पाठकहरूको प्रश्न
पाठकहरूको प्रश्न
एङ्ग्लो-अमेरिकी विश्वशक्ति बाइबल भविष्यवाणीको सातौं विश्वशक्तिको रूपमा कहिले देखापऱ्यो?
▪ राजा नबूकदनेसरले सपनामा देखेको धातुको विशाल मूर्तिले सबै विश्वशक्तिलाई चित्रण गर्दैन। (दानि. २:३१-४५) यसले परमेश्वरका जनहरूमाथि विशेष अर्थ राख्ने दानियलको समयदेखि यताको पाँचवटा विश्वशक्तिलाई मात्र चित्रण गर्छ।
दानियलले धातुको मूर्तिको वर्णन गरेअनुसार एङ्ग्लो-अमेरिकी विश्वशक्ति रोमबाटै उत्पन्न हुनेथियो, रोमलाई जितेर होइन। दानियलले मूर्तिको गोडा, खुट्टा र औंलामा फलाम देख्छन्। (तर खुट्टा र औंलामा भएको फलाम भने माटोसित मिसिएको छ।) a यस वर्णनले एङ्ग्लो-अमेरिकी विश्वशक्ति फलामको गोडाबाट निस्कने थियो भनेर सङ्केत गर्छ। यो वर्णन सही हो भनेर इतिहासले देखाउँछ। रोमी साम्राज्यको भागको रूपमा रहेको बेलायतले सन् १७०० को अन्ततिरदेखि प्रभुत्व जमाउन थाल्यो। पछि संयुक्त राज्य अमेरिका पनि शक्तिशाली भयो। तथापि, बाइबल भविष्यवाणीको सातौं विश्वशक्ति अझै अस्तित्वमा आएको थिएन। किन? किनकि यसबेलासम्म पनि बेलायत र संयुक्त राज्य अमेरिकाले सँगै मिलेर कुनै खास भूमिका खेलेका थिएनन्। तर प्रथम विश्वयुद्धताका भने तिनीहरूले त्यस्तो भूमिका खेले।
“राज्यका सन्तान”-हरूको मुख्यालय अमेरिकाको न्यु योर्कस्थित ब्रूक्लिनमा भएकोले त्यतिबेला तिनीहरू विशेषगरि अमेरिकामा सक्रिय थिए। (मत्ती १३:३६-४३) अभिषिक्त ख्रीष्टियनहरूले बेलायती साम्राज्यले प्रभुत्व जमाएका मुलुकहरूमा सक्रियताका साथ प्रचार गरिरहेका थिए। प्रथम विश्वयुद्धको दौडान बेलायत र अमेरिकाले आफ्नो राजनैतिक शत्रुसित लड्न विशेष सम्बन्ध गाँसे। साथै युद्धले गर्दा राष्ट्रियताको भाव सलबलाइरहेको अवस्थामा तिनीहरूले “स्त्री”-को सन्तानको भागप्रति घृणा प्रकट गरे। कसरी? स्त्रीका सन्तानहरूले प्रकाशन गरेका साहित्यहरूमा प्रतिबन्ध लगाएर अनि प्रचारकार्यमा नेतृत्व लिइरहेकाहरूलाई झ्यालखानामा हालेर।—प्रका. १२:१७.
बाइबल भविष्यवाणीअनुसार, सन् १७०० को अन्तमा बेलायत प्रभुत्वमा आँउदासम्म पनि सातौं विश्वशक्तिको स्थापना भएको थिएन। तर प्रभुको दिन सुरु हुँदा भने सातौं विश्वशक्ति खडा भयो। b
[फुटनोटहरू]
a फलामसित मिसिएको माटोले फलामरूपी एङ्ग्लो-अमेरिकी विश्वशक्ति भित्रैका तत्त्वहरूलाई बुझाउँछ। समय बित्दै जाँदा, माटोरूपी त्यस्ता तत्त्वहरूले यस विश्वशक्तिलाई पहिला जत्तिको शक्तिशाली हुन दिएको छैन।
b यो जानकारी दानियलको भविष्यवाणी किताब, पृष्ठ ५७, अनुच्छेद २४ अनि पृष्ठ ५६ र १३९ को तालिकामा छलफल गरिएको जानकारीभन्दा नयाँ जानकारी हो।
[पृष्ठ १९-मा भएको चित्र]
जून १९१८ मा वाचटावर मुख्यालयका आठ जना भाइहरूलाई झ्यालखानामा हालियो
