‘Thlarau Thianghlim Tirhin An Sawi Ṭhîn’
‘Thlarau Thianghlim Tirhin An Sawi Ṭhîn’
“Thu hrilh lâwk rêng rêng hi mihring thua chhuak a ni ngai si lo a, miten thlarau thianghlim tirhin Pathian hnên ata an sawi zâwk ṭhîn a ni.” —2 PET. 1:21.
NGAIHTUAH TUR THU PAWIMAWHTE
Engtin nge thlarau thianghlim chuan Pathian thuchah chu Bible ziaktute hnêna a pêk chhâwn?
Eng finfiahnate’n nge Bible hi Pathian thâwk khum a nihzia târ lang?
Pathian Thu ngaihhlutna nei reng tûrin nî tin eng nge i tih theih?
1. Engvângin nge Pathian thâwk khum Thu hi kan mamawh?
KHAWI aṭanga lo kal nge kan nih? Engvângin nge kan lo pian chhuah? Khawi lam nge kan pan? Engvângin nge khawvêl hi hetiang a nih? Kan thihin kan chungah eng nge lo thleng? Hêng zawhnate hi khawvêl puma mite’n an zâwt ṭhîn. Pathian thâwk khum Thu hi nei lo ila chuan hêngte leh zawhna pawimawh dangte chhânna chu engtin nge kan hriat ang? Pathian Lehkha Thu Thianghlim tel lo chuan, min zirtîrtu ber tûr chu mahni thiltawn hi a ni mai dâwn si a. Chutiang a nih chuan fakna hla phuahtuin “LALPA dân” chunga a neih a rilru ang hi kan nei ve thei ngai ang em?—Sâm 19:7 chhiar rawh.
2. Engin nge Bible chu Pathian thilpêk hlu tak anga ngaihhlutna nei reng tûrin min ṭanpui ang?
2 Mahse, mi ṭhenkhatin Bible thutak hmangaihna hmasa an neih an bân ta chu a lungchhiatthlâk hle. (Thu Puan 2:4 nên khaikhin rawh.) Anni chu Jehova duhzâwng angin an kal zêl tawh lo a ni. (Is. 30:21) Chutiang chu kan chungah a thleng ve tûr a ni lo. Bible leh a zirtîrna ngaihhlutna chu kan nei reng theiin, nei reng tûrin ṭan kan la tûr a ni bawk. Bible hi min hmangaihtu leh Siamtu hnên aṭanga thilpêk pawimawh tak a ni. (Jak. 1:17) Engin nge “Pathian thu” ngaihhlutna nei lehzual tûrin min ṭanpui ang? Min ṭanpui theitu ber chu Bible ziak tûra a ziaktute kaihhruai an nih dân ngaihtuah hi a ni. Chutianga tihnaah chuan thâwk khum a nihzia finfiahna tam tak awmte zînga ṭhenkhat ngaihtuahna a tel a. Chu chuan nî tina Pathian Thu chhiar tûr leh a fuihna thute nunpui tûrin min tiphûr tûr a ni.—Heb. 4:12.
‘THLARAU THIANGHLIM TIRHIN AN SAWI’ —ENGTIN NGE?
3. Engtin nge Bible ziaktute leh zâwlneite chu “thlarau thianghlim tirhin” an awm?
3 Bible chu mi chi hrang hrang 40 vêlin kum 1,610 chuang—B.C.E. 1513 aṭanga C.E. 98 inkâr—chhûng an ziak a. An zînga ṭhenkhat chu ‘thlarau thianghlim tirh’ zâwlneite an ni. (2 Petera 1:20, 21 chhiar rawh.) “Tirhin” tia lehlin he Grik ṭawngkam hian “hmun khat aṭanga hmun danga la sawn emaw, keng sawn emaw” tihna a ni thei a; tin, “kawng hrang hranga lehlin theih a ni bawk: chêttîra awm, khalha awm, inkaihhruaitîr, tiin.” * Tirhkohte 27:15 chuan thliin lawng a rawn nam sawn a, a duhna lama a len kual vêl sawi nân he ṭawngkam hi a hmang a ni. Bible ziaktute leh zâwlneite chu “thlarau thianghlim tirhin” an awm a; chu chu Pathianin a chakna chevêl reng hmangin anni chu a be pawp a, a chêttîr a, a kaihruai bawk tihna a ni. Chutiang a nih avângin, anmahni ngaih dân ni lovin, Pathian ngaih dân an ziak zâwk tihna a nih chu. A châng phei chuan, Pathian thlarauva thâwk khum Bible ziaktute leh zâwlneite chuan an thu ziah leh hrilh lâwkte awmzia pawh an hre lo. (Dan. 12:8, 9) Ni e, “Pathian Lehkha Thu zawng zawng hi Pathian thâwk khuma pek a ni a,” mihringte ngaih dân lakah a fihlîm a ni.—2 Tim. 3:16.
4-6. Eng kawngtein nge Jehova’n Bible ziaktute hnênah a thuchah a hriattîr? Hrilhfiah rawh.
4 Mahse, engtin nge Pathian thuchah chu thlarau thianghlim hmanga Bible ziaktute hnêna pêk chhâwn a nih? A ziah dân tûr ang thlapin nge an dawn a, an ziah tûr thute dawngin chu chu anmahni îrâwm chhuakin an ziak mai zâwk? Company lian taka an hotuin lehkha a ziah dân tûr hi ngaihtuah teh. A thu ang thlapa ziah a ṭûl hunah chuan amah ngeiin a ziak emaw, a secratary hnênah a ziah dân tûr ang thlapin a hrilh emaw ngei ang. Secretary chuan thu chu a ziak chhuak ang a, a pu chuan a hming a sign ang. Mahse, a châng chuan ziak tûra a duh thu chu hrilhin, secretary chuan ama ṭawngkauchheh leh ṭawngkam hmangin lehkha chu a ziak bawk ṭhîn. Chutah a pu chuan lehkha chu endikin, thlâk ngai a tih apiang secretary chu a thlâktîr leh a. Atâwpah chuan a hming a sign a, chu lehkha chu ama lehkha thawn anga ngaih a ni ta ṭhîn a ni.
5 Chutiang bawkin, Bible pêng ṭhenkhat pawh “Pathian kutzunga ziak” ngei a ni a. (Ex. 31:18) A ṭûl hunah chuan ziah tûr ṭawngkam a hrilh thlap thlap bawk. Entîr nân, Exodus 34:27-ah heti hian kan chhiar a ni: “LALPAN Mosia hnênah, ‘Hêng thute hi ziak rawh khai: hêng ang thute hian a nia, i hnênah leh Israelte hnêna thu ka thlun ni,’ a ti a,” tiin. Jehova chuan zâwlnei Jeremia hnênah pawh: “I hnêna ka thu sawi tâk zawng zawng kha lehkhabuah ziak rawh,” tiin a hrilh bawk.—Jer. 30:2.
6 Mahse, a tam zâwkah chuan an ziah dân tûr thlap thlap ni lo, a thu chauh chu Bible ziaktute rilru leh thinlungah mak taka hriattîr an ni a, chûng thute ziak chhuak tûra mahni ṭawngkam hman tûr an thlan chu a phalsak a ni. Thuhriltu 12:10 chuan: “Thuhriltu chuan thu pawm tlâk hmu tûrin a zawng a, tlang taka ziak, thutak thute chu,” tiin a sawi a ni. Chanchin Ṭha ziaktu Luka pawhin, ‘a bul ata engkim fel takin a chhui a, a indawt zêlin a ziak’ bawk. (Lk. 1:3) Pathian thlarau chuan a thuchah chu mihring ṭhat famkim lohna tel lo tûrin a endik a ni.
7. Engtin nge Bible ziak tûra mihringte A hmanna aṭangin Pathian finna a lan?
7 Pathian finna nasatzia chu Bible ziak tûra mihringte a hmanna aṭang hian a lang chiang hle. Thu mal chuan hriattîrna mai bâkah rilru veizâwngte thlengin a târ lang thei a. Jehova chuan Bible ziaktu atân vântirhkohte lo hmang ta se engtin nge ni ang? Anni chuan mihringte chunga thilthleng ṭhîn hlauhna te, lungngaihna te, leh lunghnualnate phawk tûrin an ziak thei ang em? Mihring ṭha famkim lote’n thlarau thianghlim kal tlanga an dawn thute chu mahni irâwm chhuaka an ziah a phal avângin, Pathian chuan a thuchah chu duhawm tak, chi hrang hrang, leh mihringte rilru leh thinlung hneh thei tûr zâwngin min hrilh thei a ni.
FINFIAHNA HMUH THEIHTE
8. Engvângin nge Bible chu sakhaw lehkhabu dangte lakah a danglam bîk kan tih theih?
8 Bible hi Pathian thâwk khum Thu a nihzia finfiahna tam tak a awm a. Bible chuan sakhaw lehkhabu dangte ang lo takin Pathian min hmêlhriattîr a ni. Entîr nân, Hindu sakhaw lehkhabu-ah chuan an Vedic hla an tih mai an pathian fakna hla bu te, chûng hlate chungchânga an thil chîn dân hrang hrang sawina lehkhabu te, Upanishads tia an koh khawvêl lama finna lehkhabu te, leh Ramayana leh Mahabharata tia hriat lâr hmân lai thawnthu phuahchawp ziakna lehkhabute a tel a. Nungchang lama inkaihhruaina lam ziakna Bhagavad Gita chu Mahabharata pêng pakhat a ni. Buddhist sakhaw lehkhabu Tipitaka (Pathum Thlan Khâwm) zîngah chuan a volume pakhatna chu puithiamte leh sakhaw rawngbâwl nula thianghlimte nun dân tûr chungchâng sawina a ni deuh ber a. A pahnihna chu Buddhist sakhaw thurin chungchâng ziakna a ni leh a. A volume pathumna chu Buddha zirtîrna leh ṭawngkamte chhinchhiahna a ni. Buddha chu pathian angah a inchhâl lo va, Pathian chungchâng pawh a sawi mang meuh lo a ni. Confucianism sakhaw lehkhabu chu thilthlengte, nungchang lama dân zawm tûrte, mitdawivaih lamte, leh pathian fakna hlate inchawhpawlh a ni a. Islam sakhaw lehkhabu thianghlim chuan Pathian pakhat rinna a zirtîr a, Pathian chu engkim hria, thil lo thleng tûrte hre lâwk thei angin târ lang mah se, Bible-a vawi sâng tam tak lang Pathian hming Jehova tih takngial pawh a chuang lo.
9, 10. Bible aṭangin Pathian chungchâng eng nge kan zir theih?
9 Sakhaw lehkhabu a tam zâwkte chuan Pathian chungchâng an sawi tlêm hle laiin, Bible erawh chuan Pathian Jehova leh a thiltihte chungchâng min hriattîr a. A mize hrang hrangte hre tûrin min ṭanpui a ni. Bible chuan Pathian chu thil engkim tithei, fing ber, leh rorêl dik a nihzia mai bâkah, min hmangaihtu Pathian a nihzia pawh min hrilh bawk. (Johana 3:16; 1 Johana 4:19 chhiar rawh.) Chu bâkah, Bible chuan: “Pathianin mi duhsak bîk a nei lo . . . hnam tin zîngah tupawh amah ṭiha fel taka ti apiang a lâwmzâwng mi an ni ṭhîn,” tih min hrilh bawk. (Tirh. 10:34, 35) Ṭawng chi hrang tam taka Bible hmuh theih a nihna hian he thu dikzia hi a nemnghet a ni. Ṭawng chanchin zir mite chuan tûn lai khawvêlah hian ṭawng chi hrang 6,700 vêl hman a nih thu an sawi a. Chûng zînga 100 vêl chu khawvêl mi za zêla 90 te ṭawng hman a ni. Chuti chung chuan, Bible bu pum emaw, a bu ṭhenkhat emaw chu ṭawng chi hrang 2,400 aia tama lehlin a ni a. Khawvêla mi zawng zawng deuhthawin Bible bu ṭhenkhat tal chu an chhiar thei tihna a nih chu.
10 Isua chuan: “Ka Pain tûn thleng pawhin hna a thawk reng a ni, kei pawhin ka thawk ve a ni,” a ti a. (Joh. 5:17) Jehova chu ‘chatuan ata chatuan thleng pawhin Pathian a ni.’ Chuvângin, hna a thawh zawh hnem tûrzia chu han ngaihtuah teh! (Sâm 90:2) Bible chauh hian Pathianin tûn hmaa thil a lo tih tawh te, tûna a tih mêk te, leh nakina a la tih tûrte chu min hrilh a. Amah tilâwm thei leh tilâwm lo thei thilte pawh min zirtîrin, amah kan hnaih theih dân pawh min zirtîr bawk. (Jak. 4:8) Mahni duhzâwng emaw, ngaihven zâwng emaw ûmna engpawh chu a hnên ata i inhruai botîr lo vang u.
11. Bible-ah hian eng ang finna nasa leh rin tlâk nge kan hmuh theih?
11 Bible-a kan hmuh finna nasa tak leh rin tlâk takte pawhin Bible chu mihringte aia sâng zâwk hnên aṭanga lo kal a nihzia a târ lang bawk a. Tirhkoh Paula chuan heti hian a ziak a ni: “Tuin nge Lalpa rilru hre tawha amah chu zirtîr thei ang?” tiin. (1 Kor. 2:16) He Bible châng hian zâwlnei Isaia’n a hun laia mite hnêna a zawh: “Tuin nge LALPA thlarau chu thil tih dân tûr kawhhmuh le? A nih loh leh tunge a remruatsaktu nia amah zirtîr le?” tih hi a ṭanchhan a ni. (Is. 40:13) A chhânna chu tumahin tih hi a ni. Chuvângin, inneihna te, fanau te, intihhlimna te, ṭhian kawm te, taihmâkna te, rinawmna te, leh nungchang thianghlimna te lamaBible zirtîrnate nunpuinain rah ṭha a chhuah ṭhîn pawh hi a mak lo ve! Bible aṭang chuan thurâwn ṭha lo kan dawng ngai lo. Kawng leh lamah chuan, mihringte chu engtik lai pawha hman ṭangkai theih thurâwn pe tûrin an fing tâwk lo a ni. (Jer. 10:23) An thurâwnte chu a hlawhtling lo tih an hriat chhuah apiangin an siamṭhain, an tithar leh ṭhîn. Bible chuan: “Mihringte ngaihtuahte chu engmah lo mai mai a ni,” tiin a sawi a ni.—Sâm 94:11.
12. Kum zabi tam tak chhûng eng anga beihnate nge Bible chuan a pal tlang?
12 Bible Ziaktu chu Pathian dik a nihzia finfiahna dang leh chu a thuchahte tihboral tuma beihna chungchâng hmân lai thilthleng chanchin ziakte hi a ni. B.C.E. 168 khân Suria Lal Antiochus IV-na chuan Pathian thâwk khum Dân lehkhabu chu hal ral tumin a zawng a. C.E. 303-ah pawh Rom Lal Diocletian-a chuan Kristiante inkhâwmna hmunte chu tichhia a, an Bible-te chu hâl ral vek tûrin thu a pe bawk a. Kum sâwm chhûng chu a thupêk anga tih a ni. Kum zabi 11-na hnu lamah, pope-te chuan Bible hriatna darh zêl tûr khap behnaah hma an hruai a, mi nâwlpuite hriat thiam theih tûra Bible lehlin chu an dodâl a ni. Chutianga Setana leh a pâwlte’n theihtâwp chhuahin dodâl mah se, kan hun thleng hian Bible chu a la awm zêl a ni. Jehova chuan mihringte hnêna a thilpêk chu tu tihchhiat mah a phal lo.
MI TAM TAKTE HMINTU FINFIAHNA
13. Bible hi Pathian thâwk khum a nihzia finfiahna eng nge kan târ lan theih?
13 Bible hi Pathian thâwk khum ngei a nihzia finfiahna dang pawh a la awm cheu: a chhûng thu a inmilna te, science lam nêna a inremna te, hrilh lâwkna thleng famkim tawh te, mak tak maia thil zêp hran a neih loh dân te, mite nun thlâk thleng tûra thiltihtheihna a neih dân te, thilthleng chanchin nêna a inrem dân te, leh paragraph 1-naa zawhna târ lante lungawithlâk taka a chhân dân te hi. Mi tuemawte chu Bible hi Pathian hnên aṭanga lo kal a ni tih ring tûra ṭanpuitu thil ṭhenkhat lo ngaihtuah ta ila.
14-16. (a) Mosolman te, Hindu te, leh Pathian a awm leh awm loh hriat phâk a ni lo titute chu Bible hi Pathian thâwk khum a ni tih ring tûrin engin nge hmin? (b) Bible hi Pathian thâwk khum a nihzia mite hnêna hrilhfiah nân eng finfiahna nge hman i duh?
14 Anwar-a * chu Mosolman a ni a, Middle East ram pakhata chêng a ni. North America rama rei lo te chhûng a awm laiin Jehova Thuhretute’n an va tlawh a. Ani chuan: “Chutih lai chuan Kristiana inchhâlte’n thisen chhuahna nasa tak an thlen thu ka lo hriat avângin Kristian sakhaw chungchângah ngaih dân ṭha lo tak ka nei a. Mahse, thil hre duh mi tak ka nih avângin, Bible zir chu ka remti ta a,” tiin a sawi a ni. Chu mi hnu lawk chuan Anwar-a chu an ramah a haw leh ta a, Jehova Thuhretute nên chuan an inhmu leh ta lo va. A hnu kum engemaw zâtah chuan Europe ramah a pêm a, chutah chuan a Bible zir chu a chhunzawm leh a, heti hian thu tâwp a siam a ni: “Bible hrilh lâwkna thleng famkim te, a chhûng thu inmilna te, a thu inkalh awm miah lo te, leh Jehova betute zînga hmangaihna awm te hian Bible chu Pathian Thu a nihzia min rinnghehtîr a ni,” tiin. Anwar-a chuan kum 1998-ah baptisma a chang ta a ni.
15 Kum sâwm paruk mi Asha-i chu Hindu kul mûk tak chhûngkua aṭanga seilian a ni a. Heti hian a sawi a ni: “Temple-a ka kal emaw, harsatna ka tawh hun emawah chauh ka ṭawngṭai ṭhîn a, thil engkim a kal tluan lai chuan Pathian chu ka ngaihtuah ngai lo. Mahse, Jehova Thuhretute’n min rawn tlawh tâkah chuan, ka nun chu a inthlâkthleng thawk a ni,” tiin. Asha-i chuan Bible a zir a, Pathian chu a ṭhian angin a hre ta a ni. Ani chu Bible hi Pathian thâwk khum a ni tih engin nge hmin? Heti hian a sawi a ni: “Bible chuan ka zawhna neih apiang a chhâng vek a. Pathian hmu lo chung pawhin—milim chibai bûk tûra temple-a ka kal lo chung pawhin—rinna nei tûrin min ṭanpui a ni,” tiin.
16 Paula-i chu Catholic a ni a; mahse, a nulât chhuah chuan Pathian awm leh awm loh hriat phâk a ni lo tih ngaih dân a nei a ni. Chutah thil engemaw a thleng ta. Heti hian a sawi a ni: “Thla engemaw zât ka hmuh tawh loh ka ṭhian pakhat chu ka hmu nawlh mai a. Hippie vânglai vêla ka ṭhian kha a ni a. A inthlâk danglam dân—a lu fai taka mêt a, hlim taka a awm—ka han hmuh chuan, ‘I chungah eng nge thleng ta, khawiah nge i awm tâk daih a?’ tiin ka zâwt a. Jehova Thuhretute’n Bible an zirpui thu a sawi a, thu min hrilh ṭan ta mai a ni,” tiin. Pathian Lehkha Thuin thiltihtheihna a neih nasatzia a hmuh hnu chuan a hmaa Pathian a awm leh awm loh hriat phâk a ni lo titu, Paula-i chu Bible thu chuan a hîp ta a, Pathian thâwk khum ngeia ziah a ni tih a pawm ta a ni.
“I THU HI KA KE ATANTE HIAN KHAWNVAR A NI”
17. Nî tina Pathian Thu chhiar leh a thute chhût ngunna chuan engtin nge a ṭanpui theih che?
17 Bible hi Pathianin a thlarau thianghlim hmanga a thil min pêk ropui tak a ni a. Nî tin tui takin chhiar la, tichuan, Bible i ngainatna leh a Ziaktu i hmangaihna chu a lo pung ang. (Sâm 1:1, 2) I chhiar dâwn apiangin ṭawngṭainain ṭan la, i ngaihtuahnate kaihruai tûrin Pathian thlarau ṭanpuina dîl ang che. (Lk. 11:13) Bible-ah chuan Pathian ngaihtuahnate a chuang a, chuvângin chûng thute chu i chhût ngun hian i ngaihtuahnate chu Pathian ngaihtuahna mil tûrin i siam ṭha thei ang.
18. Engvângin nge Bible aṭanga inzir chhoh zêl chu i duh ang?
18 Thutak hriatna dik lama hma i sâwn zêl rualin, i thil zirte chu nunpui bawk ang che. (Sâm 119:105 chhiar rawh.) Dârthlalanga i inen angin Pathian Lehkha Thu chu inendik nân hmang la. Inthlâkthleng ngaihna lai i hmuh chuan, inthlâkthleng nghâl ang che. (Jak. 1:23-25) Pathian Thu chu i rinna humhim nân leh mi thuhnuairawlhte thinlung aṭanga zirtîrna dik lote paih bosak nân ngûnhnâm angin hmang ṭangkai ang che. (Eph. 6:17) Chutianga i tih lai chuan, zâwlneite leh Bible ziaktute chu ‘thlarau thianghlim tirh’ an nih avângin lâwm hle ang che. (w12-E 06/15)
[Footnote-te]
^ par. 3 A Greek-English Lexicon of the New Testament and Other Early Christian Literature.
^ par. 14 Hming ṭhenkhat thlâk a ni.
[Zirlai Atâna Zawhnate]
[Phêk 32-naa thu lâk chhuah]
Nî tin Bible chhiar la, a Ziaktu i hmangaihna chu a lo pung ang
[Phêk 29-naa milem]
Lehkha chu a hming sign-tu hnên aṭanga lo kal anga ngaih a ni ṭhîn
