‘Lespri sen ki’n pous zonm’

“Parski okenn mesaz profesi pa’n ganny prezante par lavolonte imen, me se [“lespri sen,” NW] ki’n pous zonm pour anons mesaz Bondye.”​—2 PYER 1:21.

REFLESIR LO SA BANN PWEN

Ki mannyer Bondye ti servi lespri sen pour transmet son mesaz avek bann ekriven Labib?

Ki levidans nou annan ki Labib i sorti kot Bondye?

Ki ou kapab fer tou le zour pour gard ou lapresyasyon pour Parol Bondye?

1. Akoz nou bezwen Parol enspire Bondye?

PARTOU lo later dimoun pe demann sa bann kestyon: Kote nou sorti? Akoz nou lo later? Kote nou pe ale? Akoz lemonn i koumsa? Ki arive avek nou ler nou mor? Ki mannyer nou ti pou konn larepons sa bann kestyon ek lezot kestyon enportan si nou ti napa Parol enspire Bondye? San Lekritir Sen, nou ti pou bezwen aprann par leksperyans personnel. Eski nou ti pou kapab annan menm santiman avek sa psalmis konsernan “lalwa Zeova” si nou ti aprann selman atraver leksperyans personnel?​—Lir Psonm 19:7. *

2. Kwa ki pou ed nou gard nou lapresyasyon pour Labib konman en kado presye sorti kot Bondye?

² Me i fer lapenn pour vwar ki i annan serten ki’n les sa lanmour ki zot ti annan o konmansman pour Labib diminyen. (Konpar Revelasyon 2:4.) Zot nepli mars lo sa semen ki fer plezir Zeova. (Iza. 30:21) Pa fodre ki sa i arive avek nou osi. Nou kapab e devret kontinyen fer nou mye pour apresye Labib ek son bann lansennyman. Labib i en kado enportan sorti kot nou Kreater. (Zak 1:17) Kwa ki pou ed nou pour ogmant nou lanmour pour “parol Bondye”? En fason enportan se par medit lo lafason ki bann ekriven Labib ti ganny gide pour ekrir Labib. Nou bezwen osi rapel sa kantite levidans ki i’n ganny enspire. Si nou fer sa, nou pou anvi lir Parol Bondye tou le zour e aplik son bann konsey.​—Ebr. 4:12.

KI MANNYER ‘LESPRI SEN IN POUS ZONM’?

3. Dan ki sans ‘lespri sen ti pous’ bann profet ek ekriven Labib?

³ Pandan en peryod en pe plis ki 1,610 lannen,  depi lannen 1513 A.N.L. ziska 98 N.L., i’n annan apepre 40 zonm ki’n ekrir Labib. Serten sa bann zonm ki ‘lespri sen ti pous’ zot pour ekrir Labib ti bann profet. (Lir 2 Pyer 1:20, 21.) Sa lekspresyon Grek ki’n ganny tradwir konman ‘pouse’ i osi donn sa lide “pour tir dan en landrwa pour anmenn dan en lot” e “i kapab ganny tradwir konman: ganny pouse, ganny anmennen, les ou ganny pouse.” * Akt 27:15 i servi sa lekspresyon pour dekrir en bato ki’n ganny anmennen oubyen pouse dan en serten direksyon par divan. ‘Lespri sen ti pous’ bann profet ek ekriven Labib dan le sans ki Bondye ti kominik avek zot, motiv zot e gid zot par son lafors aktif. Sa i fer ki sa ki zot ti ekrir ti bann panse Bondye, pa sa ki pour zot. Parfwa sa bann profet ek ekriven ki’n ganny enspire pa ti ni menm konpran sa ki zot ti pe predir oubyen ekrir. (Dan. 12:8, 9) Alor, “tou Lekritir i enspire par Bondye,” i pa lopinyon imen.​—2 Tim. 3:16.

4-6. Ki mannyer Bondye ti transmet son mesaz avek bann ekriven Labib? Donn en legzanp.

⁴ Me ki mannyer mesaz Bondye ti ganny transmet avek bann ekriven Labib atraver lespri sen? Eski Bondye ti servi bann mo presi oubyen i ti donn zot bann nide kot zot ti ekrir dan zot prop mo apre? Annou vwar lafason ki en biznesmenn i ekrir en let. Kan i enportan pour servi bann mo presi, i ekrir sa let li menm oubyen dikte avek son sekreter mo pour mo. Son sekreter i tipe e apre sa biznesmenn i sinyen. Defwa i zis donn bann nide enportan e sa sekreter i prepar sa let dan son prop stil oubyen mo. Sa biznesmenn i tyek sa let e fer son sekreter fer bann sanzman neseser. A lafen, sa biznesmenn i sinyen konmkwa sa let i sorti kot li.

⁵ Pareyman, serten parti Labib ti ganny fourni “par ledwa Bondye.” (Egz. 31:18) Zeova ti osi dikte avek sa bann zonm kan i ti vreman enportan pour servi bann mo presi. Par egzanp, dan Egzod 34:27 i dir: “Alor, Zeova ti dir avek Moiz: ‘Ekrir sa bann parol pour ou menm, akoz i annakor avek sa bann parol ki mon fer en lalyans avek ou ek Izrael.’” Pareyman, Zeova ti dir profet Zeremi: “Ekrir pour ou menm dan en liv tou sa bann parol ki mon pou dir ou.”​—Zer. 30:2.

⁶ Par kont, dan laplipar ka, Bondye ti met dan leker ek lespri bann ekriven Labib son bann panse dan plas dikte avek zot mo pour mo e sa ti donn zot sa sans pour swazir zot prop mo pour  eksprim zot lekor. Eklezyast 12:10 i dir: “Sa enn ki rasanble dimoun ti rod bann zoli parol e ki mannyer pour ekrir bann parol laverite ki egzakt.” Lik, en ekriven Levanzil, ti “egzamin byen tou sa ki’n arive depi okonmansman” pour li kapab “ekri sa resi byen an-ord.” (Lik 1:3) Bondye ti servi son lespri sen pour fer sir ki lenperfeksyon imen pa ti sanz son mesaz.

7. Lefet ki Bondye ti servi imen pour ekrir Labib, ki mannyer sa i demontre ki i annan bokou lasazes?

⁷ Lefet ki Bondye ti servi imen pour ekrir Labib, sa i montre ki i annan bokou lasazes. Bann mo pa zis fer nou konn lenformasyon me osi santiman ek lemosyon. Si Zeova ti’n servi bann lanz pour ekrir Labib ki mannyer Labib ti pou ete? Eski zot ti pou kapab dekrir bann santiman ki imen i annan tel parey lafreyer, sagrinasyon ek dezapwentman? Par les bann imen enparfe swazir zot prop mo pour ekrir sa bann nide ki zot in gannyen atraver lespri sen, Bondye i pas son mesaz avek nou dan diferan fason, avek santiman, lanmour ek bann fason ki pou tous nou leker!

LEVIDANS KI LABIB I SORTI KOT BONDYE

8. Akoz nou kapab dir ki napa okenn liv relizye ki parey Labib?

⁸ I annan plizyer levidans ki Bondye ki’n enspir Labib. Napa lezot liv relizye ki fer nou pli byen konn Bondye ki Labib. Par egzanp, bann liv Endou i koz lo bann diferan seremoni relizye, filozofi, lezann ek bann lareg lo moralite. Bann liv Boudis i eksplik bann lareg ki bann lefrer ek leser i bezwen swiv. Sa bann liv i osi eksplik krwayans sa larelizyon ek lansennyman Bouda. Bouda pa’n zanmen dir ki i ti en bondye e i pa’n koz bokou lo Bondye. Bann liv Confucianism i koz lo bann keksoz ki’n arive dan lepase, sanson, mazik ek lareg lo moralite. I osi annan liv Islam ki dir ki i annan zis en Bondye e ki i konn tou keksoz enkli lavenir. Me i pa fer nou konn non Bondye, setadir Zeova ki aparet plizyer milye fwa dan Labib.

9, 10. Ki nou kapab aprann lo Bondye atraver Labib?

⁹ Menm si laplipar liv relizye pa koz bokou oubyen ditou lo Bondye, Labib i ed nou konn Zeova ek son bann aksyon. I ed nou konn diferan laspe son personnalite. Labib pa zis dir ki Bondye i tou pwisan, saz e zis me ki Bondye i osi kontan nou. (Lir Zan 3:16; 1 Zan 4:19.) Labib i dir nou: “Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:34, 35) Lefet ki Labib in ganny tradwir dan plizyer langaz i prouve ki Bondye pa fer preferans. Bann dimoun ki etidye langaz i dir ki i annan apepre 6,700 langaz dan lemonn ozordi e  100 parmi i ganny servi par 90 poursan popilasyon lemonn. Me Labib in ganny tradwir swa an antye ouswa zis en serten parti dan plis ki 2,400 langaz. Preski tou dimoun dan lemonn i ganny akse avek omwen en parti Labib.

¹⁰ Zezi ti dir: “Mon Papa i touzour pe travay, e mwan osi mon travay.” (Zan 5:17) ‘Depi en letan endefini ziska en letan endefini Zeova i Bondye.’ Zis mazin tou sa ki i’n fer! (Ps. 90:2) Zis Labib ki kapab fer nou konn bann keksoz ki Bondye in fer e sa ki i pou fer dan le fitir. Lekritir i osi ansenny nou sa ki fer li plezir, sa ki i pa kontan e osi ki mannyer nou kapab apros avek li. (Zak 4:8) Annou pa les okenn lentere personnel oubyen problenm fer nou dekile avek li.

11. Ki bon konsey ki nou kapab gannyen dan Labib?

¹¹ Sa kantite lasazes ki nou kapab gannyen atraver Labib i en lot levidans ki i en liv ki sorti kot Bondye. Zapot Pol ti ekrir: “Lekel ki konn Lespri Senyer pour kapab ansenny li?” (1 Kor. 2:16) Sa verse i baze lo sa ki profet Izai ti demande dan son letan: “Lekel ki kapab konn grander lespri Zeova e lekel ki kapab konsey li e fer li konn okenn keksoz?” (Iza. 40:13) Larepons byensir se personn. I pa drol alor ki kan nou aplik bann konsey Labib lo maryaz, zanfan, divertisman, frekantasyon, travay dir, lonnekte ek moralite sa i anmenn sa pli bon rezilta! Labib pa zanmen donn nou bann move konsey. De lot kote, imen i zis napa ase lasazes pour donn bann konsey ki toultan marse. (Zer. 10:23) Zot konsey i toultan pe ganny revize e ranplase akoz zot realize ki sa enn avan pa ti bon. Labib i dir: “Panse bann zonm i parey en lavaper.”​—Ps. 94:11.

12. Ki latak ki Labib in bezwen sirmonte?

¹² En lot levidans ki Bondye i Loter Labib i sa kantite zefor ki’n ganny fer pour detrir son mesaz. An 168 A.N.L., Lerwa Lasiri, Antyokis 4 ti esey rod bann liv Lalwa pour li brile. Diokletyen Lanperer Romen ti donn lord an 303 N.L. pour demolir bann landrwa kot bann Kretyen ti rasanble e pour bril zot Labib. Sa ti kontinyen pour plis ki di-z-an. Apre onzyenm syek bann lepap pa ti oule ki bann dimoun i aprann sa ki Labib i dir, alor zot pa ti dakor ki Labib i ganny tradwir dan zot prop langaz. Menm si Satan ek son bann reprezantan in fer tou pour detrir Labib, zot pa’n reisi. Zeova pa’n permet personn pour detrir sa kado ki i’n ofer imen.

LEVIDANS KI’N FER BOKOU KRWAR

13. Ki levidans nou annan ki Labib i sorti kot Bondye?

¹³ I annan en lot levidans ki Labib i sorti kot Bondye. I koz en sel parol, i annakor avek lasyans ek listwar, bann profesi ki’n ganny akonplir, son bann ekriven ti vreman onnet, i annan pouvwar pour sanz lavi e i donn nou larepons satisfezan pour sa bann kestyon ki ganny mansyonnen dan paragraf 1. Annou vwar kwa ki ti ed serten pour vwar ki Labib i sorti kot Bondye.

14-16. (a) Kwa ki ti konvenk trwa dimoun ki ti annan diferan krwayans ki Bondye i loter Labib? (b) Ki levidans ki Labib i en liv sorti kot Bondye ki ou kontan servi dan predikasyon?

¹⁴ Anwar * ti grandi konman en Mizilman dan en pei Mwayenn Oriyan. Kan i ti pe reste Nor Lanmerik, Temwen Zeova ti vizit li se li. Anwar ti dir: “Sa letan mon ti annan en pwennvi negatif lo bann Kretyen akoz sa ki bann legliz in  fer dan lepase. Me vi ki mon ti en dimoun kirye, mon ti dakor pour etidye Labib.” Pa tro bokou letan apre, Anwar ti retourn dan son pei natal e i ti perdi kontak avek bann Temwen. Plizyer lannen pli tar, i ti al reste Lerop e rekonmans etidye. I ti tonm lo sa konklizyon: “Lakonplisman bann profesi, lefet ki Lekritir Sakre i koz en sel parol, i pa kontredir son lekor ek lanmour ki egziste parmi bann adorater Zeova in konvenk mwan ki Labib i Parol Bondye.” Anwar ti batize an 1998.

¹⁵ Asha i en fiy 16 an ki sorti dan en fanmir Endou byen devoue. I ti dir: “Mon ti fer lapriyer zis letan mon ti al kot tanp oubyen kan mon ti dan problenm, me mon pa ti zanmen mazin Bondye kan tou ti pe al byen dan mon lavi.” I ti azoute: “Kan Temwen Zeova ti pas kot mwan, mon lavi ti sanz konpletman.” Asha ti etidye Labib e fer Bondye vin son zanmi. Kwa ki ti konvenk li ki Labib i sorti kot Bondye? I ti eksplike: “Labib in reponn tou bann kestyon ki mon ti kapab demande. I’n ed mwan pour annan lafwa dan Bondye menm si mon pa vwar li, setadir san ki mon bezwen al kot tanp e azenou devan en stati.”

¹⁶ Paula ti grandi konman en Katolik me kan i ti vin en adilt i pa ti krwar si Bondye i egziste. Me en keksoz ti fer li sanz son lespri. I ti dir: “Mon ti zwenn en zanmi ki mon pa ti’n vwar pour plizyer mwan. Sa ti dan bann letan kan bann dimoun ti kontan kit zot seve long e servi drog. Kan mon ti vwar ki i ti’n sanze, i ti’n raze e koup son seve, mon ti demann li: ‘Ki’n arive avek ou, kote ou ti ete?’ I ti dir mwan ki i ti pe etidye Labib avek Temwen Zeova e i ti rann temwannyaz avek mwan.” Lefet ki i ti’n vwar ki pouvwar laverite ki dan Labib i kapab annan, Paula ti aksepte Labib konman Parol enspire Bondye.

“OU PAROL I EN LALANP POUR MON LIPYE”

17. Ki byenfe ou kapab gannyen kan ou medit lo sa ki ou lir dan Parol Bondye tou le zour?

¹⁷ Labib i en kado merveye ki Zeova in donn nou atraver son lespri sen. Pran plezir pour lir li tou le zour e ou lanmour pour son Loter pou agrandir. (Ps. 1:1, 2) Sak fwa ki ou lir Labib, demann Bondye son lespri sen pour ed ou konpran sa ki ou pe lir. (Lik 11:13) Dan Labib i annan bann panse Bondye, alor kan ou medit lo sa ki ladan, ou pou pans dan menm fason avek Bondye.

18. Akoz ou anvi kontinyen aprann sa ki Labib i dir?

¹⁸ Anmezir ki ou konnesans lo Labib i agrandi, aplik sa ki ou aprann. (Lir Psonm 119:105. *) Lir Labib parey ou ti pou get dan en laglas. Si ou vwar bann sanzman ki ou devret fer, pa bezwen ezite. (Zak 1:23-25) Servi Parol Bondye konman en lepe pour defann ou krwayans e pour retir bann fo krwayans dan leker bann dimoun ki annan limilite. (Efe. 6:17) Anmezir ki ou fer sa, annan lapresyasyon pour lefet ki ‘se lespri sen ki’n pous’ sa bann profet ek lezot zonm pour ekrir sa ki dan Labib.

[Not anba lo paz]

[Kestyon]

[Ekstre lo paz 32]

Lir Labib tou le zour e ou lanmour pour son Loter pou agrandi

[Portre lo paz 29]

En let i sorti kot sa dimoun ki’n siny li