Ngera Uchul me a Omesiunged el mo er a Jehovah a Kirel el mo Kot?

“Ak mo ouchais a chisel a klungiolem, e ouchais a chisel osobel er kau.”​—PSALM 71:15.

NGMEKERANG A OMONGER?

Ngera uchul me a Noah, Moses, Jeremia, me a Paulus a ngiluu a Jehovah el mo kot er a chelsel a klengar er tir?

Ngera mo ngosukau el melilt er a mo rolel a klengar er kau?

Ngera uchul me ngsoam el nguu a omesiungem el mo er a Jehovah el mo kot?

1, 2. (a) Ngerang kongei el mo meruul er ngii a chad el mla tibir a rengul el mo er a Jehovah? (b) Ngngosukid el mo mekerang a kerebil a Noah, Moses, Jeremia me a Paulus?

 SEL mtibir er a rengum e bo metecholb el mo oltirakl er a Jesus e ke rullii a klou el tekoi er a klengar er kau. A telbilem el mo er a Dios a kot el klou a ultutelel el omelilt el kau a rullii. Ngdi ua omdu el kmo: ‘Jehovah, ak ngiltau el mo Mastang er ngak el kirel a rokui el tekoi el kuruul. Ak mesiungem. Mosisecheklak el mo meduch el ousbech a temek me aike el ngar er ngii er ngak me a duch er ngak el mesiou er kau. Momekrael er ngak er a bek el tekoi el kuruul.’

² A lsekum e ke mla tibir a rengum el Kristiano, e tiang a telbilem el mo er a Jehovah. Me ke mla rullii a kmal ungil e melemalt el tekoi el olechotel a llemesel a rengum. Me chelecha el bla mkengei er a Jehovah el mo mastang er kau, e ngmekera omousbech a temem? A kerebil a Noah, Moses, Jeremia me a apostol el Paulus a sebechel el ngosukid el mo ungil el merriter er tia el ker. Tir el rokui a kmal mle blak a rengrir el mesiou er a Jehovah. Me kede chelebangel a osisiu el tekoi el uai tir, me a tekoi el lullilt el mo meruul a osisecheklid el mo meduch el ousbech a temed.​—Matteus 28:19, 20; 2 Timoteus 3:1.

UCHEI ER A IELEB

3. Ngera me a blekeradel er chelechang a osisiu er a taem er a Noah?

³ A Jesus a ulemekesiu er a taem er a Noah er a taem er kid er a ledu el kmo: “Le be ldum a Ngelekel a chad e ngua sel taem er a Noah. . . . Te mlenga e melim, e mo bechiil e melibuk a chebechiil, el mo lmuut er sel sils ra bocha lsiseb ra Arhe a Noah. E sola e dimlak lolechesiu el mo lmuut er sera le me eeleb el okngemedeterir el rokui.” (Matteus 24:37-​39) A oumesingd er a rechad  er chelechang a di ua rechad er a taem er a Noah el mengemikr a uleklatk el ouchais a rechedal a Dios, e diak lolatk el kmo kede kiei er a uriul el sils. E a rebebil a mededenguul er a uldasu el kmo a Dios a mo olekngemed er a remekngit el chad. (2 Petrus 3:3-7) Me ngmilekerang er a lousbech a temel a Noah er sel taem el blekeradel a kmal mle mekngit?

4. Ngmilekerang er a lousbech a temel a Noah er a uriul er a Jehovah a lebsang a ngerechelel, e ngera uchul?

⁴ A Dios a dilu er a Noah el kmo ngmo olekngemed er a remekngit, e milsang a ileakl el ngerachel el mo meleketek er a Arhe el mo uchul a osobelir a rechad me a charm. (Genesis 6:13, 14, 22) Ngdirrek el uluuchais er a rechad el kirel a tekoi el bo loruul er ngii a Jehovah. A apostol el Petrus a omekedong er a Noah el kmo “ngikel omerk ra llemalt,” el belkul a kmo a Noah a millasem el ouchais er a rechad el kmo ngorechudel el taem el kirir el melodech a blekerdelir. (2 Petrus 2:5.) Omomdasu e ngmle ungil el techall el Noah me a telungalek er ngii a loruul a siobai er tir, e longaisichai er a resechelirir el osiik er a ungilbesul el rolel a klengar? Ngkmal dimlak el uaisei! Sel klemedengei er tir el kirel a tekoi el mo duubech a uchul, me ngdimlak lebechei a ngii di el tekoi er a klechad me bo longesang er tir.

A TEKOI EL LULLILT EL MO MERUUL A PRINCE ER A EKIPTEN

5, 6. (a) A skulel a Moses, ngmilengetmokl er ngii el kirel a ngerang? (b) Ngera uchul me a Moses a chiloit a kerruul me a ilteet er a beluu er a Ekipten?

⁵ Me bo dosaod er a kerebil a Moses. A ngelekel a Farao el redil a riredelii me ngmlukeroul el prince er a blil a Farao. Me ng “mlosisechakl ra bek el llomeserreng rar chad ra Egipten.” (Rellir 7:22; Exodus 2:9, 10) Me aika el osisechakl a milengetmokl er ngii el mo rredemelel a mo oureor el chedal a Farao. Ngmla er ngii a techellel el mo ngarbab el chad er a kabelment er tia el mesisiich el renged, e ngmai a betok el kerruul, me a ilteet. Me aika el tekoi ngmle meklou a ultutelel er a osengel a Moses?

⁶ A ulekeroul me a osisechakl el lesiluub er a mera el demal me a delal a uchul, me a Moses a mle medengei e uluumerang a telbilel a Jehovah el mo er a rechedal el Abraham, Isak, me a Jakob. Ngmle kerekikl el melatk er a blakerreng er ngii el mo er a Jehovah me a klengar er ngii er a ngar medal. Me ngmilekerang a Moses er sera bocha lekirel el melilt el mo prince er a Ekipten me a lechub e ngmo sibai el chad er a Israel? Ng millilt el “mo chuarm el obengterir a re chedal a Dios, e dimlak el soal el ngar a tedeb el deurreng er a klengit.” (Monguiu er a Hebru 11:24-​26.) E a uriul, e ngmillemolem el mecherei a Jehovah me ngomekrael er a klengar er ngii. (Exodus 3:2, 6-​10) Ngera uchul me ngmirruul el uaisei? E le nguluumerang a telbilel a Dios e mle medengei el kmo ngdiak a klungiolel a lolemolem el kiei er a beluu er a Ekipten. Me ngdi mle telkib e a Jehovah a ulemals er sel renged el ousbech a teruich el ringel. Me kid el mla tuib a rengud el  mo er a Jehovah ngera kede suubii er tiang? Ngkired el nguu a omesiunged el mo er a Jehovah el mo kot e diak bo demechesang er a urered e dosiik a kerruul me a deurreng er tia el beluulechad.

A JEREMIA A MLE MEDENGEI AIKE EL TEKOI EL MO DUUBECH

7. Ngera me a blekeradel er a taem er a Jeremia a di osisiu er a taem er kid?

⁷ A profet el Jeremia a dirrek el ngiluu a Jehovah el mo kot er a chelsel a klengar er ngii. A Jehovah a ulderchii el mo ouchais er a kerrekerilel el kirel a beluu er a Jerusalem me a Juda. Me ngsebeched el dmu el kmo, a Jeremia a kilie er a taem er a ulebongel, e le ngmle medengei el kmo sel mekngit el blekeradel a mochu nguemed.​—Jeremia 23:19, 20.

8, 9. (a) Ngera uchul me ngmle kirel el mesmechokl a uldesuel a Baruk? (b) Ngera kired el melatk er ngii sel doruul a turrekong er kid?

⁸ Me ngmilekerang a Jeremia? Ngdimlak losiik a ungilbesul rolel a klengar er a chelsel tia el kmedu el metemall el beluu. Ngklebelung el tekoi a bo loruul el uaisei. Engdi a oderchelel el Baruk a mlo meringel er ngii el mo medengei a tekoi el meketmeklang, me a Dios a ulemekrael er a Jeremia me ngdilu er ngii el kmo: “Mesang, a ikel ktileketek a kulemall, ma ikel kdilalem a kumadel. Tia kuruul er ngii er a beluu er rokir. E kau, kosiik a ngarbab el tekoi el di ekor kau? Bai lak mosiik. Ele . . . a kuba chelebuul el mor a rokui el chad. E ngdi kau a kusebelii a klengar er kau er a ikel rokui el beluu el cho bor ngii.”​—Jeremia 45:4, 5.

⁹ Ngdiak dodengei el kmo ngera el “ngarbab el tekoi” a lulsiik a Baruk. * Engdi kede medengei el kmo ngdimlak a belkul el tekoi, el di mo nguemed er sel taem el Babilon a mo mesisiich er a Jerusalem er a rak er a 607 er a uchei er a Kristus. Ngera kede suubii er tia el cheldecheduch? Ngkired el kutmokl a tekoi el mo uchul e ngsebeched el kiei el ngar er ngii aike el dousbech er a klengar er kid. (Osisechakl 6:6-​11) Engdi ngerang a klungiolel a lsekum kede mengoit er a klou el temed me a klisiched el osiik a tekoi el di tedeb a klungiolel? Me nguaisei, a cheldebechelel a Jehovah a melemolem el meleketek a beches el Blil a Ongdibel, obis er a branch, me a lmuut el bebil er a ureor. Engdi aika el ureor a kmal ngar er ngii a belkul, e le ngmelisiich er a ureor er a berkel a klumech er a Renged. Me ngkirir a remla tuib a rengrir el chedal a Jehovah el nguu a Rengedel a Dios el mo kot sel lolilt a turrekong er tir. Me kau, ke osiik er a renged el kot me a llemeltel a Jehovah?​—Matteus 6:33.

“AK UMES EL DI UA LE BESBAS”

10, 11. (a) Ngera ngmirruul a Paulus er a uchei er a bo el Kristiano? (b) Ngera uchul me a Paulus a ngildechii a klengar er ngii?

¹⁰ Me bo dosaod er a kerebil a Paulus. A uchei er a bo el Kristiano, e a rechad a ulemdasu el kmo ngkmal mo ungil a klengar er ngii. A Paulus a milsuub a Llach er a Rechijudea el obengkel a kot el ngarbab el sensei er sel taem, e dirrek el ngiluu a ngerachel el mloterekokl er ngii er a ngarbab el prist er a Judea. Me ngulengeriakl er a omesiungel el mo ngarbab el chad er a Judea er a delongelir tirke el mle ua klungel. (Rellir 9:1, 2; 22:3; 26:10; Galatia 1:13, 14) Engdi a rokui el tekoi er a klengar er ngii a mlengodech er sera bo lodengei el kmo a Jehovah a mla oltngakl er a rechad er a Judea.

¹¹ A Paulus a mlo medengei el kmo aike el ngar bab el tekoi er a Judea a dimlak a ultutelel er a osengel a Jehovah, e le ngdi kmedung el mo nguemed. (Matteus 24:2) Me ngika el mle Farisee er sera lobeketakl er a uldesuel a moktek er a Dios me a techall el mo mesiou er  ngii el Kristiano, e ngmlo omes aike el tekoi el lulemes er a uchei el kmo ngmeklou a ultutelel el di “ua besbas.” Me a Paulus a chiloit a rokui el tekoi el lurruul e mlo omerk er a klumech er a ungil el chais er a chelsel a klengar er ngii.​—Monguiu er a Filipi 3:4-8, 15; Rellir 9:15.

NGERANG A MEKLOU A ULTUTELEL EL TEKOI ER A OSENGEM?

12. Ngera el tekoi a mle klou a ultutelel er a osengel a Jesus er a uriul er a lemetecholb?

¹² A Noah, Moses, Jeremia, Paulus me a relmuut el bebil a milengoit a betok el temir me a klisichir er a omesiungir el mo er a Dios. Te kiltmeklii a ungil el kerebai el kired. E ngike el kot el ngarbab er a rokui el mla tuib a rengrir el mesiungel a Jehovah a Jesus. (1 Petrus 2:21) Me a uriul er a lemetecholb, e a Jesus a uluusbech er a klengar er ngii el omerk er a klumech er a ungil el chais e dirrek el milengebkall er a Jehovah. Me a Kristiano el omes er a Jehovah el Mastang er ngii a kirel el nguu a omesiungel el kirel a renged el mo kot er a chelsel a klengar er ngii. Me kau, nguaisei a uldesuem? Me ngmekerang e sebeched el meruul a betok el mo er a Jehovah e a osisiu el taem e kede remuul a ngerecheled er a klechad?​—Monguiu er a Psalm 71:15; 145:2.

13, 14. (a) Te muchelechel a remla tuib a rengrir el Kristiano el mo mekerang? (b) Ngera el klungiaol a sebechir a rechedal a Dios el mo dmeu a rengrir er ngii?

¹³ Ngar er aika el mereko el betok el rak, e a cheldebechelel a Jehovah a millemolem el melisiich er a Rekristiano el mo meluluuch el mo er a Jehovah me lebo er ngii a techellir el mo pioneer. Engdi a blekerdelel a klengar er a rebebil el blak a rengrir el mesiungel a Jehovah a uchul me ngdiak el sebechir el mo oureor el 70 el sikang er a bek el buil. Engdi ngdiak el kirir el mo mekngit a rengrir el kirel tia el tekoi. (1 Timoteus 5:8) E kau a kuk mekerang? Ngsebechem el mo pioneer?

¹⁴ Ka di molatk er sel deurreng el blo lolechesuar a rebetok el chedal a Jehovah er sel temel a Chedaol Blsoil er chelecha el rak. Sera Ongedei el Buil, e ngmlo er ngii a techall el mo sebechir a reauxilliary pioneer el di mo oureor el kirel a 30 me a lechub e ng 50 el sikang er sel buil. (Psalm 110:3) A rebetok el miliol a mlo auxilliary pioneer me a ongdibel a kmal mlo klou a deurreng er a chelsel. Me kau ngsebechem el kutmokl a temem el lmuut el mo auxiliary pioneer? Me kid el mla tuib a rengud el Kristiano a soad el bek el sils el dedu el kmo, “Jehovah, ak riruul aike el rokui el sebechek el kirel a omesiungek el eko er kau.”

15. Ngkirel el mo uangerang a osengel a ngeasek el Kristiano el kirel a skuul?

¹⁵ A lsekum ke tobeda er a skuul, e dirk mesisiich a bedengem e kesai a ngerechelem, e kau ke melatk el mo pioneer? Kede medengei el kmo a rechad er a skuul a oumerang el kmo ngmo uchul a klungiolem a lsekum ke mo er a ngarbab el skuul e lebo er ngii a ungil el urerem. Engdi a uldesuir a ultuil er a blekeradel er tia el beluulechad me a tekoi er a kerruul el di kmedu el mo nguemed. A lsekum ke nguu a omesiungem el mo kot, e ngbelkul a kmo ke oltirakl er a cherrungel el kerebil a Jesus, e meruul a ngar er ngii a ultutelel el ureor el mo uchul a ungil el klengar er kau. Me a chouaitia el omelilt a kmal mo uchul a deuil a rengum, e mo omekerreu er kau. Ngdirrek el ochotii el kmo ke oltaut er a telbilem el mo er a Jehovah.​—Matteus 6:19-​21; 1 Timoteus 6:9-​12.

16, 17. Ngera el ker a kirir a Rekristiano el di tir el oker el kirel a omesiungir el mo er a Jehovah?

¹⁶ A rebetok el mesiungel a Dios er chelechang a kirir el mengoit er a klou el taem el osiik aike el lousbech a telungalek er tir. Engdi a rebebil a kuk mengoit er a lmuut el klou el taem el mengereker me ngmla mo medeel er aike el lousbech. (1 Timoteus 6:8) Me tia el beluulechad el melisiich a tekoi er a siobai a  mengesuseu er kid el mo omdasu el kmo kede ousbech a betok e beches el klalo el mo er ngii el oteruul. Engdi a remera el Kristiano a kmal diak el sorir tia el beluulechad er a Satan a bo lomekrael a uldesuir. (1 Johanes 2:15-​17) E kuk mekerang el kirir tirke el mla retire? Sel kot el ungil el rolel el sebechir el ousbech a temir a sel lenguu a omesiungir el mo er a Jehovah el mo kot e mo pioneer.

¹⁷ Me a rokui el mla tuib a rengrir el mesiungel a Jehovah a sebechir el di tir el oker el kmo: Ngerang a klou a ultutelel el tekoi er a klengar er ngak? Ngak ak nguu a Renged el mo kot? Ak kongei el mo ousbech a temek me a klisichek el mesiou er a Dios el ua Jesus? Ngak ak melemolem el oltirakl a ulekrael er a Jesus? Ngsebechek el mo ungil el ousbech a temek el kilungii a omesiungek el mo er a Dios e meruul a lmuut el bebil er a ureor el kirel a Renged? Me a lsekum e ngdiak, e ngak ak dirk melasem el ousbech er a temek me a klisichek el mesiou er a Jehovah?

“OLEKIIS A URRUNGULIU E OLTAUT”

18, 19. Ngungil el moluluuch el kirel a ngerang, e ngera uchul me a chouaika el ongit a oldeu er a rengul a Jehovah?

¹⁸ Ngdmeu a rengud sel domes er a blakerreng er a rechedal a Dios. Engdi a rebebil a diak el semeriar el mo pioneer, alta ngngar ngii a techellir el meruul er tia el ureor, me a lechub e te omdasu el kmo te metitur. (Exodus 4:10; Jeremia 1:6) Ke mo mekerang a lsekum ke omdasu el uaisei? Moluluuch el olengit a ngeso er a Jehovah. A Paulus a dilu er a rekldemel er a klaumerang el kmo a Jehovah a “choureor ra chelsiu lolekiis a urrunguliu e oltaut, le tiakid a ungilbesul ra Dios.” (Filipi 2:13) Me a lsekum e ngdiak msemeriar el mo menglou er a omesiungem, e molengit er a Jehovah me lebeskau a urungulem me a duch er kau el mo meruul er tia el ureor.​—2 Petrus 3:9, 11.

¹⁹ A Noah, Moses, Jeremia, Paulus me a Jesus a rokui el mle blak a rengrir el mesiou. Te uluusbech a klisichir me a temir el omerk er a klemechel a Jehovah. Ngdimlak el bechei a ngii di el ngerang me longesang er tir. Me a ulebongel er tia el mekngit el blekeradel a kmal di kmedung; misei a uchul me kid el rokui el mla tuib a rengud el mo er a Dios a kired el mo blak a rengud e mo er a tkurrebab el klisiched el oltirakl aika el ungil el kerebai el medung er a Bades. (Matteus 24:42; 2 Timoteus 2:15) E sel doruul el uaisei, e kede mo oldeu er a rengul a Jehovah e dirrek el mukngeltengat.​—Monguiu er a Malakai 3:10.

[Footnote]

[Aike el Ker er a Suobel]

[Siasing el ngar er a 22 el llel]

A rechad a dimlak lorrenges a uleklatk er a Dios el lulemerk er ngii a Noah

[Siasing el ngar er a 25 el llel]

Kau, ke kora melatk el mo pioneer?