Apay nga Iyun-una ti Panagserbi ken Jehova?

“Ti bukodko a ngiwat ibinsabinsananto ti kinalintegmo, iti intero nga agmalem ti panangisalakanmo.”​—SAL. 71:15.

ANIA TI SUNGBATMO?

Ania ti nakaipamaysaan ti biag da Noe, Moises, Jeremias, ken Pablo?

Ania dagiti isaludsodmo iti bagim tapno matingitingmo ti rumbeng a pangusaram iti biagmo?

Apay a determinadoka a mangyun-una iti panagserbi ken Jehova?

1, 2. (a) Ania ti kaipapanan ti panangidedikar ti maysa iti bagina ken Jehova? (b) Kasano a mabenepisiarantayo iti panangusigtayo iti desision da Noe, Moises, Jeremias, ken Pablo?

NAGPATEG ti inaramidmo idi nagdedikarka iti Dios ken nagpabautisarka kas pasurot ni Jesus. Ti panagdedikarmo ti kapatgan a desision a maaramidam. Arigna nga ibagbagam: ‘Apo Jehova, sika ti kayatko a pagserbian iti intero a biagko. Adipennak. Iwanwannak koma no kasanok nga usaren ti tiempok, no ania ti masapul nga iyun-unak, ken no kasanok nga usaren ti abilidadko ken ti bambanag nga adda kaniak.’

² No dedikadoka a Kristiano, dayta ti inkarim ken Jehova. Makomendaranka iti dayta a desisionmo ta dayta ti umiso ken nainsiriban nga aramidem. Ngem no ni Jehova ti bigbigem nga Apo, kasanom a paneknekan dayta iti wagas a panangusarmo iti tiempom? Matulongantayo a mangsungbat iti dayta a saludsod babaen ti panangusigtayo iti ulidan da Noe, Moises, Jeremias, ken apostol Pablo. Inaramidda ti amin a kabaelanda nga agserbi ken Jehova. Umasping ti kasasaadda iti agdama a kasasaadtayo. Isu a tingitingentayo koma ti pangus-usarantayo iti tiempotayo bayat nga us-usigentayo ti bambanag nga inyun-unada.​—Mat. 28:19, 20; 2 Tim. 3:1.

SAKBAY TI LAYUS

3. Kasano nga umasping ti kasasaadtayo idi kaaldawan ni Noe?

³ Inyasping ni Jesus ti panawen ni Noe iti kaaldawantayo. Kinunana: “Kas idi kaaldawan ni Noe, kastanto ti kaadda ti Anak ti tao . . . Mangmangan ken umin-inumda, mangas-asawa dagiti lallaki ken mayas-asawa dagiti babbai, agingga iti aldaw a simrek ni Noe iti daong; ket saanda a nangikankano agingga nga immay ti layus ket  inyanudna amin ida.” (Mat. 24:37-39) Awan bibiang ti kaaduan a tattao ita iti kinaganat ti tiempotayo ken dida ikankano dagiti pakdaar nga ipakpakaammo dagiti adipen ti Dios. Kas idi kaaldawan ni Noe, adu ita ti manglalais iti iwarwaragawagtayo a panangdadael ti Dios kadagiti nadangkes a tattao. (2 Ped. 3:3-7) Ngem kasano nga inusar ni Noe ti tiempona uray no di inkankano dagiti tattao ti pakdaarna?

4. Ania ti nangusaran ni Noe iti tiempona idi inikkan ni Jehova iti annongen, ken apay?

⁴ Idi impakaammo ti Dios ti panggepna ken inikkanna ni Noe iti annongen, nangibangon ni Noe iti daong a mangispal iti tattao ken an-animal. (Gen. 6:13, 14, 22) Impakaammo met ni Noe ti asideg idin a panangukom ni Jehova. Ni apostol Pedro inawaganna ni Noe kas “manangaskasaba iti kinalinteg,” a mangipasimudaag nga inkagumaan ni Noe a tulongan dagiti kaarrubana a mangbigbig nga agpegpeggad ti biagda. (Basaen ti 2 Pedro 2:5.) Panagkunam nainsiriban ngata nga irugi ni Noe ken ti pamiliana ti agnegosio, makikompetensia kadagiti kapanawenanda, wenno agsapul iti nanam-ay a biag? Siempre saan! Liniklikanda dagita a pakasingaan ta ammoda ti asidegen a mapasamak.

TI PILI TI EGIPCIO A PRINSIPE

5, 6. (a) Ania ti mabalin a nakairantaan ti pannakaedukar ni Moises idiay Egipto? (b) Apay a saan a pinili ni Moises ti agtalinaed kas prinsipe ti Egipto?

⁵ Sumaganad nga usigentayo ti ulidan ni Moises. Napadakkel iti palasio ti Egipto kas ampon ti anak a babai ni Faraon. Kas ubing pay a prinsipe, naedukaran iti “kinasirib dagiti taga Egipto.” (Ara. 7:22; Ex. 2:9, 10) Mabalin a nairanta daytoy nga edukasion tapno maisagana iti annongenna kas opisial iti palasio ni Faraon. Adda koma gundawayna nga agbalin a prominente iti kabilgan a turay idi kaaldawanna, ken agpapas kadagiti ragragsak ken adu a pagnam-ayan agraman natan-ok a saad. Ngem dagita kadi ti napateg ken Moises?

⁶ Gapu iti panangisuro kenkuana dagiti pudpudno a nagannakna idi ubing pay, mabalin nga ammo ni Moises ti kari ni Jehova kadagiti inapona a da Abraham, Isaac, ken Jacob. Namati ni Moises kadagidiay a kari. Pinampanunotna la ketdi ti masakbayanna ken no kasano a makapagtulnog ken Jehova. Ania ti pinilina idi dimtengen ti gundaway a masapul nga agdesision no itultuloyna ti saadna kas prinsipe ti Egipto wenno agbalin nga adipen nga Israelita? Pinili ni Moises ti “dakes a pannakatrato a kadua ti ili ti Dios imbes a maaddaan iti temporario a panangtagiragsak iti basol.” (Basaen ti Hebreo 11:24-26.) Idi agangay, nagtulnog iti panangiwanwan ni Jehova mainaig iti rumbeng a pangusaranna iti biagna. (Ex. 3:2, 6-10) Apay a kasta ti inaramid ni Moises? Agsipud ta mamati kadagiti kari ti Dios. Ammona nga awan ti masakbayanna iti Egipto. Iti kinapudnona, dandani idin didigraen ti Dios dayta a nasion babaen iti sangapulo a saplit. Ania ti maadaltayo iti dayta kas dedikado nga  adipen ni Jehova? Imbes nga ipangpangrunatayo ti sekular a trabahotayo wenno ti aniaman a pagragsakan iti daytoy a sistema ti bambanag, ipamaysatayo koma ti panunottayo ken Jehova ken iti panagserbi kenkuana.

AMMO NI JEREMIAS TI MAPASAMAK

7. Kasano nga umasping ti kasasaadtayo ita iti kaaldawan ni Jeremias?

⁷ Maysa pay ni propeta Jeremias kadagiti nangyun-una iti panagserbi ken Jehova. Dinutokan ni Jehova kas propetana ken imbilinna nga ipakaammona ti pannakaukom ti apostata a Jerusalem ken Juda. Maikuna nga agbibiag idi ni Jeremias iti “kamaudianan a paset dagiti aldaw.” (Jer. 23:19, 20) Ammona unay a din agbayag ti sistema a pagbibiaganna.

8, 9. (a) Apay a kasapulan a mailinteg ti panangmatmat ni Baruc? (b) Ania ti rumbeng nga ikabilangantayo no adda dagiti planotayo?

⁸ Ania ti determinasion ni Jeremias? Saan a nagtalek iti dayta a sistema a dandani idin madadael. Awan la ketdi ti naganabna no kasta ti inaramidna. Ngem idi damo, naiduma ti panangmatmat ni Baruc a sekretario ni Jeremias. Isu nga imbaga ti Dios ken Jeremias a kunaenna iti sekretariona: “Adtoy! Ti binangonko rebbaek, ket ti immulak parutek, uray pay ti mismo nga intero a daga. Ngem no maipapan kenka, agtultuloy nga isapsapulam ta bagim iti naindaklan a bambanag. Dika itultuloy ti agsapul. Ta adtoy mangipagtengak iti didigra iti isuamin a lasag, . . . ket itedkonto kenka ta kararuam kas maysa a samsam kadagiti amin a disso a papanam.”​—Jer. 45:4, 5.

⁹ Saantay nga ammo no ania a “naindaklan a bambanag” ti sapsapulen idi ni Baruc. * Ngem ammotayo a saan nga agpaut dagidiay a banag ta nagpatingga dagita idi nadadael ti Jerusalem gapu iti iraraut dagiti Babilonio idi 607 B.C.E. Ania ti maadaltayo iti dayta? Natural laeng a kasapulantayo ti agplano para iti pangalaantayo iti pagbiagtayo. (Prov. 6:6-11) Ngem nainsiriban kadi a busbosentayo ti adu a tiempo ken pigsatayo a manggun-od iti bambanag nga awan ti manayon a pategna? Pudno nga itultuloy ti organisasion ni Jehova ti agplano para iti pannakaibangon dagiti baro a Kingdom Hall, pasilidad ti sanga nga opisina, ken dadduma pay a nateokratikuan a proyekto. Ngem naiduma dagitoy a plano ta supsuportaranda ti Pagarian ti Dios. Kas dedikado nga ad-adipen ni Jehova, rumbeng laeng ngarud nga iyun-unatayo met ti interes ti Pagarian no adda dagiti planotayo nga aramiden. Talaga kadi a ‘sapsapulem nga umuna ti pagarian ken ti kinalinteg ni Jehova’?​—Mat. 6:33.

“IBILANGKO IDA KAS ADU A BASURA”

10, 11. (a) Ania ti nakaipamaysaan ti biag ni Pablo idi saan pay a Kristiano? (b) Apay a naan-anay a nagbaliw ti panangmatmat ni Pablo?

¹⁰ Ti maudi nga usigentayo isu ti ulidan ni Pablo. Sakbay a nagbalin a Kristiano, ik-ikutanna idin ti maibilbilang a naballigi a masakbayan. Inadalna ti linteg dagiti Judio babaen iti tulong ti maysa kadagiti kalatakan a mannursuro idi kaaldawanna. Adda autoridad nga inted kenkuana ti nangato a padi dagiti Judio. Ket naregregta idi ngem iti adu a kasadaranna no maipapan iti Judaismo. (Ara. 9:1, 2; 22:3; 26:10; Gal. 1:13, 14) Ngem nagbaliw amin dagita idi nabigbig ni Pablo nga awanen ti anamong ni Jehova iti nasion dagiti Judio.

¹¹ Nabigbig ni Pablo nga iti imatang ni Jehova, saan nga agpaut ken awan serserbi ti maysa a karera iti dayta a Judio a sistema. (Mat. 24:2) Naiduma itan ti panangmatmat daytoy a sigud a Fariseo. Imbilangnan kas “adu a basura” ti bambanag nga impagarupna  idi a napateg gapu ta naawatannan dagiti panggep ti Dios ken ti pribilehiona iti ministerio kas maysa a Kristiano. Tinallikudanna ti karerana iti Judaismo ken binusbosna ti nabatbati a tiempona ditoy daga tapno ikasabana ti naimbag a damag.​—Basaen ti Filipos 3:4-8, 15; Ara. 9:15.

USIGEM DAGITI IPANGPANGRUNAM

12. Ania ti nangipamaysaan ni Jesus iti tiempona kalpasan ti bautismona?

¹² Inusar da Noe, Moises, Jeremias, Pablo, ken adu a dadduma pay ti kaaduan a tiempo ken pigsada nga agserbi ken Jehova. Nagsayaatda nga ulidan kadatayo. Siempre, ni Jesus pay laeng ti kasayaatan nga ulidan dagiti dedikado nga adipen ni Jehova. (1 Ped. 2:21) Kalpasan ti bautismo ni Jesus, binusbosna ti nabatbati a panawenna ditoy daga a nangikasaba iti naimbag a damag ken nangidayaw ken Jehova. No bigbigbigen ti maysa a Kristiano ni Jehova kas Apona, natural laeng nga ipangpangrunana ti panagserbi iti Dios. Kasta met kadi kenka? Kasano a mayun-unam dagiti nateokratikuan nga aktibidad a dimo mabaybay-an ti dadduma pay a responsabilidadmo?​—Basaen ti Salmo 71:15; 145:2.

13, 14. (a) Ania ti maiparegta nga usigen ti amin a dedikado a Kristiano? (b) Ania a pannakapnek ti mabalin a tagiragsaken dagiti adipen ti Dios?

¹³ Iti adun a tawen, maulit-ulit nga iparparegta ti organisasion ni Jehova a nainkararagan nga usigen dagiti Kristiano no kabaelanda ti agpayunir. Ti dadduma a matalek nga adipen ni Jehova saanda a kabaelan a ragpaten ti 70 nga oras iti kada bulan gapu ta saan nga ipalubos ti kasasaadda. Dida koma maupay. (1 Tim. 5:8) Iti biangmo, talaga kadi a dimo kabaelan ti agpayunir?

¹⁴ Panunotem ti rag-o ti adu nga adipen ti Dios kabayatan ti panawen ti Memorial iti daytoy a tawen. Bayat ti espesial nga urnos iti Marso, mabalin dagiti auxiliary pioneer ti agpili no 30 wenno 50 nga oras ti ragpatenda iti ministerio. (Sal. 110:3) Minilion ti nag-auxiliary pioneer, ket nakadkadlaw ti napalalo a gagar ken rag-o ti adu a kongregasion. Posible ngata a mayurnosmo dagiti aktibidadmo tapno masansan a mariknam ti kasta a rag-o? Iti ngudo ti tunggal makapnek nga aldaw, maikuna ti maysa a dedikado a Kristiano, “Apo Jehova, inaramidko ti amin a kabaelak nga agserbi kenka.”

15. Ania koma ti kalat ti agtutubo a Kristiano no maipapan iti sekular nga edukasion?

¹⁵ No maysaka nga agtutubo a dandanin agturpos iti eskuelaan, mabalin a nasalun-atka ken awan ti adu a responsabilidadmo. Pinampanunotmo kadin no kabaelam ti ag-regular pioneer? Siempre, iparegta dagiti mannursuro iti eskuelaan a pagsayaatam no nangatngato ti adalmo ken no iplanom ti agtrabaho. Ngem agtaltalek dagitoy iti organisasion ti tao ken iti kuarta a saan a makaipaay iti natalged a masakbayan. Iti sabali a bangir, no iyun-unam ti nateokratikuan a karera, ragragpatem ti pudpudno a makapnek ken manayon a masakbayan. Sursurotem met ti perpekto nga ulidan ni Jesus. Mangyeg iti ragsak ken agserbi a proteksion ti kasta a nainsiriban a desision. Ipakpakitam met a determinadoka nga agbiag maitunos iti dedikasionmo ken Jehova.​—Mat. 6:19-21; 1 Tim. 6:9-12.

16, 17. Ania dagiti tumaud a saludsod maipapan iti sekular a trabaho ken dadduma pay nga aktibidad?

¹⁶ Adu nga adipen ti Dios ita ti agtartrabaho iti adu nga oras tapno maipaayda ti kangrunaan a kasapulan ti pamiliada. Ngem mabalin nga ad-adu pay nga oras ti busbusbosen ti dadduma. (1 Tim. 6:8) Ar-aramiden ti lubong ti komersio ti amin a kabaelanna tapno kombinsirennatayo a mamati a ditay agbiag no awan ti  adu a produktona ken ti tunggal mairuar a kabaruan a modelo ti tagilako. Ngem saan nga ipalubos dagiti pudno a Kristiano a ti lubong ni Satanas ti mangikeddeng iti prioridadda. (1 Juan 2:15-17) Para kadagiti nagretiron iti trabaho, ania koma pay ti nasaysayaat a pangusaranda iti tiempoda no di ti panagpayunir, kas panangyun-una iti panagserbida ken Jehova?

¹⁷ Mabalin nga isaludsod ti tunggal dedikado nga adipen ni Jehova: Ania ti kapatgan iti biagko? Iyun-unak kadi ti interes ti Pagarian? Tultuladek kadi ti kinamanagsakripisio ni Jesus? Ipangpangagko kadi ti balakad ni Jesus nga agtultuloy a surotek ti ulidanna? Mayurnosko kadi ti eskediulko tapno ad-adu ti tiempok a mangikasaba iti Pagarian ken iti dadduma pay a nateokratikuan nga aktibidad? Nupay saan nga ipalubos ita ti kasasaadko a mapalawak ti ministeriok, ikagkagumaak kadi nga usaren ti tiempo ken pigsak nga agserbi ken Jehova?

“AGTARIGAGAY KEN AGTIGNAYKAYO”

18, 19. Ania ti mabalinmo nga ikararag, ken apay a makaay-ayo ken Jehova ti kasta a kiddaw?

¹⁸ Makaparagsak a makita ti regta ti ili ti Dios. Ngem saan a pagesman ti dadduma ti agpayunir wenno ipagarupda a saanda a kabaelan dayta​—nupay ipalubos met ti kasasaadda. (Ex. 4:10; Jer. 1:6) Kasanon no kasta ti riknam? Saan ngata a nasayaat no ikararagmo dayta? Kinuna ni Pablo kadagiti padana a Kristiano a ni Jehova, “maigapu iti pakaragsakanna unay, agtigtignay kadakayo tapno agpadpada nga agtarigagay ken agtignaykayo.” (Fil. 2:13) No saanka nga agduyos a mangpalawa iti ministeriom, kiddawem ken Jehova nga ipaayannaka iti tarigagay ken tulongannaka tapno kabaelam dayta.​—2 Ped. 3:9, 11.

¹⁹ Agpapada a matalek da Noe, Moises, Jeremias, Pablo, ken Jesus. Inusarda ti tiempo ken pigsada a mangipakaammo iti pakdaar ni Jehova. Saanda a nagpasinga. Asidegen ti panagpatingga ti agdama a sistema ti bambanag. Gapuna, amintayo a nangidedikar iti biagna iti Dios siguraduentayo koma nga agtultuloytayo a mangaramid iti amin a kabaelantayo a mangsurot kadagitoy a nagsasayaat nga ulidan iti Biblia. (Mat. 24:42; 2 Tim. 2:15) No kasta ti aramidentayo, maay-ayotayo ni Jehova ken masagraptayo ti naruay a bendisionna.​—Basaen ti Malakias 3:10.

[Footnote]

[Salsaludsod]

[Ladawan iti panid 21]

Saan nga impangag dagiti tattao ti pakdaar ni Noe

[Ladawan iti panid 24]

Pinampanunotmo kadin no kabaelam ti agbalin a regular pioneer?