“Peroveta herevadia be tau ta ese sibona ena ura dekenai ia gwauraia lasi, to lauma helaga ese taunimanima ia hasiahua hegeregerena, idia ese Dirava amo idia mai hereva idia gwauraia.”​—⁠2 PET. 1:21.

INAI OI LALOA NAMONAMO

Edena dala ai Dirava ena lauma helaga ese Baibel torea taudia ia durua, do idia torea herevadia idia diba totona?

Dahaka ese idia hamomokania Baibel be Dirava ena buka?

Dina ta ta lalonai edena dala ai oi hahedinaraia Baibel oi laloa bada?

1. Dahaka dainai Baibel be mai anina bada?

 TANOBADA hegegemadai momo idia ura inai henanadai edia haere idia diba: Ita be edeseni amo ita mai? Dahaka dainai tanobada ai ita noho? Nega vaira ai ita dekenai dahaka do ia vara? Dahaka dainai tanobada ai hekwakwanai momo idia vara? Ita mase neganai ita dekenai dahaka ia vara? Bema Baibel ia noho lasi, unai henanadai bona henanadai ma haida edia haere do ita diba lasi. Danu, bema Baibel be lasi, ita dekenai idia vara gaudia sibona amo diba do ita abia. Madi, bema unai dala sibona amo diba ita abia, iseda lalohadai Iehova “ena Taravatu” dekenai be salamo torea tauna ena hegeregerena lasi.​—⁠Salamo 19:7 duahia.

2. Dahaka ese ita do ia durua “Dirava ena hereva” ita laloa bada totona?

² Haida be guna Baibel ena hahediba herevadia idia ura henia, to hari unai ura be ia goada lasi dainai Iehova ena dala idia rakatania. (Apokalupo 2:4 sekea; Isa. 30:21) Ita dekenai unai ia vara lasi totona, namona be nega ibounai ita hekwarahi Baibel ena hahediba herevadia ita badinaia totona. Baibel be iseda Havaraia Tauna lalokauna amo ia mai harihari gauna hereadaena. (Iam. 1:17) Vadaeni, dahaka ese ita do ia durua “Dirava ena hereva” ita laloa bada totona? Dirava ese Baibel torea totona tatau haida ia gaukaralaia dalana ita laloa be namo. Danu, do ita herevalaia gaudia ese do idia hamomokania Baibel be Dirava amo, bona ita do idia hagoadaia dina ta ta ai Dirava ena Hereva ita duahia bona badinaia totona.​—⁠Heb. 4:12.

“LAUMA HELAGA ESE TAUNIMANIMA IA HASIAHUA” DALANA

3. Baibel torea taudia bona peroveta taudia be Dirava ese ia “hasiahua” anina be dahaka?

³ Baibel be lagani 1,610 lalodiai idia torea, unai be  lagani 1513 B.C.E ia lao 98 C.E. Tatau 40 ese Baibel idia torea. Idia haida be peroveta taudia, bona Baibel ia gwau idia be lauma helaga ese ia “hasiahua.” (2 Petero 1:20, 21 duahia.) Baibel torea taudia bona peroveta taudia be Dirava ese ia “hasiahua,” anina be Dirava be idia ida ia herevahereva, idia dekenai lalohadai ia henia, bona ena lauma helaga amo idia ia hakaua. Unai dainai, idia be sibodia edia lalohadai lasi, to Dirava ena lalohadai idia torea. Nega haida idia torea herevadia o idia perovetalaia gaudia edia anina idia lalopararalaia lasi. (Dan. 12:8, 9) Momokani, “Toretore Helagadia be Dirava ena hahekau henunai idia torea.” Unai dainai Baibel lalonai taunimanima edia lalohadai ia noho lasi.​—⁠2 Tim. 3:16.

4-6. Iehova ese Baibel torea taudia be edena dala ai ia durua? Haheitalai gwauraia.

⁴ To, edena dala ai Dirava ena lauma helaga ese Baibel torea taudia ia durua, do idia torea herevadia idia diba totona? Do idia torea herevadia ta ta ia hadibaia, eiava lalohadai ia henidia bena sibona edia hereva amo idia torea? Mani bisinesi tauna ta ese leta ia torea dalana ita laloa. Bema ia ura mai anina bada herevadia ia torea, ia sibona ese leta ia torea. Eiava iena ura herevadia ia gwauraia bona seketere ese leta dekenai ia torea. Seketere ese leta ia torea murinai, bisinesi tauna ese ia sainia. To, nega haida, bisinesi tauna ese hereva badadia be seketere dekenai ia gwauraia, bona seketere ese sibona ena hereva amo leta ia torea. Gabeai, bisinesi tauna ese ia sekea, gau haida ia haidaua bona seketere ese ia hamaoromaoroa lou. Unai murinai, bisinesi tauna ese leta ia sainia. Leta ia abia tauna ia diba, unai leta be bisinesi tauna ese ia torea.

⁵ Unai hegeregerena, Baibel ena kahana haida be “Dirava ese iena imana” amo ia torea. (Eso. 31:18) Iehova ia ura mai anina bada hereva haida idia gaukaralaia neganai, Iehova ese unai hereva be Baibel torea taudia dekenai ia gwauraia. Hegeregere, Esodo 34:27 ia gwau: “Lohiabada ese Mose ia hamaoroa, ia gwau, ‘Inai hereva be do oi torea, badina be inai hereva dekena amo lau be oi bona Israela taudia danu gwauhamata taravatuna do ita karaia.’” Danu, Ieremia dekenai ia gwau: “Lau ese oi lau hamaoroa vadaeni gaudia ibounai be buka ta lalonai do oi torea.”​—⁠Ier. 30:2.

⁶ Dirava ese Baibel torea taudia dekenai do idia gaukaralaia herevadia ta ta ia gwauraia hedinarai lasi. To, ena lalohadai be edia lalona dekenai ia atoa bona sibona edia hereva amo iena lalohadai idia torea. Hadibaia Tauna 12:10 ia gwau: “Hadibaia Tauna ese danu taunimanima hagoadaia herevadia ia tahua, bona ia torea herevadia be momokani, bona maoromaoro.” Luka be ‘matamana amo inai gaudia ibounai ia tahua namonamo’ bena ia torea. (Luka 1:3) Dirava ena lauma helaga ese Baibel torea taudia ia hakaua  dainai, taunimanima edia lalohadai idia torea lasi.

7. Dahaka dainai Dirava ese taunimanima ia gaukaralaia Baibel idia torea be aonega karana?

⁷ Dirava ese taunimanima ia gaukaralaia Baibel idia torea be aonega karana. Badina idia torea herevadia ita lalopararalaia, bona idia herevalaia hemami ita diba danu. To, edena bamona bema Dirava ese aneru ia gaukaralaia Baibel idia torea totona? Idia be taunimanima edia hemami hegeregere, gari, lalohisihisi, bona lalomanoka idia herevalaia diba, a? Dirava ese goevadae lasi taudia ia gaukaralaia dainai, idia torea herevadia ese iseda kudouna idia hamarerea.

EDENA BAMONA ITA DIBA BAIBEL BE DIRAVA AMO?

8. Dahaka dainai Baibel be tomadiho bukadia ma haida bamona lasi?

⁸ Badina namodia momo ese idia hahedinaraia Baibel be Dirava amo. Baibel be tomadiho bukadia ma haida bamona lasi, badina ia amo Dirava momokanina ita dibaia. Hegeregere, Hindu tomadiho bukadia ese edia tomadiho karadia, taunimanima edia lalohadai, gori herevadia, bona taunimanima ese do idia badinaia taravatu haida ia gwauraia. Buddha tomadiho bukadia ese edia hahediba herevadia idia hahedinaraia, bona monk bona nun idia badinaia taravatudia idia hahedinaraia danu. Buddha ia gwau lasi ia be dirava ta, bona Dirava ia harorolaia momo lasi. Confucius tomadiho bukadia be idaunegai idia vara gaudia, taunimanima ese do idia badinaia taravatu, meamea karadia, bona ane idia hahedinaraia. Islam tomadiho ena buka ese ia hahedinaraia Dirava be tamona, bona ia be gau ibounai, vaira negai do idia vara gaudia danu ia diba. To ia be Dirava ena ladana, Iehova ia gwauraia lasi. Baibel lalonai Iehova ena ladana be nega 7,000 bamona ia hedinarai.

9, 10. Baibel ese Dirava be edena bamona ia herevalaia?

⁹ Tomadiho bukadia momo be Dirava idia herevalaia momo lasi. To, Baibel amo ita be Iehova Dirava, ena ura bona kara ita dibaia. Baibel ia gwau Dirava be hahemaoro goeva, aonega, siahu bada bona lalokau Diravana. (Ioane 3:16; 1 Ioane 4:19 duahia.) Ma ia gwau: “Dirava be taunimanima edia toana ia laloa lasi, to bese ibounai lalonai ia idia gari henia bona kara maoromaoro idia karaia taudia be ia ese ia abia dae.” (Kara 10:34, 35) Baibel be gado idauidau ai idia hahanaia vadaeni. Unai ese ia hamomokania Dirava be taunimanima ibounai ia laloa bada. Gado stadilaia taudia idia gwau hari inai negai taunimanima be gado 6,700 ai idia hereva. To tanobada hegegemadai, taunimanima ibounai 90 pesen bamona be unai gado 100 idia gaukaralaia. Baibel ibounai eiava ena kahana haida be gado 2,400 ai idia hahanaia vadaeni. Ita gwau diba, kahirakahira taunimanima ibounai be edia gado ai Baibel idia duahia diba.

¹⁰ Iesu ia gwau: “Lauegu Tamana be ia gaukara noho ema bona hari, bona lau danu lau gaukara noho.” (Ioa. 5:17) Iehova be noho hanaihanai Diravana, bona ‘unai  bamona do ia noho ela bona hanaihanai.’ Unai dainai ia be gau momo ia karaia vadaeni. (Sal. 90:2) Baibel be idaunegai Dirava ese ia karaia gaudia ia herevalaia, hari ia karaia noho gaudia, bona nega vaira ai do ia karaia gaudia ia herevalaia danu. Baibel amo Dirava ia moalelaia bona ia moalelaia lasi karadia ita dibaia. Danu, ‘Dirava kahirakahira do ita lao’ dalana ita dibaia. (Iam. 4:8) Namo lasi eda ura o lalohekwarahi gaudia haida dainai Iehova ita rakatania.

11. Baibel lalonai edena bamona sisiba idia noho?

¹¹ Ita abia dae Baibel be Dirava amo ena badina ma ta be, Baibel lalonai Dirava ena aonega herevadia momo idia noho. Peroveta tauna Isaia be ena nega ai idia noho taudia ia nanadaia: “Daika ese Dirava ena Lauma ena dala ia diba? O daika ese ia dekenai ia hadibaia, o ia dekenai ia sisiba henia diba?” (Isa. 40:13) Paulo danu be unai bamona ia henanadai, ia gwau: “Daika be Iehova ena lalohadai ia diba bona ia do ia hadibaia?” (1 Kor. 2:16) Haere be ta lasi, badina Iehova sibona be gau ibounai ia diba. Unai dainai, bema Baibel ena sisiba headava, natudia, moale karadia, kara momokani, kara maoromaoro taravatudia, bona turadia abia hidi karana dekenai ita badinaia, namo ita davaria diba. Baibel lalonai sisiba namodia sibona idia noho. Taunimanima edia sisiba be nega momo ita idia durua lasi. (Ier. 10:23) Bema idia itaia edia sisiba be maoro lasi, nega momo idia haidaua. Baibel ia gwau taunimanima “edia laloa be anina lasi.”​—⁠Sal. 94:11.

12. Edena dala ai taunimanima be Baibel idia hadikaia toho?

¹² Histori ese ia hamomokania Baibel be Dirava momokanina amo ia mai. Guna, taunimanima momo idia ura Dirava ena hereva idia mogea. Lagani 168 B.C.E. ai, Suria ena King Antiochus Namba 4 ese taunimanima ia oda henidia Mose ena Taravatu ibounai do idia tahua bona gabudia. Danu, lagani 303 C.E. ai, Roma Pavapava Diocletian be oda ia henia Keristani taudia edia hebou gabudia ibounai do idia hadikaia bona Toretore Helagadia do idia gabua. Lagani 10 bamona lalonai unai idia karaia. Lagani momo lalonai, pope taudia ese dala idauidau ai Baibel hahanaia gaukarana idia koua toho, badina idia ura lasi taunimanima be Baibel idia duahia. Ena be Satani bona ia idia badinaia taudia idia ura Baibel idia hadikaia ore, to idia kwalimu lasi. Oibe, Iehova ia ura lasi taunimanima dekenai ia henia harihari gauna be ta ese do ia hadikaia.

MOMO ESE BAIBEL IDIA ABIA DAE ENA BADINA

13. Dahaka dainai ita abia dae Baibel be Dirava amo ia mai?

¹³ Badina ma haida dainai ita abia dae Baibel be Dirava amo ia mai. Baibel be sibona ia hakoikoia diba lasi, saiens dalanai ia maoro, ena peroveta herevadia momo be idia guguru vadaeni, bona Baibel idia torea taudia be hereva momokani sibona idia torea. Danu, Baibel be mai ena siahu ta ena mauri ia haidaua totona, ia lalonai idia noho sivaraidia be momokani bona maoromaoro, bona paragraf 1 ai idia noho henanadai ia haerelaidia. Mani ita itaia, dahaka dainai haida idia abia dae Baibel be Dirava amo ia mai.

14-16. (a) Dahaka dainai Anwar, Asha bona Paula idia abia dae Baibel be Dirava amo ia mai? (b) Haroro gaukara ai, edena dala ai oi hamomokania Baibel be Dirava ena buka?

¹⁴ Anwar a be Muslim tauna bona Middle East ena tano ta dekenai ia bada. North America ai ia noho neganai, Iehova ena Witnes taudia ese ena ruma ai idia vadivadi henia. Anwar ia gwau: “Unai negai lau be Keristani tomadiho lau ura henia lasi, badina sibona idia gwauraia Keristani taudia momo be tuari lalonai taunimanima momo idia hamasea. To lau ura gau matamatadia  lau dibaia dainai, Baibel lau stadilaia.” Daudau lasi murinai, Anwar be ena tano dekenai ia giroa lou, to Witnes taudia ia davaria lasi. Lagani haida murinai, Europe dekenai ia lao bona Baibel ia stadilaia lou. Ia gwau: “Lau abia dae Baibel be Dirava amo, badina Baibel ena peroveta herevadia idia guguru, ena matamana amo ela bona dokona ena sinado be tamona, ena hereva ibounai be momokani, bona Iehova idia tomadiho henia taudia be ta ta idia lalokau henia.” Anwar be lagani 1998 ai ia bapatiso.

¹⁵ Asha ena mauri lagani be 16 bona ena ruma bese be Hindu tomadiho idia goadalaia taudia. Asha ia gwau: “Dubu lau lao o hekwakwanai lau davaria negadia sibona ai, lau guriguri. To, lau moale negadiai, Dirava lau laloa lasi. Dina ta, Iehova ena Witnes taudia be egu iduara ai idia pidipidi, unai nega amo egu mauri lau haidaua.” Asha be Baibel stadi ia hamatamaia bona Dirava be iena turana ai ia halaoa. Dahaka dainai Asha ia abia dae Baibel be Dirava amo? Ia gwau: “Baibel ese egu henanadai momo ia haerelaia. Unai ese egu abidadama ia hagoadaia, bona lau laloparara dubu dekenai lau lao bona kaivakuku lau tomadiho henia be anina lasi.”

¹⁶ Paula bona ena ruma bese be Katolik taudia. Ia tubu daekau neganai ia daradara, Dirava ia noho eiava lasi. Bena gau ta ia vara. Ia gwau: “Egu turana ta lau davaria, ia be hua momo lalonai lau itaia lasi. Unai negai taunimanima momo edia huina be lata bona drag idia ania. To lau itaia egu turana ena toana be ia idau. Ena huina ia utua bona ia moale. Unai dainai lau nanadaia: ‘Oi dekenai dahaka ia vara, bona edeseniai oi noho?’” Ia gwau ia be Iehova ena Witnes taudia ida Baibel ia stadilaia, bena lau ia haroro henia. Paula ia itaia Baibel ena hereva momokani ese ena turana ena mauri ia haidaua dainai, ia abia dae Baibel be Dirava amo, bona ia danu be Baibel ia stadilaia.

“OIEMU HEREVA BE LAMEPA BAMONA, LAU IA HAKAUA NOHO”

17. Bema dina ta ta ai Baibel oi duahia bona ena hereva oi laloa dobu, dahaka namo do oi davaria?

¹⁷ Baibel be Iehova ena lauma helaga amo ia havaraia bona ita dekenai ia henia harihari gauna hereadaena ta. Unai dainai, bema dina ta ta ai oi duahia, ena hereva do oi ura henia bona emu lalokau Dirava dekenai be do ia goada. (Sal. 1:1, 2) Baibel oi do duahia lasi neganai, Dirava ena lauma helaga totona oi guriguri, unai amo oi duahia gaudia oi lalopararalaia diba. (Luka 11:13) Baibel lalonai Dirava ena lalohadai idia noho, unai dainai bema oi duahia gaudia oi laloa dobu, Dirava ena lalohadai do oi abia.

18. Dahaka dainai Baibel dekenai emu diba oi habadaia be namo?

¹⁸ Baibel amo emu diba oi habadaia neganai, namona be oi dibaia gaudia oi badinaia. (Salamo 119:105 duahia.) Baibel duahia karana be hevarivari ai emu vairana oi itaia bamona. Bema oi itaia emu kara haida oi haidaua be namo, oi hanamoa be gau badana. (Iam. 1:23-25) Dirava ena Hereva be tuari kaia bamona. Oi gaukaralaia diba emu abidadama oi gimaia totona. Danu, kudou maoro taudia oi durua hahediba hereva koikoidia idia dadaraia totona. (Efe. 6:17) Unai oi karaia neganai oi moale, badina lauma helaga ese peroveta taudia bona tatau haida ia “hasiahua” Baibel idia torea totona.

[Footnote]

[Study Questions]

[Picture on page 29]

Dina ta ta Baibel oi duahia, bona emu lalokau Dirava dekenai do ia goada

[Picture on page 26]

Leta ai ia noho saini amo ita diba leta be daika ese ia torea