Jehova Rawngbâwlna Kan Dah Hmasak Chhan
Jehova Rawngbâwlna Kan Dah Hmasak Chhan
“Ka kâ hian i felna thu a hril ang a, nilêngin i chhandamna thu a hril bawk ang.”—SAM 71:15.
ENGTIN NGE KAN CHHAN ANG?
Engvângin nge Nova te, Mosia te, Jeremia te, leh Paula te chuan an nunah Jehova an dah hmasak ber?
I nuna i tih tûr chungchânga thu tlûkna siam tûrin engin nge ṭanpui ang che?
Engvângin nge Jehova rawngbâwlna dah pawimawh ber chu i tum tlat?
1, 2. (a) Jehova hnêna mi a inpumpêkna chuan eng nge a târ lan? (b) Engtin nge Nova te, Mosia te, Jeremia te, leh Paula te thu tlûkna siam ngaihtuah chu kan hlâwkpui theih?
ISUA hnungzuitu inpumpêka baptisma chang tawh i han nih khân, rahbi pawimawh tak i rap a ni. Pathian hnêna i inpumpêkna chu thu tlûkna i siam theih azawnga khûnkhân ber leh pawimawh ber a ni a. ‘Aw, Jehova ka nun kawng tinrênga ka Hotu ni tûrin ka duh a che. I chhiahhlawh ka ni a, ka hun hman dân tûr te, ka thil ngaih pawimawh hmasak tûr te, leh ka sum leh pai neih leh ka thiamnate ka hman dân tûr min ruatsak tûrin ka duh che a ni,’ tia a hnêna sawi ang i ni.
2 Kristian inpumpêk tawh i nih chuan, Pathian Jehova hnêna i intiamna chu hetiang deuh hi a ni. I thu tlûkna siam avâng chuan fak tlâk i ni; i thiltih chu thil dik leh finthlâk tak a ni si a. Mahse, i Hotu anga Jehova i pawm tâk hnu chuan engtin nge i hun i hman? Nova te, Mosia te, Jeremia te, leh tirhkoh Paula te entawn tûr siam chuan hemi chungchânga mahni inenfiah tûrin min ṭanpui thei a ni. Anni chu thinlung zawng zawnga Jehova rawngbâwltu an ni vek si a. Kan dinhmun chu an dinhmun nên a inang a. An thil ûm chungchânga an thu tlûkna siamte chuan kan hun hman dân chungchâng endik tûrin min chêttîr thei a ni.—Mt. 28:19, 20; 2 Tim. 3:1.
TUILET HMA
3. Eng kawngin nge Nova hun lai leh kan hun lai hi a in an?
3 Isua chuan Nova hun lai leh kan hun lai inanna a sawi a. “Nova dam lai ang bawk kha mihring Fapa lo kal lehna chu a ni ang. Chûng nî tuilêt hmate chuan Nova lawnga a luh nî thlengin an eiin an bâr a, nupui pasal an innei ṭhîn; tui a lo lêt a, an zaa a lâk bo vek hma loh chuan engmah an hre [duh] lo,” tiin. (Mt. 24:37-39) Tûn laia mi tam zâwkte chuan kan hun hmâwr tawhzia hre lovin hun an hmang a. Pathian chhiahhlawhte vaukhânna thu puan chhuah chu an hre ṭha duh lo. Mi tam tak chuan Nova hun laia mite ang bawkin mihringte chung thuah Pathian a rawn inrawlh dâwn tih ngaih dân chu an nuihzat a ni. (2 Pet. 3:3-7) Mahse, chûng hmêlmate kârah chuan Nova chuan engtin nge a hun a hman?
4. Engtin nge Nova chuan Jehova hnên aṭanga thupêk a dawn hnuah a hun chu a hman a, engvângin nge?
4 Pathian thiltum hriattîr a nih hnu leh hnathawh tûr pêk a nih hnu chuan, Nova chuan mihringte leh ramsate nun chhanhimna tûr lawng chu a tuk ta a. (Gen. 6:13, 14, 22) Lo thleng tûr Jehova rorêlna chungchâng pawh a puang chhuak a ni. Petera chuan ani chu “felna thu hriltu,” tiin a ko va; chu chuan an chênna hun hmâwr tawhzia hre thiam tûra Nova’n a vêngte ṭanpui a tumzia a târ lang a ni. (2 Petera 2:5 chhiar rawh.) Nova leh a chhûngte tân chuan sumdâwnna lam buaipui a, an dam rualpuite zînga mi challang, a nih loh leh nuamsa taka nung tûra ṭan lâk chu âwm i ti ang em? Ti hauh lo vang! Hma lama thil lo thleng tûr chu hriain, chutiang rilru lapêng thei thilte chu an pumpelh a ni.
AIGUPTA LAL FAPA DUH THLANNA
5, 6. (a) Mosia zirtîrna dawn chu eng atâna amah buatsaih nân nge ni thei ang? (b) Engvângin nge Mosia chuan Aigupta rama nawmna a neih theih zawng zawng chu a hnâwl?
5 A dawtah, Mosia entawn tûr siam hi lo ngaihtuah ta ila. Ani chu Pharaoa fanua fapa angin Aigupta lal inah a seilian a. Lal fapa a nih angin, “Aigupta rama mite finna zawng zawng” zirtîr a ni. (Tirh. 7:22; Ex. 2:9, 10) Chu zirtîrna chu Pharaoa lal in chhûnga a chanvo chan tûr atâna buatsaih nân a nih hmêl hle. Ani chu a hun laia sawrkâr thiltithei bera mi challang tak a ni thei a, chutiang chanvo sâng neihin a ken tel nawmsakna te, hausakna te chu a nei thei reng a ni. Mahse, chûng thilte hlimpui chu Mosia thiltum a ni em?
6 A naupan laia a nu leh pa dik tak hnên aṭanga zirtîrna a lo dawn avângin Mosia chuan an thlahtu Abrahama te, Isaaka te, leh Jakoba te hnêna Jehova thutiam chu a hriat ngei a rinawm a. Ani chuan chûng thutiamte chu a ring tlat a ni. A hma lam hun tûr leh Jehova laka a rinawmna chu ngun taka a ngaihtuah ngei a rinawm hle. Chuvângin, Aigupta lal fapa nihna leh Israel mi chhiahhlawh nihna inkâra duhthlan a ngaih tâkah chuan eng nge a thlan zâwk? Mosia chuan “rei lo tê atâna sual nawmna hlimpui ai chuan Pathian mite nêna tihduhdah tuar” chu a thlang ta zâwk a ni. (Hebrai 11:24-26 chhiar rawh.) Chu mi hnuah, a nun a hman dân tûr chungchânga Jehova kaihhruaina chu a zâwm a ni. (Ex. 3:2, 6-10) Engvângin nge Mosia chuan chutianga a tih? Pathian thutiamte a rin tlat avângin. Aigupta ramah chuan atân beisei tûr rêng a awm lo tih thu tâwp a siam a. Dik takin, a hnu lawkah chu ram chu Pathian tirh hri sâwm chuan a nuai ta rêng a ni. Heta ṭang hian tûn laia Jehova hnêna inpumpêk tawhte tân zir tûr i hmu em? Kan hnathawh lam emaw, he khawvêla nawmchenna engpawh lam emaw ngaihtuah ai chuan, Jehova leh a rawngbâwlnaah rilru kan pe tlat zâwk tûr a ni.
JEREMIA CHUAN THIL LO THLENG TUR A HRIA
7. Engtin nge Jeremia dinhmun chu kan dinhmun nên a inan?
7 Jehova rawngbâwlna dah pawimawh bertu dang leh chu zâwlnei Jeremia hi a ni. Jehova chuan a zâwlnei Jeremia chu kal pêng Jerusalem leh Judai ram chunga rorêlna lo thleng tûr chungchâng puang tûrin a tîr a. Jeremia chu “ni hnuhnûngahte” a awm anga sawi theih a ni. (Jer. 23:19, 20) Ani chuan a hun laia khawvêl inrêlbâwl dân chuan rei a awh dâwn lo tih a hre chiang hle a ni.
8, 9. (a) Engvângin nge Baruka ngaihtuahna chu siam ṭhat a ngaih? (b) Ruahmanna kan siam hunah eng nge rilrua kan vawn reng ang?
8 Jeremia thil hriat chian chuan a chungah eng nghawng nge a neih? Chu kalhmang chhe mai tawh tûra inbenbel chu a tum lo a ni. Chutianga inbenbel chu thil finthlâk a ni dâwn em ni? Mahse, Jeremia lehkha ziaktu Baruka chuan hun engemaw ti chhûng chu thil a hmu fiah thiam lo va. Chuvângin, Pathian chuan Jeremia chu a lehkha ziaktu hnêna he thu hrilh tûrin a thâwk khum a ni: “Ngai rawh, ka sak tawh chu ka ṭhiat leh ang a, ka phun tawh chu ka pawt chhuak leh ang, ram pum pui mai chu: tin, mahni tân thil ropui i zawng em ni? Zawng lo mai rawh: tîsa zawng zawng chungah thil ṭha lo ka rawn thlen dâwn si a, . . . mahse i nun zawng i kalna apiangah ka zuahsak hrâm ang che,” tiin.—Jer. 45:4, 5.
9 Baruka “thil ropui” zawn chu eng nge a nih kan hre chiah lo va. * Mahse, chûng chu chatuan daih tûr ni lo, B.C.E. 607-a Babulon hovin Jerusalem an hneh huna chhe vek tûr thilte a ni tih erawh kan hria a ni. He thil aṭang hian kan tân zir tûr a awm em? Kan nun atâna mamawh châkkhaite nei thei tûr chuan nakin hun atâna inruahmanna engemaw neih zawng a ngai ngei mai. (Thuf. 6:6-11) Mahse, hlutna tluan tling nei lo thilte atâna hun leh tha leh zungte hman vak mai chu a finthlâk em? Dik takin, Jehova inawpna pâwl chuan Kingdom Hall thar te, branch thar te, leh Lalram tihhmasâwnna tûr thil dangte chu a ruahman chho zêl ngei mai a. Mahse, chûng thilte chu Lalram hmasâwnna tûra tih a nih avângin hma lam hun atân hlutna an nei a ni. Jehova hnêna inpumpêk tawh zawng zawngte tân nakin hun tûr ruahmanna an siam huna chutiang thilte dah pawimawh ve chu a âwm hle ang. Pathian ‘ram leh [Jehova] felna i zawng hmasa’ tih i thinlung zawng zawngin i ring em?—Mt. 6:33.
‘HNAWMHNEAH LEK KA NGAI’
10, 11. (a) Paula chuan Kristian a nih hma chuan eng nge a lo ngaih pawimawh ṭhin? (b) Engvângin nge Paula thiltum chu a inthlâk thleng thawk?
10 A tâwp berah chuan, Paula entawn tûr siam hi i lo ngaihtuah ang u. Kristiana a inleh hma chuan hmabâk ṭha tak nei niin a lang a. A hun laia zirtîrtu hmingthang berte zînga pakhat bulah chuan Juda dân chu a zir a. Juda puithiam lal hnên aṭangin thu neihna a dawng bawk a ni. Tin, a dam rualpui tam takte ai chuan Juda inzirtîrna lamah a sâng zâwk hle bawk. (Tirh. 9:1, 2; 22:3; 26:10; Gal. 1:13, 14) Mahse, Juda hnam chu Jehova’n mal a sâwm tawh lo tih a han hriat chuan chûng zawng zawngte chu a thlâk ta vek a ni.
11 Paula chuan Juda kal hmanga hna nghet neih chuan Jehova mithmuhah hlutna rêng a nei lo tih leh hma bâk engmah a nei lo tih a hria a ni. (Mt. 24:2) Tûn hmaa Pharisai lo ni ṭhîn, Paula chuan tûna Pathian thiltum hriatthiamna êng thar leh Kristian rawngbâwl theihna chanvo a neih nêna khaikhin chuan tûn hmaa a thil ngaih pawimawh ṭhinte pawh “hnawmhneah lek” a ngaih tawh thu a sawi hial a. Juda kal hmanga a thiltum chu bânsanin, a dam chhûng hun zawng zawng chu chanchin ṭha hrilh nân a pe ṭhak ta a ni.—Philippi 3:4-8, 15 chhiar rawh; Tirh. 9:15.
I THIL NGAIH PAWIMAWHTE BIH CHIANG RAWH
12. Isua chuan baptisma a chan hnuah eng nge a dah pawimawh ber?
12 Nova te, Mosia te, Jeremia te, Paula te leh anmahni ang mi dang tam takte chuan an hun leh tha leh zungte chu Lalram tihhmasâwnna lam thilte ûm nân an hmang a. Anni chu kan tân entawn tûr ṭha tak an ni. Jehova chhiahhlawh inpumpêkte zînga ropui ber chu Isua hi a ni a. (1 Pet. 2:21) Baptisma a chan hnuah, Isua chuan a dam chhûng hun zawng zawng chu chanchin ṭha hrilh nân leh Jehova chawimawi nân a hmang pumhlûm ṭhak a. Hotu atâna Jehova pawmtu Kristian tâna thu tlûkna chiang sa chu, a nunah Jehova rawngbâwlna a dah pawimawh hmasa ber tûr a ni tih hi a ni. Chu chu i thu tlûkna a ni ve em? Engtin nge mawhphurhna dangte ngaihthah chuang si lova thlarau lam thilte chu kan ûm lehzual theih ang?—Sâm 71:15; 145:2 chhiar rawh.
13, 14. (a) Kristian inpumpêk zawng zawngte chu eng nge ngaihtuah tûra fuih an nih? (b) Pathian mite’n eng lungawina nge an neih theih?
13 Kum kalta chhûngte khân, Jehova inawpna pâwl chuan Kristiante chu pioneer an thawh theih leh theih loh inenfiah tûrin a fuih nawn fo va. Chhan hrang hrang avângin, Jehova chhiahhlawh rinawm ṭhenkhat tân thu hrilh nân a chawhruala thla khata dârkâr 70 hman chu thil theih a ni lo. Chu chu rilru hrehawm nân an hmang tûr a ni lo. (1 Tim. 5:8) Mahse, i chungchâng chu eng nge ni? Pioneer thawh chu i tâna thil theih loh a ni tak zet em?
14 Kumin Hriatrengna hun chhûnga Pathian mi tam takte neih hlimna kha han ngaihtuah kîr teh. March thla chhûng chuan, a bîk taka ruahmanna chuan auxiliary pioneer-te chu thlawhhma rawngbâwlnaa dârkâr 30 nge dârkâr 50 an hman dâwn tih thlan theihna hun remchâng a pe a. (Sâm 110:3) Mi nuai têlte chu auxiliary pioneer rawngbâwlnaah an tel a, kohhran chuan phûrna leh hlimna namai lo an lan chhuahtîr a ni. Chutiang hlimna chu tawng ngun lehzual tûrin i dinhmun i siamrem thei ang em? Chutianga insiamremna chuan Kristian inpumpêkte chu nî a ral apiangin, lungawina nasa tak nên, “Aw, Jehova, i rawngbâwlnaah ka tih theih apiang ka ti e,” tiin a sawitîr thei a ni.
15. Lehkha zirna chungchânga Kristian ṭhalaiin a tum ber tûr chu eng nge ni?
15 School zo ṭêp tawh i nih chuan, hrisêlna ṭha leh mawhphurhna la nei tam lo pawh i ni mai thei a. Chutiang i nih chuan, regular pioneer thawh chungchâng chu tih tak zetin i ngaihtuah tawh em? In zirtîrtute chuan in ṭhatna tûr a ni tih an rin tak zet avângin zirna sâng zâwk ûm a, hna ṭha neih tum tûrin an fuih ngei ang che. Mahse, an rin chu hmabâk tluantling nei lo mihring din pâwlte leh sum leh pai a ni mai a. Kawng lehlamah chuan Pathian rawngbâwlna i ûm chuan thil hlu leh chatuan daih thil i ûm a ni ang. Tin, Isua entawn tûr siam ṭha famkim chu i zui a ni bawk ang. Chutiang thu tlûkna fing chuan a tihlim che ang a, a vênghim bawk ang che. Chu bâkah, chutianga i tihna chuan Jehova hnêna i inpumpêkna thutiam hlen tûrin i nung tih a târ lang bawk ang.—Mt. 6:19-21; 1 Tim. 6:9-12.
16, 17. Pâwn lam hnathawh leh thil dangte chungchângah eng zawhnate nge lo chhuak?
16 Tûn laia Pathian chhiahhlawh tam takte chuan an chhûngkaw mamawh bulpuite phuhrûk nân dârkâr rei tak tak hna an thawh a ngai a. Mahse, ṭhenkhat chuan a ṭul zât aia rei an thawk pawh a ni thei. (1 Tim. 6:8) Sumdâwnna khawvêl chuan a thil siam chhuah tam tak leh chhuak thar zêlte nei lova awm thei lo anga inhriatna min neihtîr tumin theih tâwp a chhuah a. Mahse, Kristian dikte chuan Setana khawvêlin an thil ngaih pawimawhte a thunun chu an duh lo. (1 Joh. 2:15-17) An hna aṭanga châwl tawhte tân chuan Jehova rawngbâwlna dah pawimawh hmasa a, pioneer rawngbâwlnaa inhman tluka hun hman dân ṭha zâwk a awm thei dâwn em ni?
17 Jehova chhiahhlawh inpumpêk tawh zawng zawngte chu heti hian an inzâwt thei a ni: Ka nuna ka thiltum ber chu eng nge ni? Lalram hmasâwnna lam ka dah pawimawh ber em? Isua neih mahni inpêkna rilru put hmang chu ka entawn em? Amah zui zêl tûra Isua thurâwn pêk chu ka zâwm em? Lalram thu hrilh rawngbâwlna emaw, lalram hmasâwnna tûr thiltih dangte emaw atâna hun tam zâwk ka pêk theih nân ka hun ka siamrem thei em? Tûnah ka dinhmun avângin rawngbâwl tam lehzual thei rih lo mah ila, mahni inpêkna rilru ka nei chhunzawm zêl em?, tiin.
‘TIH CHAKNA NEI TUR LEH TI TURIN’
18, 19. Eng chungchângah nge kan ṭawngṭai theih a, engvângin nge chutiang ṭawngṭaina chuan Jehova a tihlâwm ang?
18 Pathian mite ṭhahnemngaihna chu hmuh nuam tak a ni a. Mahse, mi ṭhenkhat chuan harsatna nei lo mah se, pioneer thawh châkna emaw, thawk tûra tling intihna emaw an nei lo pawh a ni mai thei. (Ex. 4:10; Jer. 1:6) Chutiang a nih chuan engtin nge ni ang? Ṭawngṭaia thlen chi a ni ang em? Ni tehrêng mai. Paula chuan a Kristian unaute hnênah chuan Jehova “lâwmzâwng anga tih châkna nei tûr leh ti tûra nangmahnia thawktu chu Pathian a ni si a,” tiin a hrilh a ni. (Phil. 2:13, NW) Chuvângin, rawngbâwlnaa inhman lehzual châkna i neih loh chuan, Jehova hnênah thawh châkna leh thiamna dîl ang che.—2 Pet. 3:9, 11.
19 Nova te, Mosia te, Jeremia te, Paula te, leh Isua te chu mi inpe tak an ni vek a. An hun leh tha leh zung chu Jehova vaukhânna thu puan chhuah nân an hmang a ni. Anni chu engmah an inlâkpêntîr lo. He khawvêl kalhmang tâwpna hi a hnai tawh hle a; chuvângin, Pathian hnêna inpumpêk tawh zawng zawngte chuan hêng Bible-a entawn tûr târ lan ṭha takte zui tûrin theih tâwp kan chhuah zawm zêl tûr a ni. (Mt. 24:42; 2 Tim. 2:15) Chutianga kan tih chuan Pathian Jehova kan tilâwmin, a malsâwmna kan dawng thei ang.—Malakia 3:10 chhiar rawh. (w12-E 06/15)
[Footnote]
^ par. 9 God’s Word for Us Through Jeremiah, tih lehkhabu phêk 104-106-na en rawh.
[Zirlai Atâna Zawhnate]
[Phêk 22-naa milem]
Mite chuan Nova vaukhânna thu an ngaihsak lo
[Phêk 25-naa milem]
Regular pioneer thawh chu ngun takin i ngaihtuah tawh em?
