Dios serviyninchista ñawpaqman churasun

“P’unchay-ch’isiyaqmi simiywan willasaq chaninchapuwasqaykitapas qespichiwasqaykitapas.” (SAL. 71:15.)

¿IMA NISPAN KUTICHIWAQ?

¿Imaraykun Noé, Moisés, Jeremías, Pablopas Dios serviyta ñawpaqman churarqanku?

¿Ima tapuykunan yanapasunki kawsayniykipi aswan allin kaqta ruwanaykipaq?

¿Imaraykun decidisqa kashanki Dios serviyta kawsayniykipi ñawpaqman churanaykipaq?

1, 2. a) ¿Iman Diosman qokuy? b) ¿Imapin yanapawasun ñawpa tiempopi Diosta serviqkunaq ruwasqankumanta yachay?

JESUSPA discipulon kanapaq, Diosman qokuspa bautizakuspaqa imamantapas aswan allin ruwasqanchismi karqan. Kaytapas nisunman hinan karqan: “Jehová Diosniy, kunanmantaqa kawsayniyqa qanllapaqmi. Qanmi decidinki tiempoywan kaqniykunawan, yachasqaywanpas imachus ruwanayta, hinallataq imatachus ñawpaqta ruwanaytapas”, nispa.

² Diosman qokuspaqa chaytan Diosman prometerqanki. Chay allin ruwasqaykimantan “¡kusa!”, niykiku. Kunanqa kawsayniyki Diospaqtaq chayqa, ¿imatan tiempoykiwan ruwanayki? Chay tapuytan kutichisun Noemanta, Moisesmanta, Jeremiasmanta, apóstol Pablomantawan yachaspa, paykunaqa tukuy sonqonkuwanmi Diosta servirqanku. Ñoqanchispas paykunaq tiemponpi hinan kawsashanchis, chaymi Diosta servinankupaq decidesqanku yanapawasun tiemponchista allinta qhawarinanchispaq (Mat. 28:19, 20; 2 Tim. 3:1).

MANARAQ MILLP’UQ PARA KASHAQTIN

3. ¿Imaynapin kay tiempopi kawsay rikch’akun Noepa tiemponman?

³ Jesusmi kay tiempopi kawsayta tupanachirqan Noepa p’unchayninkunawan. Nirqanmi: “Imaynan Noepa p’unchayninkunapi karqan, chay hinallataqmi Runaq Churin hamuqtinpas kanqa”, nispa. Chay tiempopi runakunan “mikhusharqanku, ukyasharqanku, casarakusharqanku [...] Noepa arcaman haykusqan p’unchaykama, manataq imatapas repararqankuchu millp’uq unu chayamuspa llapanta millp’unankama” (Mat. 24:37-39). Kunanpas  askha runakunan mana reparankuchu tukukuy p’unchaykunapi kawsasqanchista, manan kasunkuchu Diospa siervonkunaq willasqanta. Kay pachapi millay runakunata Dios chinkachinanmanta willasqapas, Noepa tiemponpi hinan asikunku (2 Ped. 3:3-7). Ichaqa, ¿imatan Noé tiemponwan ruwarqan chhayna millay pachapi kawsaspa?

4. ¿Jehová Dios huk llank’ayta qoqtin, imatan tiemponwan ruwarqan Noé? ¿Imaraykun chayta ruwarqan?

⁴ Imachus yuyaykusqanta willaspan Diosqa huk llank’ayta Noeman qorqan, chaymi huk arcata ruwarqan runakunaq animalkunaq kawsayninpas ama chinkananpaq (Gén. 6:13, 14, 22). Runakunamanpas willarqanmi kay pachata Dios chinkachinanmanta. Noeqa kallpachakurqanmi imayna tiempopi kawsasqankuta runakunaman reparachinanpaq. Chayraykun apóstol Pedro Noeta suticharqan “chanin kawsaymanta willaq”, nispa (leey 2 Pedro 2:5). Ima niwaqtaq, ¿allinchu kanman karqan Noé familiantin negocioman qokuspa, hukkunamanta aswan allin qhawarisqa kananpaq kallpachakuynin? Manan. Paykunaqa, imachus pasananta yachaspan chaykunawan mana q’otuchikurqankuchu.

MOISÉS ALLINTA DECIDEN

5, 6. a) ¿Imapaqmi yaqapas Moisesta Egiptopi allinta yachachirqanku? b) ¿Imaraykun Moisés wikch’uykurqan Egipto nacionpa munachisqanta?

⁵ Kunanqa Moisesmanta yachasun, paytaqa faraonpa ususinmi palaciopi uywarqan, chayraykun “Egipto runakunaq tukuy yachayninta yachachirqanku” (Hech. 7:22; Éxo. 2:9, 10). Kamachikuq kananpaqchá yachachirqanku. Payqa atirqanmi Egipto nacionpi allin qhawarisqa kayta, qhapaq kayta, allin llank’ayta chaskispa kusisqa kawsaytapas. Ichaqa, ¿chaytachu munarqan?

⁶ Moisés wawallaraq kashaqtinmi tayta-maman yachachirqan Diosmanta. Chayraykuchá Abrahamman, Isaacman Jacobmanwan Jehová Dios prometesqanpi iñirqan. Payqa akllakunanmi karqan Egiptopi atiyniyoq kayta otaq kamachi kayta, ichaqa qhepaman kawsayninpi, Diospaq hunt’aq kananpipas yuyaykusqanraykun “Diospa llaqtanwan kuska muchuchisqa kayta” munarqan, “pisi p’unchaykunalla huchaq kusichikuyninpi kawsananmantaqa” (leey Hebreos 11:24-26). Qhepamanqa, kawsayninwan imachus ruwananpaqmi Diosta kasukurqan (Éxo. 3:2, 6-10). ¿Imaraykun chayta decidirqan? Payqa iñirqanmi Diospa prometesqankunapi, chayraykun yuyaykurqan Egipto nacionpi mana ima suyakuyninpas kasqanta. Chhayna yuyaykusqanqa allinmi karqan, pisi tiempollamanmi Diosqa chay nacionta chunka plagakunawan tukuchirqan. Moisespa ruwasqanwanqa sut’itan yachanchis, ¿reparashankichu chayta? Ñoqanchisqa Dios  serviyninchistan ñawpaqman churananchis, manan kay pachapi qhapaq kaytachu nitaq kusirikuytachu.

JEREMIASQA YACHARQANMI IMACHUS SUCEDENANTA

7. ¿Imaynapin kay tiempopi kawsay tupan Jeremiaspa p’unchayninkunawan?

⁷ Jeremiasmi Dios serviyta ñawpaqman churallarqantaq. Jerusalén, Judá llaqtapas mana kasukuspa wak dioskunata yupaychasqankuraykun, Diosqa Jeremiasta profetata churarqan juicionta willananpaq. Jeremiaspas “tukukuy tiempopi” hinan kawsarqan (Jer. 23:19, 20, NM). Payqa yacharqanmi chay tiempopi millay kawsay tukupunanta.

8, 9. a) ¿Imaraykun Baruc yuyaykusqanta cambianan karqan? b) ¿Imatan yuyaykunanchis hamuq tiempopaq imatapas ruwayta munaspa?

⁸ Chaykunata yachasqanman hinan, Jeremiasqa mana chay tiempopi imaymana kaqkunapichu afanakurqan. Chayta ruwaqtinqa yanqan kanman karqan. Baruc secretarionmi ichaqa chayta mana repararqanchu. Chayraykun Jeremiaswan kayta Dios willachirqan: “Perqasqaytan thunikapuni, tarpusqaytataqmi t’irakapuni. Chay hinallatataqmi ruwasaq kay pachantinpipas. ¿Qanqa allin kaqkunallatachu munanki? ¡Ama mañakuychu chaytaqa! Ñoqan kachamusaq hatun llakikunata llapa runa pataman, chaywanpas qanqa maytaña rinki chaypas kawsashaqllapunin ayqenki”, nispa (Jer. 45:4, 5).

⁹ Manan yachanchischu Barucpa maskhasqan ‘allin kaqkuna’ imachus kasqanta. * Ichaqa yachanchismi 607 watapi manaraq Jesús hamushaqtin Jerusalenta Babilonia atipaqtin chaykuna yanqapaq kasqanta. ¿Imatan chaywan yachanchis? Necesitasqallanchiswan kawsanapaqqa allin yuyaywanmi llank’ananchis (Pro. 6:6-11). Ichaqa, ¿allin yuyayniyoq kaychu kanman kay pachapi tukukuq mana valeq kaqkunapi tiemponchista kallpanchistapas usuchiy? Diospa llaqtanpi astawanña hatarichikushan huñunakuna wasikuna, sucursalkuna, hukkunaña chaypas manan yanqapaqchu, aswanpas Diospa Reinonmanta willakuykuna astawan aparikunanpaqmi. Chay yuyaywanmi llapa Dios serviqkunaqa hamuq tiempopi yuyaykuspa imatapas ruwananchis. ¿Cheqaqtapunichu “Diospa qhapaqsuyunta [Gobiernonta], chanin-kaynintawan ñawpaqtaqa” maskhashanki? (Mat. 6:33.)

“Q’OPATA HINA QHAWARINI”

10, 11. a) ¿Imakunapaqmi kallpachakusharqan Pablo manaraq cristiano kashaspa? b) ¿Iman Pablota yanaparqan yuyaykusqankunata saqenanpaq?

¹⁰ Pablomanta yachasun. Manaraq cristianoman tukuspaqa allin reqsisqa runan kanman karqan. Payqa judío leykunatan allin reqsisqa runawan estudiarqan, sacerdote umallikunamantataq autoridadta chaskirqan, chhaynapin wiñaymasinkunamanta judío religión ukhupi ñawparisharqan. (Hech. 9:1, 2; 22:3; 26:10; Gál. 1:13, 14). Ichaqa, chaykunatan saqepurqan judiokuna manaña Diospa bendicionninwan kasqanta yachaspa.

¹¹ Ñawpa tiempopi fariseoña Pablo karqan chaypas, repararqanmi judiokuna ukhupi allin qhawarisqa kayqa Diospaqqa mana imapaq valeq kasqanta (Mat. 24:2). Chayllaraq Diospa promesankuna yachasqanta, predicanan kasqantapas ancha allinpaqmi qhawarirqan,  chayraykun ñawpaqpi chaninpaq hap’isqankunataqa ‘q’opata hina qhawaripurqan’. Payqa Judío religiontan saqepurqan, tukuy tiemponwantaq Diosmanta allin willakuykunata willarqan (leey Filipenses 3:4-8, 15; Hech. 9:15).

¿IMATAN ÑAWPAQMAN CHURANANCHIS?

12. ¿Imatan Jesús ñawpaqman churarqan bautizakusqan qhepaman?

¹² Noé, Moisés, Jeremías, Pablo hukkunapas tiemponkuta kallpankutan Diospa munayninta ruwanankupaq utilizarqanku, chaytan ñoqanchispas ruwananchis. Astawanqa Jesustan qatikunanchis (1 Ped. 2:21). Bautizakusqan qhepamanmi tukuy kawsayninta qorqan kay pachapi allin willakuykunata predicananpaq, Diospa sutinta hatunchananpaqpas. Chay hinaqa, Dios serviytan ñawpaqman churananchis. ¿Chaytachu ruwashanki? ¿Imaynatan familianchispaq llank’aspapas Dios serviyninchista ñawpaqman churasunman? (Leey Salmo 71:15; 145:2.)

13, 14. a) ¿Imapaqmi kallpachakun llapa cristianokunata? b) ¿Imatan llapa cristiano tarinman?

¹³ Diospa llaqtanpiqa, llapa cristianokunatan kallpachakunpuni precursor kanankupaq Diosmanta mañakuspa qhawarikunankuta. Kawsayninkupi imaynapipas tarikusqankuraykun, wakin hunt’aq sonqo cristianokunaqa killapi qanchis chunka horata mana predicayta atinkuchu, chaywanqa manan llakikunankuchu (1 Tim. 5:8). Qanri, ¿atiwaqchu precursor kayta?

¹⁴ Kayta yuyariy: kay watapi Jesuspa wañusqanta yuyarinapaqmi askha iñiqmasikuna ancha kusisqa tarikurqanku. Marzo killapin llapa cristianokunata invitakurqan 30 otaq 50 horata predicaspa precursor auxiliar kanankupaq (Sal. 110:3). Waranqanpin cristianokuna chay invitacionta chaskikurqanku, hinan iñiq t’aqapi ancha kusikuy karqan. Chhaynaqa, ¿kallpachakuwaqchu qanpas precursor kanaykipaq? Kawsayninta Diosman qoq cristianoqa, kusisqa kaspan sapa tuta Diosta kayta ninman: “Kunan p’unchaymi tukuy atisqayta ruwarqani qanta servinaypaq”, nispa.

15. ¿Imatan cristiano wayna-sipas qhawarinan imatapas estudiayta munaspa?

¹⁵ Colegioykita tukushankiña chayqa, manaraqchá nishuchu ruwanaykikuna kashan, qhalitaqchá kashankipas. Chhaynaqa, ¿yuyaykurqankichu precursor regular kanaykipaq? Ichaqa, profesorniyki hukkunapas kallpacharqasunkichá allin profesional kaspa kay pachapi allin qhawarisqa kanaykipaq. Paykunaqa tukukapushaqña pachapin confianku. Ichaqa, sichus Diosta servinaykipaq kawsayniykita qonki chayqa, manan yanqapaqchu kanqa wiñaypaqtaqmi kanpas. Chaymantapas chay ruwasqaykiwanmi Jesusta qatikunki. Chhayna allin yuyaywan ruwasqaykiqa kusichisunkin, hark’asunkin mana allin kaqkunamanta, rikuchinkitaqmi Diosman qokusqayki hunt’asqaykita (Mat. 6:19-21; 1 Tim. 6:9-12).

16, 17. ¿Imakunatan tapukunanchis llank’aymanta hukkunamantapas?

¹⁶ Askha cristianokunan askha horakuna llank’anku familiankuta mantienenankupaq. Ichaqa, wakinqa nishutapaschá llank’ashanku (1 Tim. 6:8). Vendeqkunaqa imaymanatan munachiwanchis rantinanchispaq, mana chayta ruwaqtinchisqa manapas kusisqachu kawsasunman hinatan qhawarichiwanchis. Cheqaq cristianokunaqa manan Saqraq kamachisqan  pachapi allin qhawarisqa kaqkunapichu afanakunchis (1 Juan 2:15-17). Llank’asqankumanta jubilasqakuna, ¿imapin tiemponkuta aswan allinta utilizankuman? Precursor kaspa Diosta serviymi aswan allinqa.

¹⁷ Llapa cristianokunan tapukunanchis: “¿Imatan kawsayniypi astawan ruwayta munani? ¿Diospa Reinontachu ñawpaqman churani? ¿Jesús hinachu ñoqapas kay pachapi imaymana kaqkunata qhepaman churani? ¿Imaña kaqtinpas qatikushallaymanchu Jesusta? ¿Kallpachakuymanchu astawan predicanaypaq, Diospa llaqtanpi hukkunata ruwanaypaqpas? Imaynapi tarikusqayrayku manaña astawan predicayta atinichu chaypas, ¿tiempoyta kallpaytapas qoshanichu Diosta servishanallaypaq?”, nispa.

DIOSMI YANAPASUNKI

18, 19. ¿Imatan Diosmanta mañakuwaq? ¿Imaraykun chay ruwasqayki Diosta kusichinman?

¹⁸ Diospa llaqtanpi tukuy sonqo serviqkunata rikuspaqa kusikunchismi. Ichaqa, wakin cristianokunan tiemponku kashaqtinpas mana precursor kayta munankuchu otaq mana atinankupaq hina qhawarikunku (Éxo. 4:10; Jer. 1:6). Chhayna kaqtin, ¿imatan ruwawaq? Diospa yanapaynintan mañakunayki. Filipos llaqtapi cristianokunatan Pablo nirqan: “Paymi allin munayninman hina allinkaq ruwayta munachisunkichis hinaspa ruwachisunkichis”, nispa (Fili. 2:13). Sichus precursor kanaykipaq mana hayk’aqpas yuyaykurqankichu chayqa, Jehová Diosmanta mañakuy, paymi sonqoykipi wiñachinqa precursor kayta munanaykipaq, yanapasunkitaqmi chay ruwayta allinta aparinaykipaqpas (2 Ped. 3:9, 11).

¹⁹ Noé, Moisés, Jeremías, Pablo, Jesuspas iñiyniyoq runakunan karqanku. Tiemponkuta kallpankutan qorqanku Diospa juicionmanta willanankupaq, chaymi mana kay pacha kaqkunapichu afanakurqanku. Kay pachaqa tukukapushanñan, chaymi Diosman qokuq llapa cristianokuna kallpachakunanchis chay runakuna hina ruwanapaq (Mat. 24:42; 2 Tim. 2:15). Chayta ruwaspan Diosta kusichisun askha bendiciontataq chaskisunpas (leey Malaquías 3:10).

[Uranpi willakuy]

[Tapuykuna]

[21 paginapi dibujo]

Runakunaqa manan kasurqankuchu Noepa willasqanta

[24 paginapi foto]

¿Yuyaykurqankichu precursor regular kanaykipaq?