¿Tuku xlakata pulana nawiliyaw xtaskujut Jehová?
¿Tuku xlakata pulana nawiliyaw xtaskujut Jehová?
«Nakmakatsininan [...] la kilakgmaxtunita y la kilekgawanita.» (SAL. 71:15)
¿TUKU XKGALHTINANTI?
¿Tuku kamakgtayalh kxlatamatkan Noé, Moisés, Jeremías chu Pablo?
¿Tukuya takgalhskinin namakgtayayan naʼakxilha la limaklakaskimpat milatamat?
¿Tuku xlakata liwana lakkaxwilinita tlakg xlakaskinka naʼakxilha naskujnaniya Jehová?
1, 2. 1) ¿Tuku wamputun tamakamastanikan Jehová? 2) ¿La nakinkamakgtayayan naʼakxilhaw tuku tlawakgolh Noé, Moisés, Jeremías chu Pablo?
AKXNI tamakamastaniyaw Dios chu tamunuyaw, kstalanina Cristo wanaw, wa tuku tlakg xlakaskinka tlawayaw kkilatamatkan. Kitaxtu la xwaniw: «Jehová klakaskin pi la uku chu putum kilatamat wix kimalana nawana. Nakmasta talakaskin pi wix nawana la nakmaklakaskin kinkilhtamaku, tuku kkgalhi, tuku tlan ktlawa chu tuku tlakg xlakaskinka nakaʼakxilha».
2 Komo wix tamununitata, chuna wani Jehová. Kkawaniyan pi wa tuku tlakg tlan tlawa. Pero xlakata Jehová kiMalanakan, ¿la namaklakaskinaw kinkilhtamakujkan? Xliʼakxilhtit Noé, Moisés, Jeremías chu apóstol Pablo nakinkamakgtayayan nakgalhtiyaw uma takgalhskinin. Xlakata xlakan putum xnakujkan skujnikgolh Jehová, chu akinin nachuna titaxtumaw tuku xlakan tlawakgolh nakinkamakgtayayan naʼakxilhaw tuku tlakg xlakaskinka akxilhaw. Komo chuna natlawayaw nakinkamakgtayayan naʼakxilhaw la limaklakaskimaw kinkilhtamakujkan (Mat. 28:19, 20; 2 Tim. 3:1).
AKXNI NINA XMIN MUNKAKLAT
3. ¿Tuku xtalakxtum kilhtamaku akxni xlama Noé chu la uku?
3 Jesús wa pi na xtalakxtum xkilhtamaku Noé chu kinkilhtamakujkan. Akxni wa: «Xtachuna akxni xkilhtamaku Noé, nachuna nawan akxni namin xKam nchixku». Ama kilhtamaku latamanin «xwayamakgo, xkgotnamakgo, xtapuchuwamakgoy, chu na xlamapuchuwakgo, asta maski akxni tiya ntitanulh [kʼarca] Noé. Na ni katsikgolh asta ni liwaya milh munkaklat, na liyankgolh xlipakskan» (Mat. 24:37-39). La uku lhuwa latamanin chuna lamakgolh, ni kuenta tlawakgo pi katuwa wilaw chu ni kgaxmatputunkgo tuku makatsininankgo xlakskujnin Dios. Chuna la xkilhtamaku Noé, lhuwa lilitsinkgo pi Malakatsukina nakamasputu tiku nitlan likatsikgo (2 Ped. 3:3-7). Pero ¿la limaklakaskilh xkilhtamaku Noé maski ni xkgalhakgaxmatkan tuku xwan?
4. ¿La limaklakaskilh xkilhtamaku Noé akxni Jehová wanilh wi tuku xtlawalh chu tuku xlakata?
4 Akxni Dios wa tuku xʼama tlawa chu tuku xlitlawat xwanit, Noé tlawalh arca xlakata xkalakgmaxtulh latamanin chu animales (Gén. 6:13, 14, 22). Nachuna makatsininalh tuku xʼama tlawa Dios. Apóstol Pedro limapakuwi Noé «nti ntiliʼakgchuwinalh [...] Dios», uma limasiya pi lu liskujli xlakata kawanilh latamanin pi xtalakaskin wi tuku xtlawakgolh xlakata xlakgtaxtukgolh (kalikgalhtawakga 2 Pedro 2:5). ¿Lakpuwana pi tlan xtiwa komo Noé chu xfamilia xkgalhikgolh lanka negocio, tlakg lhuwa tuku xkgalhikgolh ni xawa amakgapitsin o lu tlan la xlatamakgolh? ¡Ni! Ni chuna tlawakgolh xlakata xkatsikgo tuku xʼama tlawa Dios.
WANTUKU TLAWALH PRÍNCIPE XALAK EGIPTO
5, 6. 1) ¿Tuku xlakata lhuwa makgalhtawakgeka Moisés? 2) ¿Tuku xlakata Moisés ni kgalhiputulh tuku xalak kʼEgipto?
5 Kaʼakxilhwi xliʼakxilhtit Moisés, tiku makgastakli xtsumat faraón chu anta stakli kʼEgipto. Xlakata príncipe xwanit, «wa ntu xtastakatkan nti xala kʼEgipto ntilimakgalhtawakgakaj» (Hech. 7:22; Éxo. 2:9, 10). Chuna makgalhtawakgeka xlakata alistalh lu xlakaskinka tuku xtlawalh kʼEgipto. Lu xlakaskinka tuku xtilitaxtulh kʼuma lanka tamapakgsin nema xʼanan chu lu tlan tuku xtikgalhilh, o lu xlakaskinka tuku xtilakgatayalh nema xlakgchan chatum príncipe. Pero ¿wa tuku tlakg xlakaskinka xakxilha Moisés?
6 Xlakata tuku masiyanikgolh xtlat chu xtse akxni skgataku xwanit, max xlakapastaka tuku xkawaninit Jehová Abrahán, Isaac chu Jacob chu lipawa. Xlikana, liwana lakpuwa xlakata kilhtamaku nema aku xmima chu pi ni xʼama makgxtakga Jehová, chu akxni laksakli komo príncipe xalak kʼEgipto xwa o chatum skujni, wata «ntilaksakli xalikgaman natatlawakan[...] xlakgskgatan Dios, ni xawa wa nalimakgapaxuwakan ntalakgalhin» (kalikgalhtawakga Hebreos 11:24-26). Alistalh mastalh talakaskin pi Jehová xpulalilh xlatamat (Éxo. 3:2, 6-10). ¿Tuku xlakata chuna tlawalh? Xlakata lu xkanajla tuku xwanit Dios chu liwana xkatsi pi kʼEgipto nitlan xʼama kitaxtuni. Xlikana tuku lakpuwa, xlakata alistalh Dios kamakaminilh pulakkaw tuku nitlan. ¿Akxilha wix tuku kamasiyani xliʼakxilhtit Moisés, xlakskujnin Jehová xala uku? Pi lu xlakaskinka naskujnaniyaw Jehová chu ni lhuwa tuku nakgalhiputunaw o nalipaxuwaputunaw tuku anan kkakilhtamaku.
JEREMÍAS XKATSI TUKU XʼAMA LA
7. ¿Tuku na xtachuna akxni xlama Jeremías chu la uku?
7 Atanu tiku na lu xlakaskinka akxilhli naskujnani Jehová wa palakachuwina Jeremías. Jehová xpalakachuwina limaxtulh, xlakata xkamakatsinilh tuku xʼama katlawani tiku xkakninanikgo ídolos kJerusalén chu Judá. Tlan nawanaw pi Jeremías xlama «kxkgalhsputat kakilhtamaku» (Jer. 23:19, 20). Xkatsi pi uma kachikinin xʼamaka malakgsputukan.
8, 9. 1) ¿Tuku xlakata xtalakaskin pi Baruc xlakgpalilh tuku xlakpuwan? 2) ¿Tuku kuenta natlawayaw akxni nalakapastakaw xlakata tuku aku namin?
8 Xlakata tuku liwana xkatsi, Jeremías ni putsalh tuku xʼanan kakilhtamaku nema xʼamaka masputukan. Xlakata uma ni xʼama makgtaya. Pero milh kilhtamaku, Baruc tiku ksecretario xwanit, tanu tuku xlakapastaka. Wa xlakata Jehová wanilh Jeremías pi kstakyawalh chu xwanilh: «¡Kaʼakxilhti! Tuku ktlawanit kmalakgsputuma, chu tuku kchananit kpulhuma, kxliputum kachikin. Pero wix, wix lhuwa tuku putsapat kaj mimpalakata. Nialh kaputsa uma. Xlakata naklimin tuku nitlan xpalakata latamanin [...], chu xlikana naklakgmaxtu milatamat kaniwa niku napina» (Jer. 45:4, 5).
9 Ni liwana katsiyaw “tuku xputsama” Baruc. * Pero katsiyaw pi umakgolh ni xmakgtayalh akxni babilonios xʼakgchipakgolh Jerusalén kkata 607 akxni nina xmin Jesús. ¿Akxilha pi wi tuku kinkamasiyaniyan? Xlikana xlakata nakgalhiyaw tuku namaklakaskinaw kilatamatkan pulana talakaskin nalakaxwiliyaw tuku namaklakaskinaw (Pro. 6:6-11). Pero ¿tlan nakitaxtu nalimaxtuyaw lhuwa kilhtamaku chu litliwakga xlakata tuku kaj ni lu xlakaskinka? Xlikana pi xkachikin Dios chuntiya lakkaxwilima natlawakan Pukgalhtawakga xla xTatayananin Jehová, sucursales chu atanu. Pero uma tuku tlawamaka tlan nakitaxtu, xlakata makgtayanan tlakg natalichuwinan xTamapakgsin Dios. Lu tlan xwa komo putum xlakskujnin Jehová nachuna xlakapastakkgolh xlakata tuku aku natlawakgo. ¿Tlan xwanti pi xlikana makgantaxtipat uma tamapakgsin «xapulana kaputsatit wantu xlimapakgsin Dios, chu wa xtalakaskin»? (Mat. 6:33.)
«KAJ XTACHUNA PALHMA NCHU KLIʼUKXILHA»
10, 11. 1) ¿Tuku xlakapastaknit natlawa Pablo akxni nina kstalanina Cristo xwanit? 2) ¿Tuku tlawalh pi Pablo xlakgpalilh tuku pulana xtlawaputun?
10 Xaʼawatiya, kaʼakxilhwi xliʼakxilhtit Pablo. Akxni nina kstalanina Cristo xwanit, lhuwa tuku tlan xtitlawalh. Xlakata xlikgalhtawakganit xlimapakgsin judíos chu makgalhtawakgelh tiku lu xlakgapaskan ama kilhtamaku, xapuxku sacerdote xmaxkinit limapakgsin chu wa tlakg skgalala xwanit ni xawa amakgapitsin tiku akxtum xkatakgalhtawakganit (Hech. 9:1, 2; 22:3; 26:10; Gál. 1:13, 14). Pero putum talakgpalilh akxni katsilh pi judíos nialh xkasikulunatlawama Jehová.
11 Pablo tiku pulana fariseo xwanit, wa pi lhuwa tuku xtlawakgo judíos, nitu xtapalh xwanit xlakatin Dios chu wa xlakata ni xʼama makgapala (Mat. 24:2). Asta wa pi tuku aku xkatsinit natlawa Dios chu nalichuwinankan Dios lanka talakgalhaman, chu tuku pulana xlakpuwan pi xlakaskinka xwanit la uku xliʼakxilha «kaj xtachuna palhma» o basura. Wa xlakata makgxtakgli xtakanajlakan judíos chu putum xlatamat lichuwinalh xalakwan xalaksasti kKatiyatni (kalikgalhtawakga Filipenses 3:4-8, 15; Hech. 9:15).
KAʼAKXILHTI TUKU PULANA WILIYA KMILATAMAT
12. ¿Tuku tlakg xlakaskinka akxilhli Jesús akxni tamunulh?
12 Noé, Moisés, Jeremías, Pablo chu amakgapitsin putum xkilhtamakujkan chu xlitliwakgakan skujnikgolh Jehová wa xlakata tlan nachuna natlawayaw. Xlikana pi wa Jesús tiku tlakg tlan liʼakxilhtit (1 Ped. 2:21). Akxni tamunulh, putum xlatamat lichuwinalh xalakwan xalaksasti kKatiyatni chu malankilh Jehová. Kstalanina Cristo tiku kanajla pi wa Dios xMalana, skujnani chu wa tuku tlakg xlakaskinka akxilha kxlatamat. ¿Nachuna akxilha wix? ¿La tlakg tlan naskujniyaw Dios chu naputsayaw tuku maklakaskinaw? (Kalikgalhtawakga Salmo 71:15 chu 145:2.)
13, 14. 1) ¿Tuku kawanimaka katlawakgolh tiku tamunukgonita? 2) ¿Tuku tlan lu nalipaxuwakgo xlakskujnin Dios?
13 Chuna la titaxtunit kilhtamaku, xkachikin Jehová makglhuwa kawaninit natalan kaskinkgolh kxoracioneskan xlakata tlan precursor nawankgo. Lhuwa tuku xlakata max xlakskujnin Dios nila makgatsikgo 70 hora akgatunu papaʼ, pero uma ni katlawalh pi nitlan nalimakgkatsikgo (1 Tim. 5:8). Pero wix ¿tuku tlawapat? ¿Xlikana pi lu nila precursor nawana?
14 Kalakapastakti pi lhuwa xlakskujnin Dios lipaxuwakgolh akxni lakapastakka akxni tinilh Jesús uma kata. Marzo lu tlan tuku tlawaka, xlakata tiku precursores auxiliares skujkgolh tlan laksakkgolh komo 30 hora o 50 hora xlichuwinankgolh Dios (Sal. 110:3). Lhuwa millón natalan chuna tlawakgolh chu kcongregación niku wilakgolh lu lipaxuwakgolh. ¿Na tlan xlakkaxwili minkilhtamaku xlakata na napaxuwaya? Akxni sputa kilhtamaku, tala tiku tamakamastaninita Jehová lu paxuwa chu tlan wani: «La uku kskujnanin la tlan kmatlanilh».
15. ¿Tuku xlilakapastakatkan natlawa chatum kgawasa o tsumat tiku nataxtukgo kʼescuela?
15 Komo kgawasaku wix chu nataxtuyata kʼescuela, ni tatatlaya chu ni lhuwa tuku lakgayat. ¿Lakpuwanitata tlan precursor regular xwanti? Tiku kastakyawakgo tiku ankgo kʼescuela lakpuwankgo pi tlakg xlakaskinka lhuwa nakgalhtawakgakgo chu lu xlakaskinka taskujut nakgalhikgo kkakilhtamaku. Pero xlakan wa lipawankgo tuku xala kakilhtamaku chu tumin nema ni makgtayanan. Pero komo natsukuya skujniya Jehová nakgalhiya tuku nikxni katisputli chu tuku xlikana lu xlakaskinka. Chu wa stalanipat nawan xliʼakxilhtit Jesús. Akxni nalaksaka naskujnaniya Dios, lu nalipaxuwaya, xlakata namakgtayayan ni namakgtanuya ktaʼakglhuwit chu nalimasiyaya pi liwana lakapastaknita namakgantaxtiya tuku waninita Jehová (Mat. 6:19-21; 1 Tim. 6:9-12).
16, 17. ¿Tukuya takgalhskinin tlan natlawayaw xlakata la skujnaniyaw Jehová?
16 Lhuwa xlakskujnanin Dios lhuwa hora skujkgo xlakata namaxkikgo tuku maklakaskinkgo xfamiliajkan. Pero max wilakgolh natalan tiku tlakg lhuwa hora skujmakgolh, maski ni talakaskin (1 Tim. 6:8). Kkakilhtamaku lu kinkamalakpuwanikgoyan pi nila katilatamaw komo ni nakgalhiyaw lhuwa tuku malaknukgo chu tuku xalak xasasti taxtumakgo. Pero xaxlikana kstalaninanin Cristo ni lakaskinaw pi xkakilhtamaku Satanás nakinkawaniyan tuku tlakg xlakaskinka naʼakxilhaw (1 Juan 2:15-17). Chu tiku nialh skujkgo, ¿la tlan nalimaklakaskinkgo xkilhtamakujkan? Tlan precursores nawankgo chuna pulana nawilikgo xtaskujut Jehová.
17 Putum xlakskujnin Jehová nakinkatlawanikanan uma takgalhskinin: «¿Tuku tlakg xlakaskinka kakxilha kilatamat? ¿Tlakg xlakaskinka kaʼakxilha nakskujnani Dios? ¿Ktlawa la Jesús xlakata xatapaxuwan klimaklakaskin kinkilhtamaku xlakata nakskujnani Jehová? ¿Kkgalhakgaxmata xtastakyaw pi chuntiya nakstalani? ¿Tlan xaklakaxwililh kinkilhtamaku xlakata tlakg naklichuwinan xTamapakgsin Dios o atanu? Chu maski max la uku nila tuku tlakg lhuwa ktlawa, ¿chuntiya klakpuwan xlakata nakmaklakaskin kinkilhtamaku nakskujnani Jehová?».
«NATLAWAPUTUNATIT, CHU LANTLA LU WA NATLAWAYATIT»
18, 19. ¿Tuku tlan naskiniya Jehová akxni tlawaniya oración chu tuku xlakata nalakgati?
18 Lu lipaxuwayaw akxni akxilhaw pi xkachikin Dios lu skujmakgolh. Pero max makgapitsi natalan ni lu lakgatikgo precursor nawankgo, chu lakpuwankgo pi nila katimakgantaxtikgolh, maski kgalhikgo kilhtamaku (Éxo. 4:10; Jer. 1:6). ¿Tuku tlan natlawakgo komo chuna lakpuwankgo? ¿Tlan xwanikgolh Jehová uma akxni tlawanikgo oración? Pablo katsokgnanilh natalan xalak Filipos: «Xampi wa [Jehová] nti nkamatlawiyan kmintapuwan lantla natlawaputunatit, chu lantla lu wa natlawayatit» (Fili. 2:13). Chuna, komo wix ni tlakg skujnaniputuna Jehová, kaskini kamakgtayan xlakata nalakgatiya chu tlan chuna natlawaya (2 Ped. 3:9, 11).
19 Noé, Moisés, Jeremías, Pablo chu Jesús xkanajlanikgo Dios. Limaklakaskinkgolh xkilhtamakujkan chu xlitliwakgakan xlakata xkamakatsinikgolh latamanin tuku xʼama tlawa Dios chu nitu kamamakxtakgnilh xtaskujutkan. Atsinu tsankga nasputa uma kakilhtamaku, wa xlakata putum tiku tamakamastaninitawa Jehová, liwana kaʼakxilhwi komo lu liskujmaw nachuna natlawayaw la tlawakgolh (Mat. 24:42; 2 Tim. 2:15). Chuna namakgapaxuwayaw Jehová chu lhuwa nakinkasikulunatlawayan (kalikgalhtawakga Malaquías 3:10).
[Nota nema wi kpágina]
^ párr. 9 Kaʼakxilhti libro Dios nos habla mediante Jeremías, kpáginas 104 asta 106.
[Takgalhskinin]
[Dibujo xla página 22]
Latamanin ni kuenta tlawakgolh tuku Noé makatsininalh
[Dibujo xla página 25]
¿Liwana lakapastaknita precursor nawana?
