“Il-​profezija qatt ma ġiet bir-​rieda tal-​bniedem, imma xi bnedmin tkellmu minn Alla skond kif tmexxew mill-​ispirtu qaddis.”​—2 PT. 1:21.

PUNTI BIEX TAĦSEB DWARHOM

Il-​messaġġ t’Alla kif ġie trasmess permezz tal-​ispirtu qaddis lill-​kittieba Bibliċi?

Liema evidenza hemm li l-​Bibbja hi ispirata minn Alla?

X’tistaʼ tagħmel kuljum biex iżżomm l-​apprezzament tiegħek għall-​Kelma t’Alla?

1. Għala għandna bżonn il-​Kelma ispirata t’Alla?

 MINN fejn ġejna? Għala qegħdin hawn? X’se jiġri minna fil-​futur? Għala d-​dinja hi kif inhi? X’jiġrilna meta mmutu? Ħafna nies madwar id-​dinja jistaqsu dawn il-​mistoqsijiet. Kif konna se nkunu nafu t-​tweġibiet għalihom u għal mistoqsijiet importanti oħrajn kieku ma kellniex il-​Kelma ispirata t’Alla? Mingħajr l-​Iskrittura Mqaddsa, l-​għalliem primarju tagħna jkun l-​esperjenza personali tagħna. Bl-​esperjenza personali bħala l-​għalliem tagħna, jistaʼ qatt inħossuna l-​istess bħalma ħassu s-​salmista lejn “il-​liġi taʼ Ġeħova”?​—Aqra Salm 19:7.

2. X’se jgħinna nibqgħu nuru l-​apprezzament tagħna għall-​Bibbja bħala għotja prezzjuża mingħand Alla?

² Imma b’dispjaċir, ir-​realtà hi li xi wħud ħallew l-​imħabba li kellhom fil-​bidu għall-​verità tal-​Bibbja tmajna. (Qabbel Rivelazzjoni 2:4.) Ma baqgħux jimxu bil-​mod li jogħġob lil Ġeħova. (Is. 30:21) Dan m’għandux għalfejn jiġri lilna. Aħna nistgħu u għandna naħdmu biex nibqgħu nuru l-​apprezzament tagħna għall-​Bibbja u t-​tagħlim tagħha. Il-​Bibbja hi għotja importanti mingħand il-​Ħallieq tagħna kollu mħabba. (Ġak. 1:17) X’se jgħinna nkabbru l-​apprezzament tagħna għall-​“kelma t’Alla”? Xi ħaġa importanti li tgħinna hi li nirriflettu dwar kif kittieba tal-​Bibbja kienu gwidati biex jiktbu l-​Iskrittura. Dan jinvolvi li neżaminaw xi ftit mill-​ħafna raġunijiet għala nistgħu nemmnu li l-​Bibbja hi minn Alla. Billi nagħmlu hekk, għandna niġu mħeġġin naqraw il-​Kelma t’Alla kuljum u napplikaw il-​pariri tagħha.​—Ebr. 4:12.

 KIF “TMEXXEW MILL-​ISPIRTU QADDIS”?

3. Il-​profeti u l-​kittieba tal-​Bibbja kif “tmexxew mill-​ispirtu qaddis”?

³ F’perijodu taʼ 1,610 snin—li beda mis-​sena 1513 Q.E.K. sas-​sena 98 E.K.—xi 40 raġel differenti kitbu l-​Bibbja. Xi wħud kienu profeti li “tmexxew mill-​ispirtu qaddis.” (Aqra t-​2 Pietru 1:20, 21.) L-​espressjoni “tmexxew” ġejja minn kelma Griega, u f’dan il-​vers tfisser li tiġi mċaqlaq, li tinġarr, jew li tħalli lilek innifsek tiġi mċaqlaq. Atti 27:15 juża l-​istess kelma biex jiddeskrivi ġifen li ġie mċaqlaq jew imbottat f’ċerta direzzjoni mir-​riħ. Il-​profeti u l-​kittieba tal-​Bibbja “tmexxew mill-​ispirtu qaddis” fis-​sens li Alla kkomunika magħhom, immotivahom u ggwidahom permezz tal-​forza attiva tiegħu. Ladarba dan kien il-​każ, huma ma kitbux l-​ideat tagħhom stess, iżda l-​ħsibijiet t’Alla. Kultant, il-​profeti u l-​kittieba ispirati lanqas biss kienu jafu t-​tifsir taʼ dak li bassru jew kitbu. (Dan. 12:8, 9) Iva, “l-​Iskrittura kollha hi mnebbħa minn Alla” u ma fihiex opinjonijiet tal-​bnedmin.​—2 Tim. 3:16.

4-6. Ġeħova b’liema modi kkomunika l-​messaġġ tiegħu lill-​kittieba tal-​Bibbja? Agħti eżempju.

⁴ Imma l-​messaġġ t’Alla kif kien trasmess permezz tal-​ispirtu qaddis lill-​kittieba tal-​Bibbja? Ngħataw huma kliem speċifiku? Jew, ngħataw sempliċement ideat li setgħu jesprimu fi kliemhom? Ikkunsidra kif negozjant jistaʼ jipprepara ittra. Meta jkun importanti li jintuża kliem adattat, hu nnifsu jikteb l-​ittra jew jiddetta lis-​segretarja xi kliem għandha tuża. Is-​segretarja tittajpjaha, u l-​ittra tiġi ffirmata min-​negozjant. Drabi oħra, jipprovdi biss l-​ideat prinċipali, u s-​segretarja tipprepara l-​ittra, billi tuża l-​istil jew il-​vokabolarju tagħha. Imbagħad, in-​negozjant jistaʼ jara jekk hemmx bżonn aġġustamenti u wara jitlob lis-​segretarja biex tibdel fejn meħtieġ. Fl-​aħħar, l-​ittra tiġi ffirmata minnu u titqies li ġejja mingħandu.

⁵ B’mod simili, xi partijiet mill-​Bibbja nkitbu “bis-​sabaʼ t’Alla.” (Eżo. 31:18) Meta kien importanti ħafna li jintuża kliem speċifiku, Ġeħova qal lill-​kittieb xi kliem għandu jikteb. Pereżempju, f’​Eżodu 34:27 naqraw: “Ġeħova ssokta jgħid lil Mosè: ‘Niżżel bil-​miktub għalik innifsek dan il-​kliem, għaliex hu fi qbil maʼ dan il-​kliem li se nagħmel patt miegħek u maʼ Israel.’” Bl-​istess mod, Ġeħova qal lill-​profeta Ġeremija: “Ikteb fi ktieb dak kollu li se ngħidlek.”​—Ġer. 30:2.

⁶ Iżda f’ħafna mill-​każi, Alla mirakolożament ikkomunika ħsibijiet iktar milli kliem speċifiku fil-​qlub u fl-​imħuħ  tal-​kittieba tal-​Bibbja. Dan ippermettielhom jagħżlu l-​kliem tagħhom biex jiktbu l-​messaġġ tiegħu. Ekkleżjasti 12:10 jgħid: “Il-​kongregatur ipprova jsib kliem pjaċevoli u jikteb kliem korrett u veru.” Luqa, kittieb tal-​Evanġelju, ‘fittex kollox mill-​bidu b’eżattezza, [u] ddeċieda li jiktibhom b’ordni loġiku.’ (Lq. 1:3) L-​ispirtu t’Alla għamel ċert li l-​messaġġ tiegħu ma jiġix imtebbaʼ bl-​imperfezzjoni umana.

7. L-​għerf t’Alla kif jintwera b’mod evidenti billi uża l-​bnedmin biex jiktbu l-​Bibbja?

⁷ L-​għerf kbir taʼ Alla jintwera b’mod evidenti billi uża l-​bnedmin biex jiktbu l-​Bibbja. Il-​kliem ma jwassalx informazzjoni biss, imma emozzjonijiet u sentimenti wkoll. Xi ngħidu kieku Ġeħova qabbad lill-​anġli bħala kittieba? Setgħu huma ddeskrivew sentimenti umani bħal biżaʼ, niket, u skuraġġiment? Minħabba li ħalla lil bnedmin imperfetti jagħżlu l-​kliem tagħhom stess biex jiktbu l-​messaġġ tiegħu, il-​messaġġ t’Alla jmissilna qalbna.

ŻOMM L-​EVIDENZA QUDDIEM GĦAJNEJK

8. Għala nistgħu ngħidu li l-​Bibbja mhi bħal ebda ktieb ieħor tar-​reliġjon?

⁸ Għandna ħafna evidenza biex nemmnu li l-​Bibbja hi minn Alla. Minħabba li tgħinna nsiru nafu lill-​Alla l-​veru, il-​Bibbja mhi bħal ebda ktieb ieħor tar-​reliġjon. Pereżempju, il-​kotba tal-​Ħinduiżmu jgħidulna dwar iċ-​ċerimonji reliġjużi tiegħu, il-​filosofiji, il-​ħrejjef, u r-​regoli fuq il-​moralità. Il-​kotba tal-​Buddiżmu jispjegaw ir-​regoli li l-​patrijiet u s-​sorijiet jeħtieġu jsegwu. Jispjegaw ukoll id-​duttrini tal-​Buddiżmu u t-​tagħlim tal-​Budda. Il-​Budda ma qalx li hu nnifsu hu xi alla, u bilkemm tkellem dwar Alla. Il-​kotba tal-​Konfuċjaniżmu jitkellmu dwar affarijiet li seħħew fil-​passat, regoli dwar il-​moralità, il-​maġija, u l-​għanjiet. Hemm ukoll il-​ktieb tal-​Iżlam li jgħallem li hemm Alla wieħed u li jaf kollox, inkluż il-​futur. Imma lanqas biss jirrivela l-​isem t’Alla, Ġeħova, li jidher eluf taʼ drabi fil-​Bibbja.

9, 10. X’nistgħu nitgħallmu dwar Alla mill-​Bibbja?

⁹ Il-​maġġoranza tal-​kotba tar-​reliġjon jgħallmu ftit li xejn dwar Alla. Imma l-​Bibbja tgħinna nsiru nafu lil Alla Ġeħova u l-​attivitajiet tiegħu. Tgħinna nifhmu l-​ħafna aspetti tal-​personalità tiegħu. Il-​Bibbja tgħidilna li hu Alla taʼ ġustizzja, għerf, u qawwa kbira. Tgħidilna wkoll li Alla jħobbna. (Aqra Ġwanni 3:16; 1 Ġwanni 4:19.) Iktar minn hekk, il-​Bibbja tgħidilna: “Alla mhux parzjali, imma f’kull ġens min jibżaʼ minnu u jagħmel is-​sewwa hu aċċettat minnu.” (Atti 10:34, 35) F’ċertu sens, il-​fatt li l-​Bibbja tinsab ħafna fl-​idejn juri li dan hu minnu. Esperti tal-​lingwa jgħidu li llum hemm xi 6,700 lingwa mitkellma. Kważi 100 minn dawn il-​lingwi huma mitkellma minn xi 90 fil-​mija tan-​nies fid-​dinja. Xorta waħda, il-​Bibbja ġiet  tradotta, sħiħa jew parti minnha, f’iktar minn 2,400 lingwa. Kważi kulħadd fid-​dinja għandu aċċess għal minn tal-​inqas xi partijiet minnha.

¹⁰ Ġesù qal: “Missieri baqaʼ jaħdem s’issa, u jien nibqaʼ naħdem.” (Ġw. 5:17) ‘Minn dejjem għal dejjem Ġeħova hu Alla.’ Mela aħseb f’dak kollu li wettaq! (Salm 90:2) Il-​Bibbja biss tgħinna nsiru nafu dwar l-​attivitajiet t’Alla kemm dawk tal-​passat u kemm dawk tal-​preżent u tgħidilna x’se jagħmel fil-​futur. L-​Iskrittura tgħallimna wkoll x’jogħġbu u x’ma jogħġbux, u turi kif nistgħu nersqu qrib lejh. (Ġak. 4:8) Ejja ma nħallu ebda ġiri wara affarijiet jew tħassib personali jbegħedna minnu.

11. Liema għerf kbir u taʼ min joqgħod fuqu jinsab fil-​paġni tal-​Bibbja?

¹¹ L-​għerf kbir u taʼ min joqgħod fuqu li jinsab fil-​Bibbja jurina wkoll li l-​ktieb ġej minn Sors ogħla mill-​bniedem. L-​appostlu Pawlu kiteb: “Min sar jaf moħħ Ġeħova biex ikun jistaʼ jgħallmu?” (1 Kor. 2:16) Dan il-​vers hu bbażat fuq dak li l-​profeta Isaija staqsa lil dawk taʼ żmienu: “Min ħa l-​qisien taʼ l-​ispirtu taʼ Ġeħova, u min jistaʼ jagħtih il-​pariri u jgħarrfu xi ħaġa?” (Is. 40:13) Bla dubju, it-​tweġiba hi ħadd. Mhux taʼ b’xejn li meta napplikaw il-​pariri tal-​Bibbja dwar iż-​żwieġ, it-​tfal, id-​divertiment, il-​ħbiberija, il-​bżulija, l-​onestà, u l-​moralità jkollna l-​aħjar riżultati! Il-​Bibbja qatt ma tagħtina pariri ħżiena. Mill-​banda l-​oħra, il-​bnedmin sempliċement ma jilħqilhomx biżżejjed biex jagħtu parir li dejjem jaħdem. (Ġer. 10:23) Il-​pariri tagħhom il-​ħin kollu qed jiġu riveduti u aġġornati hekk kif jirrealizzaw li dawk taʼ qabel kienu żbaljati. “Il-​ħsibijiet tal-​bnedmin,” skont il-​Bibbja, “huma bħal nifs,” jiġifieri, jiswew veru ftit.—Salm 94:11.

12. Il-​Bibbja liema sforzi għelbet matul is-​sekli?

¹² Evidenza oħra li turi li l-​Alla l-​veru hu l-​Awtur tal-​Bibbja ġejja minn dak li l-​istorja turi dwar l-​isforzi li saru biex il-​messaġġ tagħha jinqered. Fis-​sena 168 Q.E.K., is-​sultan Sirjan Antijoku IV pprova jfittex il-​kotba ispirati tal-​Liġi biex jaħraqhom. Fis-​sena 303 E.K., l-​imperatur Ruman Dijoklezjanu ħareġ digriet biex iwaqqaʼ l-​postijiet tal-​laqgħat tal-​Kristjani u biex jaħraq l-​Iskrittura tagħhom. Il-​qerda kompliet għal għaxar snin. Għal mijiet taʼ snin, il-​papiet kienu minn taʼ quddiem biex iwaqqfu l-​għarfien tal-​Bibbja milli jinfirex u opponew it-​traduzzjoni tal-​Iskrittura fil-​lingwi tan-​nies komuni. Minkejja attentati bħal dawn minn Satana u l-​aġenti tiegħu, il-​Bibbja għadha magħna sal-​lum il-​ġurnata. Ġeħova ma ppermetta lil ħadd li jelimina l-​għotja tiegħu lill-​umanità.

EVIDENZA LI KKONVINĊIET LIL ĦAFNA

13. X’nistgħu nsemmu bħala evidenza tal-​ispirazzjoni tal-​Bibbja?

¹³ Hemm evidenzi oħrajn tal-​ispirazzjoni tal-​Bibbja: il-​qbil li hemm fiha, l-​eżattezza xjentifika, il-​profeziji mwettqin, is-​sinċerità mhux tas-​soltu, il-​qawwa biex tbiddel il-​ħajjiet, l-​eżattezza storika, u t-​tweġibiet sodisfaċenti għall-​mistoqsijiet li ssemmew fl-​ewwel paragrafu. Ikkunsidra x’għen lil xi wħud biex jaraw li l-​Bibbja hi minn Alla.

14-16. (a) Xi kkonvinċa lil Musulman, waħda Ħindu, u oħra anjostika li l-​Bibbja ġejja minn Alla? (b) Liema evidenza taʼ ispirazzjoni divina tal-​Bibbja tħobb tuża fil-​ministeru?

¹⁴ Anwar a trabba bħala Musulman f’pajjiż fil-​Lvant Nofsani. Meta għamel xi żmien jgħix l-​Amerika taʼ Fuq, ix-​Xhieda  taʼ Ġeħova ġew iħabbtulu l-​bieb. Anwar jgħid: “F’dak iż-​żmien, kelli ħarsa negattiva lejn ir-​reliġjonijiet Kristjani minħabba l-​Kruċjati u l-​Inkwiżizzjoni. Iżda taʼ kurjuż li jien, qbilt li jkolli studju tal-​Bibbja.” Ftit wara, Anwar reġaʼ mar lura pajjiżu imma ma setax jikkuntattja lix-​Xhieda. Snin wara, hu mar jgħix l-​Ewropa fejn reġaʼ beda l-​istudju tal-​Bibbja u wasal għal din il-​konklużjoni: “It-​twettiq tal-​profeziji tal-​Bibbja, il-​qbil li hemm fl-​Iskrittura Mqaddsa, il-​fatt li m’hemmx kontradizzjonijiet fil-​Bibbja, u l-​imħabba fost l-​aduraturi taʼ Ġeħova kkonvinċewni li l-​Bibbja hi l-​Kelma t’Alla.” Anwar tgħammed fl-​1998.

¹⁵ Asha, li għandha 16-​il sena, ġejja minn familja Ħindu li hi devota. Hi tgħid: “Kont nitlob biss meta kont immur fit-​tempju jew meta kont inkun għaddejja minn żmien diffiċli, iżda qatt ma ħsibt dwar Alla meta kollox kien miexi ħarir.” Hi tkompli tgħid: “Madankollu, meta x-​Xhieda taʼ Ġeħova ħabbtuli l-​bieb, ħajti nbidlet taʼ taħt fuq.” Asha studjat il-​Bibbja u saret taf lil Alla bħala l-​Ħabib tagħha. Xi kkonvinċieha li l-​Bibbja hi ispirata minn Alla? Hi tispjega: “Il-​Bibbja wieġbet kull mistoqsija li stajt noħroġ biha. Għenitni jkolli fidi anki jekk ma narax lil Alla—jiġifieri, mingħajr ma noqgħod immur it-​tempju biex immil quddiem idolu.”

¹⁶ Paula trabbiet bħala Kattolika, imma fiż-​żgħożija tagħha ma kinitx ċerta jekk jeżistix Alla. Imbagħad ġara xi ħaġa. Hi tirrakkonta: “Iltqajt maʼ ħabib li kont ilni xhur ma narah. Dan kien fi żmien il-​ħipis. Meta rajt kif kien inbidel—issa bil-​leħja mqaxxra u b’xagħru maqtugħ u kuntent—staqsejtu: ‘Xi ġralek, u x’sar minnek?’ Hu qal li kien qed jistudja l-​Bibbja max-​Xhieda taʼ Ġeħova u beda jagħtini xhieda.” Meta rat x’qawwa għandha l-​verità Skritturali, Paula, li qabel kienet anjostika, saret interessata fil-​messaġġ tal-​Bibbja u aċċettatha bħala ispirata minn Alla.

“KELMTEK MUSBIEĦ GĦAL SIEQI”

17. Kif jistgħu jgħinuk il-​qari tal-​Bibbja kuljum u l-​immeditar fuq dak li taqra?

¹⁷ Il-​Bibbja hi għotja meraviljuża li Ġeħova pprovda permezz tal-​ispirtu qaddis tiegħu. Ħu pjaċir aqraha kuljum, u l-​imħabba għaliha u għall-​Awtur tagħha se tikber. (Salm 1:1, 2) Ibda kull sessjoni tal-​istudju bit-​talb, billi titlob għall-​ispirtu t’Alla ħalli tkun tistaʼ tifhem dak li taqra. (Lq. 11:13) Il-​Bibbja fiha l-​ħsibijiet t’Alla, allura meta tkun qed timmedita fuq dak li hemm miktub, tkun tistaʼ tagħmel il-​ħsib tiegħek bħal t’Alla.

18. Għala trid tkompli titgħallem mill-​Bibbja?

¹⁸ Filwaqt li tkompli tikber fl-​għarfien eżatt tal-​verità, applika dak li titgħallem. (Aqra Salm 119:105.) Li taqra l-​Bibbja jistaʼ jkun bħal li tħares fil-​mera. B’hekk, jekk tara li hemm bżonn tagħmel xi bidliet, agħmilhom. (Ġak. 1:23-​25) Uża l-​Kelma t’Alla bħal sejf biex tiddefendi t-​twemmin tiegħek u biex tneħħi tagħlim falz minn qlub il-​ġwejdin. (Efes. 6:17) Hekk kif tagħmel dan, kun grat li l-​profeti u l-​irġiel li ntużaw biex jiktbu l-​messaġġ tal-​Bibbja verament kienu “tmexxew mill-​ispirtu qaddis.”

[Nota ta’ taħt]

[Mistoqsijiet ta’ Studju]

[Kumment f’paġna 29]

Aqra l-​Bibbja kuljum, u l-​imħabba tiegħek għall-​Awtur tagħha se tikber

[Stampa f’paġna 26]

Ittra hi meqjusa li ġejja minn min iffirmaha