Etke Jen Likũt Jerbal eo an Jeova M̦oktata?

“Lo̦ñiõ enaaj kõnnaan kõn Am̦ wãnõk im kõn Am̦ lo̦mo̦o̦r aolepen raan.”​​—SAM 71:⁠15.

EWI WÃWEEN KWÕNAAJ UWAAK?

Etke Noa, Moses, Jeremaia, im Paul rar likũt Jeova m̦oktata ilo mour ko aer?

Ta eo enaaj jipañ eok ñan jel̦ã ewi wãween kwõmaroñ kõjerbale mour eo am̦?

Etke kwõnaaj likũt jerbal eo an Jeova m̦oktata ilo mour eo am̦?

1, 2. (1) Ñe juon ej ajel̦o̦k mour eo an ñan Jeova, ta eo men in ej kalikkare? (2) Ewi wãween joñak eo an Noa, Moses, Jeremaia, im Paul remaroñ jipañ kõj?

 ÑE KWÕJ ajel̦o̦k mour eo am̦ ñan Anij im erom juon rũkal̦oor an Jijej me em̦õj an peptaij, eokwe kwõj kõm̦m̦ane juon pepe ekanooj in aorõk ilo mour eo am̦. Ilo am̦ kõm̦m̦ane pepe in ej ãinwõt ñe kwõj ba ñan Jeova: ‘Jeova, ña ri karejeram. Ikõn̦aan bwe kwõn Ri Tõl eo aõ. Ikõn̦aan bwe kwõn kwal̦o̦k ñan eõ ewi wãween in kõjerbal iien ko aõ im ta ko in likũti m̦oktata ilo mour e aõ. Kwõn kwal̦o̦k ewi wãween in kõjerbal kajoor im kapeel ko aõ kab men ko jet ewõr ippa.’

² El̦aññe kwõj juon Kũrjin me em̦õj an peptaij, eokwe em̦õj am̦ kallim̦ur bwe kwõnaaj likũt Jeova m̦oktata. Ekanooj in em̦m̦an pepe in am̦ im ej juon men ejim̦we im mãlõtlõt. Ak kiiõ ke em̦õj am̦ bõke Jeova bwe en Ri Tõl eo am̦, ewi wãween kwõj kõjerbale iien ko am̦? Eokwe joñak eo an Noa, Moses, Jeremaia, im rijjelõk Paul remaroñ jipañ kõj ñan etale kajjitõk in. Aolep em̦m̦aan rein rar kate er joñan wõt aer maroñ ñan kõm̦m̦ane jerbal eo an Jeova. Wãween ko jej iiooni ilo mour ko ad rej ãinl̦o̦k wõt wãween ko rein rar iiooni. Pepe ko rar kõm̦m̦ani rej kalikkar ta ko rar likũt m̦oktata ilo mour ko aer. Joñak kein aer ren kõm̦akũt kõj ñan kõn̦aan etale ewi wãween jej kõjerbale iien ko ad.​—Matu 28:​19, 20; 2 Timote 3:⁠1.

M̦OKTA JÃN IBWIJLEPLEP EO

3. Ewi wãween raan kein ad ej ãinl̦o̦k wõt raan ko an Noa?

³ Jijej ear keidi raan ko an Noa ñan raan kein ad. Ear ba: “Ãinwõt raan ko an Noa, enaaj ãindein an Nejin armej itok.” Armej ro ilo raan ko an “rar m̦õñã im idaak, rar pãlele im lel̦o̦k bwe ren pãlele, ñan raan eo Noa e ar del̦o̦ñ ilowaan wa eo, im re jaje ñan tõr eo ibwijleplep ej itok, im bõkl̦o̦k er otemjej.” (Matu 24:​37-39) Rainin, enañin aolep  armej rejjab roñjake naan in kakkõl ko me ri karejar ro an Anij rej kakkõl er kake. Ejjel̦o̦k aer kea bwe jej mour ilo raan ko ãliktata. Ãinwõt armej ro ilo raan ko an Noa, elõñ armej rainin rejjab tõmak bwe Anij enaaj ko̦kkure ri nana ro. Joñan aer jab tõmak, rej kajjirere kake men in! (2 Piter 3:​3-7) Ak ewi wãween an kar Noa kõjerbale iien ko an ke armej ro rar jab roñjake naan in kakkõl ko an?

4. Ãlikin an kar Jeova lel̦o̦k ñan Noa juon jerbal eaorõk, ewi wãween Noa ear kõjerbal iien ko an? Etke ear kõjerbale ilo wãween in?

⁴ Anij ear jiroñ Noa bwe enaaj ko̦kkure aolep ri nana ro, kõn men in ear lel̦o̦k ñan Noa juon jerbal eaorõk. Noa ear kalõk juon wa ñan lo̦mo̦o̦ren armej ro im menin mour ko. (Jenesis 6:​13, 14, 22) Bareinwõt, Noa ear kakkõl armej ro kõn ta eo Jeova enaaj kõm̦m̦ane. Rijjelõk Piter ear ba bwe Noa ear juon “ri kwal̦o̦k kõn wãnõk.” Men in ej kwal̦o̦k bwe Noa ear lukkuun kate e ñan jipañ ro jet bwe ren kile im mel̦el̦e aorõkin aer aikuj roñjake. (Riit 2 Piter 2:⁠5.) Ilo am̦ l̦õmn̦ak, enaaj ke kar juon men em̦m̦an im mãlõtlõt ñe Noa im baam̦le eo an rar kõjerbal iien ko aer ñan jino juon peejnej? Im enaaj ke kar em̦m̦an bwe ren kal̦apl̦o̦k aer jeraam̦m̦an jãn ro jet ak kalõñl̦o̦k m̦weiuk ko aer? Jaab! Rein rar jab lel̦o̦k aer ñan jabdewõt men me enaaj kar kõm̦ad er jãn jerbal eo aer. Etke? Ej kõnke rar jel̦ã bwe Jeova enaaj ko̦kkure jukjuk im pãd eo ilo iien eo.

PEPE KO AN MOSES

5, 6. (1) Etke kar katakin Moses kõn “mãlõtlõt otemjej an Ri Ijipt” ro? (2) Etke Moses ear kõjekdo̦o̦n jeraam̦m̦an ko me emaroñ kar bũki ilo m̦weo im̦õn Pero ilo Ijipt?

⁵ Jen kiiõ katak jãn joñak eo an Moses. Kõrã eo nejin Pero ear kakajiririik e. Kõn men in, Moses ear mour ãinwõt juon nejin kiiñ im ear dik im rũttol̦o̦k ilo m̦weo im̦õn Pero, kiiñ eo an Ijipt. Bareinwõt, kar katakin Moses kõn “mãlõtlõt otemjej an Ri Ijipt” ro. (Jerbal 7:22; Exodus 2:​9, 10) Ri Ijipt ro rar katakin e bwe en maroñ pojak in kõm̦m̦ane jerbal eo an ñan Pero. Kõn men in, Moses emaroñ kar erom juon armej eutiej im aorõk ilo aelõñ in me ear kajoortata ilo kar tõre eo. Men in emaroñ kar kõm̦m̦an bwe en l̦ap an m̦weiie im bõk elõñ jeraam̦m̦an ko. Bõtab, men kein rar ke aorõk ippãn Moses?

⁶ Ke Moses ear juon ajri, rũtto ro lukkuun jemen im jinen rar katakini kõn Jeova. Innem Moses emaroñ kar jel̦ã kõn men ko Jeova ear kallim̦ur kaki ñan Ebream, Aisak, im Jekõb. Moses ear lukkuun tõmak ilo kallim̦ur kein. Emaroñ kar kõl̦mãnl̦o̦kjen̦ kõn ilju im jekl̦aj eo an im ewi wãween emaroñ tiljek ñan Jeova. Ear wõr juon iien Moses ear aikuj pepe ta eo en kããlõte, mour eo an ãinwõt juon nejin kiiñ ke ak mour ãinwõt juon ri kam̦akoko ippãn Ri Israel ro? Moses ear kããlõt bwe “em̦m̦anl̦o̦k an eñtaan ippãn armej ro doon Anij, jãn an m̦õn̦õn̦õ kõn jerawiwi ium̦win jidik iien.” (Riit Hibru 11:​24-26, UBS.) Tokãlik, Moses ear kõjerbale mour eo an ilo wãween eo ej kabuñbũruon Jeova. (Exodus 3:​2, 6-10) Etke Moses ear kõm̦m̦ane men in? Ej kõnke ear tõmak ilo kallim̦ur ko an Anij im ear jel̦ã bwe eban to an pãd jeraam̦m̦an ko me emaroñ kar bũki ilo m̦weo im̦õn Pero ilo Ijipt. Ear jim̦we l̦õmn̦ak in an Moses kõnke ejjabto tokãlik, Anij ear kajeik aelõñ in Ijipt kõn menin  kaeñtaan ko joñoul. Aolep ri karejar ro an Jeova im rar ajel̦o̦k mour eo aer ñan e remaroñ katak jãn joñak in an Moses. Jen jab m̦ad kõn jerbal ko im m̦weiuk ko an lal̦ in ak jen likũt Jeova im jerbal eo an m̦oktata ilo mour eo ad.

JEREMAIA EAR JEL̦Ã TA EO ENAAJ WAL̦O̦K

7. Etke wãween eo Jeremaia ear iioone ej ãinl̦o̦k wõt wãween eo jej iioone rainin?

⁷ Ri kanaan Jeremaia ear bareinwõt likũt jerbal eo an Jeova m̦oktata ilo mour eo an. Jeova ear kããlõt Jeremaia bwe en ri kanaan eo an im ear lel̦o̦k ñan e juon jerbal eaorõk. Jeremaia ear aikuj in kwal̦o̦k naan in ekajet ko an Jeova ñan armej ro ilo Jerusalem im Juda kõnke rar kabuñ ñan anij ko rewaan. Innem, wãween eo Jeremaia ear iioone ej ãinl̦o̦k wõt wãween eo jej iioone rainin. L̦ein ear bareinwõt mour ilo “raan ko ãliktata” an jukjuk im pãd eo ilo tõre eo an. (Jeremaia 23:​19, 20) Ear lukkuun jel̦ã bwe m̦õttan jidik enaaj jako jukjuk im pãd eo ear mour ie.

8, 9. (1) Etke Anij ear aikuj in kajim̦weik l̦õmn̦ak eo an Baruk? (2) Ta eo jej aikuj keememeje ñe jej kõm̦m̦an pepe ko?

⁸ Kõn an kar Jeremaia tõmak, ta eo ear jab kõm̦m̦ane? Ear jab kajjioñ in kõm̦m̦an bwe en kanooj in em̦m̦an ilju im jekl̦aj eo an ilo jukjuk im pãd eo me enaaj jorrããn. El̦aññe ear kõm̦m̦ane men in, innem enaaj kar juon men ejjel̦o̦k tokjãn. Bõtab, ri jipañ eo an Jeremaia etan Baruk ear oktak l̦õmn̦ak eo an jãn e. Eñin unin Anij ear jiroñ Jeremaia bwe en kajim̦weik Baruk im ba ñan e: “Lo, men eo Iar kalõke, Inaaj jolal̦l̦o̦k e, im men eo Iar ekkat, Inaaj tũm̦wi, aet, aolepen ãne in. Im kwe, kwõj pukot men ko rel̦l̦ap ñan kwe ke? Kwõn jab pukoti! Bwe Ij bõktok jorrããn ioon kanniõk otemjej.” Innem Jeova ear kallim̦ur ñan Baruk bwe enaaj el̦l̦ã im mour jãn jorrããn eo me enaaj wal̦o̦k ñan Jerusalem.​—Jeremaia 45:​4, 5.

⁹ Baruk ear kõn̦aan jibadeke “men ko rel̦l̦ap.” Bõlen ear kõn̦aan bwe en utiejl̦o̦k jerbal eo an ilo im̦õn kiiñ eo ak bwe en m̦weiiel̦o̦k. Ilo m̦ool, jejjab lukkuun jel̦ã ta ko ear kõn̦aan jibadeki. Bõtab, men eo wõt jejel̦ã ej bwe men ko ear kõn̦aan kõttõpari rar jab to aer pãd. * (Lale kõmel̦el̦e eo itulal̦.) Men kein rar jorrããn im jako ke Ri Babilon ro rar ko̦kkure Jerusalem ilo iiõ eo 607 m̦okta jãn Kũraij. Ta eo jej katak jãn bwebwenato in? Ñe jej kõm̦m̦an pepe, en kõn men ko me jej aikuji ilo mour ko ad kiiõ. (Jabõn Kõnnaan 6:​6-11) Innem ej ke juon men em̦m̦an im mãlõtlõt ñe el̦ap ad kõjerbal iien ko ad im kajoor eo ad ñan men ko me rej ñan jidik wõt iien? Em̦ool bwe doulul eo an Jeova ej wõnm̦aanl̦o̦k im pepe ñan kalõk Im̦õn Kweilo̦k ko rekããl kab ra ko rekããl im ko jet. Bõtab, pepe kein reoktak kõnke rej rejetake Aelõñ eo. Innem ñe ro rar ajel̦o̦k mour eo aer ñan Jeova rej kõm̦m̦an pepe ko, Aelõñ eo an Anij ej aikuj men eo m̦oktata ilo mour ko aer. Kwõj ke pukot m̦okta Aelõñ eo im men ko Jeova ekõn̦aan?​—Matu 6:​33, UBS.

EAR “WATÕKI KWÕPEJ”

10, 11. (1) M̦okta jãn an kar Paul erom juon Kũrjin, ta ko ekõn kar watõki bwe raorõk? (2) Etke men ko Paul ear kaorõki ear oktak jãn m̦okta?

¹⁰ Jen kiiõ etale joñak eo an rijjelõk Paul. M̦okta jãn an kar erom juon Kũrjin, aolep rar l̦õmn̦ak bwe Paul enaaj kar bõk juon jerbal eutiej. Paul ear katak kõn m̦anit im kien ko an Ri Ju ro jãn juon rũkaki me ear lukkuun buñbuñ ilo tõre eo. Bũrij eo el̦ap an Ri Ju ro ear lõke Paul im lel̦o̦k juon an jerbal eaorõk. Im el̦apl̦o̦k an kar Paul kõm̦m̦an wõnm̦aanl̦o̦k jãn elõñ iaan ro im rar dettan wõt e ilo kabuñ eo an Ri Ju ro. (Jerbal 9:​1, 2, UBS; 22:​3, UBS; 26:​10, UBS; Galetia 1:​13, 14, UBS) Bõtab, l̦õmn̦ak eo an Paul kõn aolep men kein rar jino oktak ke ear mel̦el̦e bwe ejako an Jeova kajeraam̦m̦an aelõñ eo an Ri Ju ro.

¹¹ Kõn men in, Paul ear mel̦el̦e bwe ippãn Jeova, ejjel̦o̦k tokjãn jerbal ko reutiej ilo jukjuk im pãd eo an Ri Ju ro. Etke? Ej kõnke ejako an Jeova kajeraam̦m̦an aelõñ in. (Matu 24:⁠2) Paul  ear jel̦ã kõn karõk ko an Anij im bwe ear juon jeraam̦m̦an el̦ap ñan kõm̦m̦ane jerbal in kwal̦o̦k naan eo. Im ear make ba bwe men ko im ekõn watõki raorõk rej “kwõpej.” Paul ear kam̦õje jãn kabuñ eo an Ri Ju ro im jãn iien in m̦aanl̦o̦k ear kõjerbal aolepen mour eo an ioon lal̦ ñan kwal̦o̦k kõn nuuj eo em̦m̦an.​—Riit Pilippai 3:​4-8, 15, UBS; Jerbal 9:⁠15.

ETALE TA KO KWÕJ LIKŨTI M̦OKTATA ILO MOUR EO AM̦

12. Ta eo Jijej ear likũti m̦oktata ilo mour eo an ãlikin an kar peptaij?

¹² Noa, Moses, Jeremaia, Paul, im bar ro jet rar kõjerbal enañin aolepen iien ko aer im kajoor eo aer ñan kõm̦m̦ane jerbal eo an Jeova. Em̦m̦an joñak ko an rein ñan ad anõki. Ak ilo m̦ool, Jijej ej joñak eo em̦m̦antata ñan aolep ro im rar ajel̦o̦k mour ko aer ñan Jeova. (1 Piter 2:​21) Ãlikin an kar Jijej peptaij, ear kõjerbal aolepen mour eo an ioon lal̦ ñan kwal̦o̦k kõn nuuj eo em̦m̦an im ñan nõbar Jeova. Kõn men in, aolep Kũrjin ro im rej l̦oor joñak eo an Jijej im rej bõke Jeova bwe en aer Ri Tõl rej aikuj likũt jerbal eo an Jeova m̦oktata ilo mour ko aer. Jerbal eo an Jeova ej ke men eo m̦oktata ilo mour eo am̦? Ewi wãween jemaroñ kal̦apl̦o̦k ad jerbal ñan Jeova im ilo ejja iien eo wõt ineeke eddo ko ad?​—Riit Sam 71:15; 145:⁠2.

13, 14. (1) Ta eo doulul eo an Jeova ej rõjañ aolep Kũrjin ro ñan jar kake? (2) Ta eo enaaj kõm̦m̦an bwe armej ro an Anij ren m̦õn̦õn̦õ?

¹³ Elõñ iiõ in an doulul eo an Jeova rõjañ Kũrjin ro ñan lale el̦aññe remaroñ bõk jerbal in pioneer im ren jar kake men in. Jet ri karejar ro retiljek an Jeova rejjab maroñ kajejjet 70 awa kajjojo allõñ ilo kwal̦o̦k naan kõnke wãween ko rej iiooni rej kautameik er jãn aer kõm̦m̦ane men in. Bõtab, ejjab aikuj in nana an rein mour kõn men in. (1 Timote 5:⁠8) Ak ta kõn kwe? Kwõmaroñ ke pioneer?

¹⁴ L̦õmn̦ak m̦õk kõn an kar elõñ ri karejar ro an Jeova m̦õn̦õn̦õ ilo kar M̦aaj eo ilo iiõ in. Ãlikin allõñ in, iien Kwõjkwõj eo ear wal̦o̦k ilo kar Eprõl̦. Innem ilo kar M̦aaj eo, ro rar kõn̦aan auxiliary pioneer rar jeraam̦m̦an kõnke rar maroñ kããlõt el̦aññe rar kõn̦aan kõttõpar 30 ak 50 awa ilo jerbal in kwal̦o̦k naan. (Sam 110:⁠3) Kõn men in, elõñ milien ro jeid im jatid rar auxiliary pioneer. Im joñan an kar l̦ap an rein m̦õn̦õn̦õ, kwõmaroñ kar kile men in ilo eklejia ko. Innem kwõmaroñ ke kõm̦m̦an oktak ko ilo wãween am̦ kõjerbal iien ko am̦ bwe en maroñ lõñ alen am̦ auxiliary pioneer? Ñe juon ej pioneer, ilo jem̦l̦o̦kin kajjojo raan enaaj m̦õn̦õn̦õ im enaaj maroñ ba: “Jeova, iar kõjerbal aolepen aõ maroñ ilo jerbal eo am̦.”

15. En kar ta mejãnkajjik eo an juon jodrikdrik me m̦õttan wõt jidik em̦õj an kadiwõjl̦o̦k jãn jikuul̦?

¹⁵ Kom̦ jodrikdrik ro me m̦õttan wõt jidik em̦õj ami kadiwõjl̦o̦k jãn jikuul̦, bõlen em̦m̦an ãjmour eo ami im jejjo wõt eddo ko kom̦ij aikuj ineeki. Kom̦ nañin ke l̦õmn̦ak kõn regular pioneer? Ejjel̦o̦k pere rũkaki ro ami ilo jikuul̦ rej tõmak bwe ami jibadek jikuul̦ ko rel̦l̦apl̦o̦k ej wãween eo em̦m̦antata ñan bõk juon ilju im jekl̦aj ekanooj em̦m̦an. El̦ap an rein lõke im atartar ioon doulul ko an armej im bareinwõt jããn. Bõtab, men kein rej ñan jidik wõt iien. El̦aññe kwõj kõm̦m̦an bwe jerbal eo am̦ ñan Jeova en jerbal eo el̦aptata im ej m̦oktata ilo mour eo am̦, eokwe enaaj wõr tokjãn am̦ kõjerbal iien ko am̦. Im kwõnaaj kõm̦m̦ane juon jerbal me enaaj tõl eok ñan bõk juon ilju im jekl̦aj ej ñan indeeo. Ilo am̦ kõm̦m̦ane men in, kwõj anõke joñak eo em̦m̦antata an Jijej. Men in ej juon pepe emãlõtlõt me enaaj kam̦õn̦õn̦õik eok im bareinwõt kõjparok eok. Enaaj kalikkar bwe kwõjamin kõtl̦o̦k bwe jabdewõt men en bõbrae eok jãn am̦ kajejjet kallim̦ur eo am̦ bwe kwõnaaj jerbal ñan Jeova.​—Matu 6:​19-21; 1 Timote 6:​9-12.

16, 17. Ta kajjitõk ko Kũrjin ro rej aikuj kajjitõkin er make kaki ikijjeen jerbal eo aer ñan Jeova?

¹⁶ Rainin, elõñ ri karejar ro an Anij rej aikuj jerbal ium̦win elõñ awa ko bwe ren maroñ kabwe aikuj ko an baam̦le ko aer. Bõtab, jet rej kõm̦m̦ane men in bwe en l̦ap aer jããn jãn joñan  eo rej aikuji. (1 Timote 6:​8, UBS) Peejnej ko an lal̦ in rej kate er joñan wõt aer maroñ ñan kõm̦m̦an ad l̦õmn̦ak bwe jej aikuj wiaik aolep men ko rekããl ilo m̦õn wia ko. Im rekõn̦aan bwe jen l̦õmn̦ak bwe jej aikuji men kein ilo mour ko ad. Bõtab, Kũrjin ro rem̦ool rejjab kõn̦aan kõtl̦o̦k bwe Setan im lal̦ in an en peek ta eo ren likũti m̦oktata ilo mour eo aer. (1 Jon 2:​15-17) Ak ta kõn ro im em̦õj aer retire jãn jikin jerbal eo aer? Eokwe men eo em̦m̦antata rein remaroñ kõm̦m̦ane ej ilo aer kõjerbal iien ko aer ñan pioneer im kõm̦m̦an bwe jerbal eo an Jeova en m̦oktata ilo mour eo aer.

¹⁷ Aolep ro im rar ajel̦o̦k mour eo aer ñan Jeova ren kajjitõk ippãer make: Ta men eo eaorõktata ilo mour e aõ? Ij ke likũt jerbal eo an Jeova bwe en m̦oktata? Ij ke anõke joñak eo an Jijej im kwal̦o̦k bwe im̦õn̦õn̦õ in kõjerbal iien ko aõ im kajoor eo aõ ñan Anij? Ij ke roñjake Jijej im wõnm̦aanl̦o̦k wõt ilo aõ anõke? Imaroñ ke kõm̦m̦an oktak ilo wãween aõ kõjerbal iien ko aõ bwe in maroñ kal̦apl̦o̦k kun̦aaõ ilo kwal̦o̦k naan im ilo jerbal ko jet an Jeova? Meñe ijjab maroñ kal̦apl̦o̦k ijo kun̦aaõ kiiõ ak ij ke pukot wõt kilen aõ maroñ kõjerbal iien ko aõ im kajoor eo aõ ñan Jeova?

“KOM̦WIN KÕN̦AAN IM JERBAL”

18, 19. Ta eo kwõmaroñ jar kake ñan Jeova? Etke am̦ jar kõn men in enaaj kabuñbũruon Jeova?

¹⁸ Ekanooj in em̦m̦an ñe jej lo an ro doon Anij kijejeto. Bõtab, ro im remaroñ pioneer bõlen rejjab kõn̦aan kõm̦m̦ane men in. Im bõlen rej l̦õmn̦ak bwe rejjab ekkar im lukkuun kapeel ñan kõm̦m̦ane jerbal in. (Exodus 4:​10, UBS; Jeremaia 1:​6, UBS) Ta el̦aññe kwõj juon iaan rein im rej bõk l̦õmn̦ak kein? Eokwe kwõn jar ñan Jeova bwe en jipañ eok. Paul ear ba bwe Jeova ekõn̦aan jipañ kõj ‘bwe jen kõn̦aan im jerbal.’ (Pilippai 2:​13) El̦aññe ejjel̦o̦k am̦ kõn̦aan ñan kal̦apl̦o̦k ijo kun̦aam̦ ilo kwal̦o̦k naan, eokwe kajjitõk bwe Jeova en kõm̦m̦an bwe en wõr am̦ kõn̦aan ñan kõm̦m̦ane jerbal in. Im kajjitõk ippãn bwe en kal̦apl̦o̦k am̦ kapeel ilo jerbal in.​​—2 Piter 3:​9, 11.

¹⁹ Noa, Moses, Jeremaia, Paul, kab Jijej rar aolep tiljek. Rar kõjerbal iien ko aer im kajoor eo aer ñan kwal̦o̦k kõn naan in kakkõl ko an Jeova ñan ro jet. Rar jab kõtl̦o̦k bwe jabdewõt men en kõm̦ad er jãn jerbal in aer. M̦õttan wõt jidik im ejako jukjuk im pãd in. Kõn men in, kõj aolep me jaar ajel̦o̦k mour ko ad ñan Anij, jej aikuj lale bwe jen kate kõj joñan wõt ad maroñ ñan anõke joñak kein rem̦m̦an ilo Baibõl̦. (Matu 24:42; 2 Timote 2:​15) Ilo ad kõm̦m̦ane men in, jej kabuñbũruon Jeova im enaaj kajeraam̦m̦an kõj.​​—Riit Malakai 3:⁠10.

[Kamelele eo itulal]

[Kajitõk ko ñan katak]

[Pija ilo peij 22]

Armej ro rar jab roñjake naan in kakkõl ko an Noa

[Pija ilo peij 25]

Kwõnañin ke l̦õmn̦ak el̦aññe kwõmaroñ regular pioneer?