“Tabu Spirit i Stap Givim Tok Long Olgeta”
“Tabu Spirit i Stap Givim Tok Long Olgeta”
“I no gat tok blong profet we i kamaot long tingting blong man nomo. Taem tok blong profet i kamaot, ol profet oli talem, be Tabu Spirit i stap givim tok long olgeta, nao oli talemaot tok we i kamaot long God.”—2 PITA 1:21.
YU TRAEM TINGBAOT ANSA BLONG OL KWESTIN YA
?God i yusum tabu spirit olsem wanem blong givhan long ol man blong raetem Baebol?
?Wanem ol samting we i soemaot se Baebol i kamaot long God?
?Evri dei yu save mekem wanem blong soemaot se yu tinghae long Baebol?
1. ?From wanem yumi nidim Baebol?
PLANTE man long olgeta ples long wol oli wantem save ansa blong ol kwestin ya se: ?Laef i kamaot olsem wanem? ?Yumi laef long wol blong wanem? ?Wanem bambae i hapen long yumi? ?From wanem i gat plante trabol long wol? ?Wanem i hapen long yumi taem yumi ded? Sipos i no gat Tok blong God Baebol, bambae yumi no save ansa blong ol kwestin ya mo ol narafala impoten kwestin bakegen. Bambae ol samting nomo we i hapen long laef blong yumi, i tijim yumi. Nao bambae yumi no gat “loa blong Hae God” we i mekem yumi harem olsem man we i raetem Ol Sam.—Ridim Ol Sam 19:7.
2. ?Wanem i save givhan long yumi blong tinghae oltaem long Baebol?
2 Sore tumas, samfala oli no moa laekem ol tijing blong Baebol olsem fastaem. (Skelem wetem Revelesen 2:4.) Oli no moa traehad blong mekem ol samting we Jehova i glad long hem. (Aes. 30:21) Yumi no wantem se samting ya i hapen long yumi. Yumi save mekem tingting blong yumi i stap strong long Baebol mo ol tijing blong hem, mo yumi mas traehad oltaem blong mekem olsem. Baebol i wan nambawan presen we i kam long God ya we i mekem yumi. (Jem. 1:17) Ale ?wanem i save givhan long yumi blong tinghae moa long “Tok blong God”? Yumi mas tingbaot olsem wanem God i yusum ol man blong raetem Baebol, mo from wanem yumi save bilif se Baebol i tok blong God. Ale bambae yumi wantem ridim Baebol evri dei mo yumi folem ol tok blong hem.—Hib. 4:12.
?“TABU SPIRIT I STAP GIVIM TOK LONG OLGETA” OLSEM WANEM?
3. ?“Tabu Spirit i stap givim tok” long ol man we oli raetem Baebol olsem wanem?
3 Foti defren man oli raetem Baebol long 1,610 yia. Oli statem long yia 1513 B.K.T., mo oli finisim long 98 K.T. Sam long olgeta oli profet mo God i yusum tabu spirit blong “givim tok” blong hem long olgeta. (Ridim 2 Pita 1:20, 21.) Tok ya we oli tanem i kam “givim tok,” long Grik lanwis i save givim tingting blong muvum wan samting, blong karem wan samting, mo i save min se wan man i letem narafala i pulum hem blong mekem no blong talem wan samting. Ol Wok 27:15 i yusum sem tok ya taem i tokbaot wan sip we win i pulum no i muvum. Taem Baebol i talem se “Tabu Spirit i stap givim tok” long ol profet mo ol man we oli raetem Baebol, i min se God i talem ol tok blong hem long olgeta, hem i pulum olgeta blong raetem sam toktok, mo hem i yusum tabu spirit blong hem blong lidim olgeta. Taswe oli no raetemdaon tingting blong olgeta be oli raetemdaon tingting blong God. Samtaem oli no kasem save mining blong ol samting we oli talemaot mo oli raetemdaon. (Dan. 12:8, 9) From samting ya, yumi save se i tru we “olgeta tok blong Baebol oli kamaot long God fastaem.” Ol man oli no raetemdaon prapa tingting blong olgeta long Baebol.—2 Tim. 3:16.
4-6. ?Jehova i givhan olsem wanem long ol man blong oli save ol samting we oli mas raetem long Baebol? Plis yu talem wan pijatok.
4 ?God i yusum tabu spirit olsem wanem blong ol man ya oli save samting we oli mas raetem long Baebol? ?Hem i givim ol stret toktok we oli mas talem? ?No hem i talem samting we hem tingbaot, ale olgeta oli raetem long fasin blong olgeta blong toktok? Yu traem tingbaot wan olfala man we i wantem raetem leta i go long ol famle blong hem long aelan. Hem i askem gel blong hem blong givhan long hem. Gel ya i raetemdaon ol tok blong papa blong hem. Papa blong hem i talem ol tok we i wantem se gel blong hem i raetem. Mo samtaem hem i talem tingting blong hem long gel blong hem nao gel blong hem i yusum ol tok we hem i ting se i gud. Ale taem tufala i finisim leta, hem i askem long gel blong hem blong ridim long hem bakegen. Nao hem i raetem nem blong hem long leta ya. Taem ol famle long aelan oli kasem leta ya, oli glad tumas. Nating se gel ya i bin raetem leta, be oli save se leta ya i blong papa blong hem.
5 Long sem fasin, God hem wan i raetem sam haf blong Baebol. (Eks. 31:18) Samtaem hem i talem ol stret tok we oli mas raetem, from we ol tok ya oli mas stret gud. Long Eksodas 34:27, Jehova i talem long Moses se: “Yufala i laen blong Isrel, mo yu mas raetemdaon ol tok ya, from we ol tok ya i soemaot promes ya we mi mi mekem wetem yu, mo wetem olgeta ya.” Mo Jehova i talem long profet Jeremaea se: “Olgeta samting we mi mi talem long yu, be yu mas raetemdaon evriwan long wan buk.”—Jer. 30:2.
6 Plante taem God i no talem ol tok we ol man oli mas raetem long Baebol. Hem i putum ol samting we hem i tingbaot i go long hat mo tingting blong olgeta. Nao oli raetemdaon tingting blong hem, be long fasin blong olgeta blong toktok. Prija 12:10 i talem se waes man ya Solomon i “traehad blong faenem ol toktok blong givhan, mo ol tok we hem i raetem long buk ya oli stret gud nomo.” Mo Luk i talem se: “Mi mi stap luklukgud longtaem finis long olgeta samting ya, i stat long stat blong hem, mi mi ting se i gud mi raetem stori blong hem we evri tok blong hem oli stret.” (Luk 1:3) From we ol man ya oli sinman, God i yusum tabu spirit blong lukaot gud se oli no jenisim tingting we hem i wantem talemaot.
7. ?From wanem God i waes blong yusum ol man blong raetem Baebol?
7 God i waes blong yusum ol man blong raetem Baebol. Ol tok we man i raetem oli givhan long yumi blong save samting mo oli givhan long yumi blong save se man i harem olsem wanem. Yu tingbaot sipos Jehova i bin yusum ol enjel blong raetem Baebol. Ol enjel oli no save se man i harem olsem wanem taem hem i fraet, i harem nogud, mo taem tingting blong hem i foldaon. ?Yu ting se bambae oli tokbaot ol samting ya olsem wanem? Taswe, God i letem ol man oli raetem ol tok blong hem long fasin blong olgeta blong toktok, blong ol tok blong hem oli kasem hat blong yumi.
OL SAMTING WE I SOEMAOT SE BAEBOL I TOK BLONG GOD
8. ?From wanem Baebol i no olsem ol narafala buk blong skul?
8 I gat plante samting we i soemaot long yumi se Baebol i tok blong God. Baebol i no olsem ol narafala buk blong skul, from we hem i givhan long yumi blong save God ya we i tru. Ol buk blong skul ya Hindu oli tokbaot ol lafet, ol waes blong man, ol kastom stori, mo ol fasin we i gud mo i nogud. Ol buk blong Budis oli tokbaot ol loa blong ol man mo woman we oli mekem sam spesel wok blong skul blong olgeta. Mo oli tokbaot ol tijing blong olgeta mo ol tijing blong Buda. Buda i no talem se hem i wan god mo hem i tokbaot God smol nomo. Ol buk blong skul ya Konfusas, oli tokbaot ol samting we oli hapen long ol yia we i pas, ol fasin we i gud mo i nogud, ol rul blong majik, mo ol singsing. Buk blong skul ya Islam i tijim se i gat wan God nomo, we i save ol samting we bambae oli kamtru. Be long buk ya, i no gat nem blong God, Jehova. Nem ya i stap plante taosen taem long Baebol.
9, 10. ?Baebol i tijim wanem long yumi long saed blong Jehova?
9 Bighaf blong ol buk blong skul, oli no tokbaot God tumas. Be Baebol i givhan long yumi blong save Jehova God mo olgeta samting we hem i mekem. Baebol i givhan long yumi blong save ol fasin blong Jehova. Hem i talem se God i stap mekem i stret oltaem, hem i waes, mo hem i gat bigfala paoa. Hem i lavem yumi. (Ridim Jon 3:16; 1 Jon 4:19.) Baebol i talem tu se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” (Wok 10:34, 35) Oli tanem Baebol long plante defren lanwis. Ol man we oli stadi long ol lanwis, oli talem se i gat bitim 6,700 lanwis, be bighaf blong ol man long wol oli toktok long 100 lanwis nomo. Oli tanem ful Baebol no sam haf blong hem long bitim 2,400 lanwis. Taswe klosap olgeta man long wol oli save ridim Baebol long prapa lanwis blong olgeta. Hemia i soemaot se God i stap mekem i sem mak nomo long olgeta man.
10 Jisas i talem se: “Oltaem Papa blong mi i stap wok, mo mi tu mi mas wok.” (Jon 5:17) Baebol i tokbaot Jehova se: “Yu yu God we yu stap we yu stap, mo bambae yu save stap oltaem, gogo i no save finis.” !Yu traem tingbaot ol samting we hem i mekem! (Sam 90:2) Baebol nomo i talem wanem we God i mekem finis, wanem we hem i stap mekem, mo wanem we bambae hem i mekem. Hem i talemaot wanem i mekem God i glad mo wanem i mekem hem i no glad. Mo yumi lanem wanem we yumi mas mekem blong kam “klosap long God.” (Jem. 4:8) Yumi no mas letem ol samting we yumi nomo i wantem mo ol trabol blong yumi, i pulum yumi blong gowe long Jehova.
11. ?Wanem ol waestok we i stap long Baebol?
11 I gat plante waestok long Baebol. From samting ya, yumi bilif se Baebol i tok blong God. Profet Aesea i talem long ol man long taem blong hem se: “I no gat man i save talem long Hae God, se hemia nao fasin we hem bambae i mas mekem. I no gat man i save tijim hem, no i save givim waestok long hem.” (Aes. 40:13) Aposol Pol i talem sam tok we i klosap sem mak i se: “?Hu man i save tingting blong Hae God we i Masta blong yumi? ?Hu man i save tijim hem?” (1 Kor. 2:16) Tru ya, i no gat man i save tijim Jehova from we hem i save evri samting. Taswe, taem yumi folem ol tok blong Baebol, yumi harem gud tumas. Baebol i tokbaot wok, mared, pikinini, ol pleplei, ol fren, ol fasin we i gud mo i nogud, mo i givhan long yumi blong tok tru. Baebol i no talem ol tok we i blong spolem yumi. Defren olgeta, oltaem hem i givhan long yumi. Waes blong man i no olsem. (Jer. 10:23) Ol man oli stap jenisim ol tok mo ol tingting blong olgeta from we oli luksave se i no stret. Baebol i talem se ol tok we man i talem i no save givhan long narafala.—Sam 94:11.
12. ?Ol man oli mekem wanem blong spolem Baebol?
12 Ol samting we i hapen long ol yia we i pas i soemaot klia se Baebol i tok blong God. Ol man oli traem spolem Tok blong God. Long yia 168 B.K.T., Antiochus 4, we i king blong Siria, i talem long ol man se oli mas faenem ol buk blong Loa blong God, mo oli mas bonem. Long yia 303 K.T., Diocletian, we i haeman blong Rom, i talem long ol man blong oli spolem ol ples we ol Kristin oli stap joen long hem blong wosipim God, mo oli mas bonem Baebol blong olgeta. Oli mekem fasin ya blong 10 yia olsem. Biaen, ol haeman blong Katolik oli traehad plante handred yia blong blokem ol man, blong oli no tanem Baebol i go long ol narafala lanwis. Oli mekem olsem from we oli no wantem se ol man oli save ol tok blong Baebol. Nating se Setan mo ol man blong hem oli traem spolem Baebol, be Baebol i stap yet tede. Jehova i no letem wan man i spolem presen ya we hem i givim long ol man.
SAMTING WE I MEKEM PLANTE MAN I BILIF LONG BAEBOL
13. ?From wanem yumi save bilif long Baebol se i tok blong God?
13 I gat sam narafala samting we oli mekem man i bilif long Baebol se i tok blong God. Ol tok blong Baebol oli joen gud. Ol tok we Baebol i talem long saed blong ol samting raonabaot long yumi, oli tru. Ol profet tok blong Baebol oli kamtru mo ol man we oli raetem, oli no giaman. Baebol i save jenisim tingting mo laef blong ol man, mo i tok tru long saed blong histri. Hem i givim ol gudfala ansa long ol kwestin long haf 1. Naoia bambae yumi luk stori blong sam man we oli bilif long Baebol se i tok blong God.
14-16. (1) ?Wanem i mekem se trifala ya oli bilif se Baebol i kamaot long God? (2) ?Yu yu laekem blong tokbaot wanem samting we i soemaot se Baebol i kamaot long God?
14 Anwar * i gruap long wan kantri we i Muslim. Stat taem hem i smol nomo, hem i joen long skul blong Muslim. Taem hem i kam bigwan hem i go stap long Not Amerika. Long ples ya, ol Witnes blong Jehova oli kam long haos blong hem. Anwar i talem se: ‘Ol rabis fasin we ol bigman blong skul oli mekem long ol yia we i pas, i mekem se mi mi no laekem skul blong ol Kristin. Be mi mi laekem blong lanem ol niu samting, taswe mi glad blong stadi long Baebol.’ Smoltaem biaen, Anwar i gobak long ples blong hem mo hem i no save faenem ol Witnes. Plante yia i pas, nao hem i go stap long Yurop mo i stat blong stadi bakegen. Hem i talem se: ‘Ol samting we mi lanem i mekem mi bilif strong se Baebol i kamaot long God. Ol profet tok long Baebol oli kamtru. I gat wan bigfala tingting we i kamaot long ful Baebol. Ol tok blong hem oli joen gud. Mo ol man blong Jehova oli lavlavem olgeta.’ Long 1998, Anwar i baptaes.
15 Asha i gat 16 yia blong hem. Famle blong hem i Hindu. Asha i talem se: ‘Mi mi prea nomo taem mi go long haos prea no taem trabol i kasem mi. Taem ol samting long laef i gud, mi mi no tingbaot God. Ale wan dei ol Witnes blong Jehova oli kam long haos blong mi. Stat long taem ya laef blong mi i jenis bigwan.’ Asha i stadi long Baebol, nao hem i kam klosap moa long God. ?Wanem i mekem se hem i bilif we Baebol i kamaot long God? Asha i talem se: ‘Baebol i givim ansa blong olgeta kwestin we mi stap tingbaot. Hem i givhan long mi blong bilif se God i stap, nating se mi no stap long haos prea mo mi no bodaon long aedol.’
16 Famle blong Paula i Katolik, be taem Paula i kam bigwan, hem i no moa save sipos i tru se God i stap. Be wan samting i givhan long hem. Hem i talem se: ‘Mi mi storian wetem wan man we mi no luk hem longtaem lelebet. Plante man long taem ya oli gat longfala hea mo oli tekem drag. Be man ya i jenis. Hem i katem mustas mo hea blong hem, mo mi luk se hem i glad we i glad. Ale mi askem long hem sipos hem i kambak samples, mo wanem i mekem hem i glad olsem. Nao hem i talem se hem i stadi Baebol wetem ol Witnes blong Jehova. Mo hem i prij long mi.’ Paula i luk olsem wanem ol tok blong Baebol i givhan long fren blong hem blong jenisim fasin blong hem, nao hem i wantem save wanem we Baebol i talem. Mo hem i stat blong bilif se Baebol i kamaot long God.
“TOK BLONG YU I OLSEM LAET”
17. ?Sipos yu ridim Baebol evri dei mo yu tingting dip long hem, bambae i givhan long yu olsem wanem?
17 Jehova i yusum tabu spirit blong hem blong givim nambawan presen ya Baebol long yumi. Yu mas glad blong ridim Baebol evri dei, ale bambae yu laekem moa Baebol mo God. (Sam 1:1, 2) Evri taem bifo we yu ridim Baebol, i gud yu prea long God blong i givim tabu spirit long yu, blong yu kasem save long ol tok blong hem. (Luk 11:13) Ol tingting blong God oli stap long Baebol. I gud yu tingting dip long ol tok blong hem, nao bambae yu folem tingting blong God long ol samting we yu mekem.
18. ?From wanem yu wantem gohed blong lanem moa long Baebol?
18 I gud yu gohed blong lanem moa long ol tok blong Baebol, mo yu mekem ol samting we yu lanem i wok long laef blong yu. (Ridim Ol Sam 119:105.) Baebol i olsem wan glas we yu save lukluk yu long hem. Sipos yu luk se yu mas jenisim sam samting, yu mas mekem. (Jem. 1:23-25) Mo Baebol i olsem wan naef blong faet. Yu save yusum ol tok blong hem blong blokem ol man we oli agensem bilif blong yu. Mo yu save yusum Baebol blong rutumaot ol giaman tijing long hat blong ol man we oli wantem save trutok. (Efes. 6:17) Taem yu yusum Baebol, yu save glad we “Tabu Spirit i stap givim tok” long ol profet mo ol man we oli raetem Baebol.
[Futnot]
^ par. 14 Mifala i jenisim nem blong samfala.
[Kwestin]
[Tok blong makem poen long pej 32]
Yu mas ridim Baebol evri dei, ale bambae yu lavem God moa
[Tok blong pija long pej 29]
Leta i kam long man we i raetem nem blong hem long hem
