“Ginatuytuyan Sila sang Balaan nga Espiritu”

“Ang tagna wala mag-abot paagi sa kabubut-on sang tawo, kundi ang mga tawo nagpamulong gikan sa Dios samtang ginatuytuyan sila sang balaan nga espiritu.”—2 PED. 1:21.

MGA PUNTO NGA BINAGBINAGON

Paano ang mensahe sang Dios ginliton sang balaan nga espiritu sa mga manunulat sang Biblia?

Ano ang pamatuod nga ang Biblia naghalin sa Dios?

Ano ang himuon mo kada adlaw para magpabilin ang imo apresasyon sa Pulong sang Dios?

1. Ngaa kinahanglan naton ang Pulong sang Dios?

DIIN kita naghalin? Ngaa ari kita diri? Ano ang aton palaabuton? Ngaa amo sini ang kalibutan? Ano ang matabo sa aton kon mapatay kita? Ginapamangkot ini sang mga tawo sa bilog nga kalibutan. Paano naton mahibaluan ang mga sabat sa sini kag sa iban pa nga pamangkot kon wala ang Pulong sang Dios? Kon wala ang Balaan nga Kasulatan, mahimo nga ang aton lang mga eksperiensia ang magatudlo sa aton. Pero kon amo lang sini, masiling ayhan naton ang ginhambal sang salmista parte sa “kasogoan” ni Jehova?—Basaha ang Salmo 19:7.

2. Ano ang makabulig sa aton para padayon naton nga maapresyar ang Biblia bilang hamili nga regalo sang Dios?

² Makapasubo nga gintugutan sang iban nga magbugnaw ang ila una nga gugma sa Biblia. (Ipaanggid ang Bugna 2:4.) Wala na nila ginahimo ang makapahamuot kay Jehova. (Isa. 30:21) Indi ina dapat matabo sa aton. Dapat naton padayon nga apresyahon ang Biblia kag ang mga panudlo sini. Isa ini ka importante nga regalo halin sa aton mahigugmaon nga Manunuga. (Sant. 1:17) Ano ang makabulig sa aton agod magdalom ang aton apresasyon sa “pulong sang Dios”? Dapat naton pamalandungan kon paano gingamit ang mga tawo sa pagsulat sang Kasulatan kag usisaon ang madamo nga pamatuod nga ang Biblia naghalin sa Dios. Magapahulag ini sa aton nga basahon ang Pulong sang Dios kada adlaw kag sundon ang mga laygay sini.—Heb. 4:12.

“GINATUYTUYAN SILA SANG BALAAN NGA ESPIRITU”—PAANO?

3. Paano ang mga manalagna kag mga manunulat sang Biblia ‘gintuytuyan sang balaan nga espiritu’?

³ Ang Biblia ginsulat sang mga 40 ka tawo sa sulod sang 1,610 ka tuig, halin sang 1513 B.C.E. tubtob 98 C.E.  Ang iban sa ila mga manalagna nga ‘gintuytuyan sang balaan nga espiritu.’ (Basaha ang 2 Pedro 1:20, 21.) Ang Griego nga tinaga nga ginbadbad “ginatuytuyan” nagakahulugan sing “pagdala halin sa isa ka lugar pakadto sa lain nga lugar,” kag “mahimo man magakahulugan nga sayluhon, dalhon, ukon magpauyon.” * Gingamit ini sang Binuhatan 27:15 sa paglaragway sa isa ka sakayan nga gindaldal, ginsaylo, ukon ginpalid sang hangin. Ang mga manalagna kag mga manunulat sang Biblia ‘gintuytuyan sang balaan nga espiritu,’ buot silingon, ang Dios nagkomunikar, nagpahulag, kag naggiya sa ila paagi sa iya aktibo nga puersa. Gani ginsulat nila ang panghunahuna sang Dios, indi ang ila mga ideya. Ang iban gani sang ila mga gintagna kag ginsulat wala nila mahangpan ang kahulugan. (Dan. 12:8, 9) Huo, “ang pagsulat sa bug-os nga Kasulatan gintuytuyan sang Dios” kag wala gid ini nasamuan sang opinyon sang tawo.—2 Tim. 3:16.

4-6. Sa ano nga mga paagi ginpaalinton ni Jehova ang iya mensahe sa mga manunulat sang Biblia? Iilustrar.

⁴ Apang paano ang mensahe sang Dios ginliton sang balaan nga espiritu sa mga manunulat sang Biblia? Ginhambal bala sa ila ang kada tinaga, ukon mga ideya lamang ang ginpaalinton sa ila nga puede nila mapaathag sa ila kaugalingon nga pinamulong? Binagbinaga kon paano nagahimo sing sulat ang isa ka negosyante. Kon kinahanglan ilakip ang importante nga mga tinaga, sia mismo ang nagasulat sini ukon nagadikta sa iya sekretaryo. Gina-tayp ini sang sekretaryo, kag ginapirmahan sang negosyante. Kon kaisa, nagahatag lamang sia sing importante nga mga ideya, dayon ginasulat ini sang sekretaryo sa iya kaugalingon nga mga tinaga. Ginabasa ini sang negosyante kag ginapaliwat sa sekretaryo kon kinahanglanon. Sa katapusan, ginapirmahan niya ini nga daw sia mismo ang nagsulat.

⁵ Sing kaanggid, ang pila ka bahin sang Biblia ginsulat sang “tudlo sang Dios.” (Ex. 31:18) Kon kinahanglanon, ginadikta man ni Jehova ang mga tinaga nga dapat gamiton. Halimbawa, sa Exodo 34:27 mabasa naton: “Ang GINOO nagsiling kay Moises, ‘Isulat mo ining mga polong; kay sono sa tinutuyo sining mga polong nakahimo ako sing katipan sa imo kag sa Israel.’” Ginsilingan man ni Jehova si manalagna Jeremias: “Isulat mo sa tolon-an ang tanan nga polong nga ginpamolong ko sa imo.”—Jer. 30:2.

⁶ Apang sa masami, sa baylo sang espesipiko nga mga tinaga, mga ideya lamang ang ginapaalinton sa tagipusuon kag hunahuna sang mga manunulat sang Biblia. Gani mapabutyag nila ini sa ila kaugalingon nga mga tinaga. Halimbawa, ang Manugwali 12:10 nagsiling: “Ang Manugwali nagtinguha sa pagpangita sing mga polong nga kalahamut-an, kag yadto nga napanulat sing  matadlong nga mga polong sang kamatooran.” Ang manunulat sang Ebanghelyo nga si Lucas ‘nag-usisa sing sibu sang tanan nga butang halin sa ginsuguran, sa pagsulat sini sing pasunod.’ (Luc. 1:3) Paagi sa espiritu sang Dios, wala mabag-o sang pagkadihimpit sang tawo ang iya mensahe.

7. Ngaa makita gid ang kaalam sang Dios sang gingamit niya ang mga tawo sa pagsulat sang Biblia?

⁷ Makita gid ang daku nga kaalam sang Dios sang gingamit niya ang mga tawo sa pagsulat sang Biblia. Ang ila mga tinaga wala lamang nagpaalinton sang impormasyon kundi sang ila man balatyagon. Ano abi kon mga anghel ang ginpasulat ni Jehova? Mapabutyag ayhan nila ang nabatyagan sang mga tawo pareho sang kahadlok, kasubo, kag kapaslawan? Bangod gintugutan sang Dios ang mga tawo nga gamiton ang ila mga tinaga para ipabutyag ang mga ideya nga ginliton sa ila sang balaan nga espiritu, ang mensahe sang Dios nagtandog sa tagipusuon sang mga tawo!

MGA PAMATUOD NGA ANG BIBLIA NAGHALIN SA DIOS

8. Ngaa ang Biblia lain gid sa iban nga libro parte sa relihion?

⁸ Madamo sing pamatuod nga ang Biblia Pulong sang Dios. Indi pareho sa iban nga libro parte sa relihion, ang Biblia lamang ang nagapakilala sa matuod nga Dios. Halimbawa, ang Hinduismo may libro nga nagasugid parte sa ila mga seremonya. Ang ila libro nga Upanishads nagasugid sang ila mga pilosopiya, kag ang Ramayana kag Mahabharata nagaunod sang ginhimuhimo nga mga sugilanon. Ang Bhagavad Gita, nga bahin sang Mahabharata nagatudlo parte sa moralidad. Ang Budhismo naman may libro nga ginatawag Tipitaka (Tatlo ka Koleksion). Ang una nga tomo sini halos parte tanan sa mga pagsulundan sang pagkabuhi sang mga monghe kag madre. Ang ikaduha, parte sa doktrina sang Budhismo. Ang ikatlo, parte sa panudlo ni Budha. Pero si Budha wala nagsiling nga dios sia, kag diutay lang ang iya ginsiling parte sa Dios. Ang mga libro naman sang Confucianismo nagasugid sang mga hitabo sang una, pagsulundan sa moral, madyik, kag mga ambahanon. Matuod, ang balaan nga libro sang Islam nagatudlo nga may isa lamang ka Dios nga nakahibalo sang tanan kag sang palaabuton, pero wala gid sini ginsugid ang ngalan sang Dios nga Jehova, nga linibo ka beses nga makita sa Biblia.

9, 10. Ano ang aton matun-an sa Biblia parte sa Dios?

⁹ Diutay lamang ang ginasugid parte sa Dios sang kalabanan nga libro parte sa relihion. Pero ang Biblia nagatudlo sa aton parte kay Jehova nga Dios kag sa iya mga ginahimo. Nagabulig ini sa aton nga mahibaluan ang iya mga kinaiya. Ang Biblia wala lamang nagasugid nga ang Dios labing gamhanan, maalam, kag makatarunganon, kundi nagahigugma man sa aton. (Basaha ang Juan 3:16; 1 Juan 4:19.) Dugang pa, ang Biblia nagasiling: “Ang Dios wala sing ginapasulabi, apang sa tagsa ka pungsod ang tawo nga nagakahadlok sa iya kag nagahimo sang pagkamatarong kalahamut-an sa iya.” (Binu. 10:34, 35) Matuod gid ini kay ang Biblia mismo matigayon sang halos tanan nga tawo. Suno  sa mga eksperto, mga 6,700 ang lenguahe subong sa kalibutan. Mga 100 sa sini ang ginahambal sang mga 90 porsiento sang populasyon sa bug-os nga duta. Pero ang bilog nga Biblia, ukon ang bahin sini, ginbadbad sa sobra 2,400 ka lenguahe. Gani, halos tanan nga tawo makabasa bisan sang bahin lang sini.

¹⁰ Si Jesus nagsiling: “Ang akon Amay padayon nga nagapangabudlay tubtob karon, kag padayon ako nga nagapangabudlay.” (Juan 5:17) Si Jehova amo ang Dios “kutub sa gihapon tubtub sa gihapon.” Gani hunahunaa ang mga ginhimo niya halin sang una! (Sal. 90:2) Ang Biblia lamang ang nagasugid sa aton parte sa hilikuton ni Jehova sadto, karon, kag sa palaabuton. Ginatudlo man sini kon ano ang makapahamuot kag makapaakig sa iya, kag kon paano kita mangin suod sa iya. (Sant. 4:8) Gani indi naton pagtugutan ang iban nga butang ukon ang aton mga kabalaka nga magpahilayo sa aton kay Jehova.

11. Ano ang masaligan nga mga laygay nga makita sa Biblia?

¹¹ Ang maalamon nga mga laygay sang Biblia nagapakita man nga ini nga libro naghalin sa Dios. Si apostol Pablo nagsulat: “Sin-o ang nakahibalo sang hunahuna ni Jehova, agod matudluan niya sia?” (1 Cor. 2:16) Ini nga bersikulo ginbase sa pamangkot ni manalagna Isaias sa mga tawo sang iya panahon: “Sin-o bala ang nagmando sa [e]spiritu sang GINOO, ukon subong nga manuglaygay niya nagtudlo sa iya?” (Isa. 40:13) Siempre wala gid. Amo nga maayo gid ang resulta kon sundon naton ang mga laygay sang Kasulatan parte sa pag-asawahay, kalingawan, kaupdanan, kapisan, pagkabunayag, kag moralidad! Wala gid sing malain nga laygay ang Biblia. Pero ang mga tawo indi gid makahatag sing maalamon nga laygay. (Jer. 10:23) Ginabag-o nila pirme ang ila mga laygay kon marealisar nila nga indi ini epektibo. “Ang mga ginahunahuna sang mga tawo,” siling sang Biblia, “wala sing pulos.”—Sal. 94:11, Ang Pulong sang Dios, APD.

12. Ano nga mga paghingabot ang nalampuwasan sang Biblia?

¹² Napamatud-an man nga ang Dios amo ang Awtor sang Biblia sang gintinguhaan sang mga tawo nga dulaon ini. Sang 168 B.C.E., gintinguhaan ni Hari Antiochus IV sang Siria nga pangitaon ang inspirado nga mga libro sang Kasuguan para sunugon. Sang 303 C.E. naman, nagmando si Emperador Diocletian sang Roma nga gub-on ang tilipunan sang mga Cristiano kag sunugon ang ila mga Kasulatan. Nagpadayon ini sang mga napulo ka tuig. Pagligad sang ika-11 nga siglo, ginpamatukan sang mga papa ang pagbadbad sa Kasulatan sa madamo nga lenguahe bangod indi nila luyag nga tun-an ini sang mga tawo. Bisan pa sining paghingabot ni Satanas kag sang iya mga sakop, matigayon gihapon ang Biblia asta subong. Wala gintugutan ni Jehova nga dulaon sang bisan sin-o ang iya hamili nga regalo sa mga tawo.

ANG PAMATUOD NGA NAGKUMBINSI SA MADAMO

13. Ano ang mga pamatuod nga ang Biblia naghalin sa Dios?

¹³ May iban pa nga pamatuod nga ang Biblia naghalin sa Dios: wala ini nagasumpakilay, sibu ini sa siensia kag kasaysayan, ang mga tagna sini natuman, ang mga manunulat sini tampad, may gahom ini sa pagbag-o sang kabuhi, kag masabat gid sini ang mga pamangkot nga makita sa parapo 1. Binagbinaga kon ano ang nagkumbinsi sa pila ka tawo nga ang Biblia naghalin sa Dios.

14-16. (a) Ano ang nagkumbinsi sa isa ka Muslim, Hindu, kag agnostiko nga ang Biblia naghalin sa Dios? (b) Ano nga pamatuod nga ang Biblia naghalin sa Dios ang gusto mo gamiton sa ministeryo?

¹⁴ Si Anwar * nagdaku nga Muslim sa isa ka pungsod sa Middle East. Sang nakaistar  sia sa Aminhan nga Amerika, ginbisitahan sia sang mga Saksi ni Jehova. “Sadto nga tion,” siling ni Anwar, “wala ako nanamian sa Cristiano nga mga relihion bangod sa mga Krusada kag Inkisisyon. Pero bangod mausisaon ako, nagpasugot ako nga magtuon sa Biblia.” Sang ulihi, nagpauli si Anwar sa iya pungsod kag wala na makapakig-angot sa mga Saksi. Pagligad sang mga tinuig, nagsaylo sia sa Europa, diin ginpadayon niya ang iya pagtuon sa Biblia. Nakasiling sia sang ulihi: “Nakumbinsi ako nga ang Biblia Pulong sang Dios tungod ang mga tagna sini natuman, ang kaundan sini nagahisantuanay kag wala nagasumpakilay, kag nakita ko ang gugma sa tunga sang mga sumilimba ni Jehova.” Ginbawtismuhan si Anwar sang 1998.

¹⁵ Ang 16 anyos nga si Asha naghalin sa Hindu nga pamilya. “Nagapangamuyo lamang ako kon magkadto ako sa templo kag kon may problema,” siling niya, “pero wala ko ginadumdom ang Dios kon matawhay ang akon kabuhi.” Nagsiling pa sia: “Nagbag-o ang akon kabuhi sang ginkadtuan ako sang mga Saksi ni Jehova.” Nagtuon si Asha sa Biblia kag nangin Abyan niya ang Dios. Ano ang nagkumbinsi sa iya nga ang Biblia naghalin sa Dios? Nagsiling sia: “Nasabat sang Biblia ang tanan ko nga pamangkot. Nagbulig ini sa akon nga magtuo sa Dios bisan indi ko sia makita, gani indi na kinahanglan nga magkadto ako sa templo para magluhod sa idolo.”

¹⁶ Si Paula natawo nga Katoliko pero nangin agnostiko sia pagdaku niya. Apang may hitabo nga nagpabag-o sa iya kabuhi. “Nagkit-anay kami sang akon abyan nga wala ko makita sing pila ka bulan,” siling niya. “Sadto nga tion, uso gid ang pagpalaba sing buhok kag pagdroga. Sang nakita ko sia nga nakapagunting na, nakapamarbas, kag malipayon, ginpamangkot ko sia, ‘Ano ang natabo sa imo, kag diin ka naghalin?’ Nagsabat sia nga ginatun-an sia sa Biblia sang mga Saksi ni Jehova kag ginpanaksihan niya ako.” Bangod nakita sining agnostiko anay kon paano ginbag-o sang kamatuoran ang iya abyan, nangin interesado sia sa mensahe sang Biblia kag nagpati nga naghalin ini sa Dios.

“ANG IMO POLONG SUGA SA AKON MGA TIIL”

17. Ano ang resulta kon basahon mo kag pamalandungan ang Pulong sang Dios kada adlaw?

¹⁷ Ang Biblia isa gid ka maayo nga regalo nga gin-aman ni Jehova paagi sa iya balaan nga espiritu. Magadugang ang imo gugma sa Biblia kag sa Awtor sini kon basahon mo ini kada adlaw. (Sal. 1:1, 2) Antes mo ini basahon, mangamuyo sa Dios nga giyahan ka sang iya espiritu. (Luc. 11:13) Ang Biblia nagaunod sang panghunahuna sang Dios, gani samtang ginapamalandungan mo ini, mailog mo ang iya panghunahuna.

18. Ngaa luyag mo nga tun-an pirme ang Biblia?

¹⁸ Samtang nagauswag ang imo ihibalo sa Biblia, iaplikar ang imo natun-an. (Basaha ang Salmo 119:105.) Kabiga ang Kasulatan nga daw pareho sang espiho. Kon may makita ka nga dapat bag-uhon, himua dayon. (Sant. 1:23-25) Gamita ang Pulong sang Dios subong espada sa pagpangapin sa imo ginapatihan kag sa pag-utod sang butig nga mga panudlo sa tagipusuon sang mga mapainubuson. (Efe. 6:17) Samtang ginagamit naton ang Biblia, nagapasalamat kita kay ang mga manalagna kag ang mga lalaki nga gingamit sa pagsulat sini, ‘gintuytuyan gid sang balaan nga espiritu.’

[Mga Nota]

[Mga Pamangkot sa Pagtinuon]

[Blurb sa pahina 29]

Kon basahon mo ang Biblia kada adlaw, magadugang ang imo gugma sa Awtor sini

[Retrato sa pahina 26]

Ang isa ka sulat ginakabig nga naghalin sa nagpirma sini