Doo U Mcivir U Yehova Una Lu Kwagh U Hiihii Ken Uma Wase Sha Ci U Nyi?

“Zwa wam ua shi ôron kwagh u perapera Wou didi, man u myom Wou, gadia m fa iyenge ve ga.” —PS. 71:15.

Ú NA MLUMUN WER NYI?

Ka nyi yange i mgbegha Noa man Mose man Yeremia kua Paulu ve, ve hemba veren ishima sha mcivir u Yehova ken uma ve?

Ka kwargbidyen u nyi ua wase u u̱ fan kwagh u ú er a uma wouwe?

U kange ishima wer u hemba veren ishima sha mcivir u Yehova sha ci u nyi?

1, 2. (a) Or ka nana tsegha iyol i nan sha ci u Yehova yô, kwagh la a tese ér nyi? (b) Aluer se time sha kwagh u Noa man Mose man Yeremia kua Paulu tsua u eren la yô, a wase se nena?

 KA WEA tsegha iyol you sha ci u Yehova, a er u batisema wea hingir or u dondon Yesu yô, ka kwagh u vesen je ka u er ye. Kwagh ne ka kwagh u hemban cii u ú er yô. Ka i lu inja er u ngu kaan wer: ‘Yehova, m soo mer lu Terem. Mo m ngu wanakiriki wou. M soo mer kaam er me vihin shighe wam yô, shi pasem kwagh u i doo u una hemba gban mo ishima la, man er me eren kwagh a mfe wam kua akaa agen a m lu a mi la cii nahan.’

² Aluer u ngu Orkristu u ú tsegh iyol you sha ci u Yehova yô, ka akaa a yange u tôndo zwa a na u ôr je ne. Man ka kwagh u vough u er ye. Nahan kpa, aluer u nenge wer Yehova ka Teru yô, gba u ú eren kwagh a shighe wou nena? Ikyav i Noa man i Mose man i Yeremia man i apostoli Paulu la ia wase se u timen sha mpin ne. Hanmô ve yange nan civir Yehova a uma u nan cii. Se kpa kape kwagh wase a lu je la. Akaa a yange hemba gban ve kwagh la, aa wase se u hiden nengen sha gbenda u se eren kwagh a shighe wase la.—Mat. 28:19, 20; 2 Tim. 3:1.

SHIGHE U MNGEREM MA DEEMEE LU A VA GA LA

3. Ayange a ase ne nga kwaghmôm a ayange a Noa la sha nyi gbenda?

³ Yesu yange tese ér ayange a ase man a Noa nga kwaghmôm. A kaa ér: “Man er lu sha ayange a Noa nahan, kape mve u Wan u or kpaa una lu la.” Ve lu “yan akaa, man akaa, eren kasev, nan kasev ken unoo zan zan ar sha iyange i Noa kar nyôr ken tso la, kpa ve fa ga zan zan mngerem ma deemee va, va kua a ve cii.” (Mat. 24:37-39) Er ior mba Aôndo ve lu  tan icin ér se mba ken ayange a masejime a Aôndo una tim tar ne nahan kpa, uumace kpishi nyian wa ikyo ga, mba eren kwagh sha ishima ve. Ior kpishi ka ve naha se tar sha ci u ve nenge ér Aôndo una tim mbaaferev ga, er ior mba sha ayange a Noa kpa yange ve nenge nahan. (2 Pet. 3:3-7) Er Noa lu sha shighe u taver nahan kpa, yange er kwagh a shighe na nena?

4. Noa yange er kwagh a shighe na nena shighe u Yehova na un tom laa, man lu sha ci u nyi?

⁴ Aôndo yange ôr Noa kwagh u un we ishima u eren yô, shi wa un tom kpaa, nahan Noa gba tso sha u waren uumace man inyam. (Gen. 6:13, 14, 22) Shi Noa yôô mtim u Yehova lu van a mi sha tar la kpaa. Apostoli Peteru yange kaa ér Noa lu or u “yôôn kwagh u perapera,” sha u tesen ér Noa yange nôngo kpoghuloo ér una wase mba wan ndor a na ve kav er mlu ve la yange vihi kpishi yô. (Ôr 2 Peteru 2:5.) U hen wer yange doo u Noa man tsombor na ma ve hemba veren ishima sha u eren kpenga sha u nôngon ér vea hemba mbagenev, shin vea tema i kpe ve iyoloo? Ei he! Er ve fa kwagh u lu van ken hemen la yô, ve palegh akaa a danen ior angara nahan.

KWAGH U WANTOR U IGIPITI UGEN TSUA U EREN LA

5, 6. (a) Yange i tese Mose “mfe u Mbaigipiti cii” sha ci u nyi? (b) Mose yange venda akaa a ma va zua a mi ken Igipiti la sha ci u nyi?

⁵ Hegen se time sha ikyav i Mose ver se la. Yange i yese un ken kwa u tor, ken tar Igipiti, wan u tor Farao u kwase tôô un, hingir wan na. Shighe u lu iyev la, i tese un “mfe u Mbaigipiti cii.” (Aer. 7:22; Eks. 2:9, 10) Alaghga yange i lu tesen un nahan sha u a va er tom ken kwa u Farao. Yange ma va hingir tagher tagher ken gomoti u hemba lun a tahav sha tar cii sha shighe na la, ior ma naan un icivir kpishi shi ma lu a akaa a injaa kpishi. Kpa lu akaa ne hemba gban Mose ishima yee?

⁶ A shi nan kpa, kwagh u mbamaren mba Mose kpôô kpôô tese un shighe u lu iyev la, wase un u fan kwagh u Yehova tôndo zwa ér una na uter nav mba tamen, Aberaham man Isaka man Yakob la. Mose na uityendezwa mban jighjigh. A shi nan kpa yange hen sha kwagh u mlu na u ken hemen man ikyaryan na vea Yehova la dedoo. Nahan shighe va kom u una tsua u lun wantor u ken Igipiti shin lun kpan u ken Mbaiserael yô, a tsua nyi? Mose tsua ér “guda u i̱ er a na dang a nongoior u Aôndo imôngo a u una lu ken mdoom ma isholibo ma ma lu sha anyangem kpeghee la.” (Ôr Mbaheberu 11:24-26.) Shighe kar yô, Mose dondo kwagh u Yehova kaa er a er a uma na la. (Eks. 3:2, 6-10) Mose er nahan sha ci u nyi? Sha ci u yange na uityendezwa mba Aôndo jighjigh. Yange kure ikyaa ér tar u Igipiti ngu a kwagh u injaa u nan un ga. Man ica i gba ga je tsô, Aôndo va a atsan pue sha tar la. Mba ve tsegh ayol a ve sha ci u  Yehova cii vea fatyô u henen kwagh ken kwagh ne. Doo u akaa a injaa man mkpeyol u ken tar ne una lu se kwagh u hiihii ga, kpa a lu Yehova man tom na.

YEREMIA YANGE FA KWAGH U LU VAN KEN HEMEN LA

7. Mlu u Yeremia lu ker la ngu kwaghmôm a u wase nena?

⁷ Orgen u mcivir u Yehova yange lu nan kwagh u hiihii yô, lu Yeremia. Yehova yange tsua Yeremia ér a lu profeti na, a yôô mtim u un lu van a mi sha ior nav mba ken Yerusalem man ken Yuda, mba ve undu mcivir u mimi la. Se fatyô u kaan ser Yeremia lu uma “sha ayange a masetyô.” Yange fa dedoo ér ica a gba ga tsô a tim tar u un lu ker la.

8, 9. (a) Er nan ve yange gba u a kôôm mhen u Baruki? (b) Ka nyi i doo u se umbur shighe u se lu wan ago sha akaa a ken hemen laa?

⁸ Er Yeremia na jighjigh ér tar u un lu ker la ua ngôôr timin ga yô, a er nena? Yange kera ker ér una er akaa a aa na a va kpe un iyol ken hemen ga. Yange una er nahan yô, ma lu ibumekwagh. Kpa Baruki, akawe u Yeremia hii u lun a mnenge na kposo sha kwagh ne. Nahan Yehova kaa a Yeremia ér a kaa akawe na ne ér: “Nenge, kwagh u M maa yô, Me yôhôr un, man kwagh u M môôr kpaa, Me wuhe un; kape á lu sha tar cii la. U ngu keren akaa a vesen sha ci wou iyol youwee? De kera keren a ga; gadia nenge, M ngu van a kwagh u bo sha uuma cii, . . . kpa Me gema uma wou a̱ hingir we er ka ishar u ye yô, sha ajiir a ú zenden cii.”—Yer. 45:4, 5.

⁹ Se fa “akaa a vesen” a Baruki lu keren sha ci na la jighilii ga. * Kpa se fa tsô ser, akaa ne lu a tsan gbem ga, lu akaa a Mbababilon vea va tim gar u Yerusalem ken inyom i 607 C.S.Y. (Cii man Shighe u Yesu) la yô, a kpa aa kar kera yô. Ka nyi se fatyô u henen ken kwagh ne? Saa se vande wan iyol sha ci u kwagh u ken hemen ve se zua a akaa a hange hange a kwagh a gbe se a mi la ye. (Anz. 6:6-11) Kpa aluer se mba vihin shighe wase kpishi kua agee ase sha er se lu a akaa a tsan gbem ga la yô, se lu eren kwagh sha kwaghfan ga. Ka mimi, nongo u Yehova ka u wa ago sha er a va maa Ayou a Tartor man afishi a branci kua ityom igen ken mcivir u Yehova yô. Kpa ityom ne ka i tsan gbem, sha ci u awashima u i ka u suen Tartor u Yehova. Doo u aluer mba ve tsegh ayol a ve sha ci u Yehova cii, mba wan ago sha akaa a ken hemen yô, ve hemban veren ishima sha mcivir u Yehova. U ngu ‘vanden keren tartor u Yehova man perapera na’ kpa?—Mat. 6:33.

“M NENGE A HINGIR MO HÔNGOR”

10, 11. (a) Cii man Paulu hingir Orkristu yô, yange hemba veren ishima sha nyi? (b) Er nan ve yange gema awashima na vindi vindii?

¹⁰ De se mase timen sha ikyav i Paulu. Cii man va hingir Orkristu yô, hanma or nengen ér ngu a tom u ua na una tema a kpe un iyol yô. Ortesen u Paulu hen atindi a Mbayuda sha ikyev na la, lu môm ken mba ve hemba duen iti sha ayange la yô. Paulu za ngohol tahav hen zegepristi. Lu zan ikyura ken kwaghaôndo u Mbayuda, hemban mbakov na kpishi. (Aer. 9:1, 2; 22:3; 26:10; Gal. 1:13, 14) Nahan kpa, va fe ér Yehova venda ikyurior i Mbayuda yô, uma na jimin cii gema.

¹¹ Paulu yange kav ér u lun tagher tagher ken kwaghaôndo u Mbayuda la kera gba kwagh sha ishigh ki Yehova ga; ikyurior la lu i tsan gbem ga. (Mat. 24:2) Paulu kav mbaawashima mba Aôndo, nahan fa er lu kwagh u icivirigh kpishi u eren tom u pasen kwagh la yô. Je yô a kaa ér un nenge akaa a yange gba un kwagh kpishi la  ér ka “hôngor,” shin ihyôghonough. Paulu undu kwaghaôndo u Mbayuda, gema pase loho u dedoo sha ayange a uma na shin tar cii.—Ôr Mbafilipi 3:4-8, 15; Aer. 9:15.

HIDE HEN SHA AKAA A A HEMBE GBAN WE KWAGH LA

12. Ka nyi Yesu yange hemba veren ishima sha mi shighe u i er un batisema kera laa?

¹² Noa man Mose man Yeremia kua Paulu man mbagenev kpishi yange ve hemba nan shighe ve man agee a ve sha u eren akaa ken mcivir u Yehova. Ve ver se ikyav i dedoo. Nahan cii kpa, ken mba ve civir Yehova cii, ka Yesu a ver ikyav i hemban doon cii ye. (1 Pet. 2:21) Yange mba eren Yesu batisema kera yô, a na uma na cii sha u pasen loho u dedoo shi nan Yehova icivir. Nahan doo u hanma Orkristu u nan dondon ikyav i Yesu shi nan lumun ér Yehova ka Ter u nan cii nana hemba nan ishima i nan u civir un. Ka kwagh u ú hembe nan ishima u eren laa? Man se er nan ve ityom i hange hange i se eren ken tar la ia tagher se u eren ityom i ken mcivir u Yehova ga?—Ôr Pasalmi 71:15; 145:2.

13, 14. (a) I wa Mbakristu mba ve tsegh ayol a ve sha ci u Yehova la kwagh ér ve er nyi? (b) Ka msaanyol u nyi ior mba Aôndo vea fatyô u zuan a mini?

¹³ Ken anyom a karen ken ijime la, nongo u Yehova taver Mbakristu asema sha ashighe kpishi ér ve er msen, ve nenge aluer ka u vea fatyô u eren tom pania yô. Atôakyaa nga kpishi a a ne ve i lu u mba ve civir Yehova sha jighjigh kpishi vea fatyô u pasen kwagh ahwa 70 hanma uwer ga yô. Doo u ishima ia vihi ve sha kwagh ne ga. (1 Tim. 5:8) Kpa we di ye? Mimi je, ka u ú fatyô u eren pania gaa?

¹⁴ Hide hen ase sha msaanyol u ior mba Aôndo kpishi yange ve zua a mi sha shighe u M-umbur u ken inyom ne la. Ken uwer u sha utar la, yange i na ian ér mba ve tee ishuen pania yô, vea fatyô u pasen kwagh ahwa 30 shin 50. (Ps. 110:3) Ior umiliôn imôngo yange ve er tom u ishuen pania la, kwagh ne va a msaanyol man iember ken atôônanongo kpishi. U fatyô u sôron ian sha er u zuan a imba msaanyol ne hanma shighe kpa? Orkristu u nan tsegh iyol i nan sha ci u Yehova ka nana eren ishuen pania yô, nan zua a mkom hanma iyange i nan dugh kwaghpasen cii, nahan nan fatyô u kaan ér, “Yehova m er tom wou sha afatyô wam cii.”

15. Ka nyi i doo u Orkristu u nan lu gumor nana tsua u eren shighe u nan lu ken makeranta laa?

¹⁵ Aluer zulum u ú bee makeranta yô, alaghga u ngu a ityom i eren kpishi ga, shi u ngu a gbong gbong iyol her. U hen sha kwagh u eren tom pania u keke la a ishima i môm kpa? Ka mimi, atica ou a ken makeranta aa nenge ér aluer u za makeranta u vesen yô, a wase u u̱ va zuan a tom u injaa ken tar. Nahan kpa, atica ne nga suur sha mbamzough mba uumace man inyaregh ki ki lu kwagh u tsan gbem ga la. Kpa, aluer u er tom ken mcivir u Yehova a uma wou yô, ú lu eren kwagh u injaa man u tsôron kpaa. Shi u lu dondon ikyav i Yesu i vough la. Kwagh u injaa u ú tsough ne una na u msaanyol, shi una kura u kpaa. Shi una tese ér u kange ishima wer u kure iceghzwa you hen Yehova.—Mat. 6:19-21; 1 Tim. 6:9-12.

16, 17. Ka mba mpin mba nyi i doo u Mbakristu vea pine ayol a ve sha kwagh u tom u uke man ityom i eren igene?

¹⁶ Mbacivir Aôndo kpishi nyian ka ve er tom shighe gôgônan sha er vea nenge sha mbamgbe mba icombor ve mba hange hange mbara yô. Nahan kpa, alaghga mbagenev ka ve shi ken tom i hembe er ma ve shi la. (1 Tim. 6:8) Mbakpengav ka ve nôngon tsung ér vea mee se se na  jighjigh ser saa se yam hanma kwagh u he u ve dugh a mi ken kasua cii ve, a kpe se iyol ye. Kpa Mbakristu mba mimi yô, ve soo ér tar u Satan ne u tese ve kwagh u vea hemba veren ishima sha mi ga. (1 Yoh. 2:15-17) Hide mba ve mem tom u uke la de ye? Kwagh u a hembe doon u vea er a shighe ve yô, ka u eren tom u pania shi hemban nan ishima sha kwagh u mcivir u Yehova.

¹⁷ Doo u mba ve tsegh ayol a ve sha ci u Yehova cii vea pine ayol a ve ér: Ka nyi m hemba veren ishima sha mi ken uma wama? M ngu hemban veren ishima sha kwagh u Tartor kpa? M ngu dondon ieren i Yesu i tangen iyol ga la kpa? M ngu ungwan kwaghwan u Yesu shi zan hemen u dondon un kpa? Me fatyô u sôron shighe wam sha er me kôrcio u seer pasen kwagh shin eren ityom igen ken mcivir u Yehova kpa? Aluer mlu wam nam ian i seer eren Yehova tom hegen ga kpa, m ngu zan hemen u lun a ieren i tangen iyol ga la her kpa?

“A̱ SAR NE, SHI NE̱ EREN SHA MI”

18, 19. Ka nyi i doo u ú sôn Yehova, man imba msen ne una doo Yehova sha ci u nyi?

¹⁸ Ka sea nenge a gbashima u ior mba Aôndo ve tese la nahan i doo se kpen kpen. Nahan kpa, alaghga mlu u mbagenev una na ve ian i eren tom ne, kpa ve ayol a ve vea lu a ishima i eren u ga, shin vea nenge ér ve kuma u eren u ga. (Eks. 4:10; Yer. 1:6) Aluer ka u nahan yô, u er nena? Sôn Yehova a wase u. Paulu yange kaa a mbananjighjigh a na imôngo ér ka Yehova “A lu eren tom ken a ven ye, sha u kwagh u a doo Un la a̱ sar ne, shi ne̱ eren sha mi kpaa.” (Fil. 2:13) Nahan aluer u ngu a isharen i seer eren tom u pasen kwagh ga yô, sôn Yehova a na u isharen man agee a eren kwagh ne.—2 Pet. 3:9, 11.

¹⁹ Noa man Mose man Yeremia man Paulu kua Yesu cii yange ve lu mba civir Aôndo sha jighjigh. Yange ve yôô icintan i Yehova a shighe ve man agee a ve cii. Ve de ér akaa agen a dan ve u eren tom ne ga. Mkur u tar ne mgbôghom, sha nahan yô, gba u se mba se tsegh ayol a ase sha ci u Aôndo cii se nôngon sha gbashima u dondon ikyav i doon tsung i ior mba i er kwagh ve ken Bibilo la. (Mat. 24:42; 2 Tim. 2:15) Aluer se mba eren nahan yô, se lu eren ishima i Yehova shi se zua a averen kpishi je.—Ôr Malaki 3:10.

[Ngeren u shin kpe]

[Mbampin Mba Ngeren u Henen]

[Foto u sha peeji 21 la]

Ior yange ve wa icintan i Noa la ikyo ga

[Foto u sha peeji 24 la]

U hen sha kwagh u eren tom pania u keke la a ishima i môm kpa?