Ke ka Baka la Eng re Swanetše go Etiša Tirelo ya Jehofa Pele?

“Molomo wa ka o tla anega tša toko ya gago, letšatši ka moka ke tla anega tša phološo ya gago.”—PS. 71:15.

O BE O TLA ARABA BJANG?

Ke dilo dife tšeo di ilego tša laola bophelo bja Noa, Moshe, Jeremia le Paulo?

Ke maemo afe ao a tlago go laola tsela yeo o phelago bophelo bja gago ka yona?

Ke ka baka la’ng o ikemišeditše go etiša tirelo ya Jehofa pele?

1, 2. (a) Go ineela ga motho go Jehofa go bolela eng? (b) Go hlahloba dikgetho tšeo di dirilwego ke Noa, Moshe, Jeremia le Paulo go ka re hola bjang?

GE O ineela le go kolobetšwa gore o be molatedi wa Jesu, o gata mogato o bohlokwa kudu. Go ineela ga gago go Modimo ke phetho e bohlokwa kudu yeo o ka e dirago. Go bjalo ka ge eka o bolela gore: ‘Jehofa, ke nyaka gore o be Mong wa ka dikarolong ka moka tša bophelo bja ka. Ke mohlanka wa gago. Ke nyaka gore o mpotše kamoo ke swanetšego go diriša nako ya ka, gore ke etiše eng pele, kamoo ke swanetšego go diriša dilo tšeo ke nago le tšona gotee le bokgoni bja ka.’

² Ge e ba o le Mokriste yo a ineetšego, seo ge e le gabotse ke seo o se holofeditšego Jehofa. O a retwa ka baka la kgetho ya gago; o dirile selo se nepagetšego le se bohlale. Lega go le bjalo, go lemoga gore Jehofa ke Mong wa gago go bolela eng tseleng yeo o dirišago nako ya gago ka yona? Mehlala ya Noa, Moshe, Jeremia le moapostola Paulo e ka re thuša go hlahloba potšišo yeo. Yo mongwe le yo mongwe wa bona e be e le mohlanka wa Jehofa yo a ineetšego ka moya ka moka. Boemo bja rena bo swana le bja bona. Diphetho tšeo ba di dirilego mabapi le dilo tšeo ba di etišitšego pele di ka re kgothaletša go sekaseka tsela yeo re dirišago nako ya rena ka yona.—Mat. 28:19, 20; 2 Tim. 3:1.

PELE GA MEETSEFULA

3. Mehla ya rena e swana bjang le ya Noa?

³ Jesu o ile a swantšha mehla ya Noa le mehla ya rena. O boletše gore: “Go etša feela kamoo mehla ya Noa e bego e le ka gona, le go ba gona ga Morwa wa motho go tla ba bjalo.” Batho ba be ba “eja ba enwa, banna ba nyala le basadi ba nyalwa, go fihla letšatšing leo Noa a tsenego ka lona arekeng, ba se ele hloko go fihla Meetsefula a etla a ba gogola ka moka.” (Mat. 24:37-39) Bontši bja batho lehono ba phela ka go se ele hloko go akgofa ga mehla  ya rena. Ga ba ele hloko ditemošo tšeo bahlanka ba Modimo ba di phatlalatšago. Ba bantši e bile ba kwera bao ba bolelago gore Modimo o tla tsena ditaba tša batho gare—go etša ge batho ba mehleng ya Noa ba ile ba dira bjalo. (2 Pet. 3:3-7) Lega go le bjalo, Noa o ile a diriša bjang nako ya gagwe lefaseng leo le bego le le kotsi?

4. Noa o ile a diriša nako ya gagwe bjang ka morago ga go hwetša taelo e tšwago go Jehofa, gona ka baka la’ng?

⁴ Ka morago ga go botšwa ka morero wa Modimo le go amogela taelo ya gagwe, Noa o ile a aga areka bakeng sa go phološa batho le diphoofolo. (Gen. 6:13, 14, 22) Le gona, Noa o ile a bolela ka dikahlolo tša Jehofa tšeo di bego di akgofile kudu. Moapostola Petro o re Noa ke “mmoledi wa toko,” e lego seo se bontšhago gore o be a katanela go thuša baagišani ba gagwe go tšeela godimo bohlokwa bja dinako tšeo ba bego ba phela go tšona. (Bala 2 Petro 2:5.) Na o nagana gore e be e tla ba mo go kwagalago gore Noa le lapa la gagwe ba fetše nako ya bona ba thoma dikgwebo, ba katanela go atlega go feta bagwera ba bona goba ba nyake go phela maphelo a manobonobo? Ga go bjalo le gatee! Ka ge ba be ba tseba seo se letšego ka pele, ba ile ba phema ditšhitišo tše bjalo.

DIKGETHO TŠEO DI DIRILWEGO KE KGOŠANA YA EGIPITA

5, 6. (a) Thuto yeo Moshe a e hweditšego e be e reretšwe go mo lokišeletša eng? (b) Ke ka baka la’ng Moshe a ile a gana dibaka tšeo a ilego a di newa Egipita?

⁵ Anke ga bjale re ahlaahleng mohlala wa Moshe. O godišeditšwe mošateng wa Egipita bjalo ka morwa wa morwedi wa Farao. Ge e be e sa le mofsa wa ka mošate, o ile a rutwa “ka bohlale ka moka bja Baegipita.” (Dit. 7:22; Ek. 2:9, 10) Ga go pelaelo gore thuto yeo e be e reretšwe go mo lokišeletša go šoma kgorong ya Farao. E be e ka ba motho yo matla kudu mmušong o mogolo ka go fetišiša wa mehleng ya gagwe, a ba le matsaka, ditokelo le go thabela dilo tše dintši tšeo di bego di tlišwa ke maemo ao a lego go wona. Eupša na pakane e kgolo ya Moshe e be e le go thabela dilo tše bjalo?

⁶ Ka baka la tlwaetšo yeo a e hweditšego go batswadi ba gagwe ba kgonthe ge e be e sa le yo monyenyane, go molaleng gore Moshe o be a tseba seo Jehofa a bego a se holofeditše borakgolokhukhu ba gagwe e lego Aborahama, Isaka le Jakobo. Moshe o ile a bontšha tumelo dikholofetšong tše bjalo. O swanetše go ba a ile a naganišiša gabotse ka bokamoso bja gagwe le go botegela ga gagwe Jehofa. Ka baka leo, ge go be go fihla nako ya gore a kgethe magareng ga go ba kgošana ya Egipita goba lekgoba la Moisiraele, o ile a kgetha eng? Moshe o ile a kgetha “go swarwa gampe le setšhaba sa Modimo go e na le go thabela boipshino bja nakwana bja sebe.” (Bala Baheberu 11:24-26.) Ka morago o ile a latela tlhahlo ya Jehofa ya kamoo a swanetšego go diriša bophelo bja gagwe. (Ek. 3:2, 6-10) Ke ka baka la’ng Moshe a ile a dira bjalo? Ke ka gobane o be a bota dikholofetšo tša Modimo. O ile a phetha ka gore Egipita e be e sa mo swarela bokamoso bjo bokaone. Ee, ka moragonyana ga moo, setšhaba seo se ile sa otlwa ka dikotlo tše lesome tše tšwago go Modimo. Na o bona seo bao ba ineetšego go  Jehofa ba ithutago sona lehono? Go e na le gore re thee maphelo a rena mošomong wa boiphedišo goba maipshinong le ge e le afe a tshepedišo ye ya dilo, re swanetše go etiša Jehofa le tirelo ya gagwe pele.

JEREMIA O BE A TSEBA SEO SE BEGO SE LETŠE KA PELE

7. Boemo bja Jeremia bo swana bjang le bja rena?

⁷ Motho yo mongwe yo a ilego a etiša tirelo ya Jehofa pele e be e le moporofeta Jeremia. Jehofa o ile a laela moporofeta wa gagwe Jeremia go bolela molaetša wa kahlolo ditšhabeng tšeo di bego di hlanogile tša Jerusalema le Juda. Ka kgopolo e itšego, Jeremia o be a phela “mehleng ya bofelo.” (Jer. 23:19, 20) O be a tseba gabotse gore tshepedišo ya dilo yeo a bego a phela go yona e be e ka se dulele sa ruri.

8, 9. (a) Ke ka baka la’ng tsela ya Baruke ya go nagana e be e nyaka go lokišwa? (b) Ke’ng seo re swanetšego go se gopola ge re dira dithulaganyo?

⁸ Ke eng seo Jeremia a ilego a se se dire ka baka la seo a bego a kgonthišegile ka sona? Ga se a ka a leka go ikagela bokamoso tshepedišong yeo e ahlotšwego. E be e tla ba bošilo gore a dire seo. Lega go le bjalo, ka nakwana e itšego mongwaledi wa Jeremia, e lego Baruke, o ile a se bone dilo gabotse. Ka gona Modimo o ile a budulela Jeremia go botša mongwaledi wa gagwe gore: “Tseba gore seo ke se agilego, ke a se phušola gomme seo ke se bjetšego, ke a se tumola nageng ka moka. Eupša ge e le wena, o duletše go itsomela dilo tše dikgolo. O se ke wa di tsoma. Ka gobane šefa ke tlišetša nama ka moka bošula, . . . gomme ke tla go nea gore o ithopele moya wa gago bjalo ka dithebola mafelong ka moka ao o tla yago go ona.”—Jer. 45:4, 5.

⁹ Ga re tsebe gabotse gore “dilo tše dikgolo” tšeo Baruke a bego a itsomela tšona ke dife. * Lega go le bjalo, re a tseba gore e be e le dilo tšeo di bego di se na mohola, tšeo di bego di tla fela ge Bababilona ba fediša Jerusalema ka 607 B.C.E. Na o bona seo re ithutago sona tabeng ye? E le gore re hwetše dinyakwa tša bophelo, re swanetše go dira dithulaganyo tše itšego e sa le pele. (Die. 6:6-11) Eupša na e be e tla ba gabohlale go diriša nako ya rena e ntši le matla a rena go phegelela dilo tšeo di sa dulelego sa ruri? Ke therešo gore mokgatlo wa Jehofa o tšwela pele o rulaganya go aga Diholo tša Mmušo, meago ya lekala gotee le go dira mediro e mengwe yeo e tswalanago le Mmušo. Lega go le bjalo, mediro ye ka moka e a hola ka gobane morero wa yona ke go etiša pele dikgahlego tša Mmušo. E tla ba mo gobotse gore batho ka moka ba ineetšego go Jehofa ba etiše dilo tše bjalo pele ge ba dira dithulaganyo. Na o kgodišegile e le ka kgonthe gore o “tsoma Mmušo pele le toko ya [Jehofa]”?—Mat. 6:33.

“KE DI TŠEA E LE MAUDI”

10, 11. (a) Ke eng seo se bego se le bohlokwa go Paulo pele e eba Mokriste? (b) Ke ka baka la’ng pono ya Paulo e ile ya fetoga ka mo go feletšego?

¹⁰ Mafelelong, anke re hlahlobeng mohlala wa Paulo. Pele a eba Mokriste, o be a na le seo se bonagalago eka ke bokamoso bjo bo atlegilego. O be a rutilwe molao wa Sejuda ke yo mongwe wa barutiši bao ba tumilego kudu ba mehleng ya gagwe. Moperisita yo a phagamego wa Bajuda o be a mo neile matla a go dira dilo tše itšego. E bile o be a dira tšwelopele e kgolo kudu dithutong tša Bojuda go feta bontši bja dithaka tša gagwe. (Dit. 9:1, 2; 22:3; 26:10; Bagal. 1:13, 14) Lega go le bjalo, tšeo ka moka di ile tša fetoga ge Paulo a lemoga gore Jehofa ga a sa šegofatša setšhaba sa Bajuda.

¹¹ Paulo o ile a lemoga gore go ipeela pakane tshepedišong ya Bajuda go be go se na mohola go ya ka pono ya Jehofa; tshepedišo yeo e be e se na bokamoso. (Mat. 24:2) Motho yo yo e kilego ya ba Mofarisei o ile a ya bokgoleng bja go bolela gore ge a bapetša kwešišo ya gagwe e mpsha ya mabapi le merero ya Modimo le tokelo ya go ba bodireding  bja Bokriste, seo a kilego a nagana gore ke sa bohlokwa ga bjale o se lebelela e le “maudi.” Paulo o ile a tlogela go phegelela dithuto tša Bojuda gomme a neela matšatši ao a šetšego a bophelo bja gagwe mo lefaseng go boleleng ditaba tše dibotse.—Bala Bafilipi 3:4-8, 15; Dit. 9:15.

SEKASEKA DILO TŠEO O DI ETIŠAGO PELE

12. Pakane ya Jesu e kgolo e be e le efe ka morago ga gore a kolobetšwe?

¹² Noa, Moshe, Jeremia, Paulo le ba bangwe ba bantši bao ba swanago le bona ba dirišitše bontši bja nako ya bona le matla ba phegelela dilo tša moya. Ke mehlala e mebotse go rena. Go ba gona, Jesu ke mohlala o mogolo kudu go bahlanka ka moka bao ba ineetšego ba Jehofa. (1 Pet. 2:21) Ka morago ga go kolobetšwa, Jesu o ile a neela bophelo bja gagwe ka moka bja mo lefaseng go boleleng ditaba tše dibotse le go tumišeng Jehofa. Phetho yeo e lego molaleng go Mokriste yo a tšeago Jehofa e le Mong wa gagwe ke go lemoga gore selo seo se tlago pele bophelong bja gagwe e swanetše go ba go Mo hlankela. Na ke phetho yeo o e fihleletšego? Le gona re ka phegelela bjang dipakane tša moya mola ka lehlakoreng le lengwe re phetha boikarabelo bjo bongwe bjo re nago le bjona?—Bala Psalme 71:15; 145:2.

13, 14. (a) Bakriste ka moka ba ineetšego ba kgothaletšwa go naganišiša ka eng? (b) Batho ba Modimo ba ka kgotsofatšwa ke’ng?

¹³ Go theoša le nywaga, mokgatlo wa Jehofa o kgothaleditše Bakriste ka makga a mmalwa gore ba naganišiše ka taba ya ge e ba ba ka kgona go ba babulamadibogo gomme ba e rapelele. Ka mabaka a fapafapanego, maemo ga a dumelele ba bangwe ba bahlanka ba botegago ba Jehofa gore ba fetše palogare ya diiri tše 70 ka kgwedi modirong wa boboledi. Ga se ba swanela go nyamišwa ke seo. (1 Tim. 5:8) Eupša go thwe’ng ka wena? Na ruri maemo a gago a tloga a sa go dumelele go ba mmulamadibogo?

¹⁴ Gopola lethabo leo bontši bja batho ba Modimo ba ilego ba le hwetša sehleng sa Segopotšo sa lenyaga. Ka March, go bile le tokišetšo e kgethegilego yeo e bego e dumelela babulamadibogo ba go thuša go kgetha ge e ba ba ka fetša diiri tše 30 goba tše 50 tirelong ya tšhemo. (Ps. 110:3) Ba dimilione ba ile ba tsenela tirelo ya bobulamadibogo bja go thuša, gomme diphuthego di ile tša bonagala di thabišwa kudu ke seo. Na o ka beakanya lenaneo la gago e le gore o hwetše lethabo le swanago ka mo go oketšegilego? Mafelelong a letšatši le lengwe le le lengwe, ruri Mokriste yo a ineetšego o kgotsofatšwa kudu ke ge a kgona go bolela gore: “Jehofa, ke dirile sohle seo se lego matleng a ka tirelong ya gago.”

15. Pono ya mofsa wa Mokriste mabapi le thuto e phagamego e swanetše go ba efe?

¹⁵ Ge e ba o le kgauswi le go fetša sekolo, go ka direga gore o phetše gabotse mmeleng e bile ga o na boikarabelo bjo bontši. Na o kile wa naganišiša ka mo go tseneletšego ka go ba mmulamadibogo wa ka mehla? Ga go pelaelo gore baeletši bao ba lego dikolong ba dumela e le ka kgonthe gore o tla holega ge o ka phegelela thuto e phagamego ke moka wa itirela bokamoso mošomong wa boiphedišo. Lega go le bjalo, ba botile tshepedišo ye ya tša kgwebo le ya tša leago yeo e se nago bokamoso. Ka lehlakoreng le lengwe, ge o phegelela dilo tša moya, o tla ba o phegelela dipakane tša kgonthe le tšeo di tlago go dulela sa ruri. Le gona o tla ba o latela mohlala o phethagetšego wa Jesu. Kgetho e bjalo e bohlale e tla go thabiša. E tla go šireletša. E bile e tla bontšha gore o ikemišeditše go phelela boineelo bja gago go Jehofa.—Mat. 6:19-21; 1 Tim. 6:9-12.

16, 17. Ke dipotšišo dife tšeo di rotogago mabapi le mošomo wa boiphedišo gotee le go phegelela dilo tše dingwe?

¹⁶ Bontši bja bahlanka ba Modimo lehono ba šoma diiri tše ditelele e le gore ba hlokomele dinyakwa tša motheo tša malapa a bona. Lega go le bjalo, ba bangwe ba ka ba ba šoma diiri tše oketšegilego go sa nyakege.  (1 Tim. 6:8) Lefase la tša kgwebo le dira sohle seo le ka se kgonago go re kgodiša gore re ka se kgone go phela ka ntle le ditšweletšwa tša lona tše dintši gotee le didirišwa tše dingwe le tše dingwe tše difsa tša morago bjale. Eupša Bakriste ba therešo ga ba nyake gore lefase la Sathane le ba kgethele dilo tšeo di tlago pele maphelong a bona. (1 Joh. 2:15-17) Ge e le bao ba rotšego modiro, ke tsela efe e kaone yeo ba ka dirišago nako ya bona ge e se go ba tirelong ya bobulamadibogo, ka go etiša tirelo ya Jehofa pele?

¹⁷ Bahlanka ka moka ba ineetšego ba Jehofa ba ka ipotšiša gore: Pakane ya ka e kgolo ke efe bophelong? Na ke etiša dikgahlego tša Mmušo pele? Na ke ekiša boemo bja Jesu bja kgopolo bja go ikgafa? Na ke theetša keletšo ya Jesu ya gore ke mo latele ka go se kgaotše? Na nka beakanya lenaneo la ka e le gore ke fetše nako e ntši modirong wa go bolela ka Mmušo goba go phegelela dipakane tše dingwe tša moya? Gaešita le ge ga bjale maemo a sa ntumelele gore ke oketše tirelo ya ka, na ke tšwela pele ke hlagolela moya wa boikgafo?

“LE DIRE DILO TŠOHLE TŠEO A DI RATAGO”

18, 19. Ke eng seo o ka se rapelelago, gomme ke ka baka la’ng kgopelo e bjalo e ka thabiša Jehofa?

¹⁸ Go a thabiša go bona phišego ya batho ba Modimo. Lega go le bjalo, ba bangwe ba ka fo se ikwe ba kgahlegela go ba babulamadibogo goba go swanelegela go tsenela tirelo e bjalo—gaešita le ge maemo a bona a ba dumelela go dira seo. (Ek. 4:10; Jer. 1:6) Go ka thwe’ng ge maemo a le bjalo? Na ye e ka se be taba yeo o swanetšego go e rapelela? Ruri go bjalo. Paulo o boditše badumedigotee le yena gore Jehofa “ke yena yo a le fago mafolofolo, a le neago kganyogo le matla a gore le dire dilo tšohle tšeo a di ratago.” (Bafil. 2:13) Ge e ba o sa ikwe o tutueletšega go oketša bodiredi bja gago, kgopela Jehofa go go nea kganyogo le matla a go dira bjalo.—2 Pet. 3:9, 11.

¹⁹ Noa, Moshe, Jeremia, Paulo le Jesu ka moka e be e le banna ba ineetšego. Ba ile ba diriša nako ya bona le matla go phatlalatša molaetša wa Jehofa wa temošo. Ga se ba itumelela go šitišwa. Bofelo bja tshepedišo ye ya dilo bo batamela ka lebelo; ka go re’alo, rena ka moka bao re neetšego maphelo a rena go Modimo re swanetše go kgodišega gore re tšwela pele re dira sohle seo re ka se kgonago go latela mehlala ye e mebotse ya ka Mangwalong. (Mat. 24:42; 2 Tim. 2:15) Ka go dira bjalo, re ka thabiša Jehofa le go hwetša ditšhegofatšo tše dintši tše di tšwago go yena.—Bala Maleaki 3:10.

[Mongwalo wa tlase]

[Dipotšišo tša Thuto]

[Seswantšho go letlakala 21]

Batho ba ile ba se theetše temošo ya Noa

[Seswantšho go letlakala 24]

Na o kile wa naganišiša ka mo tseneletšego ka go ba mmulamadibogo wa ka mehla?