Mme Mbụme Oro Mme Andikot Ẹbụpde
Mme Mbụme Oro Mme Andikot Ẹbụpde
Ini ewe ke Ukara Ererimbot Eke Britain ye America akakabade edi ọyọhọ ukara ererimbot itiaba oro Bible eketịn̄de enịm?
▪ Akwa mbiet oro Edidem Nebuchadnezzar okokụtde idaha iban̄a, kpukpru ukara ererimbot. (Dan. 2:31-45) Enye ada aban̄a ition oro ẹkekarade ọtọn̄ọde ke eyo Daniel tutu ke ini iso, emi ẹkenyụn̄ ẹnen̄erede ẹnyene n̄kpọ ndinam ye ikọt Abasi.
Nte Daniel etịn̄de aban̄a akwa mbiet oro owụt ke Ukara Ererimbot Eke Britain ye America idikanke-kan Rome, edi ke ediwọwọrọ ito enye. Ke n̄kukụt oro, Daniel okụt ke ukwak ọtọn̄ọ ke ukot tutu esịm ikpat, ebe esịm nnuenukot. (Ke ikpat ye nnuenukot, ukwak abuaha ye mbateso.) * Oro owụt ke Ukara Ererimbot Eke Britain ye America ediwọrọ ito ukot ukwak. Nnennen se ikonyụn̄ itịbede edi oro. Britain, emi ekedide ikpehe Obio Ukara Rome, ama ọtọn̄ọ ndiwọrọ etop ke utịt utịt iduọk isua 1700. Ekem, United States ama akabade edi idụt emi ọwọrọde etop n̄ko. Edi ọyọhọ ukara ererimbot itiaba oro ẹketịn̄de ẹnịm ke Bible ikọwọrọke idi kan̄a. Ntak-a? Britain ye United States ikadianake kiet kan̄a inam n̄kpọ ke n̄wọrọnda usụn̄. Emi eketịbe ke ini akpa ekọn̄ ererimbot.
Etisịm ini oro, “nditọ obio ubọn̄” ẹma ẹsịn ifịk etieti, akpan akpan ke United States, ndien ibuot itieutom ofụri ererimbot mmọ okodu ke Brooklyn ke New York. (Matt. 13:36-43) Mbon oro ẹyetde aran ke ẹkesịn ifịk ẹkwọrọ ikọ ke mme idụt oro Obio Ukara Britain ẹkekarade. Ke ini akpa ekọn̄ ererimbot, ukara Britain ye America ẹma ẹdụk san̄asan̄a ediomi ke ini ẹken̄wanade ye mme asua mmọ. Ke ntak emi ekọn̄ oro akanamde mmọ ẹma idụt mmọ ẹkaha, mmọ n̄ko ẹma ẹsua mbon oro ẹkedide ubak mfri ndamban̄a “n̄wan” Abasi, ẹkpan mme n̄wed oro mmọ ẹkesiode, ẹnyụn̄ ẹkọbi mbon oro ẹkedade usụn̄ ke utom ukwọrọikọ.—Edi. 12:17.
Mmọdo, nte ntịn̄nnịm ikọ Bible owụtde, ukara ererimbot ọyọhọ itiaba ikọtọn̄ọke ke utịt utịt iduọk isua 1700 ke ini Britain ọkọtọn̄ọde ndiwọrọ etop. Edi ọkọtọn̄ọ ke ini usen Ọbọn̄ ọkọtọn̄ọde. *
[Mme Ikọ Idakisọn̄]
^ ikp. 4 Mbateso oro abuahade ye ukwak ada aban̄a mbon oro ẹdude ke idak Ukara Ererimbot Eke Britain ye America emi ebietde ukwak. Ke ediwak isua emi ẹbede, mbateso emi iyakke ukara emi ọsọn̄ odudu nte enye akpamade ndisọn̄.
^ ikp. 6 Se ẹnemede emi edi mme ukpụhọde oro ẹnamde ẹban̄a se ẹkenemede ke n̄wed Prọfesi Daniel, page 57, ikpehe ekikere 24 ye se ẹwụtde ke chart emi ẹdude ke page 56 ye 139.
[Ndise ke page 19]
Ẹma ẹkọbi nditọete itiaita emi ẹketode ibuot itieutom n̄ka Enyọn̄-Ukpeme ke June 1918
