Yuvu Y’atangi
Yuvu Y’atangi
O Luyalu lwa nz’amvimba lwa Anglo-Americana nkia ntangwa lwakituka se luyalu lwa nsambwadi luyikwanga muna ungunza wa Nkand’a Nzambi?
▪ E teke kiampwena kamona Nebukandesa wa Ntinu, ke kisunzulanga tuyalu twawonso twa nz’amvimba ko. (Dan. 2:31-45) E teke kiaki atinu tanu kaka kisunzulanga. Atinu awaya bayantika tuka muna tandu kia Daniele ye bakala ye wisa muna nkangu a Nzambi.
E mpila Daniele kasasila e teke kiaki isonganga vo o Luyalu lwa Nz’amvimba lwa Anglo-Americana mu luyalu lwa Roma lwatuka. Muna teke kiaki, Daniele wamona vo ndambu a tadi yayantikila muna nkwaka mia malu yamuna nlembo. (Kansi, e nlembo miasangwa tadi ye tûma.) * Ediadi disonganga vo Luyalu lwa Nz’amvimba lwa Anglo-Americana mu malu ma tadi ma teke lwadi tuka. O lusansu lutoma songanga e ziku kia diambu diadi. O luyalu lwa Grã-Bretanha lwakala muna wisa kia Luyalu lwa Nz’amvimba lwa Roma, lwayantika tundalala kuna mfoko a mvu 1.700. I bosi, e nsi a Estados Unidos yabaka kimpwanza. Kansi, muna ntangwa yayina o luyalu lwa nsambwadi lwa nz’amvimba luyikwanga muna ungunza wa Nkand’a Nzambi ke lwasikidiswa ko. Ekuma? E kuma kadi, luyalu lwa Grã-Bretanha ye Estados Unidos ke lwasalanga entwadi ko. Bayantika sala entwadi muna kolo kia Vit’Antete ya Nz’Amvimba.
Muna ntangwa yayina, “wan’a kintinu” basalanga ye fululu kiawonso muna zunga yayingi ya Estados Unidos. E vula diau diasina diasikidiswa muna mbanza Brooklyn, Nova York. (Mat. 13:36-43) Akuswa basalanga e salu kia umbangi muna nsi zakala muna wisa kia Luyalu lwa Nz’amvimba lwa Grã-Bretanha. Muna kolo kia Vit’Antete ya Nz’Amvimba, Grã-Bretanha ye Estados Unidos bakanga ekangu muna nwana ye mbeni zau. Muna kuma kia fu kia nzol’a nsi kiawokela muna ntangw’a vita, basia mpe kitantu mbongo a “nkento” a Nzambi. Basima nkanda miau yo sia mu pelezo awana bavitang’o ntu muna salu kia umbangi.—Lus. 12:17.
Mun’owu wa ungunza wa Nkand’a Nzambi, o luyalu lwa Grã-Bretanha lusunzulanga Luyalu lwa nsambwadi lwa Nz’amvimba ke lwayantika ko kuna mfoko a mvu 1.700. O luyalu lwalu lwayantika muna lubantiku lwa lumbu kia Mfumu. *
[Mvovo Vana Yand’a lukaya]
^ tini. 4 E tambi ina ndambu tadi, ndambu tûma, i tuyalu tuna entwadi ye Luyalu lwa Nz’amvimba lwa Anglo-Americana. Tuka kolo, e tûma diadi difilanga luyalu lwalu mu lembi songa nkuma ye wisa kiandi.
^ tini. 6 Elongi diadi disingikidi umbakuzi wina muna lukaya lwa 57 tini kia 24 kia nkanda Profecia de Daniel ye mvovo mina muna fwaniswa ina muna lukaya lwa 56 ye 139.
[Foto ina muna lukaya lwa 19]
Mpangi nana a vula diasina dia Mbangi za Yave basiwa mu pelezo muna ngonde a Yuni ya mvu a 1918
