Nkaambo Nzi Ncotweelede Kusaanguna Kucita Mulimo Wa Jehova?
Nkaambo Nzi Ncotweelede Kusaanguna Kucita Mulimo Wa Jehova?
“Mulomo wangu ulaluula bululami bwako alufutuko lwako buzuba boonse.”—INT. 71:15.
INO INGA MWAINGULA BUTI?
Ncinzi Nowa, Musa, Jeremiya, alimwi a Paulo ncobakali kubikkila kapati maano mubuumi bwabo?
Ncinzi ncomweelede kucita kutegwa mubone mbomweelede kububelesya buumi bwanu?
Nkaambo nzi ncomukanzide kusaanguna kucita mulimo wa Jehova?
1, 2. (a) Ino kulyaaba kuli Jehova nkwacita umwi aumwi wesu kutondezya nzi? (b) Mbuti mbotukonzya kugwasyigwa kwiinda mukulanga-langa kusala nkwaakacita Nowa, Musa, Jeremiya alimwi a Paulo?
CIINDI nimuba basikutobela ba Jesu balyaabide alimwi babbapatizyidwe, mubweza ntaamu iiyandika kapati. Kulyaaba kuli Leza nkusala kuyandika kapati nkomukonzya kucita lwanu kumugama. Cili mbuli kuti mwaamba kuti: ‘Jehova, ndiyanda kuti ube Simalelaangu mubuumi bwangu boonse. Ndili mubelesi wako. Ndiyanda kuti kondaambila mbondeelede kubelesya ciindi cangu, nzyintu nzyondeelede kubikkila maano, alimwi ambondikonzya kubelesya lubono amulimo ngondizyi.’
2 Ikuti kamuli Munakristo uulyaabide, mubufwaafwi eeci ncecisyomezyo ncimwakasyomezya Jehova. Eelo kaka mwakacita kabotu kapati kusala boobu; ooku nkokusala kuluzi alimwi kwabusongo. Nikuba boobo, caboola kumakani aambomubelesya ciindi, ino kuzyiba kuti Jehova ngu Simalelaanu caamba nzi? Cikozyanyo ca Nowa, Musa, Jeremiya, alimwi aca mwaapostolo Paulo cilakonzya kutugwasya kuulanga-langa mubuzyo ooyu. Umwi aumwi wabo wakali mubelesi uulyaabide camoyo woonse kuli Jehova. Bukkale bwesu bulikozyenye abukkale bwabo. Kusala nkobakacita ikujatikizya zyintu nzyobakali kubikkila kapati maano kulakonzya kutukulwaizya kulanga-langa mbotucibelesya ciindi.—Mt. 28:19, 20; 2 Ti. 3:1.
ZAMBANGULWE KALITANACITIKA
3. Ino mazuba eesu akozyenye buti amazuba aa Nowa?
3 Jesu wakatondezya kukozyanya kuliko akati kamazuba aa Nowa amazuba eesu. Wakaamba kuti: “Mbubonya mazuba aa Nowa mbwaakabede, akwalo kubako kwa Mwana wamuntu mbokuyooba. . . . Bakali kulya akunywa, baalumi kukwata abakaintu kukwasyigwa kusikila mubuzuba Nowa mbwaakanjila mubwato, pele tiibakabikkila maano kusikila Zambangulwe lyakaboola akubatola boonse.” (Mt. 24:37-39) Mazuba aano bantu banji tababikkili maano kuciindi ncotupona. Tabakubikkili maano kucenjezya kwababelesi ba Leza. Mbubwenya mbuli bantu bamumazuba aa Nowa, bamwi baladooneka kuti naa Leza uyoobweza ntaamu muzyintu zicitika munyika. (2 Pe. 3:3-7) Nikuba boobo, ino Nowa wakacibelesya buti ciindi ncaakajisi mubukkale oobu bukatazya?
4. Mbuti mbwaakacibelesya Nowa ciindi ncaakajisi naakapegwa mulimo a Jehova, alimwi nkaambo nzi?
4 Nowa naakaambilwa makanze aa Leza akupegwa mulimo, wakayaka bwato kutegwa bantu abanyama bakafwutuke. (Matl. 6:13, 14, 22) Nowa alimwi wakaambilizya lubeta lwa Jehova ilwakali afwaafwi. Mwaapostolo Petro waamba Nowa kuti wakali “mukambausi wabululami,” kutondezya kuti Nowa wakabeleka canguzu kugwasya basimukobonyina kuti bazyibe ntenda yakali kuboola. (Amubale 2 Petulo 2:5.) Sena muyeeya kuti nicakamugwasya Nowa abamukwasyi wakwe nibakabikkila kapati maano kutola ambele makwebo, kuba alubono lunji kwiinda bamwi, naa kuba abukkale bwakuliiba? Peepe! Akaambo kakuzyiba cakali kuboola kumbele, kunyina nibakabikkila maano kuzyintu zili boobu.
KUSALA KWA SILUTWE WAKU EGEPITA
5, 6. (a) Nkaambo nzi Musa ncaakayiisyigwa busongo bwabana Egepita? (b) Nkaambo nzi Musa ncaakazikakila zyoolwe nzyaakapegwa mu Egepita?
5 Lino, atulange-lange cikozyanyo ca Musa. Musa wakali mwana musankwa ngwaakakomezya mwana aa Farao musimbi, alimwi wakakomenena muŋanda yamwami. Kacili silutwe mwana, wakayiisyigwa “busongo boonse bwabana Egepita.” (Mil. 7:22; Kul. 2:9, 10) Cakutadooneka, wakatambula lwiiyo luli boobu kutegwa akapegwe mulimo muŋanda ya Farao. Musa naakaba acuuno cipati mumfwulumende yakajisi nguzu mumazuba aayo, kajisi zyintu zyoonse zyakulikondelezya azyoolwe zyalo izyakali kulangilwa akaambo kakupegwa cuuno eeci cisumpukide kapati. Sena eezyi nzyezyintu Musa nzyaakali kuyanda?
6 Akaambo kalwiiyo ndwaakatambula kuzwa kubazyali bakwe beni-beni kacili mwana, kulangilwa kuti Musa wakalizyi Jehova ncaakasyomezya Abrahamu, Izaka alimwi a Jakobo. Musa wakazisyoma zisyomezyo eezyo. Kulibonya kuti wakali kuyeeya kujatikizya buumi bwakwe bwakumbele alimwi akusyomeka kwakwe kuli Jehova. Aboobo, ncinzi ncaakasala ciindi nicakasika kuti asale akati kakuba silutwe waku Egepita naa kuba muna Israyeli muzike? Musa “wakasala kupenzyegwa antoomwe abantu ba Leza muciindi cakulikkomanisya acibi muzyakulikondelezya zyakaindi kaniini buyo.” (Amubale Bahebulayo 11:24-26.) Mukuyakwaciindi, wakatobela busolozi bwa Jehova bujatikizya mbwaakeelede kububelesya buumi bwakwe. (Kul. 3:2, 6-10) Nkaambo nzi Musa ncaakacitila boobo? Akaambo kakuti wakali kuzisyoma zisyomezyo zya Leza. Wakabona kuti kunyina bubotu mbwaakali kuyoojana mu Egepita. Inzya, kakutanainda ciindi cisi eeci cakasikilwa zipenzyo zili kkumi kuzwa kuli Leza. Sena mwacibona ciiyo kuli baabo balyaabide kuli Jehova mazuba aano? Muciindi cakubikkila maano kumulimo ngobayanda kucita naa zyakulikondelezya zyamubweende oobu bwazyintu, beelede kubikkila kapati maano kuli Jehova amulimo wakwe.
JEREMIYA WAKALIZYI CAKALI KUYOOCITIKA
7. Ino bukkale bwa Jeremiya bukozyenye buti abukkale bwesu?
7 Mwaalumi umbi iwakabikka mulimo wa Jehova mubusena bwakusaanguna wakali musinsimi Jeremiya. Jehova wakamupa mulimo Jeremiya kuti abe musinsimi akukambauka mulumbe walubeta ilwakali kuyoosikila Jerusalemu iwakaleya alimwi a Juda. Munzila imwi, Jeremiya wakali kupona “kumamanino aaciindi.” (Jer. 23:19, 20) Wakalizyi kabotu-kabotu kuti bweende bwazyintu bwamuciindi cakwe kunyina nibwakali kuyoozumanana mbubwenya mbobwakabede.
8, 9. (a) Nkaambo nzi kuyeeya kwa Baruki ncokwakali kuyandika kululamika? (b) Ncinzi ncotuteelede kuluba ciindi nitusala zyakucita?
8 Mbuti mbwaakagwasyigwa Jeremiya akaambo kakusyoma cakali kuyoocitika? Kunyina naakasola kulijanina zyintu zinji mubweende oobu ibwakali afwaafwi kumana, nkaambo eeci nicatakamugwasya. Nikuba boobo, kwaciindi cili mbocibede mulembi wa Jeremiya, Baruki, kunyina naakali kubikkila maano kuzyintu zyakali kucitika. Aboobo, Leza wakasololela Jeremiya kwaambila mulembi wakwe kuti: “Ncobeni ncindakayaka ndacimwaya, ancindakabyala ndacinonkola, nkukuti nyika yoonse. Lino webo, sa ulaliyandawida zintu zipati? Utaziyandauli pe. Nkaambo ncobeni njooletela bantu boonse buyo mapenzi, . . . pele buumi bwako, njookupa mbubo bube bulumbu bwako koonse koonse kufumbwa nkoya.”—Jer. 45:4, 5.
9 Mubwini, tatuzyi “zyintu zipati” nzyaakali kulilangawida Baruki. * Nikuba boobo, tulizyi kuti zyakali zyintu zyatakali kuyoomugwasya kumbele, zyintu zyakali kuyoomana ciindi bana Babuloni baakusaala Jerusalemu mu 607 B.C.E. Sena mwacibona ciiyo kulindiswe? Kutegwa tujane ziyandika zyamubuumi tweelede kulibambila zyakumbele. (Tus. 6:6-11) Eelo kaka tacili cabusongo kubelesya ciindi cinji anguzu kutegwa tuyandaule zyintu zyakaindi buyo kasyoonto! Nikuba boobo, mbunga ya Jehova yazumanana kubikka bubambe bwakuyaka Maanda aa Bwami mapya, mitabi, alimwi akucita milimo imbi ya Bunakristo. Pele makanze aali boobo alagwasya akaambo kakuti ajisi makanze aakusumpula ziyandika zya Bwami. Eelo kaka inga cainda kubota ikuti bantu ba Jehova boonse balyaabide baba amakanze aali boobu nibasala zyakucita! Kuzwa ansi aamoyo wanu, sena ncobeni “[m]usaanguna kuyandaula Bwami abululami [bwa Jehova]”?—Mt. 6:33.
“ZYINTU ZYOONSE NDIZIBONA KUTI NZYABUYO”
10, 11. (a) Ncinzi Paulo ncaakali kubikkila kapati maano katanaba Munakristo? (b) Nkaambo nzi Paulo ncaakacincila makanze aakwe cakumaninina?
10 Camamanino, atulange-lange cikozyanyo ca Paulo. Katanaba Munakristo, wakalijisi mulimo iwakali kulibonya mbuli kuti wakali kuyoomupa kukkala kabotu. Wakaiya mulawo waba Juda kuzwa kumwiiyi iwakadumide kapati mumazuba ngaakali kupona. Wakalipedwe nguzu kuzwa kuli basilutwe babapaizi iba Juda. Alimwi wakali kuyaambele kapati mubukombi bwaba Juda kwiinda bamusela wakwe banji. (Mil. 9:1, 2; 22:3; 26:10; Gal. 1:13, 14) Nikuba boobo, zyoonse eezyi zyakacinca ciindi Paulo naakazyiba kuti Jehova kunyina naakali kulongezya ba Juda kabali cisi.
11 Paulo wakazyiba kuti mulimo mubweende bwaba Juda tiiwakajisi mpindu kuli Jehova pe; tiiwakali kugwasya. (Mt. 24:2) Muntu ooyu iwakali mu Farisi kaindi, wakaamvwisya makanze aa Leza, alimwi wakalizyi kuti cakali coolwe cipati kupegwa mulimo wakukambauka makani mabotu. Alimwi zyintu nzyaakali kubikkila kapati maano wakazibona kuti zyakali “zyabuyo” naa tombe. Paulo wakabuleka bukombi bwaba Juda akwaaba buumi bwakwe boonse bwaanyika kumulimo wakukambauka makani mabotu.—Amubale Bafilipi 3:4-8, 15; Mil. 9:15.
AMUZILANGE-LANGE ZYINTU NZYOMUBIKKILA KAPATI MAANO
12. Ncinzi ncaakabikkila maano Jesu kuzwa naakabbapatizyigwa?
12 Nowa, Musa, Jeremiya, Paulo, alimwi abambi buyo bali mbuli mbabo, ciindi cinji ncobakajisi bakacibelesya mumulimo wa Leza. Bakatusiila zikozyanyo zibotu. Cakutadooneka, Jesu ngomubelesi wa Jehova uulyaabide kwiinda boonse. (1 Pe. 2:21) Naakabbapatizyigwa, Jesu wakabelesya ciindi cakasyeede mubuumi bwakwe bwaanyika mukukambauka makani mabotu akulemeka Jehova. Ku Munakristo uuzyi kuti Jehova ngo Simalelaakwe, ubona kuti kubelekela Leza ncecintu nceelede kusaanguna kucita mubuumi bwakwe. Sena ooku nkokusala kwanu andinywe? Mbuti kucita mulimo wa Leza mbokukonzya kweendelana akucita milimo yakumubili iiyandika?—Amubale Intembauzyo 71:15; 145:2.
13, 14. (a) Banakristo boonse balyaabide bakulwaizyigwa kucita nzi? (b) Nkukkutila kuli buti nkobakonzya kukkomana ankuko bantu ba Leza?
13 Kwamyaka minji, mbunga ya Jehova cakwiinduluka-induluka yakulwaizya Banakristo kuti baapailile makani aajatikizya kutalika mulimo wabupainiya. Akaambo katwaambo tusiyene-siyene, bukkale bwababelesi basyomeka ba Jehova bamwi tabubazumizyi kukambauka mawoola aali 70 mwezi amwezi. Tabeelede kutyompwa pe. (1 Ti. 5:8) Mbuti nywebo kumugama? Sena ncobeni inga tiimwacikonzya kucita bupainiya?
14 Amulange lukkomano ndobakajana bantu ba Leza banji ciindi ca Ciibalusyo mwaka uuno. Mumwezi wa March, bubambe bwaalubazu bwakagwasya bapainiya bakugwasyilizya kusala akati kakubeleka mawoola aali 30 naa 50 mumulimo wamumuunda. (Int. 110:3) Mamiliyoni aabakwesu abacizyi bakacita bupainiya bwakugwasyilizya, kwakali lukkomano akukondwa mumbungano zisiyene-siyene. Sena inga mwabikka bubambe bwakucita bupainiya ciindi aciindi kutegwa andinywe mukakkomane mbubwenya? Ikuti Munakristo uulyaabide wakacita oobu, ulajana lukkomano kapati, akucikonzya kwaamba kuti: “Jehova, ndacita zyoonse nzyondikonzya mumulimo wako.”
15. Makanze nzi ngeelede kuba angawo Munakristo mukubusi caboola kumakani aalwiiyo lwakunyika?
15 Ikuti kamuli afwaafwi kumanizya cikolo, inga kamujisi buumi buli kabotu alimwi azyintu zisyoonto zyakucita. Sena kuli nimwakakkala ansi kuyeeya kutegwa mubone naa inga mwatalika mulimo wabupainiya bwaciindi coonse? Cakutadooneka, basikupa lulayo kucikolo basyoma kuti mweelede kujana lwiiyo lwaatala akusala ncomweelede kucita kutegwa mukakkale kabotu. Nikuba boobo, nzyobasyoma ziyeeme abweende bwazyintu bwalo butagwasyi kwaciindi cilamfwu. Kulubazu lumwi, kusala akuzuzikizya mbaakani zyakumuuya, ncecintu ciinda kubota alimwi ciletela lukkomano. Alimwi kucita boobu kutondezya kuti mutobela cikozyanyo ca Jesu iciinda kubota. Kusala kuli boobu kuyoomupa kukkomana. Kuyoomukwabilila. Alimwi kuyootondezya kuti mukanzide kuzumanana kupona kweelana akulyaaba kwanu.—Mt. 6:19-21; 1 Ti. 6:9-12.
16, 17. Mibuzyo nzi iibuzyigwa caboola kumakani aamulimo wakumubili alimwi akucita zyintu zimbi zitali zyakumuuya?
16 Babelesi ba Leza banji mazuba aano balabeleka mawoola manji kutegwa bajane ziyandika zyamumukwasyi. Nikuba boobo, bamwi balakonzya kuti kababeleka mawoola manji ateelede. (1 Ti. 6:8) Basimakwebo balacita zyoonse nzyobakonzya kutegwa tusyome kuti tatukonzyi kupona ikuti katutajisi zyintu zinji alimwi akuti katutajisi zibelesyo zipya nzyobasambala. Banakristo bakasimpe tabayandi kuti nyika ya Saatani ibasalile ncobeelede kusaanguna kucita. (1 Jo. 2:15-17) Kuli baabo ibakacileka kubeleka mulimo wakumubili akaambo kakuti myaka yabo yakucita litaya yakakkwana, nzila mbotu yakubelesya ciindi cabo nkucita bupainiya, kubikka mulimo wa Jehova mubusena bwakusaanguna.
17 Boonse babelesi ba Jehova balyaabide beelede kulibuzya kuti: Ncinzi ncendibikkila kapati maano mubuumi bwangu? Sena ndisaanguna kucita ziyandika zya Bwami? Sena ndiiya kulyaaba kwa Jesu? Sena ndilalutobela lulayo lwa Jesu lwaamba kuti ndeelede kumutobela cakutaleka? Sena ndeelede kucinca mulongo wazyintu nzyendicita kutegwa ndicikonzye kubelesya ciindi cinji mumulimo wakukambauka makani aa Bwami naa milimo imwi yakumuuya? Nikuba kuti bukkale bwangu aciindi ecino tabundizumizyi kuyungizya mulimo wangu wakumuuya, sena ndicizumanana kutondezya muuya wakulyaaba?
‘NGUUMUPA KUTI KAMUKANZA ALIMWI ANGUZU ZYAKUCITA ZYINTU’
18, 19. Makani nzi ngotweelede kupailila, alimwi nkaambo nzi kulomba kuli boobu ncokumukkomanisya Jehova?
18 Busungu bwabantu ba Leza ncintu cikkomanisya kapati. Nikuba kuti bamwi bukkale bulakonzya kubazumizya kucita bupainiya, inga kabatajisi luyandisisyo lwakucita bupainiya naa kulimvwa kuti tabasiki azyeelelo zyakuba bapainiya. (Kul. 4:10; Jer. 1:6) Ncinzi ncibeelede kucita? Eeci nceciindi cibotu cakwaapailila makani aaya! Paulo wakaambila basyominyina kuti Jehova “ngonguwe uumupa nguzu, uumupa kuti kamukanza alimwi anguzu zyakucita zyintu akaambo kaceeco cimubotela.” (Flp. 2:13) Ikuti kamutajisi luyandisisyo lwakuba bapainiya, amumulombe Jehova kutegwa amugwasye kuba amakanze alimwi anguzu zyakucita oobo.—2 Pe. 3:9, 11.
19 Nowa, Musa, Jeremiya, Paulo, alimwi a Jesu boonse bakali baalumi balyaabide. Bakabelesya ciindi anguzu zyabo kwaambilizya mulumbe wa Jehova wakucenjezya. Bakali kubikkila maano kumulimo wabo. Mamanino abweende oobu bwazyintu alaafwaafwi; aboobo toonse buyo nitwakaaba buumi bwesu kuli Leza, tweelede kubikkila maano kubona kuti twazumanana kucita zyoonse nzyotukonzya mukutobela zikozyanyo eezyi zibotu zyamu Magwalo. (Mt. 24:42; 2 Ti. 2:15) Kwiinda mukucita boobo, tulakonzya kumukkomanisya Jehova akujana zilongezyo zinji.—Amubale Malaki 3:10.
[Bupanduluzi buyungizidwe]
^ munc. 9 Amubone Ngazi Yamulindizi ya September 15, 1997 peeji 12 minc. 14-16.
[Mibuzyo yaciiyo]
[Cifwanikiso icili apeeji 21]
Bantu kunyina nibakakubikkila maano kucenjezya kwa Nowa
[Cifwanikiso icili apeeji 24]
Sena kuli nimwakakkala ansi kuyeeya kutegwa mubone naa inga mwatalika mulimo wabupainiya bwaciindi coonse?
