“Va Vetiyiwa Lespiritu Sandu”

“Owanji wovaprofeto ka weyile locipango comunu umue, pole, omanu va popia ondaka ya tunda ku Suku, momo va vetiyiwa lespiritu sandu.” ​—2 PET. 1:21, NW.

ATOSI OKU SOKOLOLA

Esapulo lia Suku lia pitiyiwa ndati kasonehi Vembimbiliya lekuatiso liespiritu sandu?

Uvangi upi u lekisa okuti, Embimbiliya lia tunda ku Suku?

Nye o sukila oku linga eteke leteke, oco o sanjukile Ondaka ya Suku?

1. Momo lie tu sukilila oku kuata Embimbiliya?

 OMANU valua va siata oku li pula ndoco: Tua tunda pi? Momo lie tu kasilili kilu lieve? Pi tua loña? Momo lie oluali lu kasilili ndoco? Nye ci pita letu eci tu fa? Tu kũlĩha ndati etambululo liapulilo a lingiwa ndeti, kuenda apulilo akuavo a kuete esilivilo, nda ka tu kuete Ondaka ya Suku? Nda ka tu kuete Embimbiliya, ka tu pondola oku sanga atambululo luloño wetu muẽle. Nda tu kolela lika kolondunge vietu, tu kuata hẽ ovisimĩlo ndevi viukualosamo wa kapeleko “ovihandeleko via Yehova”?​—Tanga Osamo 19:7.

2. Nye ci tu kuatisa oku sanjukila Embimbiliya okuti, ombanjaile ya tunda ku Suku?

² Eci tu limbuka okuti omanu vana va solele Embimbiliya va liwekapo, tu sumua calua. (Ci sokisa lolondaka vi sangiwa kelivulu Liesituluilo 2:4.) Momo, ka va kasi vali oku linga ovina vi sanjuisa Yehova. (Isa. 30:21) Ka tu ka eceleli okuti tu kuata ocitangi caco. Tu pondola oku amamako oku sola Embimbiliya, kuenda alongiso aco. Embimbiliya, ombanjaile yimue ya velapo ya tunda Kululiki wetu ukuacisola. (Tia. 1:17) Nye ci tu kuatisa oku vokiya ocisola cetu ‘Kondaka ya Suku’? Oku kũlĩhĩsa ndomo omanu va soneha Embimbiliya va kuatisiwa lespiritu sandu. Tu sukilavo oku kũlĩhĩsa ovovangi a lekisa oku kua tunda Embimbiliya. Nda tua ci linga, tu vetiyiwa oku tanga Ondaka ya Suku eteke leteke, loku kapako alungulo a sangiwamo.​—Va Hev. 4:12.

‘VA VETIYIWA NDATI LESPIRITU SANDU?’

3. Ovaprofeto lasonehi vakuavo Vembimbiliya ‘va vetiyiwa ndati lespiritu sandu?’

³ Vokuenda kueci ci soka 1.610 kanyamo​— oku upisa kunyamo wo 1.513 O.Y., toke kunyamo wa 98 K.K.,​— 40 kalume va litepa, va  soneha Embimbiliya. Ovaprofeto vamue va ‘vetiyiwa lespiritu sandu.’ (Tanga 2 Petulu 1:20, 21.) Kelimi lio Helasi, ondaka ‘oku vetiya,’ yi lomboloka oku “tuala ocikuata cimue kocitumãlo cikuavo.” Ondaka yaco yi lombolokavo oku sondolola ocina cimue, oku cendisa, ale oku ecelela okuti ocina caco cenda lofela.”  a Elivulu Liovilinga 27:15, li tukula onaviyu yimue okuti, ya endisiwa lofela. Ondaka yokuti ovaprofeto lasonehi Vembimbiliya ‘va vetiyiwa lespiritu sandu,’ yi lomboloka okuti, Suku poku vangula lavo, wa va vetiya, kuenda wa va kuatisa longusu yaye ya pama. Omanu vaco, ka va sonehele ovisimĩlo viavo, pole, va soneha ovisimĩlo via Suku. Olonjanja vimue, ovaprofeto kuenda asonehi Vembimbiliya, ka va kũlĩhĩle elomboloko liolondaka va kala oku soneha. (Dan. 12:8, 9) Eli olio esunga lieci Embimbiliya li popela hati: “Ovisonehua vi kola viosi ovitumasuku,” momo ka via sonehiwile lovisimĩlo viomanu.​—2 Tim. 3:16.

4-6. Yehova wa eca ndati esapulo liaye kasonehi Vembimbiliya? Tukula ocindekaise cimue.

⁴ Esapulo lia Suku lia pitiyiwa ndati kasonehi Vembimbiliya? Anga hẽ asonehi vaco va tambula olondaka via suapo ku Suku, oco va vi pitiye lolondaka viavo? Kũlĩhĩsa ndomo ulume umue ukualomĩlu a pondola oku soneha ukanda. Citava okuti eye muẽle o soneha ukanda waco, ale o tuma usonehi waye oco a sonehe olondaka viaye. Eci usonehi waco a mala oku soneha ukanda, o kapako onduko ya cime caye. Pole, olonjanja vimue cime caco eca lika ovisimĩlo, kuenje, usonehi o soneha ukanda waco lolondaka viaye muẽle. Noke, ulume ukualumĩlu, o kũlĩhĩsa ukanda waco, kuenda o lingamo apongoloko amue. Kesulilo liukanda waco, ku kapiwa onduko yukualomĩlu.

⁵ Cimuamue haico ca pita Lembimbiliya okuti, olonepa vimue via “sonehiwa lomuine wa Suku.” (Etu. 31:18) Pole, Yehova wa tumavo omanu vamue oku soneha olondaka viaye. Kelivulu Lietundilo 34:27, tu tangako ndoco: “Yehova wa popia la Mose hati: ‘Sonẽha olondaka evi. Olondaka evi ovio nda lisila love la va Isareli.’” Yehova wa sapuilavo uprofeto Yeremiya hati: “Sonẽha velivulu olondaka viosi nda popia love.”​—Yer. 30:2.

⁶ Olonjanja vimue, Yehova wa kapa olondaka lovisimĩlo viaye vutima wasonehi Vembimbiliya, oco va vi pitiye volondaka viavo. Elivulu Liukundi 12:10, li popia ndoco: “Ukundi wa sanda olondaka via sunguluka, kuenje locili caye cosi wa soneha olondaka [viwa].” Luka poku soneha Evanjeliu liaye, wa ‘kapa olondaka viosi ndomo vi li kuãi.’ (Luka 1:3) Espiritu lia Suku, lia kuatisa omanu ka va lipuile oco ka va ka pitiye esapulo liaye volondaka vikuavo.

7. Olondunge via Suku via situluiwa ndati poku vetiya omanu oco va sonehe Embimbiliya?

⁷ Olondunge via velapo via Suku, tu vi limbukila kekuatiso a eca komanu oco va sonehe Embimbiliya. Olondaka vi sangiwa Vembimbiliya, ka vi tu kuatisa lika oku kuata elomboloko liesapulo liaye, pole, vi vetiyavo ovisimĩlo kuenda utima wetu. Nda Yehova wa tumĩle ovangelo oku soneha Embimbiliya, upopi upi nda va kapamo? Nda va tẽla hẽ, oku pitiya olondaka vina vi vetiya ovisimĩlo via siata pokati komanu ndeci: Usumba, esakalalo, kuenda esumuo? Pole, Suku wa ecelela okuti, omanu ka valipuile va nõla olondaka lovisimĩlo va tambula kokuaye lekuatiso liespiritu sandu. Kuenje, esapulo liaye lia pitiyiwa lonjila yimue okuti, ulandu waco u vetiya ovisimĩlo viomanu!

UVANGI U TU VETIYA OKU TAVA KEMBIMBILIYA

8. Momo lie tu popela tuti, Embimbiliya ka li sokisiwa lalivulu akuavo etavo liesanda?

⁸ Kuli ovovangi alua a lekisa okuti, Embimbiliya Ondaka ya Suku. Embimbiliya ka li sokisiwa lalivulu akuavo atavo, momo li tu kuatisa oku kũlĩha Suku yocili. Kũlĩhĩsa ulandu owu: Vovisonehua vi kola vietavo lio Indu, mu sangiwa elivulu liovisungo Viesivayo okuti, poku vimba, va tukula ovihilahila viatiamẽla kovisungo viaco. Mu sangiwavo elivulu liovilongua viesanda li tukuiwa hati, Upanisiade, lelivulu liasapulo avo li tukuiwa hati, Ramayana, kuenda elivulu lio Mahabarata. Velivulu li tukuiwa hati, Bagavada Gita, mu sangiwa alongiso a sonehiwa locimãho coku vetiya omanu oku kuata ovituwa viwa. Alongiso aco, a sangiwavo velivulu lio Mahabarata. Elivulu lietavo lio Buda li tukuiwa hati,Tipitaka (okuti li kuete Olonepa Vitatu,) vi lombolola ovihandeleko viupange wolopatele kuenda wolomandele. Elivulu likuavo, li lombolola alongiso etavo lio Budismu. Elivulu liatatu, li lombolola alongiso atiamẽla kosuku yo Buda. Pole, Buda yaco ka popele hati, ndisuku. Eye wa tukula lika ovina vimue viatiamẽla ku Suku. Vovisonehua vietavo lio Konfusionismu, mua kongeliwa alivulu atiamẽla kasapulo, kovituwa, kumbanda, kuenda kovisungo. Elivulu li kola lio Islamismu, li longisa oku kolela ku Suku umosi lika, kuenda li lekisa okuti, Suku yaco wa kũlĩha ovina viosi. Pole, ka va tukuile onduko ya Suku, yina yi sangiwa olonjanja vialua Vembimbiliya okuti, eye Yehova.

9, 10. Ovina vipi tu pondola oku lilongisa Vembimbiliya viatiamẽla ku Suku?

⁹ Alivulu alua atavo, ka a lombolola ovina viatiamẽla ku Suku, pole, Embimbiliya li tu kuatisa oku kũlĩha Yehova Suku, kuenda ovopange aye. Li tu kuatisavo oku kũlĩha ndomo eye a tuwa. Embimbiliya li lekisa okuti, Suku ukuonenewosi, ukualondunge, ukuesunga, kuenda o tu sole. (Tanga Yoano 3:16; 1 Yoano 4:19.) Embimbiliya li tu sapuila ndoco: “Suku ka kuete ocame, puãi, volofeka viosi, wosi u sumbila loku linga esunga, u sungulukila.” (Ovil. 10:34, 35) Omo okuti Embimbiliya li sangiwa kolonepa viosi violuali, ceca uvangi wokuti, Ondaka ya Suku. Olonoño vina via siata oku konomuisa alimi, via popia hati, koloneke vilo, voluali muli eci ci pitahãla 6.700 kalimi, okuti, kolonepa viosi, apa pa sangiwa omanu ocita, akũi ecea pokati kavo,  va kuete Embimbiliya. Eci ci lekisa okuti olonepa vimue Viembimbiliya, ale Embimbiliya liosi, lia pongoluiwa kueci ci pitahãla 2.400 kalimi. Omo liaco, omanu vosi va tunga kilu lieve, va pondola oku kuata Embimbiliya.

¹⁰ Yesu wa popia hati: ‘Toke cilo, Tate o kasi oku linga upange, lamevo ndi kasi oku linga upange.’ (Yoa. 5:17) ‘Tunde ka ku ci toke ka ku ci, Yehova eye Suku.’ Sokolola ovina vialua Yehova a lulika! (Osa. 90:2) Embimbiliya li tu sapuila ovina Suku a linga kosimbu, levi a kasi oku linga cilo, kuenda evi a ka linga kovaso yoloneke. Olio li tu longisa oku kũlĩha ovina viu sanjuisa, levi viu sumuisa, kuenda li tu kuatisa oku limbuka ndomo tu pondola oku amẽla kokuaye. (Tia. 4:8) Omo liaco, ka tu ka eceleli okuti ocina cimue ci tu tateka oku kuata ukamba laye.

11. Ovina vipi viatiamẽla kolondunge via Suku vi sangiwa Vembimbiliya?

¹¹ Olondunge vi sangiwa Vembimbiliya, vi lekisavo okuti, elivulu liaco lia tunda Kono ya velapo okuti, komunu hakoko. Upostolo Paulu wa soneha ndoco: “Helie wa kũlĩha ovisimĩlo via [Yehova] okuti o tẽla oku u longisa?” (1 Va Kor. 2:16) Olondaka Paulu a tukula ndeti, epulilo uprofeto Isaya a linga komanu vo koloneke viaye hati: “Helie wa longisa Yehova olondunge viovutima? Helie wa linga ondunguli yaye yoku u lungula?” (Isa. 40:13) Etambululo liaco lieli okuti, lomue o tẽla oku ci linga. Oku kapako alungulo a sangiwa Vovisonehua atiamẽla kolohuela, koku pindisa omãla, koku linga olomapalo, koku sandiliya akamba, koku talavaya, koku kala vakuacili, kuenda oku kuata ovituwa viwa, ci nena onima ya velapo! Omo liaco, ka tu ka tombi alungulo Embimbiliya. Momo, omanu ka va tẽla oku lisonguila lolondunge viavo muẽle. (Yer. 10:23) Ovo va siata oku pongolola alungulo avo, eci va limbuka okuti, ka a sungulukile. Embimbiliya li popia hati: “Ovisimĩlo viomanu, . . . viesanda.”​—Osa. 94:11.

12. Omanu vamue va seteka ndati oku nyõla Embimbiliya vokuenda kuanyamo alua?

¹² Uvangi ukuavo u lekisa okuti Suku yocili eye Ono Yembimbiliya, wa situluiwa vulandu womanu vana va setekele oku nyõla esapulo Liembimbiliya oco ka li ka pitĩle komanu. Kunyamo wo 168 O.Y., Soma umue ya va Suria o tukuiwa hati, Antioku Yakuãla, wa setekele oku sandiliya alivulu mu sangiwa Ocihandeleko ca Suku, oco a timĩhiwe. Ulume umue o tukuiwa hati, Dokelesianu una wa kala Onguluvulu Yuviali wo Roma, kunyamo wo 303 K.K., wa tuma oku nyõla ovitumãlo Akristão va enda oku lingila olohongele, loku timĩha Ambimbiliya avo. Elambalalo liaco lia amamako vokuenda kuanyamo alua. Noke, kunyamo wo 1.100, olopapa vietavo Liokatolika, via lambalala omanu vana va kala oku soneha Embimbiliya oco ka li ka sandekiwe kalimi a vanguiwa lomanu vakuavo. Ndaño okuti Satana kumue loloñame viaye va linga uyaki waco, pole, toke koloneke vilo tu kuete Embimbiliya. Yehova ka tavele okuti omunu umue imũla ombanjaile a eca komanu.

UVANGI WA TAVISA OMANU VALUA

13. Uvangi upi tu pondola oku tukula u lekisa okuti Embimbiliya lia tunda ku Suku?

¹³ Ovina vikuavo vi lekisa okuti Embimbiliya lia tunda ku Suku vievi: Li kuete ocisimĩlo cimuamue, kuenda li lombolola ciwa ovina viatiamẽla kuloño. Uvangi ukuavo wa kuatisa omanu oku tava okuti Embimbiliya lia tunda ku Suku, oku tẽlisiwa kuovitumasuku, lelitokeko liovisimĩlo vi sangiwamo, kuenda li popia ocili. Olio, li kuete unene woku pongolola ovituwa viomanu, asapulo aco ocili, kuenda olio lika li tambulula apulilo a lingiwa kefetikilo liocipama cilo kocinimbu catete. Konomuisa ovina via kuatisa omanu vamue oku tava okuti, Embimbiliya ondaka ya Suku.

14-16. (a) Nye ca vetiya omanu vamue ndeci, ukuetavo lio Musulumanu, lio Hindu, kuenda umue ka tavele ku Suku, oku tava okuti, Embimbiliya Ondaka ya Suku? (b) Uvangi upi o sukila oku tukula poku kundila omanu oco va tave okuti Embimbiliya lia tunda ku Suku?

¹⁴ Ulume umue o tukuiwa hati, Anwar b, wa kulila vetavo lio Musulumanu kofeka yimue yo Vocakati co Kutundilo wekumbi. Osimbu a kala ko Amerika yo Konano, Olombangi Via Yehova via endele konjo yaye oku u kundila. Eye wa popia hati: “Sia solele atavo ana a litukula hati Akristão, omo Liuyaki wa kala pokati kavo, kuenda oku Kangisa omanu loku va ponda. Omo okuti ndi kuete  osiata yoku kũlĩha ovina vimue, nda tava oku lilongisa Embimbiliya.” Noke liotembo yimue, Anwar wa tiukila kofeka yavo, kuenje, ka ponduile vali oku lisanga Lolombangi Via Yehova. Eci a ilukila ko Europa, wa fetika vali oku lilongisa Embimbiliya, kuenje, wa popia hati: “Oku tẽlisiwa kuovitumasuku lelitokeko viovisimĩlo vi sangiwa Vovisonehua vi Kola, kuenda ocisola ci kasi pokati kafendeli va Yehova, kua ndi vetiya oku tava okuti, Embimbiliya, Ondaka ya Suku.” Kuenje, kunyamo wo 1998, manji Anwar wa papatisiwa.

¹⁵ Tunde eci ukãi umue o tukuiwa hati, Asha kumue lepata liaye va siapo etavo lio Indu, pa pita ale ekũi lepandu kanyamo. Eye wa popia hati: “Nda lingaile lika olohutililo eci ndi kala vonembele, ale ceci ndi liyaka locitangi cimue. Pole, lalimue eteke nda simĩle okuti, kuli Suku umue wa siata oku ndi tata ciwa.” Eye wa amisako hati: “Eci Olombangi Via Yehova vieyile konjo yange, omuenyo wange wa pongoloka calua.” Omo lioku lilongisa Embimbiliya, wa fetika oku kuata ukũlĩhĩso, kuenje, wa linga ekamba lia Suku. Nye co vetiya oku tava okuti Embimbiliya lia tunda ku Suku? Eye wa lombolola hati: “Embimbiliya lia tambulula apulilo nda enda oku linga. Lia ndi kuatisa oku kolela Suku okuti, si sukila vali oku enda vonembele oku fendela oviteka loku vi kekamẽla.”

¹⁶ Ukãi umue o tukuiwa hati, Paula, wa kulila vetavo Liokatolika. Pole, eci a linga ufeko, ka tavele vali okuti, kuli Suku. Noke weya oku pita lulandu umue. Eye wa popia hati: “Nda lisanga lukuenje umue wa kala ekamba liange okuti, tunde eci tua litepa, pa pitile olosãi vimue. Otembo yaco, kua kala ocisoko cimue ci tukuiwa hati, Hippie okuti, amalẽhe vamue ka va yonguile oku kuata ovituwa viwa, loku tumĩliwa lakulu. Eci nda mola okuti, wa linga apongoloko awa, okuti wa teta esinga liaye, kuenda wa yela ciwa, ndo pulisa ndoco: ‘Nye ca pita love, kuenda pi wa kala?’ Eye wa ndi tambulula hati, Olombangi Via Yehova, via kala oku u longisa Embimbiliya, noke, wa ndi kundilavo.” Omo okuti Ovisonehua vi kuete unene woku pongolola omuenyo womanu, ndaño Paula ka tavele ku Suku, pole, wa tava okuti, Embimbiliya Ondaka ya Suku.

‘ONDAKA YOVE OYO OVELA YOLOMÃHI VIANGE’

17. Oku tanga Ondaka ya Suku eteke leteke, loku sokolola ovina wa tanga, ci nena onima yipi?

¹⁷ Embimbiliya ombanjaile yimue yi komõhisa Yehova a eca lekuatiso liespiritu sandu liaye. Omo liaco, sanjukila oku tanga Embimbiliya oloneke viosi. Nda wa ci linga ocisola cove ku Suku, Usovoli Wembimbiliya, ci li vokiya. (Osa. 1:1, 2) Olonjanja viosi osimbu handi kua fetikila oku tanga Embimbiliya, likutilila ku Suku loku pinga espiritu liaye oco li ku songuile. (Luka 11:13) Omo okuti Vembimbiliya mu sangiwa ovisimĩlo via Suku, nda wa sokolola ovina wa tanga, o kuata ovisimĩlo via Suku.

18. Momo lie o yonguila oku amamako oku lilongisa ovina vi sangiwa Vembimbiliya?

¹⁸ Osimbu amamako oku kuata ukũlĩhĩso wa suapo Wembimbiliya, kapako ovina o kasi oku lilongisa. (Tanga Osamo 119:105.) Oku tanga Embimbiliya, ku sokisiwa loku litala volumuĩlo. Nda wa limbuka okuti o sukila oku linga apongoloko amue, ci linga lonjanga. (Tia. 1:23-25) Talavaya Londaka ya Suku ndosipata yoku teyuila ekolelo liove, kuenda teta alongiso osi esanda kovitima viambombe. (Va Efe. 6:17) Osimbu amamako oku ci linga, eca olopandu kovaprofeto kuenda kalume vana va soneha esapulo Liembimbiliya okuti, “va vetiyiwa lespiritu sandu.”

[Atosi pombuelo yamẽla]

[Apulilo Elilongiso]

[Olodaka kemẽla 29]

Oku tanga Embimbiliya eteke leteke, ci vokiya ocisola cove Kusovoli walio

[Elitalatu kemẽla 26]

Tu limbuka omunu wa tuma ukanda omo lionduko yaye a soneha vukanda waco