“Te Chad a Lulengedereder er Tir a [Oureor el Klisichel a Dios]”

“E le ulaoch a kmal dimlak el tobed ra uldesuir ar chad, e te chad a lulengedereder er tir a [oureor el klisichel a Dios.]”​—2 PETRUS 1:21.

A TEKOI EL KIRED EL MELATK

Ngmilekerang a oureor el klisichel a Dios e omekrael er a rechad el mo meluches a klumech er a Biblia?

Ngerang a ochotii el kmo a Biblia a mlukrael er a Dios?

Ngera sebechem el meruul er ngii er a bek el sils el ochotii a omereng el saul el kirel a Tekingel a Dios?

1. Ngera uchul me kede ousbech er a mlukrael el Tekingel a Dios?

 KEDE mla er ker el mei? E ngera uchul me kede ngar tiang? Kede mo er ker? Ngera uchul me a beluulechad a ua itiang? Ngera duubech el mei er kid sel demad? A rechad el meliuekl er a beluulechad a oker aika el ker. Me kede mekerang e mo medengei a nger er aika el ker me a lmuut el bebil er a meklou a ultutelel el ker a lsekum e ngdiak a mlukrael el Tekingel a Dios el Biblia? A lsekum e ngdiak a Chedaol el Biblia, e kede di mo ousbech a tekoi el duubech er a klengar er kid el omekrael er kid. Me sel bo de uaisei, e ngkmal diak a rolel e doltirakl a “llechul a RUBAK” el ua le dilu a ta er a milluches er a Psalm.​—Monguiu er a Psalm 19:7.

2. Ngera ngosukid el mo omes er a Biblia el ua mekreos el sengk er a Dios?

² Ngklengiterreng e le rebebil a mla mo diak sel klemeriarreng er tir er a klemerang er a Biblia el luleba er a kot el uchul. (Momekesiu er a Chocholt 2:4.) Ngdikea loldeu er a rengul a Jehovah. (Isaia 30:21) Me kid a sebeched el oibngid er tia el mekngit el blekeradel, a lsekum kede melemolem el oba omereng el saul el kirel a Biblia me a osisecheklel. Tia el Biblia a kmal klou a ultutelel el sengk el mla er a betik a rengul el Ulemeob. (Jakobus 1:17) Ngerang a ngosukid el mo oba omereng el saul el kirel a “tekingel a Dios”? Ngkmal kired el omtab er sel rolel e tirke el milluches er a Biblia a mlukrael el mo meluches a Bades. Ngkired el melatk er sel rolel er a Dios a lousbech er a rechad el meluches er a Biblia, e dirrek el merriter a betok el ungil el uchul me ngsebeched el oumerang el kmo a Biblia a babilengel a Dios. Sel doruul el uaisei, e ngrullid el mo soad el menguiu er a Tekingel a Dios er a bek el sils e oltaut a omellach er ngii.​—Hebru 4:12.

 NGMILEKERANG A OUREOR EL KLISIICH E RULLETERIR EL MO MELUCHES?

3. Te milekerang a reprofet me a remilluches er a Biblia e ‘mlechedereder’ er a oureor el klisichel a Dios?

³ Ngar er a chelsel a bekord el 1,610 el rak el ulemuchel er a 1513 er a uchei er a Kristus el mo er a rak er a 98 er a uriul er a Kristus, e a bekord el 40 el kakerous el chad a milluches er a Biblia. Me nguleak a oureor el klisichel a Dios e te mlo meluches a tekingel a Dios. (Monguiu er a 2 Petrus 1:20, 21.) A tekoi er a Grik el “lulengedereder” a osisiu a belkul er a tekoi el “di ulebengkel a eolt.” A Rellir 27:15 a ousbech er tia el tekoi el mesaod er a bilas el merael el oltirakl me a lechub e ngoberius el obengkel a eolt. A reprofet me a remilluches er a Biblia a di chad el mlukrael, el belkul a kmo a Dios a milengedecheduch er tir, e millisiich e ulemekrael er tir el okiu a oureor el klisichel. Me ngoeak tiaikid el rolel e te milluches a uldesuel a Dios el diak el uldesuir. Me a lebebil er a taem e tirke el profet me a remilluches er a Biblia a dimlak lodengei a belkul a tekoi el lulluches. (Daniel 12:8, 9) Me a “chedaol Llechukl el rokui a melluches luleak a [oureor el klisichel a Dios]” me ngdiak el uldesuir a rechad.​—2 Timoteus 3:16.

4-6. Ngoeak a ngera el rolel e a Jehovah a ulemekrael er a remeluches er a Biblia el mo meluches a klemechel? Momekesiu.

⁴ Ngmilekerang e mo sebechel a oureor el klisichel a Dios el mekrael a klemechel el mo er a remilluches er a Biblia? Te ngilai a tekoi el ledilung me a lechub e nguldasu el mo sebechir el meluches el okiu a di tekingir? Ka di molatk er sel rolel e a chad er a siobai a soal el meluches er a babilengel. Sel lebo el soal meluches a meklou a ultutelel el tekoi e nglemuches a tekingel me a lechub e ngdmu er a melechesel me ngmeluches a bek el tekingel, me ngdi mo saing er ngii. E a lebebil er a taem e ngdi ocholt a uldesuel, e a melechesel a ousbech er sel rolel a loluches a tekoi el mechebechii a ungil el babier. Engdi ngike el chad er a siobai a lmuut el mo omes er tia el babier e mesmechokl aike el soal tekoi er a chelsel. Me a uriul er a lesemecheklii tia el babier el mo oltirakl a soal e ngmo saing er a ngklel el ochotii el kmo ngbabilengel.

⁵ Me ngdi osisiu, a bebil el tekoi el llechukl er a Biblia “a liluches a [Dios] el oba chimal.” (Exodus 31:18) Me a Jehovah a dirrek el millekoi aike el tekoi el ngii a mle soal a lemeluches. Ngar er a Exodus 34:27 e ngkmo: “Ma RUBAK a dilu er a Moses el kmo, ‘Mluches a ikal tekoi, ele ikal tekoi a kulab el meruul er a telbilek el obengkem kau ma re chad er a Israel.’ ” Me ngdi osisiu, a Jehovah a dirrek el dilu er a profet el Jeremia el kmo: “Mluches er a babier a rokui el tekoi el bla kdu er kau.”​—Jeremia 30:2.

⁶ Engdi a oumesingd el taem e a Dios a dimlak lomasech a bek el tekoi el mle soal a loluches. E ngbai rirelleterir a remilluches er a Biblia me te mo medengei a uldesuel e kilengei er tir me te milluches a uldesuel el omeketakl el ousbech a di tekingir. A Olisechakl 12:10 a kmo: “A Olisechakl  a millasem el osiik a ungil er orenges el tekoi, e ngdi ikel tekoi el le liluches a merang.” Me a ta er a milluches er a Evangkelio el Lukas a kmo: “Ngungil a kluches el blechobech . . . le kdirrek el mlo ungil kitiit a rokuil tekoi ra kot luchul.” (Lukas 1:3) Me a oureor el klisichel a Dios a ngilsuterir a rediak el mecherrungel chad me lak el mecheuid a loluches a tekingel.

7. Ngera me nguchul a llomeserreng e le Dios el uluusbech er a rechad el meluches er a Biblia?

⁷ A klou el llemesel a rengul a Dios a mocholt el okiu sel rolel e nguluusbech er a rechad el mo meluches er a Biblia. A tekingel a chad a ngosukid el mo medengei a uldesuel, e dirrek el ngosukid el medengei a urungulel me aike el soal. E kuk mekerang okmo a Jehovah a uluusbech er a rechanghel el meluches er a Biblia? Omomdasu e ngmle sebechir el mesaod a uldesuir a rechad el ua dakt, klengiterreng, me a chelitechetul a rengrir? A Dios a kilengei er a rediak el mecherrungel el chad me te ousbech a di tekingir el meluches a klemechel, e ngii el klemechel a mera el remutech a rengud.

A UCHUL ME A BIBLIA A BABILENGEL A DIOS

8. Ngera uchul me ngsebeched el melekoi el kmo a Biblia a kuk ngodech er a ngii di el babier er a klechelid?

⁸ Ngbetok a ungil el uchul e kede oumerang el kmo a Biblia a babilengel a Dios. E le ngngosukid el mo medengelii a mera el Dios, e ngii el Biblia a ileakl el ngodech er a ngii di el babier er a klechelid. El ua tiang, aike el babier er a Hindu a mesaod a chedaol el sils er tir, me a uldasu el lolisiich, me a delibech el cheldecheduch, me a llecherir el kirel a tekoi er a kldung. A babier er a Buddha a mesaod a llach el kirir tirke el monks me a nuns el mo oltirakl, e dirrek el mesaod a osisecheklir. A Buddha a dimlak a ta el lolekoi el kmo ngii a Dios, e dirrek el dimlak a omesodel el kirel a Dios. A babier er a Confucianism a mesaod a tekoi el dilubech er a ngar a mong me a llach el kirel a kldung me a tekoi er a olai me a chelitakl. Ngdirrek el ngar er ngii a babier er a Islam el olisechakl el kmo a Dios a di tang, engdi ngdiak el ochotii a ngklel a Dios el Jehovah el ngii a medung el betok el telael el taem er a chelsel a Biblia.

9, 10. Ngera kede suubii er a Biblia el kirel a Dios?

⁹ A oumesingd el babier er a klechelid a diak me a lechub e ngdi kesai a omesodel el kirel a Dios, engdi a Biblia a meskid a klou el klemedengei el kirel a Jehovah el Dios me a tekoi el lurruul. Ngdirrek el ngosukid el mo medengei a betok el blekerdelel a Dios. Me a Biblia a ochotii el kmo a Dios a diak di lekot el mesisiich, e mellomes a rengul, e lemelemalt el Dios, e ngdirrek el kmal betik a rengul er kid. (Monguiu er a Johanes 3:16; 1 Johanes 4:19.) Me a lmuut el tang, a Biblia a ouchais el kmo: “A Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.” (Rellir 10:34, 35) Ngkmal sebeched el mesang a klemerang el losaod er ngii a Biblia el kirel tia el bades. A rechad el mesuub a omelekoi a kmo ngar er a chelsel a bekord el 6,700 el bedengel a omelekoi er chelecha el taem, e a 90 el basent er a ildois er a rechad a di melekoi a bekord el 100 el bedengel a omelekoi. Me nguaisei, engdi a Biblia a mla moiuid el kuk betok er a 2,400 el bedengel a omelekoi, el cherrungel me a lechub e ngkedeb a oidel.

¹⁰ A Jesus a dilu el kmo: “A Demak a uluureor el me lmuut er chelechang, me ngak ma kdirrek loureor.” (Johanes 5:17) ‘A Jehovah el Dios a diak  a uchelel el diak a ulebengelel.’ Me ka di molatk aike el tekoi el bla leruul! (Psalm 90:2) A Biblia a ouchais er kid a betok el urerel a Dios er a irechar me a chelechang, e dirrek el ouchais aike el bo loruul er a ngar er medad. A Bades a dirrek el osisecheklid er aike el tekoi el odeuir a rengul me a diak, e dirrek el ochotii a rolel e ngsebeched el mo kmeed er ngii. (Jakobus 4:8) Me lak debechei a ngii di el tekoi me a uldasu er a klechad me lerellid el mo cheroid er ngii.

11. Ngerang a meklou a ultutelel el llomeserreng el debetik er a Biblia?

¹¹ A betok e meklou a ultutelel el rolel a llomeserreng el sebeched el metik er a Biblia a dirrek el ochotii el kmo ngbabilengel a Dios. A apostol el Paulus a milluches el kmo: “Le ngtecha medengelii a uldesuel a Rubak me ngsebechel lolisechakl er ngii?” (1 Korinth 2:16) Tia el bades a mengai a uchetemel er a tekingel a profet el Isaia er sera loker er a rechad er a taem er ngii el kmo: “Ng sebechel a chad el mengedereder er a RUBAK el kmo ng ngera ng mo meruul? Ng techa sebechel el olisechakl er ngii, ma lechub e ng omsa ngesou er a ungil uldasu?” (Isaia 40:13) Ngkmal diak a chad el sebechel. Seikid a uchul me sel doltirakl a omellach er a Bades el kirel a chebechiil, rengalek, omilil, rechad el dobengterir, tekoi er a kerruul, llemalt me a kldung e ngdi mo uchul a klungioled! A rokui el ulekrael el ngar er a Biblia a di mo uchul a klungioled. Engdi a llomeserreng er a rechad a kmal diak el sebechel el mo uchul a klungioled er a bek el taem. (Jeremia 10:23) Ngblechoel aike el uldesuir el mo mengodech e te dirrek el mo metik er ngii el kmo sel di mla uldasu a dimlak el ungil. A Biblia a kmo: A rechad a “di chelsengsang a ikel lolib el tekoi.”​—Psalm 94:11.

12. Te milekerang a rechad e melasem el melemall er a Biblia?

¹² A ta er a klou el ocholt el meketeklii el kmo a Biblia a babilengel a Dios a medung er a reksi el kirir a rechad el millasem el melemall er a klumech er a Biblia. Ngar er a rak er a 168 er a uchei er a Kristus, e a King el Antiochus IV er a beluu er a Siria a millasem el meleseb a rokui el hong er a Llach el olekngemed. Me ngike el Emperor er a Rom el Diocletian a dilung me lemeseseb a Biblia e lemeteruud aike el blil a ongdibel er a Rekristiano er a rak er a 303 er a uriul er a Kristus, e tia el omelemall a millemolem el ngar er ngii el bekord el teruich el rak. Me a betok el dart el rak er a uriul, e tirke el papa er a Rom a milerrob er a rechad me lak lomerk er a klemedengei er a Biblia, e dirrek el ulemtok a oidel a Bades e le ngmle chetirir a rechad a bo lodengelii a Biblia. Me alta e a Satan me a rechedal a millasem el lolekngemed er a Biblia, engdi ngdirkak bo el sebechir el okngemedii el me lmuut er chelechang. A Jehovah a kmal diak el becherei a ngii di el chad me letemellii tia el mekreos el sengk er ngii el mo er a rechad.

A UCHUL ME A REBETOK A MLA MO OUMERANG

13. Ngera ochotii el kmo a Biblia a mera el mlukrael er a Dios?

¹³ Ngar er ngii a bebil er a ocholt el meketeklii el kmo a Biblia a mlukrael er a Dios. Ngkmal ungil a blechebechel a cheldecheduch me a tekoi el dilubech er a chelsel, e bleketakl el oltirakl a rolel me a orretel a tekoi er a science, e mla mutaut a ulaoch el medung er a chelsel, e bleketakl e klemerang, e ngar ngii a klisichel el melodech a klengar er a rechad, e bleketakl a reksi er ngii, e dirrek el sebeched el metik a melemalt el nger er a chelsel el kirel aike el ker el medung er a kot el parakurab. Me bo dosaod a bebil el tekoi el mla ngosuterir a rebebil el mo oumerang el kmo a Biblia a babilengel a Dios.

14-16. (a) Ngera el tekoi a rirellii a chad er a Moslem, Hindu, me a chad el oumededenger er a Dios el mo kongei el kmo a Biblia a babilengel a Dios? (b) Ngera el Bades a soam el ousbech er ngii el ouchais el kmo a Biblia a babilengel a Dios?

¹⁴ A Anwar *a mlukeroul el chad er a Moslem er a ta er a beluu er a Middle East. Ngmle telkib el taem el lekiliei er a beluu er a North America e mlo sebechir a Resioning er a Jehovah el mo mengedecheduch er ngii. Ngdmu el kmo: “Ngkmal  mle chetik a klechelid er a Rekristiano el mekngit el omerellir er a ngar er a mong a uchul. Engdi ngak el kmal soak el merriter a tekoi a uchul me ak kilengei el mo mesuub a Biblia el obengterir.” Ngdi mle telkib e ngliluut el mo remei er a belual me ngmlo diak a techellel el mengedecheduch er a Resioning er a Jehovah. Sesei el rak er a uriul, e ngmillukl el mo kiei er a Europe, e liluut el mo mesuub a Biblia e dilu el kmo: “Ak mlo oumerang el kmo a Biblia a babilengel a Dios e le ulaoch er a chelsel a mla tmaut, e di tang a moktek er a Biblia er a uchelel el mo er a ulebengelel, e diak el kakebosech a tekoi er a chelsel, me a remesiungel a Jehovah a kaubltikerreng er a delongelir.” Me ngii el Anwar a miltecholb er sera 1998.

¹⁵ A 16 a rekil el Asha el mlukeroul er a chelsel a delengchokl el mle chad er a Hindu a dmu el kmo: “Ak meluluuch sel kbora templo me a lechub e ak chelebangel er a meringel el blekeradel, engdi ngdimlak a ta el kulatk er a Dios er a chelsel aike el ungil el taem er a klengar er ngak. Me sera lebo er ngii a techellek el mengedecheduch er a Resioning er a Jehovah e ngmera el mlo er ngii a klou el omeldechel a klengar er ngak.” Me ngmilsuub er a Biblia e mlo medengelii a Dios el ua sechelil. Ngera rirellii el mo kongei el kmo a Biblia a mlukrael er a Dios? Ngdmu el kmo: “A Biblia a ulenger a rokui el kerik. Ngdirrek el ngilsukak el mo oumerang er a Dios el diak el sebechek el mesang, me ngmlo diak kbo er a templo el mo mengull a bleob.”

¹⁶ A Paula a mlukeroul el Katolik, engdi sera leklunga el redil e ngmlo oumededenger el kirel a Dios. Engdi ngmlo er ngii a tekoi el dilubech, e le ngmelekoi el kmo: “Ak miltik er a sechelik el kmal meketeketang el diak kisang, e tia sel taem el mla er ngii a rechad el okedongall el hippie. Me sera kisang e ngkmal mlo mechas a renguk er ngii e le ngmla mo beches a medal, e ungil el oubail e kmal dmeu a rengul. Me ak uleker er ngii el kmo ‘Kau ke mla mekesakl, ke mla er ker el mei?’ Me ngdilu el kmo ngmla mo mesuub a Biblia el obengterir a Resioning er a Jehovah e mocha omerk er a klumech el mei er ngak.” Me a Paula er sera bo lolechesuar a klemerang el losaod er ngii a Biblia, e ngkmal mlo klou a lengedechii er a uldesuel me ngkilengei el kmo a Biblia a mera el mlukrael er a Dios.

“A TEKINGEM A OLBIDEL EL OMEKRAEL ER NGAK”

17. Ngera ngrullii el kirem sel monguiu e molebedebek a Tekingel a Dios er a bek el sils?

¹⁷ A Biblia a kmal mekreos el sengk el Jehovah a kiltmeklii el okiu a oureor el klisichel. Me bo el deu a rengum el menguiu er ngii er a bek el sils, me lemukeroul a bltkil a rengum el mo er ngii me ngike el Milskid. (Psalm 1:1, 2) A bek el taem el mosuub, e momuchel el meluluuch el olengit er a oureor el klisichel a Dios me lomekrael er a uldesuem. (Lukas 11:13) A Biblia a llechukl a uldesuel a Dios er a chelsel, me sel molebedebek e ke mo omdasu a tekoi el loba osengel a Dios.

18. Ngera uchul me ngsoam el melemolem el mesuub er a Biblia?

¹⁸ Me chelecha el molemolem el omekeroul er a klemedengei er kau er a klemerang, e ngkirem el kiei el oltirakl aike el mosuub. (Monguiu er a Psalm 119:105.) Morriter a Bades el ua sel momes er kau er a dirk. Me a lsekum e ke mo medengei el kmo ngar er ngii a tekoi el kirem el melodech, e molodech. (Jakobus 1:23-​25) Mousbech er a Tekingel a Dios el ua saider el mesebechakl er a klaumerang er kau e mousbech er ngii el omeklemalt a uldesuir a remelemalt a rengrir el chad. (Efesus 6:17) E sel mousbech er a Biblia e ke mo oba omereng el saul el kirir tirke el chad el milluches er a Biblia el ‘lulengedereder er tir a oureor el klisichel a Dios.’

[Footnote]

[Aike el Ker er a Suobel]

[Blurb el ngar er a 32 el llel]

Monguiu er a Biblia er a bek el sils me lemukeroul a bltkil a rengum el mo er ngike el Milskid

[Siasing el ngar er a 29 el llel]

A babier a babilengel ngike el chad el mle siang er ngii