Den ben e taki sani „soleki fa a santa yeye ben e sori den”

„Noiti profeititori kon fu di libisma wani, ma libisma ben taki san ben komoto fu Gado, soleki fa a santa yeye ben e sori den.”​—2 PETR. 1:21.

PRAKSERI FU DEN SANI DISI

Fa Gado gebroiki a santa yeye fu meki den Bijbel skrifiman sabi san den ben musu skrifi?

Sortu buweisi de taki Bijbel kon fu Gado?

San yu kan du ibri dei fu sori taki yu de nanga tangi taki yu abi Gado Wortu?

1. Fu san ede wi abi Bijbel fanowdu?

FU PE wi komoto? Fu san ede wi de na grontapu? San o pasa nanga wi na ini a ten di e kon? Fu san ede a situwâsi na grontapu de soleki fa a de now? San e pasa nanga wi te wi dede? Sma na heri grontapu e aksi densrefi den sani disi. Efu Gado no ben meki sma skrifi Bijbel, wi no ben o sabi a piki tapu den aksi disi nanga tra prenspari aksi. Sondro a Wortu fu Gado, ondrofeni ben o de a moro prenspari leriman fu wi. Efu ondrofeni ben o de a wan-enkri fasi fa wi ben kan leri sani, dan wi no ben o man abi a srefi denki di a psalm skrifiman ben abi fu „a wèt fu Yehovah”.​—Leisi Psalm 19:7.

2. San o yepi wi fu de nanga tangi ala ten taki wi abi Bijbel?

² A de wan sari sani taki son sma no lobi den leri fu Bijbel so furu moro leki fosi. (Luku Openbaring 2:4.) Den no e libi moro na wan fasi di Yehovah feni bun (Yes. 30:21). Dati no abi fu pasa nanga wi. Wi kan du muiti fu tan lobi den leri fu Bijbel. Fu taki en leti, wi musu fu meki a muiti dati. Bijbel na wan prenspari kado di wi lobi-ati Mekiman gi wi (Yak. 1:17). Sobun, san o yepi wi fu de nanga tangi ala ten taki wi abi „a wortu fu Gado”? Wi musu prakseri fa Gado gebroiki mansma fu skrifi Bijbel. Sobun, wi musu go luku wan tu buweisi di e sori taki Bijbel na a buku fu Gado. Disi o gi wi deki-ati fu leisi Gado Wortu ibri dei èn fu du san wi leri.​—Hebr. 4:12.

FA A SANTA YEYE SORI DEN SAN DEN BEN MUSU SKRIFI?

3. Te Bijbel e taki dati den profeiti nanga skrifiman taki sani „soleki fa a santa yeye sori den”, dan san disi wani taki?

³ A teki 1610 yari fu skrifi heri Bijbel. Disi ben de fu a yari 1513 Fosi Krestes te go miti a yari 98 Baka  Krestes. Sowan 40 man skrifi Bijbel. Sonwan fu den ben de profeiti di skrifi „soleki fa a santa yeye ben e sori den”. (Leisi 2 Petrus 1:20, 21.) A wortu „sori” e kon fu wan Griki wortu di wani taki „fu tyari noso syow wan sani fu a wan presi go na a trawan”. Son leisi den e gebroiki en tu te den e taki fu wan sani di abi krakti tapu wan sma, wan sani di e meki wan sma du wan sani, noso wan sani di wan sma e gi pasi fu abi krakti na en tapu. A srefi wortu disi gebroiki na ini Tori fu den apostel 27:15. A tekst dati e taki fa winti e wai noso pusu wan boto go na wan presi. Sobun, te Bijbel e taki dati den profeiti nanga skrifiman taki sani „soleki fa a santa yeye sori den”, dan disi wani taki dati Gado gebroiki en santa yeye fu taki nanga den, fu tiri den, èn fu meki den du san a wani. Fu di a santa yeye ben e tiri den, meki den no skrifi san den wani, ma den skrifi san Gado wani. Son leisi den profeiti nanga den skrifiman no ben e frustan srefi san den ben e skrifi èn san den profeititori ben wani taki (Dan. 12:8, 9). Iya, a tru taki „na Gado srefi ben meki sma skrifi ala den sani di de na ini Gado Buku” èn fu dati ede a no libisma denki skrifi na ini.​—2 Tim. 3:16.

4-6. Fa Yehovah meki den Bijbel skrifiman sabi san den ben musu skrifi? Gi wan eksempre.

⁴ Ma fa Gado gebroiki en santa yeye fu meki den Bijbel skrifiman sabi san den ben musu skrifi? A de so taki a santa yeye meki den skrifi ala wortu soifri soleki fa Gado ben wani? Noso a gi den soso den prakseri, so taki den ben kan skrifi dati nanga den eigi wortu? Prakseri fa wan bisnisman kan skrifi wan brifi. Te den wortu fu a brifi prenspari, dan a bisnisman srefi e skrifi a brifi, noso a e taigi en sekretarsi ala den wortu di a musu skrifi. A sekretarsi e skrifi den wortu disi èn a bisnisman e poti en nen na ondrosei fu a brifi. Ma son leisi, a bisnisman kan fruteri a sekretarsi, soso den prenspari sani di a musu skrifi na ini a brifi. Dan a sekretarsi e poti den sani dati na ini a brifi aladi a e skrifi en nanga en eigi wortu. Baka dati a bisnisman o leisi a brifi èn a o kenki san a wani kenki ete. Te fu kaba na a nen fu a bisnisman e kon na ondrosei fu a brifi èn sma o si en leki wan brifi di kon fu en.

⁵ Na so a de tu taki Gado srefi skrifi son pisi fu Bijbel (Eks. 31:18). Te a ben de fanowdu taki den skrifiman skrifi den wortu soifri soleki fa Yehovah ben wani, dan Yehovah ben e taigi den ala san den ben musu skrifi. Fu eksempre, na Eksodes 34:27 skrifi: „Yehovah taigi Moses: ’Skrifi den wortu disi, bika nanga den wortu disi mi e meki wan frubontu nanga yu èn nanga Israel.’” Yehovah taigi a profeiti Yeremia tu: „Ala den sani di mi o taigi yu, yu musu skrifi na ini wan buku.”​—Yer. 30:2.

 ⁶ Ma furu tron Gado no ben taigi den Bijbel skrifiman finifini sortu wortu den ben musu skrifi. Gado poti den prakseri fu en na ini den ati nanga frustan, dan a meki den srefi bosroiti sortu wortu den ben o gebroiki fu skrifi a boskopu fu en. Preikiman 12:10 e taki: „A leriman ben e suku fu feni switi wortu èn fu skrifi soifri san tru.” Lukas ’ondrosuku ala sani finifini sensi a bigin èn a teki a bosroiti fu skrifi den tori disi soleki fa den ben waka trutru’ (Luk. 1:3). Gado gebroiki en santa yeye fu sorgu taki sondu libisma no kenki a boskopu fu en.

7. Fu san ede wi kan taki dati Gado koni trutru fu di a gebroiki libisma fu skrifi Bijbel?

⁷ Wi kan si taki Gado koni trutru fu di a gebroiki libisma fu skrifi Bijbel. Wortu e yepi fu wi kon sabi sani èn fu frustan fa sma e denki èn fa den e firi. Fa a ben o de efu Yehovah ben meki engel skrifi Bijbel? Yu denki taki den engel ben o man taki soifri fa libisma e firi te den e frede, te den e sari, noso te den lasi-ati? Fu di Gado meki sondu libisma skrifi a boskopu fu en nanga den eigi wortu, meki a boskopu dati e naki wi ati.

BUWEISI TAKI BIJBEL E KON FU GADO

8. Fu san ede wi kan taki dati Bijbel no de leki den buku fu tra bribi?

⁸ Furu buweisi de di e sori taki Bijbel na Gado Wortu trutru. Fu di Bijbel e yepi wi fu kon sabi a tru Gado, meki a no de leki den buku fu tra bribi. Fu eksempre, den buku fu a Hindu bribi e taki fu den kerkigwenti fu den, den leri fu den sabiman fu den, anansitori, nanga wèt di e sori sma fa den musu tyari densrefi. Den buku fu a Buda bribi e taki fu den wèt di den moniki nanga den non fu a bribi dati musu hori. Den buku dati e fruteri tu fu den kerkileri fu a bribi dati èn fu den leri fu Buda. Buda no ben taki dati en na wan gado, èn a no ben taki furu fu Gado. Den buku fu a Confucius bribi e taki fu sani di pasa fositen, den e taki fu wèt di e sori sma fa den musu tyari densrefi, fu towfruwroko, èn den abi singi na ini. Yu abi a buku tu fu na Islam bribi di e taki dati wán Gado nomo de, a sabi ala sani èn a sabi san o pasa na ini a ten di e kon. Ma a no e taki fu Gado nen, Yehovah, aladi dati de fu feni na ini Bijbel dusundusun leisi.

9, 10. San Bijbel e leri wi fu Gado?

⁹ Furu fu den buku fu tra bribi no e leri sma furu fu Gado. Ma Bijbel e yepi wi fu kon sabi Yehovah Gado èn ala san a e du. A e meki wi kon sabi sortu fasi Gado abi. Bijbel e taki dati Gado lobi retidu, a abi koni, a abi furu makti, èn a lobi wi. (Leisi Yohanes 3:16; 1 Yohanes 4:19.) Boiti dati, Bijbel e taki: „Gado no lobi a wan sma moro a trawan, ma awansi fu sortu kondre wan sma de, efu a e lespeki Gado èn a e du san reti, dan Gado feni en bun” (Tori 10:34, 35). Bijbel vertaal na ini furu tongo. Disi e sori taki Gado no lobi a wan sma moro a trawan. Sabiman di sabi furu fu tongo e taki dati sowan 6700 tongo de na ini a ten disi. Sowan 90 procent fu den sma na grontapu  e taki 100 fu den tongo dati. Toku a heri Bijbel noso pisi fu en vertaal na ini moro leki 2400 tongo. Sobun, pikinmoro ala sma na grontapu kan leisi Bijbel na ini den eigi tongo, awinsi na wan pisi fu en nomo.

¹⁰ Yesus ben taki: „Mi Tata tan wroko teleki now èn mi srefi e tan wroko tu” (Yoh. 5:17). Yehovah „ben de Gado ala ten kaba”. Sobun, prakseri ala den sani di a du! (Ps. 90:2) Bijbel wawan e meki wi kon sabi san Gado du na ini a ten di pasa, san a e du now, èn san a o du na ini a ten di e kon. Bijbel e sori wi tu san a lobi èn san a no lobi. A e sori wi tu fa wi kan tron mati fu en (Yak. 4:8). Noiti wi musu gi pasi taki sani di wi lobi noso broko-ede meki wi gowe libi Yehovah.

11. Sortu bun rai wi kan feni na ini Bijbel?

¹¹ Den moro bun rai de fu feni na ini Bijbel. Disi na wan tra buweisi taki Bijbel kon fu Gado. A profeiti Yesaya ben aksi den sma fu en ten a sani disi: „Suma man frustan o bigi a yeye fu Yehovah de? Suma man gi en rai? Suma man leri en wan sani?” (Yes. 40:13) Bakaten na apostel Paulus aksi sma a srefi sani: „Suma kon sabi fa Yehovah e denki, so taki a ben o man gi en rai?” (1 Kor. 2:16) Nowan sma man du disi, fu di nowan sma abi moro sabi leki Yehovah. Dati meki sani e go bun nanga wi te wi e gi yesi na den rai di Bijbel e gi fu a trowlibi, pikin, prisiriten nanga mati. A e taigi wi tu taki wi musu tyari wisrefi na wan fasi di fiti, taki wi musu wroko tranga, èn taki wi no musu kori sma. Noiti wi o feni rai na ini Bijbel di no bun. Ma libisma no abi nofo koni, èn dati meki den no kan gi wi bun rai ala ten (Yer. 10:23). Ala leisi libisma e kenki den rai di den e gi èn den e kon nanga nyun denki te den e frustan taki a rai di den ben gi fosi, no bun. Bijbel e taki dati den prakseri fu libisma „de leki wan blo nomo”.​—Ps. 94:11.

12. Fa sma pruberi fu pori Bijbel?

¹² Den sani di pasa na ini owruten e sori tu taki Bijbel kon fu a tru Gado. Na ini a ten di pasa, sma no ben wani trawan fu sabi a boskopu fu Gado èn den du furu muiti fu no meki sma sabi en. Na ini a yari 168 Fosi Krestes, Kownu Antiokus IV fu Siria taigi sma fu suku ala den buku fu a Wèt èn fu bron den. Na ini a yari 303 Baka Krestes, Grankownu Diocletianus fu Rome taigi sma fu broko ala den konmakandra presi fu den Kresten èn fu bron den Santa Buku fu den. Sma tan du disi sowan tin yari langa. Baka a di fu erfu yarihondro den pawsu du furu muiti fu tapu sma fu vertaal Bijbel na ini difrenti tongo, fu di den no ben wani taki sma kon sabi san skrifi na ini Bijbel. Satan nanga den sma di e horibaka gi en pruberi fu pori Bijbel, ma toku wi abi Bijbel na ini a ten disi ete. Yehovah no gi nowan sma pasi fu pori Bijbel, a kado di a gi libisma.

FU SAN EDE FURU SMA E BRIBI TAKI BIJBEL NA GADO WORTU?

13. Fu san ede wi kan bribi taki Bijbel e kon fu Gado trutru?

¹³ Tra buweisi de di e sori taki Bijbel kon fu Gado trutru. Ala pisi fu Bijbel e kruderi nanga makandra, a e kruderi nanga sabidensi, den profeititori na ini kon tru, èn ala ten den skrifiman skrifi fa sani ben de trutru. Boiti dati, Bijbel man kenki sma libi, a e fruteri sani soifri soleki fa den pasa na ini owruten èn a e gi bun piki tapu den aksi di skrifi na ini paragraaf 1. Meki wi luku san yepi son sma fu bribi taki Bijbel kon fu Gado trutru.

14-16. (a) Fa dri difrenti sma bigin bribi taki Bijbel na a Wortu fu Gado? (b) Fa yu ben o yepi sma na ini a preikiwroko fu bribi taki Bijbel kon fu Gado?

¹⁴ Anwar * gro kon bigi na ini wan famiri di ben de Moslim. Furu sma na ini a kondre  pe a ben tan, na Moslim tu. Di a ben e libi na ini Noord-Amerika fu wan pisi ten, Yehovah Kotoigi kon na en oso. Anwar taki: ’Mi no ben lobi a Kresten bribi, fu di den sma fu a bribi dati kiri so furu sma fositen. Ma mi na wan sma di lobi leri sani. Sobun, mi agri fu studeri Bijbel.’ Syatu baka dati, Anwar drai go baka na oso èn a no miti den Kotoigi moro. Furu yari baka dati, a froisi go na Europa pe a bigin studeri Bijbel baka. Bakaten a taki: ’Mi kon abi na overtoigi taki Bijbel na a buku fu Gado fu di den profeititori na ini kon tru, fu a bigin te na a kaba a e taki fu wán prenspari tori nomo, ala pisi e kruderi nanga makandra, èn den anbegiman fu Yehovah lobi makandra.’ Anwar dopu na ini 1998.

¹⁵ Asha abi 16 yari èn en famiri abi a Hindu bribi. Asha taki: ’Mi ben e begi soso te mi ben go na a tempel, noso te mi ben abi problema. Ma te mi no ben abi problema, mi no ben e prakseri Gado srefisrefi. Ma wan dei, Yehovah Kotoigi kon na mi oso, èn dati kenki mi heri libi.’ Asha bigin studeri Bijbel èn a tron wan mati fu Gado. San gi en na overtoigi taki Bijbel na a Wortu fu Gado? A taki: „Bijbel piki ala den aksi di mi ben abi. Bijbel yepi mi fu kon abi bribi aladi mi no man si Gado. Fu anbegi Gado, mi no abi fu go na wan tempel moro fu boigi gi wan popki.”

¹⁶ Paula gro kon bigi na ini wan famiri di ben de Lomsu. Ma di a kon moro bigi, a no ben de seiker efu Gado de trutru. Ne wan sani pasa. Paula taki: ’Mi miti wan mati di mi no ben si wan tu mun langa. Na a ten dati furu sma ben gwenti kweki langa wiwiri èn den ben e gebroiki drugs. Ma a mati fu mi ben kenki. A ben sker en barba, a ben koti en wiwiri, èn mi si taki a ben de koloku. Dati meki mi aksi en san pasa nanga en èn pe a ben de a heri pisi ten. A taigi mi taki a ben e studeri Bijbel nanga Yehovah Kotoigi. Dan a bigin fruteri mi fu a bribi fu en.’ Fu di Paula si fa den tru leri fu Bijbel kenki a mati fu en, meki a ben wani sabi san Bijbel e leri. A e bribi now taki Bijbel kon fu Gado trutru.

„YU WORTU NA WAN LAMPU GI MI FUTU”

17. Sortu bun bakapisi yu o kisi te yu e leisi Gado Wortu ibri dei èn te yu e prakseri fu san yu e leisi?

¹⁷ Bijbel na wan heri moi kado di Yehovah gi wi nanga yepi fu en santa yeye. Te yu e leisi en ibri dei nanga prisiri, yu o kon abi moro lobi gi Bijbel èn gi Gado (Ps. 1:1, 2). Ibri leisi te yu o leisi Bijbel, bigin nanga wan begi èn aksi Gado fu yepi yu fu frustan san yu o leisi (Luk. 11:13). Bijbel abi den prakseri fu Gado. Te yu e prakseri fu den sani di yu leisi na ini, dan yu o leri fu denki neleki Gado.

18. Fu san ede yu wani tan studeri Bijbel?

¹⁸ O moro yu e kon sabi den tru tori fu Bijbel, o moro yu musu meki muiti fu du san yu leri. (Leisi Psalm 119:105.) Te yu e leisi Bijbel, a de neleki yu e luku na ini wan spikri. Sobun, efu yu si taki yu musu tyari kenki kon, dan du dati (Yak. 1:23-25). Gado Wortu de leki wan feti-owru. Yu kan gebroiki en fu sori sma krin taki den sani di yu e bribi e kruderi nanga Bijbel. Yu kan yepi safri-ati sma tu fu frustan taki son sani di den e bribi, no e kruderi nanga Bijbel (Ef. 6:17). Te yu e gebroiki Bijbel, dan de nanga tangi taki den profeiti nanga skrifiman fu Bijbel skrifi en „soleki fa a santa yeye ben e sori den”.

[Futuwortu]

[Aksi fu a tori disi]

[Prenspari pisi na tapu bladzijde 29]

Te yu e leisi Bijbel ibri dei, yu o kon abi moro lobi gi Gado

[Prenki na tapu bladzijde 26]

A sma di poti en nen na ondrosei fu a brifi, na en abi a brifi