Jehovamut kiffartorneq pingaarnerpaassava?

“Qanerma nalunaajaatigissavaa iluarsutsit, annaassinerit ulloq tamaat.” — TUSSIAAT 71:15.

QANOQ AKISSAVIT?

Noap, Mosesip, Jeremiap Paulusillu inuunerminnik atuinerminnut suna aalajangiisuutippaat?

Illit inuuninnik qanoq atuinissannik suna aalajangiisuutippiuk?

Sooq Jehovamut kiffartornerpit pingaarnerpaatinnissaa aalajangiusimaviuk?

1, 2. (a) Jehovamut tunniulluinnarneq qanoq paasisariaqarpa? (b) Noamik, Mosesimik, Jeremiamik Paulusimillu oqaluttuat qanoq iluaqutigisinnaavavut?

GUUTIMUT tunniulluinnaravit Jiisusimullu ajoqersukkatut kuisikkavit inuuninni pingaaruteqarnerpaamik aalajangiivutit. Ima oqarputillusooq: ‘Jehova, kissaatigaara sutigut tamatigut uannut Naalagaassasutit. Ilinnut kiffaavunga. Piffissara qanoq atussaneriga, suut pingaarnerutissanerikka aamma piginnaanikka pigisakkalu sumut atussanerikka ilinnut aalajangertikkusuppakka.’

² Kristumiuuguit kuisimasoq taamatorpiaq Jehova neriorsorsimavat. Taamatut aalajangiisimanerit eqqortuullunilu silatusaarneruvoq. Taavami maanna Jehova Naalakkattut akuerereerakku piffissat qanoq atortarpiuk? Apeqqutip tamatuma akiniarnerani Noamik, Mosesimik, Jeremiamik Paulusimillu oqaluttuat iluaqutigisinnaavavut. Angutit taakku tamarmik uummatikkut iluunngarlutik Jehova kiffartorfigaat. Pissutsit atukkavut taakkua atugaannut assingupput. Inuunerminni sunik pingaarnerpaatitsiniarnerlutik aalajangiinerannik misissuineq uagut sumik pingaarnerpaatitsinitsinnik misissuinissamut kajumississutigissavarput. — Matthæusi 28:19, 20; 2 Timotheusi 3:1.

ULERSUAQ SIOQQULLUGU

3. Nalerput Noap nalaanut qanoq assingua?

³ Jiisusip Noap nalaa uagullu nalerput assigiissuteqarnerarpai, ima oqarluni: “Soorlumi Noap ulluini ittoq, taamatuttaaq Inuup Ernerata tikiuffissaa ikkumaarpoq. . . . Nerillutik imerlutillu nuliartaarlutillu uinitsitsisarput ulloq Noap umiarsuarmut ikiffia tikillugu; aatsaallu paasisaqalerput ulersuaq nalliummat tamaasalu nungutillugit.” (Matthæusi 24:37-39)  Ullumikkut inuit amerlanersaasa piffissap inuuffigisatta nukinginnarnera sianiginngilaat. Mianersoqqussutit Guutip kiffaasa oqaluussissutigisaat soqutiginngilaat. Allaat Guutip inuit atugaannut akuliunnissaanik upperinnittut inuppassuarnit illaruaatigineqarput — Noap nalaanisorluinnaq. (2 Petrusi 3:3-7) Akeqqersimaartunik avatangiiseqaraluarluni Noap piffissani qanoq atorpaa?

4. Jehovamit immikkut ittumik suliassinneqareerluni Noap piffissani sumut atorpaa, aamma sooq?

⁴ Guutip inuit ajortut piuneerunniarlugit Noamut oqaluttuareriarlugu immikkut ittumik suliassippaa. Noa umiarsualiorpoq inuit uumasullu aniguiffissaannik. (1 Mosesi 6:13, 14, 22) Aamma Guutip qanoq iliorumaarnera oqaluussissutigaa. Apustilip Petrusip Noa ‘iluarnermik nalunaariartortitamik’ taavaa, tamatumannga erserpoq Noap inoqatini paasitinniarsarigai taakku qanoq ilungersunartorsiortigisut. (Atuaruk 2 Petrusi 2:5). Isumaqarpit Noa ilaquttanilu niuernermik ingerlataqalerniarneq, allanit iluatsitsineruniarneq pigisarpassuaqalerniarnerluunniit sukataarutigisimagaluarpassuk silatusaarsimassagaluartut? Soorunami naamik! Susoqassanersoq nalunnginnamikku allamut saasaarutaasinnaasut tamaasa ingalassimavaat.

EGYPTENIMI KUNNGIKKORMIUP AALAJANGIINERA

5, 6. (a) Mosesip ilinniartitaanini sumut piareersaatigisussaasimagunarpaa? (b) Sooq Mosesip Egyptenimiut neqeroorutaat itigartippai?

⁵ Maanna Mosesi sumik ilinniarfigisinnaaneripput misissoriartigu. Faraop paniata ernersiaatut Egyptenimi illussaarsuarmi peroriartorpoq kunngikkormiutullu “Egyptenimiut ilisimassusiannik tamanik ajoqersorneqarpoq”. (Apustilit Suliaat 7:22; 2 Mosesi 2:9, 10) Faraomut kiffartornermi atorfeqartussatut piareersarlugu Egyptenimiunit ilinniartinneqarpoq. Taamanikkut naalagaaffimmi pissaaneqarnerpaami nuimasuunngorsimasinnaagaluarpoq, pigisarpassuaqarluni immikkullu ataqqisaalluni. Tamakkuli Mosesip pingaartippai?

⁶ Mosesi meeraasoq angajoqqaavisa Jehova pillugu ilinniartippaat. Taamaattumik Jehovap Aaperaat, Iisaaq Jaakulu sumik neriorsorsimagai nalusimassanngilaa. Mosesip neriorsuutit tamakku upperai. Siunissani Jehovamullu qanoq ilumoorfiginnissinnaanerluni eqqarsaatigilluarsimassavai. Egyptenimi kunngikkormiutut inuussanerluni imaluunniit inussiatut Israelikkuusutut inuussanerluni aalajangertariaqalerami qanoq aalajangerpa? “Guutip innuttai naallioqatigiumanerungaarpai sivikitsuinnarmik ajortimi inuulluataarnissaminngarnit.” (Atuakkit Hebræerit 11:24-26). Kingusinnerusukkut Jehovap iluarisaatut inuunini atorpaa. (2 Mosesi 3:2, 6-10) Sooq taamaaliorpa? Taamaaliorpoq Guutip neriorsuutai upperigamigit nalunnginnamiullu Egyptenimi iluatsitsinerigaluit tamarmik killeqarumaartut. Ilumullumi sivitsunngitsoq Egypteni perlunnik qulinik aseruutaasunik eqqorneqarpoq. Jehovap  kiffai tunniulluinnarsimasut tamarmik Mosesi ilinniarfigisinnaavaat. Suliffigissaarneq nuannaarniutilluunniit silarsuup matuma neqeroorutigisinnaasai pingaarnerutinnagit Jehova taassumunngalu kiffartorneq pingaarnerpaatittariaqarpavut.

JEREMIAP SUSOQASSANERSOQ NALUNNGILAA

7. Pissutsit Jeremiap atugai uagut atukkatsinnut qanoq assinguppat?

⁷ Aamma pruffiitip Jeremiap Jehovamut kiffartorneq pingaarnerpaatippaa. Jehovap Jeremia Jerusalemimut Judamullu tunussisunut eqqartuussutip oqaluussissutiginissaanut piginnaatippaa. Oqartoqarsinnaavoq Jeremia “ullussani kingullerni” inuusoq. (Jeremia 23:19, 20, 1990) Nalunngilluinnarpaa innuttaaqatigiit inuuffigisani allanngorujussuarumaartut.

8, 9. (a) Sooq Barukip eqqarsartaasia naqqinneqartariaqarpa? (b) Pilersaarusioraangatta suna eqqaamasariaqarparput?

⁸ Upperilluinnakkani pissutigalugu Jeremiap suna kissaatiginngilaa? Innuttaaqatigiinni piuneerussaasussani siunissaqarnissani sulissutiginiarsarinngilaa. Taamaaliorsimasuuguni sianiilliorsimassagaluarpoq. Ilaannili Baruki, Jeremiap allatsia, kukkusumik eqqarsartaaseqalerpoq. Taamaattumik Guutip Jeremia Barukimut ima oqaqquaa: “Sanasimasakka piuneerukkumaarpakka ikkussukkakkalu nutsullugit. Nunami matumani tamarmi taamaaliortassaanga. Illit ujarpat angisooq. Taamaalioqinak! Uanga inuit tamaasa perlummik aallartitsivigissavakka.” Jehovalli Baruki neriorsorpaa Jerusalemi aserugaappat aniguissasoq. — Jeremia 45:4, 5.

⁹ Qulakkeerlugu ilisimanngilarput “angisooq” Barukip ujagaa suunersoq. * Nalunngilarpulli ujagaa taanna ataavartuunngitsoq. Jerusalemi 607-imi Kr.in.si. Babylonimiunit tiguarneqarpat piuneerutissaaq. Tamanna sumik ilinniutigisinnaavarput? Soorunami ullormut inuussutissaqarumalluta pilersaarusiortariaqarpugut. (Ussatit 6:6-11) Silatusaarnerussavali piujunnaartussanut piffissarujussuaq nukippassuillu atorutsigik? Ilumoorpoq Jehovap peqatigiiffiani nutaanik naalagaaffilersaarfinnik, immikkoortortaqarfinnik teokratiimullu tunngasunik allanik sanaartornissamik pilersaarusiortoqartuarmat. Pilersaarutilli taakkua Guutip naalagaaffiata soqutigisaanik siuarsaagamik siunissaqarput. Taamaattumik Jehovamut tunniulluinnarsimasut pilersaarusioraangamik Guutip naalagaaffia aamma pingaarnerpaatittariaqarpaat. Illit ‘Guutip naalagaaffia iluarneralu ujaqqaarpigit’? — Matthæusi 6:33.

‘PERLUKUTUT IGITASSAANNAATIPPAI’

10, 11. (a) Paulusip kristumiunngunngikkallarami suut ulapputigai? (b) Sooq Paulusi allarluinnarnik pingaartitaqalerpa?

¹⁰ Maanna Paulusimik oqaluttuaq sammissavarput. Taanna kristumiunngunngikkallarami atorfigissaartussaarpasippoq. Ilinniartitsisumit taamanikkut tusaamasaanerpaamit juutit inatsisaannik ilinniartinneqarpoq. Juutit palasiunerannit tatigisaalluni pingaarutilimmik suliassinneqarpoq. Naliminilu inuusorpassuarninngarnit juutiussussermi siumukarnerulluni. (Apustilit Suliaat 9:1, 2; 22:3; 26:10; Galatiamiut 1:13, 14) Paulusilli Jehovap juutit inuiattut isigalugit pilluaqqusarunnaarai paasigamiuk inuunermini allannguerujussuarpoq.

¹¹ Paulusip ilisimalerpaa juutit aaqqissuussaaneranni atorfeqarneq Jehovap isaani naleqanngitsuusoq; siunissaqanngitsuusoq. (Matthæusi 24:2) Guutip siunertai kristumiutullu oqaluussinerup  immikkut pisinnaatitaaffiunera paasivai. Allaammi siornatigut pingaartissimasani ‘perlukutut igitassaannaatippai’. Juutiussuseq qimallugu nunarsuarmi inuunermi sinnerani nutaarsiassaq nuannersoq oqaluussissutigaa. — Atuakkit Filippimiut 3:4-8, 15; Apustilit Suliaat 9:15.

SUUT PINGAARNERUTIPPIGIT?

12. Jiisusip kuisinnermi kingorna suna pingaarnerutippaa?

¹² Noap, Mosesip, Jeremiap, Paulusip allarpassuillu piffissamik nukimillu annerpaartaat Jehovamut kiffartornermut atorpaat. Taakku uagutsinnut maligassiuilluarput. Soorunami kristumiunut tunniulluinnarsimasunut maligassaalluarnerpaaq tassaavoq Jiisusi. (1 Petrusi 2:21) Jiisusip kuisinnermi kingorna nunami inuunermi sinnerani nutaarsiassaq nuannersoq oqaluussissutigaa Jehovamillu ataqqinartitsilluni. Ilinniarfissartaa erseqqippoq: Kristumiup Jehovamik Naalakkamisut akuerinnissimasup Jehovamut kiffartorneq pingaarnerpaatittariaqarpaa. Illit taamaaliorpit? Anguniakkat anersaakkut ittut anguniaatigalugit pisussaaffivut allat qanoq isumagisinnaavavut? — Atuakkit Tussiaat 71:15; 145:2.

13, 14. (a) Kristumiut tamarmik suna eqqarsaatigissagaat kajumissaarneqarpat? (b) Guutip innuttaasa suna nalerisimaarutigisinnaavaat?

¹³ Ukiorpassuarni Jehovap peqatigiiffiata kajumissaartuarpaatigut qinunikkut eqqarsaatigissagipput pioneritut kiffartulersinnaanersugut. Jehovap kiffaasa aalajaatsut ilaat assigiinngitsunik pissuteqarlutik qaammammut nalunaaquttap-akunneri 70-it oqaluussinermut atorsinnaasanngilaat. Tamanna ajuusaarutigissanngilaat. (1 Timotheusi 5:8) Illimmi? Pioneriusinnaavit?

¹⁴ Ukioq manna eqqaaniaalluni nalliuttorsiornissap tungaanut Guutip kiffaasa ilarpassuisa nuannaangaarnerat eqqarsaatigiuk. Marsip qaammataani ikiorti-pionerit immikkut ittumik aalajangersinnaatitaapput nalunaaquttap-akunneri 30-t 50-illuunniit atussanerlugit. (Tussiaat 110:3) Millionillit arlallit ikiorti-pioneriupput ilagiillu qiimmatsassimaangaarnerat malunnarpoq. Inuuninni allannguisinnaavit akulikinnerusumik ikiorti-pioneriusinnaalerlutit? Kristumiumut kuisimasumut ikiorti-pioneriusumut nalerisimaarnangaarpoq ullut tamaasa ima oqarsinnaaneq: “Jehova, ilinnut kiffartornermi sapinngisara tamaat iliuuseraara.”

15. Kristumiup inuusuttup ilinniagaqarnermut tunngatillugu suna anguniagarissavaa?

¹⁵ Kristumiuuguit inuusuttoq atuarunnaangajalersoq ilimanarpoq peqqissuullutillu ikittuinnarnik akisussaaffeqartutit. Pioneritut nalinginnaasutut kiffartorsinnaanerlutit pimoorullugu eqqarsaatiginikuuiuk? Qularutissaanngilaq atuarfimmi siunnersortit ilumoorlutik isumaqarmata ilinnut pitsaanerpaajussasoq qaffasissumik ilinniagaqaruit atorfigissaarnissarlu siunertarigukku. Isumaqarput innuttaaqatigiinni inissisimaneq aningaasatigullu isumannaatsuuneq pingaarnerpaajusut, taamaanngilarli. Jehovamulli kiffartornermi anguniagaqarneq ataavartumik nuannaarutaallunilu nalerisimaarnarpoq. Inooriaaseq tamanna siunissaqarpoq! Aamma Jiisusip maligassiuinera naammalluinnartoq ilaassavat. Nuannaarutigissavat illersuutigissallugulu tamatumanngalu ersersissavat tunniulluinnarnerit eqqortinniarlugu aalajangiusimagit. — Matthæusi 6:19-21; 1 Timotheusi 6:9-12.

16, 17. Jehovamut kiffartornermut tunngatillugu qanoq imminut aperisariaqarpugut?

¹⁶ Ullumikkut Guutip kiffaasa ilarpassui ilaquttamik pisariaqartitaat isumaginiarlugit sivisuumik sulisariaqartarput. Ilaalli sulivallaartarunarput. (1 Timotheusi 6:8)  Niuernerup silarsuaanit isumaqartinniarneqarpugut nioqqutissat sorpassuit atorfissaqartikkivut allaallumi nutaanerpaat pinngitsoorsinnaanngikkivut. Kristumiulli ilumoortut suna pingaarnerpaatissanerlugu Saatanip silarsuaanit aalajangertikkusunngilaat. (1 Johannesi 2:15-17) Suliunnaarsimasummi? Iliuuserisinnaasaannit pitsaanerpaaq tassaavoq Jehovamut kiffartornermik pingaarnerpaatitsineq pioneriunerlu.

¹⁷ Jehovap kiffai tunniulluinnarsimasut tamarmik imminut ima aperisariaqarput: Uanga inuuninni suna pingaarnerpaava? Guutip naalagaaffia salliutippara? Jiisusip imminut pilliutigeriaannaanera ilaarpara, malittuarparalu? Ullormut pilersaarutigisartakkakka allanngortissinnaavakka oqaluussineq sammisassallu teokratiimut tunngasut allat piffissaqarfiginerulerlugit? Maannakkut iliuuseqarnerusinnaanngikkaluarlunga imminut pilliutigeriaannaaneq sulissutigiuarpara?

‘PIUMASSUSEQARNEQ NAAMMASSISAQARNERLU’

18, 19. Suna qinnutigisinnaaviuk, aamma sooq Jehovap qinnut taamaattoq nuannaarutigissavaa?

¹⁸ Guutip kiffaasa aallussilluartuunerat takullugu nuannerpoq. Ilaasali immaqa pionerinngornissartik kissaatiginngilaat piukkunnanngitsutulluunniit misigipput — naak periarfissaqaraluarlutik. (2 Mosesi 4:10; Jeremia 1:6) Taavami? Jehovamut qinunikkut tamanna saqqummiunneqarsinnaavoq. Paulusi allappoq Jehovap ‘piumassuseqartittaraatigut naammassisaqartittarlutalu piumasani ajunngitsoq naapertorlugu’. (Filippimiut 2:13) Tassa pioneritut kiffartorusulernissaq piginnaaneqalernissarlu Jehovamut qinnutigisinnaavatit. — 2 Petrusi 3:9, 11.

¹⁹ Noa, Mosesi, Jeremia, Paulusi Jiisusilu tamarmik angutaapput tunniusimasut. Taakkua piffissartik nukitillu tusarliussanik pingaaruteqartunik Jehovameersunik oqaluussissutiginninnermut atorpaat. Sumilluunniit allamut saasartinngillat. Pissutsit aaqqissuussaanerat manna atuukkunnaangajaliivippoq; taamaattumik Jehovamut tunniulluinnarsimasuusugut sapinngisatsinnik qulakkeertariaqarparput maligassaalluartut Biibilimi oqaluttuarineqartut taakku ilaarnerlutigik. (Matthæusi 24:42; 2 Timotheusi 2:15) Taamaaliorutta Jehovamit iluarisaallutalu pilluaqqusaangaassaagut. — Atuaruk Malaki 3:10.

[Quppernerup ataani ilanngussaq]

[Atuaqqissaarnermi apeqqutit]

[Qupp. 22-mi assiliartaq]

Noap mianersoqqusinera soqutigineqanngilaq

[Qupp. 25-mi assiliartaq]

Pioneriusinnaaneq eqqarsaatigeqqissaarnikuuiuk?