Mukonda Diahi Tua Tokala ku ta ku Pholo o Sidivisu ia Jihova?

‘Dikanu diami di tanga jinga o ikanenu iê ni ku bhulula kuê.’ —JISÁ. 71:15.

KIEBHI KI UEJI TAMBUIJILA?

Ima iahi ia bhiti ku muenhu ua Noué, ua Mozé, ua Jelemiia, ni ua Phaulu?

Ihi ia-nda ku kuatekesa ku sola kiambote o ima ku muenhu?

Mukonda diahi eie ua mesena ku ta ku pholo o sidivisu ia Jihova?

1, 2. (a) Ihi ilombolola o muthu ku di bhakula kua Jihova? (b) Mabesá ahi u tu katula se tu xinganeka mu phangu ia Noué, Jelemiia ni Phaulu?

KIOSO kia-nda ku batizala phala ku kaiela Jezú, eie ua-nda bhanga o kima kia beta-kota. O ku di bhakula kua Nzambi, kiene o kima kia beta-kota ki tena ku bhanga o muthu. Kia difu kala ua mu zuela: ‘Jihova, nga mesena u kala Mesene iami ku muenhu uami uoso. Eme ngi selevende iê. Nga mesena u ngi longa kiebhi ki nga tokala o ku bhita o kithangana kiami, ihi i nga tokala ku dianga ku bhanga, ni kiebhi ki nga tokala o ku bhanga ni jimbote jami, ni uhete uami.’

² Se eie u Kidistá ua di bhakula kiá, íii iene i ua kanena kua Jihova. Eie ua-nda tambula mabesá mukonda dia ku sola ku bhanga kiki; o kima kia beta-kota ki ua bhange. Mu kuijiia kuila Jihova o Mesene iê, ihi iamba muéne ia lungu ni kiebhi ki ua tokala ku bhita o kithangana kiê? O phangu ia Noué ia Jelemiia ni poxolo Phaulu, i tena ku tu kuatekesa ku xinganeka kiambote o maka enhá. Ene akexile mu sidivila Jihova ni muxima uoso. Etu ué tuala kála ene. O ima ia dianga ku sola o ku bhanga ku mienhu iâ, i tu kuatekesa ku xinganeka kiebhi ki tua mu bhita o kithangana kietu.—Mat. 28:19, 20; 2 Tim. 3:1.

ANDE DIA KU BHITA O DILÚVIO

3. O kuila o izuua ietu ia difu ni izuua ia Noué?

³ Jezú ua sokesa o ima ia bhiti mu izuua ia Noué, ni ima iene mu bhita mu izuua ietu. Muéne uambe: ‘Uila kia kexile mu izuua ia Noué, ni kia kà tukuluka Mon’a Muthu ué kiene. Mbata kia kexile mu izuu’omo, kioso dilúvio kiluua diza, a kala mu kúdia, a  kala mu kúnua, ahatu ni mala a kala mu [kazala] a bhana mu [ukaza] katé kizuua kia bokona Noué mu álaka. Kejidile kima katé dilúvio dia menha ki dia tula di dia a kungulula ene oso.’ (Mat. 24:37-39) Athu avulu ku mundu lelu, ka mesena kuijiia o izulukutu ia-nda bhita ku hádia. Ene ka xikina o itendelesu ia bhana o jiselevende ja Jihova. A mukuá ka xikina kuila Nzambi ua-nda kuíza mu batula o maka oso ene mu ngongo—ene a bhanga kála kia kexile mu bhanga o athu mu izuua ia Noué. (2 Phe. 3:3-7) Sumbala ua kexile bhu kaxi ka athu enhá, ihi ia bhange Noué?

4. Ihi ia bhange Noué kioso kia tambula o kikalakalu kiê, ni mukonda diahi?

⁴ Kioso kia mu tangela Nzambi ihi ia-nda bhanga, ni kikalakalu kia tambula, Noué ua tungu álaka, phala ku bhulula o athu ni iama. (Dim. 6:13, 14, 22) Noué ua boko ué kuila Jihova ueji fundisa o mundu. O poxolo Phetele uambe kuila, Noué uexile “mujimbuidi ua maka maiuka.” (Tanga 2 Phetele 2:5.) O kuila Noué ni muiji uê, eji tena ku di tunda kiambote mu mauenji uâ, bhu kaxi ka athu mu izuua iê? Keji tena! Mu kuijiia o kizulukutu kieji kuíza, ene ka mesenene ku landuka ni ima íii.

IHI IA SOLO O MULAULA A SOBHA MU IJITU

5, 6. (a) O uhete ua tambula Mozé uexile phala ku bhanga ihi? (b) Mukonda diahi Mozé ua ditunu o fuma ieji tambula ku Ijitu?

⁵ Tua-nda di longa o phangu ia Mozé. Muéne a mu sase mu sabhalalu ia sobha mu Ijitu, kala mulaula ua Falaó. O munzangala iú a mu longo “unjimu uoso ua akua Ijitu.” (Ika. 7:22; Mak. 2:9, 10) A mu longo phala ku kala ni uhete kioso kieji tambula kikalakalu mu mbonge ia Falaó. Muéne ueji kala ni fuma mu unguvulu ua betele-kota mu izuua ienioió, ni fuma ioso ia ku kala mu kididi kiki. O kuila o fuma iene ia mesenene Mozé?

⁶ Mukonda dia ku mu longa ku jitata jê kioso kia kexile mona-ndenge, Mozé uejidile o ima ioso ia kanene Jihova ku akuku’ê, Mbalahamu, Izake, ni Jakobo. Mozé ua dielele mu ikanenu íii. Muéne nange ua xinganekene kiavulu mu ima ieji tambula kioso kieji kula, ni ufiiele uê kua Jihova. Kioso kia bhixila o kithangana kia ku sola, se u kala mon’a sobha, mba u kala mubhika, ihi ia solo? Mozé, ua solo-bho “o kutala hadi ni mundu ua Nzambi, kana o ku di uabhela muène mu jivondadi ja ituxi ji bhanga ngó kathangana.” (Tanga Jihebeleu 11:24-26.) Mu ku bhita kithangana, muéne ua belesela o itendelesu ia Jihova ia lungu ni kiebhi kia tokalele kuambata o muenhu uê. (Mak. 3:2, 6-10) Mukonda diahi Mozé ua belesela o itendelesu? Mukonda ua dielele mu ikanenu ia Nzambi. Mukonda ua mono kuila, ku Ijitu ki ku kexile kima kia valolo phala muéne. Mu kusuka-ku, Nzambi ua  bheka dikuinhi dia mabhebhu ku Ijitu. Ua tena ku mona o mabesá a tambula ió a di bhakula kua Jihova lelu? Mu veji dia ku suua mbambe ku ima ia mundu, tua tokala ku dielela kua Jihova, ni ku bhanga o sidivisu iê.

JELEMIIA UEJIDILE O IMA IEJI BHITA

7. Kiebhi kia di fuile o izuua ia Jelemiia, ni izuua ietu?

⁷ O muthu ua mukuá ua solo o ku ta ku pholo o sidivisu ia Jihova, o polofeta Jelemiia. Jihova ua tumina Jelemiia ku boka o njimbu ia kufundisa Jeluzaleme, ni Judeia akexile mu bhanga ubhezelu ua makutu. Jelemiia ua kexile ‘mu izuua ia sukidile-ku mu thembu iê.’ (Jel. 23:19, 20) Muéne uejidile kiambote kuila o mundu ua izuua iê ki ueji nangenena.

8, 9. (a) Mukonda diahi Mbaluke a tokele ku mu kuatekesa ku lungulula o ibanzelu iê? (b) Ihi i tua tokala ku xinganeka kioso ki tu mesena ku bhanga kima?

⁸ Ihi ia tambula Jelemiia mukonda dia kidielelu kiki? Muéne ka soto jimbote ku mundu mukonda uejidile kuila eji ku i buika. O kuila ua bhange kiambote? Maji o seketa ia Jelemiia, Mbaluke, ka banzele kala Jelemiia, mu kiki Nzambi, ua tumina Jelemiia ku tangela o seketa iê: “Tala, kioso ki nga tungu, ngi ki bula; o kioso ki nga phaphe, ngi ki vuza; kienhiki muene mu ixi ioso muenhumu eie anga uia ni kusota maunène? Kana ku a sota; mukonda nga-nda kubheka kuiibha ku thandu dia xitu ioso, . . . eie-phe o muenhu ué uene u nganda ku ku bhana kuma iene o mbole ié kuoso-kuoso ku u di texila.”—Jel. 45:4, 5.

⁹ Etu ki tuejiia kiambote se ima iahi ia kexile mu sota Mbaluke phala muéne. * Tuejiia ngó kuila o ima ienioió ki ieji nangenena, ieji zangiua kioso kieji buika o mbanza ia Jeluzaleme ku akua Babilonha ku muvu ua 607 A.K.K. Ihi i tu longa? O ku dikila o ibhindamu ietu ku bhinga kuila, tu kalakala phala ku bhaka jimbongo phala ku tu kuatekesa ku hádia. (Jisa. 6:6-11) O kuila unjimu ku zanga o kithangana kietu mu ima ki ia-nda nangenena? O kilunga kia Jihova kiene mu bhanga Ididi ia Ubhezelu, jifiliale, ni ima ia mukuá ia lungu ni Utuminu mu ixi. O nguzu ia bhanga mu ikalakalu iâ, ki ia-nda kala ia ki ngó, mukonda ene mu i bhanga phala ku suluka ni kikalakalu kia Utuminu. Kima kiambote se o jiselevende ja Jihova ku kaiela o phangu íii, kioso kia mesena ku bhanga kima. O kuila ua xikina ku muxima uê, kuila ua mu ‘dianga ku sota o Utuminu ni uiukilu [ua Jihova]?’—Mat. 6:33.

EME ‘NGA I MONO KUILA IXETE’

10, 11. (a) Phaulu ua zangele o thembu iê mu ima iahi, ande dia ku kituka Kidistá? (b) Mukonda diahi Phaulu ua lungulula o ukexilu uê?

¹⁰ Tua-nda sukina ni phangu ia Phaulu. Ande dia ku kala kidistá, muéne ua kexile ni ukexilu ua londekesele kuila ueji kala ni fuma. Muéne ua di longele o itumu ia Jijudé ni mulongexi ua fuma mu izuua iê. A mu bhana ku tena ku mukunji ua dikota ua Jijudé. Mu milongi ia Jijudé muéne ua betele-kota akuâ ndenge. (Ika. 9:1, 2; 22:3; 26:10; Nga. 1:13, 14) Maji ima ioso íii ia bhu kioso Phaulu kia mono kuila Jihova, ka kexile dingi ku besoala o Jijudé.

¹¹ Phaulu ua mono kuila o ku kala ni fuma ku Judé, ku kexile ni valolo kua Jihova. (Mat. 24:2) O diiala didi diexile Falizeu, uambe ué kuila kindala ua betele kuijiia o vondadi Nzambi, ni ujitu ua ku kala mukunji ua Kidistá, mukonda ua  banzele kuila uene, ua betele-kota, kindala ua monene kuila o ima ienioió iexile ‘ixete.’ Phaulu ua xisa o ima ioso ia di longo ni Jijudé, iu ua di bhakula mu ku boka o njimbu iambote, katé ku ufuilu uê.—Tanga Filipe 3:4-8, 15; Ika. 9:15.

TONGININA KIAMBOTE O IMA I UA TOKALA KU TA KU PHOLO

12. Ihi ia bhange Jezú kioso kia mu batizala?

¹² Noué, Mozé, Jelemiia, Phaulu ni athu a mukuá, a bhiti o thembu iâ mu ku bhanga o sidivisu ia Utuminu. Athu enhá phangu iambote phala etu. Maji o phangu ia beta-kota ia selevende ia Jihova ua di bhakuile, Jezú. (1 Phe. 2:21) Kioso kia mu batizala muéne ua di bhakula mu ku boka o njimbu iambote, ni ku bhana kijingu kua Jihova. O kidistá uejiia kuila Jihova muéne o Mesene iê, ua tokala uijiie ué kuila o ku mu sidivila kiene kima kia tokala ku dianga ku bhanga ku muenhu uê. O kuila iene ué i u bhanga? Kiebhi ki tu tena ku bhanga o ikalakalu ietu, ia utuminu, ni ku bhanga ué o ikalakalu phala ku dikila o ibhindamu ietu?—Tanga Jisálamu 71:15; 145:2.

13, 14. (a) Ihi ia tokala ku xinganeka o Jikidistá joso a di bhakula? (b) Mabesá ahi a tambula o mundu ua Nzambi?

¹³ Mu mivu ioso íii o kilunga kia Jihova kiene mu suínisa o Jikidistá ku xinganeka ni musambu, se a tena ku kala aboki a thembu ioso. Saí ima i bhangesa o jikidistá ku kamba ku di bhakula mu sidivisu íii, mu ku bhana 70 a ji ola ku mbeji. Ene ka tokala ku divua kia iibha. (1 Tim. 5:8) Abha eie ihi i ku fidisa? O kuila u tena ku kala muboki ua thembu ioso?

¹⁴ Xinganeka o mabesá a tambula o mundu ua Nzambi mu kithangana kia Lembalasa ia kufuá kua Jezú, ku muvu iú. Ku mbeji ia Katanu, tua tambula o ujitu ua ku bhanga 30 mba 50 a ji ola mu sidivisu ia kuboka. (Jisá. 110:3) Jiphange javulu a kalakala kala aboki a ithangana ni ithangana, o ilunga ia sangulukile kiavulu. O kuila u tena ku kala polondo phala ku tambula ué o mabesá enhá? Kima kiambote o kidistá ku sukilu dia kizuua ku zuela kuila: “Jihova nga bhange ioso i nga tena mu sidivisu iê.”

15. Mbambe iahi ia tokala ku suua o minzangala Kidistá, ia lungu ni ku di longa mu xikola ia katunda?

¹⁵ Se eie ua-nda zubha kiá ku di longa mu xikola, nange uala ni sauidi iambote, kua-nda kala dingi ni kikalakalu kiavulu. O kuila ua banze kiá ku bokona mu sidivisu ia thembu ioso? Sé phata, o jimesene mu xikola a mesena o mbote ia maxibulu mê, mu ku a suínisa ku bokona mu ji xikola ja katunda, ni ku sota salu iambote. Kienhiki, ene a dielela ngó ku ima ia mundu iú u bhanga ngó kathangana. Maji o ku di bhakula mu sidivisu ia thembu ioso, ni ku suua mbambe mu sidivisu ia Jihova kima ki nangenena. Se u bhanga kiki ua-nda kaiela o phangu ia Jezú. Kiki kia-nda ku zediuisa. Ua-nda londekesa kuila ua mesena ku kumbidila o kikanenu ki ua bhange kua Jihova, kia ku di bhakula kua muéne.—Mat. 6:19-21; 1 Tim. 6:9-12.

16, 17. Kibhuidisu kiahi ki moneka kia lungu ni salu, ni sidivisu mu kilunga?

¹⁶ Jiselevende javulu ja Nzambi lelu a kalakala kiavulu phala ku dikila o ibhindamu ia muiji. Maji saí iá, ka bhingi ku kalakala kiki. (1 Tim. 6:8) Lelu o akua mauenji a mesena ku tu xikanesa kuila tua tokala ku sumba o ima ioso ia ubhe i moneka. Maji o Jikidistá ka tokala kuehela kuila o mundu ua Satanaji, u tu longa o ima i tua tokala ku dianga o  ku sota. (1 Nzu. 2:15-17) Kima kiahi kia beta-kota kia tokala ku bhanga ió a mu nhoha ka mu kalakala dingi, o kuila u kala mu sidivisu ia thembu ioso, phala ku dianga ku bhanga o sidivisu ia Jihova?

¹⁷ O Jiselevende joso ja Jihova ja di bhakula, a tokala ku di ibhuidisa: “Ima iahi i ngene mu dianga ku bhanga ku muenhu? O kuila nga mu dianga ku bhanga o sidivisu ia Utuminu? O kuila nga mu kaiela o phangu ia Jezú ia ku sosola o ima ku muenhu uami? Nga mu belesela o kitendelesu kia Jezú kia ku mu kaiela? O kuila ngi tena ku suua mbambe phala ku bhanga dingi mu sidivisu ia ku boka, mba sidivisu ia mukua mu kilunga? Né muéne se saí kima kia mu ngi fidisa ku suua mbambe mu sidivisu, o kuila nga mu di suínisa?

“KU MI SOLESA NI KU MI BHANGESA KUTUMAKA”

18, 19. Ihi i ua tokala ku bhinga mu musambu, mukonda diahi o musambu iú u sangulukisa Jihova?

¹⁸ O ku suína kua mundu ua Nzambi ku tu bhana kisangusangu kia dikota. Maji saí iá ka mesena muene ku kala aboki a thembu ioso—né muéne se kala ni kima kia a fidisa. (Mak. 4:10; Jel. 1:6) Ihi i tua tokala ku bhanga? O maka enhá ki tu tokala ku a tumbula mu musambu? A tokala muene. Phaulu uambela o jiselevende ni akuâ “Kuma Nzambi muène u kalakala moxi dienu, mu ku mi solesa ni ku mi bhangesa kutumaka kioso kia mu kala mu vondadi iê iambote.” (Fil. 2:13) Kienhiki se ki uala ni vondadi ia ku bhanga dingi mu sidivisu ia Jihova, bhinga kua Jihova phala ku bhanga o vondadi, ni uhete.—2 Phe. 3:9, 11.

¹⁹ Noué, Mozé, Jelemiia, Phaulu, ni Jezú a di bhakuile kua Nzambi. Ene a di bhakuile mu ku boka o njimbu ia kufundisa ia Jihova. Ene ka landukile kana. O dizubhilu dia mundu iú dia zukama; kienhiki etu enioso tua di bhakula kua Nzambi, tua tokala tu kolokota ku kaiela o phangu ia athu enhá, a a tange mu Mikanda Ikola. (Mat. 24:42; 2 Tim. 2:15) Mu ku bhanga kiki, tu tena ku sangulukisa o muxima ua Jihova, ni ku tambula o mabesá mê.—Tanga Malakiia. 3:10.

[Tanga mu luji]

[Ibhuidisu ia ku dilonga]

[Foto ku mbandu 22]

O athu mu izuua ia Noué ka xikana o itendelesu

[Foto ku mbandu 25]

Ua xinganeka kia ku bokona mu sidivisu ia thembu ioso?