“Ema sira neʼebé espíritu santu leno”
“Ema sira neʼebé espíritu santu leno”
“Liafuan profeta nian ida la sai husi ema nia hakarak, maibé tanba ema sira neʼebé espíritu santu leno daudaun fó sai husi Maromak.”—2 PED 1:21.
OINSÁ ITA HATÁN?
Oinsá mak Maromak uza espíritu santu atu ajuda ema neʼebé hakerek Bíblia atu hatene buat neʼebé sira tenke hakerek?
Ita iha razaun saida deʼit atu fiar katak Bíblia mai husi Maromak?
Saida mak ita bele halo loroloron hodi ajuda ita atu nafatin hafolin Bíblia?
1. Tanbasá mak ita presiza Maromak nia Liafuan, Bíblia?
EMA barak iha mundu neʼe karik husu pergunta sira hanesan: ‘Ita ema mai husi neʼebé? Tansá ita moris iha mundu neʼe? Saida mak sei akontese ba ita iha futuru? Tansá mak mundu neʼe hanesan neʼe deʼit? Saida mak akontese ba ita kuandu ita mate?’ Tuir loloos, se ita la iha Maromak nia Liafuan, Bíblia, ita sei la hetan resposta ba pergunta sira hanesan neʼe no mós pergunta seluk neʼebé importante. Se ita la iha Bíblia, karik ita sei aprende deʼit kona-ba moris liuhusi esperiénsia neʼebé ita hetan. No mós, se ita aprende deʼit husi esperiénsia, ita la bele hafolin “Jeová nia lei” hanesan ema neʼebé hakerek salmu ida.—Lee Salmo 19:7. *
2. Saida mak ajuda ita atu nafatin hafolin Bíblia?
2 Buat neʼebé triste tebes mak ema balu la hafolin tan Bíblia nia hanorin hanesan uluk. (Kompara ho Apokalipse 2:4.) Sira la halaʼo tan sira-nia moris iha dalan neʼebé halo Jeová kontente. (Isa 30:21) Ida-neʼe lalika akontese ba ita. Ita presiza hakaʼas an atu nafatin hafolin Bíblia no ninia hanorin. Tuir loloos, Bíblia mak prezente importante ida husi ita-nia Kriadór neʼebé hadomi ita. (Tgo 1:17) Entaun, saida mak ajuda ita atu nafatin hafolin “Maromak nia liafuan”? Ita presiza hanoin kona-ba oinsá mak espíritu santu leno ema atu hakerek Bíblia, no mós hanoin kona-ba razaun barak neʼebé halo ita fiar katak Bíblia mai husi Maromak. Ida-neʼe sei book ita atu lee Maromak nia Liafuan loroloron no atu halo tuir ninia konsellu.—Ebr 4:12.
OINSÁ “ESPÍRITU SANTU LENO” BÍBLIA?
3. Oinsá mak “espíritu santu leno” profeta no ema sira neʼebé hakerek Bíblia?
3 Presiza tinan 1.610 atu hakerek Bíblia, ida-neʼe hahú husi tinan 1513 molok Kristu toʼo tinan 98 liutiha Kristu. “Espíritu santu leno” ema maizumenus naʼin-40 atu hakerek Bíblia. (Lee 2 Pedro 1:20, 21.) Liafuan gregu neʼebé tradús nuʼudar “leno” iha arti book, lori, ka husik buat ruma book ita. Iha Apostolu 27:15 uza liafuan gregu neʼebé hanesan atu koʼalia kona-ba ró neʼebé anin book no lori ba dalan ida. Entaun, kuandu ita lee katak “espíritu santu leno” profeta no mós ema sira neʼebé hakerek Bíblia, neʼe katak Maromak koʼalia ba sira, book sira, no hatudu dalan ba sira liuhusi ninia espíritu santu. Sira hakerek laʼós sira-nia hanoin, maibé Maromak nia hanoin. Dala ruma, sira neʼebé hakerek Bíblia, hanesan profeta sira, la komprende buat neʼebé sira hakerek ka fó-hatene nanis. (Dan 12:8, 9) Entaun, neʼe hatudu katak “Maromak leno Eskritura hotu”. Iha Bíblia laran, ita la hetan ema nia matenek ka ideia ida.—2 Tim 3:16.
4-6. Oinsá mak Jeová ajuda ema neʼebé hakerek Bíblia atu hatene saida mak sira tenke hakerek? Fó toʼok ezemplu.
4 Maibé, oinsá mak Maromak uza espíritu santu atu ajuda ema neʼebé hakerek Bíblia atu hatene buat neʼebé sira tenke hakerek? Maromak fó-hatene liafuan ida-idak ba sira ka lae? Ka nia fó deʼit ideia no tuirmai husik sira uza sira-nia liafuan rasik atu hakerek? Hanoin toʼok kona-ba patraun ida neʼebé hakerek karta. Kuandu nia sente katak importante atu uza liafuan neʼebé loos, nia rasik mak hakerek karta neʼe ka nia fó-hatene ninia sekretáriu liafuan neʼebé tenke uza. Depois sekretáriu hakerek tiha karta, patraun tau ninia naran no asina. Maibé iha tempu seluk, nia karik fó-hatene deʼit ba ninia sekretáriu kona-ba ideia neʼebé importante, no sekretáriu hakerek karta neʼe ho ninia liafuan rasik. Tuirmai, patraun neʼe karik haree fali karta neʼe no se presiza troka liafuan ruma, nia sei husu sekretáriu atu halo nuneʼe. Kuandu karta neʼe hotu ona, patraun neʼe sei tau ninia naran no asina. No ema neʼebé simu karta neʼe, haree ida-neʼe nuʼudar karta husi patraun rasik.
5 Nuneʼe mós kona-ba Bíblia. Iha parte balu iha Bíblia laran, Maromak hakerek ho “nia liman-fuan” rasik. (Êx 31:18) No mós, kuandu Jeová sente katak importante atu uza liafuan neʼebé loos, nia rasik fó-hatene liafuan neʼebé tenke uza. Porezemplu, iha Êxodo 34:27 Jeová dehan ba Moisés: “Hakerek liafuan sira-neʼe bá, tanba ho liafuan sira-neʼe mak haʼu sei halo aliansa ho ó no ho Israel.” Nuneʼe mós Jeová hatete ba Jeremias: “Hakerek iha livru ida liafuan hotu neʼebé haʼu sei dehan ba ó.”—Jer 30:2.
6 Maibé, dala barak Maromak la fó-hatene liafuan ida-idak neʼebé ema tenke hakerek. Maromak tau deʼit ninia hanoin iha sira-nia laran no neon, no tuirmai husik sira atu hili liafuan rasik atu hakerek ninia mensajen. Eclesiastes 12:10 hatete: “Ida neʼebé halibur povu koko atu buka liafuan neʼebé furak no hakerek liafuan neʼebé loos kona-ba lia-loos.” No mós, Lucas “buka-hatene loloos buat hotu horiuluk kedas, . . . [no] hakerek fali didiʼak buat hirak-neʼe”. (Lc 1:3) Maromak uza ninia espíritu santu atu tau matan didiʼak hodi la husik ema sala-naʼin troka ninia mensajen.
7. Tanbasá mak Maromak hatudu matenek hodi uza ema atu hakerek Bíblia?
7 Maromak hatudu duni matenek hodi uza ema atu hakerek Bíblia. Liafuan sira ajuda ita laʼós deʼit atu hatene informasaun, maibé ajuda ita atu hatene ema nia sentimentu no hanoin. Oinsá se Jeová uza anju atu hakerek Bíblia? Anju sira bele fó sai ema nia sentimentu hanesan taʼuk, triste no laran-tun ka lae? Lae. Maibé, hodi husik ema sala-naʼin sira atu hili liafuan rasik atu hakerek Maromak nia mensajen, mensajen neʼe book duni ita-nia laran.
RAZAUN BARAK ATU FIAR BÍBLIA
8. Tanbasá mak ita bele dehan katak Bíblia la hanesan livru relijiaun nian seluk?
8 Ita iha razaun barak atu fiar katak Bíblia mai husi Maromak. Bíblia laʼós hanesan livru relijiaun nian seluk, tanba Bíblia ajuda ita atu hatene kona-ba Maromak loos. Porezemplu, livru oioin husi relijiaun Indú fó-hatene ita kona-ba serimónia relijiaun nian, kona-ba filozofia, istória neʼebé ema inventa deʼit, ka ukun-fuan kona-ba morál. Livru oioin husi relijiaun Buda esplika kona-ba lei neʼebé sira-nia amlulik sira tenke tuir. Livru sira-neʼe esplika kona-ba doutrina no hanorin Buda nian. Buda nunka dehan katak nia mak Maromak, no nia koʼalia uitoan deʼit kona-ba Maromak. Livru sira husi relijiaun Konfusionizmu koʼalia kona-ba buat neʼebé akontese iha tempu uluk, ukun-fuan kona-ba morál, masonik, no knananuk sira. Iha mós livru ida husi relijiaun Izlaun neʼebé hanorin katak Maromak iha ida deʼit no nia hatene kona-ba futuru no kontrola ida-neʼe, maibé livru neʼe la fó sai Maromak nia naran, Jeová.
9, 10. Saida deʼit mak ita bele aprende kona-ba Maromak liuhusi Bíblia?
9 Livru relijiaun nian barak hanorin uitoan deʼit kona-ba Maromak. Maibé, Bíblia ajuda ita atu hatene didiʼak Maromak Jeová no buat oioin neʼebé nia halo. Bíblia ajuda ita atu hatene Maromak nia hahalok hanesan justisa, matenek, no kbiit boot. Bíblia mós hatete katak Maromak hadomi ita. (Lee Joao 3:16; 1 Joao 4:19.) Bíblia fó-hatene buat seluk tan kona-ba Maromak hodi dehan: “Tebes duni, haʼu haree katak Maromak la fihir ema. Maibé, iha nasaun hotu, Maromak simu hotu ema sira neʼebé taʼuk Nia no halo hahalok neʼebé loos.” (Apos 10:34, 35) Tanba Bíblia tradús ona ba língua oioin, ida-neʼe hatudu katak Maromak la fihir ema. Ema matenek kona-ba língua hatete katak iha mundu iha língua hamutuk 6.700. No husi língua sira-neʼe, porsentu 90 husi ema iha mundu neʼe koʼalia língua 100 deʼit. Bíblia tomak ka livru balu husi Bíblia tradús ona ba língua hamutuk 2.400. Entaun, neʼe hatudu katak besik ema hotu iha mundu tomak bele lee Bíblia tomak ka livru balu iha sira-nia língua rasik.
10 Jesus hatete: “Haʼu-nia Aman serbisu toʼo ohin, nuneʼe mós haʼu serbisu.” (Joao 5:17) Jeová mak Maromak “toʼo tempu neʼebé la bele sura”. Entaun, hanoin toʼok kona-ba buat hotu neʼebé nia halo ona! (Sal 90:2) Bíblia deʼit mak bele fó-hatene ita saida mak Maromak halo ona iha tempu uluk, saida mak nia halo agora daudauk, no saida mak nia sei halo iha futuru. Husi Bíblia ita aprende kona-ba buat neʼebé halo Maromak kontente no buat neʼebé la halo nia kontente. Ita mós aprende oinsá mak ita bele “hakbesik ba Maromak”. (Tgo 4:8) Entaun, mai ita hakaʼas an hodi nunka husik buat ida atu hadook ita husi Jeová.
11. Konsellu diʼak saida mak ita hetan iha Bíblia laran?
11 Razaun seluk atu ita fiar katak Bíblia mai husi Maromak mak ita bele hetan matenek neʼebé loos iha Bíblia laran. Apóstolu Paulo hakerek: “Sé [mak] hatene tiha Naʼi nia hanoin atu bele hanorin Nia?” (1 Kor 2:16) Liafuan iha eskritura neʼe, foti husi liafuan neʼebé profeta Isaías husu ba ema iha ninia tempu hodi dehan: “Sé mak sukat ona Jeová nia espíritu, no sé mak nuʼudar ida neʼebé fó konsellu bele halo nia hatene buat ruma?” (Isa 40:13) Resposta ba pergunta neʼe mak la iha ema ida neʼebé hatene barak liu fali Jeová. Tanba razaun neʼe mak ita sempre hetan rezultadu diʼak kuandu ita halo tuir konsellu husi Bíblia. Porezemplu, Bíblia iha konsellu kona-ba serbisu makaʼas, kaben, oan, halimar, laran-moos, morál, no kona-ba hili kolega. Ita nunka hetan konsellu neʼebé aat husi Bíblia. Maibé, ema nia matenek la toʼo atu fó konsellu neʼebé sempre diʼak. (Jer 10:23) Ema nia konsellu sempre troka kuandu sira hatene katak konsellu neʼe la diʼak ona. Bíblia hatete: “Ema nia hanoin, . . . la folin buat ida.”—Sal 94:11.
12. Oinsá mak ema koko atu halakon Bíblia?
12 Ema nia istória iha mundu mak razaun ida seluk tan atu ita fiar katak Bíblia mai husi Maromak neʼebé loos. Iha tempu uluk, ema barak koko atu halakon Maromak nia liafuan. Iha tinan 168 molok Kristu, liurai Síria nian, naran Antíoco IV haruka ema atu buka livru Ukun-Fuan nian hotu no sunu. Iha tinan 303 liutiha Kristu, liurai Roma nian, naran Diocleciano, fó lei atu harahun ema kristaun nia reuniaun-fatin hotu no sunu sira-nia livru Eskritura nian. Ida-neʼe akontese maizumenus ba tinan 10. No mós, durante tinan atus ba atus, papa sira hakaʼas an atu hapara ema atu tradús Bíblia ba língua oioin tanba sira lakohi povu baibain atu aprende kona-ba Bíblia. Maski Satanás no mós ema neʼebé apoia nia koko atu halakon Bíblia, maibé toʼo agora ita sei iha Bíblia. Sin, Jeová la husik buat ida atu halakon prezente neʼebé nia fó ba ema.
BUAT NEʼEBÉ HALO EMA FIAR
13. Iha razaun saida tan atu ita fiar katak Bíblia mai husi Maromak?
13 Iha mós razaun seluk tan neʼebé hatudu katak Maromak mak leno Bíblia. Razaun sira-neʼe mak livru sira iha Bíblia laran la kontra malu, Bíblia sempre loos kuandu koʼalia kona-ba siénsia, profesia neʼebé kumpre ona, ema neʼebé hakerek la subar sira-nia sala, no mós Bíblia iha kbiit atu troka ema nia moris. Liután neʼe, Bíblia mós konta istória neʼebé loos, no Bíblia fó resposta neʼebé diʼak ba pergunta sira iha parágrafu 1. Entaun, mai ita haree saida mak ajuda ema balu atu fiar katak Bíblia mai husi Maromak.
14-16. (a) Saida mak halo ema naʼin-tolu fiar katak Bíblia mai husi Maromak? (b) Razaun saida deʼit mak ita hakarak uza iha serbisu haklaken atu ajuda ema fiar katak Bíblia mai husi Maromak?
14 Mane ida naran Anwar * moris iha rai ida iha Médiu Oriente, no nia sai boot nuʼudar ema Izlaun. Kuandu nia bá hodi hela iha rai ida iha Amérika Norte, Testemuña ba Jeová vizita nia iha ninia uma. Anwar hatete: ‘Haʼu la gosta relijiaun kristaun tanba buat aat neʼebé igreja katólika halo iha tempu uluk. Maibé, tanba haʼu gosta atu aprende, entaun haʼu simu atu estuda Bíblia.’ Lakleur depois neʼe, Anwar fila fali ba ninia rai no lakon kontaktu ho Testemuña sira. Tinan balu depois neʼe, nia muda ba rai-Europa no hahú estuda fali. Nia hatete: ‘Haʼu fiar katak Bíblia mai duni husi Maromak tanba Bíblia nia profesia sira sai loos ona, Bíblia iha tema ida deʼit hahú husi livru primeiru toʼo livru ikus, no livru sira iha Bíblia laran la kontra malu, no mós Jeová nia atan sira hadomi malu.’ Ikusmai, Anwar hetan batizmu iha tinan 1998.
15 Feto ida naran Asha neʼebé tinan 16, sai boot iha família Indú. Nia dehan: ‘Haʼu halo orasaun deʼit kuandu haʼu bá templu ka kuandu haʼu iha problema. Maibé, haʼu nunka hanoin kona-ba Maromak kuandu haʼu la hasoru problema. Maski nuneʼe, loron ida, Testemuña ba Jeová dere haʼu-nia odamatan, no sira-nia vizita neʼe troka duni haʼu-nia moris.’ Asha komesa estuda Bíblia no hatene Maromak, no ikusmai sai belun ho Nia. Saida mak book nia atu fiar katak Bíblia husi Maromak? Asha dehan: ‘Bíblia hatán haʼu-nia pergunta hotu neʼebé haʼu iha. Bíblia ajuda haʼu atu iha fiar ba Maromak maski haʼu la bele haree nia, neʼe katak haʼu la presiza bá templu hodi hakruʼuk an iha estátua sira-nia oin atu hatene Maromak iha.’
16 Feto ida seluk naran Paula sai boot iha família katóliku. Maibé, kuandu nia sai boot, nia ladún fiar katak Maromak iha. Maski nuneʼe, buat ida akontese. Nia dehan: ‘Haʼu hasoru haʼu-nia kolega ida neʼebé haʼu la hetan ba fulan barak ona. Iha ami-nia tempu, ema barak gosta atu iha fuuk naruk no uza droga. Maibé, haʼu-nia kolega neʼe troka ona. Nia koir ninia hasan-rahun, tesi ninia fuuk, no haree kontente. Entaun, haʼu husu nia kona-ba saida mak akontese no saida mak nia halo. Nia dehan katak nia estuda Bíblia ho Testemuña ba Jeová, no nia hahú haklaken ba haʼu.’ Tanba Paula haree oinsá Bíblia troka ninia kolega nia moris, nia hakarak atu estuda Bíblia no tuirmai nia fiar katak Bíblia mai husi Maromak.
“ITA-NIA LIAFUAN MAK AHI-OAN BA HAʼU-NIA AIN”
17. Oinsá mak lee Bíblia loroloron no hanoin didiʼak kona-ba buat neʼebé ita lee bele ajuda ita?
17 Bíblia mak prezente furak neʼebé Jeová fó ba ita liuhusi ninia espíritu santu. Nuneʼe, hodi iha toman atu lee Bíblia loroloron, ita sei hafolin liután Maromak nia Liafuan, no ita-nia domin ba Jeová sei aumenta liután. (Sal 1:1, 2) Dala hotu neʼebé ita lee Bíblia, diʼak atu komesa hodi halo orasaun atu husu Maromak nia espíritu santu ajuda ita atu komprende buat neʼebé ita lee. (Lc 11:13) Iha Bíblia laran ita hetan Maromak nia hanoin, entaun se ita hanoin didiʼak kona-ba buat neʼebé ita lee, ita bele aprende atu iha hanoin hanesan Maromak.
18. Tanbasá mak ita hakarak kontinua atu aprende Bíblia?
18 Nuʼudar ita kontinua atu aprende liután kona-ba lia-loos, importante atu moris tuir buat neʼebé ita aprende. (Lee Salmo 119:105. *) Kuandu ita lee Bíblia, ida-neʼe hanesan ita haree ba espellu. Se ita haree katak ita presiza troka buat ruma kona-ba ita-nia hahalok, entaun mai ita halo nuneʼe bá. (Tgo 1:23-25) Tanba Maromak nia Liafuan hanesan surik, ita bele uza Bíblia atu defende ita-nia fiar, no mós atu hasai hanorin falsu husi ema nia laran. (Ef 6:17) Nuʼudar ita uza Bíblia, mai ita fó-agradese ba Jeová tanba nia uza “ema sira neʼebé espíritu santu leno” atu hakerek ninia liafuan.
[Nota–rodapé]
^ par. 1 Salmo 19:7: “Jeová nia lei mak perfeitu, halo ema nia moris fila fali. Jeová nia avizu mak ita bele fiar, halo ema neʼebé la iha esperiénsia sai matenek.”
^ par. 14 Naran balun laʼós naran neʼebé loos.
^ par. 18 Salmo 119:105: “Ita-nia liafuan mak ahi-oan ba haʼu-nia ain, no naroman ba haʼu-nia dalan.”
[Pergunta estudu nian]
[Liafuan neʼebé foti husi pájina 29]
Lee Bíblia loroloron halo ita-nia domin ba Jeová aumenta liután
[Dezeñu iha pájina 26]
Ema neʼebé simu karta, haree ida-neʼe nuʼudar karta husi ema neʼebé tau nia naran no asina
