho daudau lasi. Lagani 607 B.C.E. ai, Babulonia ese Ierusalema ia hadikaia neganai, unai gaudia ibounai idia ore. Unai amo dahaka ita dibaia? Hari inai negai, tauanina durua gaudia ita abia totona palani ita karaia bona ita gaukara be namo. (Aon. 6:6-11) To, iseda nega bona goada be do idia noho daudau lasi gaudia dekenai ita haorea be aonega karana, a? Momokani, Iehova ena orea be Kingdom Hall, brens opesi bona gaukara badadia ma haida totona palani idia karaia noho. Bona ita diba unai palani be Basileia durua gaukaradia totona idia karaia. Unai dainai, Iehova ena hesiai taudia be palani idia karaia neganai, namona be Dirava ena Basileia be edia mauri lalonai idia atoa guna. Oi be Iehova ena Basileia bona ena kara maoromaoro oi tahua guna, a?​—⁠Mat. 6:33.

IA LALOA UNAI GAUDIA BE “MOMORU SIBONA”

10, 11. (a) Paulo be Keristani tauna ai ia do lao lasi neganai, dahaka gaudia ia laloa bada? (b) Dahaka dainai ia laloa bada gaudia ia haidaua?

¹⁰ Hari aposetolo Paulo ena haheitalai do ita herevalaia. Keristani tauna ai ia do lao lasi neganai, taunimanima idia laloa ia be gaukara badana ta do ia karaia. Ladana bada hadibaia tauna ta ese Paulo dekenai Iuda taudia edia taravatu ia hadibaia. Iuda tomadiho ena hahelaga tau ta be Paulo ia ura henia bona gaukara badana ta ia henia. Iuda tomadihona lalonai iena ladana be bada bona ena mauri lagani tamona taudia ia hereaia. (Kara 9:1, 2; 22:3; 26:10; Gal. 1:13, 14) To, gabeai Paulo ia laloparara Iehova ese Iuda besena ia dadaraia neganai, ena mauri ia haidaua momokani.

 ¹¹ Paulo ia diba Iehova ena matanai, Iuda tomadihona lalonai ladana bada abia karana be anina lasi. Badina Iuda besena be do ia noho daudau lasi. (Mat. 24:2) Paulo be Iehova ena ura ia lalopararalaia, bona ia diba haroro gaukara be hahenamo badana. Danu, ia gwau guna ia laloa bada gaudia be “momoru sibona.” Paulo be Iuda tomadihona ia rakatania bona iena mauri ibounai lalonai sivarai namona ia harorolaia.​—⁠Filipi 3:4-8, 15 duahia; Kara 9:15.

MAI ANINA BADA GAUDIA LALOA NAMONAMO

12. Iesu ia bapatiso murinai, edena gaukara ia atoa guna?

¹² Noa, Mose, Ieremia, Paulo, bona ma haida be edia nega bona goada idia gaukaralaia Iehova idia hesiai henia totona. Edia haheitalai ita tohotohoa be namo. Momokani, Iesu be Iehova ena hesiai taudia ibounai ese idia tohotohoa diba haheitalai hereadaena. (1 Pet. 2:21) Iesu ia bapatiso murinai, iena mauri ia gaukaralaia sivarai namona ia harorolaia bona Iehova ladana ia hanamoa. Unai dainai, idia bapatiso bona Iehova be edia Biaguna ai idia halaoa Keristani taudia ibounai, ese Iesu ena haheitalai idia tohotohoa be namo. Oi be Iehova ena hesiai gaukara oi atoa guna, a? Edena dala ai eda hesiai gaukara ita habadaia bona maduna ma haida ita huaia diba?​—⁠Salamo 71:15; 145:2 duahia.

13, 14. (a) Keristani taudia ibounai be dahaka idia gurigurilaia be namo? (b) Dahaka dainai Dirava ena taunimanima idia moale?

¹³ Lagani momo lalonai, Iehova ena orea ese Keristani taudia ia hagoadaia namona be palani idia karaia idia painia totona, bona unai idia gurigurilaia. To, Iehova ena hesiai taudia haida be idia hegeregere lasi hua ta ta ai hora 70 idia haroro totona. Namona be unai idia lalohisihisilaia lasi. (1 Tim. 5:8) To, oi be edena bamona? Painia gaukara oi karaia diba, a?

¹⁴ Inai lagani ena Memorial negana ai Dirava ena hesiai taudia momo be idia moale. March lalonai heduru painia taudia be hora 30 o 50 idia hagugurua. (Sal. 110:3) Oibe, tadikaka taihu milioni momo be heduru painia gaukara idia karaia, bona kongrigeisen ibounai idia moale bada. Oiemu sediual oi haidaua diba, unai amo hua momo lalonai heduru painia gaukara oi karaia diba, a? Bapatiso Keristani tauna ia painia neganai, dina ta ta ena dokonai mai moale ida ia gwau diba, “Iehova, egu goada ibounai lau henia emu hesiai gaukara lau karaia totona.”

15. Matamata Keristani ta be ia do sikuli noho lalonai dahaka gaudia ia laloa diba?

¹⁵ Reana oi be matamata Keristani ta bona kahirakahira haisikuli do oi haorea, emu tauanina be ia goada bona emu maduna be momo lasi. Regula painia gaukara oi lalohadailaia vadaeni, a? Reana emu tisa taudia idia gwau koledi o iunivesiti oi lao be namo. Idia be taunimanima edia orea idauidau bona moni idia abidadama henia. To, unai gaudia be do idia noho daudau lasi. Bema oi be Iehova ena hesiai gaukara oi karaia, emu nega oi gaukaralaia namonamo unai, bona mauri hanaihanai do oi abia. Oi be Iesu ena haheitalai hereadaena oi tohotohoa unai. Unai be abia hidi maorona bona do oi moale. Iehova ena hesiai gaukara ese oi do ia gimaia. Danu unai ese ia hahedinaraia oi ura lasi gau ta ese Iehova dekenai oi karaia gwauhamatana ia hadikaia.​—⁠Mat. 6:19-21; 1 Tim. 6:9-12.

16, 17. Keristani taudia ese edena henanadai idia lalodia be namo?

¹⁶ Dirava ena hesiai taudia momo be moni gaukara ai hora momo idia halusia, badina idia ura tauanina dalanai edia ruma bese idia naria. To, haida be moni gaukara dekenai hora bada idia haorea kava.  (1 Tim. 6:8) Bisinesi oreadia be iseda lalona idia veria kohu momo ita hoia totona, badina idia gwau bema ita hoia lasi do ita moale lasi. To, Keristani taudia idia ura lasi, Satani bona ena tanobada ese idia totona abia hidi idia karaia. (1 Ioa. 2:15-17) To, idia ritaea taudia be edena bamona? Edia nega idia gaukaralaia namonamo totona, idia painia bona Iehova ena hesiai gaukara idia atoa guna be namo.

¹⁷ Iehova ena hesiai taudia be sibona idia nanadaia diba: Egu mauri lalonai dahaka gaudia be mai anina bada? Iehova ena hesiai gaukara lau atoa guna, a? Iesu lau tohotohoa bona lau hahedinaraia egu nega bona goada lau gaukaralaia Dirava lau hesiai henia totona, a? Iesu ena hereva lau kamonai bona lau badinaia noho, a? Egu sediual lau haidaua diba, unai amo egu haroro horadia lau habadaia bona hesiai gaukara ma haida lau karaia diba, a? Bema hari unai lau karaia diba lasi, to dala ma haida ai egu nega bona goada lau gaukaralaia Iehova lau hesiai henia totona, a?

‘EMUI URA IA HAGOADAIA, IENA URA UMUI KARAIA TOTONA’

18, 19. Dahaka totona oi guriguri diba? Dahaka dainai unai ese Iehova do ia hamoalea?

¹⁸ Dirava ena taunimanima ese edia hesiai gaukara idia goadalaia, bona unai ita itaia be moale gauna. To, haida idia ura lasi idia painia, eiava idia laloa edia diba be hegeregere lasi. (Eso. 4:10; Ier. 1:6) Bema unai bamona oi laloa, dahaka oi karaia be namo? Heduru totona Iehova oi guriguri henia. Paulo ia gwau Iehova ia ‘ura oi ia hagoadaia, ia ura henia gaudia ibounai oi karaia totona.’ (Fili. 2:13) Bema oi mamia oi ura lasi emu haroro gaukara oi hanamoa, namona be Iehova oi guriguri henia emu ura do ia habadaia bona oi dekenai diba do ia henia.​—⁠2 Pet. 3:9, 11.

¹⁹ Noa, Mose, Ieremia, Paulo, bona Iesu be abidadama taudia. Edia nega bona goada idia gaukaralaia Iehova ena hadibaia herevadia idia harorolaia totona. Idia ura lasi gau ta ese edia hesiai gaukara ia hadikaia. Inai tanobada ena dokona be kahirakahira momokani. Unai dainai, namona be Dirava dekenai iseda mauri ita gwauhamatalaia taudia ibounai ita gaukara goada, Baibel ena haheitalai namodia ita tohotohoa totona. (Mat. 24:42; 2 Tim. 2:15) Unai ita karaia neganai, Iehova do ita hamoalea bona ia ese ita do ia hanamoa.​—⁠Malaki 3:10 duahia.

[Footnote]

[Study Questions]

[Picture on page 21]

Taunimanima be Noa ena haroro herevana idia kamonai lasi

[Picture on page 24]

Regula painia gaukara oi lalohadailaia vadaeni, a?