Bilong Wanem Wok Bilong Jehova i Mas Stap Nambawan?

“Bai mi tokim ol manmeri long stretpela pasin yu bin mekim. . . . long olgeta de bai mi tokim ol long yu bin kisim bek mi.”—SNG. 71:15.

BAI YU BEKIM OLSEM WANEM?

Bilong wanem Noa, Moses, Jeremaia, na Pol i putim Jehova i stap nambawan long laip bilong ol?

Wanem samting inap helpim yu long makim samting yu bai mekim long laip bilong yu?

Bilong wanem yu bai putim wok bilong Jehova i stap nambawan long laip bilong yu?

1, 2. (a) Man i kamapim klia em i gat wanem laik taim em i dediket long Jehova? (b) Olsem wanem stori bilong Noa, Moses, Jeremaia, na Paul i helpim yumi?

 TAIM yu dediketim yu yet long God na kisim baptais olsem disaipel bilong Jisas, yu mekim nambawan bikpela disisen tru long laip bilong yu. I kain olsem yu tokim Jehova: ‘Mi laik bai yu stap Bosman bilong mi. Na mi stap olsem wokboi bilong yu. Mi laik bai yu tokim mi long yusim taim bilong mi olsem wanem, wanem ol samting mi mas tingim olsem bikpela samting, na mi mas mekim wanem wok long save mi gat na ol samting mi holim.’

² Sapos yu wanpela Kristen i baptais pinis, orait i olsem yu bin promis pinis long Jehova long mekim ol dispela samting. Dispela em wanpela gutpela disisen tru yu bin mekim. Yu mekim pasin i stret na bihainim savetingting. Tasol olsem wanem? Jehova i stap pinis olsem Bosman bilong yu, olsem na yu mekim wanem long taim bilong yu? Stori bilong Noa, Moses, Jeremaia, na aposel Pol inap helpim yumi long skelim sindaun bilong yumi yet. Ol dispela man i bin wok strong tru long mekim wok bilong Jehova. Sindaun bilong yumi long nau i kain olsem sindaun bilong ol. Ol disisen ol i bin mekim i soim wanem ol samting i stap nambawan bikpela samting long ol, na dispela i mas kirapim yumi long skelim olsem wanem yumi yusim taim bilong yumi.—Mat. 28:19, 20; 2 Tim. 3:1.

PASLAIN LONG BIKPELA TAIT

3. Olsem wanem taim bilong yumi i wankain olsem taim bilong Noa?

³ Jisas i tok taim bilong yumi i wankain olsem taim bilong Noa. Em i tok: “Pasin ol man i bin mekim long taim bilong Noa, wankain pasin bai i kamap long taim Pikinini bilong man i kam i stap.” Ol manmeri i “wok long kaikai na dring, na ol man i marit, na ol manmeri i givim ol pikinini  meri bilong ol long marit. Ol i mekim olsem i go inap long taim Noa i go insait long sip. Ol i no luksave long ol samting i wok long kamap, i go inap long taim Bikpela Tait i kam na karim ol i go.” (Mat. 24:37-39) Klostu olgeta manmeri long nau i no save putim yau long ol tok lukaut bilong ol wokboi bilong God. Ol i no wari olsem taim i sot pinis. Wankain olsem ol man long taim bilong Noa, ol man long nau i no bilip olsem God bai bagarapim ol man nogut. Ol i save tok bilas long dispela! (2 Pita 3:3-7) Tasol Noa i bin yusim taim bilong em olsem wanem, maski ol man i no bin putim yau long ol tok lukaut bilong em?

4. Taim Jehova i givim wanpela spesel wok long Noa, Noa i yusim taim bilong em olsem wanem? Bilong wanem em i mekim olsem?

⁴ God i tokim Noa long em bai bagarapim ol man nogut, na em i givim wanpela spesel wok long Noa. Noa i wokim sip bilong seivim laip bilong sampela manmeri na animal. (Stt. 6:13, 14, 22) Na tu, em i tokaut long ol samting Jehova bai mekim. Aposel Pita i tok Noa “em man bilong tokaut long stretpela pasin,” na dispela i soim olsem Noa i bin wok strong long helpim ol arapela long kliagut olsem ol i mas kirap hariap na mekim samting. (Ritim 2 Pita 2:5.) Yu ting em savetingting sapos Noa na famili bilong en i yusim taim bilong ol long kirapim wanpela bisnis, kisim biknem na winim ol arapela, o kisim gutpela sindaun tru? Nogat! Ol i sakim olgeta samting we em inap pulim ol long lusim wok bilong ol, long wanem, ol i save long samting Jehova bai mekim.

WANPELA PRINS BILONG ISIP I MEKIM DISISEN

5, 6. (a) Bilong wanem ol i bin skulim Moses long “olgeta gutpela save bilong ol Isip”? (b) Bilong wanem Moses i no laik i stap wanpela prins bilong Isip?

⁵ Orait nau yumi laik kisim skul long stori bilong Moses. Pikinini meri bilong Fero i bin adoptim em, na em i kamap olsem prins na i go bikpela long haus king bilong Isip. Moses i kisim skul long “olgeta gutpela save bilong ol Isip.” (Apo. 7:22; Kis. 2:9, 10) Ol Isip i givim skul long em na bai em i redi long mekim wok bilong Fero. Em inap kamap bikman tru insait long nambawan strongpela gavman long graun long dispela taim. Sapos em i kisim dispela wok, bai em i gat planti gutpela samting na ol man bai givim biknem long em. Tasol yu ting ol dispela samting i bikpela samting long Moses?

⁶ Taim Moses i pikinini, papamama tru bilong en i bin lainim em long Jehova. So yumi ken ting olsem em i save long ol promis Jehova i bin mekim long Abraham, Aisak, na Jekop. Moses i bilip long ol dispela promis. Ating em i bin tingting gut long ol samting bai painim em long bihain na olsem wanem em bai stap gut long Jehova. Taim Moses i mas makim olsem em bai stap olsem wanpela prins bilong Isip o wanpela wokboi nating bilong Israel, em i mekim wanem? Moses i laik “kisim hevi wantaim lain bilong God, na em i no laik bihainim pasin bilong sin na kisim amamas bilong sotpela taim tasol.” (Ritim Hibru 11:24-26.) Bihain, em i mekim ol samting Jehova i tokim em long mekim. (Kis. 3:2, 6-10) Bilong wanem Moses i mekim olsem? Long wanem, em i bilipim ol tok promis bilong God na em i save olsem ol  gutpela samting em inap kisim long Isip bai i no inap i stap longpela taim. Tingting bilong em i stret. I no longtaim na God i mekim save long Isip long rot bilong tenpela bikpela hevi. Olgeta wokboi bilong Jehova husat i dediket pinis inap kisim skul long stori bilong Moses. Wok bilong Jehova i mas i stap nambawan bikpela samting long laip bilong yumi, i no wok mani o wok bilong bungim ol gutpela samting bilong dispela graun.

JEREMAIA I SAVE LONG SAMTING BAI KAMAP

7. Olsem wanem i stap bilong Jeremaia i wankain olsem bilong yumi?

⁷ Profet Jeremaia tu i putim wok bilong Jehova i stap nambawan bikpela samting long laip bilong en. Jehova i makim Jeremaia long kamap profet na em i givim em wanpela spesel wok long mekim. Jeremaia i mas autim tok olsem Jehova bai kotim ol manmeri bilong Jerusalem na Juda, long wanem, ol i lotuim ol giaman god. I stap bilong Jeremaia i wankain olsem bilong yumi. Em tu i stap long wanpela “taim bilong las de.” (Jer. 23:19, 20) Em i save olsem ol samting long taim bilong em bai pinis.

8, 9. (a) Bilong wanem God i mas stretim tingting bilong Baruk? (b) Yumi mas tingim wanem samting taim yumi wokim plen long mekim ol samting?

⁸ Bilip bilong Jeremaia i kirapim em long sakim wanem samting? Em i no tingting long mekim ol samting bilong kisim gutpela sindaun long dispela haptaim we ol samting bai bagarap. Em i bihainim gutpela tingting. Tasol Baruk, kuskus bilong Jeremaia, i kisim narapela tingting. Olsem na God i tokim Jeremaia long stretim Baruk na tokim em olsem: “Harim. . . . Nau mi wok long brukim ol samting mi bin wokim. Na mi wok long kamautim ol samting mi bin planim. Ol dispela samting mi wok long brukim na kamautim, em olgeta hap bilong graun. Olsem na bilong wanem yu laik bai ol gutpela samting tasol i ken kamap long yu? Yu mas lusim dispela kain tingting, long wanem, mi Bikpela, mi wok long mekim nogut long olgeta manmeri bilong graun.” Na Jehova i tok promis long Baruk olsem em bai i no inap dai taim Jerusalem i kisim bagarap.—Jer. 45:2-5.

⁹ Yumi no save ol dispela “gutpela samting” Baruk i laikim em wanem samting. a Tasol yumi save ol dispela samting bai pinis. Ol bai bagarap taim Babilon i daunim Jerusalem long 607 B.C.E. Dispela i givim wanem skul long yumi? Yumi mas mekim sampela samting na bai yumi gat ol samting bilong skin yumi nidim long nau. (Snd. 6:6-11) Tasol olsem wanem? Yumi bihainim savetingting sapos yumi yusim bikpela haptaim na strong bilong yumi long bungim ol samting em bai pinis long bihain? Tru, oganaisesen bilong Jehova i stretim rot yet long sanapim ol nupela Haus Kingdom, ol brens ofis, na ol arapela samting. Tasol dispela wok i no wankain olsem pasin bilong bungim planti samting, long wanem, dispela wok i sapotim Kingdom. So taim ol manmeri husat i dediket pinis long Jehova i wokim plen long ol samting ol bai mekim, Kingdom Bilong God i mas i stap olsem nambawan samting long laip bilong ol. Olsem wanem? Yu wok long painim Kingdom pastaim na stretpela pasin bilong Jehova?—Mat. 6:33.

EM I TINGIM OL SAMTING I OLSEM “PIPIA NATING”

10, 11. (a) Wanem samting i bikpela samting long Pol paslain long em i kamap Kristen? (b) Wanem samting i mekim na tingting bilong Pol i senis olgeta?

¹⁰ Nau yumi ken skelim stori bilong aposel Pol. Paslain long em i kamap Kristen, ol man i ting olsem em bai holim wanpela gutpela wok. Wanpela tisa i gat biknem i bin skulim em long lo bilong ol Juda. Hetpris i trastim em na givim wanpela bikpela wok long em. Na em i strong moa long bihainim lotu Juda winim planti wankrismas bilong en. (Apo. 9:1, 2; 22:3; 26:10; Gal. 1:13, 14) Tasol laip bilong Pol i senis olgeta taim  em i luksave olsem Jehova i sakim ol Juda olsem wanpela lain.

¹¹ Olsem na Pol i save, wok em inap holim long lain Juda em samting nating long ai bilong Jehova. I no gat gutpela samting bai painim lain Israel long bihain. (Mat. 24:2) Pol i kliagut long ol samting God i tingting pinis long mekim, na em i save olsem wok bilong autim tok em i wanpela wok i gat biknem. Em i tok ol samting bipo em i ting em i bikpela samting i olsem “pipia nating.” Pol i lusim lotu Juda na em i yusim laip olgeta bilong em long autim gutnius.—Ritim Filipai 3:4-8, 15; Apo. 9:15.

SKELIM OL SAMTING YU PUTIM I STAP NAMBAWAN

12. Wanem nambawan samting long laip bilong Jisas bihain long em i baptais?

¹² Noa, Moses, Jeremaia, Pol, na planti arapela i bin yusim taim na strong bilong ol long mekim wok bilong Jehova. Ol i stap olsem ol gutpela piksa yumi ken bihainim. Tasol Jisas i stap olsem nambawan gutpela piksa yumi ol wokboi bilong Jehova i dediket pinis i ken bihainim. (1 Pita 2:21) Bihain long Jisas i baptais, em i yusim laip olgeta bilong em long autim gutnius na givim biknem long Jehova. Olsem na wok bilong Jehova i mas i stap olsem bikpela samting long ol Kristen husat i bihainim Jisas na i larim Jehova i stap Bosman bilong ol. Olsem wanem? Wok bilong Jehova i stap nambawan samting long laip bilong yu? Olsem wanem yumi inap mekim bikpela wok moa bilong Jehova, na mekim tu ol arapela samting yumi mas mekim?—Ritim Song 71:15; 145:2.

13, 14. (a) Oganaisesen i kirapim olgeta Kristen long beten long wanem samting? (b) Wanem samting bai mekim ol manmeri bilong God i amamas?

¹³ Inap planti yia oganaisesen bilong Jehova i bin kirapim ol Kristen long beten na skelim olsem ol inap painia o nogat. Sindaun bilong sampela gutpela wokboi bilong Jehova i no larim ol long autim tok inap 70 aua long olgeta mun. Ol i no ken bel hevi long dispela. (1 Tim. 5:8) Tasol olsem wanem long sindaun bilong yu? Yu inap mekim wok painia?

¹⁴ Tingim amamas em planti manmeri bilong God i bin kisim long mun Mas. Em mun paslain long Memorial, na ol painia haptaim i bin i gat rot long makim olsem ol i laik autim tok 30 o 50 aua. (Sng. 110:3) Sampela milion brata na sista i bin painia haptaim. Long dispela taim yumi bin pilim bikpela amamas tru insait long kongrigesen. Olsem wanem? Yu inap stretim sediul bilong yu na bai yu inap painia haptaim sampela taim moa? Taim Kristen i baptais pinis i wok painia, long pinis bilong wan wan de em i amamas na em inap tok, “Jehova, mi mekim olgeta samting mi inap mekim long wok bilong yu.”

15. Taim ol yangpela Kristen i stap yet long skul i stret ol i putim wanem mak bilong winim?

¹⁵ Sapos yu wanpela yangpela Kristen na klostu nau bai yu pinis long skul, ating yu gat gutpela helt na no gat planti wok yu mas mekim. Olsem wanem? Yu bin tingting long mekim wok painia oltaim? Ating ol tisa bilong yu bai tok olsem nambawan gutpela rot long lukautim yu long bihain em long i go long kolis o yunivesiti. Ol i bilip strong long ol oganaisesen bilong ol man na long mani. Tasol ol dispela samting i no inap stap oltaim. Sapos wok bilong Jehova i stap olsem nambawan wok bilong yu, orait yu bai yusim gut taim bilong yu na bai yu mekim wok i bringim yu i go long laip oltaim. Bai yu bihainim gutpela eksampel bilong Jisas. Dispela em gutpela disisen na em bai mekim yu amamas. Na em bai lukautim yu. Dispela bai soim olsem yu no inap larim wanpela samting i pasim yu long truim tok promis bilong yu long mekim wok bilong Jehova.—Mat. 6:19-21; 1 Tim. 6:9-12.

16, 17. Ol Kristen i mas givim wanem ol askim long ol yet long wok bilong Jehova ol i mekim?

¹⁶ Planti wokboi bilong God long nau i mas wok planti aua bilong lukautim famili bilong ol long ol samting ol i mas i gat. Tasol ating sampela i save wok planti aua na ol i no gat  wok long mekim olsem. (1 Tim. 6:8) Ol bikpela bisnis i wok strong tru long kirapim yumi long ting olsem yumi mas baim olgeta nupela nupela samting ol i wokim, na long dispela rot tasol bai yumi stap amamas. Tasol ol Kristen tru i no laik bai Satan na ol manmeri bilong en i makim wanem ol samting bai stap nambawan long laip bilong ol. (1 Jon 2:15-17) Olsem wanem long sindaun bilong ol bratasista husat i ritaia pinis? Nambawan gutpela samting ol i ken mekim em long yusim taim bilong ol long painia na putim wok bilong Jehova i stap nambawan.

¹⁷ Olgeta wokboi bilong Jehova husat i dediket pinis i ken askim ol yet olsem: Wanem nambawan bikpela samting long laip bilong mi? Mi save putim wok bilong Jehova i stap nambawan? Mi save bihainim pasin bilong Jisas na soim olsem mi laik yusim taim na strong bilong mi long mekim wok bilong God? Mi save harim tok bilong Jisas na wok long bihainim em? Mi inap senisim sediul na bai mi inap mekim bikpela wok moa long autim tok o sampela arapela wok bilong Jehova? Maski mi no inap mekim bikpela wok moa olsem painia, mi wok long painim ol rot bilong yusim taim na strong bilong mi long tingim Jehova?

‘KIRAPIM LAIK NA MEKIM OL SAMTING’

18, 19. Yu inap beten long wanem samting? Bilong wanem Jehova bai amamas long kain prea olsem?

¹⁸ I gutpela tru long lukim pasin bilong ol manmeri bilong God long givim bel long wok. Tasol sampela husat inap mekim wok painia, ating ol i no gat laik long mekim o ol i ting ol i no gat save long mekim. (Kis. 4:10; Jer. 1:6) Olsem wanem sapos yu pilim olsem? Yu mas beten askim Jehova long helpim yu. Pol i tok Jehova i laik ‘kirapim laik bilong yumi na strongim yumi long mekim ol samting.’ (Fili. 2:13) Sapos yu no gat laik long mekim bikpela wok moa bilong autim tok, orait askim Jehova long kirapim laik bilong yu na givim save long yu long mekim wok.—2 Pita 3:9, 11.

¹⁹ Noa, Moses, Jeremaia, Pol, na Jisas ol i bin stap gut long God. Ol i yusim taim na strong bilong ol long autim ol tok lukaut bilong Jehova. Ol i no larim wanpela samting i pulim tingting bilong ol na ol i lusim wok. Pinis bilong dispela taim yumi stap long en i kam klostu tru. Olsem na yumi husat i bin dediketim laip bilong yumi long God i mas wok strong long bihainim ol dispela gutpela eksampel em Baibel i stori long en. (Mat. 24:42; 2 Tim. 2:15) Long dispela rot yumi inap amamasim Jehova na em bai blesim yumi.—Ritim Malakai 3:10.

[Futnot]

[Askim Bilong Stadi]

[Piksa long pes 21]

Ol manmeri i no putim yau long tok lukaut bilong Noa

[Piksa long pes 24]

Olsem wanem? Yu bin skelim gut olsem yu inap mekim wok painia oltaim?