“Holi Spirit i Kirapim Ol”
“Holi Spirit i Kirapim Ol”
“Ol tok profet i no bin kamap long laik bilong ol man yet, nogat, holi spirit i kirapim ol long autim ol tok God yet i bin givim long ol.”—2 PITA 1:21.
OL BIKPELA POIN YUMI LAIK TINGIM
Olsem wanem God i bin yusim holi spirit bilong helpim ol man long save long ol tok ol i mas raitim long Baibel?
I gat wanem ol as na yumi ken bilip olsem Baibel i kam long God?
Yu ken mekim wanem long olgeta de bilong soim olsem yu tenkyu long Baibel?
1. Bilong wanem yumi nidim Baibel?
PLANTI man long olgeta hap bilong graun i laik save long bekim bilong ol askim olsem: Yumi bin kamap olsem wanem? Bilong wanem yumi stap long dispela graun? Wanem samting bai painim yumi long bihain? Watpo na ol samting bilong graun i stap olsem? Wanem samting i painim yumi taim yumi dai? Yumi i no inap save long bekim bilong ol dispela askim na ol arapela bikpela askim sapos yumi no gat Baibel, em Tok Bilong God. Sapos i no gat Baibel, bai yumi kisim skul tasol long ol samting i kamap long yumi. Na sapos yumi kisim skul tasol long ol samting i kamap long yumi, orait bai yumi no inap holim wankain tingting long “lo bilong Bikpela” olsem man bilong raitim song.—Ritim Song 19:7.
2. Wanem samting bai helpim yumi long amamas moa yet long Baibel?
2 Sori tru olsem sampela i no laikim moa ol tok bilong Baibel olsem bipo. (Skelim Revelesen 2:4.) Ol i no wokabaut moa long pasin Jehova i laikim. (Ais. 30:21) Dispela i no ken kamap long yumi. Yumi mas wok strong long holimpas pasin bilong amamas long Baibel na ol tok bilong en. Baibel em i wanpela bikpela presen em yumi kisim long Krieta husat i gat pasin laikim. (Jems 1:17) Wanem samting bai helpim yumi long amamas moa yet long “tok bilong God”? Yumi mas tingim olsem wanem God i bin yusim ol man long raitim Baibel, na yumi ken skelim sampela as na yumi ken bilip olsem Baibel i kam long God. Dispela bai strongim laik bilong yumi long ritim Baibel long olgeta de na bihainim ol tok bilong en.—Hib. 4:12.
HAU “HOLI SPIRIT I KIRAPIM” OL MAN
3. Wanem mining bilong dispela tok olsem “holi spirit i kirapim” ol profet na ol man bilong raitim Baibel?
3 Ol man i bin raitim Baibel insait long 1,610 yia, kirap long yia 1513 B.C.E. i go inap long 98 C.E. Klostu 40 narapela narapela man i bin raitim Baibel. Sampela em ol profet, na Baibel i tok “holi spirit i kirapim” ol. (Ritim 2 Pita 1:20, 21.) Long dispela ves, tok Grik ol i tanim olsem “kirapim” i makim wok bilong muvim wanpela samting, karim i go, o larim samting i sakim yu i go. Aposel 27:15 i yusim wankain tok Grik taim em i stori long win i sakim wanpela sip i go. Taim yumi ritim olsem “holi spirit i kirapim” ol profet na ol man bilong raitim Baibel, dispela i makim olsem God i toktok wantaim ol, kirapim ol, na stiaim ol long rot bilong strong bilong en, em holi spirit. Olsem na ol i kamapim tingting bilong God taim ol i raitim ol tok, i no tingting bilong ol yet. Sampela taim ol dispela man i no kliagut long tok profet ol i autim o tok ol i raitim. (Dan. 12:8, 9) Olsem na i tru olsem “God em i as bilong olgeta tok i stap long Rait Holi.” Baibel i no kamapim tingting bilong ol man.—2 Tim. 3:16.
4-6. Olsem wanem Jehova i bin helpim ol man long save long ol tok ol i mas raitim long Baibel? Kamapim wanpela eksampel.
4 Tasol olsem wanem God i bin yusim holi spirit bilong helpim ol man long save long samting ol i mas raitim long Baibel? Yu ting God i bin kolim ol wan wan wed ol i mas raitim, o em i givim tingting long ol na ol yet i ken makim ol tok ol i laik yusim bilong kamapim dispela tingting? Tingim hau wanpela bisnisman i raitim pas. Taim em i bikpela samting long kamapim stret sampela tok, orait em yet bai raitim pas o em bai tokim kuskus long ol wed em i mas yusim long pas. Kuskus i save taipim pas, na bisnisman i sainim nem bilong en long pas. Sampela taim, bisnisman bai tokim kuskus long ol bikpela tok tasol, na kuskus bai raitim pas na makim ol tok em bai yusim. Bihain, ating bisnisman bai sekim na mekim sampela senis. Taim pas i redi pinis, bisnisman bai sainim. Man husat i kisim dispela pas bai tingim olsem pas i kam long bisnisman yet.
5 Long wankain pasin, God yet i bin raitim sampela hap bilong Baibel. (Kis. 31:18) Taim em i bikpela samting long kamapim stret sampela tok, Jehova i bin tokim man long ol wed em i mas yusim. Olsem, long Kisim Bek 34:27, Jehova i tokim Moses: “Yu mas raitim ol dispela tok long wanpela buk, long wanem, olgeta dispela tok i as bilong dispela kontrak mi mekim wantaim yu na ol Israel.” Na Jehova i bin tokim profet Jeremaia: “Yu mas kisim wanpela buk na raitim olgeta tok mi bin givim yu.”—Jer. 30:2.
6 Tasol planti taim, God i no bin tokim ol man long ol wan wan wed ol i mas raitim long Baibel. God i putim tingting bilong em long bel na tingting bilong ol, na em i larim ol yet long makim ol wed ol bai yusim bilong kamapim tingting bilong em. Saveman 12:10 i tok: “Em [“Man bilong bungim lain,” NW] i hatwok long painim tok i swit long yau bilong ol man, na em i raitim gut ol dispela trupela tok.” Na Luk ‘i bin mekim gut wok painimaut long ol samting i bin kamap kirap long pastaim, na em i bin raitim ol tok na kamapim gut stori.’ (Luk 1:3) God i yusim holi spirit bilong lukautim gut dispela wok na bai pasin kranki bilong ol man i no ken senisim tok bilong em.
7. Olsem wanem God i bihainim savetingting taim em i yusim ol man long raitim Baibel?
7 God i bihainim savetingting taim em i yusim ol man long raitim Baibel. Ol tok yumi harim inap givim save long yumi na kirapim bel na tingting bilong yumi. Olsem wanem sapos Jehova i bin yusim ol ensel long raitim Baibel? Yu ting ol ensel inap stori gut long pasin bilong ol man long pilim pret, krai sori, na bel hevi? God i larim ol sinman i yusim ol wed ol i laikim bilong kamapim tok bilong em, olsem na yumi pilim tru long bel ol tok bilong God.
AS NA YUMI BILIP OLSEM BAIBEL EM I KAM LONG GOD
8. Bilong wanem yumi ken tok Baibel i narapela kain long ol arapela buk bilong lotu?
8 Yumi gat planti risen long bilip olsem Baibel i kam long God. Baibel i helpim yumi long save long God tru, olsem na Baibel i narapela kain long ol arapela buk bilong lotu. Olsem, ol buk bilong lotu Hindu i tokim yumi long ol bung bilong dispela lotu, savetingting bilong en, ol stori nating bilong en, na ol lo bilong en long stretpela pasin. Ol buk bilong lotu Buda i stori long ol lo ol bruder na ol sister i mas bihainim. Ol dispela buk i stori long ol bilip bilong lotu Buda na ol samting Buda i lainim ol man long en. Buda i no tok olsem em yet i wanpela God, na em i no stori tumas long God. Ol buk bilong lotu Konfusas i stori long ol samting bilong bipo, ol lo bilong stretpela pasin, mejik, na ol singsing. Na tu, i gat buk bilong lotu Islam na em i save lainim ol man olsem i gat wanpela God tasol husat i save long olgeta samting, na em i save long ol samting bai kamap bihain tu. Tasol dispela buk i no kamapim nem bilong God, em Jehova, dispela nem i stap planti tausen taim long Baibel.
9, 10. Yumi inap kisim wanem save long God long Baibel?
9 Planti buk bilong lotu i no stori tumas long God. Tasol Baibel i helpim yumi long save long God Jehova na long olgeta samting em i mekim. Baibel i helpim yumi long kliagut long ol pasin bilong God. Baibel i tokim yumi olsem God em i Man bilong bihainim stretpela pasin, savetingting, na em i gat bikpela strong. Na tu, Baibel i tok God i save laikim yumi. (Ritim Jon 3:16; 1 Jon 4:19.) Na Baibel i tok moa olsem: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.” (Apo. 10:34, 35) Ol i bin tanim tok bilong Baibel i go long planti narapela narapela tok ples. Dispela i makim olsem God i no save mekim wansait pasin. Ol saveman bilong ol tokples i tok, i gat olsem 6,700 tokples ol man i save yusim long nau. Inap olsem 100 bilong ol dispela tokples, em 90 pesen bilong ol man i save yusim. Ol i bin tanim tok bilong Baibel olgeta o sampela hap bilong en long winim 2,400 tokples. Olsem na klostu olgeta man bilong graun inap ritim sampela hap bilong Baibel long tokples bilong ol yet.
10 Jisas i tok: “Papa bilong mi i wok i stap i kam inap long nau, na mi tu mi wok i stap.” (Jon 5:17) “Oltaim oltaim, . . . long bipo na long bihain tu” Jehova i stap God. Olsem na tingim ol samting em i bin mekim! (Sng. 90:2) Baibel tasol i tokaut long ol samting God i bin mekim long bipo, na ol samting em i wok long mekim nau, na ol samting em bai mekim long bihain. Yumi kisim save long samting i mekim God i amamas na samting i mekim em i bel hevi. Yumi lain tu long olsem wanem yumi inap i “go klostu long God.” (Jems 4:8) Yumi no ken larim ol arapela samting yumi mekim o ol hevi bilong yumi i kirapim yumi long lusim Jehova.
11. Wanem gutpela skultok i stap long Baibel?
11 Bikpela savetingting i stap long Baibel. Dispela em i narapela as na yumi ken bilip olsem Baibel i kam long God. Profet Aisaia i bin askim ol man i stap long taim bilong en olsem: “Husat inap soim Bikpela long pasin bilong wokim ol samting? Ating i gat wanpela man inap givim tingting long em, a?” (Ais. 40:13) Bihain, aposel Pol i mekim askim i wankain liklik, olsem: “Husat i save long tingting bilong Jehova na bai em inap skulim em?” (1 Kor. 2:16) Yumi ken tok i no gat wanpela man, long wanem, i no gat wanpela man i gat bikpela save olsem Jehova. Olsem na gutpela samting moa i save kamap taim yumi bihainim ol tok bilong Baibel long pasin bilong wok hat, marit, lukautim ol pikinini, painim amamas, onest pasin, stretpela pasin, na ol poroman yumi makim. Olgeta taim skultok bilong Baibel i helpim yumi. Tasol skultok bilong ol man i no olsem, long wanem, savetingting bilong ol i sot. (Jer. 10:23) Taim ol man i luksave olsem skultok bilong ol i no wok, ol i save senisim gen. Baibel i tok olsem skultok bilong ol man i no wok gut tumas.—Sng. 94:11.
12. Ol man i bin mekim wanem bilong bagarapim Baibel?
12 Ol samting i bin kamap long bipo em narapela as na yumi bilip olsem Baibel i kam long God tru. Long bipo, planti man i bin traim long bagarapim Tok Bilong God. Long 168 B.C.E., Antiokus Namba 4, king bilong Siria, i tokim ol man long painim ol buk bilong Lo na kukim ol. Long 303 C.E., Diocletian, empera bilong Rom, i tokim ol man long bagarapim ol haus lotu bilong ol Kristen na kukim ol Baibel bilong ol. Ol i mekim dispela pasin birua inap 10-pela yia. Inap planti handret yia, ol pop i wok strong tru long pasim wok bilong tanim tok bilong Baibel i go long ol arapela tokples, long wanem, ol i no laik long ol man i lain long Baibel. Maski Satan na ol sapota bilong em i bin traim long bagarapim Baibel, Baibel i stap yet long nau. Jehova i no larim wanpela i bagarapim presen em i givim long ol man.
AS NA PLANTI I BILIP
13. I gat wanem as na yumi ken bilip olsem Baibel i kam long God?
13 I gat sampela as moa na yumi ken bilip olsem Baibel i kam long God. Baibel i no kamapim ol tok i pait wantaim, tok bilong Baibel i stret wantaim saiens, ol tok profet bilong en i bin kamap tru, na ol man i raitim Baibel i save tok tru oltaim. Na tu, Baibel i gat strong bilong senisim laip bilong ol man, i kolim stret ol samting bilong bipo, na em i kamapim ol gutpela bekim bilong ol askim i stap long paragraf 1. Yumi ken skelim ol samting i bin helpim sampela long bilip olsem Baibel i kam long God.
14-16. (a) Wanem samting i bin kirapim 3-pela narapela narapela long bilip olsem Baibel i kam long God? (b) Taim yu autim tok, yu save kamapim wanem ol tok bilong helpim ol man long bilip olsem Baibel i kam long God?
14 Anwar a i kamap bikpela insait long lotu Muslim long wanpela kantri bilong Midel Is. Taim em i sindaun long Not Amerika, ol Witnes Bilong Jehova i go long haus bilong en. Anwar i tok: ‘Mi no laikim ol lotu Kristen, long wanem, ol i bin mekim planti pasin nogut. Tasol mi amamas long kisim skul, so mi orait long stadi Baibel wantaim ol.’ Bihain liklik, Anwar i go bek long kantri bilong en, tasol em i no inap bungim ol Witnes. Planti yia bihain, em i muv i go long Yurop na em i kirap gen long stadi long Baibel. Bihain em i tok: ‘Mi bilip tru olsem Baibel i kam long God bikos ol tok profet bilong Baibel i kamap tru, na long kirap bilong Baibel i go inap long pinis bilong en i gat wanpela as tok tasol, na ol tok bilong Baibel i no save pait wantaim, na ol man i lotuim Jehova i save laikim narapela narapela.’ Anwar i kisim baptais long 1998.
15 Asha i gat 16 krismas, na famili bilong en i bilong lotu Hindu. Dispela meri i tok: ‘Mi bin beten tasol taim mi go long tempel o taim ol hevi i bungim mi. Tasol taim mi no gat hevi, mi no save tingim God liklik. Bihain ol Witnes Bilong Jehova i kam long haus bilong mi, na laip bilong mi i senis olgeta.’ Asha i kirap stadi long Baibel. Na em i kirap tingim God olsem pren bilong en. Wanem samting i mekim na em i bilip olsem Baibel i kam long God? Asha i tok: ‘Baibel i bekim olgeta askim bilong mi. Baibel i helpim mi long kisim bilip na mi no gat wok long go long wanpela tempel o brukim skru long imis.’
16 Paula i go bikpela insait long wanpela famili Katolik. Tasol taim em i bikpela pinis, em i gat tupela tingting olsem God i stap o nogat. Tasol bihain wanpela samting i kamap. Em i tok: ‘Mi bungim wanpela pren husat mi no bin lukim insait long planti mun. Mipela stap long taim planti man i gat longpela gras na ol i save kisim ol drak. Tasol pren bilong mi i bin senis. Em i sev, katim gras bilong en, na em i stap amamas. So mi askim em olsem, em stap we na em i bin mekim wanem. Em i tok olsem ol Witnes Bilong Jehova i bin stadi Baibel wantaim em, na em i kirap autim tok long mi.’ Paula i lukim bikpela senis tok i tru bilong Baibel i bin mekim long pren bilong en, olsem na em tu i laik kisim save long tok bilong Baibel na em i kirap long bilip olsem Baibel i kam long God.
‘TOK BILONG YU I OLSEM LAIT BILONG SOIM ROT LONG MI’
17. Sapos yu ritim Baibel long olgeta de na tingim tingim tok yu ritim, orait dispela bai helpim yu olsem wanem?
17 Long rot bilong holi spirit Jehova i givim Baibel long yumi, em wanpela gutpela presen. Sapos yu ritim long olgeta de, bai yu laikim Baibel na God moa yet. (Sng. 1:1, 2) Paslain long yu ritim Baibel, oltaim beten askim God long givim holi spirit long yu na bai yu ken kliagut long tok yu ritim. (Luk 11:13) Tingting bilong God i stap long Baibel. Taim yu tingim tingim ol samting Baibel i stori long en, yu bai lain long holim wankain tingting olsem bilong God.
18. Bilong wanem yu laik wok yet long kisim save long Baibel?
18 Taim yu wok long kisim save moa long tok i tru bilong Baibel, yu mas wok long bihainim samting yu lainim. (Ritim Song 119:105.) Taim yu ritim Baibel i kain olsem yu lukluk long wanpela mira. Olsem na sapos yu luksave olsem yu mas kamapim sampela senis long laip bilong yu, orait mekim olsem. (Jems 1:23-25) Tok Bilong God i kain olsem bainat. Yu ken yusim bilong lukautim bilip bilong yu. Na tu, yu ken yusim bilong rausim ol bilip giaman i stap long bel bilong ol man i gat pasin daun. (Efe. 6:17) Taim yu yusim Baibel, yu ken amamas olsem “holi spirit i kirapim” ol profet na ol man husat i bin raitim tok bilong en.
[Futnot]
a Mipela i bin senisim sampela nem.
[Askim Bilong Stadi]
[Rait long pes 29]
Ritim Baibel long olgeta de, na pasin bilong yu long laikim God bai i go bikpela
[Piksa long pes 26]
Pas yumi kisim, i kam long man husat i sainim dispela pas
