No te aha e tuu ai i te taviniraa a Iehova na mua roa?

“Na tau vaha e faaite i te parau-tia na oe, e te ora na oe, eiaha ia faaea.”—SAL. 71:15.

EAHA TA OUTOU E PAHONO?

No te aha Noa, Mose, Ieremia e Paulo i tuu ai ia Iehova na mua roa i roto i to ratou oraraa?

Eaha te tauturu ia outou ia ite e nafea ia faaohipa i to outou oraraa?

No te aha e faaoti papu ai e tuu i te taviniraa a Iehova na mua roa?

1, 2. (a) Eaha ta te hoê taata e haapapu ia pûpû oia ia ˈna ia Iehova? (b) E tauturu mai te hiˈoraa o Noa, Mose, Ieremia e Paulo ia aha?

 I TO oe pûpûraa ia oe ia Iehova e riroraa mai ei pǐpǐ bapetizohia a Iesu, ua rave oe i te hoê taahiraa faufaa mau e i te faaotiraa faufaa roa ˈˈe o to oe oraraa. E au ra e te parau nei oe: ‘E Iehova, te hinaaro nei au ia riro oe ei Fatu no ˈu i roto i te mau tuhaa atoa o to ˈu oraraa. E tavini au no oe. Te hinaaro nei au ia faaite mai oe e nafea ia faaohipa i to ˈu taime, eaha te mau mea faufaa aˈe e e nafea ia faaohipa i ta ˈu mau faufaa e to ˈu mau aravihi.’

² Mai te peu e e Kerisetiano pûpûhia oe, tera ta oe i euhe na mua ia Iehova. Te haapopouhia ra oe no ta oe i faaoti, e ohipa maitai hoi e te tano te reira. I teie nei râ ua farii oe ia Iehova ei Fatu no oe, e nafea oe e faaohipa ˈi i to taime? E tauturu mai te mau hiˈoraa o Noa, Mose, Ieremia e o te aposetolo Paulo ia hiˈopoa ia tatou iho. Ua tavini ratou taitahi ia Iehova ma to ratou aau e puai atoa. E au to tatou tupuraa i to ratou. E faaitoito mai te mau faaotiraa ta ratou i rave no nia i te mau fa matamua ta ratou i tapi na ia hiˈopoa e nafea tatou e faaohipa ˈi i to tatou taime.—Mat. 28:19, 20; Tim. 2, 3:1.

HOU TE DILUVI

3. Eaha te tuearaa o to tatou tau e te tau o Noa?

³ Ua faaau Iesu i to Noa tau e to tatou. Ua parau oia: “Mai tei te anotau ra ia Noa ra, oia atoa te haerea mai o te Tamaiti a te taata nei. . . . Te amu ra ratou i te maa e te inu ra, te faaipoipo ra e te horoa ra ia faaipoipohia, e tae roa aˈera i te mahana i tomo ai Noa i roto i te pahi; aore roa i ite, e roohia noa ihora ratou e te diluvi, pau roa ˈtura ratou.” (Mat.  24:37-39) Aita te rahiraa o te taata i teie mahana e haapao ra e e tau ru teie e i te mau faaararaa ta te mau tavini a te Atua e faaite ra. Mai i te tau o Noa, e rave rahi atoa te vahavaha nei i te manaˈo e e haamou te Atua i te feia ino. (Pet. 2, 3:3-7) Mea nafea Noa i te faaohiparaa i to ˈna taime noa ˈtu e aita te taata i faaroo ia ˈna?

4. Mea nafea Noa i te faaohiparaa i to ˈna taime i to Iehova horoaraa ˈtu i te hoê ohipa taa ê na ˈna, e no te aha?

⁴ I muri aˈe i to te Atua faaiteraa i ta ˈna mau opuaraa e i te ohipa tei tia ia ˈna ia rave, ua hamani atura Noa i te hoê araka no te faaora i te taata e te mau animara. (Gen. 6:13, 14, 22) Ua faaite haere atoa Noa i te haavaraa a Iehova e fatata maira. No te aposetolo Petero, e taata “aˈo i te parau-tia” o Noa, te auraa ïa e ua tutava oia i te tauturu ia vetahi atu ia taa e e tupuraa fifi to ratou. (A taio i te Petero 2, 2:5.) I to oe manaˈo, e faaotiraa paari anei ta Noa e to ˈna utuafare e rave ahani e ua tutava ratou i te haamata i te hoê ohipa tapihoo aore ra ua imi i te manuïaraa e te hoê oraraa fanaˈo? E ere roa ˈtu! Ua ite ratou eaha to mua e ua haapae i te mau mea atoa o te haafariu ê ia ratou.

TA TE HOÊ TAMAITI HUI ARII NO AIPHITI I MAITI

5, 6. (a) Ua faaineine paha te haapiiraa ta Mose i fanaˈo ia aha? (b) No te aha aita Mose i maiti i te ora noa ei tamaiti hui arii no Aiphiti?

⁵ E hiˈopoa anaˈe i teie nei i te hiˈoraa o Mose. Ua paari mai oia i roto i te hoê aorai no Aiphiti ei tamaiti faaamu a te tamahine a Pharao. Mai te hoê tamaiti hui arii apî, ua haapiihia oia i te mau parau “paari a to Aiphiti ra.” (Ohi. 7:22; Exo. 2:9, 10) Ua faaineine teie haapiiraa ia ˈna ia amo i te hoê tiaraa i te aorai o Pharao. E nehenehe oia e riro mai ei taata faufaa roa i roto i te faatereraa puai roa ˈˈe o to ˈna ra tau. E fanaˈo ïa oia i te mau mea maitatai e rave rahi e te hanahana taa ê. Tera râ anei te fa a Mose?

⁶ No te haapiiraa ta ˈna i fanaˈo i to ˈna na metua mau i to ˈna tamariiriiraa, ua ite Mose i ta Iehova i fafau ia Aberahama, Isaaka e ia Iakoba. Ua faatupu oia i te faaroo i taua mau parau fafau ra. Ua feruri maite paha oia i to ˈna ananahi e i to ˈna taiva ore ia Iehova. A tae ai râ i te taime no te maiti i te riro ei tamaiti hui arii no Aiphiti aore ra i te hoê tîtî Iseraela, eaha ta ˈna i faaoti? Ua maiti Mose “e rave atoa i te pohe i te amuiraa i te taata no te Atua ra; ia rave i te navenave poto noa o te parau ino ra.” (A taio i te Hebera 11:24-26.) I muri aˈe, ua faaohipa oia i to ˈna oraraa mai ta Iehova i hinaaro. (Exo. 3:2, 6-10) No te aha Mose i na reira ˈi? No te mea ua tiaturi oia i te mau parau fafau a te Atua. No ˈna, aita e oraraa manuïa i Aiphiti. Aita iho â i maoro, ua tairi na ati ahuru no ǒ mai i te Atua ra i tera nunaa. Eaha te haapiiraa e huti mai no te mau tavini pûpûhia a Iehova i teie mahana? Eiaha e tiatonu i te hoê tiaraa aore ra i te mau mea maitai o teie nei ao. Ia tiatonu râ tatou ia Iehova e i ta ˈna taviniraa e tia ˈi.

UA ITE IEREMIA EAHA TE TUPU

7. Eaha te tuearaa o te tupuraa o Ieremia e to tatou?

⁷ Ua tuu atoa te peropheta Ieremia i te taviniraa a Iehova na mua roa i roto i to ˈna oraraa. Ua faaue Iehova ia Ieremia, ei peropheta na ˈna, ia faaite i te hoê poroi haavaraa i nia ia Ierusalema e Iuda apotata. Ua ora atoa Ieremia “i  te mau mahana hopea.” (Ier. 23:19, 20) Ua ite maitai oia e e haamouhia iho â te totaiete ati Iuda.

8, 9. (a) No te aha e mea tia ˈi ia faaafarohia te huru feruriraa o Baruka? (b) Ia haamanaˈo tatou i te aha ia opua tatou i te tahi mau mea?

⁸ No ta ˈna i tiaturi papu, aita Ieremia i imi i te manuïaraa i roto i tera totaiete o te haamouhia. Mea maamaa iho â ia na reira, e ere anei? Ua haamata râ te huru feruriraa o Baruka, te taata papai a Ieremia, i te taui. No reira te Atua i parau ai ia Baruka na roto ia Ieremia: “Inaha, o ta ˈu i patu ra, o ta ˈu ïa e vavahi i raro; e o ta ˈu i tanu ra, o ta ˈu ïa e iriti, oia te fenua atoa nei: te imi râ oe i te maitai rahi na oe iho? eiaha e imihia; inaha hoi, te hopoi mai nei au i te ino i nia i te taata atoa ra, . . . e horoa ˈtu râ vau i te ora no oe ei taoˈa, i te mau vahi atoa ta oe e haere na.”—Ier. 45:4, 5.

⁹ Aita tatou i papu eaha te “maitai rahi” ta Baruka i imi na no ˈna iho. * Ua ite râ tatou e e mou tera mau mea. Tera iho â tei tupu i to Babulonia haruraa ia Ierusalema i 607 hou te Mesia. Eaha te haapiiraa no tatou? No te fanaˈo i te mau mea faufaa o te oraraa, e titauhia ia haamau tatou i te tahi mau fa no a muri aˈe. (Mas. 6:6-11) E haerea paari anei râ ia faaohipa i te rahiraa o to tatou taime e puai no te mau mea o te ore e vai maoro? Parau mau, mea rahi te opuaraa a te faanahonahoraa a Iehova no te mau Piha a te Basileia apî, no te mau amaa e no te tahi atu â mau ohipa. Mea taa ê râ teie mau opuaraa, no te mea o te tururaa i te mau ohipa taaihia i te Basileia te fa. Ua papu anei ia oe e te ‘mata na ra oe i te imi i te basileia o te Atua, e te parau-tia na ˈna’?—Mat. 6:33.

E “AUA” TERA MAU MEA NO ˈNA

10, 11. (a) Eaha te mea faufaa aˈe no Paulo hou oia a riro mai ai ei Kerisetiano? (b) No te aha te fa a Paulo i taui roa ˈi?

¹⁰ E hiˈopoa anaˈe i teie nei i te hiˈoraa o Paulo. Hou oia a riro mai ai ei Kerisetiano, ua manaˈo te taata e e fanaˈo oia i te tiaraa maitai. Ua haapii oia i te ture ati Iuda e te orometua tuiroo roa ˈˈe o tera tau. Ua horoa te tahuˈa rahi ati Iuda i te mana ia ˈna ra. Mea vitiviti aˈe atoa to ˈna haereraa i mua i roto i te haapaoraa ati Iuda ia vetahi atu. (Ohi. 9:1, 2; 22:3; 26:10; Gal. 1:13, 14) Ua taui roa râ to Paulo oraraa i to ˈna maramaramaraa e aita Iehova e haamaitai faahou ra i te mau ati Iuda ei nunaa.

¹¹ Ua ite Paulo e no Iehova, mea faufaa ore te hoê tiaraa i roto i te totaiete ati Iuda. E haamouhia hoi tera nunaa. (Mat. 24:2) Ua taa i teie Pharisea tahito te mau opuaraa a te Atua e ua ite oia  e e fanaˈoraa taa ê ia poro. E au atura to ˈna tiaraa tahito ta ˈna i manaˈo na e mea faufaa i te “aua” i teie nei, aore ra i te mea hairiiri. Ua faarue Paulo i to ˈna tiaraa i roto i te haapaoraa ati Iuda e ua faaohipa i te toea o to ˈna oraraa no te poro i te evanelia.—A taio i te Philipi 3:4-8, 15; Ohi. 9:15.

A HIˈOPOA EAHA TE MAU MEA FAUFAA AˈE NO OE

12. Eaha te mea faufaa aˈe no Iesu i muri aˈe i to ˈna bapetizoraa?

¹² Ua faaohipa Noa, Mose, Ieremia, Paulo e e rave rahi atu â taata i te rahiraa o to ratou taime e puai i roto i te taviniraa a Iehova. E hiˈoraa maitai ratou. O Iesu iho â te hiˈoraa maitai roa ˈˈe o te mau tavini pûpûhia a Iehova. (Pet. 1, 2:21) I muri aˈe i to ˈna bapetizoraa, ua faaohipa Iesu i te toea o to ˈna oraraa i nia i te fenua no te poro i te evanelia e no te faahanahana ia Iehova. O te taviniraa ïa i te Atua te mea faufaa aˈe no te hoê Kerisetiano e farii ra ia Iehova mai to ˈna Fatu. Tera anei no oe? E nafea ia tapi i te mau fa i roto i te taviniraa a Iehova a amo atoa ˈi i te tahi atu mau hopoia?—A taio i te Salamo 71:15; 145:2.

13, 14. (a) Te faaitoitohia ra te mau Kerisetiano pûpûhia atoa ia pure no nia i te aha? (b) Na te aha e faaoaoa i te nunaa o te Atua?

¹³ A tau matahiti i teie nei, ua tamau noa te faanahonahoraa a Iehova i te faaitoito i te mau Kerisetiano ia feruri i roto i te pure i te taviniraa pionie. Aita vetahi mau tavini a Iehova taiva ore e nehenehe e poro e 70 hora i te avaˈe no to ratou mau tupuraa. Eiaha ratou e faahapa ia ratou iho. (Tim. 1, 5:8) E no oe? Eita iho â anei oe e nehenehe e riro mai ei pionie?

¹⁴ A haamanaˈo na i te oaoa ta te nunaa o te Atua i ite i te tau o te Oroa haamanaˈoraa o teie matahiti. I te avaˈe Mati, ua tia i te mau pionie tauturu ia maiti e poro e 30 aore ra e 50 hora. E faanahoraa taa ê teie. (Sal. 110:3) E mirioni taeae e tuahine tei tavini ei pionie tauturu e ua ite te mau amuiraa i te oaoa rahi. E nehenehe anei oe e faanaho i ta oe porotarama no te ite pinepine atu â i tera oaoa? Ia riro mai te hoê Kerisetiano bapetizohia ei pionie, e oaoa oia ia hope te mahana e e nehenehe oia e parau, “E Iehova, ua rave au i tei maraa ia ˈu i roto i ta oe taviniraa.”

15. Eaha te fa a te hoê Kerisetiano apî a haere ai oia i te haapiiraa?

¹⁵ Mai te peu e ua fatata ta oe tau haapiiraa titauhia i te hope, mea maitai paha to oe ea e mea iti â ta oe hopoia. Ua feruri maite anei oe e riro mai ei pionie tamau? E manaˈo paha ta oe mau orometua e mea maitai no oe ia haere i te haapiiraa teitei ia noaa mai te hoê ohipa maitai. Tei roto râ to ratou tiaturiraa i te mau faanahonahoraa taata e i te moni, e e mou tera mau mea. I te tahi aˈe pae, ia ohipa oe no Iehova, e tapi oe i te mau fa hoona mau e fanaˈo ai oe i te hoê ananahi aita e hopea. E e pee oe i te hiˈoraa tia roa o Iesu. Ia rave oe i taua faaotiraa paari ra, e oaoa e e paruruhia oe. E faaite atoa te reira e ua faaoti papu oe i te ora ia au i ta oe i euhe ia Iehova.—Mat. 6:19-21; Tim. 1, 6:9-12.

16, 17. Eaha te uiui no nia i te ohipa e te tahi atu mau tapiraa?

¹⁶ Te ohipa nei te mau tavini a te Atua tau hora i te maoro ia fanaˈo to ratou utuafare i te mau mea faufaa o te oraraa. Te ohipa nei râ vetahi hau roa ˈtu i tei titauhia. (Tim. 1, 6:8) Te hinaaro nei teie ao ia manaˈo tatou e aita e nehenehe e ora ia ore tatou e hoo i te mau  mea apî e rave rahi. Aita râ te mau Kerisetiano e hinaaro ra e na te ao a Satani e faaoti no ratou eaha te mau mea faufaa aˈe. (Ioa. 1, 2:15-17) E no te mau Kerisetiano faatuhaahia? Aita e ravea maitai aˈe no te faaohipa i to ratou taime maori râ te raveraa i te taviniraa pionie e te tuuraa i te taviniraa a Iehova na mua roa.

¹⁷ Ia uiui te mau tavini pûpûhia a Iehova atoa: Eaha ta ˈu fa matamua roa i roto i to ˈu oraraa? Te tuu ra anei au i te mau ohipa taaihia i te Basileia na mua roa? Te pee ra anei au i te hiˈoraa o Iesu e te faaite ra anei au e ua ineine au i te faaohipa i to ˈu taime e puai no te tavini i te Atua? Te auraro ra anei au i te aˈoraa a Iesu e pee noa ia ˈna? E nehenehe anei au e faatano i ta ˈu porotarama no te apiti rahi atu â i te pororaa aore ra i te tahi atu mau ohipa taaihia i te taviniraa a Iehova? Noa ˈtu e aita e tia ia ˈu ia faarahi i ta ˈu taviniraa no to ˈu huru tupuraa, te atuatu ra anei au i te hoê huru feruriraa haapae?

‘IA HINAARO E IA RAVE’

18, 19. E nehenehe oe e pure no nia i te aha? No te aha taua aniraa ra e faaoaoa ˈi ia Iehova?

¹⁸ Mea oaoa ia ite i te itoito rahi o te nunaa o te Atua. E nehenehe vetahi e riro mai ei pionie, aita râ paha ratou e hinaaro ra aore ra te manaˈo ra ratou e e ere ratou i te mea aravihi. (Exo. 4:10; Ier. 1:6) Tera anei no oe? Eita anei oe e nehenehe e pure no nia i te reira? Oia mau. Ua parau Paulo i to ˈna mau hoa haamori e ‘te ohipa ra Iehova i roto ia outou ia hinaaro e ia rave outou i te maitai ta ˈna iho e hinaaro ra.’ (Phil. 2:13) Mai te peu e aita oe e hinaaro ra e faarahi i ta oe taviniraa, a ani ia Iehova ia horoa mai i tera hinaaro e i te aravihi no te na reira.—Pet. 2, 3:9, 11.

¹⁹ E tane taiva ore o Noa, Mose, Ieremia, Paulo e o Iesu. Ua faaohipa ratou i to ratou taime e puai no te faaite haere i te poroi faaararaa a Iehova. Aita ratou i nevaneva noa ˈˈe. Ua fatata roa te hopea o teie nei ao. Ia papu ïa ia tatou paatoa tei pûpû i to tatou ora no te Atua e te tutava noa ra tatou i te pee i teie mau hiˈoraa Bibilia maitai roa. (Mat. 24:42; Tim. 2, 2:15) Ma te na reira, e faaoaoa tatou ia Iehova e e haamaitai oia ia tatou.—A taio i te Malaki 3:10.

[Nota i raro i te api]

[Uiraa haapiiraa]

[Hohoˈa i te api 23]

Aita te taata i tâuˈa i te faaararaa a Noa

[Hohoˈa i te api 25]

Ua feruri maite anei oe e riro mai ei pionie tamau?