Sinda ‘Pinasabngan nin Banal na Espiritu’

‘Dai nin hula na nagdatong huli sa kabotan nin tawo, kundi an mga tawo nagtaram hale sa Dios, huling pinasabngan nin banal na espiritu.’—2 PED. 1:21.

MGA PUNTONG DAPAT HOROPHOROPON

Paano ipinaabot kan banal na espiritu an mensahe nin Dios sa mga kagsurat sa Biblia?

Anong ebidensia an nagpapatunay na an Biblia ipinasabong nin Dios?

Ano an puede mong gibohon aroaldaw tanganing mapagdanay an saimong pag-apresyar sa Tataramon nin Dios?

1. Taano ta kaipuhan niato an ipinasabong na Tataramon nin Dios?

SAEN kita hale? Taano ta yaon kita digdi? Saen kita paduman? Taano ta siring kaini an kinaban? Ano an nangyayari sa sato kun kita magadan? Ihinahapot ini kan mga tawo sa bilog na daga. Paano niato maaaraman an mga simbag sa mga ini asin sa iba pang mahahalagang hapot kun mayo kita kan ipinasabong na Tataramon nin Dios? Kun mayo an Banal na Kasuratan, an pangenot na matokdo sa sato iyo an personal na eksperyensia. Kun iyan an magtotokdo sa sato, an mga saboot daw niato sa “togon ni Jehova” magigin arog kan sa salmista?—Basahon an Salmo 19:7.

2. Ano an makakatabang sa sato na papagdanayon an pag-apresyar sa Biblia bilang mahalagang regalo gikan sa Dios?

² Pero, an mamondong katunayan iyo na pinabayaan nin nagkapira na lumipot an enot na pagkamoot ninda sa katotoohan sa Biblia. (Ikomparar an Kapahayagan 2:4.) Dai na sinda naglalakaw sa dalan na nakakapaogma ki Jehova. (Isa. 30:21) Dai kaipuhan na mangyari iyan sa sato. Puede asin maninigo niatong papagdanayon an pag-apresyar sa Biblia saka sa mga katokdoan kaiyan. An Biblia sarong mahalagang regalo gikan sa satong mamomoton na Kaglalang. (Sant. 1:17) Ano an makakatabang sa sato na magrarom an pag-apresyar niato sa “tataramon nin Dios”? An sarong paagi iyo an paghorophorop sa kun paano giniyahan an mga kagsurat sa Biblia sa pagsurat ninda kaiyan. Kalabot dian an paggirumdom kan nagkapira sa abundang ebidensia na ipinasabong iyan. Kun gigibohon niato iyan, mapapahiro kitang basahon an Tataramon nin Dios aroaldaw asin iaplikar an konseho kaiyan.—Heb. 4:12.

‘PINASABNGAN NIN BANAL NA ESPIRITU’—PAANO?

3. Paano masasabing an mga propeta asin kagsurat sa Biblia ‘pinasabngan nin banal na espiritu’?

³ Sa laog nin 1,610 na taon—poon 1513 B.C.E. sagkod 98 C.E.—isinurat nin mga 40 laen-laen na lalaki an Biblia.  An nagkapira mga propeta na ‘pinasabngan nin banal na espiritu.’ (Basahon an 2 Pedro 1:20, 21.) An tataramon sa Griego na trinadusir na ‘pinasabngan’ nangangahulogan na “darahon hale sa sarong lugar pasiring sa ibang lugar” asin “puedeng itradusir sa laen-laen na paagi: mapahiro, ikatulod, togotan na mapahiro an sadiri.” * Ginamit iyan sa Guibo 27:15 sa pagladawan nin barko na dinara, itinulod, o ipinadpad kan doros sa sarong direksion. Masasabing an mga propeta asin kagsurat sa Biblia ‘pinasabngan nin banal na espiritu’ huling an Dios nagkomunikar, nagmotibar, asin naggiya sa sainda paagi sa aktibong puersa nia. Huli kaiyan, an isinurat ninda bakong sadiri nindang mga ideya, kundi mga kaisipan nin Dios. Kun beses dai ngani aram kan pinasabngan na mga propeta asin kagsurat an kahulogan kan ihinula o isinurat ninda. (Dan. 12:8, 9) Iyo, ‘an gabos na kasuratan ipinasabong nin Dios’ asin mayo nin mga opinyon nin tawo.—2 Tim. 3:16.

4-6. Sa anong mga paagi ipinaabot ni Jehova an mensahe nia sa mga kagsurat sa Biblia? Iilustrar.

⁴ Pero, paano ipinaabot kan banal na espiritu an mensahe nin Dios sa mga kagsurat sa Biblia? Eksaktong mga tataramon daw an inako ninda o mga ideya sana na masasabi ninda sa saindang sadiring mga tataramon? Isip-isipa kun paano naggigibo nin surat an sarong negosyante. Kun kaipuhan an eksaktong mga tataramon, sia mismo an magibo kan surat o ididikta nia iyan termino por termino sa sekretarya nia. An sekretarya an ma-type kaiyan, dangan pipirmahan iyan kan negosyante. May mga panahon man na mayor na mga ideya sana an itinatao kan negosyante, asin an sekretarya an naggigibo kan surat gamit an sadiri kaining estilo o bokabularyo. Dangan tibaad basahon asin ikorehir kan negosyante an surat saka ipagibo sa sekretarya an ano man na kaipuhan na bagohon. Sa katapustapusi, an surat pinipirmahan kan negosyante asin minamansay na hale sa saiya.

⁵ Kaagid kaiyan, may mga kabtang kan Biblia na itinao paagi sa “moro kan Dios.” (Ex. 31:18) Ginagamit man ni Jehova an pagdikta kun kaipuhan an eksaktong mga tataramon. Halimbawa, sa Exodo 34:27, mababasa niato: ‘Si Jehova suminabi ki Moises: Isurat mo an mga tataramon na ini; huli ta siring sa mga tataramon na ini ginibo ko an tipan saimo saka ki Israel.’ Sinabi man ni Jehova ki propeta Jeremias: “Isurat mo sa sarong libro an gabos na tataramon na [sasabihon] ko sa saimo.”—Jer. 30:2.

⁶ Pero, sa kadaklan na kamugtakan, imbes na espesipikong mga tataramon, mga ideya an milagrosong ipinapaabot sa puso asin isip nin mga kagsurat sa Biblia, na tinotogotan sindang pumili nin sadiri nindang mga tataramon tanganing ikapahayag iyan. An Parahulit 12:10 nagsasabi: ‘Ginibo kan Parahulit [“paratipon,” NW] na makakua sia nin mga makawiwiling tataramon, asin tanos na ikasurat an mga tataramon na may katotoohan.’ An kagsurat nin Ebanghelyo na si Lucas  ‘sinusog nin daing sala an agi-agi kan gabos na bagay magpoon sa kapinonan, na isinurat iyan sa pagkasurunodsunod.’ (Luc. 1:3) Sinegurado kan espiritu nin Dios na an mensahe nia dai maapektaran kan pagkabakong perpekto nin tawo.

7. Paanong an kadonongan nin Dios risang-risa sa paggamit nia nin mga tawo tanganing isurat an Biblia?

⁷ Risang-risa an dakulang kadonongan nin Dios sa paggamit nia nin mga tawo tanganing isurat an Biblia. Bako sanang impormasyon an ipinapaabot nin mga tataramon kundi mga emosyon asin pagmate man. Paano kun naggamit si Jehova nin mga anghel bilang mga parasurat? Ikakapaabot daw ninda an mga emosyon na natural sa tawo arog kan takot, kamondoan, asin pagkadesganar? Paagi sa pagtogot sa bakong perpektong mga lalaki na pilion an mga tataramon para sa mga ideyang inako ninda paagi sa banal na espiritu, ikinapaabot nin Dios an mensahe nia na may kapadangatan, pagkakalaenlaen, asin magugustohan nin tawo!

MGA EBIDENSIA

8. Taano ta masasabi na an Biblia bakong arog kan ibang libro sa relihion?

⁸ Dakol an ebidensia na an Biblia iyo an ipinasabong na Tataramon nin Dios. Bakong arog kan ibang libro sa relihion, ipinapamidbid sa sato kan Biblia an Dios. Halimbawa, kaiba sa mga babasahon dapit sa Hinduismo an mga libro nin mga himnong Veda, koleksion nin ritualistikong mga komentaryo manongod sa mga himnong ini, mga komposisyon sa pilosopiya na inaapod na mga Upanishad, asin mga estoryang epiko na inaapod na Ramayana saka Mahabharata. An Bhagavad Gita, na sarong libro na may mga instruksion sa moral, kabtang kan Mahabharata. Sa Tipitaka (Tolong Koleksion) kan Budismo, an sarong tomo sa pangenot manongod sa mga susundon asin regulasyon sa pamumuhay nin mga monghe saka madre. An saro pang tomo sa pangenot nagtotokar sa mga doktrina kan Budismo. An ikatolong tomo rekord kan berbal na mga katokdoan ni Buda. Si Buda mismo dai naghingako na sia sarong dios, asin dikiton an sinabi nia manongod sa Dios. An mga libro nin Confucianismo kombinasyon nin mga rekord nin mga pangyayari, susundon sa moral, pormula sa mahika, asin kanta. Totoo, an banal na libro kan Islam nagtotokdo na saro sana an Dios asin na sia nakakaaram kan gabos asin may patienot na kaaraman, alagad dai ngani kaiyan ihinahayag an ngaran nin Dios, an Jehova, na minalataw nin rinibong beses sa Biblia.

9, 10. Ano an manonodan niato sa Biblia manongod sa Dios?

⁹ Mantang an kadaklan na pangenot na libro sa relihion dikiton an sinasabi manongod sa Dios, itinotokdo sa sato kan Biblia an manongod ki Jehova Dios asin sa mga aktibidad nia. Tinatabangan kita kaiyan na masabotan an dakol na aspekto kan saiyang personalidad. Ihinahayag kan Biblia na an Dios bako sanang makapangyarihan sa gabos, madonong, asin makatanosan kundi namomoot man sa sato. (Basahon an Juan 3:16; 1 Juan 4:19.) Dugang pa, sinasabi sa sato kan Biblia: ‘An Dios dai nagpapalaen nin mga tawo, kundi sa arin man na nasyon, an natatakot sa saiya asin naggigibo nin katanosan iyo an inaako nia.’ (Gui. 10:34, 35) Sa sarong paagi, an pagigin madaling makua kan Biblia patunay kan katotoohan na ini. An mga eksperto sa lenguahe  nagsasabi na sa mga 6,700 na lenguahe na itinataram sa kinaban ngonyan, mga 100 kaiyan an itinataram kan 90 porsiento kan populasyon sa kinaban. Pero an bilog na Biblia, o kabtang sana kaiyan, trinadusir na sa labing 2,400 na lenguahe. Haros an gabos sa kinaban puedeng makakua nin kisiera mga kabtang kaiyan.

¹⁰ Si Jesus nagsabi: ‘An sakong Ama sagkod ngonyan naggigibo, asin ako naggigibo.’ (Juan 5:17) ‘Magpoon kan panahon sagkod sa mga panahon, si Jehova iyo an Dios.’ Kaya isip-isipa na sana an gabos na nagibo nia! (Sal. 90:2) An Biblia sana an nagtotokdo sa sato kan mga aktibidad nin Dios kan nakaagi sagkod sa presente asin naghahayag kun ano an gigibohon nia sa maabot na panahon. Itinotokdo man sa sato kan Kasuratan kun ano an nakakapaogma asin nakakapamondo sa saiya, asin ipinapahiling kaiyan kun paano kita magigin harani sa saiya. (Sant. 4:8) Dai niato pagtogotan an ano man na personal na mga gibohon o kahaditan na irayo kita sa saiya.

11. Anong dakula asin masasarigan na kadonongan an nasa Biblia?

¹¹ An dakula asin masasarigan na kadonongan na nasa Biblia nagpaparisa man na an librong iyan gikan sa saro na nakakalabi sa tawo. Si apostol Pablo nagsurat: ‘Siisay an nakaaram kan kaisipan nin Kagurangnan, tanganing magtokdo sa saiya?’ (1 Cor. 2:16) An bersikulong iyan nakabasar sa ihinapot ni propeta Isaias sa mga tawo kan panahon nia: ‘Siisay an nagpasunod kan espiritu ni Jehova, o huling parahulit Nia pinagtokdoan Sia?’ (Isa. 40:13) Siempre, an simbag, mayo. Bakong makangangalas na marahayon an mga resulta kan pag-aplikar kan konseho sa Kasuratan dapit sa pag-agoman, mga aki, aling-alingan, pakikiasosyar, kahigosan, pagkaonesto, asin moralidad! Nungka kitang makakakua sa Biblia nin maraot na sadol. Sa ibong na lado, bakong igo an kadonongan nin tawo tanganing irekomendar kun ano an pirmeng epektibo. (Jer. 10:23) Daing ontok an saindang pagpakarhay asin pagbago kan saindang mga sadol kun narerealisar ninda na may depekto iyan. ‘An nasa isip nin mga tawo siring sana sa sarong hinangos,’ an sabi kan Biblia.—Sal. 94:11, An Marahay na Bareta Biblia.

12. Anong mga paghihingoa an ginibo nin mga tawo tanganing paraon an Biblia?

¹² An saro pang ebidensia na an tunay na Dios an Autor kan Biblia iyo an ihinahayag kan kasaysayan manongod sa mga paghihingoang raoton an mensahe kaiyan. Kan 168 B.C.E., si Hadeng Antioco IV kan Siria nagmaigot na hanapon an ipinasabong na mga libro kan Ley tanganing suloon iyan. An dekreto kan Romanong emperador na si Dioclesiano ilinuwas kan 303 C.E. tanganing gabaon an mga tiriponan nin mga Kristiano asin suloon an Kasuratan ninda. An paggaba asin pagsulo na iyan nagpadagos nin sarong dekada. Pagkatapos kan ika-11 siglo, pinangenotan kan mga papa an mga paghihingoang paontokon an paglakop kan kaaraman sa Biblia, na kinokontra an pagtradusir kan Kasuratan sa mga lenguahe kan ordinaryong mga tawo. Sa ibong kan siring na mga pagprobar ni Satanas asin kan mga alipores nia, nagdanay an Biblia sagkod sa panahon niato. Dai tinogotan ni Jehova an siisay man na paraon an saiyang balaog sa katawohan.

MGA EBIDENSIA NA NAKAKOMBENSIR SA DAKOL

13. Ano an masasabi niatong ebidensia na ipinasabong an Biblia?

¹³ May iba pang ebidensia na ipinasabong an Biblia: an panglaog na pagkaoroyon, pagkaeksakto kun dapit sa siensia, naotob na mga hula, pambihirang pagkasadiosan, kakayahan na bagohon an mga buhay, pagigin tama dapit sa kasaysayan, asin nakakakontentong simbag sa mga hapot na nasambitan sa parapo 1. Isip-isipa an nakatabang sa nagkapira na magtubod na an Biblia gikan sa Dios.

14-16. (a) Ano an nakakombensir sa sarong Muslim, Hindu, asin agnostiko na an Biblia hale sa Dios? (b) Sa ministeryo, ano an gusto mong gamiton na ebidensia na an Biblia ipinasabong nin Dios?

¹⁴ Si Anwar * nagdakula na Muslim sa sarong  nasyon sa Middle East. Mantang temporaryo siang nakaistar sa Amerika del Norte, an mga Saksi ni Jehova nagduman sa iniistaran nia. “Kan panahon na idto,” an sabi ni Anwar, “negatibo an paghiling ko sa mga relihion na Kristiano huli sa mga Krusada asin sa Inkisisyon. Minsan siring, huling mainusisa talaga ako, nag-ako ako nin pag-adal sa Biblia.” Dai nahaloy, nagpuli si Anwar asin nawaran nin kontak sa mga Saksi. Pakalihis nin dakol na taon, nagbalyo sia sa Europa, na duman ipinagpadagos nia an saiyang pag-adal sa Biblia asin nakapagkongklusyon kaini: ‘Nakombensir ako na an Biblia an Tataramon nin Dios huling naootob an mga hula kaiyan, nagkakaoroyon an laog kaiyan, mayo iyan nin kontradiksion, asin nagkakaminorootmootan an mga parasamba ni Jehova.’ Nabautismohan si Anwar kan 1998.

¹⁵ Si Asha, na 16 anyos, hale sa pamilya na debotong Hindu. “Namimibi sana ako kun minaduman sa templo o nag-aagi nin mga kadepisilan,” an sabi nia, “alagad nungka kong inisip an Dios kun marahay an buhay ko.” Sinabi pa nia: “Pero, kan magdalaw sa sako an mga Saksi ni Jehova, lubos na nagbago an buhay ko.” Nag-adal si Asha nin Biblia asin namidbid nia an Dios bilang Katood. Ano an nakakombensir sa saiya na an Biblia ipinasabong nin Dios? Ipinaliwanag nia: “Nasimbag kan Biblia an gabos na hapot ko. Nakatabang iyan sa sako na magkaigwa nin pagtubod dawa dai nahihiling an Dios—dawa dai na ako magduman sa templo tanganing dumuko sa rebulto.”

¹⁶ Pinadakula si Paula na Katoliko, alagad kan adulto na, nagin agnostiko sia. Dangan may nangyari. “Nanuparan ko an sarong amigo na mga bulan ko nang dai nahihiling,” an sabi nia. “Panahon idto nin mga hippie. Kan mahiling ko kun paano sia nagbago—na ngonyan disente na asin maogma—hinapot ko sia, ‘Anong nangyari sa saimo, saka saen ka hale?’ Sinabi nia na nakikipag-adal sia nin Biblia sa mga Saksi ni Jehova dangan nagpatotoo sia sa sako.” Kan mahiling kan dating agnostikong ini na arog kaiyan kapuersa an katotoohan sa Kasuratan, naakit sia sa mensahe kan Biblia asin inako nia na ipinasabong iyan nin Dios.

‘AN SAIMONG TATARAMON ILAWAN SA SAKUYANG BITIS’

17. Ano an magigibo sa saimo kan aroaldaw na pagbasa kan Tataramon nin Dios asin paghorophorop dapit dian?

¹⁷ An Biblia sarong pambihirang balaog na itinao ni Jehova paagi sa banal na espiritu nia. Ikaogma mong marhay an pagbasa kaiyan aroaldaw, asin matalubo an pagkamoot mo dian saka sa Autor kaiyan. (Sal. 1:1, 2) Ponan an kada pag-adal paagi sa pamibi, na hinahagad an espiritu nin Dios tanganing giyahan an saimong mga kaisipan. (Luc. 11:13) An Biblia igwa kan mga kaisipan nin Dios, kaya mantang hinohorophorop mo an sinasabi kaiyan, an saimong kaisipan magigin siring sa kaisipan nin Dios.

18. Taano ta gusto mong padagos na makanood sa Biblia?

¹⁸ Mantang padagos kang minatalubo sa tamang kaaraman kan katotoohan, mamuhay ka kaoyon kan nanonodan mo. (Basahon an Salmo 119:105.) Maingat na maghiling sa Kasuratan siring sa ginigibo mo sa atubangan nin salming. Kun may mahiling ka na maninigo mong bagohon, gibohon mo iyan. (Sant. 1:23-25) Gamiton an Tataramon nin Dios bilang espada tanganing idepensa an saimong mga tinutubod asin haleon an falsong mga katokdoan sa puso nin mga mahoyo. (Efe. 6:17) Mantang ginigibo mo iyan, magpasalamat ka na an mga propeta asin lalaking ginamit tanganing isurat an mensahe kan Biblia tunay na ‘pinasabngan nin banal na espiritu.’

[Mga Nota sa Ibaba]

[Mga Hapot Para sa Pag-adal]

[Blurb sa pahina 29]

Basahon aroaldaw an Biblia, asin matalubo an pagkamoot mo sa Autor kaiyan

[Ritrato sa pahina 26]

An surat minamansay na hale sa saro na nagpirma dian